“Modiro wa Lena o na le Moputso”

GE KGOŠI Asa a eteletše pele madira a gagwe, o kitimela ka moeding woo o išago tlase go tloga dithabeng tša Judea go ya molaleng o lego lebopong. Moo moedi o thomago go bulega gona, Asa o a emanyana gomme a kgotsa. Kua tlasenyana ga gagwe go na le mešaša ya manaba a gagwe—madira a mantšintši! Madira ao a Baethiopia a swanetše go ba a be a le milione ka palo. Madira a Asa a be a le ka godingwana ga seripa sa palo yeo.

Ge Asa a be a lebeletšane le kgonagalo yeo ya gore a tsene ntweng, ke eng seo a se dirago go feta dilo tše dingwe ka moka? Na o tshwenyega ka go nea balaodi ba madira a gagwe ditaelo? Na o tshwenyega ka go kgothatša madira a gagwe? Na o tshwenyega ka go ngwalela ba lapa la gagwe mangwalo? Aowaowaa! Nakong ya ge a lebeletšane le boemo bjo, Asa o ile a rapela.

Pele ga ge re ka hlahloba thapelo yeo le go bona seo se ilego sa direga tiragalong ye, ela hloko semelo sa Asa. Ke eng seo se ilego sa dira gore a gate mogato ka tsela yeo? Na o be a ka letela gore Modimo a mo thuše? Pego ye ya Asa e re botša eng ka tsela yeo Jehofa a šegofatšago mediro ya bahlanka ba Gagwe?

PEGO YA ASA

Nywaga e 20 ka morago ga go arogana ga mebušo e mebedi ya Isiraele, Juda e be e sentšwe ka mo go feletšego ke mekgwa ya boheitene. Ge Asa e eba kgoši ka 977 B.C.E., gaešita le kgoro ya mošate e be e šilafaditšwe ke borapedi bja Bakanana bja medimo ya pelego. Eupša pego e buduletšwego ya pušo ya Asa e bolela gore “o ile a dira se sebotse le se se lokilego mahlong a Jehofa Modimo wa gagwe.” Asa “o ile a tloša dialetare dišele le mafelo a phagamego, a pšhatla dikokwane tše kgethwa le go rema dikota tše kgethwa.” (2 Dikor. 14:2, 3) Le gona, nakong ya pušo ya gagwe Asa o ile a fediša “banna bao e bego e le bagweba-ka-mmele ba tempeleng,” bao ba bego ba dira bosodoma mola ba ipitša badumedi. Asa ga se a fediša feela dilo tšeo. O ile a ba a kgopela batho ba setšhaba gore “ba tsome Jehofa Modimo wa borakgolokhukhu ba bona” gomme ba boloke “molao le ditaelo” tša Gagwe.—1 Dikg. 15:12, 13; 2 Dikor. 14:4.

Ka ge Jehofa a be a thabišitšwe ke phišego ya Asa ka borapedi bja therešo, o ile a mo putsa ka nywaga e mentši ya khutšo. Ke ka baka leo kgoši yeo e be e ka bolela gore: “Re tsomile Jehofa Modimo wa rena. Re tsomile, gomme yena o re neile khutšo ka gohle.” Setšhaba se ile sa diriša sebaka seo gabotse ka gore se tiiše metse ya mmušong wa Juda. Pego ya Beibele e re: “Ba aga gomme ba atlega.”—2 Dikor. 14:1, 6, 7.

NTWENG

Ka baka la pego ye ya Asa, ga se ra swanela go makatšwa ke gore o ile a rapela ge a be a lebane le madira ao a mantšintši ao go boletšwego ka ona ka Mangwalong. Asa o be a tseba gore Modimo o putsa bao ba bontšhago tumelo go yena. Ge kgoši yeo e be e rapela, e ile ya kgopela Jehofa gore a e thuše. Asa o be a lemoga gore ge e ba a ithekgile ka Modimo gomme Modimo le yena a mo thekga, gona go be go sa tshwenye gore madira ao ke a mantši goba a matla gakaakang. Leina la Jehofa le be le akaretšwa mo ntweng ye, ka go re’alo Asa o ile a lopa Modimo. Kgoši yeo e ile ya rapela ya re: “Hle Jehofa Modimo wa rena, re thuše, ka gobane re ithekgile ka wena, gomme re tlile go lwa le lešaba le ka leina la gago. Wena Jehofa, o Modimo wa rena. Anke o se dumelele motho wa nama le madi a go feta ka matla.” (2 Dikor. 14:11) Seo se be se swana le gore o be a re: ‘Go hlaselwa ga rena ke Baethiopia go swana le ge go hlaselwa wena, Jehofa. O se ke wa dumelela leina la gago le gobošwa ka go tlogela  batho ba fokolago gore ba fenye bao ba bitšwago ka leina la gago.’ Ka baka leo “Jehofa [o ile] a fenya Baethiopia pele ga Asa le pele ga Bajuda, ke moka Baethiopia ba tšhaba.”—2 Dikor. 14:12.

Lehono, batho ba Jehofa ba lebeletšana le baganetši ba bantši ba matla. Re ka se lwe le bona ka dibetša tša kgonthe goba ra lwa le bona re le lefelong le itšego moo go lwelwago dintwa tša kgonthe. Lega go le bjalo, re ka kgodišega gore Jehofa o tla putsa bahlanka ba gagwe ka moka bao ba botegago gore ba fenye bao ba ba tsogelago matla ntweng ya moya ka go hlasela leina la gagwe. Dintwa tšeo re di lwago ka noši di ka akaretša go katanela ga rena go ganetša moya o atilego wa go hlepha boitshwarong, go lwantšha mafokodi a rena goba go šireletša malapa a rena ditutuetšong tšeo di šilafatšago. Ka gona go sa šetšwe gore re lebeletšana le mathata afe, re ka kgothatšwa ke thapelo ya Asa. Phenyo ya gagwe e be e bolela gore le Jehofa o fentše. E bontšhitše seo se ka letelwago ke bohle bao ba ithekgago ka Modimo. Ga go motho yo a ka lwago le Jehofa gomme a fenya.

KGOTHATŠO LE TEMOŠO

Ge Asa a be a boa ntweng, o ile a gahlanetšwa ke Asaria. Moporofeta yo o ile a mo kgothatša le go mo lemoša ka taba e itšego a re: “Hle wena Asa le Juda ka moka gotee le Benjamini, nkweng! Jehofa o na le lena ge feela le ka ba le yena; ge e ba le mo tsoma, o tla dira gore le mo hwetše, eupša ge e ba le mo tlogela, le yena o tla le tlogela. Ebang le sebete gomme le se ke la hlephiša diatla tša lena, ka gobane modiro wa lena o na le moputso.”—2 Dikor. 15:1, 2, 7.

Mantšu a a ka matlafatša tumelo ya rena. A bontšha gore Jehofa o tla ba le rena ge feela re mo hlankela ka potego. Ge e ba re mo hlabela mokgoši wa gore a re thuše, re ka kgodišega gore o a re kwa. Asaria o itše: “Ebang le sebete.” Gantši go nyakega sebete gore motho a dire se se nepagetšego, eupša re a tseba gore re ka dira seo ge e ba re thušwa ke Jehofa.

Makgolo wa Asa e lego Maaka o be a dirile “modingwana wa go šišimiša wo o dirišwago borapeding bja kota e kgethwa,” gomme Asa o be a lebane le bothata bjo bogolo bja gore a mo tloše maemong a bogoši a go ba “mohumagadi.” Asa o ile a mo tloša maemong ao gomme a fiša modingwana wa gagwe. (1 Dikg. 15:13) Asa o ile a šegofatšwa ka baka la maikemišetšo a gagwe le sebete seo a se bontšhitšego. Le rena re swanetše gore ka mehla re kgomarele Jehofa le ditekanyetšo tša gagwe tša go loka go sa šetšwe gore ba leloko ba botegela Modimo goba ga ba mmotegele. Ge e ba re dira seo, Jehofa o tla re šegofatša ka baka la ge re botega.

Karolo ya moputso wa Asa e bile go bona Baisiraele ba bantši go tšwa mmušong wa bahlanogi wa ka leboa ba kgeregela Juda ge ba lemoga gore Jehofa o be a ema le yena. Ba ile ba tšeela borapedi bjo bo sekilego godimo kudu moo ba ilego ba kgetha go tlogela magae a bona e le gore ba tle ba phele le bahlanka ba Jehofa. Ke moka Asa le Juda ka moka ba ile ba thabela go dira “kgwerano ya gore ba tla tsoma Jehofa Modimo wa borakgolokhukhu ba bona ka dipelo tša bona ka moka le ka meoya ya bona ka moka.” Seo se ile sa feleletša ka eng? Modimo o ile “a dira gore ba mo hwetše; Jehofa yena [o ile] a ba nea khutšo ka gohle.” (2 Dikor. 15:9-15) Re tloga re thaba kudu ge barati ba toko ba amogela borapedi bjo bo sekilego bja Jehofa!

Lega go le bjalo, go be go bile go na le mantšu a hlobaetšago ao moporofeta Asaria a bego a a boletše. O be a lemošitše gore: “Ge e ba le . . . tlogela [Jehofa], le yena o tla le tlogela.” Anke le ka mohla seo se se ke sa re diragalela, ka gobane ditlamorago tša gona di  kweša bohloko! (2 Pet. 2:20-22) Mangwalo ga a re botše lebaka leo Jehofa a ilego a botša Asa temošo ye, eupša kgoši yeo e paletšwe ke go e latela.

“WENA O DIRILE TŠA BOŠILO”

Ngwageng wa bo-36 wa pušo ya Asa, Kgoši Baasha wa Isiraele o ile a hlohla Juda. Mohlomongwe e le gore a thibele setšhaba sa gagwe gore se se kgomarele Asa le borapedi bjo bo sekilego, Baasha o ile a thoma go ageletša motse wa Rama woo o bego o le mollwaneng, woo o bego o le bokgole bja dikhilomithara tše seswai ka leboa la Jerusalema. Go e na le gore Asa a kgopele thušo go Modimo go etša ge a ile a dira bjalo nakong ya ge a lebane le tlhaselo ya Baethiopia, o ile a nyaka thušo go batho. O ile a romela mpho go kgoši ya Siria, a e kgopela gore e hlasele mmušo wa ka leboa wa Isiraele. Ge Basiria ba hlasela mmušo woo, Baasha o ile a tšhaba Rama.—2 Dikor. 16:1-5.

Jehofa o ile a se thabele seo Asa a se dirilego, gomme o ile a romela moporofeta Hanani gore a mmotše seo. Ka ge a be a tseba kamoo Modimo a ilego a swaragana ka gona le Baethiopia, Asa nkabe a ithutile gore “mahlo a [Jehofa] a lebeletše gohle lefaseng ka moka gore a bontšhe matla a gagwe bakeng sa bao ba mmotegelago ka dipelo ka moka.” Mohlomongwe Asa o ile a eletšwa gampe goba a nagana gore Baasha le madira a gagwe ba be ba sa tshwenye gakaalo gomme a ipotša gore o be a ka swaragana le boemo bjoo ka tsela ya gagwe. Go sa šetšwe seo se ka bego se ile sa direga, Asa o ile a nagana dilo ka tsela ya nama gomme a palelwa ke go ithekga ka Jehofa. Hanani o ile a re go yena: “Wena o dirile tša bošilo tabeng ye, ka gona go tloga bjale go ya pele o tla welwa ke dintwa.”—2 Dikor. 16:7-9.

Asa o ile a arabela gampe. O ile a galefa gomme a tsenya moporofeta Hanani ka setokising. (2 Dikor. 16:10) Na mohlomongwe Asa a ka be a ile a ipotša gore: ‘Na nka kgalengwa mola ke na le nywaga e mentši ke hlankela ka potego?’ Ka ge ga bjale a be a šetše a gotše, na a ka ba a be a lahlegetšwe ke tsela ya go nagana gabotse? Beibele ga e re botše.

Ngwageng wa bo-39 wa pušo ya gagwe, Asa o ile a tsogelwa ke bolwetši bja maoto. Pego yeo e re: “Gaešita le bolwetšing bjoo bja gagwe o ile a se tsome Jehofa, eupša a tsoma dingaka.” Ka nako yeo, go bonagala Asa a be a hlokomologile bomoya bja gagwe. Go bonagala gore nakong ya ge a be a le boemong bjoo e bile a nagana ka tsela yeo, o ile a hwa ngwageng wa bo-41 wa pušo ya gagwe.—2 Dikor. 16:12-14.

Lega go le bjalo, go bonagala diphošo tšeo Asa a di dirilego di ile tša fetwa ke dika tša gagwe tše dibotse le go fišegela ga gagwe borapedi bjo bo sekilego. Ga se a ka a kgaotša go hlankela Jehofa. (1 Dikg. 15:14) Ka gona, re ka ithuta eng bophelong bja gagwe go tšwa go se? Bo ka re thuša go lemoga gore re swanetše go naganišiša kamoo Jehofa a re thušitšego ka gona nakong e fetilego, ka gobane go dira ga rena seo go ka re tutueletša gore re rapelele gore a re thuše ge re lebeletšana le diteko tše difsa. Le gona, ga se ra swanela go ipotša gore ga re nyake tayo ya Mangwalo ge e ba re hlanketše Modimo ka potego ka nywaga e mentši. Go sa šetšwe gore re botegile ka nako e kaakang, Jehofa o tla re kgalema ge e ba re dira phošo. Re swanetše go amogela phošollo e bjalo ka moya o boleta e le gore re holege. Se bohlokwa le go feta, Tatago rena wa legodimong o tla ba le rena ge feela re ka ba le yena. Mahlo a Jehofa a lebeletše gohle lefaseng gore a bone bao ba mmotegelago. O ba putsa ka go diriša matla a gagwe go ba thuša. Jehofa o ile a dira seo go Asa, le rena A ka re direla se se swanago.

[Ntlhakgolo go letlakala 9]

Jehofa o putsa bahlanka ba gagwe ba botegago bao ba lwago ntwa ya moya

[Ntlhakgolo go letlakala 10]

Go nyakega sebete gore motho a dire se se nepagetšego mahlong a Jehofa