‘Natumangan Ka ed Gagawaen Mo’

MAPMAPLES ya idadaulo nen Arin Asa so armada to paleksab ed kapalandeyan na Judea paonlad patar ya asingger ed baybay. Sikatoy ontutunda labat ed saray maawang a dalan pian manpainawa. Walad arapan to so sakey milyon ya armadan Etiope. Talagan amayamay so kalaban da! Balet, say armada nen Asa et masulok labat a kapaldua na satan a bilang.

Diad satan a situasyon, anto kasi unonan gawaen nen Asa? Iganggan to ray heneral to? Pabiskegen toy armada to? Sulatan toy pamilya to? Andi! Sikatoy nampikasi.

Antis tayon pantongtongan so pikakasi to tan amtaen no antoy agawa, aralen tayo nin unona no anton klasen too si Asa. Antoy rason akin et ontan so ginawa to? Kasin dugay inkerew toy tulong ed Dios? Antoy naaralan tayod si Asa nipaakar ed panamendisyon nen Jehova ed gagawaen na saray lingkor To?

INKATOO NEN ASA

Legan na 20 taon, kayarin naapag so panarian na Israel, say Juda et sigpot lan naimpluensiaan na paganon kagagawa. Sanen nagmaliw ya ari si Asa nen 977 B.C.E., anggan say palasyo et naimpluensiaan lay panagdayew ed dios na panag-anak na saray Canaanita. Balet say apuyanan ya awaran na impanuley nen Asa et mangibabagan “ginawa to so maong dia ed saray mata nen Jehova a Dios to. Tan inekal to so saray sangkaili ya altar, tan saray atagey a pasen, tan inggeba to so saray seklang.” (2 Awa. 14:2, 3) Impaekal met nen Asa ed panarian na Juda iray “lalakin balangkantis ed templo” a mangaagamil na sodomiya lapud relihyon. Aliwan satan labat so ginawa nen Asa. Pinaseseg to met iray totoo ya “anapen da si Jehova, a Dios na saray atateng da, tan gawaen da so tunong tan say ganggan.”​—1 Ara. 15:12, 13, NW; 2 Awa. 14:4.

Lapud aliketan si Jehova ed seseg nen Asa parad dugan panagdayew, tinumangan toy Asa na kaligenan ed dakel a taon. Kanian nibaga na Ari: “Inanap tayo si Jehova a Dios tayo; sikato so inanap tayo, tan angiter ed sikatayo na painawa ed amin a diking.” Inusar na totoo iyan pankanawnawa pian pabiskegen iray syudad na panarian na Juda. “Nampaalagey ira tan inmaligwas ira,” so inkuan na salaysay.​—2 Awa. 14:1, 6, 7.

PASEN NA PANLABANAN

No ibase ed impanbilay nen Asa, agtayo la pankelawan no akin ya sikatoy nampikasi sanen nipaarap ed sankarakelan ya armadan abitla ed Kasulatan. Amta nen Asa ya bendisyonan na Dios iray manmamatalek ed sikato. Diad pikakasi to et sikatoy kinmerew na tulong ed si Jehova. Amta to ya no sikatoy manmatalek tan tulongan na Dios, agla importante no panon karakel o kabiskeg iray kalaban to. Nalalanor so ngaran nen Jehova ed sayan laban, kanian si Asa et kinmerew na tulong ed Dios. Oniay impikasi to: “Tulongan mo kami komon, O Jehova a Dios mi, ta manmatalek kami ed sika, tan dia ed ngaran mo onla kami sumpa ed saya a karaklan. O Jehova, sika so Dios mi, agmo iyabuloy komon a say too ontalona sumpa ed sika.” (2 Awa. 14:11) Singa to imbagan: ‘Aman Jehova say iyataki na saray Etiope et isusumpa ed  ngaran mo. Agmo aabuloyan a nabalaw so ngaran mo diad pakatalo na saray ontatawag ed ngaran mo.’ Kanian, “si Jehova kinabil to so saray Etiope ed arap nen Asa, tan ed arap na Juda, et saray Etiope binmatik ira.”​—2 Awa. 14:12.

Saray lingkor nen Jehova natan et nipapaarap met ed mabiskeg iran kalaban. Agtayo ra labanan panamegley na literal ya armas diad pasen na labanan. Balet makaseguro tayon panaloen nen Jehova so amin a matoor ya milalaban ed espiritual parad ngaran to. Wadtan lay pansasagpot tayon labanay imoralidad, say mismon kakapuyan tayo, odino pian protektaay pamilya tayo ed saray mauges ya impluensya. Balet antokaman a subok so nipaarap ed sikatayo, napaseseg tayod pikakasi nen Asa. Say pananalo to et pananalo nen Jehova. Ipapanengneng na saya no antoy nailaloan na amin a manmamatalek ed Dios. Anggapoy toon manuley a makatalo ed si Jehova.

PANAMASESEG TAN PASAKBAY

Kapawil ton akilaban, akatongtong toy Azarias. Sikatoy pinaseseg tan pinasakbayan na sayan propeta ya: “Denglen yo ak, Asa, tan amin a Juda tan Benjamin. Si Jehova wala ed sikayo, leleg ya wala kayo ed sikato, et no sikato so anapen yo, sikato so naromog yo, balet no sikato so ikaindan yo, sikayo so ikaindan to . . . Manpabiskeg kayo, tan saray lima yo ag-ira komon onkapuy, ta say gawa yo natumangan.”​—2 Awa. 15:1, 2, 7.

Napabiskeg na sarayan salita so pananisia tayo. Papaneknekan na saraya ya tulongan itayo nen Jehova no mansiansia tayon matoor ed sikato. No onkerew tayo na tulong, seguradon dengelen to tayo. “Manpabiskeg kayo,” so inkuan nen Azarias. Talagan kaukolay inkakpel pian gawaey duga, balet nagawaan tayo iya diad tulong nen Jehova.

Lapud say bai nen Asa a si Maaca et nanggawa na “makadimla a talintao,” sikatoy nipaarap ed mairap a situasyon, say pangekal ed “inkareyna” na bai to. Atalonaan to itan a subok tan pinoolan to iman a talintao. (1 Ara. 15:13) Abendisyonan si Asa lapud determinasyon tan pakpel to. Singa sikato, kaukolan met ya determinado tayon unorey Jehova tan saray matunong ya estandarte to, manmatoor man ed Dios odino andi iray kakanayon tayo. No ontan so gawaen tayo, tumangan itayo nen Jehova.

Sakey ed saray tumang a naawat nen Asa et say impakanengneng tod dakel ya Israelitan nanlapud apostatan amianen a panarian ya binmasil ed Juda lapud amoria dan si Jehova et walad sikato. Talagan inapresya day dugan panagdayew ta tinaynan da ray abung da pian manbilay kaiba iray lingkor nen Jehova. Si Asa tan amin a taga Juda et malikeliket ya ‘akisipan a mananap ed si Jehova a Dios na saray atateng da diad simoon a puso ra tan simoon a kamarerwa ra.’ Antoy resulta? ‘Aromog day Jehova tan inikdan to ra na painawa ed saray kakabusol da.’ (2 Awa. 15:9-15) Talagan maliket tayo sano awaten na saray mangaaro ed inkatunong so dugan panagdayew ed si Jehova!

Balet, wala so pasakbay ed imbaga nen propeta Azarias. Oniay inkuan to: “No sikato [Jehova] so ikaindan yo, sikayo so ikaindan to.” Agkomon itan nagawad sikatayo ta makapasinagem  so pansumpalan na satan! (2 Ped. 2:20-22) Ag-ibabaga na Kasulatan no akin ya inter nen Jehova itan a simbawa ed si Asa, balet ag-itan inunor na ari.

“KINMIWAS KAN MAKULANGKULANG”

Diad koma 36 a taon na impanari nen Asa, say ari na Israel a si Baasa et linma a milaban ed Juda. Pian napugeran iray uuleyan to a manmatoor ed si Asa tan ed dugan panagdayew, pinabiskeg nen Baasa iray ketegay syudad na Rama, waloran kilometro manlapud Jerusalem. Imbes ya onkerew na tulong ed Dios a singa nen nipaarap ed iyataki na saray Etiope, kinmerew na tulong si Asa ed too. Pinawitan to na regalo so ari na Sirya tan kinerew ton atakien day amianen a panarian na Israel. Sanen inataki na saray taga Sirya si Baasa a walad Rama, sikatoy inmatras.​—2 Awa. 16:1-5.

Imbaki nen Jehova si Hanani pian ipaamtan sikatoy ag-aliketan ed ginawa nen Asa. Lapud impanulong ed sikato nen Jehova sumpad saray Etiope, amoria komon nen Asa ya “saray mata nen Jehova et onnenengneng ed interon dalin pian ipatnag toy biskeg to parad saramay nagnap so puso rad sikato.” Nayarin akaawat si Asa na aliwan makabat a simbawa odino impasen ton agmet kaukolan a takotan si Baasa tan say armada to, tan inisip ton manalo ed dilin pakayari to. Antokaman so rason, nanmatalek si Asa ed too, imbes a diad si Jehova. “Kinmiwas kan makulangkulang,” so imbaga nen Hanani, “kanian manlapud natan et wala ray miguerra ed sika.”​—2 Awa. 16:7-9, NW.

Sinmanok si Asa, kanian impakulong toy propeta Hanani. (2 Awa. 16:10) Isipen kasi nen Asa ya, ‘Kasin kaukolan ko ni simbawa anta abayag ak lan nanmatoor?’ Natan ta matatken la, kasin pikewet lay panagkatunongan to? Ag-itan ibabaga na Biblia.

Diad koma 39 a taon na uley nen Asa, sikatoy awalaan na graben sakit ed sali. ‘Anggan sanen nansakit agto inanap si Jehova, noagta saray managtambal,’ so kuan na Biblia. Diad saman et nagmaliw lan mapaulyan si Asa ed espiritualidad to. Ontan so kipapasen nen Asa sanen sikatoy inatey nen koma 41 a taon na uley to.​—2 Awa. 16:12-14.

Anggaman ontan, saray maabig ya kualidad tan seseg nen Asa parad dugan panagdayew et mas nanonotan nen saray agawaan ton lingo. Sikatoy agbalot tinmundan nanlingkor ed si Jehova. (1 Ara. 15:14) Antoy naaralan tayod istorya na bilay to? Natulongan itayo na satan a nonoten so impanulong la nen Jehova ed sikatayo. Diad ontan, napakiwas itayon onkerew lamet na tulong ed sikato diad pikakasi sano wala ray balon problema. Balet, agtayo iisipen a lapud abayag tayo lan manmamatoor ed Dios et agtayo la kaukolan so Makasulatan iran simbawa. Anggano abayag tayo lan manlilingkor ed si Jehova, disiplinaen to itayo no mankasalanan tayo. Pian nagunggonaan tayo, kaukolan a mapaabeba tayon awaten iratan. Sankaimportantian ed amin, ag-itayo ikaindan na Ama tayon walad tawen no sikatoy agtayo ikaindan. Say mata nen Jehova et walad amin a pasen pian tulongan iramay matoor ed sikato. Diad panamegley na pakayari to, tumangan to ra. Ginawa itan nen Jehova ed si Asa, tan seguradon gawaen to met itan ed sikatayo.

[Blurb ed pahina 9]

Panaloen nen Jehova so amin a matoor ya milalaban ed espiritual

[Blurb ed pahina 10]

Kaukolan so inkakpel pian nagawaay duga diad pakanengneng nen Jehova