‘An Iyo Buhat Pagbabalosan’

HI Asa nga nag-uuna ha iya kasundalohan nag-apura paglugsad ha hilarom nga walog tikang ha kabukiran han Juda tipakadto ha kapatagan ha ligid han baybayon. Pag-abot niya ha mas haluag nga bahin han walog, inundang hiya ngan natigdaan. Ha ubos, iya nakita an kampo han kaaway—ngan daku gud ito! An Etiopiahanon nga kasundalohan posible nga usa ka milyon. An kasundalohan ni Asa sobra la hin gutiay ha katunga han ira kadamu.

Tungod kay maatubang hin pakiggirra, ano an siyahan nga ginbuhat ni Asa? Ginhatagan hin instruksyon an iya mga heneral? Gindasig an iya kasundalohan? Ginsuratan an iya pamilya? Diri gud! Hiton makuri nga kahimtang, hi Asa nag-ampo.

Antes naton usisahon ito nga pag-ampo ngan an nahitabo hito nga higayon, usisahon anay naton kon ano nga klase hin tawo hi Asa. Kay ano nga sugad hito an iya ginbuhat? Makatadunganon ba nga maglaom hiya nga bubuligan hiya han Dios? Ha asoy may kalabotan kan Asa, ano an aton hibabaroan mahitungod ha paagi han pagbendisyon ni Jehova ha ginbubuhat han Iya mga surugoon?

AN KASAYSAYAN NI ASA

Durante han 20 ka tuig katapos mabahin an Israel ha duha nga ginhadian, an Juda bug-os na nga naimpluwensyahan han pagano nga pagsingba. Han nagin hadi hi Asa han 977 B.C.E., bisan an aadto ha palasyo han hadi naimpluwensyahan han pagsingba ha mga dios han pagkamabungahon nga ginsisingba han mga Kanaanhon. Kondi an giniyahan nga rekord han pagmando ni Asa nasiring nga hiya “nagbuhat hadton maopay ngan matadong ha mga mata ni Jehova an iya Dios.” Iya “pinanguha an lain nga mga halaran, ngan an higtaas nga mga lugar, ngan pinamulod an mga harigi, ngan pinangutod an mga Asarim,” o sagrado nga mga poste. (2 Kron. 14:2, 3) Ginpaiwas liwat niya an ‘kalalakin-an nga maraot an dungog [mga puta] nga nag-aalagad didto han pagano nga mga dapit hin pagsingba,’ nga nagbubuhat hin homoseksuwalidad tungod han relihiyon. Diri la ito an ginhimo ni Asa. Gin-aghat liwat niya an katawohan nga ‘pangitaon hi Jehova, an Dios han ira mga amay,’ ngan buhaton an ‘balaud ngan sugo’ han Dios.—1 Hadi 15:12, 13, Maopay nga Sumat; 2 Kron. 14:4.

Nalipay hi Jehova han kadasig ni Hadi Asa ha tinuod nga pagsingba salit Iya hiya ginbendisyonan hin kamurayawan hin pipira ka tuig. Salit nakagsiring hi Asa: “Nangita kita kan Jehova nga aton Dios; pinangita naton hiya, ngan iya kita tinagan hin kapahuwayan ha tagsa nga ligid.” Ginsalingabot han katawohan ini nga kahimtang pinaagi ha pagparig-on han mga pader han mga syudad ha ginhadian han Juda. “Nagtukod hira ngan nag-uswag,” siring han Biblia.—2 Kron. 14:1, 6, 7.

HA PATAG-AWAYAN

Ha mga ginbuhat ni Asa, diri kita sadang mahipausa nga nag-ampo hiya han inatubang ha pinakadamu nga sundalo nga gin-unabi han Biblia. Maaram hi Asa nga ginbabalosan han Dios an mga nagpapakita hin pagtoo pinaagi han ira mga buhat. Ha iya pag-ampo, nangaro hiya hin bulig kan Jehova. Maaram hi Asa nga kon sumarig hiya ha Dios ngan makakarawat han Iya bulig, diri importante kon ano kadamu o kagamhanan an kaaway. Hini nga girra nahidadabi an ngaran ni Jehova, salit nanginyupo hi Asa ha Dios tungod hito. Hiya nag-ampo: “Buligi kami, O Jehova nga amon Dios; kay nasarig kami ha imo, ngan ha imo ngaran kami nakanhi patok hini nga kadam-an. O Jehova, ikaw an amon Dios; ayaw itugot nga an tawo magdaog patok ha imo.” (2 Kron. 14:11) Sugad ito hin pagsiring: ‘An pagsulong han mga Etiopiahanon usa nga pag-atake  ha imo Jehova. Ayaw pasagdi nga mapasiparahan an imo ngaran pinaagi han pagtugot nga mapirde han mga tawo la an mga nagdadara han imo ngaran.’ Salit “hinampak ni Jehova an mga Etiopiahanon ha atubangan ni Asa, ngan ha atubangan han Juda; ngan an mga Etiopiahanon nangalagiw.”—2 Kron. 14:12.

Yana, an katawohan ni Jehova naatubang hin damu nga gamhanan nga kaaway. Diri kita literal nga makikiggirra ha ira ha patag-awayan gamit an literal nga mga armas. Kondi, makakasarig kita nga babalosan ni Jehova hin kadaogan an ngatanan nga matinumanon nga nakikig-away ha espirituwal tungod han iya ngaran. An aton personal nga pakig-away mahimo mag-upod han pangalimbasog nga atohan an kalyap nga paghamubo han moral, atohan an aton mga kaluyahan, o panalipdan an aton pamilya ha nakakadaot nga mga impluwensya. Kondi anoman nga problema an aton naieksperyensyahan, mapaparig-on kita ha pag-ampo ni Asa. An iya kadaogan, kadaogan ni Jehova. Iginpakita hito kon ano an malalaoman han ngatanan nga nasarig ha Dios. Waray tawo nga makakapirde kan Jehova.

PAGDASIG NGAN PAHAMANGNO

Pagbalik ni Asa tikang ha girra, gintapo hiya ni Asaria. Ini nga propeta nagdasig ngan nagpahamangno ha iya: “Pamati kamo ha akon, Asa, ngan bug-os nga Juda ngan Benjamin: hi Jehova maupod ha iyo samtang nga kamo naupod ha iya; ngan kon mangita kamo ha iya, hiaagian hiya niyo; kondi kon kamo bumaya ha iya, hiya mabaya ha iyo. . . . Magmakusganon kamo, ngan ayaw pahumoka an iyo mga kamot; kay an iyo buhat pagbabaslan.”—2 Kron. 15:1, 2, 7.

Ini nga mga pulong magpaparig-on han aton pagtoo. Iginpapakita hito nga hi Jehova maupod ha aton tubtob nga matinumanon kita nga nag-aalagad ha iya. Kon mangangaro kita ha iya hin bulig, makakasarig kita nga babatunon niya an aton pag-ampo. “Magmakusganon [o magmaisugon] kamo,” siring ni Asaria. Kasagaran na nga kinahanglan magin maisugon gud kita basi mabuhat an husto, kondi maaram kita nga mahihimo naton ito pinaagi ha bulig ni Jehova.

An lola ni Asa nga hi Maaka naghimo hin “mangil-ad nga ladawan para hin usa nga Asera.” Salit makuri nga desisyon para kan Asa nga paiwason hiya ha pagin “rayna.” Nahimo ito ni Asa ngan iya liwat ginsunog an ladawan nga ginhimo han rayna. (1 Hadi 15:13) Ginbendisyonan hi Asa ha iya ginbuhat ngan ha iya kaisog. Kita liwat kinahanglan marig-on nga dumapig kan Jehova ngan ha iya matadong nga mga suruklan, maunungon man ha Dios an aton mga kapamilya o diri. Kon bubuhaton naton ito, babalosan kita ni Jehova tungod han aton pagkamatinumanon.

Upod han balos kan Asa an pakakita han damu nga Israelita tikang ha apostata nga ginhadian ha norte nga kinadto ha Juda han ira naobserbaran nga hi Jehova upod ha iya. Ira gud ginpabilhan an putli nga pagsingba salit nagdesisyon hira nga bayaan an ira mga balay basi umukoy upod han mga surugoon ni Jehova. Katapos, hi Asa ngan an bug-os nga Juda ‘sinulod ha kauyonan ha pagpangita kan Jehova, ha bug-os nira nga kasingkasing ngan kalag.’ Ano an resulta? An Dios “hin-agian nira: ngan tinagan hira ni Jehova hin kapahuwayan ha palibot.” (2 Kron. 15:9-15) Malipayon gud kita kon an mga mahigugmaon ha pagkamatadong nakarawat han putli nga pagsingba kan Jehova!

Kondi, may iginpahamangno liwat hi propeta Asaria. Hiya nagsiring: “Kon kamo bumaya [kan Jehova], hiya mabaya ha iyo.” Diri gud unta ito mahitabo ha aton, kay maraot gud an mahimo magin resulta hito! (2 Ped. 2:20-22) Waray unabiha ha Biblia kon kay ano  nga iginpahamangno ito ni Jehova kan Asa, kondi waray ito sunda han hadi.

“NAGBUHAT KA HIN LINURONG”

Ha ika-36 ka tuig han pagmando ni Asa, hi Hadi Baasa han Israel ginios kontra ha Juda. Iya gintikangan pagparig-on an Rama, an giutan nga syudad nga walo ka kilometro ha norte han Jerusalem. Bangin katuyoan niya nga pugngan an iya mga sakop ha pagpahayag hin pagkamaunungon kan Asa ngan ha tinuod nga pagsingba. Imbes nga mangaro hin bulig hi Asa ha Dios pariho han iya ginhimo han ginsulong hira han mga Etiopiahanon, nagpabulig hiya ha tawo. Nagpadara hiya hin regalo ha hadi han Sirya ngan naghangyo nga atakehon an norte nga ginhadian han Israel. Han pipira ka beses nga ginhimo ito han mga Siryahanon, hi Baasa binaya ha Rama.—2 Kron. 16:1-5.

Waray malipay hi Jehova kan Asa ngan ginsugo Niya an propeta nga hi Hanani basi isumat ito ha iya. Tungod kay nakita ni Asa an ginhimo ni Jehova ha mga Etiopiahanon, nahibaro unta hiya nga an “mga mata ni Jehova nadalagan ngadto nganhi sahid an bug-os nga kalibotan, ha pagpakita ha iya ngahaw nga makusog ha ngaran nira kan kanay kasingkasing hingpit tipakadto ha iya.” Bangin nakakarawat hi Asa hin maraot nga sagdon, o para ha iya hi Baasa ngan an iya kasundalohan diri daku nga tarhog salit naghunahuna hiya nga maaakos niya ito ha iya la kalugaringon. Anoman an hinungdan, hi Asa sinarig ha panhunahuna han tawo ngan waray sumarig kan Jehova. “Dida hini nagbuhat ka hin linurong,” siring ni Hanani, “kay tikang niyan ikaw mamamay-ada mga away.”—2 Kron. 16:7-9.

Maraot an nagin reaksyon ni Asa. Tungod han iya kasina, iginpapriso niya hi Hanani. (2 Kron. 16:10) Posible ba nga naghunahuna hi Asa, ‘Angay ba ako sawayon katapos magin matinumanon ha sulod hin damu ka tuig?’ Yana nga nagtitikalagas na hiya, nagluya na ba an iya abilidad ha paghunahuna? Waray ito unabiha han Biblia.

Ha ika-39 ka tuig han pagmando ni Asa, nagkaada hiya grabe nga sakit ha tiil. “Bisan pa ha iya sakit waray hiya mangita kan Jehova, kondi ha mga mananambal,” siring han asoy. Hito nga panahon, baga hin napabay-an na ni Asa an iya relasyon ha Dios. Matin-aw nga ha sugad hito nga kahimtang ngan panhunahuna, namatay hiya ha ika-41 ka tuig han iya pagmando.—2 Kron. 16:12-14.

Bisan pa hito, an kan Asa mag-opay nga kalidad ngan kadasig ha tinuod nga pagsingba baga hin mas nalabaw ha iya mga nahimo nga sayop. Waray gud hiya umundang pag-alagad kan Jehova. (1 Hadi 15:14) Kon sugad, ano an igintututdo ha aton han iya kasaysayan? Nabulig ito ha aton nga masantop nga kinahanglan pamalandungon naton kon paonan-o kita ginbuligan ni Jehova ha naglabay, kay an paghinumdom hito makakapagios ha aton nga mag-ampo para han iya bulig kon naatubang kita hin bag-o nga mga pagsari. Kondi, diri naton sadang hunahunaon nga diri na kita nagkikinahanglan hin sagdon tikang ha Kasuratan kay maiha na kita nga matinumanon nga nag-aalagad ha Dios. Anoman an aton rekord ha pag-alagad, sasawayon kita ni Jehova kon makasayop kita. Kinahanglan mapainubsanon nga karawaton naton an sugad nga pagtadong basi magpahimulos kita hito. Labaw ha ngatanan, an aton langitnon nga Amay maupod ha aton tubtob nga kita naupod ha iya. An mga mata ni Jehova nag-uusisa ha bug-os nga tuna ha pamiling han mga matinumanon ha iya. Ginbabalosan niya hira pinaagi han paggamit han iya gahum para ha ira. Ginbuhat ito ni Jehova kan Asa, ngan mabubuhat liwat Niya ito ha aton.

[Blurb ha pahina 9]

Ginbabalosan ni Jehova an magtinumanon nga nakikig-away ha espirituwal

[Blurb ha pahina 10]

Ginkikinahanglan an kaisog basi mabuhat an husto ha paniplatan ni Jehova