Dɛ mbrɛ yehu wɔ mfonyin a ɔwɔ enyimfa afamu no mu no, nyimpa pii susu dɛ, wɔ Atsɛmbu Da no mu no, Nyankopɔn bɛma akra ɔpepepem pii ebegyina n’ahengua no enyim, na oeegyina hɔn bɔn a wɔayɛ etwa mu no do ebu hɔn atsɛn. Wɔka dɛ wɔ atsɛmbu no mu no, Nyankopɔn bɛma binom akɔ sor ekedzi dɛw, na binom so bohu amandze wɔ hell anaa abɔnsamgyamu. Naaso Bible no ma yehu dza Atsɛmbu Da no dze bɛba, ɔnye dɛ wɔbɛgye nyimpa efi atsɛnkyew mu. (Ndwom 96:13) Nyankopɔn eyi Jesus dɛ Ɔtsɛmbuafo, na ɔdze atsɛntsenenee bɛba asaase yi do.​—Kenkan Isaiah 11:1-5; Asomafo Ndwuma 17:31.

Aber a nyimpa a odzi kan a wɔfrɛ no Adam, hyɛɛ da ara tseew Nyankopɔn no do etua no, ɔdze n’asefo nyina kɛhyɛɛ bɔn, amandzehu, nye owu ase. (Romefo 5:12) Jesus benyan nyimpa ɔpepepem pii efi owu mu, na ɔnam iyi do bɛsan dze atsɛntsenenee aba. Nyikyerɛ nwoma no ma yehu dɛ, iyi bɔkɔ do wɔ Christ Jesus ne mfrenhyia apem tumdzi no mu.​—Kenkan Nyikyerɛ 20:4, 11, 12.

Sɛ wonyan ewufo no a, worinngyina hɔn bɔn a wɔyɛe ansaana woruwu no do mmbu hɔn atsɛn. Na mbom sɛ wɔda “nwoma” a Nyikyerɛ tsir 20 no ka ho asɛm no mu nsɛm no edzi a, mbrɛ wɔbɛyɛ hɔn adze wɔ ho no na wobegyina do eebu hɔn atsɛn. (Romefo 6:7) Ɔsomafo Paul kaa dɛ hɔn a wobenyan hɔn ma woeenya hokwan esua Nyankopɔn ho adze no mu bi nye “hɔn a wɔtsen nye hɔn a wɔnntsen.”​—Kenkan Asomafo Ndwuma 24:15.

Nyimpa binom enntum ennsua Jehovah no ho adze annsom no ansaana woruwu. Nyimpa a wɔtse dɛm no benya hokwan abɛyɛ adze pa. Sɛ wɔyɛ dɛm a, hɔn wunyan no bɛyɛ “nkwa wunyan.” Naaso nyimpa binom a wobenyan hɔn no renntsie Jehovah n’asɛm, ntsi hɔn wunyan no bɛyɛ “afɔdzi wunyan.”​—Kenkan John 5:28, 29; Isaiah 26:10; 65:20.

Obodu dɛ mfrenhyia apem Atsɛmbu Da no bɛba n’ewiei no, nna Jehovah ama nyimpa nyina edzi mu dɛ mbrɛ nna ɔtse wɔ ahyɛse no. (1 Corinthfo 15:24-28) Hwɛ enyidado papa bi a ɔda hɔ rotweɔn nyimpa a wɔbɛyɛ setsie no! Nyankopɔn beyi Satan a wɔdze no ato efiadze mfe apem no epue ma ɔdze no nsɔhwɛ a otwa tun no aba. Satan bɔbɔ mbɔdzen bio dɛ ɔbɛdaadaa nyimpa ma wɔaatwe hɔnho efi Nyankopɔn ho. Naaso hɔn a wɔbɔpow Satan no benya onnyiewiei nkwa wɔ asaase do.​—Kenkan Isaiah 25:8; Nyikyerɛ 20:7-9.

Bible no san dze ‘atsɛmbu da’ gyina hɔ ma nsɛm a obesisi ama wɔaasɛɛ dɛm wiadze bɔn yi. Noah n’aber do no, Nsuyirii no baa mpofirmu bɛsɛɛ ndzebɔnyɛfo a nna wɔwɔ hɔ dɛm aber no. Dɛm pɛpɛɛpɛ na atsɛmbu da yi bɛyɛ. Nyankopɔn bɛsɛɛ “emumuyɛfo” na ɔdze wiadze fofor a “tsenenee tse mu bɛba.”​—Kenkan 2 Peter 3:6, 7, 13.