Gehazi Aatigire Kwendwo nĩ Jehova nĩ Ũndũ wa Ũkoroku
RUTA CIANA CIAKU
Gehazi Aatigire Kwendwo nĩ Jehova nĩ Ũndũ wa Ũkoroku
HIHI ũrĩ wakorũo ũkĩenda kĩndũ mũno?— * Angĩkorũo nĩguo, ũhaana o ta andũ aingĩ. No hihi nĩ wagĩrĩirũo kũgeria kũgĩa na kĩrĩa ũrenda na njĩra ya kwaria maheeni?— Aca, ndwagĩrĩirũo. Mũndũ ũrĩa wĩkaga ũguo nĩ mũkoroku. Reke tuone ũrĩa mũndũ wetagwo Gehazi aatigire kwendwo nĩ Jehova nĩ ũkoroku. Aarĩ ndungata ya Elisha, mũnabii wa Ngai ũrĩa wa ma, Jehova.
Elisha na Gehazi maatũũraga mahinda ma tene, mĩaka ta ngiri ĩmwe mbere ya gũciarũo kwa Mũrũ wa Ngai, Jesu, gũkũ thĩ. Jehova nĩ aahũthĩrire Elisha gwĩka maũndũ ma magegania mũno—kũringa ciama! Kwa ngerekano, Bibilia nĩ ĩtwĩraga ũhoro wa mũndũ ũmwe wa bata mũno mbũtũ-inĩ ya Suriata ũrĩa warĩ na mũrimũ mũru wa mangũ. Gũtirĩ mũndũ ũngĩahotire kũmũhonia, no Elisha akĩmũhonia.
Elisha aahũthĩrũo nĩ Ngai kũhonia andũ, ndaretĩkĩra mbeca. Hihi nĩ ũũĩ nĩkĩ?— Tondũ Elisha nĩ aramenya atĩ ciama icio ciumaga kwĩ Jehova—ti kũrĩ we mwene. Naamani aahonio, agakena mũno ũũ atĩ arenda kũhe Elisha iheo cia thahabu, betha, na nguo njega. Elisha akaaga gwĩtĩkĩra kĩndũ o na kĩmwe, no Gehazi nĩ arenda iheo icio mũno.
Thutha wa Naamani gũthiĩ, Gehazi akamũkinyĩra atekwĩra Elisha. Aakinyĩra Naamani, nĩ ũĩ ũrĩa Gehazi akũmwĩra?— ‘Ndatũmwo nĩ Elisha ngwĩre atĩ nĩ agĩa na ageni erĩ. No ende ũmũhe nguo igĩrĩ cia kũgarũrĩra nĩguo amahe.’
No macio nĩ maheeni! Gehazi nĩ gũtunga atunga rũgano rwa maheeni rwĩgiĩ ageni erĩ. Aaria maheeni tondũ nĩ arenda nguo iria Naamani ekwendaga kũhe Elisha. Hatarĩ nganja, Naamani ndaramenya ũhoro ũcio. Kwoguo akahe Gehazi iheo akenete. Naamani nginya akamũhe indo nyingĩ kũrĩ iria ekwendaga. Hihi nĩ ũũĩ nĩ ũndũ ũrĩkũ ũkũhaanĩka thutha ũcio?—
Gehazi acooka mũciĩ, Elisha akamũũria: “Uuma kũ?”
Gehazi akamũcokeria, “ndirĩ kũndũ ngũthiĩte.” No Jehova nĩ amenyithirie Elisha ũrĩa Gehazi eka. Kwoguo Elisha akamwĩra: ‘rĩrĩ ti ihinda rĩa kwamũkĩra mbeca na nguo!’
Gehazi oya mbeca na nguo itarĩ ciake. Kwoguo Ngai agatũma mangũ ma Naamani manyite Gehazi. Ũgwĩciria tũngĩĩruta ũndũ ũrĩkũ kuumana na ũhoro ũcio?— Ũndũ wa mbere tũreruta nĩ atĩ tũtiagĩrĩirũo gũtunga na kũheana ng’ano cia maheeni.
Nĩ kĩĩ gĩatũmire Gehazi atunge rũgano rwa maheeni?— Nĩ tondũ aarĩ mũkoroku. Eendaga kũgĩa na kĩndũ gĩtaarĩ gĩake, na akĩgeria kũgĩa na indo icio na njĩra ya kũheenania. Nĩ ũndũ ũcio, akĩnyitwo nĩ mũrimũ mũru mũno ũtũũro-inĩ wake wothe.
Kwaria ma, Gehazi aanyitirũo nĩ ũndũ mũru mũno o na gũkĩra mangũ. Hihi nĩ ũũĩ ũndũ ũcio nĩ ũrĩkũ?— Agĩtiga kwendwo nĩ Ngai. Rekei tũtikaneke ũndũ ũngĩtũma tũtige kwendwo nĩ Ngai! Ithenya rĩa ũguo, rekei tuonanie ũtugi na tũkorũo twĩhaarĩirie kũheana indo iria tũrĩ nacio.
Thoma Bibilia-inĩ Yaku
2 Athamaki 5:5, 20-27, Judasi 21
[Kohoro ka Magũrũ-inĩ]
^ kĩb. 3 Angĩkorũo ũrathoma na mwana, kamũhari karĩa gacore karakũririkania ũtithie na wĩkĩre mwana ngoro eyarie.
Icunjĩ Ingĩ Hihi Ũngĩenda Gũthoma
MŨRANGĨRI
Ngai No Aigue Ũũru Ngoro, Tũngĩmũkenia Atĩa?
Hihi nĩ ũĩ atĩ no ũtũme Jehova akena kana arakare? Wĩrute ũrĩa ciĩko cia Adamu na Hawa ciatuurithirie Jehova.
MŨRANGĨRI
Tũngĩĩruta Atĩa Kuumana Na Mũndũ Ũmwe Warĩ Mũũru?
Rĩrĩa Jesu aakuhĩrĩirie gũkua, nĩ eerĩire mũndũ ũmwe warĩ mũũru atĩ nĩ agatũũra thĩinĩ wa Paradiso. Jesu eendaga kuuga atĩa, na Paradiso ĩyo ĩgaakorũo ĩhaana atĩa?
MŨRANGĨRI
Petero na Anania nĩ Maaririe Maheeni—Tũngĩĩruta Atĩa?
Thuthuria kĩrĩa gĩatũmire mũndũ ũmwe oherũo thutha wa kwaria maheeni ĩndĩ ũrĩa ũngĩ akĩaga kuoherũo.
