Mukwañuli ne U Tahisize Kuli Gehazi A Latehelwe ki Silikani sa Hae ni Mulimu
Mu Lute Bana Ba Mina
Mukwañuli ne U Tahisize Kuli Gehazi A Latehelwe ki Silikani sa Hae ni Mulimu
KANA u kile wa lakaza hahulu ku ba ni nto ye ñwi?— * Haiba ki cwalo, hasi wena u nosi. Kono, kana wa swanela ku lika ku fumana ze u bata ka ku bulela buhata?— Batili, ha u swaneli ku eza cwalo. Mutu ya eza cwalo ki wa mukwañuli. Ha lu boneñi mo mukwañuli ne u tahiselize kuli muuna wa libizo la Gehazi a haniwe ki Mulimu. Gehazi ne li mutangaa Elisha, mupolofita wa Mulimu wa niti, Jehova.
Elisha ni Gehazi ne ba pilile ibato ba lilimo ze sikiti kwamulaho koo, pili Mwanaa Mulimu, Jesu a si ka pepwa kale fa lifasi. Jehova naa itusisize Elisha ku peta lika ze tuna luli ili ku eza limakazo! Ka mutala, Bibele i lu bulelela ka za muuna ya naa tompeha hahulu mwa mpi ya Masiria ya naa kula butuku bo bu maswe bwa mbingwa. Ne ku si na mutu yo muñwi ya naa kona ku mu folisa kwandaa Elisha.
Elisha ha itusiswa ki Mulimu ku folisa batu, ha amuheli masheleñi e ba mu fa. Kana wa ziba libaka?— Kakuli Elisha wa ziba kuli limakazo zeo li zwa ku Jehova isiñi ku yena muñi. Naamani ha saa folisizwe, u ba ni tabo ye tuna hahulu kuli mane u bata ku fa Elisha limpo ze cwale ka gauda, silivera, ni liapalo. Elisha wa hana ku li amuhela, kono Gehazi u lakaza hahulu limpo zeo.
Naamani ha sa fundukile, Gehazi a mu latelela a sa buleleli Elisha. Kana wa ziba zeo Gehazi a bulelela Naamani ha sa mu katani?— ‘Elisha u ni lumile ku to ku bulelela kuli kihona a sa zo amuhela baenyi ba babeli. U kupa kuli u mu fe liapalo ze peli za mikiti ilikuli a fe baana bao.’
Kono bo ki buhata! Gehazi u ipangezi feela taba ya kuli ku tile baenyi ba babeli. U bulela taba ya buhata yeo kakuli u bata ku fiwa liapalo zeo Naamani naa batile ku fa Elisha. Kono Naamani ha zibi kuli taba ya bulela Gehazi ki ya ku ipangela. Kamukwaocwalo, u fa Gehazi limpo zeo ka tabo. Mane Naamani u fa Gehazi lika ze ñwi ze ñata ku fita za kupile. Kana wa ziba se si ezahala hamulaho wa fo?—
Gehazi ha kutela kwahae, Elisha u mu buza kuli: “U zwa kai?”
Gehazi u alaba kuli: ‘Aa, ha ku na ko ni zwa.’ Nihakulicwalo, Jehova u zibisize Elisha za ezize Gehazi. Kamukwaocwalo, Elisha u bulela kuli: ‘Ye haki nako ya ku amuhela masheleñi ni liapalo!’
Gehazi u amuhezi masheleñi ni liapalo ze si za hae. Kabakaleo, Mulimu u shimbululela mbingwa ya Naamani ku Gehazi. U nahana kuli lu kona ku itutañi kwa taba ye?— Nto ye ñwi ye lu ituta ki ya kuli ha lu swaneli ku ipangela kamba ku bulela litaba ze si za niti.
Ki kabakalañi Gehazi ha naa ipangezi taba ya buhata?— Ne li ka libaka la kuli naa na ni mukwañuli. Naa bata ku ba ni lika ze ne si za hae, mi naa itusisize buhata kuli a fumane lika zeo. Kabakaleo, naa kulile butuku bo bu maswe mwa bupilo bwa hae kaufela.
Kaniti, Gehazi naa tahezwi ki nto ye ñwi ye maswe ku fita mbingwa. Kana wa ziba kuli ne li nto mañi ona yeo?— Naa latehezwi ki limbuyoti za Mulimu ni lilato la hae. Haike ni luna lu si ke lwa eza nto ifi kamba ifi ye ka tahisa kuli lu latehelwe ki limbuyoti ni lilato la Mulimu! Kono lu be ni sishemo mi lu zwelepili ku ba ni bufani.
Mu bale mwa Bibele ya mina
[Litaluso za kwatasi]
^ para. 3 Haiba mu sweli ku bala ni mwanana, mutila o mu ka fumana hamulaho wa puzo ni puzo, u mi hupulisa kuli mu yeme ni ku susueza mwanana ku alaba.
