KUTUKU muanji kujinga tshintu kampanda bikole menemene anyi?— * Bikalabi nanku, kuena nkayebe to. Kadi udiku mua kushima bua kupeta tshintu tshiudi natshi dijinga anyi?— Tòo, kuena mua kuenza nanku to. Muntu udi wenza nunku udi ne lukuka. Tumone muvua lukuka lukebele Gehazi ntatu. Uvua muena mudimu wa Elisha, muprofete wa Yehowa Nzambi mulelela.

Elisha ne Gehazi bavua basombe pamue mutantshi mule pamuapa bidimu bitue ku tshinunu kumpala kua Yezu Kristo Muana wa Nzambi kuledibua pa buloba. Yehowa uvua musungule Elisha bua kuenza malu a kukema, bua kuenza bishima. Tshilejilu, Bible udi utulondela muyuki wa muntu munene wa mu tshiluilu tshia bena Suliya uvua ne disama dia nsudi. Kakuvua muntu nansha umue uvua mua kumuondopa to, kadi Elisha wakamuondopa.

Pavua Nzambi ukuata mudimu ne Elisha bua kuondopa bantu, Elisha kavua witaba musangu nansha umue bua bamupeshe makuta to. Udi mumanye tshivuaye ubengela anyi?— Mbualu uvua mumanye ne: bishima abi bivua bifumina kudi Yehowa, kadi ki nkudiye yeye to. Pavuabu bondope Namana uvua ne disanka dia bungi, ke yeye kujinga kupesha Elisha bintu bia or, arjan ne bilamba bimpe. Elisha kakitaba bua kuangata tshintu nansha tshimue, kadi Gehazi uvua mujinge bintu abi bikole menemene.

Pakaya Namana, Gehazi wakamulonda kayi mumanyishe Elisha. Pakapetanganaye ne Namana, udi mumanye tshivua Gehazi mumuambile anyi?— ‘Elisha mmuntume kuudi bua kukuambila ne: mmupete benyi babidi anu mpindieu. Udi dijinga ne bilamba bibidi bua kubapesha.’

 Kadi uvua mushime. Gehazi wakafuikakaja bualu bua dishima bua benyi babidi. Uvua muenze nunku bualu uvua musue bua bamupeshe bilamba bivua Namana musue kupesha Elisha. Bushuwa, Namana kavua mumanye bualu ebu to. Ke bua tshinyi uvua ne disanka dia kupesha Gehazi bintu ebi. Namana uvua mupeshe Gehazi bintu bia bungi bipite bivua Gehazi mulombe. Udiku mumanye tshivua tshienzeke pashishe anyi?—

Pakapingana Gehazi kumbelu, Elisha wakamukonka ne: ‘udi ufuma kuepi?’

Gehazi wakamuandamuna ne: ‘Tshivue muye pa muaba to.’ Kadi Yehowa wakenza bua Elisha amanye tshivua Gehazi muenze. Ke Elisha kuamba ne: ‘Etshi ki ntshikondo tshia kuangata makuta ne bilamba to.’

Gehazi wakangata makuta ne bilamba bivua kabiyi biende to. Nunku Nzambi wakenza bua nsudi ivua nayi Namana ikuate Gehazi. Tshinyi tshitudi mua kulongela ku tshilejilu etshi?— Tudi tulongelaku ne: katuena mua kuikala tufuikakaja malu adi kaayi malelela ne kuambila bantu to.

Gehazi uvua mufuikakaje bualu bua dishima bua tshinyi?— Mbualu Gehazi uvua ne lukuka. Uvua musue kupeta bintu bivua kabiyi biende, ke kushimaye bua kubipeta. Bua bualu ebu, wakakenga ne disama dikole mu matuku ende onso a muoyo.

Bulelela, Gehazi uvua mupete lutatu lukuabu luvua lupite nsudi. Udi mulumanye anyi?— Uvua mujimije dinanga dia kudi Nzambi, mmumue ne: Nzambi katshivua kabidi umuanyisha to. Katutetshi bua kuenza bualu budi mua kutunyangila malanda etu ne Nzambi. Pamutu pa kuenza nunku, tuikalayi ne dinanga ne tupeshayi bakuabu bintu bitudi nabi.