Fundisa Abantwabakho

Ukuba Marhamaru KwaLahlekisela UGehazi IThando LakaZimu

WAKHE wayifuna into ekulu?— * Nengabe kunjalo, ufana nabantu abanengi. Kodwana kufuze uzame ukuthola okufunako ngokukhuluma amanga?— Awa, ungenzi njalo. Umuntu owenza njalo umarhamaru. Akhe sibone indlela indoda ebizwa bona nguGehazi eyalahlekelwa ngayo lithando lakaZimu ngokuba marhamaru. Bekayinceku ka-Elitjha, umporofidi kaZimu wamambala, uJehova.

U-Elitjha noGehazi baphila esikhathini eside esadlulako, iminyaka engaba ziinkulungwana ngaphambi kobana iNdodana kaZimu, uJesu ibelethwe ephasini. UJehova wasebenzisa u-Elitjha bona enze izinto ezihle khulu—bona enze iimangaliso! Isibonelo, IBhayibhili isitjela ngendoda eqakathekileko ebuthweni leSiriya egade inobulwelwe besilepheru obumbi. Akekho obekangayipholisa, kodwana u-Elitjha wayipholisa.

U-Elitjha nekasetjenziswa nguZimu ukusiza abantu bona baphole, akhenge amukele imali. Uyazi bona kubayini?— Ngombana u-Elitjha bekazi bona iimangaliswezi zivela kuJehova—ingasi kuye. UNahamani nekapholiswako, wathaba khulu wafuna ukunikela u-Elitjha izipho zegolide, isiliva neempahla ezihle. U-Elitjha akhenge azithathe, kodwana uGehazi bekazifuna khulu iimpahlezi.

Ngemva kobana uNahamani akhambe, uGehazi wamgijimisa ngaphandle kokutjela u-Elitjha. Nekafika kuNahamani, uyazi bona uGehazi wathini kuye?— ‘U-Elitjha ungithume bona ngikutjele bonyana kufike iimvakatjhi ezimbili. Ufuna unginikele iimpahla zokutjhentjha ezimbili bona azinikele amadoda layo.’

 Kodwana gade akhuluma amanga! UGehazi wazithomela yena indaba yeemvakatjhi ezimbili. Wakhuluma amanga la ngombana bekafuna iimpahla uNahamani ebekafuna ukuzinikela u-Elitjha. Yiqiniso, uNahamani bekangazi bona uGehazi unamanga. Ngalokho wakuthabela ukunikela uGehazi izipho. UNahamani wanikela uGehazi izinto ezinengi kunalezo uGehazi azibawileko. Uyazi bona yini eyenzekako ngemva kwalokho?—

UGehazi nekabuyela ekhaya, u-Elitjha wambuza: ‘Bewuyephi?’

UGehazi waphendula wathi, ‘Mina, bengikhona.’ Nokho, uJehova wenza u-Elitjha wayazi into eyenziwe nguGehazi. Ngalokho u-Elitjha uthi: ‘Lesi akusiso isikhathi sokwamukela imali neempahla!’

UGehazi uthethe imali neempahla ekungasi ngezakhe. Ngalokho uZimu wenza isilepheru sakaNahamani saya kuGehazi. Ucabanga bona yini esingayifunda kilokhu?— Kusifundisa bona akukafuzi sithome begodu sikhulume amanga.

Kubayini uGehazi athoma amanga?— Ngombana uGehazi bekamarhamaru. Wafuna ukuba nezinto ekungasi ngezakhe, begodu walinga ukufumana iintwezi ngokukhuluma amanga. Ngebanga lalokhu waphathwa bulwelwe obumbi khulu ukuphila kwakhe koke.

Kwamambala, uGehazi wavelelwa yinto ebuhlungu ukudlula isilepheru. Uyazi bona bekuyini leyo?— Bekukulahlekelwa mumusa kaZimu, ukulahlekelwa lithando lakhe. Asingenzi litho elingasilahlekisela umusa nethando lakaZimu! Kunalokho, asibe nomusa silungele ukwabelana nabanye izinto esinazo.

Funda eBhayibhilinakho

U-2 AmaKhosi 5:5, 20-27; Juda 21

Jwanisi 15:10

[Umtlolo waphasi]