E MATE mate ua ake ana rai koe te inangaro i tetai apinga?— * Me koia ia, aite rai koe mei te maataanga o te tangata. E mea tau ainei te pikikaa kia rauka mai taau e inangaro ra?— Kare e tau kia akapera koe. Te tangata ka akapera e tangata noinoi aia. Ka akara ana tatou e akapeea tetai tangata tona ingoa ko Gehazi i ngere ei i to te Atua aroa. E tavini aia no Elisaia, e peroveta no te Atua mou, ko Iehova.

Kua ora ana a Elisaia e Gehazi mei tetai tauatini mataiti i mua ake ka anau mai ei a Iesu te Tamaiti a te Atua, i te enua nei. Kua taangaanga a Iehova ia Elisaia kia rave i tetai au mea umere tikai​—kia rave i te au temeio! Ei akaraanga, te tuatua ra te Pipiria no runga i tetai tangata maata i roto i te vaeau o Arama tei rokoia e te maki repera. Kare e tangata e rauka i te rapakau iaia, mari ua ko Elisaia.

Te taangaanga anga te Atua ia Elisaia kia tauturu i te aronga maki, kare rava aia e ariki ana i te moni i te tutaki iaia. Kite koe eaa te tumu?— No te mea kua kite a Elisaia e no ko mai ia Iehova taua au temeio​—e kare nana uaorai. Te ora anga te maki o Naamana, mataora tikai aia e kua inangaro i te oronga i tetai au apinga aroa, mei te auro, te ario, e te kakau manea na Elisaia. Kare a Elisaia e ariki i tetai ua atu apinga, inara kua inangaro maata tikai a Gehazi i teia au apinga aroa.

Te akaruke anga a Naamana, kua arumaki atura a Gehazi iaia e kare aia i akakite ana kia Elisaia. Te rokoia atu anga iaia a Naamana, kua kite ainei koe eaa ta Gehazi i akakite kiaia?— ‘Na Elisaia i tono mai iaku kia akakite kia koe e koi aere ua mai nei tetai nga manuiri. Ka inangaro aia i te oake i tetai nga kakau no taua nga tangata.’

 Inara e pikikaa ua te reira! Na Gehazi rai tana tuatua maani ua no runga i taua nga manuiri ra. Kua akakite aia i te reira no tona inangaro i te kakau ta Naamana i oronga kia Elisaia. Kare oki a Naamana i kite i teia. No reira kua mataora aia i te oronga i te au apinga aroa kia Gehazi. E maata atu ta Naamana au apinga i oronga kia Gehazi, tei kore aia i pati mai ana. Kua kite ainei koe eaa tei tupu i muri mai?—

Te tae anga a Gehazi ki te kainga, kua ui a Elisaia kiaia e: ‘Noea mai koe?’

‘Kare au i aere ana,’ i pau atu ei a Gehazi. Inara, kua akakite a Iehova kia Elisaia i ta Gehazi i rave. E kua karanga atu a Elisaia e: ‘Kare teia i te taime no te rave i te moni e te kakau!’

Kua rave a Gehazi i te moni e te kakau kare nana. No reira kua tuku mai te Atua i te maki repera o Naamana ki runga ia Gehazi. Eaa ra i toou manako ta tatou ka kite mai mei teia?— E tai mea ta te reira e apii maira ia tatou koia oki, eiaa e maani tuatua pikikaa.

Eaa ra a Gehazi i maani ei tetai tuatua pikikaa mei tera?— No te mea e tu noinoi to Gehazi. Inangaro aia i tetai apinga kare nana, e kua titau aia kia rauka mai taua apinga ra na roto i te pikikaa. No tana i rave kua rokoia aia e te maki kino e mate ua atu aia.

Ko te tika, kua rokoia a Gehazi e tetai apinga kino rava atu i te maki repera. Kua kite koe e eaa te reira?—Kua ngere aia i te akaperepereanga a te Atua, e tona aroa. Auraka rava tatou e rave i tetai mea te ka akangere ia tatou i te reira! Mari ra, kia akaari tatou i te tu takinga meitaki e kia papa ua i te oronga atu i ta tatou au apinga.