KASI uli kudokerapo comene cinthu cinyake?​— * Usange uli kudokerapo, umanye kuti ndiwe pera yayi. Kweni kasi ukwenera kuteta kuti usange ico ukukhumba?— Yayi, ndimo ukwenera kucitira yayi. Munthu uyo wakucita nthena ni muryezi. Tiye tiwone umo munthu munyake zina lake Gehazi, wakakomwera cifukwa ca uryezi. Iyo wakaŵa muteŵeti wa Elisha, nchimi ya Ciuta waunenesko, Yehova.

Elisha na Gehazi ŵakaŵako kale comene pambere Yesu, Mwana wa Ciuta wandababike pa caru capasi. Yehova wakagwiliskira nchito Elisha pakucita vinthu vyakuzizwiska, nga nkhucita minthondwe. Mwaciyelezgero, Baibolo likutiphalira za munthu wakuzirwa mulara wa nkhondo wa ku Siriya uyo wakaŵa na nthenda yiheni comene ya vyoni. Padera pa Elisha pakaŵavyaso munyake wakuti wangamucizga.

Elisha wakapokerangapo ndalama yayi para Ciuta wamugwiliskira nchito kucizga ŵanthu. Kasi ukumanya cifukwa cake?— Cifukwa Elisha wakamanyanga kuti ndiyo yayi wakacitanga minthondwe iyi kweni Yehova. Namani wakati wacizgika wakakondwa comene mwakuti wakakhumbanga kupa Elisha vyawanangwa vya golide, siliva, na malaya ghawemi. Elisha wakakhumba yayi kupoka cilicose kweni Gehazi wakakhumbisiska kuti wapoke vyawanangwa ivi.

Namani wakati wanyamuka, Gehazi wakamucimbilira kwambura Elisha kumanya. Gehazi wakati wamusanga Namani, kasi ukumanya ico wakamuphalira?— Iyo wakati ‘Elisha wanituma kuti nimuphalirani kuti sonosono apa kwiza ŵalendo ŵaŵiri. Wakukhumba kuti waŵe na vyakuvwara viŵiri vyakusinthira kuti wavipeleke ku ŵalendo.’

Kweni uwu ukaŵa utesi! Gehazi wakayowoya vya mu mutu wake vyakukhwaskana na ŵalendo ŵaŵiri aŵa. Wakakhumbanga kuti watore vyakuvwara ivyo Namani wakakhumbanga kupeleka kwa Elisha. Nakuti Namani wakamanya yayi za ici. Namani wakamupa vinthu ivi mwakukondwa. Ndipo wakamupa vinthu vinandi Gehazi, nanga ni ivyo wakaleka kupempha. Kasi ukumanya ivyo vikacitika?—

Gehazi wakati wafika kunyumba, Elisha wakamufumba kuti: ‘Kasi wanguŵa nkhu?

Gehazi wakazgora kuti: ‘Nindawukepo!’ Kweni Yehova wakaŵa kuti wamuphalira kale Elisha ivyo Gehazi wakacita. Ntheura Elisha wakati: ‘Kasi iyi ndi nyengo yakupokelera ndalama na minjilira?’

Gehazi wakapoka ndalama na vyakuvwara ivyo vikaŵa vyake yayi. Ntheura, Ciuta wakacitiska kuti vyoni vya Namani vize pa Gehazi. Kasi ukughanaghana kuti tingasambirapo vici pa nkhani iyi?— Tikusambirapo kuti tileke kwata nkhani panji kuyowoya utesi.

Cifukwa wuli Gehazi wakata nkhani iyi uku wakamanyanga kuti ukaŵa utesi?— Cifukwa ca uryezi. Wakakhumbanga kuŵa na vinthu ivyo vikaŵa vyake cara, ndipo wakakhumbanga kuŵa navyo mwakuyowoya utesi. Lekani wakakomwa na nthenda yakofya comene umoyo wake wose.

Nakuti Gehazi wakakomwaso pa cinthu cinyake kujumpha nthenda ya vyoni. Kasi ukucimanya?— Wakataya ubwezi wake na Yehova. Ntheura, nase tileke kucita cilicose ico cingananga ubwezi withu na Yehova. M’malo mwake tikwenera kuŵa ŵalusungu na kugaŵirako ŵanji ivyo tili navyo.