Wafa nga mɛn nga wá wíe’n

“An ti-man kɛ sran b’ɔ o aosin nun’n sa, i sɔ’n ti, nán maan cɛn sɔ’n fu amun nun kɛ awiefuɛ’n fu sran nun’n sa.”​—1 TƐS. 5:4.

?AMUN KWLA YIYI NUN?

?Sa benin mun yɛ be nin a juman mɔ ndɛ mma nga be lɔngɔ su yɛ’n be kan be ndɛ ɔ?

1 Tɛsalonikfuɛ Mun 5:3

Sa Nglo Yilɛ 17:16

Daniɛl 2:44

1. ?Ngue yɛ ɔ́ úka e naan e ɲin w’a tran su naan kusu y’a jran kekle sa nga be tɔ e su’n be ɲrun ɔn?

 Ɔ KA kaan sa’n, sa sroesroe wie’m bé wá jú asiɛ’n su. Biblu’n nun kasiɛ’m be su kpɛnlɛ’n kle sɔ. I sɔ’n ti’n, ɔ fata kɛ e ɲin tran su. ?Ngue yɛ ɔ́ úka e naan y’a yo sɔ ɔ? Akoto Pɔlu wla e fanngan kɛ “ninnge nga [...] be wun-man be’n, be akunndan yɛ e bu-ɔ.” Ɔ fata kɛ ɔ tran e klun titi kɛ maan ɔ yo ɲanmiɛn su lɔ o annzɛ asiɛ’n su wa o, Zoova mán e anannganman nguan. Pɔlu klɛli i sɔ ndɛ’n kɛ ɔ́ fá wlá i wiengu Klistfuɛ’m be fanngan naan like nga be nin Ɲanmiɛn be nantilɛ klanman’n ti’n bé ɲɛ́n i’n, be ɲin tran su titi. I sɔ yolɛ’n úka be wie naan b’a kwla jran kekle sa fanunfanun nga be tɔ be su’n be ɲrun.​—2 Kor. 4:8, 9, 16-18; 5:7.

2. (a) ?Ngue yɛ ɔ fata kɛ e yo naan e wla w’a tran like nga e ɲin o i sin’n i su kpa titi ɔ? (b) ?Ngue yɛ é wá wún i like suanlɛ nga ɔ nin ng’ɔ́ bɛ́ i sin lɔ’n be nun ɔn?

² Pɔlu i afɔtuɛ’n kle e like cinnjin kpa kun. Yɛle kɛ, kɛ ɔ ko yo naan e wla w’a tran like nga e ɲin o i sin’n su kpa titi’n, nán maan e bu ninnge nga e wun be’n be ngunmin be akunndan. Ɔ fata kɛ e ɲin tran sa cinnjin wie mɔ e nin a wunman be’n be su wie. (Ebr. 11:1; 12:1, 2) I ti’n, sa blu mɔ bé jú ka naan y’a ɲan anannganman nguan mɔ e wla o su’n, maan e fa e ɲin e sie be su. *

?KƐ MƐN’N I NUNNUNLƐ’N WÁ MÁNTAN KOKO KPA’N, NGUE SA YƐ Ɔ́ JÚ Ɔ?

3. (a) ?E ɲrun lɔ sa benin yɛ Pɔlu kɛnnin i ndɛ 1 Tɛsalonikfuɛ Mun 5:2, 3 nun ɔn? (b) ?Ngue yɛ politikifuɛ’m be ɲrun dinfuɛ’m bé yó ɔ? ?Atrɛkpa’n, wan mun yɛ be nin be yó sɔ ɔ?

³ Pɔlu i fluwa ng’ɔ klɛli ko mannin Tɛsalonikifuɛ mun’n i nun’n, ɔ kannin sa sɔ mɔ bé wá jú’n be nun kun ndɛ. (An kanngan 1 Tɛsalonikfuɛ Mun 5:2, 3 nun.)  Ɔ kannin ‘e Min [“Zoova,” NW] i cɛn’n’ i ndɛ. Cɛn sɔ m’ɔ ti blɛ kun i nzɔliɛ’n, ɔ́ bó i bo Ɲanmiɛn sulɛ wafa nga be timan su’n be nunnunlɛ’n su yɛ Armagedɔn alɛ’n yɛ ɔ́ yó i awieliɛ ɔ. Sanngɛ ka naan “Zoova i cɛn’n” w’a bo i bo’n, asiɛ’n su famiɛn’m bé wá sé kɛ ‘y’a nyan e ti, y’a di alaje.’ Be kwla kɛn i sɔ liɛ’n kpɛ kunngba annzɛ kpɛ sunman. Nvlenvle’m bé bú i kɛ b’a wie sa kekleekle nga be o be su’n be siesie. ?Blɛ sɔ’n nun’n, ngue yɛ Ɲanmiɛn sulɛ wafa’m be su kpɛn’m bé yó ɔ? Kɛ mɔ be ti mɛn’n i nunfuɛ wie’n ti’n, atrɛkpa’n, be nin politikifuɛ’m be ɲrun dinfuɛ mun yɛ be bo yó kun bé sé kɛ ‘y’a nyan e ti, y’a di alaje’ ɔ. (Ngl. 17:1, 2) Ɲanmiɛn sulɛ wafa’m be su kpɛn sɔ’m be aeliɛ’n wá fá laa Zida lɔ be nga be buli be wun Ɲanmiɛn nuan ijɔfuɛ’n be liɛ’n. Zoova kannin be ndɛ seli kɛ: “Be waan sa fi su ju-man. Be waan lika’n ti fɔun, kusu wuun lika’n ti-man fɔun.”​—Zer. 6:14; 23:16, 17.

4. ?Ngue yɛ e si i mɔ sran sunman simɛn i ɔ?

⁴ E siman sran trele ng’ɔ́ sé kɛ “y’a ɲan e ti y’a di alaje’n.” Sanngɛ i sɔ kanlɛ’n klé kɛ Zoova i cɛn’n w’a ju. I ti’n, Pɔlu kwla seli kɛ: “Aniaan mun, an ti-man kɛ sran b’ɔ o aosin nun’n sa, i sɔ’n ti, nán maan cɛn sɔ’n fu amun nun kɛ awiefuɛ’n fu sran nun’n sa.” (1 Tɛs. 5:4, 5) Kannzɛ sran sunman siman sa nga be ju andɛ’n be su ndɛ nga Biblu’n kan’n sanngɛ e liɛ’n e si i. ?Kɛ Ɲanmiɛn Ndɛ’n se kɛ sran’m bé sé kɛ “y’a nyan e ti, y’a di alaje’n,” wafa sɛ yɛ i sɔ’n kpɛ́n su ɔ? Ɔ fata kɛ e minndɛ naan e nian. I sɔ’n ti’n, maan e fua kpa kɛ ‘é nían e wun su é trán mínndɛ.’​—1 Tɛs. 5:6; Sof. 3:8.

“FAMIƐN” BLA KUN M’Ɔ SIMAN KƐ SA SU WA ƝƐN I’N

5. (a) ?Wafa sɛ yɛ ‘nyrɛnnɛn dan’n’ bó i bo ɔ? (b) ?Wan yɛ ɔ ti kɛ “famiɛn” bla sa m’ɔ bu i kɛ sa fi su ɲɛnmɛn i le’n niɔn?

⁵ ?Kɛ be ko se kɛ “y’a nyan e ti, y’a di alaje’n,” sa benin yɛ ɔ́ bɛ́ i sin ɔn? Pɔlu seli kɛ: “Kɛ sran’m be se kɛ: ‘Y’a nyan e ti, y’a di alaje’n,’ kpɛkuun nyrɛnnɛn dan kpa tɔ́ be su.” “Nyrɛnnɛn” sɔ’n yɛle kɛ Satan i mɛn’n i nunnunlɛ’n, ɔ́ bó i bo alɛ nga bé wá fá wlá Ɲanmiɛn sulɛ wafa kwlaa nga be timan su’n be sin’n i su. Biblu’n nun’n be flɛ Ɲanmiɛn sulɛ wafa nga be timan su’n be kɛ “Babilɔni klɔ dan’n” annzɛ ‘tekle bla.’ (Ngl. 17:5, 6, 15) Be nga be tɔn be wun suɛn kɛ be ti Klistfuɛ’n be o be nun wie. Alɛ sɔ mɔ bé fá wlá Ɲanmiɛn sulɛ wafa kwlaa sɔ’m be sin’n, yɛ ɔ́ yó ‘nyrɛnnɛn dan’n’ i bo bolɛ’n niɔn. (Mat. 24:21; 2 Tɛs. 2:8) Sa sɔ’n fú sran kpanngban nun. ?Ngue ti ɔ? Afin lele mɔ blɛ sɔ’n fá jú’n tekle bla’n ɔ́ bú i wun “famiɛn” m’ɔ “su yo-man sɛnvuɛ le” ɔ. Ɔ́ bú i kɛ sa fi su ɲɛnmɛn i le. Sanngɛ ɔ́ wá  wún i kɛ ɔ lɛkɛli i wun. Yɛle kɛ bé núnnún i ndɛndɛ kpa. Ɔ́ yó kɛ “cɛn kunngba” nun sa.​—Ngl. 18:7, 8.

6. ?Wan yɛ ɔ́ núnnún Ɲanmiɛn sulɛ wafa ng’ɔ timan su’n niɔn?

⁶ Ɲanmiɛn Ndɛ’n waan “nnɛn” mɔ i ‘ti’n ti nso’n’ ɔ́ fá alɛ wlá tekle bla’n sin. Kɛ e suan Sa Nglo Yilɛ fluwa’n i nun like’n, e wun i kɛ nnɛn sɔ’n yɛle anuannzɛ nga be flɛ i ONU. I “wuɛ blu” mun be ti famiɛn kwlaa nga kɛ é sé yɛ’n be suan ‘nnɛn ɔkwlɛ’n’ i bo’n be nzɔliɛ. * (Ngl. 17:3, 5, 11, 12) ?Wafa sɛ yɛ alɛ sɔ’n i tɛ liɛ’n wá yó ɔ? Yɛle kɛ nvlenvle nga be o ONU nun’n, bé wá fɛ́n tekle bla’n i bo ninnge ngba. Bé tɛ́ tete nin ɲannzuɛn sa kwlaa ng’ɔ yoli be’n be nglo. Asa kusu’n, bé dí i nnɛn’n yɛ bé “yrɛ́ i sin nun mlɔnmlɔn.” Be su wunmɛn i osu kun sa le.​—An kanngan Sa Nglo Yilɛ 17:16 nun.

7. ?Ngue yɛ maan ‘nnɛn’n’ fá alɛ wlá tekle bla’n i sin ɔn?

⁷ Asa kusu’n, Biblu’n kle like ng’ɔ́ yó maan alɛ sɔ’n bó i bo’n. Zoova wá sú mɛn siefuɛ’m be bo naan “be yo i bɔbɔ Nyanmiɛn i klun sa.” I klun sa sɔ’n yɛle tekle bla’n i kunlɛ. (Ngl. 17:17) Ɲanmiɛn sulɛ wafa’m be kpɛ alɛ ba likalika’m be nun yɛ be te fa ndɛ kpanngban te yi i sran’m be su. I ti’n, nvlenvle’m bé wá sé be wun kɛ sɛ be nunnun Ɲanmiɛn sulɛ wafa sɔ mun’n, i sɔ’n yó be wun sa ye. Kɛ mɛn siefuɛ’m bé wá fá alɛ bé wlá tekle bla’n i sin’n, bé bú i kɛ be bɔbɔ be klun sa yɛ be su yo ɔ. Kusu nn Ɲanmiɛn yɛ ɔ su sin be lika nunnun Ɲanmiɛn sulɛ wafa kwlaa ng’ɔ timan su’n niɔn. Ɔ maan, Satan i mɛn’n i bue kun fá alɛ wlá i bue uflɛ sin sanngɛ Satan ɲinma tá nun sa, ɔ su kwlaman alɛ sɔ’n i jran.​—Mat. 12:25, 26.

BÉ FÁ ALƐ WLÁ ƝANMIƐN I NVLE’N I SIN

8. ?Ngue yɛ be flɛ i ‘Gɔgu m’ɔ fin Magɔgu mɛn’n nun’n’ i alɛ’n niɔn?

⁸ Kɛ bé wíe Ɲanmiɛn sulɛ wafa kwlaa nga ɔ timan su’n i núnnún’n nn Ɲanmiɛn sufuɛ’m be liɛ’n, ‘be te o be tranwlɛ’m be nun be klun titi-man be,’ yɛ be tranwlɛ’n ti kɛ ‘klɔ mɔ talɛ nun-man be wun’n’ sa. (Eze. 38:11, 14) ?Sran akpasua sɔ mɔ be te su Zoova’n, mɔ kɛ a wun be sa’n ɔ waan nn be leman sinfuɛ’n, sa benin yɛ ɔ́ wá jú be su ɔ? Ɔ yo kɛ “sran kpanngban kpa” bé wá fá alɛ wlá be sin sa. Ɲanmiɛn Ndɛ’n flɛ i sɔ alɛ’n kɛ ‘Gɔgu m’ɔ fin Magɔgu mɛn’n nun’n’ i alɛ. (An kanngan Ezekiɛl 38:2, 15, 16 nun.) ?I sɔ’n ti’n, wafa sɛ yɛ ɔ fata kɛ e wun yo e ɔ?

9. (a) ?Ngue yɛ ɔ ti cinnjin kpa man Klistfuɛ mun ɔn? (b) ?Ngue yɛ ɔ fata kɛ e yo i dɔ nga su naan e Ɲanmiɛn sulafilɛ’n i bo w’a wla ase kpa ɔ?

⁹ E si kɛ bé fá alɛ wlá Ɲanmiɛn i sufuɛ’m be sin, sanngɛ nɛ́n i sɔ’n ti yɛ e klun títí e  trátrá su ɔ. Like ng’ɔ ti e cinnjin’n nɛ́n i yɛle e ti ɲanlɛ’n. Sanngɛ yɛle kɛ Zoova i dunman’n yo sanwun naan kusu ɔ kle kɛ i yɛ ɔ le atin sie nglo nin asiɛ’n niɔn. Zoova seli nvlenvle’m be kɛ: “Amún wá sí jrɛiin kɛ min yɛ n ti Anannganman nin-ɔn.” Ɔ kɛnnin i sɔ ndɛ’n nin i wunsu wie mun ekun sɔ lele kpɛ 60 tra su. (Eze. 6:7) E ɲin o blɛ nga Ezekiɛli fluwa’n nun ndɛ cinnjin sɔ’n kpɛ́n su’n i sin kpa. Yɛ e lafi su kɛ Zoova “kwla de be nga be sro i bɔ sa tɔ be su’n.” (2 Piɛ. 2:9) Ka naan i sɔ liɛ’n w’a ju’n, ɔ ti kpa kɛ e mian e ɲin kpa e wla e Ɲanmiɛn sulafilɛ’n i bo ase kpa. I liɛ’n, kannzɛ sa nga bé tɔ́ e su’n bé yó sɛ’n, e su kpɔciman Zoova le. ?Ngue yɛ ɔ fata kɛ e yo naan y’a wla e Ɲanmiɛn sulafilɛ’n i bo ase kpa ɔ? Ɔ fata kɛ e srɛ Ɲanmiɛn, e suan Ɲanmiɛn Ndɛ’n nun like yɛ e bu su akunndan. Kpɛkun maan e bo Ɲanmiɛn Sielɛ’n i jasin fɛ’n e kle sran mun. I sɔ yolɛ’n maan é láfi su kpa titi kɛ é trán anannganman nguan nun. E wla m’ɔ o i sɔ’n su’n, ɔ́ yó kɛ “mmeli i blalɛ’n bɔ be fa jrɛn i’n sa,” ɔ́ úka e naan y’a kpɔciman Ɲanmiɛn le.​—Ebr. 6:19; Jue. 25:21.

NVLENVLE’M BÉ WÁ SÍ ZOOVA

10, 11. ?Ngue yɛ ɔ́ kpɛ́ Armagedɔn alɛ’n i ba ɔ? ?Yɛ alɛ sɔ’n nun’n, sa benin yɛ ɔ́ jú ɔ?

¹⁰ ?Kɛ be ko fa alɛ ko wla Zoova i sufuɛ’m be sin’n, sa sroesroe benin yɛ i sɔ’n kpɛ́ i ba ɔ? Zoova súnman Zezi nin i sonja mɔ be o ɲanmiɛn su lɔ’n, naan be w’a kpli i sufuɛ’m be ti. (Ngl. 19:11-16) Ɔ maan bé kún “alɛ Anannganman Nyanmiɛn b’ɔ kwla like kwlaa yo’n i cɛn dan’n nun.” Alɛ sɔ’n yɛ be flɛ i Armagedɔn alɛ’n niɔn.​—Ngl. 16:14, 16.

¹¹ Zoova sinnin Ezekiɛli lika kannin alɛ sɔ mɔ bé fá wlá Gɔgu sin’n i ndɛ seli kɛ: “‘Ń yó maan bé fá alɛ wlá ɔ sin min oka’m be kwlaa be su. Sran kun nin i niaan bé kún.’ Anannganman Nyanmiɛn’n yɛ ɔ kan sɔ ɔ.” Srɛ m’ɔ́ kún be nga be o Satan sin’n ɔ nin be akunndan m’ɔ́ sánngan dan’n ti’n, bé kún be wiengu. Zoova seli Gɔgu nin i minniɛn’m be kɛ: “Ń yó maan [...] sufru m’ɔ lo fiaan bé gúa amun su.” (Eze. 38:21, 22) ?Ajalɛ sɔ mɔ Ɲanmiɛn fá’n i bo’n gúa sɛ?

12. ?Ngue yɛ nvlenvle’m bé wá sí i kekle nun ɔn?

¹² Nvlenvle’m bé wá wún i wlɛ kɛ be nunnunlɛ’n fin Zoova. Kpɛkun kɛ nga laa Eziptifuɛ mɔ be fuannin Izraɛlifuɛ mun lele ndɛ mma jenvie’n i nuan lɛ’n be fa kpannin’n sa’n, atrɛkpa’n awlaboe’n ti’n, be nga be o Satan sin’n bé kpán sé kɛ: “Anannganman b’ɔ o be sin’n nin e su kun”! (Tul. 14:25) Nvlenvle’m be su ɲɛnmɛn i yowlɛ. Bé wá sí Ɲanmiɛn nga be flɛ i Zoova’n kekle nun. (An kanngan Ezekiɛl 38:23 nun.) ?Sa sɔ’m be julɛ’n te o mmua?

KLƆ SRAN’M BE FAMIƐN DIWLƐ UFLƐ FI SU JASOMAN SU KUN

13. ?Like sunman waka sran nga Daniɛli kɛnnin i ndɛ’n, i bue nnun su’n i su like benin yɛ e si i ɔ?

¹³ Ɲanmiɛn nuan ndɛ kun m’ɔ o Daniɛli i fluwa’n nun’n, ɔ uka e naan y’a si blɛ nga e o nun yɛ’n. Daniɛli kannin like kun m’ɔ ti kɛ waka sran sa’n mɔ be fali blalɛ nin i wunsu ninnge fanunfanun wie mun yoli’n i ndɛ. (Dan. 2:28, 31-33) Like sɔ’n ti famiɛn diwlɛ nga be ɲannin kwlalɛ kpa mɛn’n su, mɔ be tuli be ɲin be wɔli Ɲanmiɛn i nvle’n i trele laa kpa nin e blɛ liɛ’n su’n, be nzɔliɛ. Be yɛle Babilɔni, Medi nin Pɛrsi, Glɛki, yɛ Rɔmu. Kun ng’ɔ ti be nun kasiɛn’n ɔ o lɛ dɔ nga su. Kɛ e suan Daniɛli i ndɛ sɔ’n i su like’n e wun i kɛ famiɛn diwlɛ sɔ’n i nzɔliɛ like yɛle like sunman waka sran’n i ja ngbabua nin i ja mma mun. Alɛ dan klikli’n nun’n, Angle nin Amlɛnkɛn mun be trali aenguɛ yɛ be wa boli ninnge’m be yolɛ bo likawlɛ. Ɔ maan like nga Daniɛli kɛnnin i ndɛ’n i bue nnun su’n yɛle Angle nin Amlɛnkɛn mɔ be bo yo kun be sie mɛn wunmuan’n. Like sunman waka sran’n i ja ngbabua mun yɛ be ti i lika kasiɛn’n niɔn. I sɔ’n kle kɛ klɔ sran’m be famiɛn diwlɛ uflɛ  fi su sinman Angle nin Amlɛnkɛn’m be famiɛn diwlɛ’n i osu. Like sunman waka sran’n i ja ngbabua nin i ja mma’m be bue ti blalɛ yɛ be bue ti wufa. I ti yɛ Angle nin Amlɛnkɛn’m be kwlalɛ’n jranman cinnjin’n niɔn.

14. ?Kɛ Armagedɔn alɛ’n fá bó i bo’n nn wan yɛ ɔ le kwlalɛ mɛn wunmuan’n su ɔ?

¹⁴ Daniɛli i ndɛ sɔ’n nun’n, yɛbuɛ dan kun m’ɔ ti Ɲanmiɛn Sielɛ’n i nzɔliɛ’n ɔ tuli i wun bo oka kun su afuɛ nga be flɛ i 1914 nun. Oka sɔ’n yɛle sielɛ mɔ Zoova le atin sie like kwlaa’n. Ɔ ka kaan sa’n yɛbuɛ’n fín like sunman waka sran’n i ja ngbabua’n. Armagedɔn alɛ’n nun’n, like sunman waka sran’n i ngbabua nin i lika onga’m be kwlaa bé fúfú mlɔnmlɔn. (An kanngan Daniɛl 2:44, 45 nun.) I sɔ’n kle kɛ kɛ Armagedɔn alɛ’n bó i bo’n nn Angle nin Amlɛnkɛn mun yɛ be te le kwlalɛ mɛn’n su ɔ. Nanwlɛ, sran ng’ɔ́ wún kasiɛ sɔ’n i su kpɛnlɛ’n nun’n, aklunjuɛ’n kún i kpo! * ?Sanngɛ Satan bɔbɔ’n niɔn, ngue yɛ Zoova wá fá yó i ɔ?

LIKE NGA BÉ WÁ FÁ YÓ ƝANMIƐN I KPƆFUƐ’M BE TI’N

15. ?Kɛ Armagedɔn alɛ’n ko wie’n, sa benin yɛ ɔ́ wá ɲán Satan nin i mmusu mun ɔn?

¹⁵ Kɛ bé bó Satan i mɛn’n i nunnunlɛ bo lele mɔ bé fá gúɛ i bo’n, Satan bɔbɔ i ɲin tá nun sa weiin’n. I sin’n, sa wá ɲán Satan bɔbɔ. Akoto Zan kan sa sɔ’n i ndɛ. (An kanngan Sa Nglo Yilɛ 20:1-3 nun.) Zezi Klist mɔ yɛle “anz” nga “kunman dan bɔ be si-mɛn i bo’n i lakle’n” wo i sa nun’n, ɔ́ tó Satan nin i mmusu mun gúa kunman dan’n nun. Kpɛkun ɔ́ yáci be lɔ lele afuɛ akpi. (Lik 8:30, 31; 1 Zan 3:8) I sɔ sa liɛ’n yɛ ɔ ti wuo’n i ti’n i kpɔtɔlɛ’n i bo bolɛ’n niɔn. *​—Bob. 3:15.

16. ?Kɛ be ko to Satan ko yi i “kunman dan bɔ be si-mɛn i bo’n” nun’n i liɛ yó sɛ?

¹⁶ ?Ngue yɛle “kunman dan bɔ be si-mɛn i bo’n” mɔ bé tó Satan nin mmusu mun gúa nun’n? Ɔ ti lika kun mɔ sɛ w’a yoman kɛ Zoova nin i anzi nga “kunman dan bɔ be si-mɛn i bo’n i lakle’n” wo i sa nun’n sa’n, sran fi kwlá kɔman lɔ’n. Kɛ be ko to Satan ko yi i lika sɔ’n nun lɔ’n ɔ su kwlá yoman like fi kun. Ɔ maan ɔ su kwlá “laka-man nvle-nvlefuɛ mun kun.” Nanwlɛ, Satan m’ɔ ti kɛ ‘asɔmɔli b’ɔ kpan’n’ sa’n, bé tó i amunle.​—1 Piɛ. 5:8.

SA MƆ BÉ BÓ FƆUNDI DILƐ BLƐ’N I ƝRUN ATIN’N

17, 18. (a) ?Like suanlɛ nga nun’n sa benin mun yɛ be nin a juman mɔ e kannin be ndɛ ɔ? (b) ?Kɛ i sɔ sa’m be ko sin’n, e mɛn dilɛ wafa’n yó sɛ?

¹⁷ Ɔ ka kaan sa’n, sa cinnjin wie mɔ bé yó maan lika’n kéje’n bé jú. E su minndɛ wafa nga sran’m bé wá sé kɛ “y’a nyan e ti, y’a di alaje’n.” I sin’n, kɛ bé núnnún Babilɔni klɔ dan’n mɔ i sin Gɔgu m’ɔ fin Magɔgu fa alɛ wla Ɲanmiɛn i sufuɛ’m be sin’n, mɔ i sin bé kún Armagedɔn alɛ’n, é wún nun. Bé tó Satan nin i mmusu mun gúa kunman dan mɔ be simɛn i bo’n nun. Kɛ sa sɔ’m be kwlaa be ko sin’n, klunwi sa’m be kwlaa be osu núnnún. Klist i afuɛ akpi famiɛn dilɛ blɛ’n nun’n, e mɛn dilɛ wafa’n su yoman kɛ andɛ liɛ’n sa kun. Blɛ sɔ’n nun’n é ‘wún jɔ́ e kpa fɔuun.’​—Jue. 37:10, 11.

¹⁸ Like suanlɛ nga nun’n e kannin “ninnge nga [...] be wun-man be’n,” be nun nnun be ndɛ. Sanngɛ sa sɔ mɔ be nin a juman’n m’ɔ fata kɛ ‘be akunndan yɛ e bu’n’ be nun wie mun ekun te o lɛ. É wá kán be ndɛ like suanlɛ ng’ɔ́ bá lɛ’n nun.

[Ja ngua lɛ ndɛ mun]

[Kosan mun]

 [Kuku/​Foto mun, bue 9]

SA NNUN MƆ BÉ WÁ JÚ’N

1 Bé sé kɛ ‘y’a nyan e ti, y’a di alaje’

2 Nvlenvle’m bé fá alɛ wlá “Babilɔni klɔ dan’n” i sin yɛ bé núnnún i

3 Bé fá alɛ wlá Zoova i sufuɛ’m be sin

4 Armagedɔn alɛ’n

5 Bé tó Satan nin i mmusu mun gúa kunman dan’n nun