?En Blong Wol Bambae i Olsem Wanem?
?En Blong Wol Bambae i Olsem Wanem?
“Yufala i no moa stap long tudak, mo i no stret blong Dei ya bambae i kam kasem yufala olsem we man blong stil i mekem yufala i sek.”—1 TES. 5:4.
?BAMBAE YU YU ANSA OLSEM WANEM?
?Wanem ol samting we oli no hapen yet, we ol vas ya oli tokbaot?
1. ?Wanem bambae i givhan long yumi blong yumi lukaot gud mo yumi stanap strong?
I NO longtaem bambae ol samting blong sapraes oli hapen long wol. Yumi save bilif long samting ya from we ol profet tok blong Baebol oli pruvum se oli tru. Taswe yumi mas lukaot gud. ?Be wanem i save givhan long yumi blong lukaot gud? Aposol Pol i talem se yumi no mas “tingbaot ol samting ya we yumi save luk long ae blong yumi.” Be yumi “tingbaot ol samting we yumi no save luk.” Yumi mas tingbaot se Jehova bambae i givim laef we i no save finis long yumi, nomata se long heven no long wol. Pol i talem ol tok ya blong givhan long ol Kristin long taem blong hem. Hem i wantem se oli tingting strong long blesing we bambae oli kasem taem oli holemstrong long God. Ale taem oli kasem trabol mo ol man oli agensem olgeta, bambae oli save stanap strong.—2 Kor. 4:8, 9, 16-18; 5:7.
2. (1) ?Yumi mas mekem wanem blong tingting blong yumi i stap strong long promes blong Jehova? (2) ?Bambae yumi tokbaot wanem long stadi ya mo long nekis stadi?
2 Advaes blong Pol i tijim yumi long wan impoten samting: Sipos yumi wantem se tingting blong yumi i stap strong long promes blong Jehova, yumi no mas tingbaot ol samting we yumi save luk nomo. Be yumi mas tingting strong long ol impoten samting we yumi no luk wetem prapa ae blong yumi. (Hib. 11:1; 12:1, 2) Bambae yumi tokbaot ten samting we oli joen wetem promes blong laef we i no save finis. Ol samting ya oli no hapen yet. *
?WANEM BAMBAE I HAPEN BIFO WE EN I KAM?
3. (1) ?Fas Tesalonaeka 5:2, 3 i tokbaot wanem samting we bambae i hapen? (2) ?Ol lida blong politik bambae oli mekem wanem? ?Hu maet i mekem sem mak?
3 Pol i tokbaot wan long ol samting ya we bambae i hapen, long leta we hem i raetem long ol Kristin long Tesalonaeka. (Ridim 1 Tesalonaeka 5:2, 3. *) Long leta ya, Pol i tokbaot “dei blong Jehova.” Dei ya bambae i stat taem ol giaman skul oli lus, mo bambae i finis long bigfala faet blong Amagedon. Taem klosap dei blong Jehova i stat, ol lida blong wol bambae oli stap singaot se: ‘!Pis mo seftaem!’ Maet oli talem tok ya wan taem nomo, no oli talem long ol defdefren taem. Ol neson bambae oli ting se klosap oli stretem ol bigfala problem blong olgeta. ?Ol lida blong skul bambae oli mekem wanem? Olgeta tu oli haf blong wol ya, taswe maet oli joen wetem ol lida blong politik blong singaot se: ‘!Pis mo seftaem!’ (Rev. 17:1, 2) Ol lida ya blong skul bambae oli mekem sem fasin olsem ol giaman profet long Juda bifo, we oli stap talem se: “!I gat pis! !I gat pis!” Be Jehova i talem se i no gat pis.—Jer. 6:14, NW; 23:16, 17.
4. ?Wanem samting we plante man oli no save long hem?
4 Nomata se hu i singaot ‘!Pis mo seftaem!,’ be samting ya i soemaot se dei blong Jehova i stat. Taswe Pol i talem se: “Naoia yufala i no moa stap long tudak, mo i no stret blong Dei ya bambae i kam kasem yufala olsem we man blong stil i mekem yufala i sek. Yufala evriwan i man blong delaet.” (1 Tes. 5:4, 5) Yumi kasem save tok blong Baebol long saed blong ol samting we oli stap hapen tede, be plante man oli no save. ?Profet tok blong ‘!Pis mo seftaem!,’ bambae i kamtru olsem wanem? Yumi mas wet nomo blong luk wanem bambae i hapen. Taswe, i gud we yumi gat strong tingting blong stap “wekap, we hed blong yumi i klia gud.”—1 Tes. 5:6; Sef. 3:8.
OL GIAMAN SKUL OLI NO SAVE SE BAMBAE OLI LUS
5. (1) ?“Bigfala trabol” bambae i stat olsem wanem? (2) ?Hu “kwin” ya we i ting se nogud samting bambae i no hapen long hem?
5 ?Wanem bambae i hapen afta? Pol i talem se: “Taem bambae ol man oli talem se: ‘!Pis mo seftaem!’ long taem ya nao, bambae trabol ya i kam long olgeta wantaem nomo.” Trabol ya bambae i stat taem oli spolem olgeta giaman skul long wol. Baebol i kolem olgeta giaman skul se ‘Bigfala Babilon’ no “woman blong rod.” (Rev. 17:5, 6, 15) Faet ya agens long olgeta giaman skul mo Krisendom, i statem “bigfala trabol.” (Mat. 24:21; 2 Tes. 2:8) Plante man bambae oli sapraes taem samting ya i hapen. ?From wanem? From we go kasem taem ya, woman blong rod ya i ting se hem i wan “kwin” we bambae i no save “krae” samtaem. Hem i ting se bambae i no gat wan nogud samting i hapen long hem. Be bambae hem i sek se hem i mestem bigwan. Bambae hem i lus wantaem nomo, olsem se long “wan dei” nomo.—Rev. 18:7, 8.
6. ?Hu bambae i spolem ol giaman skul?
6 Baebol i talem se wan anamol we i gat “ten hon” bambae i spolem woman ya. Taem yumi stadi long buk blong Revelesen, yumi lanem se anamol ya hemia Yunaeted Neson. “Ten hon” hemia olgeta gavman we oli stap sapotem “anamol we i red we i red. * (Rev. 17:3, 5, 11, 12) ?Bambae oli spolem woman ya olsem wanem? Ol neson we oli joen long Yunaeted Neson bambae oli tekemaot olgeta samting we woman ya i gat, oli soemaot se hem i nogud tumas mo hem i gat rabis fasin. Bambae oli kakae mit blong bodi blong hem mo oli “bonem hem long faea blong spolem hem olgeta.” Taswe olgeta giaman skul bambae oli lus blong olwe.—Ridim Revelesen 17:16.
7. ?Wanem bambae i mekem se oli spolem woman ya?
7 Profet tok blong Baebol i soemaot olsem wanem bambae samting ya i hapen. Jehova bambae i pulum ol lida blong politik blong oli mekem samting “we hem i wantem,” hemia blong spolem woman ya. (Rev. 17:17) Ol jos oli mekem faet i kamaot long plante ples mo oli gohed blong mekem plante trabol long wol. Taswe ol neson oli ting se sipos oli spolem woman ya, bambae samting ya i mekem i gud long olgeta. Oli ting se oli stap mekem samting we olgeta nomo oli wantem. Be Jehova bambae i yusum olgeta blong spolem ol giaman skul. Wan haf blong wol blong Setan bambae i faet agensem narafala haf blong hem, mo Setan i no naf blong stopem samting ya.—Mat. 12:25, 26.
BAMBAE OLI AGENSEM OL MAN BLONG GOD
8. ?Wanem faet we King Gogo i mekem?
8 Afta we ol giaman skul oli lus, bambae ol man blong God “oli stap gud nomo,” mo i “no gat stonwol i goraon long olgeta blong blokem olgeta.” (Esik. 38:11, 14) ?Wanem bambae i hapen long ol man blong Jehova we i luk olsem se oli no gat man blong protektem olgeta? “Plante we plante” man bambae i agensem olgeta. Tok blong God i tokbaot faet ya olsem wan faet blong ‘King Gogo long kantri ya Magog.’ (Ridim Esikel 38:2, 15, 16.) ?Yumi mas gat wanem tingting long faet ya?
9. (1) ?Wanem samting we wan Kristin i tinghae moa long hem? (2) ?Yumi mas mekem wanem naoia blong bilif blong yumi i strong?
9 Yumi save se bambae oli agensem ol man blong God, be yumi no mas wari tumas long saed ya. Samting we yumi tinghae moa long hem, i no se bambae yumi sef no nogat, be hemia blong leftemap nem blong Jehova mo hae rul blong hem. Bitim 60 taem Jehova i talem se: “Bambae oli savegud we mi mi Hae God [“Jehova,” NW].” (Esik. 6:7) Yumi wantem tumas blong luk profet tok ya i kamtru. Mo yumi save se Jehova “i save sevem ol man we oli bilif long hem, i save tekemaot olgeta long ol samting we i stap traem olgeta.” (2 Pita 2:9) Long sem taem, yumi wantem mekem evri samting we yumi naf blong mekem, blong bilif blong yumi i strong. Mo blong yumi save holemstrong long Jehova, nomata wanem samting i hapen long yumi. ?Yumi mas mekem wanem? Yumi mas prea, yumi mas stadi long Baebol mo tingting dip long hem, mo yumi mas talemaot Kingdom long ol narafala. Olsem nao, bambae tingting blong yumi i stap strong long promes blong laef we i no save finis. Promes ya i olsem “wan angka” we i givhan long yumi blong stap tru long Jehova.—Hib. 6:19; Sam 25:21.
OL NESON BAMBAE OLI SAVE SE JEHOVA I HU
10, 11. ?Amagedon bambae i stat olsem wanem? ?Wanem samting bambae i hapen long taem ya?
10 Taem oli agensem ol man blong Jehova, ?wanem bambae i hapen? Jehova bambae i yusum Jisas wetem ol enjel long heven blong givhan long ol man blong hem. (Rev. 19:11-16) Hemia faet blong “bigfala Dei blong God ya we i gat olgeta paoa,” we Baebol i kolem se Amagedon.—Rev. 16:14, 16.
11 Jehova i talem se: “Bambae mi mekem plantekaen trabol i kam long king ya, we bambae i mekem hem i fraet we i fraet. Bambae ol man blong hem oli stap kilkilim olgeta bakegen long naef blong faet blong olgeta.” Olgeta we oli stap long saed blong Setan, bambae oli fraet mo tingting blong olgeta i fasfas, mo bambae oli stat blong kilkilim olgeta bakegen. Jehova i talem se: “Faea wetem salfa, i folfoldaon long [King Gogo] wetem ol soldia blong hem, mo long ol man ya blong ol narafala kantri we oli joen long hem.” (Esik. 38:21, 22) ?Wanem samting bambae i hapen afta?
12. ?Ol neson oli mas save wanem?
12 Ol neson bambae oli save se Jehova nao i givim oda se oli mas lus. Biaen ol man we oli stap long saed blong Setan, bambae oli talem sem samting olsem ol man Ijip ya bifo, we oli biaen long ol man Isrel long Red Si. Oli singaot bigwan se: “!Hemia Hae God ya! !Hem i stap faet long saed blong olgeta!” (Eks. 14:25) Bambae ol neson oli mas save se Jehova i hu. (Ridim Esikel 38:23.) ?Ol samting ya bambae oli stat wetaem?
BAMBAE I NO GAT NARAFALA GAVMAN LONG WOL
13. ?Las haf blong pija ya i soemaot wanem?
13 Wan profet tok long buk blong Daniel, i givhan long yumi blong kasem save se yumi stap laef long wanem taem. Daniel i tokbaot wan bigfala pija blong man we oli wokem long ol defdefren samting. (Dan. 2:28, 31-33) Ol defren haf blong pija ya hemia ol gavman we oli gat bigfala paoa long laef blong ol man blong God bifo, mo tede tu. Ol gavman ya hemia Babilon, Media mo Pesia, Gris, mo Rom. Mo las gavman we i gat bigfala paoa, hem i rul long taem blong yumi. Long profet tok blong Daniel, yumi lanem se leg blong hem daon mo ol fingga blong leg, tufala i pija blong gavman ya. Long taem blong Wol Wo Wan, Inglan mo Amerika i stat blong wok wanples long wan spesel fasin. Taswe namba faef haf blong pija ya we Daniel i tokbaot, hem i Inglan mo Amerika. Leg blong hem daon, hem i las haf blong pija ya. Hemia i soemaot se bambae i no moa gat wan narafala gavman blong man bakegen. Leg blong hem daon mo ol fingga blong leg, oli wokem long aean wetem red graon. Hemia i min se paoa blong Inglan mo Amerika i no moa strong.
14. ?Wanem gavman bambae i rul taem Amagedon i kam?
14 Long profet tok ya, ston we i kamaot long wan bigfala hil, hemia Kingdom blong God we i stanap long 1914. Bigfala hil ya hem i hae rul blong Jehova. I no longtaem, ston ya bambae i bangem bigfala pija ya long tufala leg blong hem daon. Long Amagedon, tufala leg ya wetem ol narafala haf blong pija ya, bambae oli brobrok long ol smosmol pis. (Ridim Daniel 2:44, 45.) Taswe Inglan mo Amerika bambae i gohed blong rul long wol, taem Amagedon i kam. !Bambae i nambawan tumas blong luk profet tok ya i kamtru! * ?Be Jehova bambae i mekem wanem long Setan?
?WANEM BAMBAE I HAPEN LONG SETAN?
15. ?Wanem bambae i hapen long Setan mo ol enjel blong hem?
15 Fastaem, Setan bambae i luk ogenaesesen blong hem long wol ya i lus olgeta. Biaen, wan samting i hapen long hem. Aposol Jon i talemaot samting ya long yumi. (Ridim Revelesen 20:1-3.) ‘Enjel we i aot long heven i kamdaon mo i stap holem ki blong lokem bigfala hol ya we i godaon we i godaon olgeta,’ hemia Jisas Kraes. Hem bambae i sakem Setan mo ol rabis enjel blong hem oli go long bigfala hol ya we i godaon we i godaon, mo oli stap long ples ya blong wan taosen yia. (Luk 8:30, 31; 1 Jon 3:8) I olsem we Jisas i stat blong smasem hed blong snek. *—Jen. 3:15.
16. ?Taem Setan i stap long “bigfala hol,” bambae hem i no moa mekem wanem?
16 I no gat man i save go long “bigfala hol” we i godaon we i godaon. Jehova nomo wetem enjel blong hem we i gat ‘ki blong hol ya,’ tufala i save go long hem. Setan bambae i stap long ples ya blong i “no moa giaman long ol man, blong pulum olgeta oli go krangke.” Baebol i talem se Setan i olsem wan laeon we i “singaot bigwan.” Be taem hem i stap long bigfala hol ya, bambae hem i no moa save mekem wan samting.—1 Pita 5:8.
OL SAMTING WE BAMBAE OLI HAPEN BIFO WE I GAT PIS
17, 18. (1) ?Wanem ol samting we yumi tokbaot long stadi ya, we oli no hapen yet? (2) ?Afta we ol samting ya oli hapen, wanem bambae i stat?
17 I no longtaem, bambae ol samting blong sapraes oli hapen. Yumi wet blong luk taem ya we ol man oli singaot se: ‘!Pis mo seftaem!’ Biaen, bambae yumi luk ol giaman skul oli lus, King Gogo i agensem ol man blong Jehova, mo faet blong Amagedon. Bambae Setan mo ol rabis enjel blong hem oli go long hol ya we i godaon we i godaon. Afta we ol samting ya oli hapen, olgeta rabis fasin bambae oli finis. Long Wan Taosen Yia Rul Blong Kraes, laef blong yumi bambae i nambawan tumas. Bambae yumi harem gud from we yumi “stap long pis.”—Sam 37:10, 11, NTB.
18 Long stadi ya, yumi tokbaot faef samting we yumi “no save luk.” Be long nekis stadi, bambae yumi tokbaot faef narafala samting bakegen we yumi mas “tingbaot” olgeta.
[Futnot]
^ par. 2 Long stadi ya, bambae yumi tokbaot faef long ol samting ya, mo ol narafala faef long nekis stadi.
^ par. 3 1 Tesalonaeka 5:2, 3, NW: “From we yufala i save gud finis we dei blong Jehova i stap kam stret olsem man blong stil i kam long naet. Taem bambae ol man oli talem se: ‘!Pis mo seftaem!’ long taem ya nao, bambae trabol i kam blong spolem ol man ya olgeta. Bambae trabol ya i kam long olgeta wantaem nomo, olsem woman we i gat bel, taem hem i harem nogud blong bonem pikinini. Mo olgeta bambae oli no save ronwe nating.”
^ par. 6 Yu save lukluk buk ya Revelesen—Klosap i Kasem Nambawan En Blong Hem! pej 251-258.
^ par. 14 Long Daniel 2:44, NW, tok ya “flatemgud paoa blong ol kingdom ya,” i blong tokbaot ol king we oli haf blong bigfala pija ya. Be wan narafala profet tok i tokbaot taem ya, i se “ol king blong evri ples long wol” bambae oli kam wanples blong faet agensem Jehova “long bigfala dei blong God ya we i gat olgeta paoa.” (Rev. 16:14; 19:19-21) Taswe long Amagedon, ol king we Daniel i tokbaot wetem olgeta narafala gavman, bambae oli lus.
^ par. 15 Bambae Jisas i smasemgud hed blong snek ya afta long en blong wan taosen yia, taem Setan mo ol rabis enjel blong hem oli go long “bigfala hol ya blong faea, we i fulap long faea mo salfa.”—Rev. 20:7-10; Mat. 25:41.
[Kwestin]
[Bokis/Tok blong pija long pej 9, 10]
FAEF SAMTING WE BAMBAE OLI HAPEN:
1 Ol lida blong wol bambae oli singaot se: ‘!Pis mo seftaem!’
2 Ol neson bambae oli spolem ‘Bigfala Babilon’
3 King Gogo bambae i agensem ol man blong Jehova
4 Faet blong Amagedon
5 Jisas i sakem Setan mo ol rabis enjel blong hem oli go long bigfala hol ya we i godaon we i godaon
