1. Kaba íderaguawa lun agagudúañu wamá luma lun wawandun lénrengunga?

GUFIRÜMA lumuti lagunfulirun profesía burí le tídanbei Bíbülia luagu málübei lan asusereda sügǘ burí le lunbei lánhingichuni ubóu. Kaba íderaguawa lun agagudúañu wamá lubá? Amisuraha lumutiwa apostolu Pábulu lun metenirun wamá “lun katei le arihúabei, luéidigia luagun le marihínwabei”. Le linarün katei, moun lumuti wabulieiduni emenigini le wawagubei lun wawinwandun lun súnwandan, sielu lan yebe o ubouagu. Lidan burí bérusu le bürüwañubei lubaragiñe luma lárigiñe bérusu le, ariha wamuti luagu lamisurahañanu lan Pábulu kristiánugu lun hasaminarun luagu afayeiruahaü le lunbei habihini ha úaraguatiña. Anhein meha gabaroun hamá emenigini le, gayarabei meha hawandun lénrengunga luma éibaahouni (2 Ko. 4:8, 9, 16-18; 5:7).

2. a) Ka lunbei wadügüni lúntima derebugu lan wakipuruni wemenigin? b) Kaba wakutiha lidan arütíkulu le luma lidan le aban?

² Anihein aban adundehani súdiniti lidan eweridihani le líchugubei Pábulu: lúntima derebugu lan wemenigin mosu warihin lóugiñe katei burí le ligibugiñebei wagu, ru wameime giñe wasaminan luagu burí katei le marihin wamagilibei (Ebü. 11:1; 12:1, 2). Ligíati, lidan arütíkulu le luma lidan le aban wakutihaba diisi sügǘ le úarabei luma füramasei lánina ibagari magumuchaditi.

3. a) Ka sügǘ le lunbei lasuseredun ámuñegü uágubei ladimureha 1 Tesalónikana 5:2, 3? b) Kaba gárada háhurera lábutigu polítika, ani kaba gürigia másiñati hóundaraguba lan hama?

³ Tidan aban tídangiñe gárada to labürüdüboun Pábulu houn Tesalónikana, ariñaga lumuti kaba lan asusereda furumiñe (aliihoualá 1 Tesalónikana 5:2, 3). Ladimurehaña meha apostolu Pábulu luagu “luéyuri Heowá” (NM),  le lunbei lagumeserun danme le lagumuchúniwa lau sun relihión le mama inarüniti, ábameti lagumuchun lidan Arümahedón. Lubaragiñeraüme lagumeserun “luéyuri Heowá”, hariñaguba gumadimatiña ubouaguna: “Lídanñein darangilaü luma achoururuni sun katei”, gayarati ladimurehaña lan le luagu ábanrügü sügǘ o luagu saragu. Háfuga hasaminaruba néchanigu luagu aranseméme hamaali lan fiú lídangiñe haturobulin le wéinamutimabei. Ágiati alidihatiña relihión? Kei giñe lánigu habéi ubóu, gayarati hóundaraguba lan hamoun lábutigu polítika (Aruf. 17:1, 2). Anhein ítara liña lubéi, háyeihañanume alidihatiña relihión profetagu mama inarünitiña ha meha lídanbaña binadu Hudá ha uágubaña lariñaga Heowá: “Hariñaga luagu lídanñein lan dan sun katei lau sun wuriba lan” (Her. 6:14; 23:16, 17).

4. Ka katei gufuranda wabéi le úabei gunfuranda hamani hibe-agei gürigia?

⁴ Meberesenga kátañaba lan ariñaga: “Lídanñein darangilaü luma achoururuni sun katei”, larufudubei sügǘ le luagu gumesemémeeli lan luéyuri Heowá. Ligía lariñagunbei Pábulu: “Ánheinti huguya, niduheñu [...] mama lídanñadün luburiga luagu katei luáguti Bungiu lun lárügüdünün luéyuri [...] kei híweruti. Lídanñadün larugounga sun huguya” (1 Tesa. 5:4, 5). Mítarantiwa kei hibe-agei gürigia lugundun wagía gunfuranda wamuti lisudinin katei burí le asuseredubei uguñe weyu según tarufuduni Bíbülia. Ida lubati lagunfulirun profesía luáguti lariñawagún “Lídanñein [lan] darangilaü luma achoururuni sun katei”? Mosu wagurabahan lun warihini. Ligíati, “lunti agagudúañu wamá, súruañu wagíame” (1 Tesa. 5:6; Sof. 3:8).

5. a) Ida luba lagumeserun “saragu asufuriruni”? b) Kaba “urúei” abulieidagua lau tasaminarun luagu tasigiruba lan wínwanñu?

⁵ Ka katei lunbei lasuseredun lárigiñe? Ariñagati Pábulu: “Danme añaha lan gürigia ariñaga: ‘Lídanñein darangilaü luma achoururuni sun katei’, ligíame liabin günringuaü hawagun sódini”. Lábürühoun tuagun “horu”, lidan amu dimurei, tuagun “Babilónia to wéiriboun”, óundaruni lánina relihión le mama inarüniti, ligíaba furumiñeti katei le lunbei lasuseredun danme le liabin günringuaü hawagun gürigia sódini (Aruf. 17:5, 6, 15). Lagumeseruba “saragu asufuriruni” danme le lábürühoun luagun sun relihión le mama inarüniti, íbini hawagun ha ariñagubaña kristiánugu hamá (Mat. 24:21; 2 Tesa. 2:8). Magurabun habéi saragu gürigia sügǘ le. Ka uagu? Ladüga darime dan ligía chóurubei tasandiragun horu tungua, aríagua tungua kei “aban urúei” to ariñaguboun: “Masufurirúnbadina”. Gama lumoun sódinibei tíchugun fe bulíeiguatu lan lau tasaminarun luagu tasigiruba lan wínwanñu. Furesebei  tábürühan kamá hamuga “lidan ábanmeme weyu” (Aruf. 18:7, 8).

6. Kaba san agünrinchaguei sun relihión le mama inarüniti?

⁶ Kaba agünrinchaguoun horu? Afuranguagüda tumuti Lererun Bungiu luagu ábanba lan “mónsturu” le lauti ‘diisi ganchu’ ábürüha tuagun. Aban aturiahani tídangiñe líburu Arufudúni arufudati luagu ONU lan mini lubéi mónsturu le, ánheinti “diisi liganchun” sun óundaruni hani polítiku ha uguñebaña weyu ha íchugubalin hídehan lun “mónsturu funati” ligía mini lubéi (Aruf. 17:3, 5, 11, 12). * Hanarimebei tagünrinchawagun. Hásiuragubei lílana burí ageiraü le tídanbei ONU sun tirisin horu, harufudubei furangu kátounñoun lan, héigibei tǘgürügü, ábameti “hágudunu lau watu gemeti”. Hagumuchuba tau sunsuinagubei (aliihoualá Arufudúni 17:16).

7. Ida luba lagumeserun lábürühan “mónsturu” tuagun “horu”?

⁷ Lidan burí profesía le tídanbei Bíbülia arufudúati giñe ida luba lan lagumeserun tagünrinchawagúniwa horu. Lidan somu manera, líchugubei Heowá ayumahani tidoun hanigi gumadimatiña lun “hadügüni le labusenrubei” hagünrinchagunu horu (Aruf. 17:17). Anihagua burí relihión adüga lun ñein lan wuribu lidan sun ubóu, ligíati gayarabei lubéi hasaminarun néchanigu buídutimabei lan lun hagumuchun lau. Hasaminaruba alidihatiña polítika hani lan houngua hagünrinchaguni sun relihión mama inarüniti. Gama lumoun, le linarün katei Búngiuba ayusuraña lun hagünrinchaguni. Lidan lasansiragun katei sódini, lagarabaaguba aban fánreinti lídangiñe ubóu le lábugiñebei lubafu Satanási luagun le aban fánreinti, ani siñabei ladügün Mafia ni kata lun lararamuni (Mat. 12:25, 26).

8. Kaba ladüga “Gogu” le lídangiñeti lumúan “Magogu”?

⁸ Lárigiñeme gumuguagüda waali lan relihión mama inarüniti, larihíba añahagua lan lubúeingu Bungiu awinwanda “lidan burí uburugu le mabarieirunti”, le “ñein hamuti gürigia darangilutiña [lidan ichouruni]” (Ese. 38:11, 14). Kaba asusereda houn gürigia ha hame lúnbaña hasigirun áhuduragua lun Heowá ani genegebei úabei lan ageindaguti haweigiñe? Genegeti hábürühaba lan “súdaragu héretiña ani gíbetiña” hawagun. Ariñagatu Lererun Bungiu luagu ‘Góguba’ lan lememe Satanási le lídangiñeti lumúan “Magogu” alidihaña saragu gürigia hagía (aliihoualá Esekiéli 38:2, 15, 16). Lunti san ladiheridagüdüniwa katei le?

9. a) Ka katei súdinitimabei woun wagía kristiánugu? b) Ka lunbei wadügüni lun wederebudagüdüni wafiñen?

⁹ Mawinwanduntiña lubúeingu Heowá lau  anufudei ladüga hábürühaba lan saragu áganiñu hawagun. Ladüga ladügǘniwa liri Heowá sándume luma larufudúniwa ligía lan garichabei lun larúeihan, ligía katei súdinitimabei woun mama wesefuruni wabagari. Lidan Ebüréu lóugiñe ǘrüwa-wein wéiyaasu ariñagati: “Ligíame hasubudiruni luagu Au lan [Heowábei]” (Ese. 6:7). Ladimurehaña bérusu le luagu ladügǘniwa liri Heowá sándume ya ubouagu. Ligía ayumaha wabéi lun lagunfulirun fánreinti súdiniti lídangiñeti profesía le tídanbei liliburun Esekiéli, ani afiñetiwa luagu “salba lumutiña [lan] [...] Bungiu ha deregeguabaña houngua lun luéi óuchawaguni” (2 Fe. 2:9). Lidan wagurabahaña lan lagunfulirun profesía le, meferidira wamá chansi lun wederebudagüdüni wafiñen lun gayara lan úaragua wamá lun Heowá meberesenga kaba lan asusereda. Kati lunbei wadügüni? Wafurieidun, waturiahanu Lererun Bungiu, wararamagun asaminara luagu le waliihabei, apurichiha wameime uganu buiti luáguti Larúeihan Bungiu. Ítarati, derebugubei wakipuruni wemenigin luagu ibagari magumuchaditi, kamá hamuga aban óunguru (Ebü. 6:19; Sal. 25:21).

10, 11. Ida luba lagumeserun Arümahedón, ani kaba asusereda lidan wuribu ligía?

¹⁰ Lábürühouniwa hawagun lubúeingu Bungiu ligíaba anüga lidoun ábanya sügǘ le lunbei lánhingichuni ubóu. Layusurubei Heowá Hesusu úara hama ánheligu ha siélubaña lun lageindagun haweigiñe lumutuniña (Aruf. 19:11-16). Ítara luba lagumeserun “wuribu le lánina óunwenbu luéyuri Bungiu le Suntigabafu”, wuribu le gíribei “Arümahedón” (Aruf. 16:14, 16).

¹¹ Kaba asusereda lidan wuribu ligía? Yusu lumuti Heowá Esekiéli lun lasubudiragüdüni woun: “Nanügüba sun luwuyeri wuribani luagun Gogu” liña Bungiu Suntigabafu Heowá. “Hageindaguba luwügüriñanigu hámagua tau eféin”. Lídanme hanufudedagun lánigu Satanási, ábame hageindagun hámagua ábameti háfaragun houngua. Ni Mafia mesefubei, lugundun ariñagati Heowá: “Nadügüba lun lábürühan [...] watu gemeti luma súfuru luagun luma hawagun lisudaranigu luma hawagun saragu gürigia ha úarabaña luma” (Ese. 38:21, 22). Kaba resultóu lanüga lebelurun Bungiu lidoun wuribu le?

12. Kábame katei unti mosu lanme hánharun néchanigu hínsiñe mínsiñe houn?

¹² Hínsiñe mínsiñe houn mósume hánharun néchanigu luagu lúmagiñeti lan Heowá lanarime hagünrinchawagun. Ítara kei súdaragu Ehiptuna ha meha éibaahabaliña ísüraelina dan le hánhiñuragunbalin Barana Funati, másiñati hagúaraguba lan giñe súdaragu ha lábugiñebaña lubafu Satanási danme le siñaguaña houngua: “Lageindaguña [Heowá] Bungiu wama haweigiñe”! (Afu. 14:25.) Le linarün katei, hasubudirubei néchanigu ka lan Heowábei (aliihoualá Esekiéli 38:23). Átirirügaaliti dan lun lasuseredun katei burí le?

13. Ka wasubudirubei luagu liseingün fánreinti le luágubei guáriua le uágubei ladimureha Danieli?

¹³ Anihein aban lídangiñe profesía tídangiñeti Bíbülia tidan liliburun Danieli le íderagubaliwa lun gunfuranda wamani ka lan dan ídanbei wawinwanda. Lidan profesía ligía adimurehati profeta Danieli luagu aban guáriua le adügǘbei kei hágubu gürigia lau ámuñegueinarügü luwuyeri metali (Dan. 2:28, 31-33). Mini lan guáriua le, arúeihani burí gabafuti le achülaagubei aban lárigiñe aban, ani gánihali efekütu hawagu lumutuniña Bungiu lidan binadu dan, kéiburi Babilónia, Media luma Pérüsia, Güresia luma Roma, leti lagumuhóun lidan wadaani. Arufudati profesía le, lugudi lan luma lifinga lugudi guáriua mini lubéi arúeihani gabafuti le. Lidan Furumiñeti Wuribu Wéiriti óundarati Alundu luma Meriga lidan aban  igaburi espechaliti. Ligíati Alundu lubéi luma Meriga liseingünbei fánreinti lídangiñe guáriua le uágubei ladimureha Danieli. Lugudi guáriua lagumuhóunbei fánreinti luagu, arufudati katei le luagu machülaagunhali lan amu arúeihani gabafuti ubouagu. Kei lau lubéi gürabu luma múa ladügǘwa lugudi guáriua luma lifinga lugudi, mini lan lira, débili lan arúeihani lani Alundu luma Meriga.

14. Danme le lagumeserun Arümahedón, kaba arúeihani gabafuti ubouagu?

¹⁴ Lidan ligiaméme profesía, arufudúati Larúeihan lan Bungiu mini lubéi dübü le ábürühabei luéigiñe aban wübü, mini lan wübü le liricha Heowá lun larúeihan. Lidan irumu 1914 lábürüha dübü le, ani lawanseruña lau lóufudagun luagun lugudi guáriua. Lídanme wuribu Arümahedón lañaürüdaguba lugudi guáriua le lau sun le líbiri lúgubu sunsuinagubei (aliihoualá Danieli 2:44, 45). Ligíati, danme le lagumeserun Arümahedón, Alunduba luma Meriga arúeihani gabafuti ubouagu. Mame lanarime ugundani wawagu danme le warihini lagunfulirun profesía le sunsuinagubei! * Gama lumoun, kábati ladüga Heowá lau Satanási? Ariha waméi.

15. Lárigiñe Arümahedón, kaba asusereda lun Satanási hama lumafianu?

¹⁵ Lidan furumiñeti lúgaaru, ligirúba Satanási lun larihini ida luba lan hagumuchagun sun lánigu ha ubouagubaña. Lárigiñe, ábame libihini le yuubei lun. Ariñaga lumuti apostolu Huan woun kaba lan asusereda (aliihoualá Arufudúni 20:1-3). Lárügüdübei Hesukrístu —ánheli le laubei “ligelein fusu le mébehabei”—Satanási hau sun lumafianu, ábameti láguruniña lidoun fusu le mébehabei, ábame lígiruniña ñein milu irumu (Luk. 8:30, 31; 1 Huan 3:8). Ñeinba lagumesera lachuinrawagun tábulugu hewe (Agu. 3:15). *

16. Kaba liyara Satanási adüga lidan “fusu le mébehabei”?

¹⁶ Katei san “fusu le mébehabei” le ñéinhinba lubéi lachüürǘwa Satanási hama máfianu? Ligía aban fulasu le ñein lubéi siñá lan lachülürün ni aban, luéidigia Heowá luma ánheli le unbei líchigei “ligelein fusu le mébehabei”. Ñeinba lakipurúa Satanási, ani siñabei ladügün ni kata kamá hamuga hilaali lun masigirun lan eferidiraguagüdaña néchanigu. Daruwaalime liyuma “liñún gáñiti”! (1 Fe. 5:8.)

17, 18. a) Ka burí sügǘ lídangiñe le lunbei lasuseredun ámuñegü akutiha wamaalibei? b) Ida luba wabagari lárigiñeme lasuseredun sügǘ burí le?

¹⁷ Gumesemémeeli lanarime burí sügǘ le lunbei lánhingichuni ubóu. Memeniha wanigi warihini ida luba lan lichugún ñunsu “Lídanñein darangilaü luma achoururuni sun katei”. Lárigiñe, ábame warihini tagünrinchawagun Babilónia to Wéiriboun, lábürühan Gogu lídangiñeti lumúan Magogu hawagun lubúeingu Heowá luma wuribu Arümahedón. Lárigiñe, ábame lagurún Satanási hau sun lumafianu lidoun fusu le mébehabei. Danme le úaali wuribani, lasansiruba wabagari sunsuinagubei lábugiñe Larúeihan Kristu le lánina Milu Irumu le ñeinba lubéi wabagarida “lidan darangilaü le dayarüti” (Sal. 37:10, 11).

¹⁸ Akutihaadiwa seingü sügǘ ‘le marihínwagilibei’, gama lumoun mosu ‘wetenirun lun’. Lidan le aban arütíkulu wakutihaba séingüya sügǘ le lunbei lasuseredun ámuñegü.