Lafason ki sa lemonn pou ariv ver son lafen
Lafason ki sa lemonn pou ariv ver son lafen
“Me pour zot mon bann frer, zot pa dan fernwanr, e sa zour pa pou sirprann zot parey en voler.”—1 TESA. 5:4.
ESKI OU KAPAB EKSPLIKE?
Ki levennman ki nou pa ankor vwar ki ganny dekrir dan sa bann verse swivan?
1. Kwa ki pou ed nou kontinyen veye e fer fas avek bann leprev?
IANNAN bann levennman sokan ki pou arive byento. Lakonplisman bann profesi Labib i konfirm sa, alor nou bezwen kontinyen veye. Kwa ki pou ed nou fer sa? Zapot Pol i ankouraz nou pour “konsern nou avek . . . sa ki nou pa war.” Alor nou bezwen gard antet nou rekonpans, swa lavi eternel dan lesyel oubyen lo later. Ler zapot Pol ti ekrir sa parol i ti pe ankouraz son bann konpanyon Kretyen pour konsantre lo rekonpans ki zot ti pou gannyen si zot reste fidel. Si zot ti fer sa ki i ti dir zot, sa ti pou ed zot fer fas avek leprev ek persekisyon.—2 Kor. 4:8, 9, 16-18; 5:7.
2. (a) Ki nou bezwen fer pour ki nou lespwar i sir? (b) Ki nou pou egzaminen dan sa lartik ek sa lot ki swiv?
2 Dan sa konsey ki Pol ti donnen i annan en prensip enportan: Fodre ki nou annan en lespwar sir e port latansyon lo bann keksoz ki nou pa vwar. Nou bezwen konsantre lo bann levennman enportan ki nou pa ankor vwar. (Ebr. 11:1; 12:1, 2) Aprezan, annou egzamin dis levennman ki pou arive byento ki relye avek nou lespwar pour viv pour touzour. *
KI POU ARIVE ZIS AVAN LAFEN?
3. (a) Ki levennman 1 Tesalonisyen 5:2, 3 i dir pou arive byento? (b) Ki bann dirizan politik pou fer e posibleman lekel ki pou zwenn ansanm avek zot?
3 Pol ti mansyonn en levennman ki pou arive byento dan son let pour bann Tesalonisyen. (Lir 1 Tesalonisyen 5:2, 3.) I ti met lanfaz lo “zour Senyer.” I pou en peryod letan ki pou konmans avek destriksyon fo larelizyon e i pou fini avek lager Armagedon. Zis avan zour Zeova i konmanse, bann dirizan lemonn pou dir ki “Tou i an-pe e an sekirite.” Sa i kapab pe refer avek en levennman oubyen en seri levennman. Petet bann nasyon pou mazinen ki zot pros pour rezourd serten gro problenm dan lemonn. Ki nou pou dir lo bann sef relizye? Zot fer parti lemonn, alor i posib ki zot pou zwenn avek bann dirizan politik pour fer sa deklarasyon. (Rev. 17:1, 2) Par fer sa, bann sef relizye pou azir parey avek bann fo profet Zida dan letan lontan. Konsernan zot, Zeova ti dir: “Zot [pe] dir: ‘I annan lape! I annan lape!’ kan napa lape.”—Zer. 6:14; 23:16, 17.
4. Ki nou nou konpran kontrerman avek lezot dimoun?
4 Nenport ki ki dir: “Tou i an-pe e an sekirite,” sa pou endike ki zour Zeova pe al konmanse. I pour sa rezon ki Pol ti dir: “Mon bann frer, zot pa dan fernwanr, e sa zour pa pou sirprann zot parey en voler. Zot tou, zot bann zanfan lalimyer.” (1 Tesa. 5:4, 5) Kontrerman avek lezot dimoun, nou nou konpran sa ki Labib i dir konsernan bann levennman ki pe arive ozordi. Me ki mannyer sa profesi kot dimoun pou dir “tou i an-pe e an sekirite” pou ganny akonplir? Nou bezwen espere pour vwar. Alor annou determinen pour “reste vizilan e azen.”—1 Tesa. 5:6; Tsef. 3:8.
“EN LARENN” KI’N MAL KALKILE
5. (a) Ki mannyer “gran ladetres” pou konmanse? (b) Lekel sa “larenn” ki’n mal kalkile?
5 Ki sa lot levennman ki pou arive apre? Pol ti dir: “Kan dimoun i ava pe dir: ‘Tou i an-pe e an sekirite,’ alor en sel kou destriksyon pou tonm lo zot.” (Nou ki’n met an italik.) Premye faz sa “destriksyon” ki pou ariv “en sel kou” i latak lo “Gran Babilonn,” setadir tou fo larelizyon ki osi ganny apele “sa fanm prostitye.” (Rev. 17:5, 6, 15) Sa latak kont tou fo larelizyon enkli bann ki pretann ki zot Kretyen pou konmansman sa “gran ladetres.” (Mat. 24:21, NW; 2 Tesa. 2:8) Sa levennman pou sirprann bokou dimoun. Akoz? Parski sa fanm prostitye pou ankor pe konsider li konman “en larenn” ki “pa pou zanmen konn dey” letan sa destriksyon i arive. Me i pou realize ki i’n mal kalkile. I pou ganny detrir en sel kou, i pou konmsi sa i ariv dan “en sel zour.”—Rev. 18:7, 8.
6. Lekel ki pou detrir fo larelizyon?
6 Labib i dir ki en “bebet” ki annan “dis korn” pou atak sa fanm prostitye. Ler nou etidye liv Revelasyon nou konpran ki sa bebet pe refer avek Nasyon-z-ini. “Sa dis korn” i reprezant tou bann pouvwar politik ki siport sa “bebet rouz.” * (Rev. 17:3, 5, 11, 12) Ki kantite dega sa latak pou fer? Bann nasyon ki reprezant Nasyon-z-ini pou depouy sa prostitye avek tou sa ki i posede, revel sa ki i vreman ete, devor li e “bril li avek dife.” Son destriksyon pou final.—Lir Revelasyon 17:16.
7. Kwa ki pou fer “sa bebet” atak sa prostitye?
7 Profesi Labib i endike kwa ki pou deklans sa latak. Zeova pou met dan leker bann dirizan politik “lavolonte pour akonpli son plan,” setadir detrir sa prostitye. (Rev. 17:17) Larelizyon i touzour sa lafors ki pous bann nasyon pour fer lager, alor zot pou panse ki si sa prostitye i ganny detrir, zot pei ki pou benefisye. Anfet, ler sa bann dirizan pou atake, zot pou krwar ki zot pe akonplir ‘zot lentansyon.’ An realite, Bondye pou servi zot pour detrir konpletman tou fo larelizyon. Dan sa fason, en parti sistenm Satan pou atak en lot parti son sistenm e Satan pa pou kapab fer nanryen pour anpes sa arive.—Mat. 12:25, 26.
LATAK LO PEP BONDYE
8. Ki latak “Gog sorti dan pei Magog” pou fer?
8 Apre ki fo larelizyon pou ganny detrir, bann serviter Bondye pou ankor “pe viv an sekirite” e “san miray.” (Ezek. 38:11, 14) Ki pou arive avek sa group dimoun ki pou paret pe viv san defans e ki pe kontinyen ador Zeova? I paret ki zot pou ganny atake par “bokou pep.” Parol Bondye i dekrir sa levennman konman latak “Gog sorti dan pei Magog.” (Lir Ezekyel 38:2, 15, 16. *) Ki mannyer nou devret vwar sa latak?
9. (a) Kwa ki pli enportan pour bann Kretyen? (b) Ki nou devret fer la konmela menm pour ranforsi nou lafwa?
9 Lefet ki nou konn davans ki pep Bondye pou ganny atake, nou pou napa en tro gran lenkyetid. O kontrer, sa ki pli enportan pour nou se ki non Zeova i ganny sanktifye e son souvrennte i ganny zistifye olye ki zis mazin nou prop delivrans. Anfet plis ki 60 fwa Zeova in dir: “Zot pou bezwen konnen ki mwan mon Zeova.” (Ezek. 6:7, not.) Nou enpasyan pour vwar sa laspe remarkab dan profesi Ezekyel ganny akonplir. Nou annan konfyans ki Zeova “i konnen ki mannyer [i] pou delivre bann dimoun ki atase avek li dan difikilte.” (2 Pyer 2:9) Antretan, nou anvi servi tou loportinite ki nou annan pour ranforsi nou lafwa pour ki nou kapab reste fidel avek Zeova dan nenport leprev ki nou pou fer fas avek. Ki nou devret fer? Nou devret priye, etidye e medit lo Parol Bondye e anons sa mesaz Rwayonm avek lezot. Si nou fer sa, nou lespwar pour ganny lavi eternel pou solid konman en “lank.”—Ebr. 6:19; Ps. 25:21.
BANN NASYON POU BEZWEN KONN ZEOVA
10, 11. Ki mannyer Armagedon pou konmanse e ki pou arive dan sa letan?
10 Ki sa levennman sokan ki pou ganny deklanse par sa latak lo bann serviter Bondye? Atraver Zezi ek bann lanz, Zeova pou entervenir an faver Son pep. (Rev. 19:11-16) Sa lentervansyon pou sanmenm sa konba “gran zour Bondye Toupisan,” setadir Armagedon.—Rev. 16:14, 16.
11 Atraver Ezekyel, Zeova ti koz konsernan sa lager: “‘Mon pou apel dan tou mon bann rezyon montanny en lepe kont [Gog],’ se sa ki Souvren Senyer Zeova i deklare. ‘Lepe sakenn pou vir kont son prop frer.’” Tou bann ki pou lo kote Satan pou per e dan konfizyon e zot pou touy kanmarad. Me maler pou osi ariv lo Satan. Zeova ti dir: “Mon pou fer dife ek souf tonm lo [Gog] ek tou son larme e lo bokou pep ki pou avek li.” (Ezek. 38:21, 22) Ki pou rezilta sa aksyon ki Bondye pou fer?
12. Ki bann nasyon pou oblize fer?
12 Bann nasyon pou bezwen realize ki se Zeova ki’n donn lord pour detrir zot. Zis parey bann Ezipsyen dan letan lontan ti dir ler zot ti atak bann Izraelit kot Lanmer Rouz, probableman bann dimoun ki lo kote Satan pou kriye dan dezespwar: “Zeova pe sirman lager pour zot.” (Egz. 14:25) Wi, bann nasyon pou oblize konnen lekel Zeova. (Lir Ezekyel 38:23. *) Eski i reste bokou letan avan ki sa bann levennman i arive?
POU NAPA EN LOT POUVWAR MONDYAL
13. Ki nou konnen konsernan senkyenm parti sa stati ki Danyel ti dekrir?
13 En profesi dan liv Danyel i permet nou konnen kote nou’n arive dan sa letan ki nou pe viv ladan. Danyel i dekrir en stati dan laform imen ki ti ganny fer avek diferan metal. (Dan. 2:28, 31-33) Sa stati i reprezant diferan pouvwar mondyal ki’n annan lenfliyans lo pep Bondye dan letan lontan e ozordi. Sa bann pouvwar mondyal i Babilonn, Med ek Pers, Lagres, Ronm e sa enn dernyen ki pou egziste dan nou letan. Profesi Danyel i montre ki sa dernyen pouvwar mondyal i ganny reprezante par lipye ek ledwa lipye sa stati. Pandan Premye Lager Mondyal, Grannbretanny ek Leta-z-ini ti annan en relasyon spesyal kot zot ti travay avek kanmarad. Wi, senkyenm parti sa stati i Pouvwar Mondyal Anglo-Ameriken. Lipye i dernyen parti sa stati e sa i endike ki pou napa en lot pouvwar mondyal apre sa enn. Lefet ki lipye ek ledwa lipye sa stati i an fer ek larzil, sa i montre ki Pouvwar Anglo-Ameriken i fay.
14. Ki sa pouvwar mondyal ki pou dominan zour Armagedon?
14 Dan sa menm profesi, Rwayonm Bondye i ganny reprezante par en gro ros ki ti detase avek en montanny e sa ti arive an 1914. Sa montanny i reprezant souvrennte Zeova oubyen son drwa pour dirize. Sa ros pe desann avek en vites ver lipye sa stati. Zour Armagedon, sa lipye ek leres parti sa stati pou ganny kraze. (Lir Danyel 2:44, 45. *) Alor Pouvwar Mondyal Anglo-Ameriken pou ankor pe dominen kan Armagedon i arive. Pa i pou gou pour vwar lakonplisman sa profesi! * Me ki Zeova in rezerve pour Satan?
KI POU ARIVE AVEK PLI GRAN LENNMI BONDYE?
15. Ki pou arive avek Satan ek son bann demon apre Armagedon?
15 Premyerman Satan pou vwar son lorganizasyon lo later ganny detrir konpletman. Apre sa, en keksoz pou arive avek Satan. Zapot Zan i rakont sa ki pou arive. (Lir Revelasyon 20:1-3.) Zezi Kri, sa ‘lanz ki annan lakle labim’ pou sezi Satan ek son bann demon e zet zot dan labim pour mil an. (Lik 8:30, 31; 1 Zan 3:8) Kan sa pou arive, latet sa serpan pou konmans ganny kraze. *—Zen. 3:15.
16. Lefet ki Satan pou dan labim, ki sa pou vedir?
16 Ki sa “labim” kot Satan ek son bann demon pou ganny zete? Sa mo Grek aʹbys·sos ki Zan ti servi i vedir “vreman profon.” Sa mo i osi ganny tradwir konman “san en limit” oubyen “en lespas vid san fon.” Alor i en landrwa kot personn pa kapab arive eksepte Zeova ek sa lanz ki “annan lakle labim.” Laba Satan pou dan en leta inaktif kot “i a nepli kapab tronp bann nasyon.” Lagel sa “lyon ki kriye” pou vreman ganny fermen!—1 Pyer 5:8.
BANN LEVENNMAN KI POU ANMENN VER EN LETAN LAPE
17, 18. (a) Ki levennman ki nou pa vwar pour lemoman ki nou’n egzaminen ziska prezan? (b) Apre sa bann levennman ki kalite peryod letan nou pou viv ladan?
17 Tre byento i pou annan bann sanzman enportan ek levennman sokan ki pou arive. Nou enpasyan pour vwar ki mannyer sa parol ki dir “tou i an-pe e an sekirite” pou ganny akonplir. Nou pou osi vwar destriksyon Gran Babilonn, latak Gog sorti Magog, lager Armagedon e kot Satan ek son bann demon i ganny zete dan labim. Apre sa bann levennman, ler tou bann mesan pou nepli la, nou pou konmans en nouvo lepok, setadir Renny Milener Kris kot nou pou viv dan “labondans lape.”—Ps. 37:10, 11.
18 An plis ki sa senk levennman ki nou’n egzaminen ziska prezan, i annan lezot keksoz “ki nou pa war” ki nou oule “konsern nou avek.” Sa bann levennman pou ganny egzaminen dan lartik swivan.
[Not anba lo paz]
^ par. 2 Sa dis levennman pou ganny egzaminen dan sa lartik ek sa lot ki swiv.
^ par. 6 Vwar liv Revelation—Its Grand Climax at Hand! paz 251-258 an Angle.
^ par. 8 Ezekyel 38:2, 15, 16: “2 Garson zonm, vir ou figir kont Gog sorti dan pei Magog, Sef Mesek ek Toubal e profetiz kont li.” “15 Ou pou sorti kot ou, sa landrwa pli lwen dan nor, ou avek bokou pep, zot tou lo seval, en gran lafoul e menm plizyer lafors militer. 16 Ou pou definitivman vin atak mon pep Izrael parey bann nyaz pour kouver pei. Sa pou ariv dan bann dernyen zour e mon pou fer ou vin atak mon pei pour ki bann nasyon i konn mwan kan mon pou sanktifye mwan devan zot lizye, O Gog.”
^ par. 12 Ezekyel 38:23: “Sirman mon pou fer mwan gran e mon pou sanktifye mon lekor e fer bokou nasyon vwar ki mon ete; e zot pou bezwen konnen ki mwan mon Zeova.”
^ par. 14 Danyel 2:44, 45: “44 Dan bann zour sa bann lerwa, Bondye lesyel pou etabli en rwayonm ki pa pou zanmen ganny detrir. Sa rwayonm li menm pa pou pas avek okenn lezot pep. I pou kraz e met en lafen avek tou sa bann rwayonm e li menm i pou dire pour en letan endefini. 45 Lefet ki ou ti vwar en ros detase avek sa montanny non par lanmen zonm e i ti kraz sa fer, kwiv, larzil, larzan ek lor. Bondye li menm in fer konnen lerwa sa ki pou arive apre sa. Sa rev i vre e son enterpretasyon i diny konfyans.”
^ par. 14 Sa fraz “met en lafen avek tou sa bann rwayonm” dan Danyel 2:44 pe refer avek bann rwayonm oubyen pouvwar mondyal ki ganny reprezante par diferan parti sa stati. Par kont i annan en profesi Labib ki montre ki sa “bann lerwa lo later an antye” pou zwenn ansanm pour lager kont Zeova lo “sa gran zour Bondye Toupisan.” (Rev. 16:14, nou ki’n met an italik; 19:19-21) Alor, pa zis bann rwayonm ki sa stati pe reprezante ki pou ganny detrir me tou lezot rwayonm osi pou ganny detrir zour Armagedon.
^ par. 15 Latet sa serpan pou fini ganny kraze a lafen sa mil an kan Satan ek son bann demon pou ganny zete dan “lak dife avek souf.”—Rev. 20:7-10; Mat. 25:41.
[Kestyon]
[Bwat lo paz 9]
SENK LEVENNMAN KI POU ARIVE BYENTO:
1 Lanons ki “Tou i an-pe e an sekirite”
2 Bann nasyon i atak e detrir “Gran Babilonn”
3 Latak lo pep Zeova
4 Lager Armagedon
5 Satan ek son bann demon i ganny zete dan labim
