1. Dahaka ese ita do ia durua ita gima noho bona hahetoho ita haheaukalaia totona?

 KAHIRAKAHIRA tanobada ai gari gaudia do idia vara. Unai ita abia dae badina, Baibel ena peroveta herevadia ese idia hamomokania. Unai dainai ita gima noho be gau badana. Dahaka ese ita do ia durua? Aposetolo Paulo ese ita ia hagoadaia, “matana dekenai ita itaia gaudia ita raraia noho lasi, to ita itaia lasi gaudia ita raraia noho” be namo. Oibe, namona be ita laloatao, herevana ita be guba o tanobada ai do ita noho, to Iehova ese ita dekenai mauri hanaihanai do ia henia. Paulo ese iena negai idia noho Keristani taudia ia hagoadaia, badina ia ura Dirava abidadama henia karana amo do idia abia hahenamo idia laloa noho totona. Danu, do idia abia hahenamo laloa noho karana ese idia do ia durua dagedage bona hahetoho idia haheaukalaia totona.​—⁠2 Kor. 4:8, 9, 16-18; 5:7.

2. (a) Iseda helaro ia goada totona dahaka ita karaia be namo? (b) Inai stadi bona wiki vaira ena stadi ai, dahaka do ita herevalaia?

² Paulo ena sisiba ese ita dekenai, mai anina bada gauna ta ia hadibaia. Bema ita ura iseda helaro ia goada noho, ita itaia gaudia sibona lasi, to vaira negana ai do idia vara gaudia​—⁠ita do itaia lasi gaudia unai​—⁠ita laloa be mai anina bada. (Heb. 11:1; 12:1, 2) Inai stadi bona wiki vaira ena stadi ai, vaira negana ai do idia vara gaudia 10 do ita herevalaia. Unai gaudia do idia vara guna, bena taunimanima be mauri hanaihanai do idia abia.

3. (a) Tesalonika Ginigunana 5:2, 3 ese edena vaira negana ai do ia vara gauna ia herevalaia? (b) Gavamani gunalaia taudia be dahaka do idia karaia? Daidia be unai bamona do idia karaia danu?

³ Paulo be Tesalonika taudia ia tore henia neganai, vaira negana ai do ia vara gauna ta ia herevalaia. (1 Tesalonika  5:2, 3 duahia.) Unai revareva lalonai, Paulo ese “Iehova ena dina” ia herevalaia. Unai dina ia matamaia neganai, tomadiho koikoi ibounai be dika do idia davaria, bona dokonai Aramagedono tuarina do ia vara. Iehova ena dina be kahirakahira do ia matamaia neganai, tanobada gunalaia taudia do idia gwau, “Maino bona noho namo!” Reana unai boiboi be nega tamona o sisina momo do idia gwauraia. Reana tanobada gavamanidia do idia laloa, idia be hegeregere hekwakwanai badadia idia hamaoromaoroa totona. To, dubu gunalaia taudia be dahaka do idia karaia? Idia be tanobada ena dainai, reana idia bona gavamani taudia be “Maino bona noho namo!” herevana do idia gwauraia. (Apok. 17:1, 2) Unai amo tomadiho gunalaia taudia edia kara be idaunegai Iuda peroveta koikoi taudia bamona do idia gwau: “Maino, maino.” To, Iehova ia gwau maino be ia noho lasi.​—⁠Ier. 6:14; 23:16, 17.

4. Ita be dahaka gaudia ita lalopararalaidia, to momo be idia laloparara lasi?

⁴ Herevana daika ese inai hereva, “Maino bona noho namo!” ia gwauraia, to Iehova ena dina be do ia ginidae. Paulo ia gwau: “Tadikaka e, umui be dibura lalonai umui noho lasi, unai dainai unai dina dekenai do umui hoa lasi, henaohenao tauna be dina ena diari dekenai ia hoa bamona, badina umui ibounai be diari ena natudia.” (1 Tes. 5:4, 5) Ita be Baibel ena hereva, hari idia vara noho gaudia dekenai ita lalopararalaia, to momo be idia laloparara lasi. Edena dala ai inai peroveta herevana, “Maino bona noho namo!” do ia guguru? Ita naria noho bona do ita itaia. Unai dainai, namona be “ita noga noho bona iseda laloa maoromaoro karana ita dogoatao noho.”​—⁠1 Tes. 5:6; Sep. 3:8.

5. (a) “Hisihisi badana” be edena bamona do ia matamaia? (b) Daika ia laloa ia be “kwini ta” bamona dainai, ia dekenai gau dikana ta do ia vara lasi?

⁵ Gabeai dahaka do ia vara? Paulo ia gwau: “Inai hereva, ‘Maino bona noho namo!’ idia gwauraia neganai, karaharaga dika bada herea be idia latanai do ia ginidae.” Unai dika be tanobada ena tomadiho koikoi ibounai latanai do ia vara. Baibel ese tomadiho koikoi ia gwauraia, “Babulonia Badana” o “ariara hahinena.” (Apok. 17:5, 6, 15) Tomadiho koikoi ibounai bona Kerisendom latanai unai dika ia vara neganai, “hisihisi badana” do ia matamaia unai. (Mat. 24:21; 2 Tes. 2:8) Momo do idia hoa. Dahaka dainai? Badina guna amo ela bona “hisihisi badana” negana, ariara hahinena ia laloa ia be “kwini ta” bona ‘do ia taitai lasi.’ Ia laloa ia dekenai gau dikana ta do ia vara lasi. To, haraga momokani do ia laloparara ena lalohadai be kerere, badina  “dina tamona lalonai” do idia haorea haraga.​—⁠Apok. 18:7, 8.

6. Daika ese tomadiho koikoi oreadia do ia hadikaia ore?

⁶ Baibel ia gwau, “dagedage animal” mai ena “doana 10” ese ariara hahinena do ia hadikaia. Apokalupo bukana ita stadilaia neganai, ita diba unai dagedage animal be United Nations (UN) ia laulaulaia. Unai “dagedage animal kakakakana” idia durua gavamani ibounai be “doana 10” ese ia laulaulaia. a (Apok. 17:3, 5, 11, 12) Edena dala ai “dagedage animal” ese “ariara hahinena” do ia hadikaia? United Nations henunai idia noho gavamani ibounai ese ariara hahine ena taga do idia dadia, ena matabodaga karadia do idia hahedinaraia, ena tauanina do idia ania, bona lahi dekenai do “idia gabua ore.” Oibe, tomadiho koikoi ibounai be do idia hadikaia ore momokani.​—⁠Apokalupo 17:16 duahia.

7. Edena dala ai “dagedage animal” ese ariara hahinena do ia hadikaia?

⁷ Baibel ena peroveta herevadia ese unai hadikaia karana ia matamaia dalana idia gwauraia hedinarai danu. Iehova ese “iena palani” be gavamani oreadia edia lalona dekenai do ia atoa, unai amo idia ese iena ura do idia hagugurua, bona ariara hahinena do idia hadikaia. (Apok. 17:17) Tomadiho oreadia ese tanobada ai tuari bona hekwakwanai momo idia havaraia noho. Unai dainai, gavamani oreadia idia laloa ariara hahinena idia hadikaia ore neganai, namo do ia vara. Bona unai bamona do idia karaia neganai, do idia laloa edia ura idia hagugurua unai. To, Dirava ese idia do ia gaukaralaia tomadiho koikoi ibounai idia hadikaia ore totona. Oibe, Satani ena orea taudia be sibodia do idia tuari heheni, bona Satani ese unai do ia koua diba lasi.​—⁠Mat. 12:25, 26.

8. “Goga, Magoga tano tauna” be dahaka do ia karaia?

⁸ Ena be tomadiho koikoi oreadia ibounai idia ore, to Dirava ena hesiai taudia be mai “maino” ida ‘magu lasi’ hanuadia ai do idia noho bamona. (Ese. 38:11, 14) Anina be Iehova idia tomadiho henia noho, to toana be gau ta ese idia ia gimaia lasi. Vadaeni idia dekenai dahaka do ia vara? Toana be “bese idauidau” ese idia do idia tuari henia. Baibel ia hahedinaraia “Goga, Magoga tano tauna” ese idia do ia tuari henia. (Esekiela 38:2, 15, 16 duahia.) Unai tuari dainai ita gari be namo, a?

9. (a) Keristani tauna dekenai dahaka be mai anina bada? (b) Dahaka ita karaia be namo iseda abidadama ita hagoadaia totona?

⁹ Ita diba Goga ese Dirava ena taunimanima do ia tuari henia, to unai ita garilaia lasi be  namo. Eda hahemauri totona ita lalohekwarahi momo lasi. To, ita laloa bada gauna badana be: Iehova ena ladana do ita hahelagaia bona ena lohia siahuna do ita abia isi. Iehova be nega 60 mai kahana ia gwau: “Unai neganai do umui diba lau be Lohiabada.” (Ese. 6:7) Unai be Esekiela ena peroveta hereva badana ta, bona ita ura bada ena guguru dalana do ita itaia. Bona ita abia dae momokani, “Iehova ese ia idia badinaia taudia be hahetoho amo ia hamauridia dalana ia diba.” (2 Pet. 2:9) Danu, ita ura iseda abidadama ita hagoadaia, unai amo herevana dahaka ia vara, to do ita haheauka bona Iehova do ita badinaia noho. Vadaeni, dahaka ita karaia be namo? Namona be ita guriguri, Baibel ita stadilaia bona laloa dobu, bona Basileia ena sivarai namona be ma haida dekenai ita harorolaia. Unai amo iseda mauri hanaihanai helarona do ita dogoatao auka noho. Unai helaro be “dogo” bamona, ita ia durua Dirava ita abidadama henia noho totona.​—⁠Heb. 6:19; Sal. 25:21.

10, 11. Edena dala ai Aramagedono do ia matamaia? Bona unai negai dahaka do ia vara?

¹⁰ Iehova ena taunimanima idia tuari henia neganai, dahaka hoa gauna do ia vara? Iehova ese Iesu bona guba tuari oreadia do ia gaukaralaia, Dirava ena taunimanima idia durua totona. (Apok. 19:11-16) Baibel ia gwau, unai be “Siahu Ibounai Diravana ena dina badana ena tuari,” bona ena ladana be Aramagedono.​—⁠Apok. 16:14, 16.

¹¹ Iehova be unai tuari ia herevalaia neganai, ia gwau: “Lau ese gari karadia idauidau momo do lau havaraia, Goga do lau hadikaia totona, vadaeni iena tuari taudia ese idia ta ta dekenai do idia tuari henia, vadaeni tuari kaia dekena amo do idia mase.” Satani ena taunimanima be do idia daradara bona gari dainai, do idia ala-ala heheni. Iehova ia gwau: “Lahi bona salipa be Goga, bona iena orea taudia, bona ia idia durua besedia edia latanai do lau siaia diho.” (Esek. 38:21, 22) Dirava ese unai ia karaia neganai, dahaka do ia vara?

12. Tanobada gavamanidia be dahaka do idia lalopararalaia?

¹² Tanobada gavamanidia be gabeai do idia laloparara, idia be Iehova ena oda dainai dika bada idia davaria. Idaunegai, Davara Kakakakana ai Israela besena idia lulua lao Aigupito taudia be dika idia davaria neganai, mai gari ida idia boiboi: ‘Lohiabada ese idia ia durua, to ita ia tuari henia noho’! (Eso. 14:25) Unai hegeregerena, Satani ena taunimanima be dika idia davaria neganai, unai bamona do idia boiboi bona do idia diba Iehova be daika. (Esekiela 38:23 duahia.) Unai gaudia be kahirakahira do idia vara, a?

13. Kaivakuku ese ia hahedinaraia Basileia Badana namba faiv be daika ia laulaulaia?

¹³ Daniela ena peroveta herevana ta amo do ita laloparara ita be edena nega lalonai ita noho. Daniela ese kaivakuku ta ena toana ia herevalaia. Ia gwau unai kaivakuku be taunimanima ta bamona, bona ena tauanina ena kahana ta ta be gau idauidau amo idia karaia. (Dan. 2:28, 31-33) Unai kaivakuku ese tanobada basileia badadia idauidau ia laulaulaia. Idia be idaunegai bona hari Dirava ena taunimanima idia inai henia. Unai basileia badadia be Babulonia, Mede-Parasa, Greece, Roma bona basileia badana ginigabena be iseda negai ia do lohia noho. Daniela ena peroveta herevana amo ita diba, unai kaivakuku aena bona aena kwakikwaki be basileia ginigabena ia laulaulaia. Tanobada Tuarina Ginigunana lalonai, Britain bona United States be tura namodia bamona idia gaukara hebou. Unai dainai, kaivakuku ese ia hahedinaraia basileia badana namba faiv be Anglo-America. Kaivakuku ena dokona kahana be ena aena dainai, ia hahedinaraia Anglo-America Basileia  Badana murinai, basileia badana ma ta do ia lohia lasi. Kaivakuku ena aena bona aena kwakikwaki be auri bona raro amo idia karaia, anina be Anglo-America Basileia Badana be ia goada momokani lasi.

14. Edena basileia badana do ia lohia ela bona Aramagedono ia mai?

¹⁴ Unai peroveta herevana ese ia hahedinaraia, nadi badana ta be ororo amo ia mai bona kaivakuku ia botaia. Unai ororo be Iehova ena lohia siahuna ia laulaulaia, bona unai nadi be Dirava ena Basileia ia laulaulaia. Lagani 1914 ai, unai nadi be ororo amo ia toreisi. Kahirakahira, Aramagedono ai unai nadi ese kaivakuku ena aena do ia botaia, bona ena kahana ibounai do idia makohia maragimaragi. (Daniela 2:44, 45 duahia.) Unai ese ia hahedinaraia, Anglo-America Basileia Badana be do ia lohia ela bona Aramagedono ia mai. Unai peroveta herevana ia guguru ita itaia be moale bada gauna! b To, Iehova be Satani dekenai dahaka do ia karaia?

15. Aramagedono murinai, Satani bona ena demoni dekenai dahaka do ia vara?

¹⁵ Satani ese tanobada ai iena orea idia hadikaia karana do ia itaia guna. Bena gabeai, ia sibona dekenai gau ta do ia vara. Aposetolo Ioane ese ita dekenai unai ia hahedinaraia. (Apokalupo 20:1-3 duahia.) Ia gwau, “aneru ta lau itaia, guba amo ia diho, ena imana dekenai guri dobu masemase ena ki” ia dogoatao. Unai aneru be Iesu Keriso, bona ia ese Satani bona ena demoni be guri dobu masemase lalonai do ia negea bona lagani 1,000 unuseniai do idia noho. (Luka 8:30, 31; 1 Ioa. 3:8) Unai be Iesu ese Satani ena kwarana do ia haberoa karana ena kahana ginigunana. c​—⁠Gen. 3:15.

16. Satani be “guri dobu masemase” lalonai do ia noho neganai, dahaka do ia karaia?

¹⁶ “Guri dobu masemase” ena anina be dahaka? Unai hereva ena anina be, dobu momokani eiava guri ta ena dokona be lasi. Ta be unai gabu ia lao diba lasi to Iehova bona ena aneru sibona, badina unai aneru ese “guri dobu masemase ena ki” ia dogoatao. Satani be unuseniai do idia atoa, unai amo ia ese “tanobada gavamanidia do ia hakaudia kerere lou lasi.” Baibel ia gwau, Satani be “boiboi bada laiona” ta bamona. To, guri dobu masemase lalonai do ia noho neganai, ena uduna do ia koua.​—⁠1 Pet. 5:8.

17, 18. (a) Inai stadi lalonai edena gaudia faiv ita herevalaia? (b) Unai gaudia idia vara murinai, dahaka do ia vara?

¹⁷ Kahirakahira, do ita itaia tanobada ai mai anina bada bona gari gaudia do idia vara. Taunimanima ese “Maino bona noho namo!” do idia gwauraia. Gavamani oreadia ese Babulonia Badana do idia hadikaia, bena Goga, Magoga tano tauna ese Dirava ena taunimanima do ia tuari henia, bona Aramagedono tuarina do ia vara. Satani bona ena demoni be guri dobu masemase lalonai do idia negea. Unai murinai, kara dika ibounai do idia ore. Keriso ena Lagani 1,000 Lohia Negana ai, iseda mauri be do ia idau momokani, bona “mai maino danu” do ita noho.​—⁠Sal. 37:10, 11.

¹⁸ Inai stadi lalonai, matana amo ita do “itaia lasi gaudia,” o idia do vara lasi gaudia faiv ita dibaia. To, ita “itaia lasi gaudia” ma haida idia noho, bona idia be “iseda matana” amo ita itaia be namo. Unai gaudia faiv be stadi gabena ai do ita herevalaia.