Mutindu Nsi-Ntoto Yai Tasuka

‘Beno kele na mpimpa ve, sambu kilumbu yina kukwisila beno bonso muyibi.’​—1 TES. 5:4.

KETI NGE LENDA TENDULA?

Inki mambu ya memonanaka ntete ve yina bo ketubila na baverse yai kelanda?

1 Tesalonika 5:3

Kusonga 17:16

Daniele 2:44

1. Inki tasadisa beto na kulanda kukengila mpi kunwana ti bampasi?

MAMBU ya mfunu tasalama ntama mingi ve. Kulungana ya bambikudulu ya Biblia kendimisa dyambu yai, yo yina beto fwete kengila. Inki tasadisa beto na kukengila? Ntumwa Polo kesyamisa beto na ‘kutula meso na beto na bima yina ke monanaka ve.’ Ya kyeleka, beto fwete vila ve lufutu na beto ya luzingu ya mvula na mvula, yo vanda na zulu to na ntoto. Mutindu mukapu yango kemonisa, Polo sonikaka bangogo yai sambu na kusyamisa bampangi na yandi Bakristu na kutula dikebi na balusakumunu yina bo zolaka kubaka sambu na kwikama na bo. Dyaka, kusala mpidina zolaka kusadisa bo na kunwana ti bampasi mpi mbangika.​—2 Kor. 4:8, 9, 16-18; 5:7.

2. (a) Inki beto fwete sala sambu na kutanina kivuvu na beto? (b) Inki beto tatadila na disolo yai mpi yina kelanda?

² Nsyamisa ya Polo kele ti dyambu mosi ya mfunu: Sambu na kutanina kivuvu na beto, beto fwete tala kaka ve mambu yina beto kemona ntangu yai. Kansi, beto fwete tula dikebi na mambu ya mfunu yina beto memonaka ntete ve. (Baeb. 11:1; 12:1, 2) Yo yina, bika beto tatadila mambu kumi yina tasalama na bilumbu kekwisa ya kele na kuwakana ti kivuvu na beto ya luzingu ya mvula na mvula. *

INKI MAMBU TASALAMA NA NTWALA NDE NSUKA KUKWISA?

3. (a) Inki dyambu ya nene tasalama ya bo ketubila na 1 Tesalonika 5:2, 3? (b) Bamfumu ya politiki tasala nki mpi ziku, banani tavukana ti bo?

³ Polo ketubila dyambu mosi ya nene yina tasalama na bilumbu kekwisa na mukanda yina yandi sonikilaka Bakristu ya Tesalonika. (Tanga 1 Tesalonika  5:2, 3.) Yandi bendaka dikebi na “kilumbu ya Yehowa.” Mutindu verse yai mesadila yo, “kilumbu ya Yehowa” kele nsungi yina tayantika ti lufwa ya mabundu ya luvunu mpi tasuka na mvita ya Armagedoni. Kansi ntangu fyoti na ntwala nde kilumbu ya Yehowa kuyantika, bamfumu ya nsi-ntoto tatuba nde “Ngemba mpi lutaninu!” Ziku dyambu mosi to mambu mingi ya kulandana tasalama na ntangu yango. Bantu ya makanda tayindula nde bo mefinama sambu na kumanisa mwa mambu ya mpasi yina keyangisaka bo. Inki beto lenda tuba sambu na bamfumu ya mabundu? Bo kele bantu ya nsi-ntoto yai, yo yina ziku bo tavukana ti bamfumu ya politiki. (Kus. 17:1, 2) Mpidina, bamfumu ya mabundu talanda mbandu ya baprofete ya luvunu ya Yuda ya ntangu ya ntama. Yehowa tubaka sambu na bo nde: “Bo ketuba nde, ‘Ngemba kele!’ Ngemba kele! Kansi ngemba kele ve.”​—Yer. 6:14, NW; 23:16, 17.

4. Na kuswaswana ti bantu mingi, nki mambu beto kebakisa?

⁴ Yo vanda nani tatuba nde “Ngemba mpi lutaninu!” dyambu yai tamonisa nde kilumbu ya Yehowa mefinama. Yo yina Polo tubaka nde: ‘Bampangi, beno kele na mpimpa ve, sambu kilumbu yina kubasikila beno na kintulumukina bonso muyibi. Sambu beno yonso kele bantu ya mwini.’ (1 Tes. 5:4, 5) Na kuswaswana ti bantu mingi, beto kebakisa ntendula yina Masonuku kepesa sambu na mambu yina kesalama. Na nki mutindu mbikudulu yina ketubila “Ngemba mpi lutaninu!” talungana mpenza? Beto fwete vingila sambu na kumona yo. Yo yina, bika nde lukanu na beto kuvanda ya kulanda ‘kukengila mpi kutanina mabanza na beto.’​—1 Tes. 5:6; Sof. 3:8.

‘NTOTILA-NKENTO’ YINA MEVIDISA DIBAKU NA YANDI YA KUGULUKA

5. (a) ‘Mpasi ya nene’ tayantika nki mutindu? (b) Nani kele ntotila-nkento yina tavidisa dibaku na yandi ya kuguluka?

⁵ Inki dyambu yina memonanaka ntete ve ya tasalama na nima? Polo tubaka nde: ‘Na ntangu bo ta tuba nde: “Ngemba mpi lutaninu!” na ntangu yina na kintulumukina lufwa ta kwisila bo.’ Kitini ya ntete ya ‘lufwa yai ya kintulumukina’ tayantika ntangu bo tanwanisa ‘Babilone ya nene,’ kintinu ya nsi-ntoto ya mvimba ya mabundu ya luvunu, yina bo kebingaka mpi “nkento ya ndumba.” (Kus. 17:5, 6, 15) Ntangu bo tanwanisa mabundu yonso ya luvunu, yika mpi ya Kikristu, yo tavanda luyantiku ya ‘mpasi ya nene.’ (Mat. 24:21; 2 Tes. 2:8) Sambu na bantu mingi, dyambu yai tasalama na kintulumukina. Sambu na nki? Sambu tii na ntangu yina, nkento yina ya ndumba takudimona bonso ‘ntotila-nkento’ yina  ‘tavanda ve na mawa ata fyoti.’ Kansi yandi tabakisa na kintulumukina nde yandi mevidisa dibaku na yandi ya kuguluka. Bo tafwa yandi nswalu, bonso ‘na kilumbu mosi kaka.’​—Kus. 18:7, 8.

6. Nani tafwa mabundu ya luvunu?

⁶ Ndinga ya Nzambi kemonisa nde ‘mbisi ya mfinda’ ya “bibongo kumi” tanwanisa nkento ya ndumba. Kulonguka ya mukanda ya Kusonga kemonisa nde mbisi yai ya mfinda kemonisa Nations-Unies (ONU). “Bibongo kumi” kemonisa bangolo yonso ya politiki yina kepesa maboko na ‘mbisi yai ya mfinda ya mbwaki ya ngolo.’ * (Kus. 17:3, 5, 11, 12) Nkento ya ndumba tasuka nki mutindu? Makanda yina kele na kimvuka ya ONU tabotula kimvwama ya nkento ya ndumba, tamonisa pwelele bifu na yandi, tadya misuni na yandi mpi “ta yoka yandi” ya mvimba na tiya. Lufwa na yandi tavanda ya kimakulu.​—Tanga Kusonga 17:16.

7. Inki tapusa ‘mbisi ya mfinda’ na kunwanisa nkento ya ndumba?

⁷ Bambikudulu ya Biblia kemonisa mpi dyambu yina tapusa mbisi ya mfinda na kunwanisa nkento ya ndumba. Yehowa tatula na ntima ya bamfumu ya politiki mpusa ya “kulungisa dibanza na yandi,” disongidila kufwa nkento ya ndumba. (Kus. 17:17, NW) Mabundu yina kezolaka bitumba kelanda kutula mavwanga na nsi-ntoto; yo yina bantu ya makanda lenda yindula nde kufwa nkento ya ndumba tavanda sambu na mambote na bo. Nkutu, ntangu bamfumu tanwanisa nkento ya ndumba, bo tayindula nde bo kelungisa “dibanza” na bo mosi. Kansi na kutuba ya kyeleka, Nzambi tasadila bo sambu na kufwa mabundu yonso ya luvunu. Na mutindu yina, yo tavanda bonso nde kitini mosi ya ngidika ya Satana tanwanisa kitini yankaka, mpi Satana takuka ve na kubuyisa dyambu yina.​—Mat. 12:25, 26.

BO TA NWANISA BANSADI YA NZAMBI

8. Mvita ya ‘Gogi ya nsi ya Magogi’ kele nki?

⁸ Na nima ya lufwa ya dibundu ya luvunu, bansadi ya Nzambi ‘tazinga na ngemba’ mpi kukonda “bibaka ya nda.” (Ezek. 38:11, 14) Inki takumina bantu yina kemonana bonso nde bo mekonda lutaninu ya kelanda kusambila Yehowa? Yo kemonana nde bantu mingi tasosa kunwanisa bo. Ndinga ya Nzambi kebinga yo mvita ya ‘Gogi ya nsi ya Magogi.’ (Tanga Ezekiele 38:2, 15, 16.) Inki mutindu beto fwete tadila mvita yina?

9. (a) Inki kele dyambu ya mfunu sambu na Bakristu? (b) Inki beto fwete sala ntangu yai sambu lukwikilu na beto kukuma ngolo?

⁹ Kuzaba na ntwala nde bo tanwanisa  bansadi ya Nzambi keyangisa beto ve mingi. Dyambu ya kuluta mfunu sambu na beto kele kusantisama ya zina ya Yehowa mpi kunwanina luyalu na yandi kansi ve luguluku na beto. Nkutu, Yehowa tubaka mbala kuluta 60 nde: ‘Beno ta zaba nde mono kele Yehowa.’ (Ezek. 6:7) Yo yina, beto kevingila na kyese yonso kulungana ya dyambu yai ya mfunu ya mbikudulu ya Ezekiele, mpi ketula ntima nde: ‘Yehowa me zaba mutindu ya kugulusa bantu yina ke kangamaka na Nzambi.’ (2 Pie. 2:9, NW) Kansi na ntwala nde yo salama, beto kezola kusadila mabaku yonso yina beto kele ti yo sambu na kukumisa ngolo lukwikilu na beto na mpila nde beto vanda ti makuki ya kubikala ya kwikama na Yehowa yo vanda beto takutana ti bampasi ya nki mutindu. Beto fwete sala nki? Beto fwete samba, kulonguka Ndinga ya Nzambi ti kuyindulula yo, mpi kuzabisa bankaka nsangu ya Kimfumu. Kusala mpidina tasadisa beto na kutanina ngolo kivuvu na beto ya luzingu ya mvula na mvula bonso “longo.”​—Baeb. 6:19, NW; Nk. 25:21.

BANTU YA MAKANDA TAZABA YEHOWA

10, 11. Inki tavanda luyantiku ya Armagedoni, mpi nki mambu tasalama na ntangu yango?

¹⁰ Inki dyambu ya mfunu tasalama ntangu bo tanwanisa bansadi ya Yehowa? Yehowa tasadila Yezu mpi bawanzyo sambu na kukotila bansadi na yandi. (Kus. 19:11-16) Yo tavanda luyantiku ya “bitumba ya kilumbu ya nene ya Nzambi Nkwa-Ngolo Yonso.”​—Kus. 16:14, 16, NW.

¹¹ Sambu na mvita yango, Yehowa ketuba na nzila ya Ezekiele nde: “Mono ta pesa Gogi boma na bampasi ya mutindu na mutindu. Mono Mfumu Nzambi muntu me tuba. Bantu na yandi ta kudifwa bo na bo na bambele.” Bantu yina tavanda na lweka ya Satana tawa boma ngolo, bo takuma kisakasaka mpi tayantika kudifwa bo na bo. Kansi, mpasi yango takwisila mpi Satana. Yehowa ketuba nde: ‘Mono ta nokisa mvula ya ngolo ya matadi mpi tiya ta bwila Gogi ti basoda na yandi mpi bantu yonso yina tavanda ti yandi.’ (Ezek. 38:21, 22) Inki tavanda nsuka ya dyambu yai Nzambi tasala?

12. Bantu ya makanda tazaba nki?

¹² Bantu ya makanda tabakisa nde kukonda kununga na bo mekatuka na Yehowa yandi mosi. Yo yina, bonso basoda ya Ezipte yina landaka Bantu ya Izraele na Nzadi-Mungwa ya Mbwaki, ziku bantu yina tavanda na lweka ya Satana tatuba kukonda kivuvu nde: ‘Yehowa ke nwanina bo’! (Kub. 14:25) Ee, bantu ya makanda tazaba kana Yehowa kele nani. (Tanga Ezekiele 38:23.) Keti beto mefinama na luyantiku ya mambu yai ya kulandana?

KELE VE TI NGOLO YANKAKA YA NSI-NTOTO YINA TABASIKA

13. Inki beto mezaba na yina metala kitini ya tanu ya kiteki yina Daniele ketubila?

¹³ Mbikudulu mosi ya kele na mukanda ya Daniele kesadisa beto na kubakisa nde nsuka kefinama. Daniele ketubila kiteki mosi ya kele bonso muntu mpi ya mesalama na bibende ya kuswaswana. (Dan. 2:28, 31-33) Yo kemonisa bangolo ya kulandana ya nsi-ntoto yina vandaka ti bupusi ya ngolo na luzingu ya bansadi ya Nzambi, na ntangu ya ntama mpi bubu yai. Bangolo yango kele: Babilone, Medo-Persia, Grese, Roma mpi ya nsuka kele luyalu mosi ya ngolo na bilumbu na beto. Kulonguka ya mbikudulu ya Daniele kemonisa nde makulu mpi misapi ya makulu ya kiteki yina kele ngolo yai ya nsuka. Na nsungi ya Mvita ya Ntete ya Ntoto ya Mvimba, Grande-Bretagne mpi États-Unis salaka bangwisana ya ngolo. Kitini ya tanu ya kiteki yina Daniele ketubila kemonisa Anglo-Amerika Ngolo ya Nsi-Ntoto ya Mvimba. Makulu kele kitini ya nsuka ya kiteki yina mpi yo kemonisa nde kele ve ti ngolo yankaka yina tabasika na nima. Sambu makulu mpi misapi  ya makulu mevukana ti kibende na ntoto, yo kemonisa mutindu Anglo-Amerika kele ve ti ngolo ya kusala mambu mutindu yo kezodila.

14. Inki luyalu tavanda ngolo ya nsi-ntoto ntangu Armagedoni tasalama?

¹⁴ Mbikudulu yango ketuba mpi nde ditadi mosi ya nene, yina kemonisa Kimfumu ya Nzambi, zenganaka na ngumba disongidila luyalu ya Yehowa na 1914. Ntangu yai ditadi yango kepusana nswalu sambu na kututa makulu ya kiteki. Na Armagedoni, makulu mpi bitini yonso yankaka ya kiteki tapanzana. (Tanga Daniele 2:44, 45.) Kansi, Anglo-Amerika Ngolo ya Nsi-Ntoto ya Mvimba tavanda luyalu ya kuluta ngolo ntangu mvita ya Armagedoni tasalama. Yo tavanda kyese mpenza na kumona mutindu mbikudulu yai talungana na mvimba na yo! * Kansi inki Yehowa tasala Satana yandi mosi?

MUTINDU MBENI YA NENE YA NZAMBI TAFWA

15. Na nima ya Armagedoni, nki takumina Satana mpi bademo na yandi?

¹⁵ Ya ntete, Satana tamona banda na luyantiku mutindu organizasio na yandi ya mvimba ya kele na ntoto tafwa. Na nima, Yehowa tatula dikebi na Satana yandi mosi. Ntumwa Yoane ketubila dyambu yina tasalama na nima. (Tanga Kusonga 20:1-3.) Yezu Kristu, ‘wanzio yina kele ti nsapi ya dibulu ya nda’ takanga Satana ti bademo na yandi, talosa bo na dibulu ya nda mpi tabika bo kuna na nsungi ya bamvula funda. (Luka 8:30, 31; 1 Yoa. 3:8) Yo tavanda kulungana ya kitini ya ntete ya kunyatama ya ntu ya nyoka. *​—Kuy. 3:15.

16. Kulosama ya Satana na “dibulu ya nda” tatendula nki?

¹⁶ Inki kele “dibulu ya nda” yina bo talosa Satana mpi bademo na yandi? Ngogo ya Kigreki abussos yina Yoane mesadila ketendula “dibulu ya nda mpenza.” Yo lenda tendula mpi “dibulu ya kukonda nsuka mpi ya kele ti ndilu ve.” Yo yina, dibulu yango kele kisika yina ata muntu mosi ve lenda kuma katula kaka Yehowa mpi wanzyo yina yandi meponaka ya kele ‘ti nsapi ya dibulu ya nda.’ Kuna, Satana tavanda dyaka ve ti ngolo ya kusala ata kima mosi na ‘mpila nde yandi kukusa diaka ve bantu.’ Ee, “ntambu yina ke dila” takanga munoko na yandi kimakulu!​—1 Pie. 5:8.

MAMBU YINA TANATA NA NSUNGI MOSI YA NGEMBA

17, 18. (a) Inki mambu yina memonanaka ntete ve ya beto metubila na disolo yai? (b) Na nima ya mambu yina, beto takota na nki nsungi?

¹⁷ Mambu ya nene mpi ya mfunu tasalama ntama mingi ve. Beto kevingila kumona kulungana ya bangogo “Ngemba mpi lutaninu!” Na nima beto tamona lufwa ya Babilone ya Nene, mvita ya Gogi ya Magogi, bitumba ya Armagedoni, mpi kulosama ya Satana ti bademo na yandi na dibulu ya nda. Na nima ya mambu yai, ntangu mambi yonso tamana, beto takota na nsungi mosi ya mpa ya luzingu, disongidila Luyalu ya Bamvula Funda ya Kristu yina tanatila beto ‘ngemba ya mingi.’​—Nk. 37:10, 11.

¹⁸ Katula mambu tanu yina beto metubila, kele mpi ti mambu yankaka yina ‘me monanaka ve’ ya beto fwete ‘tula meso.’ Beto tatubila mambu yango na disolo yina kelanda.

[Banoti na nsi ya lutiti]

[Bangyufula ya disolo ya kulonguka]

[Lupangu/​Bifwanisu ya kele na lutiti 9, 10]

MAMBU TANU YINA TASALAMA:

1 Bantu tatuba nde “Ngemba mpi lutaninu!”

2 Bantu ya makanda tanwanisa ‘Babilone ya Nene’ mpi tafwa yo

3 Bantu tanwanisa bansadi ya Yehowa

4 Bitumba ya Armagedoni

5 Kulosama ya Satana ti bademo na yandi na dibulu ya nda