Indi Dinu Ituña Damba Kamana Ñahi?

“Himwekala mumwidima, mwaka ifuku odu dakayishintakeshi neyi ikombuku.”—1 TESA. 5:4.

MUNATELI KULUMBULULA?

Yumanyi yichidi kanda yimwekani yinashimunuwu haniji nsona?

1 Atesalonika 5:3

Chimwekeshu 17:16

Danyeli 2:44

1. Yumanyi yikutukwasha kwikala atona nikuumika kweseka?

 YUMA yomisha mbaña keña yimwekani hamaseki. Kushikijewa kwawuprofwetu wamuBayibolu kunakumwekesha nawu yumiyi keña yimwekani, dichi twatela kwikala atona. Yumanyi yikutukwasha kwikala atona? Kapostolu Pawulu watukonkomwena ‘kutala hayuma yabulaña kumwekana.’ Eñañi, twanukeña wuloku wetu wakutambwila wumi wahaya nyaka, chili mwiwulu hela hamaseki. Kwesekeja nampanji yidi muniyi nsona, Pawulu wasonekeli awa mazu kulonda yakoleshi akwawu akakwitiya ashi muchima hawuloku wakatambwilawu hamuloña wakashinshi kawu. Chumichi chadi kuyikwasha kuumika kweseka niyihuñu yamweneñawu.—2 Kor. 4:8, 9, 16-18; 5:7.

2. (a) Chumanyi chitwatela kwila kulonda tukwatishi chikupu kukuchiñeja kwetu? (b) Yumanyi yitukudiza muchinu chibaaba nimuchibaaba chinalondeluhu?

² Kufumba kwaPawulu kukweti lushimbi lwalema: Lwakukwatisha chikupu kukuchiñeja kwetu, twatela kushinshika hayuma yakumbidi bayi yamakonuku. Twatela kusha maana hayuma yalema yikukeña kumwekana. (Heb. 11:1; 12:1, 2) Tushinshikenu hayuma ikumi yikamwekana kumbidi yesekana chikupu nakuchiñeja kwetu kwakutambwila wumi wahaya nyaka. *

CHUMANYI CHIKAMWEKANA NEYI KUKUMA KUNASHIKI DEHI KWAKWIHI?

3. (a) Chumanyi chikukeña kumwekana chashimunawu ha 1 Atesalonika 5:2, 3? (b) Indi akulumpi jamapolitiki akeladi nawa anyi akadinuña nawu?

³ Pawulu washimwini chuma chimu chikamwekana  mumukanda wasonekeleliyi Atesalonika. (Tañenu 1 Atesalonika 5:2, 3.) Wahosheli ‘hefuku daYehova.’ Neyi chadizatishawu, ‘ifuku daYehova’ datalisha kumpinji yakatachika kujilumunawu nsakililu yakutwamba nawa yikamana nanjita yaAmagedoni. Hela chochu, henohu ifuku daYehova kanda ditachiki, anlomboli amwituña akahoshaña nawu ‘Kuwunda nikumwena!’ Chumichi chakamwekana kamu hela kakavulu mukulondashana. Nyuza yakatoñojokaña nawu yinashiki dehi kwakwihi nakumanisha kukala kweneni kwamonañawu. Indi akulumpi jansakililu akeladi? Chineli ekala kabadi ketuña, anateli kudinuña hamu nawanlomboli ajipolitiki. (Chim. 17:1, 2) Akulumpi jansakililu akembujola atuprofwetu akutwamba amuYuda wakushankulu. Yehova wayilili nindi: ‘Anakuhosha nawu, kwamwena; kutoña hikwamwenaku.’—Yere. 6:14; 23:16, 17.

4. Kwambukaku nawantu ejima, chumanyi chitwelukaña?

⁴ Hichidi namuloña nawantu akadibomba nakuhosha nawu ‘Kuwunda nikumwenaku!’ chumichi chakamwekesha nawu ifuku daYehova keña ditachiki. Dihafumini Pawulu kuhosha nindi: “Enu ana kwetu, himwekala mumwidima, mwaka ifuku odu dakayishintakeshi neyi ikombuku. Muloña wejima wenu mudi akwachejeji.” (1 Tesa. 5:4, 5) Kwambukaku nawantu ejima, twelukaña mwatalisha yuma yashimunawu muNsona yinakumwekana makonu. Indi iwu wuprofwetu ‘waKuwunda nikumwena!’ wukashikijewa ñahi? Tukutalilaña yuma yakamwekana. Dichi, twikalenu ‘atona nikubabala.’—1 Tesa. 5:6; Zef. 3:8.

“MWANTA WAMUMBANDA” WAKAÑENYI KWILUKA MWAKUPULUKILA

5. (a) Indi “lukadi lwasweja,” lukatachika ñahi? (b) “Mwanta wamumbanda” wumu yodihi wukakañanya kwiluka mwakupulukila?

⁵ Chumanyi chikwawu chikukeña kumwekana chitwabula kumonahu dehi? Pawulu nindi: ‘Chakwilawu nawu, Kuwunda nikumwena! hohenohu kujilumuka hikukuyikasumwisha.’ Chibalu chatachi ‘chakujilumuka kwakukasumwisha’ chakekalaku hakamulukukawu ‘Babiloni Muneni,’ wanta wamukaayi wansakililu yakutwamba, watenañawu cheñi nawu “chivumbi.” (Chim. 17:5, 6, 15) ‘Lukadi lwasweja’ lwakatachika neyi nyichidi yejima yansakililu yakutwamba niKristendomu, anayilukuki dehi. (Mat. 24:21; 2 Tesa. 2:8) Antu amavulu akahayama chakayishintakeshawu. Muloñadi? Muloña chivumbi wakadimonaña nindi ‘himwanta wamumbanda’ wakabula ‘kumona kuneña’ kushika nihaniyi mpinji. Ilaña wakakashimuka nakañanyi  dehi kwiluka mwakupulukila. Akanyakala kumujilumuna, neyi kwiji ‘mwifuku dimu.’—Chim. 18:7, 8.

6. Hinyi wakajilumuna nsakililu yakutwamba?

⁶ Izu daNzambi dashimuna chilumbu wakamulukuka chivumbi nawu ‘kanyama’ wukweti ‘nseñu ikumi.’ Mukanda waChimwekeshu washimunaña nawu kanyama yeniwu wemenañaku United Nations (UN). ‘Nseñu ikumi’ yemenañaku matuña amakonu ejima añovu japolitiki anakukwasha ‘kanyama kachinana.’ * (Chim. 17:3, 5, 11, 12) Akamukisañana ñahi? Nyuza yamu UN yakakisañana maheta achivumbi, nakumusawula, akamudya nawa “akamushita nakesi bwi.” Akamujilumuna haya nyaka.—Tañenu Chimwekeshu 17:16.

7. Chumanyi chikaletesha “kanyama” yakamulukuki chivumbi?

⁷ Wuprofwetu wamuBayibolu washimuna cheñi chuma chikaleñela akamulukuki. Yehova wakasha munyichima yawanlomboli ajipolitiki ‘kwila mwafuukulayi,’ dikwila nawu, akamukisañana chivumbi. (Chim. 17:17) Nsakililu yinakubutula jinjita nawa yinakutwalekahu kuleta kukala mukaayi; dichi nyuza yikatoñojoka nawu neyi amukisañana chivumbi chakayikwashaku. Anlomboli chakamulukukawu, akatoñojoka nawu anakwila ‘mwatiyañenuwu.’ Ilaña, Nzambi diyi wakayizatisha kujilumuna nsakililu yakutwamba yejima. Dichi, chibalu chimu chetuña daSatana chikalukuka chibalu chikwawu, nawa Satana hakatwesha kuyilekeshaku.—Mat. 12:25, 26.

ANTU JANZAMBI AKUYILUKUKA

8. Indi kulukuka ‘kwaGogi wamwituña daMagogi’ hichumanyi?

⁸ Hanyima yakujilumuna nsakililu yakutwamba, ambuña aNzambi “akashakama chakadi kwakama” nawa “chakadi mpwembu.” (Ezek. 38:11, 14) Chumanyi chikamwekena izanvu dawantu damwekana neyi dinakuyumbwañila hohu dinakutwalekahu kudifukula kudi Yehova? Chidi neyi akayilukuka kudi ‘nyuza yawantu yayivulu.’ Izu daNzambi dalumbulula ichi chuma chikamwekana nawu hikulukuka ‘kwaGogi wamwituña daMagogi.’ (Tañenu Ezekeli 38:2, 15, 16.) Indi iku kulukuka tunateli kukwimona ñahi?

9. (a) Chumanyi chakamenañayi chikupu mukwaKristu? (b) Yumanyi yitwatela kwila katataka kulonda tukoleshi chikuhwelelu chetu?

⁹ Hamuloña wakwilukila chadimu netu antu jaNzambi akayilukuka kwatuleñelaña kubula kusweja kwakama. Dichi, hitwaswejaña kwakamena netu akatupulwishuku, ilaña twakamenaña  netu ijina daYehova akadijiliki nikuyiñisha chiyuulu chindi. Yehova wahosheli kubadika hamapampa 60 nindi: “Mwakeluka nenu yami Yehova.” (Ezek. 6:7) Dichi, tunakutalila chikupu kushikijewa kwakweni kwawuprofwetu waEzekeli, nakukuhwelela netu “Yehova weluka kupulwisha akwakumwakama mukweseka.” (2 Pet. 2:9) Hayinu mpinji, twatela kuzatisha mpinji yitukweti kulonda tukoleshi chikuhwelelu nikuhemba kashinshi ketu kudi Yehova hela tukumona kweseka kudi kwejima. Twatela kwiladi? Twatela kulomba, kudiza Izu daNzambi nikutoñojokahu chikupu nikushimwina nsañu yaWanta kudi antu. Chitwela mwenimu, chikutukwashaku kukwata chikupu kukuchiñeja kwetu kwawumi wahaya nyaka neyi “chikuñu chakwimikisha nachu watu.”—Heb. 6:19; Mas. 25:21.

NYUZA YAKELUKA NAWU DIYI YEHOVA

10, 11. Chumanyi chakasañumuna Amagedoni nawa chumanyi chakamwekana haniyi mpinji?

¹⁰ Yumanyi yomisha mbaña yakamwekana hamaseki hakayilukukawu ambuña aYehova? Yehova wakakiña antu Jindi kuhitila mudi Yesu nimajita amwiwulu. (Chim. 19:11-16) Chumichi chakamwekana ‘hanjita yefuku odu deneni daNzambi Watwesha yejima,’ haAmagedoni.—Chim. 16:14, 16.

¹¹ Kutalisha haniyi njita, Yehova washimuna kuhitila mudi Ezekeli nindi: “Nakamutambikila mpoku yakabali [Gogi] yakenzi kumpidi jami jejima, mpoku jawantu ejima jatubali jakatapa ana kwawu, iwu nakutapa mana kwindi, iwu nakutapa mana kwindi. Dimu mwanahoshiyi Mwanta Yehova.” Hamuloña wawoma, antu adi kukabadi kaSatana akayiluwañesha nawa akanona yitwa yawu nakudijaha awenawu, mushidika wakajaha mukwawu mushidika. Hela chochu, Satana wakekala muwufwinda. Yehova nindi: ‘Nakamunokeshela [Gogi] niyena, niyendu yindi, ninyuza yawantu yayivulu yadiyi nayu, nvula yayeji, nimalola amaneni, nikesi nisawufa.’ (Ezek. 38:21, 22) Chumanyi chakafuma mukuzuwa kwaNzambi?

12. Nyuza yamba kelukadi?

¹² Nyuza yakeluka nawu kujilumuka kwawu kunafumi kudi Yehova yomweni. Kuhiñahu, kufwana aEjipitu akushankulu alukukili aIsarela nakuyilondela kushika niKukaluñalwiji Kachinana, mashidika aSatana akabilela nawu: “Yehova hakuyilwila”! (Kwid. 14:25) Eñañi, nyuza dihiyamba kamwiluka Yehova. (Tañenu Ezekeli 38:23.) Komana tunashiki dehi kukamwihi nakutachika kwaniyi yuma yikamwekana tahindi?

KWOSI WANTA WAÑOVU MUKAAYI WAKEMANAKU

13. Chumanyi chitweluka hadi chibalu chamuchitanu chamukishi washimunayi Danyeli?

¹³ Wuprofwetu wudi mumukanda waDanyeli watukwashaña kwiluka mpinji yitunashikimu. Danyeli washimuna mukishi wachifwikija chamuntu wakutuña nayikuñu yashiyashana. (Dan. 2:28, 31-33) Wemenañaku mawanta añovu mukaayi adilondashana anayandishi chikupu antu jaNzambi, akunyima nikulelu. Mawanta wenawa hiBabiloni, Medo-Persia, Greece, Roma niwanta wakukumishaku, wudiku chayinu mpinji, wanta wukwawu wañovu mukaayi. Wuprofwetu waDanyeli wamwekeshaña nawu madachilu ninyinu yamukishi yemenañaku wanta wakukumishaku wañovu mukaayi. Hanjita yaMukaayi Yatachi, ituña daBritain niUnited States adikwatili wubwambu wakola. Eñañi, chibalu chamuchitanu chamukishi wamweniyi Danyeli hiWanta waÑovu Mukaayi waAnglo-America. Madachilu dichibalu chakukumishaku chamukishi, chinakumwekesha nawu kwosi wanta wañovu  mukaayi wukamwekanaku. Chineli madachilu ninyinu atuñewa nachikuñu niwumba, dikwila nawu yinakwimenaku Wanta waÑovu Mukaayi waAnglo-America wazeya.

14. Wanta wumu wudihi wañovu mukaayi wakekalaku hampinji yakenza Amagedoni?

¹⁴ Wuprofwetu wowumu washimuna nawu Wanta waNzambi, wafwikijawu nelola deneni, adabalwili kumpidi yachiyuulu chaYehova mu 1914. Idi ilola keña dichiki madachilu amukishi. HaAmagedoni, madachilu nimukishi wejima akamuchika. (Tañenu Danyeli 2:44, 45.) Dichi, Wanta waÑovu Mukaayi waAnglo-America wakatwalekahu kwikala wanta wañovu mukaayi nihampinji yakenza Amagedoni. Wenowu muzañalu wutwakatiya hakumona kushikijewa kwaniwu wuprofwetu wejima! * Indi Yehova wakamwiladi Satana?

CHAKAMUJILUMUNAWU CHILUMBU MUNENI WANZAMBI

15. Hanyima yaAmagedoni, chumanyi chakamwilawu Satana niandemoni jindi?

¹⁵ Chatachi, Satana wakadimwena chakatachikawu kujilumuna wanta windi wejima hamaseki kushika nikunsa. Kuhiñahu, Satana yomweni akamujilumuna. Kapostolu Yowanu washimuna chuma chikalondelahu. (Tañenu Chimwekeshu 20:1-3.) Yesu Kristu, “kañelu, wudi nansapi yekela,” wakamukwata Satana niandemoni jindi, nakuyumbila mwikela, nakuyihembela mwenomu hadi ikombakaji danyaka. (Luka 8:30, 31; 1 Yow. 3:8) Ichi dichakekala chibalu chatachi chakumuchika kapela kumutu. *—Kutach. 3:15.

16. Indi mazu akwila nawu Satana akamusha ‘mwikela’ atalisha mudihi?

¹⁶ Indi ‘ikela’ mwakamumbilawu Satana niandemoni jindi hichumanyi? Izu dachiGiriki daaʹbys·sos dazatishiliyi Yowanu dalumbuluka nawu “kukunama nankashi hela chikupu.” Adibalumuna cheñi nawu “wina wabulaña kukuma, waya hohu.” Nawa kwosi muntu wunateli kushika hidakuminaku, chiña Yehova hohu nikañelu kindi katondayi “wudi nansapi yekela.” Mwikela, Satana wukekala neyi muntu wunahwidili kulonda ‘yakabuleña kudimba cheñi nyuza.’ Mwalala, iwu “mutupa wabulumaña” akamunwisha menji kuchopu!—1 Pet. 5:8.

YUMA YAKAMWEKANA HENOHU MPINJI YAKUWUNDA KANDA YISHIKI

17, 18. (a) Yumanyi yichidi kanda yimwekani yitunadizi? (b) Hanyima yayumiyi, mpinjinyi yitukadiluñisha?

¹⁷ Yuma yamaneni yomisha mbaña keña yimwekani. Tunakutalila njila mwakahoshelawu mazu akwila nawu ‘Kuwunda nikumwena!’ Kuhiñahu twakamona Babiloni Muneni chakamujilumunawu, chakamulukukawu Gogi waMagogi, njita yaAmagedoni nichakamumbilawu Satana niandemoni jindi mwikela. Chakahita yumiyi, chakela yuma yatama yejima yinamani dehi, Muchiyuulu chaKristu Chekombakaji daYaaka chihandilu chetu chakahimpika, mutwakadiluñisha “nakushakama chachiwahi chamwena.”—Mas. 37:10, 11.

¹⁸ Kubombela hayuma yitanu yikamwekana yitunadizi, kudi yuma yikwawu ‘yabulaña kumwekana’ yitwatela ‘kutalila.’ Iyi yuma tukayidiza muchibaaba chinalondeluhu.

[Tumazu twaheshina]

[Malwihu aKuzatisha haKudiza]

[Chikasha/Nyevulu yidi hefu 4, 5]

YUMA YITANU YIKAMWEKANA:

1 Kubidika nawu ‘Kuwunda nikumwena!’

2 Nyuza yikalukuka nikumukisañana “Babiloni Muneni”

3 Antu jaYehova akayilukuka

4 Njita yaAmagedoni

5 Satana niandemoni jindi akayumbila mwikela