He Khawvêl Tihtâwp A Nih Dân Tûr

“Nimahsela unaute u, nangni zawng chu mi Nî chuan rûkru anga a nanna tûr che uin thimah in awm lo ve.”—1 THES. 5:4.

KAN HRILHFIAH THEI EM?

A hnuaia Bible chângahte hian nakina lo thleng tûr tûna thil hmuh theih loh engte nge târ lan a nih?

1 Thessalonika 5:3-ah

Thu Puan 17:16-ah

Daniela 2:44-ah

1. Engin nge harhvâng renga awm tûr leh fiahnate tuar chhuak thei tûrin min ṭanpui ang?

NAKIN lawkah khawvêl nghawr nghîng khawp thil a lo thleng dâwn a. Chu chu Bible hrilhlâwkna thleng famkimte aṭang hian kan hre thei a, chuvângin, kan harhvân reng a ngai a ni. Chutianga harhvâng reng tûr chuan engin nge min ṭanpui ang? Tirhkoh Paula chuan “thil hmuh theih lohte chu . . . en” tûrin min fuih a ni. Ni e, vân lam beiseina emaw, lei lam beiseina emaw nei pawh ni ila, kan lâwmman dawn tûr chatuan nunna chu rilrua kan vawn reng a ngai a. A thu hnu leh thu hmain a târ lan angin, Paula chuan he thu hi rinawm taka an awm avânga an lawmman dawn tûr en tlat tûra a unaute fuih nâna a ziah a ni a. Chutianga an tihna chuan fiahna leh tihduhdahnate tuar chhuak thei tûrin a ṭanpui ang.—2 Kor. 4:8, 9, 16-18; 5:7.

2. (a) Kan rinna tinghet tûr chuan eng nge kan tih ngai? (b) He thuziak leh a dawta thuziakah eng nge kan ngaihtuah ang?

² Paula fuihnaah chuan thu bul pawimawh tak a tel a: Kan beiseina tinghet tûr chuan hma lam hun hla tak kan thlîr a, thil thleng pawimawh tak, tûna ‘la hmuh theih lohte’ kan en tlat a pawimawh, tih hi. (Heb. 11:1; 12:1, 2) Chuvângin, tûna thuziakah leh a dawta thuziakah chuan kan beisei chatuan nunna nêna inkûngkaih hnai tak nakina thil lo thleng tûr chi sâwmte kan ngaihtuah ang.

TAWPNA HMA CHIAHIN ENG NGE LO THLENG ANG?

3. (a) Eng thil lo thleng tûr nge 1 Thessalonika 5:2, 3-ah târ lan a nih? (b) Politics hruaitute’n eng nge an tih ang a, anni chu tute’n nge zawm ve ang?

³ Nakina thil lo thleng tûr pakhat chu Thessalonika mite hnêna a lehkhathawnah Paula’n a târ lang a. (1 Thessalonika 5:2, 3 chhiar rawh.) Paula chuan a lehkhathawnah chuan “Lalpa Nî” chungchâng a sawi a.  Heta “Lalpa Nî,” a nih loh leh Jehova ni ropui hi sakhaw dik lo tihchhiatna aṭangin a inṭan ang a, Armageddon indonaah a tâwp ang. Mahse, Jehova nî a inṭan hma chiah chuan khawvêl hruaitute chuan “Muanna leh himna” tiin an sawi ang. Chu chu vawi khat emaw, vawi engemaw zât a inzawma thleng tûr emaw sawina a ni thei a. Hnamte chuan an harsatna lian tham ṭhenkhatte chu an ching fel mai dâwn angah an ngai mai thei a ni. A nih leh sakhaw hruaitute chungchâng chu eng nge ni ve ang le? Khawvêla mi an nih tlat avângin, anni chuan politics hruaitute an zawm ve pawh a ni thei. (Thup. 17:1, 2) Chutiang chuan sakhaw hruaitute chuan hmân lai Judai rama zâwlnei derte tih dân an entawn dâwn a ni. Jehova chuan an chungchâng chu heti hian a sawi a: “‘Muanna a awm alâwm, muanna a awm alâwm,’ tiin an thawi a, muanna a awm hauh si lova,” tiin.—Jer. 6:14, New World Translation; Jer. 23:16, 17.

4. Mi nâwlpuite ang lo takin, eng thil nge kan hriat thiam?

⁴ “Muanna leh himna” titute zînga tel chu tute pawh ni se, chu thilthleng chu Jehova nî inṭanna târ langtu a ni ang. Chuvângin, Paula chuan heti hian a sawi thei a ni: “Unaute u, nangni zawng chu mi Nî chuan rûkru anga a nanna tûr che uin thimah in awm lo ve; êng fate leh ni fate in ni vek si a,” tiin. (1 Thes. 5:4, 5) Mi nâwlpuite ang lo takin, Bible-in tûn lai thilthleng a sawite pawimawhna chu kan hrethiam a ni. Eng ang chiahin nge “Muanna leh himna” tia sawi chungchâng hrilhlâwkna chu a thlen famkim ang? A thlen famkim dân tûr chiah chu kan nghah a ngai a. Chuvângin, ‘meng a, ngaihven’ reng i tum tlat ang u.—1 Thes. 5:6; Zep. 3:8.

A DINHMUN CHHUT SUALTU ‘LALNU’ CHU

5. (a) Engtin nge “hrehawm nasa tak” chu a inṭan ang? (b) Eng ‘lalnuin’ nge a dinhmun chu chhût sual ang?

⁵ Tûna la hmuh theih loh thil dang eng nge lo thleng leh ang? Paula chuan heti hian a sawi: “‘Muanna leh himna,’ tia an sawi lai takin hmeichhe nau vei angin chawp leh chilha boralna an chungah a thleng ang,” tiin. Chu “chawp leh chilha boralna” inṭan tirh lam chu “nawhchizuar” tia koh bawk, “khawvêla sakhaw dik lo zawng zawng, “Babulon Khaw Ropui” beihna a ni ang. (Thup. 17:5, 6, 15) Kristianna ram pawh tiamin, sakhaw dik lo zawng zawng beihna chu “hrehawm nasa tak” inṭanna a ni ang. (Mt. 24:21; 2 Thes. 2:8) Chu thilthleng chu mi tam tak chuan mak an ti hle dâwn a ni. Engvângin nge? Chutih hun thleng chuan nawhchizuar chu inringtâwk takin, ‘lungngaihna hmu hauh lo tûr’ “lalnuah” a inngai dâwn a. Mahse, a dinhmun chu a chhût sual tih a hre chhuak thuai ang. ‘Ni khat chauhva’  thil thleng ang maiin tihboral a ni ang.—Thup. 18:7, 8.

6. Sakhaw dik lo chu tuin nge tiboral ang?

⁶ Pathian Thu chuan nawhchizuar beitu tûr chu “sakawlh” “ki sâwm nei” tiin a sawi a. Thu Puan bu zirna chuan chu sakawlh chu United Nations (UN) a nih thu a târ lang a ni. “Ki sâwm” chuan “sakawlh sen tak” thlâwptu sawrkâr zawng zawng a entîr a ni. * (Thup. 17:3, 5, 11, 12) Chu beihna chuan eng ang khawpa chhiatna nge a thlen ang? UN hnamte chuan nawhchizuar hausakna chu rawkin, a mize dik tak an hai lang ang a, an ei ang a, an “hâl ral ang.” Tichuan, kum khua atâna tihboral a ni tawh ang.—Thu Puan 17:16 chhiar rawh.

7. ‘Sakawlhin’ nawhchizuar a beihna tichhuaktu chu eng nge ni?

⁷ Bible hrilhlâwkna chuan chu beihna tichhuaktu tûr pawh a târ lang bawk a. Jehova chuan khawvêl sawrkâr hotute thinlungah chuan “a duhzâwng an tihna tûr,” nawhchizuar an tihboralna tûrin engtin emaw tak a tîr dâwn a ni. (Thup. 17:17) Sakhuate chu khawvêla buaina awmtîrtu a ni chhunzawm zêl a; chuvângin, hnamte chuan chu nawhchizuar tihboralna chu an ram tâna ṭha tûr angin an ngai ang. Dik takin, sawrkâr hotute’n chutianga sakhuate an beih lai chuan, anmahni thu ang taka thilti a, ‘thu khat vua’ angin an inngai dâwn a. Mahse, a nihna takah chuan, sakhaw dik lo zawng zawng tihboral nâna Pathian hmanruaah an ṭang zâwk a ni. Chutiang chuan, rin loh tak maiin, Setana inawpna pêng pakhat chuan a inawpna pêng dang chu a bei ang a, Setana chuan titâwp tûrin theihna rêng a nei lo vang.—Mt. 12:25, 26.

PATHIAN MITE CHUNGA BEIHNA

8. ‘Magog rama mi, Goga’ beihna chu eng nge ni?

⁸ Sakhaw dik lo tihboral a nih hnu chuan, Pathian chhiahhlawhte chu ‘kulh kawngkhar’ nei lovah ‘him takin an la awm hle hle’ ang. (Ezek. 38:11, 14) Chûng vêngtu nei lo ang taka lang, Jehova be chhunzawm zêltute chungah chuang eng nge lo thleng ang? Anni chu “mi tam tak” beih rawnin an awm dâwn niin a lang. Chu dinhmun chu Pathian Thu chuan “Magog rama mi, . . . Goga” beihna tiin a sawi a ni. (Ezekiela 38:2, 15, 16 chhiar rawh.) Chu beihna chu engtin nge kan thlîr ang?

9. (a) Kristiante lung kham ber chu eng nge ni? (b) Kan rinna tihchak nân tûnah eng angin nge hma kan lâk ang?

⁹ Chutianga Pathian mite beihna chungchâng hriat lâwkna chuan min timangang lutuk lo. Kan lung kham ber chu keimahni chhanhimna lam ni lovin, Jehova hming tihthianghlimna leh a lal chungnunna  thiam chantîrna zâwk chu a ni. Dik takin, Jehova chuan vawi 60 chuang lai chu: “LALPA ka ni tih in hria ang,” a ti a ni. (Ezek. 6:7) Chuvângin, “Lalpa chuan amah ngaihsaktute chu thlêmna ata chhan chhuah dân . . . a hria” tih ring tlatin, chu mi chungchânga Ezekiela hrilhlâwkna thlen famkimna chu nghâkhlel takin kan thlîr a ni. (2 Pet. 2:9) Chutih chhûng chuan, kan hun neih apiang chu fiahna engpawh tâwk mah ila Jehova laka kan rinawm ngheh tlat theih nâna kan rinna tichak nân hman kan duh a ni. Chu chu engtin nge kan tih ang? Ṭawngṭaia, Pathian Thu zirin, kan chhût ngun tûr a ni a, Lalram thuchah chu mi dangte hnênah kan hrilh tûr a ni. Chutianga kan tih chuan, kan beisei chatuan nunna chu “thiîrchakai” ang maiin kan vawng nghet tlat thei ang.—Heb. 6:19; Sâm 25:21.

HNAMTE CHUAN JEHOVA CHU AN HRIA ANG

10, 11. Engtin nge Armageddon chu a inṭan ang a, chu mi chhûng chuan eng thil nge thleng ang?

¹⁰ Jehova chhiahhlawhte chunga beihna chuan khawvêl nghawr nghîng khawp thilthleng eng nge a awmtîr ang? Jehova chu A mite ṭanpui tûrin a rawn che dâwn a, Isua leh vân lam sipaite a rawn hmang dâwn a ni. (Thup. 19:11-16) Chu a rawn chêtna tak chu ‘Pathian Engkimthitheia ni ropuia indona’—Armageddon a ni ang.—Thup. 16:14, 16.

¹¹ Chu indona chungchângah chuan Jehova’n Ezekiela kal tlangin heti hian a sawi a: “Ka tlâng zawng zawngahte [Goga] beina tûrin khandaih ka lam ang, mi tin khandaih chuan a unaupa a do vang, tih hi Lalpa PATHIAN thu chhuak a ni,” tiin. Setana lam ṭangte chu an chi-ai zo ang a, anmahni mi leh sate an bei nuai nuai mai dâwn a ni. Mahse, chu buaina chu Setana chungah pawh a thleng bawk ang. Jehova chuan heti hian sawi a ni: “[Goga] leh a sipai rualte leh a hnêna mi tam takte chungah chuan ruahpui vânâwn leh rial nasa tak leh mei leh kâtte ka sûrtîr ang,” tiin. (Ezek. 38:21, 22) Chutianga Pathian a rawn chêtna chuan eng nge a rah chhuah ang?

12. Hnamte chu eng nge hriat luihtîr an nih ang?

¹² Hnamte chuan chutianga hneh an nihna chu Jehova ngeiin a thlentîr a ni tih an hria ang a. Tichuan, hmân lai Aigupta mite’n Tuipui Sena Israel mite an ûm laia an tih ang chiah khân, Setana mite chu mangang takin: “LALPAN . . . a dopui a nih hi,” tiin an au ang. (Ex. 14:25) Ni e, hnamte chu Jehova hriat luihtîr an ni dâwn a ni. (Ezekiela 38:23 chhiar rawh.) Chu thil rawn thlen ṭan hun tûr chu eng ang takin nge kan hnaih tawh?

KHAWVEL AWPTU TUR DANG A AWM TAWH LO

13. Daniela sawi milim pêng pangana chungchângah eng nge kan hriat?

¹³ Daniela bua hrilhlâwkna chuan kan awmna hun hmâwr tawhzia hre thiam thei tûrin min ṭanpui a. Daniela chuan thîr hrang hranga siam milim chanchin chu a hrilhfiah a ni. (Dan. 2:28, 31-33) Chu milim chuan tûn hma leh tûn laia Pathian mite chunga dodâlna lian tham thlentîrtu, khawvêl awptu sawrkâr indawt zêlte a entîr a. Chûngte chu Babulon te, Medo-Persia te, Grik te, Rom te—leh a tâwp berah chuan, kan hun laia khawvêl awp mêktu sawrkâr hi a ni. Daniela hrilhlâwkna zir chianna chuan he khawvêl awptu sawrkâr hnuhnung ber hi milim ke leh kezungtangte khân a entîr a. Khawvêl indopui 1-naah khân Britain leh United States-te chu an inkawp ta tlat a ni. Ni e, Daniela milim hmuha a pangana chu Anglo-American Khawvêl Thuneitu hi a ni. A kephah chu milim taksaa a tâwpna ber a ni a, chu chuan mihring awp khawvêl thuneitu dang a awm tawh dâwn lo tih a târ lang a. A kephah leh a kezungṭangte thîr leh bellei inpawlh a nihna chuan Anglo-American Khawvel Thuneitu dinhmun derthâwnna a entîr a ni.

14. Armageddon a rawn thlen laia khawvêl thuneitu ding lai mêk chu eng nge ni ang?

¹⁴ Chu hrilhlâwkna vêk chuan lung lian  takin a entîr Pathian Ram chu kum 1914 khân Jehova lalna tlâng ata laih chhuah a ni tawh a. Tûnah chuan a delh tum tak—milim kephah lamah chuan a lûm mêk a ni. Chu chuan milim kephah leh a taksa pêng dangte chu Armageddon-ah a tikeh sawm vek ang. (Daniela 2:44, 45 chhiar rawh.) Chutiang chuan, Anglo-American Khawvêl Thuneitu chu Armageddon a rawn thlen laia khawvêl thuneitu ding lai mêk a ni dâwn a ni. Chu hrilhlâwkna thlen famkimna kimchang hmuh chu a va phûrawm dâwn êm! * Mahse, Jehova chuan Setana chu engtin nge a tih ang?

PATHIAN HMELMA LIAN BER CHUNGA THIL THLENG TUR

15. Armageddon hnuah chuan, Setana leh a ramhuaihote chungah eng nge thleng ang?

¹⁵ A hmasa berin, Setana chuan atîr aṭanga a tâwp thlengin lei lama a inawpna pâwl zawng zawng tihboral vek a nihzia chu a hmu phawt ang a. Chutah, amah Setana chungah ngei chuan thil engemaw a thleng ve leh ang. Tirhkoh Johana chuan a dawta thil lo awm tûr chu a sawi a ni. (Thu Puan 20:1-3 chhiar rawh.) Isua Krista—‘vântirhkoh leilâwt chabi kengtu’—chuan Setana leh a ramhuaihote chu a man ang a, leilâwtah a paih anga a, chutah chuan kum sângkhat chhûng a dah ang. (Lk. 8:30, 31; 1 Joh. 3:8) Chu chu rûl lu tihthitlin ṭantirhna a ni ang. *—Gen. 3:15.

16. Setana tân ‘leilâwta’ paihna chuan eng awmzia nge a neih ang?

¹⁶ Setana leh a ramhuaihote paih an nihna “leilâwt” chu eng nge ni? Heta Johana hman Grik thumal aʹbys·sos tih hi “thûk lutuk emaw, thûk tâwp khâwk emaw, sawina a ni a. “Hriatthiam phâk bâk, tiam chin nei lo,” tih leh “thil ruak tâwp chin nei lo” tia lehlin a ni bawk. Chuvângin, chu hmun chu Pathian Jehova leh a mi ruat vântirhkoh “leilâwt chabi kengtu” te tih chauh loh mi dang tuma ban phâk lohna hmun sawina a ni. Chutah chuan, Setana chu “hnam tin a bum leh tawh lohna tûrin” mitthi ang maia engmah tithei lova siam a ni ang a. Chu “sakeibaknei rûm ṭhîn” chu ngawihtîr hmâk a ni ang.—1 Pet. 5:8.

MUANNA A THLEN HMAA THIL THLENG TURTE CHU

17, 18. (a) Nakina lo thleng tûr tûna thil hmuh theih loh engte nge kan ngaihtuah tawh? (b) Chûng thilthlengte zawhah chuan, eng dinhmun nge kan chen ang?

¹⁷ Thil thleng pawimawh tak takte leh khawvêl nghawr nghîng thei thilte chu kan hma lawkah a rawn thleng dâwn a. “Muanna leh remna” tia an sawi a rawn thlen dân tûr hmuh chu kan nghâkhlel hle a ni. Chu mi hnu chuan Babulon Khaw Ropui tihchhiatna te, Magog rama Goga’n Pathian mite a beihna te, Armageddon indona te, leh Setana leh a ramhuaihote leilâwta paih an nihte chu kan hmu bawk ang. Chûng thilte a thlen hnu a, mi suaksual zawng zawng an boral hnu chuan, nun thar chu kan ṭan tawh ang—Krista Kum Sâng Rorêl chu. Chu mi hun chhûng chuan “remna chênin” kan awm ang.—Sâm 37:10, 11.

¹⁸ Nakina thil thleng tûr panga tûna kan sawi tâkte bâkah kan “en” tûr tûna ‘thil hmuh theih loh’ dangte pawh a la awm a. Chûng thil thlengte chu a dawta thuziakah kan ngaihtuah ang. (w12-E 09/15)

[Footnote-te]

[Zirlai Atâna Zawhnate]

[Phêk 9-naa bâwm]

LO THLENG TUR THIL PANGATE:

1 “Muanna leh remna” tia puan chhuahna

2 Hnamte’n “Babulon Khaw Ropui” an beih a, an tihchhiatna

3 Jehova mite beihna

4 Armageddon indona

5 Setana leh a ramhuaiho leilâwta paihna

[Phêk 9-naa milem]

[Phêk 9-naa milem]

[Phêk 10-naa milem]

[Phêk 10-naa milem]

[Phêk 10-naa milem]