1. ¿Toni techpaleuis maj titachixtokan uan maj tikxikokan ouijkayomej?

TEIN Biblia achtook kijtojka ke mochiuaskia, kinextia ke amo uejkaua onkas tachiualismej tein taltikpakneminij kitelmouiliskej. ¿Toni techpaleuis maj titachixtokan? Tatitanil Pablo techyolmajxitij maj tikitakan “ten amo tikitstinemij ika toixtololouan. Porin nochi ne ten tikitstinemij, yejuan ne nochi tajtamis san”. Yejua ika, motelneki maj nochipa tikelnamiktokan ke Jiova techmakas nemilis nochipaya, yeski iluikak oso nikan taltikpak. Pablo kijkuiloj nejin tajtolmej porin ika kinekia kinyolchikauas akin kichiuayaj kemej Cristo maj tanemilianij itech netetayokolil tein kiseliskiaj komo amo keman kikauayaj Dios. Komo itech tanemiliayaj, nejon kinpaleuiskia maj kixikokan ouijkayomej uan taixnamikilis tein kipiaskiaj (2 Cor. 4:8, 9, 16-18; 5:7).

2. 1) ¿Toni moneki tikchiuaskej uan ijkon tonechialis yeski chikauak? 2) ¿Toni tikitaskej itech nejin tamachtilis uan itech okse?

² Tein Pablo tayolmajxitij kinextia se taman tein motelneki: komo tiknekij maj mochikaua nechialis tein tikpiaj, moneki maj totachialis okachi uejka ajsi uan maj itech titanemilikan tein ayamo tikitaj (Heb. 11:1; 12:1, 2). Yejua ika, itech nejin tamachtilis uan itech okse, tikitaskej majtakti tachiualismej tein panoskej satepan, tein moteluikaj ika se nemilis nochipaya tein tikchiaj.

3. 1) ¿Toni tachiualis tein panos satepan ika motajtoua itech 1 Tesalonicenses 5:2, 3? 2) ¿Toni kichiuaskej tekiuanij uan akonimej xa mosentiliskej iniuan?

³ Itech semej amaixmej tein Pablo kinijkuilouilij Tesalonicenses, ika tajtoj yekinika taman tachiualis (xikonixtajtolti 1 Tesalonicenses 5:2, 3, TNM). Itech nejin tajkuilol, tatitanil ika tajtoua “itonal Jiova”. Nejin tonal peuas keman ixpoliuis taneltokalis tein amo melauak uan tamis itech neteuilis Armagedón. Tepitsin achto  ke peuas “itonal Jiova” taltikpaktekiuanij kijtojtoskej “¡Onkak yolseuilis uan yekyetolis!”. Nejin uelis moijtos sayoj sepa oso miakpa. Tekiuanij uelis kinemiliskej ke kitamiyektalijtokejya seki uejueyi kuejmolmej tein kipiaj. ¿Uan toni kichiuaskej tayekananij itech taneltokalismej? Kemej pouij nikan taltikpak, yejuan xa no ijkon kijtoskej kemej tekiuanij (Apoc. 17:1, 2). Komo ijkon kichiuaj, kitojtokatoskej inintachiualis tanauatianij tein amo melaujkej tein nenkej itech ne uejkauj Judá akin kijtouayaj: “¡Onkak yolseuilis! ¡Onkak yolseuilis!”, sayoj ke Jiova kinextij ke amo onkaya yolseuilis (Jer. 6:14; 23:16, 17).

4. ¿Toni tikajsikamatij tejuan tein miakej taltikpakneminij amo kimatij?

⁴ Maski amo tikyekmatij akoni kijtos “¡Onkak yolseuilis uan yekyetolis!”, nejin tachiualis kinextis ke itonal Jiova amo uejkaua peuas. Yejua ika, Pablo kiyekijtoj: “Namejuan, nantokniuan amo [nannemij] tech ne tayouayanilot den tajtakol para ma namechichtakakuis ne tonal [...], ijkon keme ne tachtekke teichtakauia ika ne ijsiukayot. Porin nochi namejuan nanpoutinemij iuan ne Tajtoltsin de Dios keme se tanextsin” (1 Tes. 5:4, 5). Biblia techpaleuia maj tikajsikamatikan toni kijtosneki tein axkan mochiujtok, maski miakej taltikpakneminij amo kiajsikamatij. Sayoj ke, ¿keniuj yekmelauj mochiuas tajtolmej “¡Onkak yolseuilis uan yekyetolis!”, tein achtook moijtojka ke moijtoskia? Moneki timochiaskej uan ijkon uelis tikitaskej. Yejua ika, “moneki ma tiijsatokan uan ma tikuatamatkanentinemikan” (1 Tes. 5:6; Sof. 3:8).

5. 1) ¿Keniuj peuas “ueyi tajyouilis”? 2) ¿Akoni ‘ueyichiujkej’ kinemilijtos ke amo kipanos nion teyi tein amo kuali?

⁵ ¿Toni panos satepan? Pablo achtook kijtoj: “Keman taltikpakneminij kijtojtoskej: ‘¡Onkak yolseuilis uan yekyetolis!’, ijkuak ejkotiuetsis ininixpoliuilis”. Nejin ixpoliuilis peuas keman kinixnamikiskej nochi taneltokalismej tein amo melaujkej itech nochi taltikpak, tein Biblia kintokaytia ‘Ueyi Babilonia’ oso “siuaauilnenke” (Apoc. 17:5, 6, 15). Keman kinixnamikiskej nochi taneltokalismej tein amo melaujkej, kampa no poujtokej tein kijtouaj kitojtokaj Cristo, peuas “ueyi tajyouilis” (Mat. 24:21; 2 Tes. 2:8). Keman mochiuas nejin, miakej taltikpakneminij kimoujkaitaskej. ¿Keyej? Porin hasta nejon tonal, siuaauilnenkej kinemilijtos ke amo kipanos nion teyi tein amo kuali uan moitas kemej se ‘ueyichiujkej’ uan kijtos: ‘Amo keman nimoyolkokojtinemis’. Sayoj ke niman kiitas ke mopoloj. Yejua ijsiujka ixpoliuis kemej  itech ‘se tonal san’ (Apoc. 18:7, 8).

6. ¿Akoni kiixpolos taneltokalis tein amo melauak?

⁶ ¿Akoni kiixnamikis siuaauilnenkej? ITajtol Dios kinextia ke yeski se “okuilin” oso se tapial tamouilil ika “majtakti ikuakuau”. Keman timomachtiaj amaix Apocalipsis tikajsikamatij ke nejon tapial yejua Naciones Unidas, uan “majtakti ikuakuau” kinixnextia nochin uejueyi tekiuajyomej tein moajsij axkan uan kipaleuiaj “chichiltik okuilin” (Apoc. 17:3, 5, 11, 12). * Nejin taixnamikilis tel tauejuelos. Altepemej tein pouij itech Naciones Unidas kikuiliskej siuaauilnenkej nochi tein kipia, kinextiskej ke amo yolkuali uan auilnemi, kijtakoskej uan ‘kitamichichinoskej’. Senkis kiixpoloskej (xikonixtajtolti Apocalipsis 17:16).

7. ¿Keniuj peuas taixnamikis “okuilin” oso tapial tamouilil?

⁷ Tein Biblia achtook kijtojka ke mochiuas no kinextia keniuj peuas taixnamikilis. Amo tikmatij keniuj, sayoj ke Jiova kinyoltanemililtis tekiuanij maj kiixpolokan siuaauilnenkej ‘ijkon kemej Yejuatsin kimonekiltia’ (Apoc. 17:17). Taneltokalismej kisentokaj kichiuaj maj onka neteuilismej uan kuejmolmej itech taltikpak, yejua ika tekiuanij xa kinemiliskej ke kuali yetok komo kinixpolouaj. Keman tekiuanij taixnamikiskej, kinemiliskej ke kichiuaj porin ijkon kinekij. Sayoj ke tein melauj, yejua Jiova kichiuas maj kinixpolokan nochin taneltokalismej tein amo melaujkej. Keman senkis mopatas tachiualismej tein semi kimoujkaitaskej, sekin tein kinixyekana Satanás kinixnamikiskej oksekin tein no kinixyekana, uan Amokuali amo uelis kitsakuilis (Mat. 12:25, 26).

8. ¿Toni taixnamikilis kichiuas “Gog tein poui itech tal Magog”?

⁸ Keman taneltokalis tein amo melauak ixpoliuisya, moitas ke itekitikauan Dios “kipiaj[ok] yekyetolis” uan “amo kipiaj tepamit” tein kinpaleuis (Ezeq. 38:11, 14). ¿Toni kinpanos nejin taltikpakneminij akin kiueyichiujtoskej Jiova uan moita ke amo kipiaj nepaleuil? Uelis mochiuas ke “miakej xolalmej” kinixnamikiskej itekitikauan Jiova. ITajtol Dios kinextia ke yejua “Gog tein poui itech tal Magog” kinixyekanas, tein kijtosneki yejua Satanás (xikonixtajtolti Ezequiel 38:2, 15, 16). ¿Moneki techteltekipachos nejin taixnamikilis?

9. 1) ¿Toni okachi techtekipachoua tiitekitikauan Dios? 2) ¿Toni moneki tikchiuaskej tein techpaleuis maj mochikaua totakuaujtamatilis?

⁹ Tiitekitikauan Dios amo titelmoujtokej porin tikmatij ke techixnamikiskej. Amo okachi techtekipachoua tonemakixtilis, ta maj itokay Jiova moueyitali uan maj  monexti ke yejuatsin kinamiki taixyekanas. Itech amaix tein kijkuiloj Ezequiel, tajtolmej kemej nejin tein Jiova kijtoj moajsij panoua 60: “Nankimatiskej ke nejua niJiova” (Ezeq. 6:7). Yejua ika, tiktelnekij tikitaskej maj mochiua nejin taman tein motelneki tein Ezequiel achtook kijtoj, uan no titakuaujtamatij ke “Jiova ueli kinmakixtia itech tayejyekolis taltikpakneminij akin nemij kemej yejuatsin kineki” (2 Ped. 2:9, TNM). Sayoj ke axkan moneki tikchiuaskej nochi tein techpaleuis maj tikchikauakan totakuaujtamatilis uan ijkon uelis tiksentokaskej iuan Jiova maski tikpanoskej miak ouijkayomej. ¿Toni moneki tikchiuaskej? Moneki tikchiuaskej netataujtil, tikixtajtoltiskej iTajtol Dios, tiknemiliskej tein tikixtajtoltiaj uan tikteixmatiltiskej iTekiuajyo. Ijkon, nechialis tein tikpiaj ika nemilis nochipaya, chikauak yeski “ijkon kemej se tepos ancla” (Heb. 6:19; Sal. 25:21).

10, 11. ¿Keniuj peuas neteuilis Armagedón, uan toni panos itech nejon neteuilis?

¹⁰ Keman kinixnamikiskej itekitikauan Dios, ¿toni okse tachiualis panos tein taltikpakneminij kitelmouiliskej? Jiova kiiluis Jesús uan itateuijkauan tein moajsij iluikak maj kinpaleuikan itekitikauan Dios (Apoc. 19:11-16). Ijkon peuas “guerra iuan Dios tech ne ueyi tonal [...] porin sayo Yejuatsin kipixtinemi nochi chikaualis”, tein no motokaytia Armagedón (Apoc. 16:14, 16).

¹¹ ¿Toni panos itech nejon neteuilis? Itenkopa Ezequiel, Jiova kiteixmatiltij: “Uan nikchiuas maj itech ajsi [Gog] se espada itech nochi noxolal tein tepeyoj, —ijkon kijtoua toTajtsin Jiova akin okachi Ueyi Taixyekankej—. Ika ininespada, sayoj yejuan momijmiktiskej”. Kemej amo kiajsikamatiskej toni panotos, taixnamikinij tein kitojtokaj Satanás momoujtiskej uan peuas momijmiktiskej sayoj yejuan. Uan Amokuali amo no uelis cholos, porin Jiova kiyekijtoua: “Tit uan azufre nikchiuas maj itech uetsi yejua uan itateuijkauan uan miak xolalmej tein iuan yetoskej” (Ezeq. 38:21, 22). ¿Toni panos keman Jiova kichiuas nejon?

12. ¿Toni monekis kiajsikamatiskej taltikpakneminij?

¹² Nochin taltikpakneminij monekis kiajsikamatiskej ke tapolouaj uan ixpoliuij porin Jiova ijkon tanauatij. Kemej taixnamikinij akin kinixyekana Satanás amo kimatiskej toni kichiuaskej, xa no kijtoskej kemej tateuianij kayomej Egipto akin kinikantokayaj israelitas itech ueyiat Chichiltik: “Jiova yekmelauj ininka kinteuia egipcios” (Éx. 14:25). Kemaj, nochin taltikpakneminij kimatiskej akoni Jiova (xikonixtajtolti Ezequiel 38:23). ¿Uejka poliuiok keman panos nejin tachiualismej?

13. ¿Toni tikmatij ika imetsuan ueyi takat tamachijchiuj tein ika tajtoua Daniel?

¹³ Se tajkuilol tein moajsi itech amaix Daniel tein kinextia toni mochiuas satepan, techajsikamatiltia ox uejka poliuiok keman ualas tamilis. Tanauatijkej Daniel ika tajtoua se ueyi takat tamachijchiuj ika tataman teposmej (Dan. 2:28, 31-33). Nejin takat tamachijchiuj kinixnextia seki uejueyi taltikpaktekiuajyomej, Babilonia, Medopersia, Grecia uan Roma, tein motojtokatiyajkej uan senkis kinixnamikinij itekitikauan Dios, uan ueyi tekiuajyot tein ika tami moajsi itech totonaluan. Nejon tajkuilol kinextia ke imetsuan uan iikxipiluan ueyi takat tamachijchiuj kiixnextia nejin ueyi tekiuajyot. Itech yekinika neteuilis tein mochiuak itech nochi taltikpak, Gran Bretaña uan Estados Unidos mosentilijkej uan peuak sentekitij. Yejua ika, imetsuan uan iikxipiluan takat tamachijchiuj kiixnextia ueyi taltikpaktekiuajyot Gran Bretaña iuan Estados Unidos de América. Uan kemej imetsuan ika tami nejin ueyi takat tamachijchiuj kinextia ke amo ixnesisok okse ueyi tekiuajyot.  Uan no, kemej imetsuan uan iikxipiluan chijchiujtok ika tepos uan sokit, kinextia ke ueyi taltikpaktekiuajyot Gran Bretaña iuan Estados Unidos de América amo chikauak.

14. Keman peuas Armagedón, ¿katiyejua taltikpaktekiuajyot taixyekantos?

¹⁴ No itech nejin tajkuilol moijtoua ke se ueyi tet kikixtiaj itech se tepet. Nejin tet kiixnextia iTekiuajyo Dios, uan tepet, iueyitaixyekanalis Jiova. Nejon tet kikixtijkej itech xiuit 1914 uan amo uejkaua kimetsuitekis ueyi takat tamachijchiuj. Itech neteuilis Armagedón, imetsuan uan nochi ueyi takat tamachijchiuj senkis kuechiuis (xikonixtajtolti Daniel 2:44, 45). Ika nejin moita ke ijkuak peuas Armagedón, taltikpaktekiuajyot tein taixyekantos yeski Gran Bretaña iuan Estados Unidos de América. ¡Semi techyolpaktis tikitaskej maj motamichiua nejin tein achtook moijtojka! * ¿Toni Jiova kichiuilis Satanás? Maj tikitakan.

15. ¿Toni kinpanos Satanás uan iamokuali ejekauan keman panosya Armagedón?

¹⁵ Yekinika, Satanás kiitas keniuj ixpoliui nochi tein kiixyekanaya nikan taltikpak. Satepan, yejua kitatsakuiltiskej. Tatitanil Juan techiluia toni panos (xikonixtajtolti Apocalipsis 20:1-3). Jesucristo, ángel akin kipia “llave tenika tatapoa kampa ne ueyi taltekoch”, kikitskis Satanás uan iamokuali ejekauan, uan kinpantamotas itech ueyi taltekoch, uan ompa tsaktoskej mil xiuit (Luc. 8:30, 31; 1 Juan 3:8). Ika nejin peuas taksaskej itech itsontekon kouat (Gén. 3:15). *

16. ¿Keniuj moajsis Satanás itech “ueyi taltekoch”?

¹⁶ ¿Toni “ueyi taltekoch” kampa kipantamotaskej Satanás uan iamokuali ejekauan? Tajtol griego ábyssos tein Juan kikuik itech nejin tajkuilol, kijtosneki “taltekoch tein tel uejkatan” oso “taltekoch tein amo kipia itamian”. Yejua ika, amo akin ueli ajsi ompa, sayoj Jiova uan ángel akin kimaktilij “llave tenika tatapoa kampa ne ueyi taltekoch”. Ijkon, Satanás amo teyi uelis kichiuasok, kemej yeskia miket moajsis uan amo kinkajkayauasok taltikpakneminij. ¡Nejon “kuoutajtekuani” tein nanalkatinemi kitentsakuaskej! (1 Ped. 5:8.)

17, 18. 1) ¿Toni tachiualismej tein panos satepan timomachtijkej? 2) ¿Toni peuas keman panosya nejin tachiualismej?

¹⁷ Amo uejkaua panos tachiualismej tein motelnekij uan tein taltikpakneminij kitelmouiliskej. Tiknejnekij tikakiskej keman moijtos “¡Onkak yolseuilis uan yekyetolis!”. Satepan tikitaskej keniuj ixpoliui Ueyi Babilonia, taixnamikilis tein kichiuas Gog tein poui Magog uan neteuilis Armagedón. Ompa, kipantamotaskej Satanás uan iamokuali ejekauan itech ueyi taltekoch. Keman ixpoliuisya nochi tein amo kuali, peuas se kualtsin uan yankuik nemilis: iTekiuajyo Cristo tein uejkauas Mil Xiuit. Itech nejon tonalmej tikpiaskej “ueyi yolseuilis” (Sal. 37:10, 11).

¹⁸ Tikitakejya makuil tataman tachiualismej “ten a[ya]mo tikitstinemij” uan ompa moneki titachixtoskej. Itech okse tamachtilis tikitaskej okseki makuil tachiualismej tein panos satepan.