Kɛzi Ewiade Ɛhye Bahɔ Ye Awieleɛ La
Kɛzi Ewiade Ɛhye Bahɔ Ye Awieleɛ La
“Ayi mɔ, bɛmɛ bɛnde awozinli nu na Kenle ne ali bɛ nvunu kɛ awule la.”—1 TƐS. 5:4.
ƐBAHOLA WƆAHILEHILE NU Ɔ?
Ninyɛne mɔɔ basisi la boni a bɛha nwolɛ edwɛkɛ wɔ ngɛlɛlera ɛhye mɔ anu a?
1. Duzu a baboa yɛ yeamaa yɛazinza na yɛagyinla sɔnea nloa ɛ?
NINYƐNE mɔɔ bakpusu azɛlɛ ne la bazi kenlensa ye ala. Baebolo ngapezo mɔɔ ɛra nu la maa yɛnwu kɛ ɔle nɔhalɛ, yemɔti ɔwɔ kɛ yɛkɔ zo yɛsinza. Duzu a baboa yɛ yeamaa yɛayɛ ɛhye a? Ɛzoanvolɛ Pɔɔlo dule yɛ folɛ kɛ yɛva yɛ nye yɛzie “ninyɛne mɔɔ ɛnyelɛ ɛnnwu bɛ la” azo. Yemɔti, ɔwɔ kɛ yɛmaa dahuu ngoane ahatualɛ ne mɔɔ yɛbanyia ye wɔ anwuma anzɛɛ azɛlɛ ye azo la tɛnla yɛ adwenle nu. Pɔɔlo luale edwɛkɛ ɛhye azo ɔmanle ɔ gɔnwo mɔ diedima anwosesebɛ kɛ bɛva bɛ adwenle bɛzie anyelielɛ mɔɔ ɔbavi bɛ nɔhalɛlilɛ ne anu ara la azo. Saa bɛyɛ ɛhye a, eza ɔbaboa bɛ yeamaa bɛagyinla sɔnea nee ɛkpɔlɛ nloa.—2 Kɔl. 4:8, 9, 16-18; 5:7.
2. (a) Amaa yɛazɔ yɛ anyelazo ne anu boɛ la, duzu a ɔwɔ kɛ yɛyɛ a? (b) Duzu a yɛbazuzu nwo wɔ edwɛkɛ ɛhye nee mɔɔ doa zo la anu a?
2 Ngyinlazo bie mɔɔ ɔhyia la wɔ Pɔɔlo folɛdulɛ ne anu: Amaa yɛazɔ yɛ anyelazo ne anu boɛ la, ɔnle kɛ yɛfa yɛ adwenle yɛsie ninyɛne mɔɔ yɛnwu bɛ kɛkala la azo. Ɔwɔ kɛ yɛfa yɛ adwenle yɛsie ninyɛne mɔɔ ɔhyia mɔɔ yɛnnwu bɛ la azo. (Hib. 11:1; 12:1, 2) Ɛhye ati, bɛmaa yɛzuzu ninyɛne bulu mɔɔ bazi kenlebie mɔɔ ɔbaha dahuu ngoane anyelazo mɔɔ yɛlɛ la anwo. *
ƆKA EKYII AWIELEƐ NE BA A DUZU NINYƐNE A BASISI A?
3. (a) Debie mɔɔ bazi kenlensa ye la boni a bɛha nwolɛ edwɛkɛ wɔ 1 Tɛsalonaekama 5:2, 3 a? (b) Duzu a maanyɛlɛ mgbanyima bɛayɛ a, na nwane mɔ a baboka bɛ nwo a?
3 Pɔɔlo hanle ninyɛne mɔɔ ɔbasisi kenlebie la anu ko anwo edwɛkɛ wɔ ye kɛlata ne mɔɔ ɔhɛlɛle Tɛsalonaekama la anu. (Bɛgenga 1 Tɛsalonaekama 5:2, 3. *) Ɔhwenle adwenle ɔhɔle “Gyihova kenle ne” azo. “Gyihova kenle ne” mɔɔ ɔvale ɔlile gyima wɔ ɛke la kile mekɛ mɔɔ bɛbabɔ adalɛ ɛzonlenlɛ ɛzɛkyelɛ bo na yeahɔwie Amagɛdɔn konle ne anu la. Noko akee, kolaa na Gyihova kenle ne abɔ ɔ bo la, ewiade arelemgbunli baha kɛ, “Anzondwolɛ nee anwobanebɔlɛ!” ɛra. Bie a ɛhye bayɛ debie ko anzɛɛ ɔbadoɔdoa zo. Maanle maanle ne mɔ adwenle bayɛ bɛ kɛ asɛɛ bɛli bɛ ngyegyelɛ titile ne mɔ anwo gyima bɛwie. Na ɛzonlenlɛ nu mgbanyima ne mɔ noko ɛ? Bɛboka ewiade ne anwo, yemɔti ɔbahola yeara ye kɛ bɛbava bɛ nwo bɛabɔ maanyɛlɛ mgbanyima ne mɔ. (Yek. 17:1, 2) Ɛhye bahile kɛ ɛsɔfo ne mɔ ɛlɛsukoa adalɛ ngapezoma mɔɔ ɛnee wɔ Dwuda la. Gyihova hanle edwɛkɛ ɛhye vanenle bɛ nwo: “Bɛka kɛ, ‘Anzondwolɛ wɔ ɛkɛ! Anzondwolɛ wɔ ɛkɛ!’ wɔ mekɛ mɔɔ anzondwolɛ ɛnle ɛkɛ la.”—Gyɛ. 6:14, NW; 23:16, 17.
4. Kɛmɔ yɛnle kɛ alesama mɔɔ ɛha la ati, ninyɛne boni mɔ a yɛze a?
4 Ɔnva nwo menli holɛ ko mɔɔ bɛbaha kɛ “Anzondwolɛ nee anwobanebɔlɛ!” ɛra la, edwɛkɛ ɛhye bamaa yeala ali kɛ ɔwɔ kɛ Gyihova kenle ne bɔ ɔ bo. Ɛhye ati a Pɔɔlo hanle kɛ: “Ayi mɔ, bɛmɛ bɛnde awozinli nu na Kenle ne ali bɛ nvunu kɛ awule la. Bɛ muala bɛle wienyi nu menli.” (1 Tɛs. 5:4, 5) Yɛnle kɛ alesama mɔɔ ɛha la, yɛze deɛmɔti Ngɛlɛlera ne anu ninyɛne bie mɔ ɛlɛsisi kɛkala la. Kɛzi ngapezo ne mɔɔ se bɛbaha kɛ “Anzondwolɛ nee anwobanebɔlɛ!” la bara nu ɛ? Ɔwɔ kɛ yɛkendɛ na yɛnea. Ɛhye ati, “ɔwɔ kɛ yɛmaa yɛ nye gyinla zolɛ na yɛyɛ yɛ nye gyɛlɛmgbɛɛnye.”—1 Tɛs. 5:6; Zɛf. 3:8.
“BELEMGBUNLI RAALƐ” MƆƆ YE ƐZƐKYELƐ RALE ARƐLEVILƐ NU
5. (a) Kɛzi “anwongyelelɛ” kpole ne babɔ ɔ bo ɛ? (b) “Belemgbunli raalɛ” boni a ye ɛzɛkyelɛ bara arɛlevilɛ nu a?
5 Ninyɛne mɔɔ ɛnyelɛ ɛnnwu bɛ la boni bieko a bazi a? Pɔɔlo hanle kɛ: “Saa ɔba ye kɛ bɛlɛka kɛ: ‘Anzondwolɛ nee anwobanebɔlɛ!’ a, arɛlevilɛ nu ala ɛzɛkyelɛ bara bɛ nwo zo.” ‘Arɛlevilɛ nu ɛzɛkyelɛ’ ne foa mɔɔ lumua la a le ‘Babelɔn Kpole’ ne, adalɛ ɛzonlenlɛ maanle ne mɔɔ eza bɛfɛlɛ ye “tuutuunli ne” la ɛtetalɛ. (Yek. 17:5, 6, 15) Adalɛ ɛzonlenlɛ kɔsɔɔti mɔɔ bɛbateta bɛ, mɔɔ Keleseɛnemaanle ne boka nwo la a bayɛ “anwongyelelɛ” kpole ne mɔlebɛbo a. (Mat. 24:21; 2 Tɛs. 2:8) Edwɛkɛ ɛhye bazi menli dɔɔnwo anwo. Duzu ati ɔ? Ɔluakɛ badwu zɔhane mekɛ ne tuutuunli ne baha ahile ɔ nwo kɛ, mele “belemgbunli raalɛ” na “menrɛnwu nyane deɛ holɛ.” Noko arɛlevilɛ nu ala, ɔbanwu kɛ yeanyɛ boɛ. Bɛbaye ye bɛavi ɛkɛ arɛlevilɛ nu, kɛ asɛɛ ye ɛzɛkyelɛ ne yɛle kenle ko la.—Yek. 18:7, 8.
6. Nwane mɔ a bazɛkye adalɛ ɛzonlenlɛ a?
6 Nyamenle Edwɛkɛ ne ka debie mɔɔ bateta tuutuunli ne la anwo edwɛkɛ kɛ ɔle “nane” mɔɔ lɛ “mɛne bulu.” Yekile buluku ne mɔɔ yɛzukoa la maa yɛnwu kɛ nane anwo ɛzulolɛ ne gyi ɛkɛ maa Maamgbole Koyɛlɛ Eku (UN) ne. “Mɛne bulu ne” gyi ɛkɛ maa maanyɛlɛ tumima mɔɔ boa “nane kɔkɔlɛ” ne la amuala. * (Yek. 17:3, 5, 11, 12) Kɛzi ɛtetalɛ ne bazɛkye ninyɛne ɛ? Maanle maanle ne mɔ mɔɔ wɔ UN ne anu la balie debie biala mɔɔ tuutuunli ne lɛ la bɛamaa yealɛ ɔ nwo zɔ; bɛbali ye nwonane ne na “bɛado ye senle nu bɛayela ye bɔkɔɔ.” Bɛbazɛkye ye bɔkɔɔ.—Bɛgenga Yekile 17:16.
7. Duzu a bamaa “nane ne” ateta adalɛ ɛzonlenlɛ a?
7 Baebolo ngapezo ne eza maa yɛnwu debie mɔɔ bava ɛtetalɛ ɛhye ara la. Ɔbayɛ kɛ Gyihova bava ‘ye gyimayɛlɛ nwo adwenle awula’ maanyɛlɛ tumima ne ahonle nu yeamaa bɛazɛkye tuutuunli ne. (Yek. 17:17) Ɛzonlenlɛ mɔɔ bɛkulo konle la kɔ zo gyegye adwenle wɔ ewiade ye anu; ɛhye ati, maanle maanle ne mɔ bade nganeɛ kɛ saa bɛsɛkye tuutuunli ne a ɔbaboa bɛ maanle ne. Bie a saa tumima ne teta bɛ a, bɛbazuzu kɛ ‘bɛbɔ nu bɛyɛ ko.’ Noko akee, nɔhalɛ ne a le kɛ Nyamenle a ɛlɛfa bɛ ali gyima yeamaa bɛazɛkye adalɛ ɛzonlenlɛ kɔsɔɔti a. Yemɔti, Seetan ahyehyɛdeɛ ne foa ko babɔ adwenle ateta ɔ gɔnwo arɛlevilɛ nu, ɛhye bamaa Seetan tumi ne aha aze na ɔnrɛhola ɔnrɛyɛ nwolɛ ɛhwee.—Mat. 12:25, 26.
BƐBATETA NYAMENLE MENLI
8. Ɛtetalɛ boni a ‘Gɔɔgo mɔɔ wɔ Meegɔɔgo azɛlɛ zo’ la bava ara a?
8 Saa bɛsɛkye adalɛ ɛzonlenlɛ bɛwie a, bɛbanwu kɛ Nyamenle menli “anzo nu ɛdwo bɛ” na bɛde “anwondɔlɛ nu.” (Yiz. 38:11, 14) Duzu a bado ekpunli ɛhye mɔɔ ɔle kɛ asɛɛ bɛnlɛ banebɔlɛ na bɛkɔ zo bɛsonle Gyihova la ɛ? ‘Menli dɔɔnwo’ badu bɛ nye azie bɛ nwo na bɛateta bɛ. Nyamenle Edwɛkɛ ne kilehile nu kɛ ɛhye a le ɛtetalɛ ne mɔɔ ‘Gɔɔgo mɔɔ wɔ Meegɔɔgo azɛlɛ zo’ bava ara la. (Bɛgenga Yizikeɛle 38:2, 15, 16.) Kɛzi ɔwɔ kɛ yɛbu zɔhane ɛtetalɛ ne ɛ?
9. (a) Duzu a hyia Keleseɛnenli kpalɛ a? (b) Ninyɛne boni mɔ a ɔwɔ kɛ yɛyɛ ye kɛkala yɛfa yɛmia yɛ diedi ne anu a?
9 Saa yɛdumua yɛnwu ɛtetalɛ ɛhye mɔɔ bara Nyamenle menli anwo zo la a, ɔnrɛmaa yɛnrɛdwenledwenle nwolɛ somaa. Tɛ yɛ ngoanelielɛ a hyia yɛ kpalɛ a, emomu, Gyihova duma ne mɔɔ ɔte nwolɛ na yeabua ye tumililɛ ne benle la ɔ. Nɔhalɛ nu, Gyihova hanle ye mɔɔ ɔbo fane 60 la kɛ: “Na bɛanwu kɛ medame a mele [Gyihova] a.” (Yiz. 6:7) Ɛhye ati, yɛlɛfa anyelielɛ kpole yɛanlea mekɛ mɔɔ Yizikeɛle ngapezo titile zɔhane bara nu la ade, yɛlɛ anwodozo kɛ “Awulae ze kɛ ɔsi ɔdie menli kpalɛ ɔfi bɛ sɔnea nu” la. (2 Pita 2:9) Wɔ mekɛ ɛhye anu, yɛkpondɛ kɛ yɛfa nwolɛ adenle biala mɔɔ yɛbanyia la yɛmiemia yɛ diedi ne anu amaa yɛahola yɛagyinla yɛ munlililɛ nu yɛamaa Gyihova ɔnva nwo sɔnea biala mɔɔ yɛbayia la. Duzu a ɔwɔ kɛ yɛyɛ a? Ɔwɔ kɛ yɛyɛ asɔne, yɛsukoa Nyamenle Edwɛkɛ ne na yɛdwenledwenle nwolɛ, na yɛka Belemgbunlililɛ edwɛkɛ ne yɛkile awie mɔ. Saa yɛyɛ ɛhye a, ɔbamaa dahuu ngoane anyelazo mɔɔ yɛlɛ la, anu amia kɛ “sɛkɛ.”—Hib. 6:19; Edw. 25:21.
MAANLE MAANLE NE MƆ BANWU GYIHOVA
10, 11. Duzu a bamaa yɛanwu Amagɛdɔn ne mɔlebɛbo a, na duzu a bahɔ zo wɔ zɔhane mekɛ ne a?
10 Saa bɛteta Gyihova azonvolɛ a, edwɛkɛ kpole boni a bazi a? Gyihova balua Gyisɛse nee anwumabɔvolɛma ɛlɔne ne anwo zo yeava Ɔ nwo yealie nu. (Yek. 19:11-16) Ɔ nwo mɔɔ ɔbava yealie nu la bahɔwie Amagɛdɔn—“Nyamenle Bedevinli ne Kenle kpole ne” konle ne anu.—Yek. 16:14, 16.
11 Mɔɔ fane konle zɔhane anwo la, Gyihova luale Yizikeɛle anwo zo hanle kɛ: “Mebamaa ɛzulolɛ kpole kpalɛ aha Gɔɔgo, medame Awulae Nyamenle a mese a. Awie biala bahwe ɔ gɔnwo anwo dadeɛ.” Ɛzulolɛ kpole bamaa menli mɔɔ wɔ Seetan afoa la anye zo ada bɛ na bɛahwe bɛ nwo dadeɛ, kovolɛ bahwe kovolɛ anwo dadeɛ. Bɛbazɛkye Seetan noko. Gyihova hanle kɛ: “Mebamaa . . . senle nee sɔlefe adɔ bilididi agua [Gɔɔgo] nee ye ɛlɔnema nee maanle maanle mɔɔ yehwe bɛ yeli ɔ nzi la anwo zo.” (Yiz. 38:21, 22) Duzu a bavi nyɛleɛ ɛhye anu ara a?
12. Duzu a bɛbamaa maanle maanle ne mɔ anwu ye a?
12 Akee maanle maanle ne mɔ banwu kɛ Gyihova ɛmaa bɛho bɛdɔ. Kɛmɔ Yigyibitima mɔɔ tetale Yizilayɛma wɔ Nyevile Kɔkɔlɛ ne anu la hanle la, Seetan ɛlɔnema ne baha kɛ: “[Gyihova] ɛlɛko atia yɛ amaa bɛ”! (Ade. 14:25) Bɛbamaa maanle maanle ne mɔ anwu Gyihova. (Bɛgenga Yizikeɛle 38:23.) Kɛzi yɛbikye ninyɛne ɛhye mɔ mɔɔ basisi ndoɔdoa zo la ɛ?
EWIADE TUMILILƐ BIEKO ƐNRƐDWAZO
13. Duzu a yɛze ye wɔ ananze ne mɔɔ Daneɛle hanle nwolɛ edwɛkɛ la foa ne mɔɔ tɔ zo nnu la anwo a?
13 Ngapezo bie mɔɔ wɔ Daneɛle buluku ne anu la maa yɛnwu ɛleka mɔɔ yɛdwu ye kɛkala la. Daneɛle hilehilele ananze bie mɔɔ ɔle kɛ sonla mɔɔ bɛvale mbulalɛ ngakyile a bɛyɛle la anu. (Dan. 2:28, 31-33) Ɔgyi ɛkɛ ɔmaa ewiade tumililɛ mɔɔ doɔdoale zo rale mɔɔ bɛnyianle Nyamenle menli anwo zo tumi wɔ tete ne nee ɛnɛ la. Bɛmɛ a le Babelɔn, Midea nee Pɛhyea, Gilisi, Wulomu—na mɔɔ li awieleɛ la a le ewiade tumililɛ mɔɔ wɔ ɛkɛ ne kɛkala la. Daneɛle ngapezo ne maa yɛnwu kɛ bɛvale ananze ne agyakɛ babonle ne nee ɔ gyakɛ mrɛlɛsɛka ne mɔ bɛziele ɛkɛ bɛmanle ewiade tumililɛ ɛhye mɔɔ li awieleɛ la. Wɔ Ewiade Konle I la anu, Britain nee United States vale bɛ nwo agɔnwolɛ wɔ adenle titile bie azo. Yemɔti, Daneɛle ananze ne foa mɔɔ tɔ zo nnu la a le Anglo-America Ewiade Tumililɛ ne. Egyakɛ babonle ne a le ananze ne foa mɔɔ li awieleɛ la, ɛhye kile kɛ ewiade tumililɛ mɔɔ sonla banlea zo la bieko ɛnrɛra. Ananze ne agyakɛ babonle ne mɔɔ ye foa ko le bulalɛ na foa ko le ɛva la le kɛzi Anglo-America Ewiade Tumililɛ ne tumi baha aze la anwo nvoninli.
14. Ewiade tumililɛ boni a bali tumi wɔ mekɛ mɔɔ Amagɛdɔn kɛra la ɛ?
14 Ngapezo ko ne ala maa yɛnwu kɛ wɔ 1914, Nyamenle Belemgbunlililɛ ne mɔɔ le bolɛ kpole mɔɔ awie ɛnlɛ nu la kpɔkyele vile Gyihova tumililɛ boka ne anwo. Bolɛ ne ɛlɛyɛ ye ndɛndɛ adwu ye bodane ne mɔɔ le ananze ne agyakɛ babonle ne anwo la anwo. Wɔ Amagɛdɔn ne anu, bɛbabubu ananze ne agyakɛ babonle ne nee foa ne mɔɔ ɛha la. (Bɛgenga Daneɛle 2:44, 45.) Ɛhye ati, Amagɛdɔn kara la ɛnee Anglo-America Ewiade Tumililɛ ne a tɛdi tumi a. Nea anyelielɛ mɔɔ ɔbayɛ kɛ yɛbanwu kɛ ngapezo ɛhye ɛra nu bɔkɔɔ a! * Duzu a akee Gyihova bava ayɛ Seetan a?
DUZU A BƐBAVA BƐAYƐ NYAMENLE KPƆVOLƐ KPOLE NE A?
15. Wɔ Amagɛdɔn ne anzi, duzu a bado Seetan nee ye sunsum ɛtane ne mɔ a?
15 Mɔɔ lumua, Seetan banwu kɛ bɛzɛkye ye ahyehyɛdeɛ ne mɔɔ wɔ azɛlɛ ye azo la kɔsɔɔti. Akee bɛbava bɛ adwenle bɛazie Seetan mumua ne anwo zo. Ɛzoanvolɛ Dwɔn hanle debie bieko mɔɔ ɔbazi la anwo edwɛkɛ. (Bɛgenga Yekile 20:1-3.) Gyisɛse Kelaese, anwumabɔvolɛ ne mɔɔ “ɔlɛ azɛlɛ kuma ne mɔɔ ɛnlɛ ɔ bo la sanvɛ” la bahye Seetan nee ye sunsum ɛtane ne mɔ yeavuandi bɛ yeagua kuma ne mɔɔ ɛnlɛ ɔ bo la anu ɛvolɛ apenle ko. (Luku 8:30, 31; 1 Dwɔn 3:8) Ɛhye le ɛwɔlɛ ne mɔɔ bɛbagelegele ɔ ti la foa mɔɔ lumua. *—Mɔl. 3:15.
16. Seetan mɔɔ bɛbava ye bɛado “kuma mɔɔ ɛnlɛ ɔ bo” anu la kile duzu?
16 Duzu a le kuma ne mɔɔ ɛnlɛ ɔ bo mɔɔ bɛbavuandi Seetan nee sunsum ɛtane ne mɔ bɛagua nu la? Giliki edwɛkɛkpɔkɛ aʹbys·sos mɔɔ Dwɔn vale lile gyima la kile “kuma mɔɔ anu kɔ kpalɛ.” Eza bɛkile ɔ bo kɛ “kuma mɔɔ ɛnlɛ ɔ bo,” ɔnlɛ “ye awieleɛ la.” Ɛhye ati, ɔle ɛleka mɔɔ awie biala ɛngola ɛngɔ ɛkɛ, kyesɛ Gyihova nee ye anwumabɔvolɛ ne mɔɔ “ɔlɛ azɛlɛ kuma ne mɔɔ ɛnlɛ ɔ bo la sanvɛ ne” la. Wɔ ɛkɛ ne, Seetan bahɔ tɛnlabelɛ mɔɔ le kɛ ewule la anu, ɔnrɛhola finde “na yeabɛlɛbɛla maanle maanle bieko.” Nɔhalɛ nu, bɛbamaa ‘awenade ɛhye mɔɔ ɛlɛkpo la’ aha ɔ nloa ado nu!—1 Pita 5:8.
NINYƐNE MƆƆ BASISI NA ANZONDWOLƐ ARA LA
17, 18. (a) Duzu ninyɛne a ɛnyelɛ ɛnnwu bɛ noko ɔbasisi mɔɔ yɛzuzu nwo a? (b) Ɛhye mɔ anzi, asetɛnla boni a yɛbanyia a?
17 Ɔnrɛhyɛ ninyɛne mɔɔ hyia na ɔyɛ ɛzulolɛ la basisi. Yɛlɛnea kɛzi “Anzondwolɛ nee anwobanebɔlɛ!” ne mɔɔ bɛbabɔ ye nolo la bayɛ la. Akee yɛbanwu Babelɔn Kpole ne ɛzɛkyelɛ, ɛtetalɛ mɔɔ Gɔɔgo mɔɔ wɔ Meegɔɔgo azɛlɛ zo bava ara, Amagɛdɔn konle ne, nee Seetan nee ye sunsum ɛtane ne mɔ mɔɔ bɛbavuandi bɛ bɛagua azɛlɛ kuma ne mɔɔ ɛnlɛ ɔ bo anu la. Saa ninyɛne ɛhye mɔ pɛ nu, na ɛtaneyɛlɛ kɔsɔɔti fi ɛkɛ a, yɛbahɔ asetɛnla fofolɛ nu, Kelaese Ɛvolɛ Apenle Tumililɛ ne mɔɔ yɛ nye balie yɛ “ɛkpazilɛ nwo [anzɛɛ, “anzondwolɛ dɔɔnwo bara,” NW]” la anu.—Edw. 37:10, 11.
18 Mɔɔ boka ninyɛne nnu ne mɔɔ yɛzuzu nwolɛ la anwo la, ninyɛne bie mɔ wɔ ɛkɛ mɔɔ “ɛnyelɛ ɛnnwu bɛ” mɔɔ yɛkulo kɛ yɛfa “yɛ nye” yɛto zo a. Yɛbazuzu ninyɛne ɛhye mɔ anwo wɔ edwɛkɛ mɔɔ doa zo la anu.
[Ɔ bo ɛkɛ ne edwɛkɛ ne mɔ]
^ ɛden. 2 Yɛbazuzu ninyɛne bulu ne anwo wɔ edwɛkɛ ɛhye nee mɔɔ doa zo la anu.
^ ɛden. 3 1 Tɛsalonaekama 5:2, 3 (NW) kenga kɛ: “Na bɛdabɛ bɛze kɛ Gyihova kenle ne ɛlɛba kɛmɔ awule ba nɔɔzo la: Saa ɔba ye kɛ bɛlɛka kɛ: ‘Anzondwolɛ nee anwobanebɔlɛ!’ a, arɛlevilɛ nu ala ɛzɛkyelɛ bara bɛ nwo zo kɛmɔ awolɛ nyane ka nrenzɛvolɛ la na bɛnrɛhola nriandi wɔ adenle biala azo.”
^ ɛden. 6 Nea Revelation—Its Grand Climax at Hand! mukelɛ 251-258.
^ ɛden. 14 Edwɛkɛ “ɔbahomo maanle zɔhane mɔ anwo zo yeamaa bɛagolo” mɔɔ wɔ Daneɛle 2:44 la fane arelemgbunlililɛ, anzɛɛ ewiade tumililɛ mɔɔ bɛva ananze ne foa ne mɔ bɛyɛ nwolɛ nvoninli la anwo. Noko akee, Baebolo ngapezo bie mɔɔ nee ɛhye yia la kile kɛ “arelemgbunli mɔɔ wɔ ewiade la amuala” baboɔboa bɛ nloa bɛ nee Gyihova aho wɔ “Nyamenle Bedevinli ne Kenle kpole ne anu.” (Yek. 16:14; 19:19-21) Ɛhye ati, bɛbazɛkye arelemgbunli ne mɔ mɔɔ ananze ne le bɛ nwo sɛkɛlɛneɛ la nee arelemgbunli mɔɔ ɛha la kɔsɔɔti wɔ Amagɛdɔn.
^ ɛden. 15 Ɛwɔlɛ ne ati mɔɔ bɛbagelegele la foa mɔɔ li awieleɛ la bazi wɔ ɛvolɛ apenle ko ne awieleɛ wɔ mekɛ mɔɔ bɛvuandi Seetan nee ye sunsum ɛtane ne mɔ bɛgua “sendɔlɔra nee sɔlefa tandane ne” anu la.—Yek. 20:7-10; Mat. 25:41.
[Debiezukoalɛ kpuyia ne mɔ]
Ɛlɛka/Nvoninli ne mɔ wɔ mukelɛ ne mɔ 9, 10]
NINYƐNE NNU MƆƆ BASISI:
1 “Anzondwolɛ nee anwobanebɔlɛ!” nwo nolobɔlɛ
2 ‘Babelɔn Kpole ne’ mɔɔ maanle maanle ne bateta ye na bɛazɛkye ye la
3 Gyihova menli ne ɛtetalɛ
4 Amagɛdɔn konle ne
5 Seetan nee ye sunsum ɛtane ne mɔ mɔɔ bɛbava bɛ bɛagua kuma ne mɔɔ ɛnlɛ ɔ bo anu la
