1. Antoy ontulong ed sikatayon mantultuloy a manbantay tan talonaan iray subok?

ASINGGER lan nagawa iray makapataktakot ya ebento. Papaneknekan iya na saray nagagawa lan propesiya ed Biblia, kanian nepeg tayoy mantultuloy a manbantay. Antoy ontulong ed sikatayon nagawaan itan? Oniay ipapaseseg ed sikatayo nen apostol Pablo: ‘Iteen yo so kamataan yo ed saray bengatlan agnanengneng.’ Kaukolan a sinononot tayon tumangan itayo nen Jehova a manbilay ed andi-angga, balanglan diad tawen odino diad dalin. Singa ipapanengneng na konteksto, insulat nen Pablo irayan salita pian ipaseseg ed saray kapananisiaan ton isentroy imano dad tumang a nagamoran da no manmatoor ira. Ontulong met itan ed sikaran natalonaan iray subok tan panamasegsegang.​—2 Cor. 4:8, 9, 16-18; 5:7.

2. (a) Antoy nepeg tayon gawaen pian mansiansian malet so ilalo tayo? (b) Antoy pantongtongan tayod saya, tan ed onsublay ya artikulo?

² Walay importantin leksion a naaralan tayod simbawa nen Pablo: Pian mansiansian malet so ilalo tayo, nepeg ya imanoen tayo ray bengatlan agtayo ni anengneng. Kaukolan ya isentro tayoy imano tayod saray importantin ebento a nagawa ni labat. (Heb. 11:1; 12:1, 2) Pantongtongan tayod saya, tan ed onsublay ya artikulo iray samploran ebenton nagawa ni labat a walaan na baleg a pikonektaan ed ilalo tayon manbilay ya andi-angga.

3. (a) Anton ebento a nagawa ni labat so binitla ed 1 Tesalonica 5:2, 3? (b) Antoy gawaen na saray lider na politika tan siopay miulop ed sikara?

³ Sakey ed saray nagawad arapen et binitla nen Pablo diad sulat tod saray taga Tesalonica. (Basaen so  1 Tesalonica 5:2, 3.) Impaimano to so “agew nen Jehova.” Tutukoyen na saya so panaon ya onggapo ed kaderal na palson relihyon tan manampot ed bakal na Armagedon. Balet, antis ya onggapoy agew nen Jehova, ibaga na saray manuley ed mundo ya “Kareenan tan kaligenan!” Nayarin ontutukoy iya ed sakey odino mantutumbokan ya ebento. Isipen na saray nasyon ya asingger da lan naresolbe iray angkakabaleg a problema da. Saray lider na relihyon ey? Kabiangan ira na mundo, kanian posiblin miulop ira ed saray lider na politika. (Apo. 17:1, 2) Onkiwas iray klero a singa ed saramay palson propeta na Juda nensaman. Oniay imbaga nen Jehova: “Kuan da, ‘Deen, deen.’ Anta anggapo so deen.”​—Jer. 6:14; 23:16, 17.

4. Aliwan singa saray totoo ed mundo, antoy natatalosan tayo?

⁴ Siopaman so mangiyabawag na “Kareenan tan kaligenan!” mankabaliksan itan a say agew nen Jehova et onggapo la. Kanian imbaga nen Pablo: “Agagi, anggapo kayo ed kabilungetan pian nasabian na satan ya agew a singa ed saray matakew, ta sikayon amin et ananak na liwawa.” (1 Tes. 5:4, 5) Aliwan singa saray totoo ed mundo, natatalosan tayoy ibabaga na Biblia nipaakar ed saray nagagawa. Panon a nasumpal so propesiyan pangiyabawag na “Kareenan tan kaligenan”? Kaukolan tayoy manalagar. Kanian, komon ta determinado tayon ‘mansiansian aliing tan mantultuloy a manlikas.’​—1 Tes. 5:6; Sof. 3:8.

5. (a) Panoy igapo na “baleg ya kairapan”? (b) Siopan reyna so nalingo ed iilaloan to?

⁵ Anto ni onsublay a nagawa? Inkuan nen Pablo: “Sano ibabaga ran: ‘Kareenan tan kaligenan!’ et tampol ya onsabi ed sikara so biglan kadederal.” Say unonan kabiangan na sayan “biglan kadederal” et say iyataki ed “Makapanyarin Babilonia,” say sankamundoan ya empiryo na palson relihyon, a kabkabat met bilang “say balangkantis.” (Apo. 17:5, 6, 15) Satan ya iyataki ed amin a palson relihyon, kaiba lay Kakristianoan so gapoan na “baleg ya kairapan.” (Mat. 24:21; 2 Tes. 2:8) Dakel so nabigla ed saya. Akin? Lapud anggad satan ya panaon, matalek so balangkantis a sikatoy “sakey a reyna” ya ‘agbalot makalikna na ermen.’ Balet bigla ton naamtaan ya sikatoy alingo ed iilaloan to. Sikatoy naderal a tampol, a singa ed “sakey ya agew.”​—Apo. 18:7, 8.

6. Siopay maneral ed palson relihyon?

⁶ Deneskribe na Biblia a say onataki ed balangkantis et sakey ya “atap ya ayep” a walaan na “samploran saklor.” Naaralan tayod libro na Apocalipsis a say atap ya ayep et ontutukoy ed United Nations (UN). Say “samploran saklor” et mangirerepresentad amin a kaplesan ya politikal a pakayari a manusuporta ed “ambalbalangan atap ya ayep.” * (Apo. 17:3, 5, 11, 12) Panon kagrabe itan ya iyataki? Samsamen na saray nasyon a kabiangan na UN so kayamanan na balangkantis, iparungtal day inkauges to, buagen da, tan “sigpot dan poolan.” Satan la so kasampotan to.​—Basaen so  Apocalipsis 17:16.

7. Antoy sengegan na iyataki na “atap ya ayep”?

⁷ Ipapaamta met na Biblia no antoy magmaliw a sengegan na sayan iyataki. Iyan nen Jehova ed kapusoan na saray lider na politika a ‘gawaen so walad kanonotan to,’ say paneral ed balangkantis. (Apo. 17:17) Saray relihyon so mangigagapo na guerra a sengegay dakel a problema ed mundo. Kanian nayarin isipen na saray nasyon a say paneral ed balangkantis et parad pankaabigan da. Sano onataki la ray manuley, isipen dan gagawaen day “saksakey a kanonotan da.” Balet diad tua, usaren ira na Dios pian deralen so amin a palson relihyon. Kanian atakien na sakey a kabiangan na sistema nen Satanas so sakey nin kabiangan na sistema to, tan anggapoy nagawaan nen Satanas pian patundaen itan.​—Mat. 12:25, 26.

8. Anto itay iyataki na “Gog ed dalin na Magog”?

⁸ Kayari kaderal na palson relihyon, saray lingkor na Dios et siansian ‘manaayam ed kaligenan’ tan “andiay padir.” (Eze. 38:11, 14, NW) Antoy nagawa ed sayan singa anggapoy laban a grupo na totoo a mantutultuloy a mandadayew ed si Jehova? Sikaray magmaliw a puntirya na nankakasakey ya iyataki na “dakel a balbaley.” Deneskribe iya na Salita na Dios bilang say iyataki na “Gog ed dalin na Magog.” (Basaen so Ezequiel 38:2, 15, 16.) Antoy nepeg a panmoria tayod sayan iyataki?

9. (a) Antoy sankaimportantian ed saray Kristiano? (b) Anto ray nepeg tayon gawaen pian ombiskeg so pananisia tayo?

⁹ Amta tayon onsabi panaon et atakien so totoo na Dios, balet agtayo iya masyadon pampapagaan. Imbes, say sankaimportantian ed sikatayo et say pamasanto ed  ngaran nen Jehova tan pangiyalangon ed soberanya to, aliwan say kilalaban tayo. Diad tua, 60 beses ya inyabawag nen Jehova: “Naamtaan yo naani a siak si Jehova.” (Eze. 6:7) Kanian, pitalaran tayo so pakagawa na satan ya importantin kabiangan na propesiya nen Ezequiel tan matalek tayon “amta nen Jehova no panon ton iliktar ed subok iray maridios a totoo.” (2 Ped. 2:9) Kaleganan to, gawaen tayoy anggaay nayarian tayon pabiskegey pananisia tayo pian makapanmatoor tayod si Jehova antokaman ya subok so nipaarap ed sikatayo. Antoy nepeg tayon gawaen? Kaukolan tayoy manpikasi, manaral na Salita na Dios tan dalepdepen itan, tan inabang so mensahe na Panarian ed arum. Pabiskegen na satan so ilalo tayon manbilay ya andi-angga. Sayan ilalo et magmaliw a singa “angkla” ya ontulong ed sikatayon mansiansian matoor ed Dios.​—Heb. 6:19; Sal. 25:21.

10, 11. Panon ya onggapo so Armagedon, tan antoy nagawa legan na satan?

¹⁰ Anton makatantandan ebento so nagawa sano atakien la ray lingkor na Dios? Usaren nen Jehova si Jesus tan saray anghel to pian tulongan iray totoo To. (Apo. 19:11-16) Satan so “guerra a nagawa ed baleg ya agew na Dios a Makapanyarin-amin,” a tatawagen ya Armagedon.​—Apo. 16:14, 16.

¹¹ Nipaakar ed satan ya guerra, oniay inyabawag nen Jehova panamegley nen Ezequiel: “‘Tawagen koy sakey ya espada sumpad sikato [Gog] diad interon kapalandeyan ko,’ so inkuan na Soberanon Katawan a Jehova. ‘Say espada na balang sakey so onsumpa ed dilin agi to.’” Saramay onsusuportad si Satanas so nawetwet tan nataktakot, tan pateyen day sakey tan sakey. Nawetwet met si Satanas. Inkuan nen Jehova: “Apoy tan asupre et papelagen ko ed sikato [Gog] tan saray tropa to tan saray dakerakel a totoon nakaiba to.” (Eze. 38:21, 22, NW) Antoy magmaliw a resulta no gawaen la iya na Dios?

12. Napilitan iray nasyon ya gawaen so anto?

¹² Namoria lanlamang na saray nasyon a say impakatalo da et lapud ingganggan itan nen Jehova. Singa say impangataki na saray Ehipsio ed saray Israelita diad Ambalangan Dayat, iyeyag met na puersa nen Satanas: “Si Jehova so pinagkalaman da a mibakal.” (Exo. 14:25) On, napilitan iray nasyon a bidbiren si Jehova. (Basaen so Ezequiel 38:23.) Panon la kaasingger so pakagawa na sarayan ebento?

13. Anton impormasyon so naamtaan tayo nipaakar ed komaliman kabiangan na imahen ya deneskribe nen Daniel?

¹³ Ontulong ed sikatayo so propesiya ed libro na Daniel a natalosan no panon tayo la kaasingger ed baleg ya kairapan. Deneskribe nen Daniel so sakey ya imahen a singa itsuray too tan gawad nanduruman klase na metal. (Dan. 2:28, 31-33) Irerepresenta na satan so mantutumbokan ya makapanyari ed mundo a walaan na baleg ya impluensya ed totoo na Dios nensaman tan natan. Saraya et say Babilonia, Medo-Persia, Gresya, Roma​—tan say unor ya makapanyari ed mundo ed panaon tayo. Naaralan tayod propesiya nen Daniel, a saray sali tan gamet na imahen et mangirerepresentad sayan makapanyari ed mundo. Legan na Sankamundoan a Guerra I, nanulop so Britain tan United States. Kanian say komaliman kabiangan na imahen et say Anglo-Amerikanon Makapanyari ed Mundo. Say sali so unor lan kabiangan na  imahen a mangipapatnag ya anggapo lay ontumbok ya makapanyari ed mundo. Irerepresenta na sali tan gamet a gawad balatyang tan langa so makapuy a kipapasen na Anglo-Amerikanon Makapanyari ed Mundo.

14. Anton makapanyari ed mundo so manuuley sano onsabi Armagedon?

¹⁴ Unong met ed satan a propesiya, say baleg a bato ya mangirerepresentad Panarian na Dios et atapyas ed palandey nen Jehova nen 1914. Satan a bato et asingger lan onkena ed target to​—say sali na imahen. Diad Armagedon, say sali tan arum nin kabiangan na satan et nabuybuyak. (Basaen so Daniel 2:44, 45.) Kanian, say Anglo-Amerikanon Makapanyari ed Mundo so manuuley sano onsabi Armagedon. Talagan makapaliket a nanengneng so sigpot a pakagawa na sayan propesiya! * Balet antoy gawaen nen Jehova ed si Satanas?

15. Kayari na Armagedon, antoy nagawad si Satanas tan ed saray demonyo to?

¹⁵ Unona et nanengneng ni nen Satanas so sigpot a kaderal na organisasyon to. Insan, sikato lay onsublay ya deralen. Impaamtad sikatayo nen apostol Juan so onsublay a nagawa. (Basaen so Apocalipsis 20:1-3.) Si Jesu-Kristo, say ‘anghel ya akaegnad tombok na kaaralman’ so mangibasileng ed si Satanas tan saray demonyo to ed kaaralman anggad kasumpal na sanlibon taon. (Luc. 8:30, 31; 1 Juan 3:8) Satan so gapoan na panmekmek ed ulo na uleg. *​—Gen. 3:15.

16. Antoy kabaliksan na pangibasileng ed si Satanas ed “kaaralman”?

¹⁶ Anto so “kaaralman” ya pangibasilengan ed si Satanas tan ed saray demonyo to? Say Griegon salita ya aʹbys·sos ya inusar nen Juan et mankabaliksan na “araldalem a maong.” Impatalos met iya bilang “aralem, agmangangga,” tan “agnayarian a laen.” Kanian sakey itan a lugar a say makaonla labat et si Jehova tan say tinuro ton anghel ya “sankaegnaan toy tombok na kaaralman.” Ditan et singa inatey so kipapasen nen Satanas, pian “agto la napalikdo iray nasyon.” Talagan anggapoy nagawaan na sayan “managlem a leon!”​—1 Ped. 5:8.

17, 18. (a) Anto ran ebento ya agni anengneng so naaralan tayo? (b) Kayari na sarayan ebento, antoy napanliketan tayo?

¹⁷ Saray importante tan makapataktakot ya ebento et asingsingger lan nagawa. Pitalaran tayo so pakanengneng ed pangiyeyag na “Kareenan tan kaligenan!” Insan tayo nanengneng so kaderal na Makapanyarin Babilonia, say iyataki na Gog ed dalin na Magog, say bakal na Armagedon, tan say pangibasileng ed si Satanas tan ed saray demonyo to ed kaaralman. Kayari na sarayan amin et naandi lay kaugsan, onsublay lay Sanlibon Taon ya Uley nen Kristo tan napanliketan tayo lay “inkadaakan na kareenan.”​—Sal. 37:10, 11.

¹⁸ Likud ed limaran ebento ya naaralan tayo, wala ni ray “bengatlan agnanengneng” ya labay tayon ‘pangiteenan na kamataan tayo.’ Sarayan ebento so pantongtongan tayod onsublay ya artikulo.