1. Kiko lo yuda nos keda alerta i wanta prueba?

PRONTO susesonan ku lo shòk mundu lo tuma lugá. Nos ta sigur di esaki debí na profesia bíbliko ku ta kumpliendo. Pues, nos tin ku keda alerta. Kiko lo yuda nos hasi esei? Nos tin ku kòrda riba e bida eterno ku nos lo haña, sea den shelu òf riba tera. Apòstel Pablo a urgi nos pa “fiha nos bista . . . riba e kosnan ku hende no ta mira.” Manera e konteksto ta mustra, Pablo a skirbi e palabranan akí pa animá e rumannan den su tempu pa fiha nan bista riba e rekompensa ku nan lo haña pasobra nan a keda fiel na Dios. A la bes, esaki lo a yuda nan wanta prueba i persekushon.—2 Kor. 4:8, 9, 16-18; 5:7.

2. (a) Kiko nos mester hasi pa mantené nos speransa firme? (b) Kiko nos lo analisá den e artíkulo akí i esun siguiente?

² E konseho di Pablo ta siña nos un lès importante: Pa mantené nos speransa firme, nos tin ku wak mas leu di e kosnan ku nos por mira. Nos tin ku fiha nos bista riba susesonan importante ku aworakí nos no ta mira. (Heb. 11:1; 12:1, 2) Pues, den e artíkulo akí i esun siguiente, nos lo analisá 10 suseso ku lo tuma lugá promé ku nos speransa di bida eterno keda realisá.

3. (a) Ki suseso ku mester tuma lugá ainda 1 Tesalonisensenan 5:2 i 3 ta deskribí? (b) Kiko e lidernan polítiko lo hasi, i ken kisas lo djòin nan?

³ Pablo a menshoná un di e susesonan akí den su karta na e tesalonisensenan. (Lesa 1 Tesalonisensenan 5:2, 3.) El a hala nan atenshon na “e dia di Yehova.” Esaki ta referí na e periodo ku lo kuminsá ku destrukshon di religion falsu i kulminá den e guera di Armagedon. Pero djis promé ku e dia di Yehova kuminsá, lidernan di mundu lo ta bisando “Pas  i siguridat!” Esaki lo por sosodé un biaha so òf vários biaha tras di otro. Kisas e nashonnan ta pensa ku nan ta serka di resolvé algun di nan problemanan grandi. Kiko di e lidernan religioso? Wèl, nan ta parti di mundu, pues ta posibel ku nan tambe lo bisa “Pas i siguridat!” huntu ku e lidernan polítiko. (Rev. 17:1, 2) Nan lo ta hasi meskos e ora ei ku e profetanan falsu di Huda di antigwedat ku tabata bisa: “Pas, pas.” Ma Yehova a bisa ku no tin pas.—Yer. 6:14; 23:16, 17.

4. Kiko nos ta komprondé, ku hende en general no ta komprondé?

⁴ Sin importá ken bisa “Pas i siguridat!,” e suseso ei lo indiká ku e dia di Yehova ta bai kuminsá. P’esei Pablo por a deklará: “Rumannan, boso no ta den skuridat; pues e dia ei no mester kue boso di sorpresa manera lus di dia ta kue ladron di sorpresa, pasobra boso tur ta yu di lus.” (1 Tes. 5:4, 5) Aunke hende en general no ta komprondé loke Beibel ta bisa tokante e susesonan ku ta tumando lugá awendia, nos sí ta komprondé. Kon e profesia tokante bisamentu di “Pas i siguridat!” lo kumpli? Wèl, nos tin ku warda i mira. P’esei laga nos ta determiná pa “keda lantá i mantené nos sano huisio.”—1 Tes. 5:6; Sof. 3:8.

5. (a) Kon e “tribulashon grandi” lo kuminsá? (b) Ken ta manera un “reina” ku ta kere ku nada malu lo pas’é?

⁵ Kiko ta e siguiente suseso ku lo tuma lugá? Pablo di: “Ora nan ta bisa: ‘Pas i siguridat!,’ e ora ei diripiente destrukshon lo bini riba nan instantáneamente.” E promé fase di e ‘destrukshon diripiente’ akí ta e atake kontra “Babilonia e Grandi,” e imperio mundial di religion falsu, konosí tambe komo “e prostituta.” (Rev. 17:5, 6, 15) E atake ei, ku lo ta kontra tur forma di religion falsu, inkluso kristiandat, ta kuminsamentu di e “tribulashon grandi.” (Mat. 24:21; 2 Tes. 2:8) E suseso akí lo kohe hopi hende di sorpresa. Dikon? Pasobra te ku e momento ei, e prostituta lo kere ku e ta “un reina” ku ‘hamas lo mira tristesa.’ Pero diripiente lo e realisá ku e tabata kiboká. Lo e ser destruí basta lihé, komo si fuera “riba ún dia.”—Rev. 18:7, 8.

6. Ken lo destruí religion falsu?

⁶ E Palabra di Dios ta bisa ku ta un “bestia salbahe” ku “dies kachu” lo ataká e prostituta. Un análisis di e buki di Revelashon ta yuda nos komprondé ku e bestia salbahe ta referí na Nashonnan  Uní. “E dies kachunan” ta representá tur e podernan polítiko aktual ku ta apoyá e “bestia salbahe koló kòrá bibu.” * (Rev. 17:3, 5, 11, 12) Kon destruktivo e atake ei lo ta? E nashonnan ku ta pertenesé na Nashonnan Uní lo plùnder e rikesa di e prostituta. Ademas, nan lo revelá su berdadero karakter, habrak’é i “kim’é kompletamente ku kandela.” Su destrukshon lo ta pa semper.—Lesa Revelashon 17:16.

7. Kiko lo provoká e atake di e “bestia salbahe”?

⁷ Profesia bíbliko ta indiká tambe kiko lo provoká e atake akí. Di un manera òf otro Yehova lo hinka den kurason di lidernan polítiko pa “kumpli ku Su pensamentu,” i esei ta: destruí e prostituta. (Rev. 17:17) Religion ta fomentá guera i ta sigui kousa masha problema na mundu; pues, tal bes e nashonnan lo pensa ku ta kumbiní nan interesnan nashonal si nan destruí e prostituta ei. Anto ora e gobernantenan atak’é, nan lo kere ku nan ta kumpliendo ku nan propio “pensamentu.” Pero, en realidat, ta Dios ta usando nan pa kaba ku tur religion falsu. Pues, den un buèlta sorprendente, un parti di e sistema di Satanas lo ataká un otro parti, i Satanas lo no por hasi nada pa evitá esei.—Mat. 12:25, 26.

8. Kiko ta e atake di “Gòg di tera di Magòg”?

⁸ Despues ku e nashonnan destruí religion falsu, nan lo ripará ku e sirbidónan di Dios ainda “ta biba trankil” i “sin muraya.” (Eze. 38:11, 14) Kiko lo pasa ku e grupo akí di hende ku ta sigui adorá Yehova i ku ta komo si fuera sin ningun protekshon? Aparentemente, nan lo ser ataká pa “hopi pueblo.” E Palabra di Dios ta deskribí e suseso ei komo e atake di “Gòg di tera di Magòg.” (Lesa Ezekiel 38:2, 15, 16.) Kon nos mester mira e atake ei?

9. (a) Kiko ta e preokupashon prinsipal di un kristian? (b) Kiko nos mester hasi awor pa fortalesé nos fe?

⁹ Nos sa ku e pueblo di Dios lo ser ataká, pero esaki no ta pone nos bira aribabou. Nos preokupashon prinsipal no ta nos propio salbashon, sino mas bien, e santifikashon di e nòmber di Yehova i e vindikashon di su soberania. De echo, Yehova a deklará mas ku 60 biaha den e buki di Ezekiel: ‘Boso lo sa ku ami ta Yehova.’ (Eze. 6:7) Pues, nos ta masha interesá pa mira kon e parti importante ei di e profesia di Ezekiel lo kumpli. I nos  tin sigur ku “Yehova sa kon pa libra hende deboto na dje for di prueba.” (2 Ped. 2:9) Mientrastantu, nos ke hasi tur loke ta na nos alkanse pa fortalesé nos fe pa asina nos por mantené nos integridat na Yehova pase loke pase. Kon nos por hasi esei? Nos mester hasi orashon, studia e Palabra di Dios i meditá riba dje i kompartí e mensahe di Reino ku otro hende. Esei lo hasi nos speransa di bida eterno mas firme. I e speransa akí lo ta manera “un anker” ku ta yuda nos keda fiel na Dios.—Heb. 6:19; Sal. 25:21.

10, 11. Kiko lo marka komienso di Armagedon, i kiko lo tuma lugá durante e tempu ei?

¹⁰ E atake kontra e sirbidónan di Yehova lo provoká ki suseso ku lo shòk mundu? Yehova, pa medio di Hesus i e ehérsitonan selestial, lo intervení na fabor di Su pueblo. (Rev. 19:11-16) Esaki lo ta “e guera ku lo tuma lugá riba e gran dia di Dios, e Todopoderoso,” esta, Armagedon.—Rev. 16:14, 16.

¹¹ Relashoná ku e guera ei, Yehova a deklará pa medio di Ezekiel: “‘Riba tur mi serunan lo mi yama un spada kontra Gòg,’ Señor DIOS ta deklará. ‘Spada di kada hòmber lo ta kontra su ruman.’” E hendenan na banda di Satanas lo drenta den pániko, bira tur konfundí i kuminsá usa nan arma kontra otro, sòldá kontra sòldá. Pero esei no ta tur; e destrukshon lo bini riba henter e sistema di Satanas. Yehova a bisa: “Lo mi laga yobe riba [Gòg], riba su trupanan i riba e hopi pueblonan ku ta huntu kuné, un áwaseru pisá, ku hagel, kandela i suafel.” (Eze. 38:21, 22) Kiko lo ta e resultado di e akshon divino akí?

12. Kiko e nashonnan lo haña nan obligá di hasi?

¹² Sin duda, e nashonnan lo realisá ku ta riba òrdu di Yehova nan ta ser destruí. E ora ei e kompinchinan di Satanas kisas lo reakshoná meskos ku e egipsionan di antigwedat ku a persiguí e israelitanan te na Laman Kòrá. Nan a grita den nan desesperashon: “[Yehova] ta bringa pa nan”! (Éks. 14:25) Sí, e nashonnan lo haña nan obligá di rekonosé ken Yehova ta. (Lesa Ezekiel 38:23.) Kuantu tempu falta pa e seri di susesonan ei kuminsá?

13. Kiko nos sa di e di sinku parti di e imágen ku Daniel a deskribí?

¹³ Un profesia den e buki di Daniel ta yuda nos komprondé den ki periodo nos ta bibando. Daniel a deskribí un estatua, òf imágen den forma di hende, ku tabata konsistí di diferente metal. (Dan. 2:28, 31-33) E imágen akí a representá un seri di poder mundial ku tabatin un gran influensia riba e pueblo di Dios di pasado i di presente. Nan ta Babilonia, Medo-Persia, Gresia, Roma i e último poder mundial, esun ku ta eksistí den nos tempu. Un análisis di e profesia di Daniel ta mustra ku e pianan i e dedenan di pia ta representá e último poder mundial ei. Durante Promé Guera Mundial, Gran Bretaña i Merka a forma un aliansa spesial ku otro. Pues, e di sinku parti di e imágen di Daniel ta e Poder Mundial Kombiná di Gran Bretaña i Merka. E pianan ta forma e último parti di e imágen. Esaki ta indiká ku lo no lanta ningun otro poder mundial humano despues di nan. E pianan i e dedenan di pia ta konsistí di heru mesklá ku klei. Esaki ta representá e kondishon suak di e Poder Mundial Kombiná di Gran Bretaña i Merka.

14. Kua poder mundial lo ta esun dominante ora Armagedon dal aden?

 ¹⁴ E mesun profesia ei ta indiká ku un piedra grandi ku a ser kòrtá for di un seru na aña 1914 ta representá e Reino di Dios. E seru ta representá e soberania di Yehova, esta, su derecho di goberná. Anto e piedra ku a ser kòrtá ta biniendo awor stret riba e pianan di e imágen. Na Armagedon, e piedra lo garna e pianan i e restu di e imágen. (Lesa Daniel 2:44, 45.) Pues, e Poder Mundial Kombiná di Gran Bretaña i Merka lo ta e potensia dominante ora Armagedon dal aden. Lo ta masha emoshonante pa ta testigu di e kumplimentu di e profesia akí! * Pero kiko Yehova lo bai hasi ku Satanas mes?

15. Despues di Armagedon, kiko lo pasa ku Satanas i su demoñonan?

¹⁵ Di promé, Satanas lo tin ku para mira kon henter su organisashon riba tera ta ser eliminá. Kaba Satanas mes ta bira e sentro di atenshon. Apòstel Huan ta konta nos kiko lo pasa. (Lesa Revelashon 20:1-3.) Hesukristu—kende ta e ‘angel ku tin e yabi di e abismo’—lo gara Satanas i su demoñonan, benta nan den abismo i tene nan ei den pa 1.000 aña. (Luk. 8:30, 31; 1 Huan 3:8) Esei lo ta e promé fase di e akshon di “heridá” e kabes di e kolebra. *—Gén. 3:15.

16. Ora benta Satanas den abismo, kiko esei lo nifiká p’e?

¹⁶ Kiko ta “e abismo” ku e angel ta benta Satanas i e demoñonan aden? E palabra griego ábissos ku Huan a usa ta nifiká un profundidat ku bo no por midi, ku no tin final. Tambe nan sa tradusié komo “e bashí infinito.” Pues, ta Yehova i su angel ku tin e “yabi di e abismo” so por saka Satanas i su demoñonan for di e abismo akí. Satanas lo ta einan den un estado inaktivo komo si fuera e ta morto, di manera ku ‘e no por gaña e nashonnan mas.’ Sí, Dios lo silensiá e “leon ku ta grita” ei!—1 Ped. 5:8.

17, 18. (a) Menshoná e susesonan ku nos a analisá pero ku ainda no a tuma lugá. (b) Despues di e susesonan akí, ki periodo di tempu nos lo disfrutá di dje?

¹⁷ Pronto susesonan importante ku lo shòk mundu lo tuma lugá. Nos ta ansioso pa mira kon e bisamentu di “Pas i siguridat!” lo sosodé. Kaba nos lo ta testigu di e destrukshon di Babilonia e Grandi, e atake di Gòg di Magòg, e bataya di Armagedon i e bentamentu di Satanas i su demoñonan den abismo. Despues di e susesonan akí, ora ku lo no tin maldat mas riba tera, nos lo kuminsá un kapítulo nobo: bida bou di e Reinado di Mil Aña di Kristu! Durante e periodo ei nos lo disfrutá di “pas abundante.”—Sal. 37:10, 11.

¹⁸ Fuera di e sinku susesonan ku nos a analisá te asina leu, tin mas ‘kos ku hende no ta mira’ ku nos lo ke “fiha nos bista” riba dje. Den e siguiente artíkulo, nos lo analisá e susesonan ei.