¿Kʼuxi chtal slajeb li balumil liʼe?
¿Kʼuxi chtal slajeb li balumil liʼe?
«Li voʼoxuque quermanotac, muʼyucoxuc xa ta icʼ osil jech mu chʼayeluc avoʼntonic chvul staoxuc jech chac cʼu chaʼal li bochʼo chʼayem yoʼnton chtaat yuʼun jun jʼeleqʼue.» (1 TES. 5:4)
¿MI X-ALBE AVUʼUN SMELOLAL?
¿Kʼusitik chkʼot ta pasel ta tsʼakal ti chichʼ albel skʼoplal li ta tekstoetik chtale?
1. ¿Kʼusi tskoltautik sventa lekuk vikʼil jsatik xchiʼuk stsal kuʼuntik li vokoliletike?
LI ALBILKʼOPETIK ta Vivliae chal ti poʼot xa chkʼot ta pasel senyailtak ti solel xibal sba chkʼot ta pasel li ta balumile. ¿Kʼusi tskoltautik sventa lekuk vikʼil jsatik? Li jtakbol Pabloe xi laj yale: «Maʼuc te batem jsatcutic yuʼun li cʼusi chquil ta jsatique. Jaʼ te batem jsatcutic yuʼun li cʼusi mu xquiltique». Jaʼ yuʼun chaʼa, skʼan me te oyuk ta joltik ti chakʼbutik kuxlejal sbatel osil li Jeovae, akʼo mi ta vinajel o mi ta Balumil. Li kʼusi la stsʼiba li jtakbol Pabloe jaʼ sventa tspatbe yoʼonton li yajtsʼaklomtak Cristo ti spatoj yoʼonton tsta smotonik mi tukʼ laj yakʼ sbaik ta stojolal Diose. Mi jech tsnopike, jaʼ me chkoltaatik sventa xkuch yuʼunik li nutsele xchiʼuk kʼusuk vokolil ti tsnuptanike (2 Cor. 4:8, 9, 16-18; 5:7).
2. 1) ¿Kʼusi skʼan jpastik sventa tsotsuk-o li spatobil koʼontontike? 2) ¿Kʼusi ta jchantik li ta xchanobil liʼe xchiʼuk li ta yan xchanobil chtale?
2 Li tojobtasel laj yal Pabloe oy kʼusi tsots skʼoplal chakʼ jchantik: sventa te oyuk-o li spatobil koʼontontike, maʼuk noʼox skʼan jkʼeltik batel li kʼusi xkiltike, moʼoj, yuʼun jaʼ skʼan jkʼeltik batel li kʼusi mu to xkiltike (Heb. 11:1; 12:1, 2). Li xchanobil liʼe xchiʼuk li ta yan xchanobil chtale ta jkʼeltik lajuneb senyailtak kʼusitik chkʼot ta pasel ta jelavel ti te tsakal skʼoplal li kuxlejal sbatel osile.
¿KʼUSI CHKʼOT TA PASEL KʼALAL JUTUK XA SKʼAN XTAL LI SLAJEBAL KʼAKʼALE?
3. 1) ¿Kʼusi chkʼot ta pasel ta tsʼakal ti jaʼ chalbe skʼoplal li 1 Tesalonicenses 5:2, 3 ta Xchʼul Cʼop ti Jtotic Diose, ta skʼop Chamulae? 2) ¿Kʼusi van abtelal xuʼ tspasik li jbabeetik ta relijion xchiʼuk li jpolitikoetike?
3 Li Pabloe te la stsʼiba ta jun karta sventa Tesalonicenses li baʼyel senyail ti kʼusitik chkʼot ta pasel ta jelavele (kʼelo 1 Tesalonicenses 5:2, 3, Ch). Li jtakbole jaʼ chalbe skʼoplal li «scʼacʼalil ta xtal ti Cajvaltique», li ta teksto taje jaʼ chalbe skʼoplal li yorail ti kʼusi ora chlik li slajeb li jecheʼ relijione xchiʼuk ti te tstsuts li ta paskʼop ta Armagedone. Kʼalal jutuk xaʼox skʼan xlik li «scʼacʼalil ta xtal ti Cajvaltique», li jnitvanejetik ta spʼejel Balumile yakal chalik: «Lamajem cʼop, muʼyuc xiʼel, lec oy scotol», taje jaʼ skʼan xal jtos noʼox li kʼusi chkʼot ta pasele o jun li ta skotole. Li mukʼtik lumetike ta van snopik ti poʼot xa xchap yuʼunik junantik li kʼopetik ti mas tsotsike. ¿Kʼusi xuʼ xkaltik ta stojolal li jnitvanejetik ta relijione? Ta skoj ti te tsakal skʼoplalik li ta balumile, xuʼ van spasik ta jmoj sjolik xchiʼuk li jpolitikoetike (Apoc. 17:1, 2). Mi jech tspasike, jaʼ me yakal chchanbeik li jecheʼ j-alkʼopetik ta voʼneal Judá, ti xi laj yalike: «Lec xa oy, toj lec chbat scotol», pe li Jeovae laj yal ti jaʼo chʼabal lekilale (Jer. 6:14; 23:16, 17).
4. Ta skoj ti mu xijkoʼolajutik kʼuchaʼal li yan krixchanoetike, ¿kʼusi ti xkaʼibetik smelolale?
4 Taje mu ventauk ti buchʼu chalik ti «Lamajem cʼop, muʼyuc xiʼel, lec oy scotol» xiʼike, yuʼun taje jaʼ skʼan xal ti poʼot xa xlik li skʼakʼalil Jeovae. Jaʼ yuʼun li Pabloe xi laj yale: «Li voʼoxuque quermanotac, muʼyucoxuc xa ta icʼ osil jech mu chʼayeluc avoʼntonic chvul staoxuc jech chac cʼu chaʼal li bochʼo chʼayem yoʼnton chtaat yuʼun jun jʼeleqʼue» (1 Tes. 5:4, 5). Li voʼotike mu xijkoʼolajutik kʼuchaʼal li yan krixchanoetike, yuʼun li voʼotike jnaʼojtik ti toj tsots skʼoplal li senyailtak chkʼotanuk ta pasel avi jech kʼuchaʼal chal Vivliae. Jaʼ yuʼun chaʼa, ¿kʼuxi chkʼot ta pasel kʼalal chichʼ alel: «Lamajem cʼop, muʼyuc xiʼel, lec oy scotol» xiʼe? Taje skʼan jmalatik sventa xkiltik. Jaʼ yuʼun chaʼa «viqʼuiluc me jsatic, cuxuluc me coʼntontic» (1 Tes. 5:6; Sof. 3:8).
LI «MEʼ AJVALIL[E]» MU SNAʼ MI CHICHʼ LAJESEL
5. 1) ¿Kʼuxi chlik li «tsots vocol[ile]»? 2) ¿Buchʼu jaʼ li «meʼ ajvalil» ti tsnop ti muʼyuk kʼusi chopol chkʼot ta stojolale?
5 ¿Kʼusi jaʼ li xchibal senyail chtal ta tsʼakale? Xi laj yal li Pabloe: «Cʼalal xi ta xalic ti jnaclejetic ta banomile: “Lamajem cʼop, muʼyuc xiʼel, lec oy scotol”, jaʼ o ta jech yepal ta xtal ti tsots vocol ta stojoli[ke]». Li baʼyele, jaʼ ti «ta jech yepal ta xtal ti tsots vocol ta stojol[al]» skotol li jecheʼ relijionetike. Li Vivlia xtoke chal ti jaʼ li «mucʼta lum [Babilonia]», jaʼ xkaltik, li «jmulavil [antse]» (Apoc. 17:5, 6, 15). Ti chichʼ lajesel skotol li jecheʼ relijionetike, ti te tsakal skʼoplal li buchʼutik tskuy sbaik ta yajtsʼaklom Cristoe, jaʼ me te chakʼ ta ilel ti chlik li «tsots vocole» (Mat. 24:21; 2 Tes. 2:8). Ep ti chʼayal yoʼonton chtaatike. ¿Kʼu yuʼun? Yuʼun li vaʼ ora taje, li jmulavil antse mu snaʼ mi ta xichʼ lajesel, yuʼun tsnop ti jaʼ «jun meʼ ajvalil» xchiʼuk ti xi chale: «Muʼyuc cʼusi ora chquil ta jsat chiʼocʼ». Pe jaʼ to chile, muʼyuk jech chkʼot ta pasel ti kʼuyelan snopoje. «Jaʼ yuʼun ta jun noʼox cʼacʼal» chichʼ lajesel (Apoc. 18:7, 8).
6. ¿Buchʼu chakʼbe slajeb li jecheʼ relijione?
6 ¿Buchʼu chakʼbe slajeb li jmulavil antse? Li Skʼop Diose chal ti jaʼ la «jcot tsajal jtiʼvanej bolom» ti oy «lajuneb xulub[e]». Kʼalal ta jchantik li livro Apocalipsise, te chal ti jaʼ ONU li jtiʼvanej bolome, pe li «lajuneb xulub[e]» jaʼ skotol li tsatsal politika ti jaʼ tskoʼoltas sjolik xchiʼuk li «tsajal jtiʼvanej bolom[e]» (Apoc. 17:3, 5, 11, 12). * Toj echʼ noʼox me xibal sba ti kʼuyelan chlajesvane. Li lumetik yuʼun organisasion ONU sbie, ta me stʼananik komel ta jyalel li jmulavil antse, ta me xakʼik ta ilel ti kʼuyelan ta melele, ta stibeik li sbekʼtale xchiʼuk ta «xchiqʼuic ta cʼocʼ». Ta xlaj-o sbatel osil (kʼelo Apocalipsis 17:16).
7. ¿Kʼuxi chlik tsakvanuk ta kʼop li «jtiʼvanej bolom[e]»?
7 Li albilkʼopetik ta Vivlia xtoke chal ti kʼuxi chlik tsakvanuk ta kʼope. Taje jaʼ Jeova snaʼoj stuk kʼusi tspas sventa tstikʼbe ta yoʼonton ajvaliletik sventa «[tspasik] li cʼusi snopoj onoʼox stuque», ti chakʼbe slajeb li jmulavil antse (Apoc. 17:17). Ta skoj ti jaʼ onoʼox tslikesik kʼopetik ta spʼejel Balumil li relijionetike, jaʼ yuʼun, li ajvaliletike tsnopik ti jaʼ mas lek ti xakʼbeik slajebe. Li jnitvanejetik ta politikae yaloj mi la snop stukik ta yakʼbel slajeb li jecheʼ relijione. Pe li kʼusi melele, jaʼ ti chichʼik tunesel yuʼun Jeova sventa xakʼbeik slajeb skotol li jecheʼ relijionetike. Ta xjel ta anil li kʼusitike, li sviniktak Satanase ta stsak sbaik ta kʼop stukik, li Diabloe mu kʼusi xuʼ spas sventa mu spasik li kʼop taje (Mat. 12:25, 26).
TA XICHʼ TSAKEL TA KʼOP LI SLUMAL DIOSE
8. ¿Kʼuxi van tstsakvan ta kʼop li «Gog te ta yosilal Magoge»?
8 Mi laj xaʼox li jecheʼ relijionetike, li yajtuneltak Jeovae chichʼik ilel ti «jun yoʼnton te nacal ta yosilali[k]» xchiʼuk «ti muʼyuc setbil ta coralton slumalique» (Ezeq. 38:11, 14). ¿Kʼusi van chkʼot ta pasel ta stojolal li krixchanoetik ti mu xpak yuʼun skʼoplalik yileluk ti chichʼik-o ta mukʼ Jeovae? Li Skʼop Diose chal ti «ep lumetic» tstsakik ta kʼop li jtsop yajtuneltak Diose, taje jaʼ li «Gog te ta yosilal Magoge», jaʼ xkaltik, li Satanase (kʼelo Ezequiel 38:2, 15, 16). ¿Mi ta van xkat koʼontontik ta skoj taje?
9. 1) ¿Kʼusi li mas chkat-o koʼontontik li yajtsʼaklomutik Cristoe? 2) ¿Kʼusi skʼan jpastik avi sventa jtsatsubtastik li xchʼunel koʼontontike?
9 Li yajtunelutik Diose muʼyuk chijxiʼ yuʼun ta skoj li kʼusitik chtale. Li kʼusi mas chkat-o koʼontontike jaʼ li xchʼultajesbel sbi Jeovae xchiʼuk ti jpakbetik skʼoplal li mukʼul pasmantal yuʼune, maʼuk li jkoleltike. Li Jeovae mas ta 60 ta velta laj yal: «Jech chlic anaʼic ti vuʼun Mucʼul Diosune» (Ezeq. 6:7). Jaʼ yuʼun, oy ta koʼontontik ti xkʼotuk ta pasel li kʼusitik labal sba laj yal li Ezequiele, jech xtok jpatoj koʼontontik ti «Cajvaltique snaʼ cʼuxi chut tscolta ta svocol li bochʼo ta xʼichʼat ta mucʼ yuʼune» (2 Ped. 2:9). Yoʼ to oy yoraile, tsots skʼoplal skʼan jtsatsubtas xchʼunel koʼontontik sventa tukʼuk xkakʼ jbatik ta stojolal Jeova, kʼusiuk ti xtal ta jtojolaltike. Vaʼun chaʼa, ¿kʼusi skʼan jpastik? Spasel orasion, xchanel Skʼop Dios, snopbel skʼoplal xchiʼuk yalel batel aʼyej ta sventa li Ajvalilal yuʼun Diose. Mi jaʼ jeche, li spatobil koʼontontik ta sventa li kuxlejal sbatel osile «lec nacal coʼntontic jech chac cʼu chaʼal anclataqʼuin ti lec pajal yalel ta chac nab[e]» (Heb. 6:19; Sal. 25:21).
LI JTEKLUMETIKE TA ME SNAʼIK BUCHʼU JAʼ LI JEOVAE
10, 11. ¿Kʼuxi chlik li Armagedone, xchiʼuk kʼusi chkʼot ta pasel li ta paskʼop taje?
10 Ti chlik stsakik ta kʼop li steklumal Diose jaʼ me li kʼusi chʼayal to yoʼonton chkʼot-o yuʼun li krixchanoetike. Li Jeovae ta stunes Jesús xchiʼuk anjeletik ta vinajel sventa tspoj li steklumale (Apoc. 19:11-16). Jaʼ jech chlik «spasic mucʼta pleito ta scʼacʼalil yuʼun li Dios ti echʼem svuʼele», ti Armagedón sbi noxtoke (Apoc. 16:14, 16).
11 ¿Kʼusi chkʼot ta pasel li ta paskʼop taje? Xi laj yal ta stojolal Ezequiel li Jeovae: «Yuʼun te ta xquiqʼuic tal ta vitsetic yuʼun Israel sventa acʼo lajicuc ta milel ta espada li Goge. Jech noxtoc te chlic smilan sbaic ta yespada stuquic». Ta skoj ti solel xiʼemike, li buchʼutik tspas kʼop yuʼun Satanase solel mu xa snaʼik kʼusi tspasik, jaʼ yuʼun tsmil sba stukik. Li Diablo eke maʼuk xa me kolem chkom, yuʼun xi chal li Jeovae: «Cʼocʼ, xchiʼuc azufre. Jaʼ jech chvul ta stojolic jech chac cʼu chaʼal tsatsal icʼal voʼ. Chtʼab scotol li epal soldadoetique xchiʼuc li epal cristianoetic liquemic tal ta epal lum te xchiʼinoj batele» (Ezeq. 38:21, 22). ¿Kʼusi chkʼot ta pasel mi jech la spas li Dios taje?
12. ¿Kʼusi van chakʼik venta li lumetike?
12 Li lumetike ta me xakʼik venta ti jaʼ Jeova li buchʼu ch-akʼbat slajebike. Jech kʼuchaʼal kʼot ta stojolalik li soltaroetik yuʼun Egipto kʼalal bat snutsik ta Tsajal Nab li j-israeletike, li soltaroetik ti pasbilik ta mantal yuʼun Satanase xuʼ xi chalike: «Yuʼun li Mucʼul Diose jaʼ ta scolta ta pleito» (Éx. 14:25). Ta melel, li lumetike ta me snaʼik buchʼu jaʼ li Jeovae (kʼelo Ezequiel 38:23). ¿Kʼu to sjalil skʼan xlik li kʼusitik taje?
MUʼYUK XA CHTAL YAN MUKʼTA TSATSAL LUM
13. ¿Kʼusi jnaʼojtik ta sventa li svoʼobal mukʼta tsatsal ajvalil li ta lokʼol laj yalbe skʼoplal Daniele?
13 Li jun albilkʼop chal ta slivroal Daniele, jaʼ tskoltautik ta yaʼibel smelolal ti jutuk xa skʼan xtal li mukʼta tsatsal vokolile. Li j-alkʼope chalbe skʼoplal jun mukʼta lokʼol kʼuchaʼal jun krixchano ti ep ta tos kʼusitik pasbil-oe (Dan. 2:28, 31-33). Li lokʼol taje jaʼ skʼan xal li mukʼta tsatsal lumetik ti te tsakal skʼoplal xchiʼuk li steklumal Jeova ta voʼnee —Babilonia, Medopersia, Grecia xchiʼuk Roma— li slajeb mukʼta tsatsal lume jaʼ li ta jkʼakʼaliltike. Li jun albilkʼop ti jaʼ chalbe skʼoplal li mukʼta tsatsal lume jaʼ li xpachʼomal yok xchiʼuk li sniʼtak yoke. Kʼalal jaʼo yakal li Baʼyel Mukʼta Paskʼop ta spʼejel Balumile, li Gran Bretaña xchiʼuk Estados Unidose jmoj la snop skʼopik. Jaʼ yuʼun, li ta svoʼobal mukʼta tsatsal ajvalil li ta lokʼol laj yil Daniele, jaʼ li mukʼta tsatsal lum angloamericanae. ¿Kʼusi skʼan xal li xpachʼomal yok xchiʼuk li sniʼtak yok li ta lokʼol taje? Jaʼ ti muʼyuk xa chtal yan mukʼta tsatsal lume. Jech xtok, li xpachʼomal xchiʼuk li sniʼtak yok li mukʼta lokʼole patbil ta lum xchiʼuk ta tsatsal takʼin, taje jaʼ skʼan xal ti mas kʼun yip li mukʼta tsatsal lum angloamericanae.
14. Kʼalal mi lik xaʼox li Armagedone, ¿kʼusi mukʼta tsatsal lum ti mas mukʼ skʼoplale?
14 Li ta albilkʼop taje, chal ti kʼok talel stuk jpʼej ton ta vitse, li jpʼej tone jaʼ skʼan xal li Ajvalilal yuʼun Diose, li vitse jaʼ li mukʼul pasmantal yuʼun Jeovae. Li jpʼej ton ti kʼok talel stuke jaʼo kʼot ta pasel ta sjabilal 1914, taje solel anil xa noʼox chtal sventa chkʼot ti bu satioj batele: ta xpachʼomal xchiʼuk ta sniʼ yok li lokʼole. Li ta paskʼop ta Armagedone, mi kʼot ta xpachʼomal yok li ton taje, lilijem me chkom skotol li lokʼole (kʼelo Daniel 2:44, 45). Jech oxal, kʼalal mi lik xaʼox li Armagedone, li mukʼta tsatsal lum ti mas mukʼ skʼoplale, jaʼ me li angloamericanae. ¡Toj labal sba ta aʼyel mi kʼot ta pasel li vaʼ albilkʼop taje! * Vaʼun chaʼa, ¿kʼusi tspasbe Jeova li Satanase? Jkʼeltik.
¿KʼUSI CHKʼOT TA STOJOLAL LI YAJKONTRA JEOVAE?
15. ¿Kʼusi chkʼot ta stojolal Satanás xchiʼuk li spukujtak mi echʼ xaʼox li Armagedone?
15 Ta baʼyele, li Satanase ta me xil kʼuxi chkʼot slajeb ta slikebal onoʼox skotol li s-organisasion ta Balumile. Mi laje, ta me xichʼ akʼbel slajeb ek. Li jtakbol Juane ta xalbutik li kʼusi chkʼot ta pasele (kʼelo Apocalipsis 20:1-3). Li Jesucristo —li «jʼalmantal» ti jaʼ yichʼojbe «sllavial li natil xabe»— ta me xchuk li Satanás xchiʼuk li spukujtake, ta sjip ochel ta natil xab xchiʼuk te chchuk jmil jabil (Luc. 8:30, 31; 1 Juan 3:8). Taje jaʼ me slikeb li xvochʼbel sjol li kiletel chone (Gén. 3:15). *
16. ¿Kʼu yelan chkom Satanás li ta natil xab taje?
16 ¿Kʼusi jaʼ li «natil» xab ti te chichʼ jipel ochel li Satanás xchiʼuk li spukujtake? Li jpʼel kʼop ta griego ti la stunes Juan li ta teksto —ábyssos— jaʼ skʼan xal «ti solel nat jomole» xchiʼuk ti «mu jtabetik spajebe». Li ta natil xab taje, muʼyuk buchʼu xuʼ xkʼot te, jaʼ noʼox li Jeovae o li anjel ti jaʼ yakʼojbe «sllavial li natil xabe». Kʼalal te xaʼox oy li Satanase mu kʼusi xuʼ spas, xkoʼolaj kʼuchaʼal chamem chkom sventa mu sloʼla krixchanoetik ta jujun balumil. Mi jech kʼot ta pasel taje, ¡makbil xaʼox me ye li «león ti xʼavet noʼox[e]»! (1 Ped. 5:8.)
KʼUSITIK CHKʼOT TA PASEL KʼALAL SKʼAN TOʼOX XTAL LI LEKILALE
17, 18. 1) ¿Kʼusitik chkʼot ta pasel ta tsʼakal ti laj xa jchanbetik skʼoplale? 2) ¿Kʼusi chkʼot ta pasel mi laj xaʼox li voʼob senyailtake?
17 Oy kʼusitik chkʼot ta pasel ti chʼayal to chkʼot yoʼonton yuʼun li krixchanoetike. Oy ta koʼontontik skʼelel kʼalal mi laj yichʼ alel «Lamajem cʼop, muʼyuc xiʼel, lec oy scotol» xie. Vaʼun chkiltik kʼuyelan chichʼ lajesel li Mukʼta Babiloniae, ti kʼuyelan tstsakvan ta kʼop li Gog ta Magoge, li paskʼop ta Armagedone xchiʼuk ti kʼuyelan chichʼ tikʼel ochel ta natil xab li Satanás xchiʼuk li spukujtake. Mi laj xaʼox skotol li kʼusitik chopole, te chlik achʼ kuxlejal: kʼalal jaʼo ch-ajvalilaj Jmil Jabil li Cristoe ta jkʼupintik ti jun noʼox koʼontontike (Sal. 37:10, 11).
18 Laj xa jkʼeltik voʼob ti kʼusi mu to xkil ta jsatike, pe skʼan «viqʼuiluc me jsatic» ta skoj taje. Li ta yan xchanobil chtale ta jchantik yan voʼob ti kʼusitik chkʼot ta pasel ta tsʼakale.
[Tsʼibetik ta yok vun]
^ par. 6 Kʼelo li livro Apocalipsis... ¡se acerca su magnífica culminación!, ta pajina 251 kʼalal ta 258.
^ par. 14 Kʼalal «ta slajesbe scʼoplal scotol li yantic ajvalileti[k]» xi ta Daniel 2:44, li «ajvalileti[k]» xiʼe, jaʼ li tsatsal lumetik ti te tsakal skʼoplal li ta mukʼta lokʼole. Pe akʼo mi jech, jun albilkʼop ta Vivlia chal ti «stsobic tal scotol ajvaliletic ta sbejel banamil» ti tstsakik ta kʼop Jeova li ta «mucʼta pleito ta scʼacʼalil yuʼun li Dios ti echʼem svuʼele» (Apoc. 16:14; 19:19-21). Li ta Armagedone ta xichʼ lajesel skotol li ajvaliletik ta balumile, maʼuk noʼox li ajvaliletik chalbe skʼoplal li ta mukʼta lokʼol laj yil Daniele.
^ par. 15 Li slajeb xvochʼbel sjol li kiletel chone jaʼ to chkʼot ta pasel mi laj li jmil jabile, kʼalal mi laj yichʼik jipel ochel ta «mucʼta cʼocʼ tsanbil ta azufre» li Satanás xchiʼuk li spukujtake (Apoc. 20:7-10; Mat. 25:41).
[Sjakʼobiltak sventa xchanobil]
[Rekuadro ta pajina 4]
VOʼOB KʼUSITIK CHKʼOT TA PASEL TA JELAVEL:
1 Chichʼ alel ti «Lamajem cʼop, muʼyuc xiʼel, lec oy scotol»
2 Li lumetike tstsakik ta kʼop xchiʼuk tslajesik li «Mukʼta Babiloniae»
3 Tstsakik ta kʼop steklumal Jeova
4 Li paskʼop ta Armagedone
5 Li Satanás xchiʼuk li spukujtake chichʼik jipel ochel li ta natil xabe
[Rekuadro ta pajina 3]
[Rekuadro ta pajina 4]
[Rekuadro ta pajina 4]
[Rekuadro ta pajina 5]
[Rekuadro ta pajina 5]
[Rekuadro ta pajina 5]
