1. Ano an mabulig ha aton nga padayon nga magbantay ngan makailob ha mga pagsari?

HIRANI na mahitabo dinhi ha tuna an magpakalilisang nga hitabo. Ginpapamatud-an ito han katumanan han mga tagna ha Biblia, salit kinahanglan padayon kita nga magbantay. Ano an makakabulig ha aton ha pagbuhat hito? Hi apostol Pablo nag-aghat ha aton nga padayon nga ‘magtan-aw ha mga butang nga diri nakikita.’ Oo, kinahanglan hunahunaon naton an ihahatag ni Jehova nga kinabuhi nga waray kataposan, ha langit man o ha tuna. Iginpapakita han konteksto nga ginsurat ini ni Pablo basi dasigon an iya mga igkasi-tumuroo nga magpokus ha makalilipay nga balos han ira pagkamatinumanon. An pagbuhat hito mabulig liwat ha ira nga mailob an mga pagsari ngan pagtimaraot.—2 Kor. 4:8, 9, 16-18; 5:7.

2 (a) Basi magpabilin nga marig-on an aton paglaom, ano an sadang naton buhaton? (b) Ano an aton hihisgotan hini ngan ha sunod nga artikulo?

² An sagdon ni Pablo nagtututdo ha aton hin importante nga leksyon: Basi magpabilin nga marig-on an aton paglaom, kinahanglan magpokus kita diri la ha mga nahitatabo yana. Kinahanglan isentro liwat naton an aton atensyon ha importante nga mga hitabo nga diri pa nahitatabo. (Heb. 11:1; 12:1, 2) Salit hini ngan ha sunod nga artikulo, aton hihisgotan an napulo nga mahitatabo ha tidaraon nga may kalabotan gud ha aton paglaom nga mabuhi ha waray kataposan.

3. (a) Ano an mahitatabo ha tidaraon nga gin-unabi ha 1 Tesalonika 5:2, 3? (b) Ano an bubuhaton han politikal nga mga magmarando, ngan hin-o an bangin bumulig ha ira?

³ An usa han mga mahitatabo ha tidaraon gin-unabi ni Pablo ha iya surat ha mga taga-Tesalonika. (Basaha an 1 Tesalonika 5:2, 3.) Iya gin-unabi an “adlaw han Ginoo [“adlaw  ni Jehova,” NW].” Ini nga “adlaw ni Jehova” nagtutudlok ha panahon nga magtitikang pinaagi han kabungkagan han buwa nga mga relihiyon ngan matatapos ha girra han Armagedon. Kondi antes gud magtikang an adlaw ni Jehova, an mga magmarando han kalibotan masiring, “Kamurayawan ngan kasigurohan!” (NW) Mahimo ini magtudlok ha usa nga hitabo o sunod-sunod nga mga hitabo. Bangin hunahunaon han mga magmarando han mga nasud nga hirani na nira masulbad an iba han ira dagku nga problema. Ano an bubuhaton han mga lider han relihiyon? Bahin hira han kalibotan, salit posible nga mabulig hira ha pagsiring hin “Kamurayawan ngan kasigurohan!” (Pah. 17:1, 2) Ha pagbuhat hito ginsusubad han mga lider han relihiyon an buwa nga mga propeta ha kadaan nga Juda. Hi Jehova nagsiring mahitungod ha ira: ‘Hira nasiring, kamurayaw, kamurayaw; hin waray kamurayaw.’—Jer. 6:14; 23:16, 17.

4. Ano an aton nasasabtan nga diri nasasabtan han kadam-an nga tawo?

⁴ Bisan hin-o pa an bumulig pagsiring hin “Kamurayawan ngan kasigurohan!” ito nga panhitabo magpapakita nga magtitikang na an adlaw ni Jehova. Salit nakasiring hi Pablo: “Mga kabugtoan, waray kamo dida ha kasisidman, basi nga kamo kalitan hadto nga adlaw sugad han kawatan. Kay kamo ngatanan mga anak han kalamrag.” (1 Tes. 5:4, 5) Diri pariho han kadam-an nga tawo, nasasabtan naton an ginsisiring han Biblia mahitungod han mga nahitatabo yana. Paonan-o an tagna mahitungod ha pagsiring hin “Kamurayawan ngan kasigurohan!” matutuman? Hulaton naton kon paonan-o ito mahitatabo. Salit, magin determinado kita nga padayon nga ‘mag-agma ngan magmaligdong.’—1 Tes. 5:6; Sep. 3:8.

5. (a) Paonan-o magtitikang an “daku nga kagol-anan”? (b) Hin-o an rayna nga diri naghuhunahuna nga bubungkagon hiya?

⁵ Ano an sunod nga mahitatabo? Hi Pablo nagsiring: “Kon magsiring hira, Pakigdait ngan karig-onan [“Kamurayawan ngan kasigurohan!” NW], ha kadagmitan an pagkabungkag maabot ha ira.” An siyahan nga bahin hinin ‘madagmit nga pagkabungkag’ amo an pag-atake ha ‘Babilonya nga Daku,’ an imperyo han buwa nga relihiyon ha kalibotan nga gintatawag liwat nga “puta.” (Pah. 17:5, 6, 15) An pag-atake ha ngatanan nga buwa nga relihiyon, upod na an Kakristianohan, amo an tinikangan han “daku nga kagol-anan.” (Mat. 24:21; 2 Tes. 2:8) Damu an makakalasan kon mahitabo na ito. Kay ano? Kay tubtob hito nga panahon, huhunahunaon han puta nga usa hiya nga rayna nga ‘diri gud makakakita hin kabidoan.’ Kondi tigda nga masasantop niya nga sayop an iya panhunahuna.  Tigda hiya nga bubungkagon, sugad hin “ha usa ka adlaw.”—Pah. 18:7, 8.

6. Hin-o an magbubungkag han buwa nga relihiyon?

⁶ An Biblia nasiring nga an maatake ha puta amo an mapintas nga “mananap” o hayop nga may “napulo nga sungay.” Kon aton pag-aadman an libro nga Pahayag, aton hibabaroan nga an mapintas nga hayop nagtutudlok ha United Nations (UN). An “napulo nga sungay” nagrirepresentar han ngatanan nga gobyerno nga nasuporta hinin “mapula nga mananap.” * (Pah. 17:3, 5, 11, 12) Ano kadaku an kadaot nga magigin resulta hito nga pag-atake? Kukuhaon han mga nasud nga membro han UN an ngatanan nga karikohan han puta, ibubuhayhag an iya magraot nga binuhatan, lalamyon hiya, ngan “pagsusunugon gud hiya.” Salit an buwa nga relihiyon bug-os gud nga mabubungkag.—Basaha an Pahayag 17:16.

7. Paonan-o magtitikang an pag-atake han mapintas nga hayop?

⁷ Gin-unabi liwat ha tagna ha Biblia kon paonan-o magtitikang ini nga pag-atake. Ibubutang han Dios ha mga kasingkasing han politikal nga mga magmarando “an pagbuhat han iya kaburut-on,” nga amo an pagbungkag ha puta. (Pah. 17:17) An mga relihiyon nag-aaghat hin girra ngan padayon nga nagigin hinungdan han kasamok ha kalibotan; salit bangin maghunahuna an mga magmarando han mga nasud nga an pagbungkag ha puta para ha kaopayan han ira nasud. Ha pagkamatuod, kon umatake na hira, maghuhunahuna hira nga ira ginbubuhat an ira “pagkaurosa hin buot.” Kondi ha pagkamatuod, ginagamit hira han Dios ha pagbungkag han ngatanan nga buwa nga relihiyon. Salit, tigda nga magbabag-o an mga panhitabo. An usa nga bahin han sistema ni Satanas maatake ha lain nga bahin hito, ngan waray mahihimo hi Satanas ha pagpugong hito.—Mat. 12:25, 26.

8. Ano an pag-atake ni “Gog, ha tuna ha Magog”?

⁸ Katapos bungkagon an buwa nga relihiyon, an katawohan han Dios padayon nga “nangungukoy ha masarig” ngan “waray mga kuta.” (Esek. 38:11, 14) Ano an mahitatabo hini nga grupo han mga tawo nga padayon nga nagsisingba kan Jehova ngan baga hin waray mahihimo ha pagdepensa ha ira kalugaringon? Sugad hin aatakehon hira han ‘damu nga katawohan.’ Gin-unabi ito ha Biblia sugad nga pag-atake ni “Gog, ha tuna ha Magog.” (Basaha an Esekiel 38:2, 15, 16) Ano an sadang naton abaton mahitungod hito nga pag-atake?

9. (a) Ano an mas importante ha usa nga Kristiano? (b) Ano an sadang naton buhaton yana basi maparig-on an aton pagtoo?

⁹ Bisan kon maaram kita nga aatakehon an  katawohan han Dios, diri kita sobra nga nababaraka. Lugod, mas importante ha aton an pagbaraan han ngaran ni Jehova ngan pagbindikar han iya pagkasoberano kay han aton kaluwasan. Ha pagkamatuod, ha libro han Esekiel, sobra 60 ka beses nga nagsiring hi Jehova: “Kamo makilala nga ako hi Jehova.” (Esek. 6:7) Salit ginpapamulat gud naton an katumanan hiton makatirigamnan nga bahin han tagna ni Esekiel, ngan nasarig kita nga “an Ginoo maaram ha pagluwas han matinumanon ha Dios tikang ha panulay.” (2 Ped. 2:9) Samtang yana, karuyag naton buhaton an ngatanan ha pagparig-on han aton pagtoo basi matipigan naton an aton integridad kan Jehova anoman nga pagsari an aton maeksperyensyahan. Ano an sadang naton buhaton? Sadang kita mag-ampo, mag-aram han Pulong han Dios ngan pamalandungon ito, ngan magsangyaw han mensahe han Ginhadian. Ha pagbuhat hito, matitipigan naton nga marig-on sugad hin “angkla” an aton paglaom nga kinabuhi nga waray kataposan.—Heb. 6:19, Maopay nga Sumat; Sal. 25:21.

10, 11. Paonan-o magtitikang an Armagedon, ngan ano an mahitatabo hito nga panahon?

¹⁰ Ano nga makalilisang nga butang an mahitatabo kon atakehon na an mga surugoon ni Jehova? Pinaagi kan Jesus ngan han kasundalohan ha langit, bubuligan ni Jehova an iya katawohan. (Pah. 19:11-16) Ini an “pakipag-away han daku nga adlaw han Dios, nga Makagagahum”—an Armagedon.—Pah. 16:14, 16.

¹¹ Mahitungod hito nga girra, hi Jehova nagsiring pinaagi kan Esekiel: “Ako magpapatawag para hin usa nga kampilan patok [kan Gog] ngada ha ngatanan ko nga kabukiran, nasiring an Ginoo nga hi Jehova: an kampilan han tagsa-tagsa nga tawo mapatok han iya bugto nga lalaki.” An mga dapig kan Satanas magugupong ngan malilisang, ngan hira mismo an magpaparaptayay. Ha pagkamatuod, ito nga kasamok mahitatabo ha bug-os nga sistema ni Satanas. Hi Jehova nagsiring: “Akon pauuranon ngada [kan Gog], ngan ngada ha iya mga kasundalohan, ngan ngada ha damu nga mga katawohan nga upod niya, . . . an kalayo, ngan an asupre.” (Esek. 38:21, 22) Ano an magigin resulta kon buhaton na ini han Dios?

12. Mapipiritan an mga nasud nga buhaton an ano?

¹² Masasantop han mga nasud nga hi Jehova an nagsugo basi bungkagon hira. Katapos, pariho han mga kasundalohan han kadaan nga Ehipto nga naglanat ha mga Israelita ha Dagat nga Pula, an mga dapig kan Satanas bangin magsinggit: “Hi Jehova nakikig-away tungod ha ira”! (Eks. 14:25) Oo, an mga nasud mapipiritan nga kilalahon hi Jehova. (Basaha an Esekiel 38:23.) Ano na kahirani an pagtikang hito nga mga hitabo?

13. Ano an aton hinbabaroan mahitungod ha ikalima nga bahin han ladawan nga iginhulagway ni Daniel?

¹³ Usa nga tagna ha libro han Daniel an nabulig ha aton nga masabtan kon hain na kita nga bahin han panahon. Iginhulagway ni Daniel an ladawan nga sugad hin tawo nga hinimo ha iba-iba nga metal. (Dan. 2:28, 31-33) Nagrirepresentar ito han sunod-sunod nga mga gahum ha kalibotan nga direkta nga kinontra ha katawohan han Dios, hadto ngan yana. Ito amo an Babilonya, Medo-Persia, Gresya, Roma, ngan an kataposan nga gahum ha kalibotan nga naeksister ha aton panahon. An pag-aram ha tagna ni Daniel nagpapakita nga inin kataposan nga gahum han kalibotan ginrirepresentaran han mga tiil ngan mga tudlo ha tiil han ladawan. Durante han Girra ha Kalibotan I, an Britanya ngan Estados Unidos nagtikang gumios nga magkaupod ha espesyal nga paagi. Oo, an ikalima nga bahin han ladawan nga iginhulagway ni Daniel amo an Anglo-Amerikano nga Gahum ha Kalibotan. An mga tiil amo an kataposan nga bahin han ladawan.  Nagpapasabot ito nga waray na iba nga gahum ha kalibotan nga masunod hito. An mga tiil ngan mga tudlo ha tiil nga hinimo ha puthaw ngan lapok nagsisimbolo han maluya nga kahimtang han Anglo-Amerikano nga Gahum ha Kalibotan.

14. Ano nga gahum ha kalibotan an nagmamando pag-abot han Armagedon?

¹⁴ Hito gihapon nga tagna, gin-unabi nga an Ginhadian han Dios, nga ginsisimbolohan han daku nga bato, gintibag tikang ha usa nga bukid. An bukid nagrirepresentar han pagkasoberano ni Jehova. Diri na mag-iiha pupusakon hito nga bato an mga tiil han ladawan. Ha Armagedon, an mga tiil ngan an bug-os nga ladawan bubungkagon. (Basaha an Daniel 2:44, 45.) Salit an Anglo-Amerikano nga Gahum ha Kalibotan amo pa gihapon an nagmamando pag-abot han Armagedon. Makalilipay gud an pakakita han bug-os nga katumanan hini nga tagna! * Kondi, ano an bubuhaton ni Jehova kan Satanas?

15. Ano an mahitatabo kan Satanas ngan ha iya mga demonyo katapos han Armagedon?

¹⁵ Siyahan, makikita ni Satanas tikang ha tinikangan tubtob ha kataposan an pagbungkag ha iya organisasyon dinhi ha tuna. Katapos, may mahitatabo kan Satanas. Iginsumat ito ni apostol Juan. (Basaha an Pahayag 20:1-3.) Hi Jesu-Kristo—an “anghel . . . nga may-ada han yawi han atabay nga waray sag-od”—maglalabog kan Satanas ngan han iya mga demonyo ngadto ha atabay nga waray sag-od, ngan diri hira papagawson didto hin 1,000 ka tuig. (Luk. 8:30, 31; 1 Juan 3:8) Hito nga paagi titikangan an pagtultog ha ulo han halas. *—Gen. 3:15.

16. Ano an mahitatabo kan Satanas kon ilabog hiya ha “atabay nga waray sag-od”?

¹⁶ Ano an “atabay nga waray sag-od” diin ilalabog hi Satanas ngan an iya mga demonyo? An Griego nga pulong nga a′bys·sos nga gin-gamit ni Juan nangangahulogan hin “duro o uraura kahilarom.” Ginhubad liwat ito nga “diri matugkad” ngan “waray tubtoban nga buho.” Salit usa ito nga lugar nga diri makakadto han bisan hin-o gawas la kan Jehova ngan han iya pinili nga anghel nga “may-ada han yawi han atabay nga waray sag-od.” Didto, hi Satanas sugad hin patay nga waray mahihimo basi “diri na niya paglimbongan an mga nasud.” Oo, iton “maaringasa nga leon” maghihilom!—1 Ped. 5:8.

17, 18. (a) Ano nga mga panhitabo nga waray pa mahitabo an aton ginhisgotan? (b) Katapos hito nga mga panhitabo, ano nga peryodo han panahon an aton mapapahimulsan?

¹⁷ Hirani na mahitabo an importante ngan magpakalilisang nga hitabo. Ginpapamulat naton kon paonan-o matutuman an pagsiring nga “Kamurayawan ngan kasigurohan!” Katapos aton makikita an kabungkagan han Babilonya nga Daku, an pag-atake ni Gog han Magog, ngan an girra han Armagedon. Hi Satanas ngan an iya mga demonyo ilalabog ha atabay nga waray sag-od. Katapos hini, waray na an ngatanan nga karaotan. Bug-os na nga mababag-o an aton kinabuhi durante han Usa ka Yukot ka Tuig nga Pagmando ni Kristo. Hito nga panahon, mapapahimulsan naton an “kahuraan han kamurayaw.”—Sal. 37:10, 11.

¹⁸ Dugang pa han lima nga panhitabo nga aton ginhisgotan, may iba pa nga “mga butang nga diri nakikita” nga karuyag naton ‘tan-awon.’ Ini nga mga panhitabo hihisgotan ha sunod nga artikulo.