¡Waranqa maranak sumankaña ukat jukʼampinaka!
¡Waranqa maranak sumankaña ukat jukʼampinaka!
“Diosajj taqe kunjjarus munañanïni[wa].” (1 COR. 15:28.)
¿QHANAÑCHTʼASMATI?
¿Aka profecianakan phoqhasiñap uñjañajj kun lurañatakis yanaptʼätamjja?
1. ¿Walja jaqenakajj kuna bendicionanaksa katoqapjjani?
¿CHEQAPAR uñjiri ukat khuyaptʼayasiri chʼamani mä reyejj kunanaksa waranqa maranak apnaqäwipan markachirinakapatak luraspa uk amuyasmati? “Walja jaqenak[jam]” uñtʼatäpki ukanakajj wali muspharkañanak pasañapwa suyasipki. Jupanakaw jachʼa tʼaqhesïwit qhespipjjani, uka jachʼa tʼaqhesïwinwa Supayan apnaqata aka jan wali pachajj tukjatäni (Apo. 7:9, 14).
2. ¿Jaqejj 6.000 maranak apnaqawayki uka tiempon kunas utjawayi?
2 Jaqejj 6.000 maranak apnaqawayki uka tiemponjja llakinaka ukat tʼaqhesiñanakakiw utjawayi. Walja maranak nayraw Bibliajj akham säna: ‘Jaqejj chʼamanïtapatwa masinakaparu jan walinak luri’ sasa (Ecl. 8:9). Cheqas ukwa jichhürunakan uñjtanjja: guerranaka, marka apnaqerinak contra sartirinaka, manqʼat jiwañanaka, usunaka, ukat oraqesa, umasa ukat samanasa wali qʼañuchatäjjewa, tiempos janirakiw walëjjeti. Jaqenakatï jan wali luräwinakap jan jaytapkani ukat Oraqsa jan waltʼayasipkakini ukhajja, sinti jan walinakaw utjani sasaw marka apnaqerinakat waljanejj sapjje.
3. ¿Jesucriston Waranqa Maranak Apnaqäwipanjja kunas phoqasini?
3 Jesucristompi ukat 144.000 ajllitanakampi waranqa maranak apnaqapkani ukhajja, Diosan Reinopajj jaqen tʼaqhesïwip qʼal chhaqtayani ukat Oraqsa sumaptayarakiniwa. Jesucriston Waranqa Maranak Apnaqäwipanwa Jehová Diosan aka arunakapajj phoqasini: “Nayajj mä machaq alajjpachampi mä machaq oraqempi uskü. Kunatejj utjkän ukajj armatäjjaniwa, janirakiw khitis mayampsa jupanakatjja amtaskjjaniti” sasa (Isa. 65:17). ¿Uka tiempon kuna muspharkañanakas pasani? Janis ukanak uñjkstanjja, Biblian utjki uka profecianakaw kunanakatï “jan uñjaski” ukanakat sum amuytʼayistu (2 Cor. 4:18).
“UTANAK UTACHASIPJJANI” UKAT “UVANAK YAPUCHASIPJJANI”
4. Utat parlkasajja, ¿kuna jan walinakansa waljanejj uñjasipjje?
4 Taqeniw mä utanïña ukat familiasampi ukan jan kun ajjsarasa jakasiñ muntanjja. Ukampis jichhürunakanjja, oraqpachanwa waljanejj jan utani jikjjatasipjje. Jachʼa markanakas wali phoqhantatapunïjjewa, ukat waljanejj wali pisin jakasipjje. Ukat yaqhepatakisti mä atunïñajj samkakïkaspas ukhamakiwa.
5, 6. 1) ¿Kunjamsa Isaías 65:21 ukat Miqueas 4:4 qellqatankir profecianakajj phoqhasini? 2) ¿Uka profecianakan phoqhasitap uñjañatakejj kunsa lurañasa?
5 Diosan Reinopanjja, taqeniw utanïpjjani. Isaías profetajj akham sänwa: “Jaqenakasti utanak utachasipjjani, ukan jakasipjjarakini, uvanak yapuchasipjjani, uka yaputjja manqʼasipjjarakini” sasa (Isa. 65:21). Jichhürunakanjja, waljaniw utanïpjje, yaqhepasti jachʼa utanïpjjewa jan ukajj haciendanïpjjewa. Ukampis qollqe toqet jan waltʼäwi utjatapatjja, inas utaj aptʼaschï jan ukajj lunthatach utar mantkani jan ukajj kunach paskani sasaw llakisipjje. Ukampis Diosan Reinopanjja, taqe uka llakinakajj janiw utj-jjaniti, kunattejj Miqueas profetajj akham sänwa: “Ukapachasti taqenis jan ajjsarasaw jakasipjjani, sapa maynirakiw samartʼasirakini uva, ukhamarak higo alin chʼiwipana” sasa (Miq. 4:4).
6 ¿Jehová Diosan Reinopan jakañ munstan ukajj kunsa lurañasa? Cheqas taqeniw mä utanïña muntanjja. Ukampis jichhürunakan mä suma uta jikjjatañatakejj inas maynejj wal manuntaschispa, ukhaman uñjasiñat sipansa, ¿janit kuntï Jehová Diosajj churapjjämaw siskistu ukar chuyma churañajj wakiskaspa? Jesusajj jupapachpat akham sänwa: “Qamaqenakajj putunakaniw, jamachʼinakas tapanirakiwa, ukampis jaqen Yoqapanjj janiw kawkhar pʼeqepa samartʼayañatakis utjkiti” sasa (Luc. 9:58). Jesusajj mä suma utwa lurasispäna jan ukajj alasispäna. Ukampis ¿kunatsa jan utanïkänjja? Jesusajj janiw kunanakatï Diosan Reinopa nayraqat thaqhañat jitheqtaykaspäna ukanakamp apayasiñ munkänti. ¿Jiwasajj Jesusat yateqassnati, ukhamat yänakat jan llakisiskañataki? (Mat. 6:33, 34.)
“QAMAQEMPI, OVEJAMPISTI MAYAKIW MANQʼAPJJANI”
7. ¿Jehová Diosan amtaparjamajj kunjamsa jaqenakajj animalanakampi apasipjjañapäna?
7 Taqe kun lurañ tukuyasajja, Jehová Diosajj jaqeruw lurarakïna. ¿Kuna amtampis Diosajj jaqenakar luräna? Jilïr Yoqaparojj akham sänwa: “Jichhajj jaqe lurarakiñäni. Uka jaqesti jiwasar uñtasitäniwa, ukatsti qotan utjir chawllanakarusa, jamachʼinakarusa, uywañ animalanakarusa, pampankir animalanakarusa, oraqenjam qatatnaqtir animalanakarusa apnaqarakiniwa” sasa (Gén. 1:26). Ukhamasti, Adanarusa Evarusa ukat wawanakaparusa animalanakar apnaqapjjañapatakiw Jehová Diosajj usküna.
8. ¿Kunjamäpjjes animalanakajja?
8 ¿Cheqapuniti jaqenakajj animalanakar apnaqapjjaspa ukat animalanakampis suman jakasipjjaspa? Jïsa, waljaniw anupampisa, phisipampisa jan ukajj yaqha uywampis wal munasipjje. Ukampis ¿pampankiri jan ukajj montenkiri animalanakat kamsasirakispasa? Uka animalanakat yatjjatiri ukat jupanak jakʼan jakiri cientificonakajja, ñuñuri kasta animalanakajj munasirïpjjewa sasaw sapjje. Kunapachatï uka animalanakar katuntaña jan ukajj usuchjañ munapki ukhajj ajjsarapjjatapsa jan ukajj kutkatasipjjatapsa yattanwa. Ukampis ¿munasiñ uñachtʼayapjjaspati? Uka animalanakajj qallunakanïpki ukhaw kunja munasirïpjjesa ukajj qhan amuyasi sasaw pachpa cientificonakajj sapjjaraki.
9. ¿Kunjamsa animalanakajj jakasjjapjjani?
9 Animalanakajj sumanwa jaqenakampi jakasjjapjjani siw Biblianjja, ukatjja janiw pächasiñasäkiti (Isaías 11:6-9 ukat 65:25 liytʼasiñapawa). ¿Kunatsa? Kunapachatï Noé chachajj familiapampi Uma Juicio pasatar arkat mistupkäna ukhajj kunsa Jehová Diosajj jupanakar säna uk amtañäni: “Aka oraqenkir taqe animalanakasti jumanakatakejj ajjsarañatsa khathatirakiniwa” sasa. Uka ajjsarañaw animalanakarojj jan walinakat jarkʼaqe (Gén. 9:2, 3). Ukampis animalanakar ajjsarañsa ukat animalanakan jaqer ajjsarañanakapsa Jehová Diosaw chhaqtayaspa, ukhamat kunjamtï qalltan lurkäna ukhamäjjañapataki (Ose. 2:18). ¡Khitinakatï aka Oraqen jakapkani ukanakatakejj wali sumapunïniwa!
“TAQE JACHANAKAPWA NAYRANAKAPATJJA PICHARANI”
10. ¿Kunatsa jaqejj jila partejj jachi?
10 “Aka oraqen maynir tʼaqhesiy[ir]” uñjasajja, Salomón reyejj llakitaw akham säna: “Janiw tʼaqhesiyatanakar khiti chuymachiris utjkiti” sasa (Ecl. 4:1). Jichhürunakanjja, ukat sipansa jukʼampi tʼaqhesiñanakaw utji. Janipuniw khitis janiw may kutis jachkti siskaspati. Cheqas awisajj kusisiñatwa maynejj jachaspa, ukampis jila partejj chuyma ustʼatätapatwa maynejj jachi.
11. ¿Bibliankir sarnaqäwinakatjja, kawkïris chuyma chʼalljjtaytamjja?
11 Bibliankir sarnaqäwinakatjja, khitinakas chuyma chʼalljjtayasisin jachapjjäna ukanakat amtañäni. Kunapachatï Sarajj 127 maranïkasin jiwjjäna ukhajja, Abrahamajj “warmipan jiwatapatjja wal jacharakïna” (Gén. 23:1, 2). Ukat kunapachatï Noemí warmejj viuda yojjchʼanakapar markapar kuttʼayañ munäna ukhajja, jupanakajj “wal jachapjjarakïna”, ukat Noemejj jupanakampi mä jukʼampi parltʼatapatjja “wasitat jukʼampi jachapjjäna” (Rut 1:9, 14). Ukat Ezequías reyejj usuntkäna ukat jiwañap yatisïna ukhajja, Diosaruw mayisïna ukat “walipuniw jachäna”, ukasti Jehová Diosan chuymaparuw purtʼpachäna (2 Rey. 20:1-5). Kunapachatï Pedrojj kims kuti Jesusar jan uñtʼir tuküna ukat gallor artʼir istʼäna ukhajja, anqar “mistusinjja Pedrojj wal jachäna”, ¿uk amtañajj janit chuym chʼalljjtaykistu? (Mat. 26:75.)
12. ¿Kuna jan walinakatsa jaqenakajj samarapjjani?
12 Taqeniw jiskʼa jan ukajj jachʼa llakinakan uñjastanjja, ukatwa ukanakat samarañsa ukat chuymachtʼatäñsa wal muntajja. Ukpï Jesucristojj Waranqa Maranak Apnaqäwipan luranejja. Bibliansti akham siwa: “Diosajj taqe jachanakapwa nayranakapatjja picharani, janirakiw jiwañas, jachañas utjkjjaniti, warariñasa ni usuyasiñasa” sasa (Apo. 21:4). Taqe uka llakinakan chhaqtañap yatiñajj wali kusiskañapuniwa. Ukat Jehová Diosajja, jaqenakan enemigoparu, mä arunjja, jiwañaru chhaqtayañwa arsuwayaraki. ¿Kunjamsa uk lurani?
“TAQE JIWATANAKASTI [...] JAKTAPJJANIWA”
13. ¿Adanan juchachasitapatjja kunjamsa jiwañajj jaqenakar uñjasiyi?
13 Adanampi Evampi juchachasipjjatapat aksaruw jiwañajj jaqenakar wali chʼamani mä enemigor uñtat katuntawayi, janirakiw khitis ukat jaltkaspati. Ukaw jaqenakarojj wali llakin uñjasiyaraki (Rom. 5:12, 14). Ukatwa millón millón jaqenakajj “jiwañar ajjsarasin esclavjam jakasipki taqe jakäwipana” (Heb. 2:15).
14. ¿Jiwañajj qʼala tʼunjatäjjani ukhajj kunas pasani?
14 “Qhepïri uñisiristi jiwañawa, ukas qʼala tʼunjatarakïniwa” sasaw Bibliajj qhanañchi (1 Cor. 15:26). Ukasti pä toqetwa phoqhasini. Nayraqatjja, “walja jaqenakjam” uñtʼatäpki ukanakaw jakkirpach paraisor mantapjjani, ukat janipuniw jiwañ uñtʼapkaniti. Maysa toqetjja, khitinakatï jiwatäpki ukanakaw jaktapjjani. ¿“Walja jaqenakjam” uñtʼatäpki ukanakajj kunja kusisitas jaktirinakar katoqapjjani uk amuytʼasmati? Uk sumpach amuytʼañatakejj jiwatat jaktanirinakat Biblian parlki ukanakat mä qhawqha amuytʼañäni (Marcos 5:38-42; Lucas 7:11-17 liytʼasiñapawa).
15. ¿Munat familiaranakamajj jaktanipkani ukhajj kunjamas jikjjatasïta?
15 “Jaqenakasti uk uñjasajj wal muspharapjjäna” ukat “Diosar yupaychañ qalltapjj[äna]” siski uka arunakat amuytʼañäni. Jiwasatï uka tiempon jakasänjja, ukanak uñjasajj ukhamarakiw wal muspharasänjja. Ukhamasti, wali munat familiaranakasar jaktaniri uñjasajj ukhamarakiw wal kusisiñäni ukat musphararakiñäni. Jesusajj akham sänwa: “Horasajj purininiwa taqe jiwatanakasti arupjj istʼapjjaniwa. Ukatsti uka jiwatanakajj jaktapjjaniwa” sasa (Juan 5:28, 29). Jiwatat jaktir janipuniw khitis uñjktanti, ukhamasti jiwatanakar jaktanir uñjañajja, kunanaktï ‘jan uñjktan’ ukanakat maynirïniwa.
“DIOSAJJ TAQE KUNJJARUS MUNAÑANÏNI[WA]”
16. 1) ¿Kunatsa “jan uñjktan” ukanakat kusisita taqe chuyma parlañasa? 2) ¿Pablojj kunjamsa Corintonkir cristianonakar chʼamañchtʼäna?
16 Khitinakatï aka jan wali tiempon Diosar taqe chuyma yupaychasipkakini ukanakajj mä suma bendición katoqapjjani. Jichhürunakan janis uka bendicionanak katoqkstanjja, ukanakat amtañaw kunanakatï cheqapun wakiskirïki ukanak lurañatakisa ukat akapachampi jan apayasiñatakis yanaptʼistani (Luc. 21:34; 1 Tim. 6:17-19). Ukat Familiana Diosar Yupaychañataki Aruman Bibliat yatjjatkasasa, jilat kullakanakampi parltʼaskasasa, Bibliat yatichkasasa jan ukajj yatiykasasa, kuna suma suytʼäwinïktantï ukanakat kusisitaw parlañasa. Ukhamatwa kuntï suyktan ukanakajj chuymasatsa pʼeqesatsa jan chhaqtkaniti. Apóstol Pablojj ukham parlasaw cristianonakar chʼamañchtʼäna, Jesucriston Waranqa Maranak Apnaqäwip tukuyaskir niyas uñj-jjapjjaspa ukhamwa amuytʼayäna. Kuntï 1 Corintios 15:24, 25, 28 qellqatan siski uka arunakampejj kamsañsa munäna uk amuytʼañäni (liytʼasiñapawa).
17, 18. 1) Qalltanjja, ¿kunjamsa “Diosajj taqe kunjjarus munañanïn[jja]”? 2) ¿Mayachtʼata ukat sumana wasitat jakasiñatakejj kunsa Jesusajj lurani?
17 “Diosajj taqe kunjjarus munañanïni[wa]” sasinjja Jesucriston Waranqa Maranak Apnaqäwip tukuyarojj kunjamänisa ukwa Pablojj sum qhanañchtʼäna. ¿Uka arunakapajj kamsañsa muni? Janïr juchachaskasajja, Adanampi Evampejj Diosan familiap taypinkapjjänwa, ukat wali sumwa jakasipjjarakïna. Taqe kunjjaru Munañani Jehová Diosajj sumwa taqe luratanakapar uñjäna, alajjpachankirinakarusa ukhamarak jaqenakarusa. Jupanakajj cheqakwa Jehová Diosamp parlapjjäna, yupaychapjjäna ukat bendicionapsa katoqapjjarakïna. Cheqpachansa “Diosajj taqe kunjjarus munañanïn[wa]”.
18 Ukampis kunapachatï jaqenakajj Supayampi apayasisin Jehová Dios contra saytʼapkäna ukhaw taqe ukanakjja aptʼawayapjje. Cristojj 1914 maran Diosan Reinopan Apnaqañ qalltawayki ukhat aksaruw kunanakatï wasitat mayachtʼata ukat sumana jakasiñatakejj wakiski ukanak luraski (Efe. 1:9, 10). Criston Waranqa Maranak Apnaqäwipanjja kunanaktï “jan uñjktan” ukanakaw phoqhasjjani. Ukatsti, Criston Apnaqäwipajj tukuyjjaniwa. ¿Ukjjarojj kunas pasani? Jesusajj alajjpachansa, akapachansa “taqe munañanïñ[sa]” katoqkchïnjja, janiw Jehová Diosan Apnaqäwip apaqañ munkiti. Jan ukasti, wali altʼat chuymampiw “Dios Awkipa[rojj] apnaqañapataki taqe kuna katuyjjani”, ukhamata “Dios Awkejj jachʼachatäñapataki” (Mat. 28:18; Fili. 2:9-11).
19, 20. 1) ¿Kunjamsa Jehová Dios toqet saytʼasipjjatap yupaychirinakapajj uñachtʼayapjjani? 2) ¿Kuna suma suytʼäwinïtansa?
19 Uka tiempotakejja, jaqenakajj janiw juchararäjjapjjaniti. Jupanakajj Jesusat yateqasisaw taqe chuyma ukat altʼat chuymampi Jehová Diosarojj Apnaqeriparjam uñjapjjani. Ukham chuymanïpjjatapjja, qhep qhepa yantʼar atipasaw uñachtʼayapjjani (Apo. 20:7-10). Ukatsti Diosar kutkatasir jaqenakasa angelanakasa wiñayatakiw tukjatäpjjani. ¡Ukajj wali kusiskañapunïniwa! Jehová Diosan familiapajj alajjpachansa aka Oraqensa kusisitaw Jupar yupaychapjjani, ukhaw “Diosajj taqe kunjjarus munañanïni” (Salmo 99:1-3 liytʼasiñapawa).
20 ¿Diosan Reinopat kuna profecianakatï niya phoqhasiñampïski ukanakat yatjjatawayktan ukajj kunjamsa yanaptʼätamjja? ¿Diosan munañap lurañatakit nayraqat chʼamachasïta? ¿Supayan sipitanakapar jan jaltʼañatakisa ukat kunanaktï akapachajj churañ munkistu ukanakampi jan apayasiñatakisa suma thurtʼatätati? ¿Jehová Dios toqet saytʼasiñatakisa ukat sutip jachʼañchañatakisa chʼamachasïtati? Ukhamächi ukhajja, luratanakamampiw wiñay ukham lurañ munatam uñachtʼayañama. Ukhamatakwa waranqa maranak sumankañana jakasïta ukat jukʼampi.
[Jiskt’anaka]
[11 janan fotonakapa]
Waranqa Maranak Reyjam Apnaqañ tukuyjjani ukhajja, Jesusajj wali altʼat chuymampiw Jehová Dios Awkiparojj apnaqañapataki taqe kun katuyjjani
