Afuɛ akpi nin i sin lɔ ekun fɔundi dilɛ
Afuɛ akpi nin i sin lɔ ekun fɔundi dilɛ
“[Maan] Nyanmiɛn sie like’n kwlakwlakwla.”—1 KOR. 15:28.
?AMUN KWLA YIYI NUN?
?Kɛ Biblu’n nun ndɛ mma nga bé wá kpɛ́n su’n, ye benin yɛ amún ɲɛ́n i ɔ?
1. ?Ye benin yɛ “sran kpanngban kpa” mun bé wá ɲɛ́n i ɔ?
MAAN e se kɛ awa kun le kwlalɛ kpa yɛ i su famiɛn’n yo sa i nuan su yɛ ɔ si aunnvuɛ. Ninnge kpakpa kwlaa nga lele m’ɔ́ fá dí afuɛ akpi’n, awa sɔ’n nin i su famiɛn’n be kwla yo man be nga be sie be’n, amun bu i akunndan kan be nian! Ye nga “sran kpanngban kpa” mun bé wá dí’n yɛ ɔ o lɛ ɔ. Sran sɔ mun yɛ bé fín “afɛ dan’n” nun fíte’n niɔn. Afɛ dan sɔ’n i agualiɛ’n yɛle mɛn tɛ nga i nunnunlɛ’n.—Ngl. 7:9, 14.
2. ?Afuɛ 6.000 nga be sinnin lɛ’n nun’n, sa benin mun yɛ be juli klɔ sran’m be su ɔ?
2 Afuɛ 6.000 nga be sinnin lɛ’n nun’n, sran’m be miannin be ɲin kpa naan bé síe be wun. I sɔ’n fali ɲrɛnnɛn nin afɛ yili sran’m be su. Laa kpa lele’n, Biblu’n seli kɛ: “Ɔ lɛ blɛ kun bɔ sran kun sie i wiengu kun kpɛkuun ɔ kle i nyrɛnnɛn-ɔn.” (Aku. 8:9) ?Sa benin yɛ be ju andɛ ɔ? Sran’m be kun alɛ, be jaso be siefuɛ’m be wun. Sanngɛ nɛ́n i ngba ɔ. Yalɛ’n nin tukpacɛ’n be o sran’m be su. Wawa nin munngun’n be blɛ’n kacikaci yɛ lika’n lo, annzɛ ɔ jɔ tratra su, kpɛkun sa yalɛ uflɛ wie’m be o lɛ ekun. Mɛn siefuɛ’m be waan sɛ sran’m be kaciman be aeliɛ’n, naan be yaciman asiɛ’n i sacilɛ’n, e wun sa su yoman ye mlɔnmlɔn.
3. ?Afuɛ akpi famiɛn dilɛ blɛ nun’n, sa benin mun yɛ bé jú ɔ?
3 Kɛ Zezi Klist m’ɔ ti Mɛsi mɔ Ɲanmiɛn sieli i famiɛn’n, ɔ nin sran 144.000 bé wá dí famiɛn’n, Ɲanmiɛn Sielɛ’n wá yó maan sa tɛtɛ kwlaa nga klɔ sran’m be fa yoli be wiengu’n, ɔ nin nga be fa yoli asiɛ’n bɔbɔ ba’n be osu kwlaa wíe. Klist i afuɛ akpi famiɛn dilɛ blɛ’n nun’n, Ɲanmiɛn Zoova i kasiɛ ng’ɔ boli i yɛ’n m’ɔ cici wla’n, ɔ́ kpɛ́n su. I waan: “Ń wá yí nyanmiɛn ng’ɔ la nglo lɔ plaii’n, nin asiɛ’n be uflɛ. Kɛ ɔ ko yo sɔ’n, be su bo-man laa sa’m be su be di-man jɔlɛ kun. Be su bu-man be akunndan kun.” (Eza. 65:17) ?Sa ɲɛnmɛn benin mun yɛ é wá wún be e ɲrun lɔ ɔ? Kannzɛ e “wun-man” sa sɔ mun andɛ’n, sanngɛ Biblu’n kwla uka e naan y’a wun be wlɛ.—2 Kor. 4:18.
‘BÉ KPLÁN SUA YƐ BÉ TÁ VINYI’
4. ?Andɛ’n sua kpa ɲanlɛ ndɛ’n ti sɛ?
4 ?Wan cɛ yɛ ɔ kloman kɛ ɔ́ ɲɛ́n i bɔbɔ tiaun sua naan ɔ nin i awlofuɛ’m be tran nun be di alaje ɔ? Sanngɛ, sua kpa ɲanlɛ sa’n ɔ leman ba mɛn nga e o nun yɛ’n nun. Blɔfuɛ klɔ wie’m be su’n, sran’m be ta be wun su. Wie’m be liɛ’n, be lemɛn i yowlɛ ti’n, be tran sua sɛkɛsɛkɛ’m be nun lika fiɛnfiɛn wie’m be nun. Be bɔbɔ be klunklo sua ɲanlɛ’n, ɔ ti be ɲrun laliɛ nun ndɛ.
5, 6. (a) ?Wafa sɛ yɛ Ezai 65:21 nin Mise 4:4 bé kpɛ́n su ɔ? (b) ?Ngue yɛ é yó naan y’a di i sɔ ye’n wie ɔ?
5 Kɛ Ɲanmiɛn wá síe mɛn’n, sran’m be kwlaa bé ɲán be bɔbɔ be sua. Ezai kannin sa sɔ’n i ndɛ seli kɛ: “Sɛ min sran’m be kplan sua’n, bé trán be nun, sɛ be ta vinyi’n, bé dí i su mma.” (Eza. 65:21) Sanngɛ nán sran kun bɔbɔ i klunklo sua ngunmin yɛ ɔ́ ɲɛ́n i ɔ. Afin kɛ é sé yɛ’n bɔbɔ’n, sran wie’m be le sua dandan kpakpa mun. Sanngɛ kɛ mɔ sua sɔ’m be kwla fi be sa’n ti’n srɛ kun be. Yɛle kɛ wie liɛ’n sika ndɛ kwla tɔ be su, annzɛ awiefuɛ mun annzɛ sa tɛtɛ yofuɛ’m be kwla yo be abɔlɛ. Kɛ Ɲanmiɛn wá síe asiɛ’n, i sɔ sa’m be wun srɛ su kunman sran’m be kun mlɔnmlɔn. Ɲanmiɛn nuan ijɔfuɛ Mise klɛli i kɛ: “Sran’m bé dí vinyi fie nin be olivie fie fɔuun, sran fi su wla-man be nyin nglo-nglo kun.”—Mis. 4:4.
6 ?Kɛ ɔ ko yo naan y’a di i sɔ ye’n wie’n, ngue yɛ ɔ fata kɛ e yo ɔ? I yo, ɔ ti weiin kɛ ɔ fata kɛ e ngba e ɲan sua kpa e la nun. Sanngɛ ɔ nin i fataman kɛ e se kɛ san fii kɛ é sé yɛ’n é ɲán e awlɛn su sua, naan i sɔ’n ti’n wie liɛ bɔbɔ’n é kó fá kalɛ kpli wie. Ngwlɛlɛ aeliɛ’n, yɛle kɛ maan wafa nga e di e mɛn’n, ɔ kle kɛ e ɲin o ninnge kpakpa nga Zoova waan ɔ́ yó be’n be sin. Maan e wla kpɛn Zezi bɔbɔ i wun ndɛ ng’ɔ kannin’n su. Ɔ seli kɛ: “Solongbi’m be lɛ kunman la nun, yɛ anunman’m bɔ be tu sin’n, be lɛ lawlɛ, sanngɛ m bɔ n kacili Sran’n n lɛ-man lika bɔ n la nun de wunmiɛn bɔ kaan-an.” (Lik 9:58) Sɛ ɔ ti kɛ Zezi waan ɔ́ kplán sua annzɛ ɔ́ ɲán sua kpa nga sran uflɛ fi su kwlá ɲɛnmɛn i le’n, nn ɔ kwla yoli sɔ. ?Sanngɛ ngue ti yɛ w’a yomɛn i sɔ ɔ? Yɛle kɛ w’a kunndɛman kɛ ɔ́ fɛ́ i wun wlá like wie m’ɔ kwla tɛnndɛn i ɲrun mɔ maan ɔ su kwlá faman Ɲanmiɛn i klun sa yolɛ’n siemɛn i like kwlaa ɲrun’n i nun. Maan e fɛ i ajalɛ’n su. Nán ninngeninnge’m be kunndɛlɛ’n ɔ yo e cinnjin naan i ti’n e tran ngokɔɛ’n nun.—Mat. 6:33, 34.
“BLO ALUA NIN BUA’N BÉ DÍDÍ LIKAWLƐ”
7. ?Wafa sɛ yɛ Zoova sunnzunnin kɛ sran’m be nin nnɛn’m be tran ɔn?
7 Asiɛ’n su wa ninnge nga Ɲanmiɛn yili be’n, be nun kasiɛnfuɛ’n yɛle klɔ sran. Zoova kannin like nga ti yɛ ɔ yili klɔ sran’n i ndɛ kleli i Wa klikli mɔ i sa w’a tɔ junman’n nun kpa’n. Ɔ seli i kɛ: “E yi sran kɛ e bɔbɔ sa cɛ, maan ɔ fa e, maan ɔ sie jenvie’n nun jue mun nin anunman nga be tu sin’n, nin klɔ nnɛn mun, nin asiɛ’n su nnɛn’m be kwlaa, ɔ nin nnɛn nga be cuɛn be wun ase’n mun.” (Bob. 1:26) Ɔ maan Ɲanmiɛn fali nnɛn mun wlali Adam nin Ɛvu be sa nun kɛ be sie be naan i agualiɛ su’n, klɔ sran’m be kwlaa be yo i sɔ wie.
8. ?Nzuɛn kpa benin yɛ nnɛn’m be yi i nglo ɔ?
8 ?Sran’m be sie nnɛn’m be kwlaa ɔ yo ye? ?Yɛ be nin be kwla tran fɔun sakpa? Sran kaka be nin klɔ nnɛn kɛ alua annzɛ jeliwa sa’n be afiɛn mantan kpa. ?Yɛ blo nnɛn’m be li, be nin be kwla tran fɔun wie? Blo nnɛn nga be man be mma nɔnman’m be ɲɔnflɛn’n, siansifuɛ wie’m be fali be wun mantannin be kpa, yɛ be suannin be su like. Be sieli i nzɔliɛ kɛ kɛ sa wie ju’n wafa nga sran’m be wun fa yo be’n, nnɛn sɔ’m be wun kwla yo be sɔ wie. E si kɛ kɛ nnɛn’m be wun kɛ sa wie su wa ɲan be’n, srɛ kun be annzɛ be yo wlɛ. ?Sanngɛ be kwla yi klolɛ’n i nglo wie? Siansifuɛ’m be waan kɛ nnɛn wafa nga e kannin be ndɛ lɛ’n bé tá be mma mun’n, be yi klolɛ’n i nglo kpa be mma’m be lika.
9. ?E ɲrun lɔ’n, wafa sɛ yɛ nnɛn’m be aeliɛ’n káci ɔ?
9 I ti’n, kɛ Biblu’n se kɛ fɔundi trán sran nin nnɛn’m be afiɛn’n, ɔ fataman kɛ ɔ bo e nuan. (An kanngan Ezai 11:6-9 nin 65:25 nun.) ?Ngue ti ɔ? Maan amun wla kpɛn su kɛ kɛ anannganman su nzue dan’n kpɛli’n mɔ Nowe nin i awlobofuɛ’m be fin mmeli’n nun fiteli’n, Zoova seli be kɛ: “Maan asiɛ’n su nnɛn’m be kwlakwla nin anunman mun, ɔ nin jue’m be kwlaa be sro amun.” I sɔ ti’n kɛ nnɛn’m be wun sran mun’n be wanndi naan sran’m b’a kunman be. (Bob. 9:2, 3) Sanngɛ Zoova kwla yo naan sran’m be wun srɛ ng’ɔ kun nnɛn mun’n w’a kan ase naan be nin sran mun b’a kwla tran klanman kɛ mɛn’n i bo bolɛ nun’n, ɔ fa sunnzunnin’n sa. (Oze 2:20) Kɛ ɔ ko yo sɔ’n aklunjuɛ nga sran’m bé wá dí’n, nanwlɛ ɔ́ yó dan!
“Ɔ́ NÚNNÚN BE NYINMUƐN’N KWLAA”
10. ?Ngue ti yɛ klɔ sran’m be sun ɔn?
10 Kɛ Salomɔn wunnin “nyrɛnnɛn nga sran’m be kle be wiengu mun nyanmiɛn’n bo wa’n,” i awlɛn’n kpɛli i klun yɛ ɔ seli kɛ: “Be nga be wun nyrɛnnɛn’n, kannzɛ bé kpán sɛ, be nyan-man sran b’ɔ́ fɔ́nvɔ be-ɔ.” (Aku. 4:1) Kɛ lika’n ti sɔ wie andɛ ɔ. I kpa’n e kwla se kɛ ɔ tra ngalɛ’n bɔbɔ. ?E nun benin yɛ sa wie ti’n ɔ nin a sunman le ɔ? I yo, ɔ ju wie’n aklunjuɛ’n ti’n e kwla gua mmuɛn ase. Sanngɛ kpɛ sunman’n, awlabɔɛ’n ti yɛ e sun ɔn.
11. ?Biblu’n nun ndɛ benin yɛ ɔ wluwlu amun wun kpa ɔ?
11 Maan e kan Biblu’n nun sa kpanngban wie mɔ be yo ɲrɛnnɛn’n be ndɛ kan e nian. Kɛ Abraamu i yi Sara ɲannin afuɛ 127 m’ɔ wuli’n, “i wie ndɛ’n ɔ wluli Abraam wun dan” ti’n “ɔ sunnin i.” (Bob. 23:1, 2) I nun mɔ Naomi kále i sewi angbeti bla nɲɔn mun’n, “be konviabo boli be kpɔlɛ naan b’a sun kpa.” I sin’n kɛ Naomi nin be ijɔli ekun’n ‘be sunnin sunlɛ kpa ekun.’ (Rit 1:9, 14) Kɛ tukpacɛ’n ti’n Famiɛn Ezekiasi mantannin wie’n i koko’n, ɔ srɛli Zoova yɛ ɔ “sunnin sunlɛ kpa.” I sunlɛ sɔ’n ti’n ɔ yoli Zoova i annvɔ. (2 Fam. 20:1-5) ?Blɛ mɔ akoto Piɛli seli kɛ ɔ siman Zezi’n sa ng’ɔ juli’n, wan yɛ ɔ wluwlumɛn i wun ɔn? Kɛ Piɛli tili akɔ ɲinman’n i bolɛ’n, “ɔ fiteli gua su lɔ naan w’a sun dan kpa.”—Mat. 26:75.
12. ?Ngue yɛ Ɲanmiɛn Sielɛ’n wá yó mán sran mun mɔ i ti’n be wun jɔ́ be fɔun ɔn?
12 Ɲrɛnnɛn sa nga be ju’n, maan be yo kaan o, annzɛ dan o, be ti’n klɔ sran’m be mian fɔnvɔlɛ wun, yɛ be kunndɛ kɛ be uka be naan sa sɔ’m be jaso be su. I sɔ kusu yɛ Ɲanmiɛn Sielɛ’n wá yó mán sran mun afuɛ akpi famiɛn dilɛ blɛ’n nun ɔn. “[Nyanmiɛn] núnnún be nyinmuɛn’n kwlaa, wie’n su tran-man lɛ kun. Be su yo-man sɛ kun, be su sun-man kun, be su wun-man nyrɛnnɛn kun.” (Ngl. 21:4) Kɛ e bu i akunndan kɛ sran’m be su siman afɛ kun yɛ be su wunman ɲrɛnnɛn kun’n, ɔ yo e fɛ dan. Kɛ Ɲanmiɛn se kɛ wie’n su tranman lɛ kun’n, i sɔ’n yo e fɛ kpa ekun. ?Sanngɛ blɛ benin nun yɛ sa sɔ’m bé jú ɔ?
“BE KWLAA NGA BE O NDIA NUN’N [...] BÉ FÍN NDIA’N NUN FÍTE”
13. ?Kɛ ɔ fin cɛn mɔ Adam yoli sa tɛ’n, ngue yɛ wie’n w’a fa yo sran mun?
13 Kɛ ɔ fin cɛn mɔ Adam yoli sa tɛ’n, wie’n kwla sran’m be kwlakwla. Ɔ ti e kpɔfuɛ kun mɔ klɔ sran mɔ be yo sa tɛ’n be nun wie fi kwlá jrɛnmɛn i ɲrun ɔn. I ti’n sran’m b’a wun ɲrɛnnɛn kpa. (Rɔm. 5:12, 14) I kpa’n “wie’n i srolɛ” ti’n sran kpanngban kpa “b’a kaci kɛ kanga” sa.—Ebr. 2:15.
14. ?Kɛ wie’n su tranman lɛ kun’n, e wun yó e sɛ?
14 Biblu’n kan blɛ kun mɔ sran’m be kpɔfuɛ’m be kwlaa be osu núnnún’n i ndɛ. “Be nun kasiɛnfuɛ’n yɛlɛ wie’n.” (1 Kor. 15:26) I sɔ’n yó sran akpasua nɲɔn ye. Yɛle kɛ “sran kpanngban kpa” mɔ be o lɛ andɛ’n, bé kwlá wlú mɛn uflɛ’n nun yɛ bé ɲán anannganman nguan nun tranlɛ’n i wun atin. Sran akpi ngbinngbin nga wie’n kunnin be kusu’n, bé kwlá cɛ́n. ?Kɛ “sran kpanngban kpa” mun bé wá trá be nga be cɛnnin be’n be je’n, aklunjuɛ nga bé wá dí’n, amun kwla bu i sin kan be nian? Sran wie mɔ be cɛnnin be laa’n, Biblu’n kan be ndɛ. Sɛ e kanngan be su ndɛ’m be nun’n, é kwlá wún wafa nga kɛ sran’m bé wá cɛ́n’n e wun fá yó e’n.—An kanngan Mark 5:38-42 nin Lik 7:11-17 nun.
15. ?Sɛ be cɛn amun awlɛn su sran kun amun ɲrun lɛ’n, wafa sɛ yɛ amun wun yó amun ɔn?
15 Biblu’n se kɛ sran’m “be nuan boli be wun dan kpa” yɛ be “manmannin Nyanmiɛn.” An bu ndɛ sɔ’n i akunndan kan be nian. Sɛ ɔ ti kɛ blɛ sɔ nun amun o lɛ’n, nn atrɛkpa’n amun wun yoli amun sɔ wie. Nanwlɛ, sɛ e wun kɛ b’a cɛn e awlɛn su sran kun’n, é dí aklunjuɛ dan yɛ e wun blíblí e. Zezi seli kɛ: “Cɛn wie lele be kwlaa nga be o ndia nun’n, bé tí i nɛn, yɛ bé fín ndia’n nun fíte.” (Zan 5:28, 29) E nun wie fi nin a wunmɛn i sɔ sa le. Sa nga e nin a “wun-man” be’n mɔ bé wá jú’n, ɔ́ yó be nun dan kpafuɛ’m be nun kun.
ƝANMIƐN WÁ SÍE “LIKE’N KWLAKWLAKWLA”
16. (a) ?Ngue ti yɛ ɔ fata kɛ e tu e klun e kan suyralɛ nga e nin a ɲanman be’n be ndɛ ɔ? (b) ?Ngue ndɛ yɛ Pɔlu kannin fa wlali Klistfuɛ nga be o Korɛnti lɔ’n be fanngan ɔn?
16 Nanwlɛ, be kwlaa nga mɛn nga w’a yo kekle yɛ’n nun’n, be nanti ndɛnman su Zoova ɲrun’n, e ɲrun lɔ’n bé ɲán manndran. Kannzɛ bɔbɔ e nin a ɲanman suyralɛ sɔ mun kɛ é sé yɛ’n, sanngɛ ɔ ti kpa kɛ e bu be akunndan. I sɔ’n úka e naan y’a fa e ɲin y’a sie ninnge nga be ti cinnjin’n be su. I liɛ’n é kwlá sú Zoova titi, kpɛkun e su faman e ɲin e siemɛn i mɛn’n nun ninnge’m be su. (Lik 21:34; 1 Tim. 6:17-19) Kɛ e nin e awlobofuɛ mun é súan Ɲanmiɛn Ndɛ’n nun like’n, yɛ kɛ é sú Ɲanmiɛn awlo lɔ’n, ɔ nin blɛ mɔ e nin be nga e kle be Biblu’n nun like’n ɔ nin be nga Ɲanmiɛn Ndɛ’n lo be’n é kókó yalɛ’n, maan e tu e klun e kan ninnge kpakpa nga e ɲin o be sin’n be ndɛ. I sɔ liɛ’n yó maan ninnge sɔ’m bé ká e awlɛn’n nin e akunndan’n nun titi. Kɛ akoto Pɔlu wlɛ́ i niaan Klistfuɛ’m be fanngan’n i sɔ yɛ ɔ yoli ɔ. I ndɛ’n yoli maan be buli suyralɛ nga “kɛ mɛn’n ɔ́ wá wíe’n [“i agualiɛ su’n,” NW] bé wá ɲán be’n be akunndan.” Pɔlu i ndɛ ng’ɔ o 1 Korɛntfuɛ Mun 15:24, 25, 28 nun’n, wafa nga é wá wún i nuan su sa’n, maan e bu i akunndan kan e nian.—An kanngan nun.
17, 18. (a) ?Kɛ Zoova yili klɔ sran mun’n, wafa sɛ yɛ blɛ sɔ’n nun’n, ɔ “sie like’n kwlakwlakwla” ɔ? (b) ?Ngue yɛ Zezi yó naan klɔ sran nin anzi mun yɛ Ɲanmiɛn b’a tran klanman kɛ i klikli nun’n sa ɔ?
17 Kɛ afuɛ akpi blɛ’n ko sin’n wafa nga lika’n wá yó’n, kɛ bé kɛ́n i ndɛ mɔ be se kɛ ‘Nyanmiɛn síe like’n kwlakwlakwla’n,’ ɔ leman ndɛ fi mɔ i fɛ’n kwla tra ngalɛ’n niɔn. ?Ndɛ sɔ’n i bo’n yɛle benin? Blɛ mɔ Adam nin Ɛvu be te yo Zoova i awlobo mɔ i nun tranlɛ’n ti fɔun’n i nunfuɛ’n, wafa nga lika’n fa ti’n, maan e bu i akunndan e nian. Zoova m’ɔ ti like kwlakwla siefuɛ’n, w’a sinman sran uflɛ sin naan w’a sie anzi nin klɔ sran mun. Blɛ sɔ’n nun’n be ngba be nin Ɲanmiɛn kwla koko yalɛ trele, be su i, kpɛkun ɔ yra be su. I yɛ ɔ sie “like’n kwlakwlakwla” ɔ.
18 Tranlɛ mɔ be nin Ɲanmiɛn trannin klanman sɔ’n, ɔ wa sacili. Yɛle kɛ Satan suli sran’m be bo maan be yoli ɲin kekle Zoova su. Sanngɛ kɛ ɔ fɛ i afuɛ 1914 nun’n, Mɛsi’n i Sielɛ’n fa ajalɛ naan blɛblɛblɛ klɔ sran’m be nin Ɲanmiɛn ɔ nin be kwlaa nga be o ɲanmiɛn su lɔ’n be tran klanman kɛ i klikli nun’n sa. (Efɛ. 1:9, 10) Klist i afuɛ akpi famiɛn dilɛ blɛ’n nun’n, é wá wún ninnge ɲɛnmɛn nga kɛ é sé yɛ’n e nin a “wun-man be’n.” I sin’n, “i agualiɛ’n” jú, yɛle kɛ Klist i afuɛ akpi famiɛn dilɛ sɔ’n i awieliɛ’n jú. ?Kɛ ɔ ko yo sɔ’n ngue sa yɛ ɔ́ bɛ́ i sin ɔn? Kannzɛ ‘Nyanmiɛn mannin Zezi i atin kɛ ɔ sie nyanmiɛn su lɔ nin asiɛ’n su ninnge’n kwlaa’n,’ sanngɛ Zezi kunndɛman kɛ ɔ nin Zoova bé sɛ́. Aenvuɛ su, “ɔ́ fá bia’n mɛ́n i Si Nyanmiɛn.” Junman ɔ nin kwlalɛ nga Ɲanmiɛn mɛnnin i’n, ɔ́ fá yó “naan e Si Nyanmiɛn’n nyan nyrun.”—Mat. 28:18; Fil. 2:9-11.
19, 20. (a) ?Be nga Ɲanmiɛn síe be’n, sɛ bé kplín su kɛ Zoova yɛ ɔ le atin sie be o, annzɛ be su kplinman su o, wafa sɛ yɛ bé yí i nglo ɔ? (b) ?Ninnge kpakpa benin mun yɛ é wá ɲán be e ɲrun lɔ ɔ?
19 Blɛ sɔ’n nun’n nn fɔ w’a tu be nga be tran asiɛ’n su wa’n mɔ Ɲanmiɛn sie be’n, be kwlaa be nun. Bé fá Zezi i ajalɛ’n su. Kpɛkun kɛ mɔ be ti aenvuɛfuɛ’n ti’n, bé kplín su kɛ Zoova yɛ ɔ le atin sie be ɔ. Sran’m be sa nianlɛ kasiɛn su’n nun’n, sɛ be yi i nglo kɛ be klo kɛ Zoova sie be’n, bé fíte nun. (Ngl. 20:7-10) I sin’n, be kwlaa nga be ti ɲin keklefuɛ’n, maan ɔ yo klɔ sran mun o, annzɛ anzi mun o, bé núnnún be ngba mlɔnmlɔnmlɔn. Blɛ sɔ’n i nun tranlɛ wá yó fɛ dan! I be nga be o nglo lɔ’n nin o, i be nga be o asiɛ’n su wa’n nin o, aklunjuɛ su be kwlaa bé ló be wun mán Zoova yɛ ɔ́ ‘síe like’n kwlakwlakwla.’—An kanngan Jue Mun 99:1-3 nun.
20 ?Ɔ fataman kɛ sa kpakpa nga Ɲanmiɛn Sielɛ’n maan bé wá jú’n, be wla amun fanngan naan amun fa amun ɲin sie Ɲanmiɛn klun sa’n i yolɛ’n su yɛ amun mian amun ɲin be yo? Satan kunndɛ kɛ e fa e wla e gua ninnge wie mɔ be timan nanwlɛ’n be su. ?Amún kwlá kpálo i sɔ ninnge mun naan amun ɲin w’a tran Zoova i sulɛ’n su titi? ?Fualɛ nga amun fuali kɛ amún jrán Zoova sin afin i yɛ ɔ le atin sie like kwlaa’n, amún jrán su kpa trá laa’n? Maan amun aeliɛ’n yi i nglo kɛ amun klo kɛ amún yó i sɔ tititi. I liɛ’n, amún kwlá dí fɔundi nin alaje. Ɔ su yoman afuɛ akpi’n nun ngunmin, sanngɛ ɔ́ yó sɔ anannganman!
[Kosan mun]
[Foto mun, bue 16]
Kɛ Zezi ko guagua famiɛn dilɛ junman nga Ɲanmiɛn mɛnnin i’n i bo’n, aenvuɛ su, ɔ́ fá Sielɛ’n mɛ́n i Si.
