Pis Blong Wan Taosen Yia Mo Blong Olwe
Pis Blong Wan Taosen Yia Mo Blong Olwe
“God bambae i holem paoa bakegen, blong i rul long olgeta samting.”—1 KOR. 15:28.
?BAMBAE YU YU ANSA OLSEM WANEM?
?Wanem samting bambae i hapen taem ol vas ya oli kamtru?
1. ?Wanem gudfala samting we “bigfala hip blong ol man” bambae oli kasem?
YU TRAEM tingbaot ol gudfala samting we bambae oli kamaot aninit long rul blong wan gavman we i kaen, mo i mekem i stret long ol man blong wan taosen yia. Hemia nao samting we “bigfala hip blong ol man” bambae oli kasem. Olgeta nao bambae oli pastru long “bigfala trabol,” we bambae i finisim olgeta rabis fasin long wol ya.—Rev. 7:9, 14.
2. ?Long ol 6,000 yia we oli pas, ol man oli harem olsem wanem?
2 Long ol 6,000 yia we oli pas, ol man oli traem blong rul long ol man bakegen. Be samting ya i mekem plante man oli harem nogud. Longtaem finis, Baebol i talem se: “Sam man oli gat paoa, mo ol narafala man oli stap aninit long olgeta, oli stap harem nogud.” (Pri. 8:9) ?Wanem i stap hapen tede? I gat ol faet, ol man oli agensem gavman, ol man oli pua, oli sik, man i spolem graon, wota mo win, ol trabol long saed blong weta, mo sam narafala moa. Ol man blong gavman oli givim woning se, sipos ol man oli gohed blong spolem wol, bambae plante nogud samting i kamaot.
3. ?Wanem bambae i hapen long Wan Taosen Yia Rul Blong Kraes?
3 Aninit long rul blong Jisas, mo ol 144,000 man we oli rul wetem hem, Kingdom blong God bambae i finisim olgeta nogud samting we i spolem ol man mo i spolem wol ya. Long Wan Taosen Yia Rul Blong Kraes, promes ya blong Jehova bambae i kamtru, se: “Bambae mi mi mekem niufala heven mo niufala wol bakegen. Ol samting ya we i hapen bifo, bambae ol man oli no moa save tingbaot stori blong olgeta, bambae i lus olgeta.” (Aes. 65:17) ?Wanem ol nambawan samting we bambae oli kamtru i no longtaem? Profet tok blong Baebol i save halpem yumi blong kasem save long ol nambawan samting ya, nating se ‘yumi no luk’ olgeta.—2 Kor. 4:18.
BAMBAE OLI WOKEM HAOS MO OLI PLANEM GAREN
4. ?Plante man tede oli stap long wanem haos?
4 Evri man oli wantem gat wan haos we oli save harem gud long hem mo oli stap sef wetem famle blong olgeta. Be laef long wol ya i strong tumas, nao i had blong man i faenem wan ples blong stap long hem. Plante man oli stap long ol taon we i fasfas long ol man. Maet oli stap long ol haos we oli fasfas, oli olfala, oli doti, mo oli nogud. Oli drim blong gat wan haos, be oli no save gat.
5, 6. (1) ?Ol tok blong Aesea 65:21 mo Maeka 4:4 bambae oli kamtru olsem wanem? (2) ?Yumi mas mekem wanem blong kasem blesing ya?
5 Taem Kingdom i rul long wol ya, olgeta man bambae oli gat prapa haos blong olgeta. Profet Aesea i talem se: “Man we i wokem haos blong hem, hem bambae i save stap gud long hem. . . . Man we i planem plantesen blong grep, hem bambae i dring waen blong ol grep ya.” (Aes. 65:21) Bambae oli gat prapa haos blong olgeta, be i no hemia nomo. Tede, sam man oli stap long prapa haos blong olgeta, mo samfala oli gat bigfala haos. Be oli wari se oli no moa save pem lon blong haos blong olgeta. Mo oli wari se ol man bambae oli kam stil long haos blong olgeta no oli kam kilim olgeta. Taem Kingdom i rul, bambae ol man oli no moa wari long ol samting ya. Profet Maeka i talem se: “Bambae oli save stap gud long ol plantesen blong grep blong olgeta, mo oli save sidaon aninit long ol figtri blong olgeta. Bambae i no moa gat man blong mekem olgeta oli fraet.”—Maeka 4:4.
6 ?Yumi mas mekem wanem blong yumi laef aninit long rul blong Kingdom? I tru se yumi evriwan i nidim wan ples blong stap long hem. Be yumi no mas traem blong gat wan gudfala haos naoia, nao yumi gat bigfala lon blong pem. Yumi waes sipos yumi laef long wan fasin we i soemaot se yumi putum tingting blong yumi i stap strong long promes blong Jehova. Jisas i tokbaot hem wan se: “Ol wael dog oli gat ol hol blong slip blong olgeta, mo ol pijin oli gat ol bed blong olgeta. Be mi, mi Pikinini blong Man, mi no gat ples blong mi, blong go slip long hem.” (Luk 9:58) Jisas i save wokem no i save pem wan haos we i gud moa i bitim ol narafala haos. ?Be from wanem hem i no mekem? From we Jisas i no wantem letem eni samting i blokem hem blong putum Kingdom fastaem. Yumi save folem fasin blong hem blong no letem ol samting blong laef i blokem yumi, mo i mekem yumi wari. ?Yumi save mekem samting ya olsem wanem?—Mat. 6:33, 34.
BAMBAE OL MAN OLI GAT PIS WETEM OL ANAMOL
7. ?Jehova i talem wanem long saed blong ol man mo ol anamol?
7 Taem Jehova i stat blong mekem ol samting long wol ya, las samting we hem i mekem, hemia man. Hem i talem long Nambawan Man blong wok blong hem, from wanem hem i mekem ol man. Hem i se: “I gud yumi mekem man, mo i gud yumi mekem we hem i tekem fasin blong yumi, i olsem yumi. Hem bambae i bos long ol fis, mo long ol pijin, mo long ol anamol blong vilej mo long ol anamol blong bus, i stat long olgeta we oli bigbigfala, i go kasem olgeta we oli smosmol. Olgeta evriwan bambae oli stap aninit long han blong hem.” (Jen. 1:26) Jehova i talem long Adam mo Iv blong tufala i lukaot gud long ol anamol, mo tufala i bos long olgeta. Jehova i wantem se olgeta man oli bos long ol anamol.
8. ?Ol anamol tede oli gat wanem fasin?
8 ?Olsem wanem? ?Ol man oli save bos long ol anamol mo oli save gat pis wetem olgeta? Plante man oli gat dog mo puskat mo oli laekem olgeta. ?Be olsem wanem long ol wael anamol? Yumi save se taem anamol i stap long denja, hem i fraet mo i kros. Be ol saentis we oli stadi long laef blong ol wael anamol, oli faenemaot se ol anamol oli save glad, oli save sore, mo oli save laekem narafala anamol. Oli talem se ol anamol oli kaen tumas long ol pikinini blong olgeta.
9. ?Taem Kingdom i rul, ol anamol bambae oli olsem wanem?
9 Taswe yumi no mas sapraes we Baebol i talem se bambae ol man oli gat pis wetem ol anamol. (Ridim Aesea 11:6-9; 65:25.) Taem Noa mo famle blong hem oli kamaot long bigfala sip, afta we Bigfala Wota i ron, Jehova i talem long olgeta se: “Olgeta anamol blong wol ya, wetem olgeta pijin mo olgeta fis bambae oli fraet long yufala.” Tede plante anamol oli ronwe long ol man from we oli fraet long olgeta. (Jen. 9:2, 3) Be Jehova i save tekemaot sam long ol fraet ya, blong mekem se oli gat pis wetem ol man, olsem we hem i bin wantem fastaem. (Hos. 2:18) !Hemia wan taem we olgeta man we bambae oli laef long wol ya, oli save harem gud long hem!
“HEM BAMBAE I RAVEMAOT WOTA BLONG AE BLONG OLGETA”
10. ?From wanem ol man oli krae?
10 Solomon i luk plante nogud samting we ol man oli mekem long wol ya. Mo hem i luk plante man oli harem nogud from we i no gat man blong givhan long olgeta. Taswe hem i talem se: “Ol man we oli gat paoa oli stap mekem i strong tumas long ol narafala man. Oli stap spolem olgeta, mo oli stap mekem olgeta oli harem nogud, we oli stap krae from, be i no gat man i save givhan long olgeta.” (Pri. 4:1) Tede, ol samting i sem mak, mo i stap kam mowas. ?Hu long yumi i neva krae? Samtaem yumi krae from we yumi glad. Be plante taem yumi krae from we yumi harem nogud tumas.
11. ?Weswan stori long Baebol i tajem hat blong yu?
11 Yu traem tingbaot stori blong sam man long Baebol we oli krae. Ol stori ya oli tajem hat blong yumi. Taem Sera i gat 127 yia blong hem, hem i ded. Ale “Ebraham i stap krae bigwan long hem.” (Jen. 23:1, 2) Taem Nomi i talem tata long tufala woman blong tufala boe blong hem, “tufala i krae bigwan,” mo biaen “tufala i stat krae bigwan bakegen.” (Rut 1:9, 14) Taem King Hesekia i sik bigwan mo i luk olsem se bambae i ded, hem i prea long God mo “hem i stap krae we i krae.” Jehova i luk samting ya, mo i mekem hem i gud bakegen. (2 King 20:1-5) Mo Pita i talem se hem i no save Jisas, be taem hem i harem faol i singaot, hem i “go afsaed, mo hem i krae we i krae.”—Mat. 26:75.
12. ?Wan Taosen Yia Rul Blong Kraes bambae i mekem i gud long ol man olsem wanem?
12 Plante nogud samting i hapen long ol man, taswe oli nidim we narafala i leftemap tingting blong olgeta mo i mekem olgeta i harem gud. Long Wan Taosen Yia Rul Blong Kraes, God “bambae i ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem.” (Rev. 21:4) I nambawan tumas blong tingbaot se bambae man i no moa harem nogud long bodi blong hem. Mo yumi harem gud long promes blong God se bambae i no moa gat ded. ?Samting ya bambae i hapen olsem wanem?
“OL DEDMAN” BAMBAE OLI LAEF BAKEGEN
13. ?Stat taem Adam i mekem sin, ded i spolem man olsem wanem?
13 Stat taem Adam i mekem sin, olgeta man oli kam slef blong masta ya ded. Ded i wan enemi we i no gat man i save winim. Man i no save ronwe long hem, mo hem i mekem plante man oli harem nogud. (Rom 5:12, 14, NW) Plante milian man oli fraet se bambae oli ded, ale fasin ya i bos long “laef blong olgeta, olsem we oli slef nomo.”—Hib. 2:15.
14. ?Wanem bambae i hapen taem God i winim ded?
14 Baebol i tokbaot taem ya we God bambae i ‘winim ded.’ (1 Kor. 15:26) Promes ya bambae i mekem i gud long tu grup blong man. “Bigfala hip blong ol man” blong Jehova bambae oli pastru long bigfala trabol, blong laef long niufala wol. Biaen, oli save gat janis ya blong laef olwe. Mo plante milian man we oli ded, bambae oli laef bakegen. Evriwan we oli laef long taem ya, oli save kasem bigfala glad, taem bigfala hip blong ol man i welkamem olgeta we oli laef bakegen. Sipos yumi ridimgud ol stori blong Baebol long saed blong olgeta we oli laef bakegen, bambae yumi kasem save se laef bakegen i olsem wanem.—Ridim Mak 5:38-42; Luk 7:11-17.
15. ?Bambae yu yu harem olsem wanem taem wan we yu lavem hem, i laef bakegen?
15 Yu traem tingbaot ol tok ya se “taem olgeta oli luk samting ya, oli sapraes tumas,” mo “oli stap leftemap nem blong God.” Sipos yu stap long taem ya, bambae yu tu yu harem sem mak. Bambae yumi glad tumas blong luk olgeta we yumi lavem olgeta, oli laef bakegen. Jisas i talem se: “I gat taem i stap kam we ol dedman bambae oli harem voes blong mi, nao bambae oli aot long beregraon blong olgeta.” (Jon 5:28, 29) Hemia wan long ol bigfala samting we ‘yumi no luk,’ be bambae i hapen.
GOD BAMBAE “I RUL LONG OLGETA SAMTING”
16. (1) ?From wanem yumi mas glad blong tokbaot ol blesing we bambae oli kamtru? (2) ?Pol i talem wanem blong givhan long ol Kristin long Korin?
16 Ol man we oli holemstrong long Jehova long ol taem naoia we laef i strong tumas, bambae oli kasem wan nambawan laef. Nating se yumi no kasem ol blesing ya yet, be yumi mas tingbaot olgeta. Samting ya bambae i givhan long yumi blong putum tingting blong yumi i stap long ol samting we oli moa impoten. Nao bambae yumi gohed blong mekem wok blong Jehova, we yumi no letem ol samting blong wol ya i blokem yumi. (Luk 21:34; 1 Tim. 6:17-19) Taem yumi mekem famle stadi, yumi storian wetem ol brata mo sista, mo wetem ol Baebol stadi mo visit blong yumi, yumi mas glad blong tokbaot ol gudfala blesing we bambae yumi kasem. Ale bambae tingting blong yumi i stap strong long ol promes blong Jehova. Pol tu i mekem olsem. Hem i givhan long ol Kristin long taem blong hem, blong oli tingbaot ol samting we bambae i hapen long en blong Wan Taosen Yia Rul Blong Kraes. Yu traem tingbaot mining blong ol tok blong Pol long 1 Korin 15:24, 25, 28.—Ridim.
17, 18. (1) ?Long wanem rod Jehova “i rul long olgeta samting” taem hem i mekem fas man mo woman? (2) ?Jisas bambae i mekem wanem blong putumbak pis mo fasin joen gud?
17 Tok ya se God “i rul long olgeta samting,” i eksplenemgud se laef bambae i olsem wanem long en blong wan taosen yia. ?Tok ya i minim wanem? Yu traem tingtingbak long taem we Adam mo Iv, tufala i joen long famle blong Jehova, we i gat pis. Jehova, Hae Rula blong heven mo wol, i rul stret long olgeta samting we hem i mekem, nomata se oli stap long heven no long wol. Oli save toktok wetem Jehova, wosipim hem, mo hem i save blesem olgeta. Long taem ya, Jehova “i rul long olgeta samting.”
18 Taem Setan i pulum Adam mo Iv blong agensem Jehova, hem i spolem pis ya we tufala i gat wetem Jehova. Be stat long 1914, King Jisas i mekem sam samting blong putumbak pis mo fasin joen gud. (Efes. 1:9, 10) Long Wan Taosen Yia Rul Blong Kraes, ol nambawan samting we “yumi no save luk” from we oli no hapen yet, bambae oli kamtru. Ale “en” blong Wan Taosen Yia Rul Blong Kraes, i kam. ?Wanem bambae i hapen long taem ya? Nating se Jehova i givim “olgeta paoa” long Jisas, be Jisas i no wantem tekemaot raet blong Jehova blong rul. Hem putum hem i stap daon, nao hem “i givimbak olgeta paoa blong hem long God, Papa blong hem.” Bambae hem i yusum raet no paoa blong hem, blong “leftemap nem blong God, Papa blong yumi.”—Mat. 28:18; Fil. 2:9-11.
19, 20. (1) ?Olgeta we oli laef aninit long rul blong Kingdom, oli soemaot olsem wanem se oli sapotem hae rul blong Jehova? (2) ?Wanem ol gudfala samting we bambae yumi harem gud long olgeta?
19 Long taem ya, olgeta man we oli stap aninit long rul blong Kingdom, bambae oli stret gud olgeta. Mo oli folem eksampol blong Jisas. From we oli gat tingting daon, bambae oli glad se Jehova i rul long olgeta. Sipos oli soemaot se oli wantem we Jehova i rul long olgeta, bambae oli stanap strong taem Setan i traem olgeta laswan. (Rev. 20:7-10) Biaen, ol enjel mo ol man we oli agensem Jehova, bambae oli lus blong olwe. !Bambae i wan taem blong glad! Evriwan long heven mo long wol we oli stap long famle blong Jehova, oli presem hem. Mo Jehova bambae “i rul long olgeta samting.”—Ridim Ol Sam 99:1-3.
20 I no longtaem, Kingdom blong Jehova bambae i mekem ol gudfala samting oli kamtru. Taswe yu mas putum tingting blong yu i stap long ol samting we Jehova i wantem, mo yu mas traehad blong mekem olgeta. Yu no mas letem ol samting long wol blong Setan oli blokem yu, nao yu no moa tingbaot blong mekem wok blong Jehova. Yu mas strong long desisen blong yu blong sapotem rul blong Jehova. ?Olsem wanem? ?Yu yu stap mekem ol samting ya? Yu mas mekem ol wok we i soemaot se yu wantem sapotem rul blong Jehova olwe. Biaen, bambae yu save harem gud long pis, mo yu gat plante samting, i no long wan taosen yia nomo, be blong olwe.
[Kwestin]
[Tok blong pija long pej 16]
Taem Jisas i finisim wok blong hem olsem King, hem i putum hem i stap daon, mo i givim Kingdom long Papa blong hem
