Kinamwe Lón Úkúkún Engeréú Ier Me Feilfeiló!
Kinamwe Lón Úkúkún Engeréú Ier Me Feilfeiló!
“Kot epwe unusen nemeni mettoch meinisin.”—1 KOR. 15:28.
KA TONGENI ÁWEWEEI?
Ifa usun pwénúetáán ekkeei wokisin epwe kkúú manawom?
Mika 4:4
Aisea 11:6-9
1. Ifa án ewe “mwich mi fokun chocho” ápilúkúlúk mi ámmeseik?
ANCHANGEI watteen ewe feiéch lón úkúkún engeréú ier epwe tori aramas fán nemenien eú mwú mi péchékkúl me emén sou nemenem mi pwúng me úméúméch. Chón ewe “mwich mi fokun chocho” repwe pwapwaiti ekkena watteen feiéch. Iir ekkewe repwe manawewu seni ewe “riäfföü mi lapalap,” ewe epwe unusen amóeló ei ótót mi ngaw.—Pwär. 7:9, 14.
2. Lón ekkewe 6,000 ier ra ló, met aramas ra kúna?
2 Lón ekkewe 6,000 ier ra ló, aramas ra sótun nemeni pwisin iir me ina met a fen efisatá watteen riáfféú ngeni aramas. Lóóm lóóm, ewe Paipel a erá: “Eman aramas a nemeni aramas o ariaföüür.” (SalAf. 8:9) Met a fiffis lón ei fansoun? Me lúkún maun me féfférún ú ngeni, a pwal fis mwelele, samau, katalóón fénú, limengawelóón konik, ásepwál, me osukosuken weather me metakkan. Ekkewe néúwisin mwú ra fen eáni éúréúr pwe sipwe fókkun feiengaw ika aramas rese aúkatiw ar akkataieló ei fénúfan.
3. Met epwe fis atun ewe Nemenem Úkúkún Engeréú Ier?
3 Fán nemenien Jesus, Kingen ewe Mwúún Messaia, me ekkewe 144,000 mi eti i le nemenem, ewe Mwúún Kot epwe amóeló ekkewe feiengaw mi tori aramas me fénúfan. Atun ewe Nemenem Úkúkún Engeréú Ier, án Jiowa Kot ei pwon mi aururukich epwe pwénúetá: “Üpwe föri eu läng mi fö me eu fanüfan mi fö. Iwe, esap chüen wor eman epwe chechemeni ekewe mettochun lom o ekieki usun.” (Ais. 65:17) Nge ikkefa ekkewe mettóch mi amwarar repwe fis lón mwachkkan? Ekkewe oesini lón Paipel repwe álisikich le weweiti ekkena mettóch mi amwarar, inaamwo ika resaamwo fis are ‘sisamwo tongeni küna.’—2 Kor. 4:18.
REPWE AÚETÁ IMWER ME FÓTUKI IRÁÁN WAIN
4. Pwata sia tongeni erá pwe a watte osukosuk ren leeni ikewe aramas repwe tongeni nónnóm ie?
4 Meinisin aramas ra tipeni an epwe pwisin wor imwer, ikewe ia iir me ar famili repwe tongeni meefi núkúnúkéch me ie. Nge lón ei fénúfan iei, a weires án aramas repwe kúnékún ia repwe nónnóm ie. Ekkewe telinimw ra ur ren chómmóngun aramas. Leenien chómmóng a limengaw, me eú chék imw a kan ákkáfite famili ra nóm lón. Ra tongeni chék ttana an epwe wor pwisin imwer.
5, 6. (a) Ifa usun Aisea 65:21 me Mika 4:4 repwe pwénúetá? (b) Ifa usun sipwe tongeni angei ena feiéch?
5 Lupwen ewe Mwúún Kot epwe nemeni fénúfan, meinisin aramas epwe pwisin wor imwer. Iei met Aisea a oesini: “Repwe aüetä imwer o nonom lon, repwe pwal fotuki irän wain o ochei uan.” (Ais. 65:21) Iwe nge, lap seni an epwe wor pwisin leenier, ra pwal ápilúkúlúkú och mettóch. Pwúngún pwe lón ei fansoun a fen pwisin wor imwen ekkóch aramas, me ekkóch ra pwal mwo nge imweni imw watte, iwe nge ra lólilen ika epwe chúen naf néúr moni ren méén imwer, are ren chón solá repwe solááni pisekiir. Nge fán nemenien ewe Mwúún Kot, aramas resap chúen lólileniesini ekkeei mettóch. Ewe soufós Mika a makkeei: “Eman me eman epwe nom lon an tanipin wain me fän an irä fiik fän kinamwe, nge esap wor eman epwe eniuokusu.”—Mik. 4:4.
6 Met a lamot sipwe féri ika sia mochen manaw fán nemenien ewe Mwúún Kot? Pwúngún pwe a lamot ngenikich meinisin eú leeni ia sipwe tongeni nónnóm ie. Nge sisap éttúres le imweni ewe sókkun imw mi mesemesekis sia tipeni lón ei fansoun mi tongeni akokakicheló lón watteen liwinimmang. Sipwe mirit ika sia manaweni ewe sókkun manaw mi pwáraatá pwe sia ánnefota án Jiowa kewe pwon. Jesus pwisin a erá: “Ekewe foks a wor pwanger, ekewe machang a wor faser, nge Nöün Aramas esap wor eu leni ia epwe konola ie o asösö.” (Luk. 9:58) Jesus a tufichin aúetá are mééni eú sókkun imw mi fókkun éch, nge pwata ese féri? Pún ese mochen epwe féri och mettóch epwe tongeni eppeti an akkomwa Mwúún Kot lón manawan. Sia tongeni áppirú Jesus ren ach sisap mut ngeni pisek an epwe nampa eú lón manawach me efisi ach aúrek?—Mat. 6:33, 34.
EPWE WOR KINAMWE LEFILEN ARAMAS ME MAN
7. Met Jiowa a fen akkóta usun ewe riri lefilen aramas me man?
7 Lupwen Jiowa a poputá le fératá ekkewe mettóch wóón fénúfan, sáingolóón a fératá aramas. A ereni Jesus, néún we Sou Angang, minne a tipeni: “Sipwe föri aramas mi wewe ngenikich pwe repwe nemeni ekewe ikenen leset me ekewe mansüsü me ekewe man meinisin won fanüfan.” (Ken. 1:26) Kot a akkóta pwe Atam me Efa repwe túmúnú ekkewe man me nemeniir. Iwe ló, ló, ló, meinisin aramas epwe pwal wor ar nemenem wóór.
8. Ifa usun mwékútúkútún ekkewe man lón ei fansoun?
8 Mi tufich án aramas repwe nemeni meinisin man me repwe kinamwefengen? Chómmóng aramas ra túmúnú néúr kewe man, áwewe chék ren kolak me káttu. Nge ifa usun ren ekkewe man mi mwocho? Ekkewe sou káé usun man mi nónnóm ren ekkewe manmwacho pwe repwe káé pwóróuseer, ra kúna pwe meinisin man a wor ar memmeef. Sia silei pwe ekkewe man repwe meefi niwokkus me song lupwen emén epwe eniwer, nge iir mi tongeni pwáraatá ar tong? Ekkewe sou káé ra erá pwe lupwen ekkewe man ra foleni néúr kewe kúkkún, ra pwáraatá watteen tong ngeniir.
9. Ifa usun ekkewe man repwe sókkóló lón mwachkkan?
9 Ina popun sisap máirú, pwe ewe Paipel a erá pwe aramas me man repwe kinamwefengen. (Álleani Aisea 11:6-9; 65:25.) Pwata sisap máirú? Chechchemeni pwe lupwen Noa me an we famili ra towu seni ewe waimw mwirin ewe Noter, Jiowa a ereniir: “Ekewe manfetal me mansüsü, ekewe mantötö me ikenen leset meinisin repwe niueitikemi.” Ikenái chómmóng man ra kan sú seni aramas pwe aramas resap efeiengawer. (Ken. 9:2, 3) Nge Jiowa a tongeni féri pwe resap kon chúen niwokkus pwe ewe riri lefiler me aramas epwe usun chék ewe sókkun riri Jiowa a fen akkótaló me lepoputáán. (Os. 2:18) A ifa me apwapwaan ena fansoun fán iten meinisin mi nónnóm wóón fénúfan!
EPWE TÉLÚ CHÉNÚN MAS MEINISIN
10. Met popun aramas ra kechiw?
10 Salomon a kúna chómmóng féfféringaw a fiffis wóón fénúfan me esor emén a angasaaló chómmóng aramas seni. Ina minne, fán letipechou iei met a erá: “Chokewe mi küna riaföü ra kechü, nge esap wor eman a alisiir.” (SalAf. 4:1) A pwal ina usun lón ei fansoun me a pwal mwo nge fen ngaw seni ena. Ié me leich esap mwo fán eú a kechiw? Fán ekkóch sia kechiwen pwapwa nge lap ngeni sia kechiw pokiten sia fókkun riáfféú.
11. Menni pwóróus lón Paipel a fókkun achchúngú letipom?
11 Ekieki ekkewe chómmóng pwóróus lón Paipel usun ekkewe aramas ra kechiw. Lupwen Sara a máló lón an 127 ierin, “Apraham a tolong ren pwe epwe kechüeiti Sara o ngüngüres won.” (Ken. 23:1, 2) Lupwen Naomi a kapong ngeni pwúlúwen néún kewe rúúemén át “ir ra kechü fän leüömong.” Mwirin a pwal fóssefál ngeniir, iwe, “ra kechüsefäl fän leüömong.” (Rut 1:9, 14) Lupwen King Hiskia a fókkun semmwen me usun epwele máló, a iótek ngeni Kot me “a fokun kechüangau.” Iwe, Jiowa a áfánni an kechiw me a echikaraatá. (2 King 20:1-5) A chúng letipach ren met a fis ngeni Petrus lupwen a amamesini Jesus. Lupwen a rongorong kékkén ewe chukó, “a towu lükün o fokun kechüengau.”—Mat. 26:75.
12. Ifa usun án Kot we Mwú epwe atoto ngaseló ngeni aramas?
12 Pokiten a chómmóng mettóch mi eletipechou aramas, iwe, a lamot ngeniir ouruur me ngaseló. Atun án Kraist Nemenem Úkúkún Engeréú Ier, Kot epwe “talüpwasei chönün mas seni won meser meinisin. Esap chüen wor mäla ika letipeta ika kechü ika cheuch.” (Pwär. 21:4) A fókkun amwarar an esap chúen wor metek me riáfféú. Nge ewe a kon amwarar seni ena, án Kot we pwon pwe epwe amóeló máló. Ifa usun epwe fis ena?
“MEINISIN REPWE . . . TOWU SENI PEIASER”
13. Ifa usun máló a kkúú aramas seni ewe atun Atam a tipis?
13 Seni chék ewe atun Atam a tipis, máló a nemeni aramas usun emén king. A usun emén chón koput esor mi tongeni akkufu. Meinisin aramas mi tipis rese tongeni opoló seni, me a efisi watteen riáfféú me letipechou. (Rom 5:12, 14) Pokiten án aramas “niuokusiti mäla,” iwe chómmóng ra “fötek lon unusen manauer.”—Ipr. 2:15.
14. Met epwe fis lón ewe fansoun esap chúen wor máló?
14 Ewe Paipel a fós usun ewe fansoun lupwen máló “epwe mola” are esap chúen wor. (1 Kor. 15:26) Iwe, epwe fis ruu mettóch. Epwe suuk ngeni ewe “mwich mi fokun chocho,” an epwe manaw lón ewe fénúfan sefé me kúna manaw esemuch. Epwe pwal suuk ngeni chómmóng aramas mi máló ar repwe manawsefál. En mi tongeni anchangei apwapwaan me ámeseiken lupwen ewe “mwich mi fokun chocho” epwe souni ekkewe chón manawsefál? Ika sia álleaniéchú ekkewe pwóróus lón Paipel usun chókkewe mi manawsefál, sia tongeni kachitoni ewe atun sipwe chuursefáli ekkewe repwe manawsefál.—Álleani Markus 5:38-42, Ewe Kapasen God; Lukas 7:11-17.
15. Epwe ifa meefiom lupwen kopwe kúna attongom an a manawsefál?
15 Ekieki ekkeei itiitin kapas, “ra fakkun mwar” me “ra mwareiti Kot.” Ika ka nóm lón ekkena atun Jesus a amanawasefáli chókkana, iwe eli epwe pwal ina usun meefiom. Enlet epwe fókkun ámmeseik me apwapwa atun sia kúna attongach kewe ra manawsefál. Jesus a erá: “Epwe war ewe fansoun lupwen ekewe sotup meinisin repwe rong mwelian o towu seni peiaser.” (Joh. 5:28, 29) Esor emén me leich a kúna án emén manawsefál, iwe ese mwáál ina eú me lein ‘ekewe mettoch sisamwo tongeni küna’ mi fókkun amwarar seni meinisin.
“KOT EPWE UNUSEN NEMENI METTOCH MEINISIN”
16. (a) Met popun itá sipwe mwasangasang le fós usun ekkewe feiéch sisaamwo kúna? (b) Met Paulus a apasa ren an epwe apéchékkúla ekkewe Chón Kraist lón Korint?
16 Chókkewe mi amwéchú ar tuppwél ngeni Jiowa lón ei fansoun weires ra eáni eú ápilúkúlúk mi echipwér fán iten mwachkkan! Inaamwo ika sisaamwo kúna ekkewe feiéch, nge mi lamot sipwe ekieki usur. Ei mettóch epwe álisikich le nefotofot wóón ekkewe mettóch mi kon lamot me túmúnúkich seni án ei fénúfan epwe erikikicheló. (Luk. 21:34; 1 Tim. 6:17-19) Sipwe mwasangasang le fós usun ach ápilúkúlúk usun mwachkkan atun ach famili fel, lupwen sia pwóróusfengen me pwiich kewe are ngeni néúch kewe chón káé, me lupwen sia afalafala aramas. Epwe álisikich le anúkúcharaló ach ápilúkúlúk. Ina usun án aposel Paulus apéchékkúla chienan kewe Chón Kraist. Alón kewe a álisiir le ekieki usun ekkewe mettóch epwe fis lesópwólóón án Kraist we Nemenem Úkúkún Engeréú Ier. Sótun anchangei unusen weween alón Paulus keei lón 1 Korint 15:24, 25, 28.—Álleani.
17, 18. (a) Ifa usun Jiowa a “unusen nemeni mettoch meinisin” atun an a kerán fératá aramas? (b) Ifa usun Jesus epwe eliwinato kinamwe me tipeeúfengen?
17 Esap pwal wor och itiitin kapas epwe áweweéchú ifa usun napanapen manaw le muchulóón ewe engeréú ier me lúkún ekkei kapas: “Kot epwe unusen nemeni mettoch meinisin.” Met weween ena? Anchangei sefáli ewe fansoun lón Eten lupwen Atam me Efa ra chúen chón án Jiowa we famili mi kinamwe. Jiowa, ewe Sou Nemenemen Unuselapen Láng me Fénúfan, a wisen nemeni férian kewe meinisin. Ra tongeni fós ngeni Jiowa, fel ngeni me kúna feiéch seni. I a “unusen nemeni mettoch meinisin.”
18 A ta ena riri mi kinamwe lupwen Satan a etipetipa aramas ar repwe ú ngeni Jiowa. Nge seni 1914 ewe Mwúún Kot a fen mwékútúkút an epwe enniwilisefálli ena kinamwe me tipeeúfengen. (Ef. 1:9, 10) Atun ewe Engeréú Ier, chómmóng mettóch mi amwarar ‘sisamwo tongeni küna’ pokiten resaamwo fis, repwe pwénúetá. Mwirin epwe war “ewe fansoun sopoloon,” weween, sópwólóón án Kraist Nemenem Úkúkún Engeréú Ier. Iwe, met epwe fis mwirin? Inaamwo ika a nóm ren Jesus “nemenem meinisin” lón láng me wóón fénúfan, nge ese mochen angei seni Jiowa an nemenem. Fán tipetekison epwe “atolonga mwün fän nemenien Saman Kot.” Ewer, i a kan áeá an manaman me wisan we mi kkóló aúchean pwe Kot “epwe ling ren.”—Mat. 28:18; Filip. 2:9-11.
19, 20. (a) Ifa usun chókkewe mi nóm fán nemenien ewe Mwú repwe pwáraatá pwe ra etiwa án Jiowa nemenem? (b) Ikkefa ekkewe mettóch mi amwarar sipwe pwapwaiti lón mwachkkan?
19 Iwe, lón ena atun, meinisin mi nóm wóón fénúfan fán nemenien ewe Mwúún Kot repwe fen unuséchúló. Repwe tapweló lón án Jesus leenien áppirú. Me pokiten ra tipetekison, repwe pwapwa le etiwa án Jiowa pwúúng le nemeniir. A suuk ngeniir ar repwe pwáraatá pwe ra mochen anómuur fán án Jiowa nemenem ren ar pworacho ngeni ewe sáingoon sóssót. (Pwär. 20:7-10) Mwirin ena, meinisin chón ú ngeni Kot, chónláng are aramas, repwe ninniiló me málófóchofóch. A ifa me apwapwaan ena fansoun! Meinisin chón án Jiowa we famili lón láng me fénúfan, repwe mwareiti i. Me Jiowa epwe “unusen nemeni mettoch meinisin.”—Álleani Kölfel 99:1-3.
20 Ekkewe mettóch mi amwarar ewe Mwúún Kot epwele atoto itá repwe amwékútuk le afota óm ekiek me óm achocho le apwénúetá letipen Jiowa? Ka tongeni tumunuk seni ewe ouruur me ápilúkúlúk mi chofona seni án Satan ei ótót an esap erikukóló seni óm angang ngeni Jiowa? Kopwe apposaló letipom le álisatá án Jiowa pwúúng le nemenem? Amwo féfférum kewe repwe ánnetatá pwe ina met ka mochen féri tori feilfeiló. Iwe, kopwe tongeni pwapwaiti ewe kinamwe me feiéch esap chék lón úkúkún engeréú ier nge tori feilfeiló!
[Sasing lon pekin taropwe 15]
Lupwen Jesus a unusen apwénúetá wisan usun emén King, fán tipetekison epwe atolongasefáli ewe Mwú fán nemenien Seman we
