Lape pour mil an e pour leternite!
Lape pour mil an e pour leternite!
“Bondye i ava tou pour tou dimoun.”—1 KOR. 15:28.
ESKI OU KAPAB EKSPLIKE?
Ki lakonplisman sa bann verse pou vedir pour ou?
1. Ki kalite lavenir sa “gran lafoul” pe espere?
ZIS mazin bann bon keksoz ki en gouvernman pwisan avek en dirizan zis ki annan konpasyon ti pou kapab fer pour son bann sitwayen dan mil an! I annan plizyer levennman ekstraordiner ki pe esper sa “gran lafoul” ki pou sirviv sa “gran ladetres.” Sa gran ladetres pou detrir konpletman sa move lemonn.—Rev. 7:9, 14, NW.
2. Ki zonm in eksperyanse pandan sa 6,000 an ki’n pase?
2 Pandan sa 6,000 an ki’n pase, zonm in esey domin zot lekor me sa in fer limanite an zeneral konn en kantite douler ek soufrans. Labib ti dir depi byen lontan: “Zonm in domin zonm e sa in fer ditor zot menm.” (Ekle. 8:9) Ki nou pe vwar ozordi? Apard lager ek rebelyon, i annan en kantite problenm parey lapovrete, maladi, destriksyon lanvironnman, sanzman klima ek lezot problenm ankor. Bann zofisye gouvernman i dir ki nou bezwen sanz nou latitid e aret detrir later parski sa pou anmenn move konsekans.
3. Ki pou arive pandan sa Renny Mil An?
3 Anba dominasyon Zezi Kri ek sa 144,000 dirizan, Rwayonm Bondye pou ptitapti retir tou bann domaz ki imen ek later in sibir. Pandan Renny Mil An Kris, nou pou vwar lakonplisman sa promes ki Zeova ti fer: “Mon pe kre nouvo lesyel ek en nouvo later. Bann keksoz dan lepase pa pou vin dan lespri, zot pa pou ni vin dan leker.” (Iza. 65:17) Ki bann levennman merveye ki nou pe espere? Avek led Parol profetik Bondye, annou ganny en pti apersi sa bann keksoz merveye ki nou “pa [ankor] war.”—2 Kor. 4:18.
‘ZOT POU KONSTRI LAKAZ E PLANT PYE REZEN’
4. Ki problenm lakaz bokou dimoun i rankontre ozordi?
4 Lekel ki pa ti pou kontan annan son prop lakaz, en landrwa kot li ek son fanmir i kapab santi zot sen e sof? Par kont, i difisil ozordi pour trouv en bon landrwa reste. I annan tro bokou dimoun ki reste dan bann lavil. Bokou i bezwen reste dan en lakaz kot i annan plizyer fanmir ansanm oubyen dan bann batiman ki dan en move leta. Zot zis reve pour annan zot prop lakaz.
5, 6. (a) Ki mannyer Izai 65:21 ek Mika 4:4 pou ganny akonplir? (b) Ki mannyer nou kapab ganny sa benediksyon?
5 Sa dezir ki tou zabitan later i annan pour ganny zot prop lakaz pou ganny akonplir anba dominasyon Rwayonm Bondye, akoz Izai ti profetize: “Zot pou konstri lakaz e zot pou reste ladan; wi, zot pou plant pye rezen e zot pou manz son fri.” (Iza. 65:21) Par kont, annan zot prop lakaz i pa sa sel keksoz ki zot pe espere. Apre tou, pa i annan serten ki pe viv dan zot prop lakaz ozordi, petet menm dan en gro lakaz oubyen en gran propriyete? Me zot touzour enkyet ki zot kapab perdi zot lakaz akoz problenm larzan oubyen ki voler i kas zot lakaz. Pa tou keksoz pou vreman diferan anba dominasyon Rwayonm Bondye! Profet Mika ti ekrir: “Zot pou vreman asize, sakenn anba son pye rezen e anba son pye fig, e pou napa personn ki pou fer zot tranble.”—Mik. 4:4.
6 Ki nou bezwen fer si nou anvi viv anba dominasyon Rwayonm Bondye? Definitivman nou tou nou bezwen en bon landrwa reste. Par kont, olye gaspiy nou zefor e andet nou lekor pour ganny sa lakaz ki nou ti a kontan annan la konmela, pa i ti pou pli saz pour konsantre lo promes Zeova? Mazin sa ki Zezi ti dir lo li: “Renar i annan zot trou, zwazo lesyel i annan zot nik, me Fis-de-Lonm napa en landrwa kot i kapab repoz son latet.” (Lik 9:58) Zezi ti annan sa abilite ek pouvwar pour konstri oubyen annan sa pli zoli lakaz. Akoz i pa ti fer sa? I kler ki Zezi pa ti oule nanryen anpes li met Rwayonm Bondye premye dan son lavi. Eski nou kapab swiv son legzanp par gard nou lavi senp e pa trakas nou avek bann keksoz materyel?—Mat. 6:33, 34.
“LELOU EK MOUTON POU MANZ ANSANM”
7. Ki Zeova ti dir konsernan relasyon ki ti pou annan ant imen ek zannimo?
7 Kan Zeova ti konmans kre bann keksoz lo later, i ti kre bann imen dernyen. I ti dir avek Zezi, son Zouvriye Abil akoz i ti kre bann imen: “Annou fer zonm parey nou, dan nou resanblans e les zot domin lo bann pwason dan lanmer, lo bann kreatir ki anvole dan lesyel, lo bann zannimo domestik, later antye e lo tou zannimo ki mouvmante lo later.” (Zen. 1:26) Bondye ti demann Adan ek Ev pour pran swen avek bann zannimo e annan lotorite lo zot. Finalman tou imen ti pou annan sa menm responsabilite.
8. Ki konportman zannimo i annan ozordi?
8 Eski i vreman posib pour imen annan lotorite lo zannimo e viv anpe avek zot? En kantite dimoun i kontan zot zannimo domestik, parey sat ek lisyen. Me ki nou pou dir konsernan bann zannimo sovaz? En lartik i dir: “Bann syantis ki’n etidye bann zannimo sovaz in remarke ki tou manmifer i annan santiman.” Nou vwar ki bann zannimo i per oubyen vin feros ler zot santi zot an danze, me eski zot kapab demontre lafeksyon? Sa lartik i azoute: “Nou kapab remark sa pli gran kalite ki bann manmifer i annan, setadir zot lafeksyon ler zot pran swen avek zot piti.”
9. Ki mannyer bann zannimo pou diferan dan lavenir?
9 Alor nou pa devret sirprann ler nou lir dan Labib ki i pou annan lape ant imen ek zannimo. (Lir Izai 11:6-9; 65:25. *) Akoz sa pa devret sirprann nou? Pa bliye ki ler Noe ek son fanmir ti sorti dan lars apre Deliz, Zeova ti dir zot: “Tou kreatir vivan lo later pou kontinyen per zot e pou annan en gran lafreyer pour zot.” Sa lafreyer ki bann zannimo i annan pour zonm i pour zot prop proteksyon. (Zen. 9:2, 3) Zeova i kapab diminyen sa lafreyer terib ki bann zannimo i annan pour imen e fer zot relasyon avek imen vin parey i ti anvi depi o konmansman. (Ose. 2:18) Kan sa pou arive, pa i pou vreman gou!
“I POU ESWIY TOU LARM”
10. Akoz imen i plere?
10 Ler Salomon ti vwar “tou bann labi ki pe ganny fer lo sa later,” i ti dir: “Gete! larm sa bann ki pe ganny abize, me zot ti napa personn pour konsol zot.” (Ekle. 4:1) Nanryen pa’n sanze e petet sityasyon i pli pir ozordi. Lekel parmi nou ki pa’n zanmen plere? I vre, parler nou plere avek lakontantman. Me laplipar di tan nou plere akoz nou dan sagrinasyon.
11. Ki resi Labib ki tous ou plis?
11 Zis mazin sa kantite fwa ki nou’n lir bann resi tousan dan Labib kot dimoun in eksprim zot sagren. Par egzanp ler Sara ti mor a laz 127 an, Abraam ti vreman sagren e ti plere. (Zen. 23:1, 2) Ler Naomi ti dir orevwar son de belfiy ki ti vev, “zot ti konmans lev zot lavwa e plere,” apre zot “ti lev zot lavwa e rekonmans plere.” (Rit 1:9, 14) Kan Lerwa Izkiya ti tonm malad e i ti konnen ki i pou mor, i ti priy Bondye e “konmans plere asodlarm.” Sa ti tous Zeova. (2 Rwa. 20:1-5) Lekel ki pa ganny touse ler i lir sa resi kot zapot Pyer ti renye Zezi? Ler i ti tann kok sante, Pyer ti “sorti deor e plere avek remor.”—Mat. 26:75.
12. Ki mannyer Rwayonm Bondye pou anmenn vre soulazman pour limanite?
12 Bann imen i vreman bezwen rekonfor ek soulazman akoz bann levennman tris ki zot pas atraver e sanmenm sa ki Renny Mil An pou anmennen pour tou bann ki siport Rwayonm Bondye. “[Bondye] pou eswiy tou larm dan zot lizye. Lanmor pou nepli egziste. Pou nepli annan ni dey, ni plere, ni soufrans.” (Rev. 21:4) I gou pour mazinen ki i pou nepli annan plere ek soufrans e an plis ki sa Bondye in menm promet ki lanmor pou nepli egziste. Ki mannyer sa pou arive?
“TOU BANN MOR KI DAN TONBO . . . POU SORTI”
13. Ki mannyer lanmor i afekte bann imen depi ki Adan in fer pese?
13 Depi ki Adan in fer pese, lanmor pe domin limanite parey en lerwa. I en lennmi pwisan e personn pa kapab defet li. Napa en dimoun ki’n kapab evit li e i lakoz en kantite sagrinasyon ek soufrans. (Rom. 5:12, 14) An realite, “akoz zot lafreyer lanmor,” plizyer milyon dimoun i “viv konman lesklav pandan tou zot lavi.”—Ebr. 2:15.
14. Ki pou arive kan lanmor pou ganny detrir?
14 Labib i dir ki “dernyen lennmi ki pou ganny detri, se lanmor.” (1 Kor. 15:26) Sa pou benefisye de group dimoun. En group i sa “gran lafoul” ki vivan ozordi ki pou sirviv e antre dan nouvo lemonn avek sa lespwar pour viv pour touzour. Sa lot group i sa plizyer bilyon dimoun mor ki pou resisite. Eski ou kapab mazin sa lazwa ek leksitasyon ki pou annan ler sa de group dimoun pou rezwenn kanmarad? Si ou egzamin serten resi konsernan rezireksyon dan Labib ou pou ganny en avangou lo sa ki pou arive sa zour.—Lir Mark 5:38-42; Lik 7:11-17.
15. Ki mannyer ou ti pou santi si ou vwar en dimoun ki ou kontan resisite?
15 Mazin sa parol, “zot ti dan en gran letonnman” e “zot ti glorifye Bondye.” Si ou ti la sa zour petet ou ti pou santi parey. Nou osi nou pou dan en gran lazwa ek leksitasyon ler nou pou vwar bann dimoun ki nou kontan ki’n mor, resisite. Zezi ti dir: “Ler pe arive kan tou bann mor ki dan tonbo pou tann son lavwa.” (Zan 5:28, 29) Napa personn parmi nou ki’n deza vwar en dimoun resisite, alor sa pou sirman enn parmi sa pli gran keksoz “ki nou pa [ankor] war.”
BONDYE I A VIN “TOU POUR TOU DIMOUN”
16. (a) Akoz nou bezwen koz avek lantouzyasm konsernan bann benediksyon ki pou vini byento? (b) Ki Pol ti dir pour ankouraz bann Kretyen Korent?
16 Wi, en lavenir merveye pe esper bann ki reste fidel avek Zeova dan sa bann letan difisil! Kantmenm nou pa ankor vwar sa bann benediksyon, si nou gard zot byen antet, nou pou konsantre lo sa ki vreman enportan e evite les nou ganny distrer par bann keksoz dan sa move lemonn. (Lik 21:34; 1 Tim. 6:17-19) Annou touzour koz avek lantouzyasm lo sa lespwar merveye ki nou annan dan letid ek ladorasyon an fanmir, kot lasanble avek lezot frer ek ser e dan nou diskisyon avek bann etidyan Labib ensi ki bann dimoun enterese. Sa pou ed nou gard nou lespwar pour sa bann benediksyon vivan dan nou lespri ek leker. Zapot Pol ti fer sanmenm ler i ti ankouraz son bann konpanyon Kretyen. Sa ki i ti dir ti ed zot mazin lo bann keksoz ki ti pou arive a lafen Renny Mil An Kris. Esey konpran byen sinifikasyon parol Pol dan 1 Korentyen 15:24, 25, 28.—Lir.
17, 18. (a) Dan ki fason Zeova ti “tou pour tou dimoun” o konmansman listwar imen? (b) Ki Zezi pou fer pour reetablir lape ek linite?
17 Napa parol ki kapab pli byen dekrir ki mannyer lavi pou ete a lafen sa mil an ki “Bondye i ava tou pour tou dimoun.” Ki sa parol i vedir? Mazin sa letan dan zarden Edenn ler sa de imen parfe, Adan ek Ev ti form parti fanmir Bondye ki ti anpe e ini. Zeova, Souvren Liniver ti domin lo tou son kreasyon, ki swa dan lesyel oubyen lo later. Zot ti kapab ador li, koz avek li personnelman e ganny son benediksyon. I ti “tou pour tou dimoun.”
18 Lape ek linite sa fanmir ti kase ler Satan ti enfliyans bann imen pour rebel kont souvrennte Zeova. Depi 1914, Rwayonm Bondye in pran bann dispozisyon pour ptitapti reetabli lape ek linite. (Efe. 1:9, 10) Pandan sa Renny Mil An, i pou annan bann keksoz merveye ki nou “pa war,” ki pou vin en realite. Ki pou arive apre “lafen,” setadir kan Renny Milener Kris i fini? Menm si Zezi in ganny “tou pouvwar dan lesyel ek lo later,” i pa anbisye. I napa okenn lentansyon pran plas Zeova. Avek limilite “i pou remet Rwayonm dan lanmen Bondye, son Papa.” I pou servi sa pozisyon ek lotorite ki zis li tousel ki annan “pour laglwar Bondye.”—Mat. 28:18; Fili. 2:9-11.
19, 20. (a) Ki mannyer tou bann ki pou anba dominasyon Rwayonm Bondye pou demontre ki zot aksepte souvrennte Zeova? (b) Ki kalite lavenir pe esper nou?
19 Tou sitwayen Rwayonm pou’n fini vin parfe ler Zezi i remet tou keksoz dan lanmen son Papa. Akoz zot annan limilite, zot pou swiv legzanp Zezi e volonterman aksepte souvrennte Zeova. Zot pou’n pas sa tes final si zot demontre ki zot anvi Zeova i domin lo zot. (Rev. 20:7-10) Apre sa, bann lanz ek imen ki rebele pou ganny detrir pour touzour. Pa i pou gou sa letan! Sa fanmir iniversel pou loue Zeova ki pou vin “tou pour tou dimoun.”—Lir Psonm 99:1-3. *
20 Rwayonm Bondye pou byento fer bann keksoz ekstraordiner. Eski sa i motiv ou pour reste konsantre e fer zefor pour fer lavolonte Bondye? Eski ou kapab evite les ou ganny distrer par bann fo lespwar ek rekonfor ki lemonn Satan i ofer? Eski ou pare pour fer tou zefor posib pour siport e defann souvrennte Zeova? Annou fer sir ki nou aksyon ek dezir i demontre ki nou anvi fer sa pour touzour. Si ou fer sa ou pou annan sa privilez pour konn lape ek boner pour mil an e pour leternite!
[Not anba lo paz]
^ par. 9 Izai 11:6-9: “6 Lelou pou vreman reste avek en pti mal mouton pour en serten letan, e en leopar pou dormi avek en pti kabri. En pti bef, en zenn lyon for, ek bann zannimo ki ganny byen nouri, zot tou zot pou ansanm; e en pti garson pou gid zot. 7 Bef ek lours pou manze; zot piti pou dormi ansanm. Menm en lyon pou manz lapay zis parey en toro. 8 En nourison pou sirman zwe lo trou kobra; e lo trou en serpan anpwazonnen en pti zanfan ki’n sevre pou met son lanmen. 9 Zot pa pou fer okenn keksoz mal oubyen koz okenn destriksyon dan tou mon montanny sen, akoz later pou vreman ranpli avek konnesans Zeova zis parey delo i kouver lanmer.” 65:25: “ ‘Lelou ek mouton pou manz ansanm, lyon pou manz lapay parey toro; tandis ki serpan, i pou manz lapousyer. Zot pa pou fer ditor, ni fer ravaz dan tou mon montanny sen,’ Zeova in dir.”
^ par. 19 Psonm 99:1-3: “1 Zeova li menm in vin lerwa. Ki bann pep i azite. I pe asiz lo bann seriben. Ki later i tranble. 2 Zeova i gran Siyon e i par lao tou bann pep. 3 Ki zot loue ou non. Sa non i gran e efreyan, i sen.”
[Kestyon]
[Portre lo paz 16]
Kan Zezi pou fini son travay konman Lerwa, avek limilite i pou remet Rwayonm dan lanmen son Papa
