1. Anong makalilipay nga palaabuton ang nagahulat sa “dakung kadam-an”?

MAHANDURAW mo bala ang tanan nga kaayuhan nga mahimo sa katawhan sang isa ka gamhanan nga gobierno nga ginadumalahan sang isa ka matarong kag mahigugmaon nga manuggahom sa sulod sang isa ka libo ka tuig? Ang makalilipay nga mga hitabo nagahulat sa indi maisip nga “dakung kadam-an.” Sila ang makalampuwas sa “dakung kapipit-an,” nga amo ang magadula sing bug-os sa malaut nga sistema sang mga butang.—Bug. 7:9, 14.

2. Ano ang naeksperiensiahan sang tawo sang nagligad nga 6,000 ka tuig?

² Sa sulod sang 6,000 ka tuig nga kasaysayan sang tawo, ang pagbuot kag paggahom sang tawo nagresulta sa daku nga kasakit kag pag-antos sang katawhan. Ang Biblia madugay na nga nagsiling: “Ang isa ka tawo may gahum sa isa sa iya kasamaran.” (Man. 8:9) Ano ang nakita naton subong? Luwas sa inaway kag kinagamo, yara man ang daku nga problema sa kaimulon, balatian, pagkaguba sang palibot, pagbag-o sang klima, kag iban pa. Ang mga opisyal sang gobierno nagpaandam nga kon indi naton pagbag-uhon ang aton panimuot, mangin makahalalit ang resulta.

3. Ano ang tumanon sang Isa ka Libo ka Tuig nga Paggahom?

³ Sa idalom sang paggahom sang Mesianikong hari nga si Jesucristo kag sang iya 144,000 nga kaupod nga manuggahom, ang Ginharian sang Dios magahimo sing mga tikang para ipasag-uli ang katawhan kag ang ila puluy-an, ang planeta nga Duta, gikan sa tanan nga kahalitan. Tumanon sang Isa ka Libo ka Tuig nga Paggahom ang makalilipay nga saad ni Jehova nga Dios: “Ako nagatuga sing bag-ong mga langit kag bag-ong duta; kag ang una nga mga butang indi na pagdumdumon ukon mag-abut sa painoino.” (Isa. 65:17) Anong makalilipay  nga mga hitabo, nga wala pa naton nakita, ang nagahulat sa aton? Sa bulig sang mga tagna sang Dios sa Biblia, tan-awon naton ang dalayawon nga mga butang nga “indi [pa] makita.”—2 Cor. 4:18.

4. Ngaa problema subong sang madamo ang pagtigayon sing nagakaigo nga balay?

⁴ Sin-o ang indi gusto makatigayon sing kaugalingon nga balay, diin mabatyagan niya kag sang iya pamilya ang proteksion kag kasiguruhan? Sa karon, problema gid ini kay madamo ang wala sing nagakaigo nga balay. Nagapulunsok ang mga tawo sa gutok nga mga siudad. Madamo ang nagamantenir sa mga hayubhayob sa mga iskwater. Para sa ila, ang pagtigayon sang kaugalingon nga balay isa na lamang ka damgo.

5, 6. (a) Ano nga kahimtangan ang mahanabo suno sa Isaias 65:21 kag Miqueas 4:4? (b) Paano naton matigayon ina nga pagpakamaayo?

⁵ Sa paggahom sang Ginharian, matuman ang handum sang tagsa ka pumuluyo nga makatigayon sing balay, kay gintagna ini paagi kay Isaias: “Magapatindug sila sing mga balay kag puy-an sila; magatanum sila sing mga ulubasan kag magakaon sang bunga nila.” (Isa. 65:21) Pero indi lamang balay ang ila matigayon. Ang iban subong may kaugalingon na nga balay, kag ang pila may mansion pa gani. Pero ara gihapon ang kabalaka nga basi madula ini bangod sa pagpamigado ukon basi sudlon sang mga kawatan. Tuhay gid ang kahimtangan sa paggahom sang Ginharian! Si manalagna Miqueas nagsulat: “Magalingkod sila ang tagsa ka tawo sa idalum sang iya uvas kag sa idalum sang iya higuera, kag wala na sing magapahadluk sa ila.”—Miq. 4:4.

⁶ Samtang ginahunahuna naton ining makalilipay nga palaabuton, ano ang dapat naton himuon? Matuod, tanan kita nagakinahanglan sing nagakaigo nga balay. Pero sa baylo nga tinguhaan ang imo ginahandum nga balay—nga mahimo mangutang ka para matigayon ini—indi bala maalamon gid kon magkonsentrar kita sa saad ni Jehova? Dumduma ang ginsiling ni Jesus parte sa iya kaugalingon: “Ang talunon nga mga ido may mga lungib kag ang mga pispis sa langit may mga hulunan, apang ang Anak sang tawo wala gid sing maunlan sang iya ulo.” (Luc. 9:58) Si Jesus may ikasarang kag gahom sa pagpatindog ukon pagtigayon sing pinakamaayo nga balay. Pero ngaa wala niya ini ginhimo? Maathag nga luyag ni Jesus nga likawan ang bisan ano nga tublag nga makaupang sa iya sa pag-una sang Ginharian. Mailog bala naton sia kag mahuptan ang simple nga mata—nga hilway sa mga tublag kag kabalaka sa materyal?—Mat. 6:33, 34.

7. Ano ang kaangtanan sang mga tawo kag mga sapat suno sa orihinal nga sugo ni Jehova?

⁷ Sang nagpanuga si Jehova, ulihi niya nga ginhimo ang tawo, ang pinakamaayo sa tanan niya nga tinuga sa duta. Ginsiling niya sa iya Batid nga Manugpangabudlay, nga iya panganay nga Anak, ang iya espesipiko nga katuyuan: “Himoon ta ang tawo sa dagway naton, sono sa kaangay naton; kag pagahumon sila sa kaisdaan sang dagat, kag sa kapispisan sang kahanginan, kag sa kahayupan, kag sa bug-os nga duta, kag sa tagsa ka butang nga nagasaug sa duta.” (Gen. 1:26) Gani, sanday Adan kag Eva, kag sa ulihi ang tanan nga tawo, ginsugo nga gamhan ang mga kasapatan.

8. Ano ang kinaandan nga ikasarang sang mga sapat?

⁸ Posible gid bala nga magamhan sang tawo ang tanan nga sapat kag makighidait sa ila? Madamo nga tawo ang suod sa ila mga hinuptanan, pareho sang mga ido kag kuring. Pero kamusta ang ilahas nga mga sapat? Ang isa ka report nagsiling: “Nasapwan sang mga sientipiko nga nagpanilag kag  nagtuon sing maayo sa mga sapat nga ang tanan nga mamalya may balatyagon.” Makita naton nga ang mga sapat nahadlok ukon naakig kon ginahalitan sila. Pero makahibalo man bala sila magpakita sing pagpalangga? Ang report nagpadayon: “Makita sa ila pag-atipan sa ila mga bata ang pinakamaayo nga kinaiya sang mga mamalya—ang ila dalayawon nga kapasidad nga magpakita sang pagpalangga.”

9. Ano nga mga pagbag-o sa mga sapat ang mapaabot naton?

⁹ Gani indi kita matingala kon mabasa naton sa Biblia nga may paghidait na sa mga tawo kag sapat. (Basaha ang Isaias 11:6-9; 65:25.) Ngaa? Dumduma nga sang naggua si Noe kag ang iya pamilya sa arka pagkatapos sang Anaw, si Jehova nagsiling sa ila: “Ang kahadluk sa inyo kag ang kakugmat sa inyo manginsa sapat sang duta.” Ang katuyuan sini para indi mapapas ang mga sapat. (Gen. 9:2, 3) Indi bala masarangan ni Jehova nga dulaon ina nga kahadlok kag kakugmat agod matuman ang iya orihinal nga sugo? (Os. 2:18) Makalilipay gid ini nga palaabuton para sa tanan nga makalampuwas kag magapuyo sa duta sa sina nga tion!

10. Ngaa nagahibi ang mga tawo?

¹⁰ Sang nakita ni Solomon “ang tanan nga pagpigus nga ginahimo sa idalum sang adlaw,” nagpanalambiton sia: “Yari karon, ang mga luha sang mga ginpigus, kag wala sila sing manuglipay!” (Man. 4:1) Nagakatabo man ini karon kag mahimo nga mas malala pa. Sin-o bala sa aton ang wala nagahibi bangod sa pila ka kabudlayan? Matuod, kon kaisa makahibi kita sa kalipay. Pero sa kabilugan ang paghibi nagapakita sang aton kasubo.

11. Ano nga kasaysayan sa Biblia ang nagtandog gid sa imo?

¹¹ Dumduma ang makatalandog kag masubo nga mga eksena nga aton mabasa sa Biblia. Sang napatay si Sara sa edad nga 127, “si Abraham nag-abut sa paglalaw kay Sara kag sa paghibi sa iya.” (Gen. 23:1, 2) Sang nagpaalam si Noemi sa iya duha ka umagad nga babayi, “ginbayaw nila ang ila tingug kag naghibi” kag dayon “ginbayaw nila ang ila tingug kag naghibi liwat.” (Rut 1:9, 14) Sang nagbalatian sing malubha si Hari Ezequias, nangamuyo sia sa Dios kag “naghibi sing tama,” amo nga natandog gid si Jehova. (2 Hari 20:1-5) Kag sin-o ang indi matandog sa pagpanghiwala ni apostol Pedro kay Jesus? Sang nabatian ni Pedro ang pagpamalo sang manok, “naggua sia kag naghilibion gid.”—Mat. 26:75.

12. Paano ihatag sang Ginharian ang matuod nga paumpaw sa katawhan?

¹² Bangod sang mga trahedya nga nagakatabo sa aton—gamay man ukon daku—kinahanglan gid sang katawhan ang lugpay kag paumpaw. Amo ini nga pagpakamaayo ang ihatag sang Isa ka Libo ka Tuig nga Paggahom sa mga sakop sini: “Pahiran [sang Dios] ang tagsa ka luha sa ila mga mata, kag wala na sing kamatayon, ukon paglalaw ukon paghibi ukon kasakit pa.” (Bug. 21:4) Makalilipay gid kay wala na sing paglalaw, paghibi, kag kasakit. Nagsaad man ang Dios nga dulaon ang katapusan nga kaaway sang katawhan—ang kamatayon. Paano?

13. Ano ang epekto sang kamatayon sa katawhan sugod sang nakasala si Adan?

¹³ Sugod sang nakasala si Adan, ang kamatayon naggahom subong hari sa mga katawhan. Ini nga kaaway indi malutos ukon mapalagyuhan sang makasasala nga katawhan, nga nagaresulta sing daku nga kasubo kag kasakit. (Roma 5:12, 14) Ang matuod, “tungod sa kahadlok sa kamatayon,” minilyon ang “napasakop sa pagkaulipon sa bug-os nila nga kabuhi.”—Heb. 2:15.

14. Ano ang resulta kon dulaon na ang kamatayon?

 ¹⁴ Ang Biblia nagasiling parte sa tion nga ang “katapusan nga kaaway, ang kamatayon dulaon.” (1 Cor. 15:26) May duha ka grupo nga makabenepisyo sa sini. Para sa “dakung kadam-an” nga nagakabuhi karon, mahimo sila makalampuwas pakadto sa ginsaad nga bag-ong kalibutan nga may paglaum nga mabuhi sing walay katapusan. Para naman sa binilyon nga napatay, mahimo sila banhawon. Mahanduraw mo bala ang kalipay kon mag-updanay na ang mga nakalampuwas kag ang mga nabanhaw? Ang pagbinagbinag sa pila ka rekord sang Biblia parte sa pagkabanhaw makabulig sa aton nga mabatyagan kon daw ano ini ka makalilipay.—Basaha ang Marcos 5:38-42; Lucas 7:11-17.

15. Ano ang mahimo mo nga reaksion kon makita mo ang imo hinigugma nga ginbanhaw?

¹⁵ Hunahunaa ang mga pinamulong nga “nahayanghag sila kag nagkalipay sing daku” kag “ginhimaya nila ang Dios.” Kon ara ka sadto nga tion, mahimo nga amo man sini ang imo mabatyagan. Kon makita naton ang aton mga hinigugma nga ginbanhaw, pat-od gid nga magaudyak kita sa kalipay. Si Jesus nagsiling: “Magaabot ang tion nga ang tanan nga yara sa handumanan nga mga lulubngan makabati sang iya tingog kag magagua.” (Juan 5:28, 29) Wala sing isa sa aton nga nakakita sini nga hitabo, pero pat-od nga isa ini sa pinakamaayo nga “mga butang nga indi [pa] makita.”

16. (a) Ngaa dapat naton isugid sing mapagsik ang mga pagpakamaayo nga indi pa naton makita? (b) Ano ang ginsiling ni Pablo para palig-unon ang mga Cristiano sa Corinto?

¹⁶ Huo, dalayawon gid nga palaabuton ang nagahulat sa mga magapabilin nga matutom kay Jehova sa sining mabudlay nga mga tion! Bisan indi pa makita ining daku nga mga pagpakamaayo, ang pagdumdom sini pirme makabulig sa aton nga  magkonsentrar sa labing importante nga buluhaton kag malikawan nga mapatalang sang temporaryo nga mga butang sining sistema. (Luc. 21:34; 1 Tim. 6:17-19) Sa aton pangpamilya nga pagsimba, sa pagpakig-istorya sa mga masigkatumuluo, kag sa paghinun-anon sa mga estudyante sa Biblia kag mga interesado, isugid naton sing mapagsik ang aton makalilipay nga paglaum. Makabulig ini para ang aton paglaum mangin buhi sa aton hunahuna kag tagipusuon. Amo sini ang ginhimo ni apostol Pablo sang ginpalig-on niya ang iya masigka-Cristiano. Daw pareho lang nga gindala niya sila sa katapusan sang Isa ka Libo ka Tuig nga Paggahom ni Cristo. Tilawi nga hunahunaa ang bug-os nga katumanan sang pinamulong ni Pablo sa 1 Corinto 15:24, 25, 28.—Basaha.

17, 18. (a) Sa ano nga paagi si Jehova nangin “tanan nga butang sa tanan” sa pagsugod sang kasaysayan sang tawo? (b) Ano ang himuon ni Jesus para mapasag-uli ang paghiusa?

¹⁷ Wala na sing mas maayo pa nga paglaragway sa mahimayaon nga katapusan sangsa mga pinamulong nga “ang Dios mangin tanan nga butang sa tanan.” Ano ang buot silingon sini? Hunahunaa ang tion sa Eden sang ang perpekto nga mga tawo, nga sanday Adan kag Eva, bahin pa sang mahidaiton kag nahiusa nga pamilya ni Jehova sa bug-os nga uniberso. Si Jehova, nga Soberano sa Uniberso, ang naggahom sing direkta sa tanan niya nga tinuga, mga anghel man ukon tawo. Makakomunikar sila sing personal sa iya, makasimba, kag makabaton sang iya pagpakamaayo. Sia nangin “tanan nga butang sa tanan.”

¹⁸ Ini nga paghiusa nadula sang ang mga tawo, nga naimpluwensiahan ni Satanas, nagrebelde sa pagkasoberano ni Jehova. Pero sugod sang 1914, ang Mesianikong Ginharian naghimo sing mga tikang para mapasag-uli ina nga paghiusa. (Efe. 1:9, 10) Sa tion sang Isa ka Libo ka Tuig nga Paggahom, maeksperiensiahan na naton ang makalilipay nga mga butang nga “indi [pa naton] makita” subong. Dayon magaabot “ang katapusan,” nga amo ang hingapusan sang Milenyo nga Paggahom ni Cristo. Ano dayon ang masunod nga matabo? Bisan pa ginhatag kay Jesus “ang bug-os nga awtoridad sa langit kag sa duta,” indi sia ambisyuso. Wala gid niya ginhandum ang posisyon ni Jehova. Mapainubuson niya nga “itugyan . . . ang ginharian sa iya Dios kag Amay.” Gamiton niya ang iya pinasahi nga posisyon kag awtoridad “sa himaya sang Dios.”—Mat. 28:18; Fil. 2:9-11.

19, 20. (a) Paano mapakita sang tanan nga sakop sang Ginharian kon bala ginabaton nila ang pagkasoberano ni Jehova? (b) Ano ang aton dalayawon nga paglaum?

¹⁹ Sina nga tion, ang mga sakop sa duta sang Ginharian ibalik sa kahimpitan. Ilugon nila ang halimbawa ni Jesus kag mapainubuson kag kinabubut-on nila nga kilalahon ang pagkasoberano ni Jehova. May kahigayunan sila nga ipakita ini kon malampuwasan nila ang katapusan nga pagtilaw. (Bug. 20:7-10) Dayon, ang tanan nga rebelde—mga tawo kag espiritu—laglagon sing dayon. Makalilipay gid ina nga tion! Ang bug-os uniberso nga pamilya malipayon nga magadayaw kay Jehova, nga mangin “tanan nga butang sa tanan.”—Basaha ang Salmo 99:1-3.

²⁰ Ang mahimayaon bala nga Ginharian sa palaabuton magapahulag sa imo nga isentro ang imo igtalupangod kag panikasog sa paghimo sang kabubut-on sang Dios? Malikawan mo bala nga mapatalang sang butig nga paglaum kag paumpaw nga ginatanyag sang kalibutan ni Satanas? Pabakuron mo bala ang imo determinasyon sa pagsuporta sa pagkasoberano ni Jehova? Kabay pa nga makita sa imo binuhatan nga amo sini ang imo luyag himuon sa walay katubtuban. Nian mangin pribilehiyo mo nga matigayon ang paghidait kag kahamungayaan sa isa ka libo ka tuig—kag sa walay katubtuban!