Kum Sângkhat Chhung Leh A Hnu Lama Remna Chû!
Kum Sângkhat Chhûng Leh A Hnu Lama Remna Chu!
“Pathian chu engkima engkim a nih theihna tûrin.”—1 KOR. 15:28.
KAN HRILHFIAH THEI EM?
Hêng Bible chângte thlen famkimna hian i tân eng awmzia nge a neih?
Mika 4:4
Isaia 11:6-9
1. Eng thil phûrawm tak nge “mipui tam tak” chuan an chen ang?
RORELTU dik leh khawngaihna ngah tak kaihhruai sawrkâr thil tithei takin kum sâng khat chhûnga a khua leh tuite tâna a tih tûr thil ṭha zawng zawng chu i mitthla thei em? Tûna khawvêl kal hmang suaksual titâwptu tûr “hrehawm nasa tak” ata dam khaw chhuak—“mipui tam tak” tuma chhiar sên lohte chuan thil ropui tak chen tûr an nei a ni.—Thup. 7:9, 14.
2. Kum 6,000 kal ta chhûng khân mihringte’n eng thilte nge an tawn?
2 Kum 6,000 kalta chhûng khân mihringte hian mahnia ro inrêl an lo tum tawh a. Chu chuan mihringte chungah natna leh hrehawm tawrhna nasa tak a thlen a ni. Kum tam tak kalta khân Bible chuan: “Mi, mi dang chungah pawi khawpin a intilal ṭhîn,” a lo ti a ni. (Thur. 8:9) Tûn laiah eng nge kan hmuh? Indona leh ram chhûng buainate bâkah, retheihna te, natna te, chhehvêl boruak chhiatna te, sik leh sa inthlâk thlengna nasa tak te, leh thil dang dangte avânga buaina nasa tak kan hmu bawk a ni. Sawrkâr hotute chuan inthlâkthlengna nasa tak kan neih loh va, leilung tihchhiatna kan tihtâwp loh chuan a rah chhuah chu a chhe ngawt ang tih an vaukhân a ni.
3. Kum Sâng Rorêlna chuan eng nge a rawn thlen ang?
3 Messia Lal, Isua Krista leh a rorêlpui mi 1,44,000-te rorêlna hnuaia Pathian Ram chuan mihringte leh an chênna Leilung chunga chhiatna zawng zawng siam ṭha tûrin zawi zawiin hma a la chho vang. Kum Sâng Rorêlna chuan Pathian Jehova thutiam duhawm tak: “Ngai teh u, vân tharte leh lei thar ka siam a nih hi; tûn hma thilte chu hriat rengin a awm tawh lo vang a, rilruah pawh a lût tawh hek lo vang,” tih hi a rawn thlen famkimtîr ang. (Is. 65:17) Tûna la hmuh theih loh, thil thleng tûr ropui tak engte’n nge min hmuak? Pathian hrilh lâwkna Thu ṭanpuinain, ‘thil la hmuh theih loh’ ropui takte chu hmuh thiam i lo tum ang u.—2 Kor. 4:18.
‘INTE AN SA ANG A, GREP HUANTE AN SIAM ANG’
4. In leh lo chungchânga tûn laia mi tam takte dinhmun hmachhawn chu eng nge ni?
4 Tuin nge chhûngte nêna him tak leh râlmuang taka awm theihna hmun, mahni in leh lo ngei neih chu duh lo vang? Mahse, tûn lai khawvêlah chuan chênna tûr in leh lo mamawh tâwk neih chu thil khirh tak a ni a. Mite chu khawpui chêp takahte an inhnawh hrâm hrâm a. Mi tam tak chu khawpui pâwna mi rethei awmnaah leh khawpui vêng ṭawp lai leh michhe vêngahte an khawsak a ngai a ni. An tân chuan mahnia in leh lo neih chu duhthusâm thil mai a ni.
5, 6. (a) Isaia 65:21 leh Mika 4:4 chuan thlen famkimna eng nge a neih ang? (b) Engtin nge chu malsâwmna chu kan dawn theih ang?
5 Lalram rorêlna hnuaiah chuan, mi zawng zawngin mahni in leh lo neih an châkna chu tihhlawhtlin a ni ang: “Inte an sa ang a, chûngah chuan an awm reng bawk ang; grêp huante an siam ang a, a rah an ei bawk ang,” tia Isaia kal tlanga hrilh lâwk a nih avângin. (Is. 65:21) Mahnia in leh lo neih chauh chu beisei tûr awmchhun a ni lo. Tihah chuan, tûn laia mi ṭhenkhat chu mahni in leh lo ngei neiin, a ṭhen phei chuan in ropui tak tak an nei hial a. Mahse, an inte chu sum leh pai tlâk chhiatna avângte, rûkrute rawk avângtea a chhiat an hlau tho a ni. Lalram rorêlna hnuaiah chuan thil awm dân chu a va danglam dâwn êm! Zâwlnei Mika chuan: “Mi tinte chu an grêp hrui hnuaiah leh an theipui kûng hnuaiah an ṭhu zâwk ang a; tuman an tihlau lo vang,” tiin a ziak a ni.—Mik. 4:4.
6 Chu thil beisei tûr ropui tak chu hre rengin eng nge kan tih ang? Kan vai hian in leh lo chu kan mamawh ngei mai. Mahse, tûna kan duhthusâm in leh lo neih tuma thawhrim a, sum tam tak bat phah hial ai chuan, Jehova thutiamte ngaihsak zâwk chu a finthlâk dâwn lâwm ni? Isua ngeiin ama chungchângah: “Sihalten kua an nei a, chunglêng savate pawhin bu an nei a, Mihring Fapa erawh hi chuan a lu nghahna a nei lo,” a tih hi hre chhuak leh ang che. (Lk. 9:58) Isua chu tuma neih phâk loh khawpa in ṭha sa a, lei thei reng a ni a. Engvângin nge chutianga a tih loh? Lalram a dah hmasakna dâl theitu leh tihnawktu engpawh pumpelh a duh vâng a ni tih a chiang hle a ni. A entawn tûr siam chu zuiin, hauhsak âtchilhnain a tihbuai loh leh a tihlungkham lohvin kan awm thei em?—Mt. 6:33, 34.
“CHINGHNIA LEH BERAM NO CHU AN TLA DUN TAWH ANG”
7. Mihringte leh thilnungte inlaichînna chungchânga atîra Jehova ruahmanna chu eng nge ni?
7 Jehova’n thilte a siam khân lei lama a thilsiamte zînga sâng ber, mihringte chu a siam hnuhnûng ber a. A mi themthiam, a Fapa piang hmasa ber hnênah Jehova chuan a thiltum tak chu heti hian a sawi a ni: “Kan anpuiin, keimahni ang takin mihring siam ila, anni chu tuifinriata sangha chungah te, chunglêng sava chungah te, ran chungah te, lei chung zawng zawngah te, rannung leia bawkvâka kal zawng zawng chungah te thu i neihtîr ang u,” tiin. (Gen. 1:26) Chutiang chuan, Adama leh Evi chu thilnungte chunga thu neihna pêk an ni a. A tâwpah chuan mi dang zawng zawngte pawh chutiang bawk thuneihna nei tûra duan an ni.
8. Tûn laia ramsate ze tlângpui chu eng nge?
8 Mihringte tân thilnung zawng zawng chunga thu neih leh anni nêna inrem taka awm chu thil theih a ni tak zet em? Mi tam tak chuan ui leh zawhte ang chi, an ran vulhte chu an ngaina hle a. Mahse, ramsate chungchâng chu eng nge ni ve thung? Report pakhat chuan: “Ramsa kawlh bula hun tam tak hmang a, an chanchin zir mi scientist-te chuan an fate hnute tuia châwm chi ramsa zawng zawngte chuan rilru vei zâwng an nei vek tih an hmu chhuak a ni,” tiin a sawi a. Ramsate chu tihhlauhva an awm huna an hlau hmêl emaw, an thinrim inhrosa hmêl emaw chu kan hmu ṭhîn ngei mai; mahse, rilru veizâwng pawh an lantîr thei bawk em? Report chuan heti hian a sawi zawm a ni: “Chûng an fate hnute tuia châwm chi ramsate’n an ze ropui ber—ngainatna nasa tak—an lan chhuahtîrna chu an fate an enkawlnaah hian a ni,” tiin.
9. Ramsate chungchângah, eng inthlâkthlengna nge kan beisei theih?
9 Chuvângin, Bible-ah mihringte leh ramsate inrem takin an awm dâwn tih kan chhiar hian mak kan ti tûr a ni lo. (Isaia 11:6-9; 65:25 chhiar rawh.) Engvângin nge? Tuilêt hnua Nova leh a chhûngte lawng aṭanga an rawn chhuah laia, Jehova’n an hnêna a sawi: “Nangmahni ṭihna leh hlauhna leia sa . . . tinrêngin an nei ang,” tih hi hre chhuak leh rawh. Chu chu ramsate mahni an inhumhin nân a ni a. (Gen. 9:2, 3) Jehova chuan atîra a ruahmanna a thlen famkim theih nân chûng ṭihna leh hlauhna an neih ṭhenkhat chu a tibo thei dâwn lo vem ni? (Hos. 2:18) Chutih huna leia nung tûra dam khaw chhuak zawng zawngte hun chen tûr chu a va hlimawm dâwn tak êm!
“MITTUI ZAWNG ZAWNG A HRUFAI ANG”
10. Engvângin nge mihringte hi an mittui a tlâk ṭhin?
10 Solomona chuan “ni hnuaia inhnehchhiatna zawng zawngte” a hmuh khân, “En teh, hnehchhiaha awmte mittui te chu, thlamuantu an nei lo ve,” tiin a rûm a. (Thur. 4:1) Tûn lai thil awm dân pawh hi a nasat zâwk loh vêk pawhin chutiang bawk chu a ni. Kan zînga tu hi nge chhan engemaw tak avânga mittui tla ngai lo awm? A châng chuan mittui tlâk chhan chu hlimna vâng ni mah se, a tlâk chhan tlângpui ber chu rilru mangan lutuk vâng a ni.
11. Bible thuziaka a eng berin nge i rilru khawih?
11 Bible-a rilru leh thinlung khawih tak chanchin kan chhiar tam takte chu hre chhuak leh rawh. Kum 127 mi nia, Sari a thih khân, “Abrahama chu Sari sûn tûr leh ṭah tûrin a lo kal a.” (Gen. 23:1, 2) Naomi’n a mo hmeithai pahnihte hnêna thlahna thu a sawi khân, “aw chhuah meuhvin an ṭap ta chiam mai a,” chu mi hnuah pawh “aw chhuahin an ṭap leh ta chiam mai” a ni. (Rut. 1:9, 14) Lal Hezekia chu thih ngama a nat khân, Pathian hnêna ṭawngṭaiin, “a ṭap ta zawih zawih a,” chu chuan Jehova rilru a khawih a ni ngei ang. (2 Lal. 20:1-5) Chu bâkah, tirhkoh Petera’n Isua a phatna chanchin pawh hian tu rilru nge a khawih loh vang? Ar khuang ri a hriatin, Petera chu “a chhuak a, a ṭap ta zawih zawih a.”—Mt. 26:75.
12. Engtin nge Lalram rorêlna chuan mihringte tâna chhâwk zângkhaina a thlen ang?
12 Kan chunga thilthleng lungchhiatthlâk—a tê leh a liante—avângin, mihringte hian thlamuanna leh chhâwk zângkhaina an mamawh hle a. Chu chu a ni Kum Sâng Rorêlnain a khua leh tuite hnêna a rawn thlen tûr chu: “[Pathian chuan] an mit ata mittui zawng zawng a hrufai ang a; thihna a awm leh thei tawh lo vang a, lungngaih te, ṭah te, nat te pawh a awm leh tawh hek lo vang.” (Thup. 21:4) Lungngaih te, ṭah te, leh nat te a awm tawh dâwn lo tih hriat chu a ropui hle a. Pathian thutiam zînga mihringte hmêlma hnuhnûng ber thihna tihbo a nih tûr thu a tel chu a ropui lehzual a ni. Chu chu engtin nge a lo thlen ang?
‘HRIATRENGNA THLANA AWM ZAWNG ZAWNG AN CHHUAK VEK ANG’
13. Adama sual hnu aṭang khân engtin nge thihna chuan mi zawng zawng a fan chhuah?
13 Adama’n thil sual a tih aṭang khân, thihna chuan mihringte chungah lal angin ro a rêl a. Chu chu hneh theih loh hmêlma a ni a, sualna nei mihringte tâwpna pumpelh theih loh, lungngaihna leh lusûnna nasa tak lo chhuahna a ni. (Rom 5:12, 14) Dik takin, mi maktaduai tam tak chu ‘thih hlauh vângin dam chhûngin bâwihah an awm a ni.’—Heb. 2:15.
14. Thihna a awm tawh loh hunah chuan eng nge thleng ang?
14 Bible chuan, “hmêlma hnuhnûng ber,” thihna ‘tihbova a awm’ hun tûr chu a sawi a. (1 Kor. 15:26) Chu mi hlâwkpuitu tûr chu pâwl hnih angin a sawi theih a. A pakhat zâwkah chuan, tûna la dam “mipui tam tak” te hian tâwp thei lo nun chên tûra thutiam khawvêl thara dam khawchhuah theihna an nei ang a. A pahnihnaah chuan, mitthi tawh tlûklehdingâwn têlte tân thawhlehna chan theih a ni ang. Chûng “mipui tam tak” te’n mitthi tholehte an lo hmuah huna a hlimawm dân tûr leh a phûrawm dân tûr chu i mitthla thei em? Bible-a chhinchhiah thawhlehna chanchin ngun taka chhiarna chuan nakina thawhlehna awm dân tûr hriatthiamna min pe thei a ni.—Marka 5:38-42; Luka 7:11-17 chhiar rawh.
15. Kan hmangaih thi tawhte an lo thawhleh huna i chhân lêt mai theih dân chu eng nge ni?
15 “Anni chuan mak tih namêmin mak an ti lo va,” tih leh “Pathian an fak a” tih thute hi han ngaihtuah teh. Chûng hun laia awm ve chu ni ta la, chutiang chuan i ti ve ngei ang. Kan hmangaih thi tawhte lo tholeh hmuhna chuan hlimna leh phûrna nasa tak min pe dâwn a ni. Isua chuan: “Hêng hi mak ti suh u, a hun a thleng dâwn ta, chutih hunah chuan thlâna awm zawng zawngin a aw an hria ang a, an chhuak vek ang,” tiin a sawi a ni. (Joh. 5:28, 29) Chutiang thil thleng chu tuman kan la hmu lo na a, tûna “thil hmuh theih lohte” zînga ropui ber pakhat a ni ngei dâwn a ni.
PATHIAN CHU “ENGKIMA ENGKIM” A NI ANG
16. (a) Engvângin nge malsâwmna la hmuh theih lohte chungchâng chu phûr taka kan sawi ang? (b) Korinth khuaa Kristiante fuih nân Paula’n eng thu nge a sawi?
16 Ni e, hêng hun khirh tak kâra Jehova laka rinawmte chu nakin hun ropui tak chuan a nghâk a ni! Malsâwmna ropui takte chu la hmuh theih rih loh mah se, chûng thilte rilrua vawn tlatna chuan thil pawimawh tak zette ngaihtuah tûr leh he khawvêl hîpnate lâk pêna awm lo tûrin min ṭanpui ang. (Lk. 21:34; 1 Tim. 6:17-19) Chhûngkuaa Pathian biakna kan neih lai te, Kristian unaute nêna kan inkawm lai te, Bible zirlaite leh a ngaihventute nêna kan sawiho laite chuan kan beiseina ropui tak chungchâng chu phûr takin i sawi ṭhîn ang u. Chu chuan kan beiseina chu kan ngaihtuahna leh thinlungah a tinung ang. Tirhkoh Paula pawhin a Kristian unaute a fuih khân chutiang chiah chuan a ti a. A thusawi chuan Krista Kum Sâng Rorêlna tâwpa thil thleng tûrte ngaihtuah thiam tûrin anni chu a ṭanpui a ni. 1 Korinth 15:24, 25, 28-a hmuh Paula thute pawimawhna chu hmuh thiam tum rawh.—Chhiar rawh.
17, 18. (a) Eng kawngin nge Jehova chu mihring bul inṭanna lamah khân “engkima engkim a nih?” (b) Inremna leh inlungrualna din thar leh tûrin Isua’n eng nge a tih ang?
17 Kum Sâng Rorêl zawha nun awm dân tûr hrilhfiah nân ‘Pathian chu engkima engkim a ni’ tih thu aia ṭha hi a awm thei lo. Chu mi awmzia chu eng nge ni? Eden huana mihring ṭha famkim Adama leh Evi chu lei leh vâna Jehova chhûngkaw inngeih leh lungrual tak zînga mi an nih lai kha han ngaihtuah lêt leh teh. Chutih lai chuan lei leh vâna Lalchungnungber Jehova ngei chuan a thilsiam zawng zawng vântirhkoh leh mihringte chungah ro a rêl a. Anni chuan a mi malin an be pawp thei a, chibai an bûk thei a, a malsâwmna an dawng thei a ni. Ani chu “engkima engkim” a ni.
18 Chu inlaichînna muanawm tak chu Setana thununna avânga Jehova lalchungnunna laka mihringte an hel khân tihbuaiin a awm a. Mahse, kum 1914 aṭang khân Messia Lalram chuan chu inremna leh inlungrualna din thar leh nân zawi zawiin hma a la chho a ni. (Eph. 1:9, 10) Kum Sâng Rorêl chhûng chuan thil ropui tak tûna kan la “hmuh theih lohte” chu a takah a chang ang a. Chutah, “a tâwp”—Krista Kum Sâng Rorêlna tâwp—chu a lo thleng ang. Chutih huna thil awm dân tûr chu eng nge ni ta ang? “Lei leh vâna thuneihna zawng zawng” pêk ni mah se, Isua chuan tum sân zêlna a nei lo va. Jehova dinhmun luah lan tumna a nei lo a ni. Inngaitlâwm takin, “Pa hnên ngeiah chuan ram chu a pe” zâwk ang a. A dinhmun leh thuneihna ropui tak chu “Pathian tihropuina tûrin” a hmang zâwk ang.—Mt. 28:18; Phil. 2:9-11.
19, 20. (a) Engtin nge Lalram khua leh tui zawng zawng chuan Jehova lalchungnunna an pawm leh pawm loh an târ lan ang? (b) Eng beiseina ropui takin nge min hmuak?
19 Chutih hunah chuan, lei lama Lalram awpna hnuaia awmte chu an ṭha famkim vek tawh ang a. Isua entawn tûr siam zuiin, inngaitlâwm tak leh châk tak chungin Jehova lalber nihna chu an pawm tawh ang. Chutianga Jehova lalna pawm an châkzia chu fiahna hnuhnûng ber hlawhtling tawrh chhuahna hmangin an lan tîr ang. (Thup. 20:7-10) Chu mi hnuah chuan, mihringte leh thlarau thilsiamte zînga hel hmang zawng zawngte chu chatuan atâna tihboral an ni tawh ang. Hun hlimawm leh lâwmawm a va ni dâwn êm! Lei leh vâna chhûngkaw pum chuan Jehova chu hlim takin an chawimawi ang a, ani chu “engkima engkim” a ni tawh ang.—Sâm 99:1-3 chhiar rawh.
20 Lalram ropuina a taka lo thleng mai tûrte chuan Pathian duhzâwng ringawt ngaihtuah a, thawkrim tûrin a chêttîr che ang em? Setana khawvêlin a pêk beiseina der leh thlamuanna derte hruai pêna awm chu i pumpelh thei em? Jehova lalchungnunna thlâwp leh chawisân i tum tlatna chu i tinghet ang em? Chutianga chatuana tih i duhzia chu i thiltihin târ lang rawh se. Chutichuan kum sâng khat mai ni lo, chatuan atâna remna leh hmuingîlna chen theihna chanvo i nei dawn nia! (w12-E 09/15)
[Zirlai Atâna Zawhnate]
[Phêk 16-naa milem]
Lal anga a chanvo a hlen chhuah hnuah, Isua chuan inngaitlâwm takin a Pa hnênah Lalram a pe ang
