1. ¿Toni tel kualtsin tein kiseliskej “uel miak tagayot”?

XIONTANEMILI itech nochi tein se tekiuajyot tein tel chikauak, kampa moajsi se tekiuaj akin yolmelauak uan teiknelijkej, ueliskia kinualkuiliskia itech mil xiuit nochin akin kinixyekana. Tein melauj, yejua nejin tel kualtsin tein kiseliskej “uel miak tagayot” akin momakixtiskej itech “ueyi tajyouilis”, ijkuak ixpoliuis nochi tein amo kuali tein mochiujtok (Apoc. 7:9, 14).

2. ¿Toni mochiuani itech nejin 6,000 xiujmej kampa taltikpakneminij taixyekananij?

² Itech nejin 6,000 xiujmej kampa taltikpakneminij moixyekananij, sayoj moitani tekokojkayot uan tajyouilis. Miak tonalmej achtook Biblia kijtoj: “Taltikpaknenkej kiixyekanani taltikpaknenkej uan ijkon kitajyouiltia” (Ecl. 8:9). Yekmelauj yejua nejon tein axkan tikitaj: neteuilis, taixnamikilis uan kuejmolmej tein tauejuelouaj, kemej tatasojtilis, kokolismej tein ijsiujka momoyauaj, uan no moijtakojtok taltikpak uan yejua ika mochiuaj miak tetsaujmej. Taixyekananij kijtouaj ke komo tiksentokaj titaijtakouaj okachi mouejuelos taltikpak.

3. ¿Toni mochiuas keman tekiuajtitos Cristo Mil Xiuit?

³ Keman taixyekantos iTekiuajyo Dios tein moajsi imako Cristo iniuan 144,000, kiyektalis tein kinijtakouani taltikpakneminij uan taltikpak kampa tichanchiuaj. Keman tekiuajtitos Cristo Mil Xiuit, mochiuas tein Jiova motenkauak: “Nikchijchiuati yankuik iluikak uan se yankuik taltikpak; uan tein achto onkaya amo moelnamikisok, nion yetosok itech nanmoyolo” (Is. 65:17). ¿Toni tein tel kualtsin mochiuas ijkuak? Maski axkan amo ueli tikitaj, tein achto moijtoj itech iTajtol Dios techpaleuia maj tikajsikamatikan “ten a[ya]mo tikitstinemij ika toixtololouan” (2 Cor. 4:18).

4. ¿Keniuj axkan chanchiuaj miakej?

⁴ Nochin kinekiskiaj kipiaskej se kali tein ininaxka, kampa nemiskej kemej kalyetouanij ika yolseuilis. Sayoj ke itech nejin tonalmej semi ouij kiajsiskej se kali kampa nemiskej. Itech uejueyi xolalmej nemij tel miakej taltikpakneminij, uan miakej nemij itech kalmej tein amo yekchijchiujtokej uan amo kipia nochi tein moneki. Yejuan sayoj kiitaj kemej se takochitalis kipiaskej se kali kemej moneki.

5, 6. 1) ¿Keniuj mochiuas tein kijtoua Isaías 65:21 uan Miqueas 4:4? 2) Komo tiknekij tikseliskej nejon tatiochiualismej, ¿toni moneki tikchiuaskej?

⁵ Keman iTekiuajyo Dios taixyekantos nikan taltikpak, nochin uelis kipiaskej se kali ijkon kemej kinekij, ta tanauatijkej Isaías kijtoj tein panos: “Yekmelauj kinchijchiuaskej kalmej uan ompa chanchiuaskej, yekmelauj kitokaskej uvajmekat uan kikuaskej takilot tein mochiuas” (Is. 65:21). Axkan miakej kipiajya se kali kampa chanchiuaj, sekin hasta kipiaj se ueyi kali. Maski ijkon, kimouiliaj kipoloskej ininchan porin amo ueli taxtauaj oso kimouiliaj maj oksekin moaxkatilikan oso porin uelis mochiuas okse taman tein tel amo kuali. Sayoj ke keman taixyekantos iTekiuajyo Dios amo onkasok nejon netekipacholmej, ta tanauatijkej Miqueas kijkuiloj: “Akin yeski motalis uvajmekatampa uan higuerajtampa uan amo akinok kinmojmoujtis” (Miq. 4:4).

⁶ ¿Toni moneki tikchiuaskej komo tiknekij tinemiskej keman taixyekantos iTekiuajyo Dios? Semi melauak ke tinochin tiknekij tikpiaskej se kali kampa tinemiskej. Sayoj ke moneki maj amo tikteltemokan tikpiaskej kali tein tiktelnekij, uan xa maski timoteltauikaltiskej, ta okachi kuali maj tiknextikan ika tonemilis ke amo tikelkauaj tein Jiova motenkaua techmakas. Keman Jesús kijtoj tein yejua kipanok, kinextij: “In kuektsitsin kipiaj nintechanti kampa kochij. Uan in tototsitsin ten patantinemij ejekaixko no kipia in tapajsoluan. Pero Nejuatsin [...] amo nikpia kan nimokuatekas” (Luc. 9:58). Jesús ueliskia kichijchiuas oso kikouas se kali tein tel kualtsin kemej amo akin kipiaya. ¿Keyej amo kichiuak? Porin amo kinekia maj nion se taman kitapololtiani oso maj kitsajtsakuiliani maj kitayekanalti iTekiuajyo Dios. ¿Uelis tikchiuaskej ijkon kemej Jesús uan amo tiksentiliskej tel miak taman itech tonemilis tein semi kiualkui netekipacholis? (Mat. 6:33, 34.)

7. ¿Keniuj tanauatijka Jiova maj mouikanij taltikpakneminij iuan tapialmej?

⁷ Keman Jiova tachijchiuak nikan taltikpak, ika matamik taltikpakneminij. ¿Toni kinekia maj kichiuakan? Jiova kijtoj tein kinekia keman kiiluij iTayekankakonetsin, akin katka Tekitikej akin Ixmach: “Maj tikchijchiuakan takat ijkon kemej tejuan titamatij, uan maj yejuan kinixyekanakan tapialmej tein nemij itech ueyiat, uan tein patanij ejekaixko, uan tapialmej tein taltikpaknenkej kiyekpia uan nochi taltikpak uan nochi tapial tein moolinia itech taltikpak” (Gén. 1:26). Kemaj, Dios kiixtalijka maj Adán uan Eva uan nochi okseki taltikpakneminij kinixyekananij tapialmej.

8. ¿Toni ueli kinextiaj tapialmej?

⁸ ¿Yekmelauj uelij taltikpakneminij kinixyekanaj nochi tapialmej uan yolseujkanemij iniuan? Miakej tel kuali mouikaj iniuan inintapialuan, kemej itskuimej, mistomej uan okseki tapialmej. Sayoj ke, ¿toni uelis tikijtoskej ika koujtajtapialmej? Keman kinitakej keniuj nemij tapialmej moijtoj: “Tamatinij tein tel yetonij iniuan tapialmej uan kinitanij tein kichiuaj, kiitakej ke nochi tapialmej tein moskaltiaj iijtik ininmomaj, kimachiliaj miak taman”. Tinochin tikinitanij  maj kinextikan ke momoujtiaj uan kualanij ijkuak kinekij kinijtakoskej, sayoj ke ¿uelij kinextiaj netasojtalis? Nejon tein kinitakej tapialmej, no kijtojkej: “Keman nejon tapialmej moskaltiaj, uelij kinextiaj ueyi netasojtalis”.

9. ¿Keniuj mopataskej tapialmej?

⁹ Amo moneki techouijmakas tikneltokaskej ke taltikpakneminij yolseujkanemiskej iniuan tapialmej ijkon kemej Biblia motenkaua (xikonixtajtolti Isaías 11:6-9 uan 65:25). ¿Keyej? Maj tikelnamikikan keman Jiova kiniluij Noé uan ichankauan ijkuak kiskej itech arca: “Uan kisentokas namechcholuiskej uan namechtelmouiliskej nochi tapialmej tein yoltokej itech taltikpak”. Axkan, tapialmej kinmouiliaj taltikpakneminij porin ijkon yejuan mopaleuiaj (Gén. 9:2, 3). Sayoj ke Jiova uelis tepitsin oso senkis kinajchiuilis moujkayot uan ijkon mochiuas kemej Jiova yekinika kinekia (Os. 2:18). ¡Semi kinyolpaktis nejon akin nemiskej nikan taltikpak!

10. ¿Toni okachi kichiua maj tichokakan?

¹⁰ Keman Salomón kiitak “nochi tajyouilis tein [mochiujtoya] kampa tauia tonal”, kitayokolijtoj: “¡Xikita!, ininixayo akin kinteltajyouiltiayaj uan amo akin kinyolseuiaya” (Ecl. 4:1). Axkan no ijkon mochiujtok oso okachi amo kuali tein mochiujtok. ¿Melauj ke tinochin tichokanij porin teisa techtajyouiltia? Maski kemansa tichokaj porin tiyolpakij, okachi tichokaj porin tiyoltajyouiaj.

11. ¿Katiyejua tajkuilol tein kipia Biblia okachi kichiua xionmomachili kemej yejuan?

¹¹ Maj titanemilikan itech seki tajkuilolmej tein kipia Biblia kampa ika tajtoua taltikpakneminij tein chokakej. Kemej neskayot, keman Sara momikilij ijkuak kipiaya 127 xiujmej, “Abrahán kalakito kampa moajsia Sara uan peuak kitelchokilia” (Gén. 23:1, 2). Keman Noemí monauatij iniuan omen isiuamouan akin amo nemiajok inintakauj, ojpa “peujkej chokaj chikauak” (Rut 1:9, 14). Keman tekiuaj Ezequías kokolispeuak uan kimatia ke momikiliskia, kitataujtij Dios uan “peuak tel choka”, uan moita ke Jiova kiiknelij (2 Rey. 20:1-5). ¿Uan melauj ke no ijkon timomachiliaj keman titanemiliaj itech Pedro, satepan ke kijtoj ke amo kiixmatia Jesús uan tsajtsik pio uan peuak “semi mochojchoktia”? (Mat. 26:75.)

12. ¿Toni kinualkuilis taltikpakneminij iTekiuajyo Cristo tein uejkauas Mil Xiuit?

¹² Tinochin tikpanouanij miak taman tein tetayokoltij, yejua ika tiktelnekij maj aksa techkixtili tajyouilis uan maj techyolseui. Yejua nejon kinualkuilis iTekiuajyo Cristo tein uejkauas Mil Xiuit akin kinixyekanas, ta ijkon motenkaua Biblia: “Totajtsin kinelkaualtis de ninchokilisuan [...]. Uan amo aken momikilis ok; uan amo aken mochoktis ok; uan amo aken motekipachos ok; uan amo aken yoltajyouis ok” (Apoc. 21:4). Semi techyolpaktia tikmatiskej ke amo onkasok tayokol, chokalis uan tekokojkayot. Sayoj ke Dios no motenkaua ke kitamis mikilis tein tamati kemej se aksa tein okachi kintauelita taltikpakneminij. ¿Keniuj kichiuas?

13. ¿Keniuj techtajyouiltiani mikilis satepan ke Adán tajtakoj?

¹³ Keman Adán tajtakoj, mikilis peuak kemej yeskia kinixyekana taltikpakneminij tajtakouanij, kemej se aksa tetauelitakej tel chikauak tein amo akin ueli kicholuia, uan kiualkui ueyi tayokol uan tekokojkayot (Rom. 5:12, 14). Uelis tikijtoskej ke tel miakej taltikpakneminij ‘moukakalaktokej de ke se tonal momikilitiuej’, yejua ika kemej yeskia moajsij imako mikilis (Heb. 2:15).

14. ¿Toni panos ijkuak mikilis “amo teyi chikaualis kipia[s] ok”?

¹⁴ Biblia motenkaua ke “Yejuatsin  kitamitanilis ya in mikilis uan amo teyi chikaualis kipia[s] ok” (1 Cor. 15:26). Nejin kinpaleuis ome oloch taltikpakneminij. Yekinika, “uel miak tagayot” tein axkan nemij uelis makisaskej uan nemiskej itech taltikpak keman motayektalis uan amo keman momikiliskej. Ojpatika, tel miakej tein momikilijkejya oksepa uelis nemiskej. Xionmonemili ueyi yolpakilis tein kipiaskej “uel miak tagayot” keman kinseliskej akin moajokuiskej. Maj tikixtajtoltikan ika nejmachkayot tajkuilolmej tein kipia Biblia kampa ika tajtoua neajokuilis, uan ijkon tikajsikamatiskej keniuj yeski (xikonixtajtolti Marcos 5:38-42 uan Lucas 7:11-17).

15. ¿Keniuj tionmomachilis keman moajokuiskej akin tikontasojta?

¹⁵ Maj itech titanemilikan tajtolmej tein tikixtajtoltijkej, “tel senka yolpakkej, [TNM]” uan “peuke kimouistiliayaj Totajtsin Dios”. Komo ompa tiyetoskiaj keman nejon omen akin momikilijkaj oksepa nenkej, senkis tikmatij ke no titelyolpakiskiaj. Uan no tikmatij ke semi techyolpaktis keman tikinitaskej ke moajokuij akin tikintasojtaj. Jesús kijtoj: “Ejkos ok in tonal keman nochi in [...] [mikemej] nechkakiliske notajtolis [...] [uan] ual kisaske” (Juan 5:28, 29). Maski neajokuilis yejua semej “ten [axkan] a[ya]mo tikitstinemij ika toixtololouan”, senkis tikneltokaj ke yeski se taman tein okachi techyolpaktis.

16. 1) ¿Keyej ika ueyi yolpakilis moneki ika titajtoskej “ten a[ya]mo tikitstinemij ika toixtololouan”? 2) ¿Keniuj kinyolchikauak Pablo itatojtokakauan Cristo tein nemiaj Corinto?

¹⁶ Akin amo keman kikauaskej Jiova itech nejin tonalmej tein semi ouijkej, kiseliskej uejueyi tatiochiualismej. Maski nejon ayamo tikitaj, komo nochipa tikelnamiktokej, techpaleuis maj tikixtalikan tiktayekanaltiskej tein yekmelauj motelneki uan amo tikauaskej maj techtapololti tein onkak nikan taltikpak (Luc. 21:34; 1 Tim. 6:17-19). Ika ueyi yolpakilis  maj ika titajtokan tonechialis keman timomachtiskej uan tikueyichiuaskej Jiova kemej kalyetouanij, keman titajtoskej iniuan tokniuan uan keman titamachtiskej ika Biblia oso keman tikteixmatiltiskej iTajtol Dios. Nejin techpaleuis maj tikitakan ke yekmelauj mochiuas. Ijkon tatitanil Pablo kinyolchikauak iikniuan tein kichiuayaj kemej Cristo. Ika itajtoluan kinpaleuij maj tanemilikan itech nochi tein mochiuas keman tamisya iTekiuajyo Cristo tein uejkauas Mil Xiuit. Maj itech titanemilikan toni kijtosneki tein kijkuiloj Pablo itech 1 Corintios 15:24, 25, 28 (xikonixtajtolti).

17, 18. 1) ¿Toni kijtosneki keman moijtoua ke ne achtopayan “Yejuatsin [tayekantinemia] ipan nochi ten ongak”? 2) ¿Toni kichiuas Jesús tein tapaleuis maj oksepa nochi mosentili uan maj yolseujkayetokan?

¹⁷ Pablo tel kuali kinextij keniuj yeski keman tamis mil xiuit ijkuak kijtoj ke “Yejuatsin tayekantinemis ipan nochi ten ongak”. ¿Toni kijtosneki nejon tajtolmej? Achto ke Adán uan Eva tajtakoskiaj, poujtoyaj iniuan ichankauan Dios tein moajsi iluikak uan taltikpak, uan senyetoyaj uan yolseujkanemiaj iniuan. Jiova akin okachi Ueyi Taixyekankej, kiixyekanaya nochi tein kichijchiuak, kemej ángeles uan taltikpakneminij. Yejuan ueliaj kiueyichiuayaj uan monojnotsayaj iuan, uan yejuatsin kintatiochiuiaya. Kemej tikitaj, “Yejuatsin [tayekantinemia] ipan nochi ten ongak”.

¹⁸ Nejon kuali uikalis mouejueloj keman taltikpakneminij kitajtolkakkej Satanás uan kiixnamikkej iueyitaixyekanalis Jiova. Sayoj ke itech xiuit 1914, iTekiuajyo Cristo peuak kichiua tein tapaleuis maj oksepa nochi mosentili uan maj yolseujkayetokan (Efes. 1:9, 10). Itech iTekiuajyo Cristo tein uejkauas Mil Xiuit, mochiuas tel miak taman tein kualtsin tein “a[ya]mo tikitstinemij ika toixtololouan”. Satepan, ejkos tamilis, tein kijtosneki itamilis iTekiuajyo Cristo tein uejkauas Mil Xiuit. ¿Toni mochiuas satepan? Maski Jesús kimaktilijkej “nochi in tanauatil tech in eluiyaktsinko uan nikan taltikpak”, yejua nion tepitsin kinemilia kitakuilis Jiova porin amo kikui tein amo iaxka. Ta ika yolyemanilis Cristo “kimaktilis Totajtsin Dios nochi iuelilis” uan kikuis itanauatil uan ika tapaleuis maj ‘kiueyikualnextikan Totajtsin Dios’, ta no mokauas maj kiixyekana uan kiueyichiuas (Mat. 28:18; Filip. 2:9-11).

19, 20. 1) ¿Keniuj akin kinixyekana iTekiuajyo Dios kinextiskej ke kiseliaj iueyitaixyekanalis Jiova? 2) ¿Toni ueyi tatiochiualis tikseliskej?

¹⁹ Ijkuak panos nejon, taltikpakneminij tein kinixyekantos iTekiuajyo Dios amo kipiaskejok tajtakol. Yejuan no kichiuaskej kemej Jesús uan, ika miak pakilis uan ika yolyemanilis, kiseliskej iueyitaixyekanalis Jiova. Monekis panoskej itech tayejyekolis tein ika tamis, uan ijkon kinextiskej ke kinekij maj Jiova kinixyekana (Apoc. 20:7-10). Satepan, akin taixnamikiskej, yeski taltikpakneminij oso ángeles, senkis ixpoliuiskej. ¡Semi ueyi yolpakilis onkas! Nochin ichankauan akin moajsij iluikak uan taltikpak, ika yolpakilis kisenueyichiuaskej Jiova akin “tayekantinemis ipan nochi ten ongak” (xikonixtajtolti Salmo 99:1-3).

²⁰ ¿Toni mitsonolinis xikonchiua axkan ke timomachtijkejya uejueyi tatiochiualismej tein iTekiuajyo Dios kiualkuis amo uejkaua? ¿Tikonixtalis uan tikonchiuas ika nochi moyolo itanejnekilis Dios? ¿Amo tionmokauas maj mitsonkajkayaua tein kijtoua kiualkuis taltikpak tein kiixyekana Satanás uan kuali nemilis tein kitemaka? ¿Senkis tikonixtalis tikonpaleuis iueyitaixyekanalis Jiova? Komo ijkon, ika motachiualis xikonnexti ke tikonneki tikonchiuas nejon nochipaya. Nejon mitsonpaleuis xikonpia tatiochiualis tikonselis yolseuilis uan yekyetolis, amo sayoj mil xiuit, ta ¡nochipaya!