1. Ko e heigoa e amaamanakiaga fiafia ne tatali ke he “moto tagata tokologa”?

 MAEKE nakai a koe ke manamanatu ke he tau mena mitaki oti ka taute he fakatufono i lalo he pule tututonu mo e fakaalofa noa ka taute ma e tau tagata haana he taha e afe tau? Ko e tau mena tutupu homo ue atu kua tatali ke he “moto tagata tokologa” nakai maeke ke totou—ko lautolu kua hao he “matematekelea lahi,” ka tamai e fakaotiaga katoatoa ke he fakatokaaga kelea nei.—Fakakite. 7:9, 14.

2. Ko e heigoa he tau tagata ne moua he 6,000 tau kua mole?

² He 6,000 tau he fakamauaga tuai he tagata, ko e fifiliaga fakatagata mo e pule fakatagata kua tamai e tau lekua loga he mamahi mo e matematekelea ke he tau tagata. Ne leva tuai e talahau he Tohi Tapu: “Kua pule ai e taha tagata ke he taha, ke kelea ai e ia ni.” (Fakama. 8:9) Ko e heigoa kua kitia e tautolu he vahā nei? Kehe mai he tau felakutaki mo e tau totokoaga, ha ha i ai e tau lekua kelea lahi mahaki he mativa, gagao, moumou e takatakaiaga, hiki e matagi, mo e loga atu foki. Ko e tau tagata gahua fakatufono ne hataki ka nakai hiki e aga pisinisi ha tautolu tuga fa mahani, to hagahaga kelea e fakahikuaga.

3. Ko e heigoa he Pule Afe Tau ka tamai?

³ I lalo he Patuiki faka-Mesia ko Iesu Keriso mo e haana tau ekegahua 144,000, to taute he Kautu he Atua e tau lakaaga holo ki mua ke vetevete e tau hagahaga kelea oti ne taute ke he tau tagata mo e ha lautolu a tau kaina, ko e Lalolagi palaneta. Ko e Pule Afe Tau to tamai e fakamooliaga he maveheaga loto mafanatia ha Iehova ko e Atua: “Kua eke e au e lagi fou mo e lalolagi fou; nakai tuai manatu ke he tau mena fakamua, ti nakai hake ai ke he loto e tau mena ia.” (Isaia 65:17) Ko e heigoa e tau mena tutupu homo ue atu ne nakaila kitia hane tatali atu a tautolu? Ko e lagomatai he Kupu fakaperofeta  he Atua, kia mailoga e tautolu e tau mena ofoofogia “nakai kitia” ka tutupu.—2 Kori. 4:18.

4. Ko e heigoa e tau tuaga he tau nonofoaga ne fehagai mo e tokologa he vahā nei?

⁴ Ko hai ne nakai manako ke he kaina ni haana, ko e matakavi kua logona e ia mo e haana magafaoa e puipui mo e haohao mitaki? He lalolagi he vahā nei, kua lekua lahi mahaki e tau nonofoaga hagahaga mitaki. Kua nonofo putuputui e tau tagata he tau taone. Tokologa ne maeke ke hiki e tau nonofoaga he tau taone mativa mo e tau fale nofogati. He moua e tau fale ha lautolu kua tuga ni e miti ki a lautolu.

5, 6. (a) Ko e heigoa e fakamooliaga ha Isaia 65:21 mo Mika 4:4? (e) Maeke fēfē a tautolu ke moua e monuina ia?

⁵ I lalo he pule he Kautu, ko e manako he tau tagata takitaha ke moua e kaina ni haana ka fakamooli, ha kua perofeta ai puhala ia Isaia: “To ta fale e lautolu, mo e nonofo ai a lautolu; to to e lautolu e tau ulu vine, mo e kai ai e lautolu ha lautolu a tau fua.” (Isaia 65:21) Ka e moua e kaina ha lautolu kua nakai ni ko e amaamanakiaga a ia. Mole ia, falu he vahā nei ne nonofo ni he tau kaina ha lautolu, tokogahoa ne fai kaina lalahi po ke monuina. Ka e tupetupe tumau agaia neke galo e kaina ha ko e tau tuaga uka fakatupe po ke tau tagata kaihā—po ke mua atu e kelea—ka huhū pulenoa atu ki ai. To kehe mooli e tau mena oti kana i lalo he pule he Kautu! Ko e perofeta ko Mika ne tohi: “To takitokotaha a lautolu mo e nofo i lalo hana vine, mo lalo foki he hana mati; to nakai ha i ai foki taha ke fakamatakutaku ki ai.”—Mika. 4:4.

⁶ He tokaloto e amaamanakiaga homo ue atu ia, ko e heigoa ha tautolu ka taute? Mooli, kua lata ia tautolu oti ke fai kaina mitaki. Ka e, he nakai tutuli ke moua e fale ia ne miti ki ai mogonei—liga mamafa e kaitalofa ke taute pihia—nakai kia pulotu ke hagaaki a tautolu ke he maveheaga a Iehova? Manatu e mena ne talahau e Iesu hagaao ki a ia: “Na fai ofaga e tau alope, ti fai mena foki ke momohe ai e tau manu lele; ka ko e Tama he tagata nakai fai mena a ia ke mohe ai.” (Luka 9:58) Ha ha ia Iesu e lotomatala mo e malolō ke tā po ke moua e fale mitaki lahi mahaki ka maeke he ha tagata. Ka ko e ha ne nakai taute pihia e ia? Maaliali ai, ne manako a Iesu ke kalo mai he ha fakatauhele mo e kātia ai he taofi a ia mai he tuku fakamua e Kautu. Maeke nakai a tautolu ke muitua ke he fifitakiaga haana mo e tumau ke fakamukamuka e tau mata ha tautolu—atāina mai he vihi he velevelekoloa mo e fakaatukehe?—Mata. 6:33, 34.

7. Ko e heigoa e fakafetuiaga he tau tagata mo e tau manu ne poaki fakamua e Iehova?

⁷ He tufugatiaaga, ne tufuga fakahiku e Iehova e tau tagata, ko e tapunu he tau gahua haana he lalolagi. Ke he haana Iki Gahua ko e Tama uluaki haana, ne talahau e Iehova e finagalo pauaki haana: “Kia eke e tau[a] e tagata ke he ha tau[a] a fakatai, ke tuga a tau[a]; kia pule foki a lau[a] ke he tau ika he tahi, mo e tau manu lele he pulagi, mo e tau manu huifa, mo e kelekele oti kana, katoa mo e tau mena totolo oti kua totolo ke he kelekele.” (Kene. 1:26) Ko Atamu mo Eva, ti fakahiku ke he tau tagata oti kana, ne poaki ke leveki e tau tufugatiaaga he tau manu.

8. Ko e heigoa e mahani he manu kua aga mau he vahā nei?

⁸ Maeke mooli kia ma e tau tagata ke taute e tau manu oti ke omaoma mo e nonofo fakafeheleaki mo lautolu? Tokologa e tau tagata ne tata lahi ke he tau manu fao ha lautolu, tuga e tau kulī mo e tau pusi. Ka e kua e tau manu vao? Taha e hokotaki ne pehē: “Ko e tau saienetisi ne nonofo tata  mo e tau manu vale mo e kumikumi ki a lautolu ne moua kua fai logonaaga e tau manu totolo oti.” Mooli, kua kitia e tautolu e tau manu ne hopoate po ke vale ka kunuene ki ai, ka e maeke nakai a lautolu ke fakamaama e tau logonaaga hofihofi ha lautolu? Matutaki e hokotaki: “Ko e feaki he tau punua ha lautolu ne fakakite he tau manu e tau mahani mua ue atu ha lautolu—ko e lahi mahaki he ha lautolu a fakaalofa mafanatia.”

9. Hagaao ke he tau manu, ko e heigoa e tau hikiaga ka amanaki a tautolu ki ai?

⁹ Ti nakai lata ia tautolu ke ofo ka totou a tautolu ke he Tohi Tapu to kautū e mafola ke he vahāloto he tau tagata mo e tau manu. (Totou Isaia 11:6-9; 65:25.) Nakai pihia he ha? Manatu he mogo ne liliu mai a Noa mo e magafaoa haana ki fafo he vaka he mole e Fakapukeaga, ne tala age a Iehova ki a lautolu: “Kia matakutakuina a mutolu mo e hopo ate kia mutolu e tau manu huifa oti he lalolagi.” Ko e fakamouiaga a ia ma e tau manu. (Kene. 9:2, 3) Nakai kia maeke a Iehova ke utakehe e matakutaku mo e hopoate ia, ke maeke he poakiaga fakamua haana ke fakamooli? (Hosea 2:18) Ko e magaaho fiafia mooli ma lautolu oti ka hao ke nonofo ke he lalolagi he mogoia!

10. Ko e ha e tau hihina mata ko e aga mau he tau tagata?

¹⁰ He kitia e Solomona e “tau mahani favale oti kua eke i lalo he lā,” ne tauui atu a ia: “Kitiala foki e tau hihina mata ha lautolu ne pehia he favale, kua nakai ha ha i ai taha foki ke fakamafana a lautolu.” (Fakama. 4:1) Tatai po ke muaatu e kelea he tau mena he vahā nei. Ko hai ia tautolu kua nakai tagi ha ko e tau kakano kehekehe? Mooli, he falu mogo ne liga ko e tau hihina mata he fiafia. Ka ko e tau hihina mata kua fakakite e mamahi lahi he loto.

11. Ko e heigoa e tala pauaki he Tohi Tapu kua lauia e loto haau?

¹¹ Manatu e tau tala aamotia mo e mafanatia ne totou e tautolu he Tohi Tapu. He mate a Sara he 127 e tau, “ne fina atu foki a Aperahamo ke tagi tatuki ha ko Sara, mo e tagi kia ia.” (Kene. 23:1, 2) He mavehe a Naumi ke he tau figona takape haana, ne “tagi fakaleolahi ai a lautolu. Ti tagi tautau fakaleolahi foki a lautolu.” (Ruta 1:9, 14) He matematekelea e Patuiki ko Hesekia he gagao mo e mate fakaofo, ne liogi a ia ke he Atua mo e “tagi lahi ai,” ati lauia mooli a Iehova. (2 Patu. 20:1-5) Ti ko hai ne nakai omoomoi he tala ke he aposetolo ko Peteru ne fakatikai a Iesu? He logona e moa ne kō, “ti hu atu a [Peteru] ki fafo, kua tagi lahi.”—Mata. 26:75.

12. To tamai fēfē he pule he Kautu e fakatotoka mooli ke he tau tagata?

¹² Ha ko e tau mena tutupu matakutakuina—ikiiki mo e lalahi—ne hoko ki a tautolu, ko e tau tagata kua manako lahi ke he fakamafanaaga mo e fakatotokaaga. Ko e mena haia he Pule Afe Tau ka tamai ke he tau tagata haana: “To holoholo kehe he Atua e tau hihina mata oti mai he tau mata ha lautolu; ti nakai tuai fai mate, po ke fakatutuku, po ke tagi, ti nakai tuai fai matematekelea.” (Fakakite. 21:4) Homo ue atu mooli he nakai fai fakatutuku, tagi, mo e mamahi, ko e maveheaga he Atua kua putoia foki e utakehe he fī mua ue atu he tagata—ko e mate. To tupu fēfē e mena ia?

13. Lauia fēfē e tau tagata he mate tali mai he agahala ha Atamu?

¹³ Tali mai he agahala a Atamu, ne pule e mate ko e patuiki ki luga he tau tagata. Kua eke ai mo fī mua ue atu, ne nakai maeke ke atāina mai he tau tagata agahala, ko e punaaga momoko mo e maanu lahi mahaki. (Roma 5:12, 14) He “matakutaku ke he mate,” totou miliona a “lautolu oti kua fakatupatupa  . . . ke he mouiaga katoa ha lautolu.”—Hepe. 2:15.

14. Ko e heigoa e fua ka utakehe e mate?

¹⁴ Kua tuhi e Tohi Tapu ke he magaaho “ko e fi fakamui ke fakaotioti ai ko e mate haia.” (1 Kori. 15:26) Ua e vahega kua maeke ke totoku ka aoga mai he mena ia. Ma e “moto tagata tokologa,” kua momoui mogonei, ka maeke ke momoui ke he lalolagi foou ne mavehe to nakai fai fakaotiaga e moui. Ma e tau piliona ne fitā e hamutia he mate, to ha ha i ai e liu tu mai. Maeke nakai a koe ke manamanatu ke he olioli mo e fiafia ka fakafeleveia e lautolu he matakau fakamua a lautolu ka liliu tutū mai? Ko e onoonoaga tata ke he falu tala he liu tu mai he Tohi Tapu ka foaki ki a tautolu e kitiaaga fakamua he mena ka liga ke tupu.—Totou  Mareko 5:38-42; Luka 7:11-17.

15. Liga to tali atu fēfē a koe ke kitia e fakahele kua liuaki mai ke he moui?

¹⁵ Manamanatu ke he talahauaga “ti hohopo ai ha lautolu a tau ate” ti “fakaheke ai a lautolu ke he Atua.” Ka haia a koe i ai he tau magaaho pehenā, liga to logona pihia foki a koe. Mooli, he kitia e tau fakahele ha tautolu ne mamate ka liliu tutū mai puhala he liu tu mai to tupu i loto ha tautolu e logonaaga fiafia mo e malagaki e logonaaga homo ue atu. Pehē a Iesu: “Ko e mena hoko ke he aho ke logona ai ke he hana leo a lautolu katoa ha he tau tukuaga [“fakamanatu,” NW], mo e o mai ai.” (Ioane 5:28) Nakai fai ia tautolu kua kitia e mena pihia kua tupu; to mooli ai ke eke mo taha he “tau mena nakai kitia.”

16. (a) Kua lata he ha a tautolu ke tutala hakahakau hagaao ke he tau monuina ne nakaila kitia? (e) Ko e heigoa ne talahau e Paulo ke fakamalolō e tau Kerisiano i Korinito?

¹⁶ E, ko e vahā mua ue atu anoiha kua tatali ki a lautolu kua fakakite e fakamooli ki a Iehova he tau mogo uka nei! Pete ne nakaila kitia e tau monuina  mua ue atu, ko e tokaloto tumau ai ka lagomatai a tautolu ke hagaaki mau ke he tau mena kua aoga mooli mo e ke kalo kehe he fakatauhele he tau mena futiaki mole vave he fakatokaaga nei. (Luka 21:34; 1 Timo. 6:17-19) He fakaako mo e tapuaki fakamagafaoa, he tau fakatutalaaga mo e tau matakainaga fakaagaaga, mo e tau tutalaaga mo e tau tagata fakaako Tohi Tapu mo lautolu ne fiafia, kia tutala hakahakau a tautolu hagaao ke he amaamanakiaga mo e tau fakatokaaga mua ue atu ha tautolu. To lagomatai he mena nei a tautolu ke mauokafua tumau he tau manamanatuaga mo e tau loto ha tautolu. Taute he aposetolo ko Paulo e mena ia he fakamalolō e tau matakainaga Kerisiano haana. Ne uta e ia a lautolu ke hoko ke he fakaotiaga he Pule Afe Tau he Keriso. Lali ke manamanatu ke he aoga katoatoa he tau kupu ha Paulo ne moua ia 1 Korinito 15:24, 25, 28.—Totou. 

17, 18. (a) He puhala fe ha Iehova kua eke mo “tau mena oti kana ke he tau tagata” he kamataaga he fakamauaga tuai he tagata? (e) Ko e heigoa ha Iesu ka taute ke liuaki mai e kaufakalataha mo e lagotatai?

¹⁷ Nakai fai talahauaga mitaki foki ke mua atu ke he tau kupu ko e “Atua ke he tau mena oti kana ke he tau tagata.” Ko e heigoa e kakano he mena ia? Liu manamanatu ke he magaaho i Etena ko e tau tagata mitaki katoatoa ko Atamu mo Eva, ko e vala he magafaoa he lagi mo e lalolagi katoatoa ha Iehova ne mafola mo e lagotatai auloa. Ko Iehova ko e Pule he Lagi mo e Lalolagi Katoatoa, ne pule fakahako ke he tau tufugatiaaga oti kana haana he tau agelu mo e tau tagata. Kua maeke a lautolu ke matutaki fakatagata mo ia, tapuaki a ia, mo e fakamonuina e ia. Kua eke a ia mo “tau mena oti kana ke he tau tagata.”

¹⁸ Ko e fakafetuiaga lagotatai auloa ia ne fakatauhele he fakaohooho e Satani e tau tagata, ti totoko ke he pule katoatoa a Iehova. Ka e tali mai he 1914, ko e Pule faka-Mesia ne holo ki mua e tau lakaaga ke liuaki mai e fakalataha mo e lagotatai ia. (Efeso 1:9, 10) He Pule Afe Tau, ko e tau mena mua ue atu mogonei ne “nakai kitia” to fakamooli ai. Ti hoko mai e “fakahikuaga,” ko e otiaga he Pule Meleniamu he Keriso. Ko e heigoa ka tupu mogoia? Pete he age ki a Iesu e “pule oti kana ke he lagi mo e lalolagi,” kua nakai foli tuaga a ia. Nakai fai foliaga a ia ke fofō e tuaga ha Iehova. Kua fakatokolalo a ia he “tuku atu . . . e kautu ke he Atua, ko e Matua.” To fakaaoga e ia e tuaga uho mo e pule haana ke “fakaheke ke he Atua.”—Mata. 28:18; Filipi 2:9-11.

19, 20. (a) To fakakite fēfē he tau tagata he Kautu kua talia e lautolu e pule katoatoa a Iehova? (e) Ko e heigoa e amaamanakiaga homo ue atu kua tatali ki a tautolu?

¹⁹ He mogoia, ko e tau tagata he lalolagi he Kautu to liuaki mai ke he mitaki katoatoa. To muitua a lautolu ke he fifitakiaga ha Iesu mo e talahau fakatokolalo mo e fakamakai e pule katoatoa ha Iehova. Kua moua e lautolu e magaaho ke fakakite e manako ha lautolu ke taute e mena ia he kautū ke he kamatamata fakahiku. (Fakakite. 20:7-10) Mole ia, ko lautolu oti ne totoko—tau tagata mo e agaaga—to fakamahaikava tukulagi. Ko e magaaho fiafia mo e olioli a ia! Ko e magafaoa he lagi mo e lalolagi katoatoa to fakaheke fiafia ki a Iehova, ka eke mo “tau mena oti kana ke he tau tagata.”—Totou  Salamo 99:1-3.

²⁰ Ko e tau mena mooli mua ue atu he Kautu kia i mua kua fakaohooho a koe ke hagaaki e onoonoaga mo e tau laliaga haau ke taute e finagalo he Atua? Maeke nakai a koe ke kalo kehe he fakatauhele he amaamanakiaga mo e fakamafana fakavai ne foaki he lalolagi ha Satani? To fakamalolō nakai e koe e fifiliaga haau ke lalago mo e fakatokoluga e pule katoatoa a Iehova? Kia fakamooli he tau gahua haau kua manako a koe ke taute ai tukulagi. Ti eke mo lilifu haau ke fiafia e mafola mo e monuina ke he taha e afe tau—mo e anoiha!