Bem Una Lu Gbem, Hii Shighe U Anyom Dubu La!
Bem Una Lu Gbem, Hii Shighe U Anyom Dubu La!
“Aôndo Una hoghom cii ken hanma or cii.”—1 KOR. 15:28.
Ú FATYÔ U PASEN KPA?
Shighe u avur a Bibilo ne aa kure la, a lu u nena?
Mika 4:4
Yesaia 11:6-9
1. Ka nyi i dedoo i lu keghen “zegeikpelaior”?
TÔÔ ase wer gomoti u ageegh, u lun a tor u mimi man u mhôôn ngu, u una va er akaa a dedoo sha ci u mba a lu hemen ve la, ken atô u anyom dubu. Man ior mba gomoti ne a lu hemen ve la ka “zegeikpelaior,” i ia va war “zegecan” la. Imba kwagh u doon tsung ne ngu keghen ve ken hemen. “Zegecan” la una va tim tar u ifer ne gburu gburu.—Mpa. 7:9, 14.
2. Ka nyi uumace ve tagher a mi ken anyom 6,000 a a kar nee?
2 Uumace hemen ayol a ve ken atô u anyom 6,000 a a kar ne. Kpa kwagh ne gema va uumace a ican i yan kpishi. Bibilo ôr kwagh ne tsuaa je, ér: “Shighe u or ka nana lu a tahav sha orgen yô, nan eren nan ican.” (Orpa. 8:9) Ka nyi i lu zan hemen nyiana? Dugh ityav man ayôôso kera yô, uumace mba tagher a mbamzeyol mbagenev kpaa, er ibanave man angev man mvihi u vihin tar man mtsee u tar u lu tseen shin ndôhôr karen ikyaa inya la nahan, kua mbamzeyol mbagen kpaa. Mbahemenev mba gomoti ta icin ér aluer uumace gema inja, de u vihin tar ne ga yô, ua vihi kaca kaca.
3. Hemen u Anyom Dubu la ua va a nyi?
3 Sha hemen u Tor Mesiya, Yesu Kristu, vea mba 144,000 mba vea tema tor a na la, Tartor u Aôndo ua kar a mbamzeyol mba uumace cii kera, shi ua sôr tar kpaa. Hemen u Anyom Dubu la ua kure ityendezwa i sagher iyol i Yehova Aôndo ne. A kaa ér: “M ngu gban Usha u he man tar u he kpaa; á kera umbur akaa a tsuaa la ga, man shi aa kera va or ken ishima kpaa ga.” (Yes. 65:17) Ka akaa a doon tsung a nyi a lu keghen se? Se mba a nenge a kwagh ne ga, kpa de se nenge er kwaghôron u profeti u Aôndo, u a lu ken Bibilo la una wase se se fa er akaa a doon tsung a se lu a ‘nenge’ a mi ga la, aa va lu yô.—2 Kor. 4:18.
‘VEA MAA UYA SHI VEA KAHA ISHULE I IKYON I WAIN’
4. Ka mbamzeyol mba nyi ior ve lu tagher a mi nyian sha kwagh u ijiir i tsana?
4 Hanmô wase nan soo ér nana maa ya u nan, nana lu her kundu kundu, vea tsombor u nan. Nahan kpa, ken tar u ainge ne, ior kpishi mba a ijiir i tsan ga. Ior ngee sha ugeri kar ikyar inya. Mbakpishiv mba tse ken ubaca, shin ken utse mba ayough shin ken ayou a lun côu côu. Man tsegha u vea lu a ya ve tsô kpaa ga.
5, 6. (a) Kwagh u i er ken takerada u Yesaia 65:21 man Mika 4:4 la una va kure nena? (b) Se er nan ve se zua a averen shono?
5 Shighe u Tartor u Aôndo ua hemen uumace la, hanma or nana lu a ya u nan, gadia i tsengaôron ken takerada u Yesaia ér: “Vea maa uya man vea tema keregh, vea kaha ishule i ikyon i wain, man vea ya atam a i.” (Yes. 65:21) Kpa ka cii ishimaverenkeghen i ve lu a mi la ga. Sha ci u nyian ne kpa, ior mbagenev mba a uya vev, mbagenev je yô maa uzegembayaav. Kpa ishima ka i nyian ve ér, alaghga a va gba u vea tee ya ve la, shin mbaiv vea va vihi ve ya, vea nyôr a kura ve akaa. Kpa ken Tartor u Aôndo yô, ishima ia kera nyian or môm ga. Profeti Mika yange nger ér: “Hanmô ve nana tema shin itine i kon u wain u nan, man shin itine i kon u tur u nan, ma or nana kera ta ve mciem iyol ga.”—Mika 4:4.
6 Er se lu veren ishima u va zuan a akaa a dedoo ne yô, doo u se er nyi? Gba u hanma wase nana lu a ijiir i tsan. Nahan kpa, doo u se gba anzô kpishi hegen sha u maan ya wase ga. Kpa aluer se mba eren akaa a tesen ér se hemba veren ishima sha uityendezwa mba Yehova yô, a tese ér se mba eren kwagh sha kwaghfan. Yesu yange ôr kwagh na, kaa ér: “Atsôngo nga a ijô, inyon i sha kpaa ngi a aya; kpa Wan u or yô, ngu ape suur ityough ga.” (Luka 9:58) Yesu yange una soo yô, ma maa shin ma yam ya u hemban cii, u orgen môm kpa ma fatyô u maan shin lun a mi ga yô. Kpa er nan ve yange er nahan ga? Yange soo ér kwagh môm a dan un shin a yange un u hemban veren ishima sha kwagh u Tartor ga. Se fatyô u dondon ikyav na la sha u veren ishe yase jighilii, nahan palegh akaa a yolough shi lumun ser ishima i nyian se sha akaa shon ga—Mat. 6:33, 34.
“GBASEELA MAN WANIYÔNGO VEA YA TOHO IMÔNGO”
7. Yehova yange gema tar cii wa sha ikyev i uumace nena?
7 Shighe u Yehova lu gban akaa shin tar la, yange mase gban uumace. Yehova yange pase Waniunda na, Yesu, u a lu Orfantom la, ityôkyaa i i na ve gba uumace yô. A kaa a na ér: “Sé er or sha inja i mlu Wase, sha ibeen Yase; ishu i shin zegemnger man inyon i sha man uzendenya man tar cii kua hanma kwagh u kpelan inya, u a kper a kpela sha tar kpaa, ve̱ lu sha ikyev ve.” (Gen. 1:26) Nahan lu u tar ua lu sha ikyev i Adam man Ifa kua uumace mbagenev mba vea va lu sha tar la cii.
8. Inyam ngi tesen ieren i nyi nyiana?
8 Inyam cii ia fatyô u lun sha ikyev i uumace kpa? Shi ve cii vea fatyô u lun ken bem kpa? Ior kpishi ka ve lu a inyam igen kôôsôô ken uya vev, er iwa man ukpatema nahan. Gema inyamtoho di ye? Kwaghtôvon ugen kaa ér: “Mbatôvonkwaghfan mba ve nengen sha inyamtoho shi ve hen kwagh ve tsembelee yô, kav ér inyam cii, kwaghdoon shin vihin i.” Ka a̱ ta i mciem iyol yô, i cia shi i er tswam kpaa. Kpa, ia fatyô u tesen dooshima je he? Mbatôvonkwaghfan mban pase ér: “Inyam ka ia mar yô, i tese ônov mba i dooshima kpishi.”
9. Inyam ia va gema inja ken hemen nena?
9 Nahan kwagh u Bibilo i kaa ér bem una va lu her atô u uumace man inyamtoho la, a de kpiligh se iyol ga. (Ôr Yesaia 11:6-9; 65:25.) Sha ci u nyi? Umbur wer, shighe u Noa man tsombor na due ken tso, zum u mngerem ma deemee uma kera la, Yehova kaa a ve ér: “Hanma inyam i sha tar cii . . . , né cier ve iyol, vea cia ne.” Nahan inyam ngi yevese uumace sha er ia war yô. (Gen. 9:2, 3) Kpa Yehova una va kar a mciem mara kera, sha er uumace vea lu kôôsôô a inyam, er yange soo ér i lu nahan. (Hos. 2:18) Hanma or u nan war mkurtar yô, a kpe nan iyol hen shighe la kpen kpen!
“UNA ESE VE MLIAM SHA ASHE KERA CII”
10. Uumace mba vaan sha ci u nyi?
10 Solomon yange nengen a “ipila i i eren shin tar cii” yô, a kaa wener: “Nenge, mliam ma mba i kighir ve la, man ve lu a orsurun ve ishima ga” la. (Orpa. 4:1) Nyian kpa kaha ga, shin hemba gban kera je kpaa. Ka an je kwagh a lu a er nan, nan haa mliam ashe ga? Sha mimi yô, ashighe agen kwagh ngu a doo or je nan haa mliam ashe. Nahan kpa, ashighe kpishi ka se vaa sha ci u ishima vihi se ker.
11. Ka kwagh u an u er ken Bibilo ve, a ker u ken ishima yumu?
11 Umbur akaa a Bibilo i er sha kwagh u ior mba yange ve vaa la. Zum u Sara kpe, shighe u lu anyom 127 la, “Aberaham nyôr gba zungwen ku u Sara vaan un.” (Gen. 23:1, 2) Shighe u Naomi lu lôhôn kasevmbacôgholov mba ônov nav ayem la, “ve gba vaan genger genger.” Mba been yô, “shi [ve hide] ve vaa genger genger” kpaa. (Rutu 1:9, 14) Shighe u Tor Hesekia gba angev, lu nôngon ku la, a sôn Aôndo je a “gba vaan tsung,” nahan kwagh ne kôr Yehova ken ishima. (2 Utor 20:1-5) Shi ka an je nana ôr kwagh u Peteru yange nyiman Yesu la ve a kôr nan ken ishima ga? Zum u Peteru ungwa ikyegh tôngo yô, “a due ken won, a gba za vaan tsung.”—Mat. 26:75.
12. Hemen u Anyom Dubu la ua va uumace a mpeveryol nena?
12 Er akaa a vihin kpishi a eren ior yô, gba u a sur ve ishima. Ka kwagh u Hemen u Kristu u Anyom Dubu la ua er sha ci u uumace vough je la. Bibilo kaa ér: “[Aôndo] una ese ve mliam sha ashe kera cii, ku ua kera lu ga, shin ijungwen shin mliam shin ican kpaa ia kera lu je ga, gadia akaa a tse la kar kera.” (Mpa. 21:4) Er i doo se kpishi sha ci u mba va karen a ijungwen man mliam man ican kera nahan kpa, ka cii la ga. Aôndo shi tôndo zwa ér una va kar a orihyom wase u hemban cii la kpa kera, ka ku je la. Kwagh ne una er nena?
“MBA VE LU SHIN IWAR CII . . . VEA DUE”
13. Hii shighe u Adam er isholibo la je, ku ya tor sha uumace nena?
13 Ku ya tor sha uumace cii, hii shighe u Adam yange er isholibo la je. Ku za hemen u lun orihyom u or môm kpa nana fatyô u hemban u ga yô. Or môm nana fatyô u waren ku ga. U va uumace a ijungwen man iuren kpishi. (Rom. 5:12, 14) Sha kpôô yô, ior umiliôn kpishi ‘mba ken uikyangen sha mciem ma kuugh, hii shighe u i mar ve la je.’—Heb. 2:15.
14. Shighe u a tim ku kera la, ka nyi ia ere?
14 Bibilo ôr kwagh u shighe u ku ua kera lu ga la. I̱ kaa ér: “Orihyom u masetyô u á tim un kera yô, ka ku.” (1 Kor. 15:26) A lu ikweior ihiar ia zua a mtsera ye. “Zegeikpelaior” i i lu uma hegen ne ia fatyô u va waren nyôron ken tar u he u ityendezwa la, shi ia lu uma gbem sha won. Ior ubiliôn imôngo mba ku u men ve la di, a va nder ve shin ku. Nenge er a saan mba vea war mbara iyol u keghen mba a nder ve shin ku la gbenda sha wono! Aluer se time sha avur a ken Bibilo a a er kwagh u mba yange ve nder shin ku la tsembelee yô, se fatyô u kaven er mnder u shin ku una va lu la.—Mar. 5:38-42; Luka 7:11-17.
15. Shighe u a va nder or wou u nan kpe, nana hide a lu uma la, a lu u nena?
15 Hen ase sha kwagh u mkaanem ma ior mba yange i nder ior vev shin ku man: “Cier ve iyol je zua ga,” kua “ve gba civir Aôndo.” Yange wea lu her shighe u i nder ior mban shin ku la yô, adooga we kpa kape ma lu u je la. Sha kpôô yô, zum u a va nder ior asev mba ve kpe mbara, vea hide a lu uma la, se ember tsung. Yesu kaa ér: “Shighe ngu van u mba ve lu shin iwar cii vea ungwa imo Na, vea due kpaa.” (Yoh. 5:28, 29) Mô wase môm nan ngu a vande nengen a imbakwagh ne ga; nahan kwagh ne una lu môm ken akaa a hemban doon cii, a se lu a̱ ‘nenge a mi ga yô.’
AÔNDO UNA “HOGHOM CII KEN HANMA OR CII”
16. (a) Doo u se ôron kwagh u averen a se lu a nenge a mi ga la sagher sagher sha ci u nyi? (b) Ka nyi Paulu yange ôr sha u taver Mbakristu mba ken Korinte mbara ishima?
16 Sha kpôô yô, mlu u doon tsung ngu keghen mba vea civir Yehova sha mimi ken ashighe a ican ne zan zan mkur la! Shin er se lu a nenge a averen a doon tsung ne ga nahan kpa, gba u se henen sha a. Kwagh ne una wase se se hemba veren ishima sha kwagh u a hembe lun hange hange la. Nahan se za hemen u civir Yehova shi palegh akaa a danen se, a ken tar la. (Luka 21:34; 1 Tim. 6:17-19) Shighe u se lu eren mcivir u hen tsombor shi se lu lamen a mba ve civir Yehova a vese imôngo, man shighe u se lu lamen a mba se henen Bibilo a ve yô, doo u se pase ve kwagh u ishimaverenkeghen yase la sagher sagher. Kwagh ne una wase se, nahan kwagh u ishimaverenkeghen yase ne una lu se kwagh u mimi. Kape apostoli Paulu yange taver mba ve lu Mbakristu a na imôngo la ishima je la. Mkaanem nam man yange ma wase ve u henen sha akaa a aa va er ken mkur u Hemen u Kristu u Anyom Dubu la. Nôngo u nengen a kwagh u Paulu a nger ken 1 Mbakorinte 15:24, 25, 28 ne ken ishima.—Ôr.
17, 18. (a) Yehova yange “hoghom cii ken hanma or cii” sha mhii u tsombor u uumace sha nyi gbenda? (b) Yesu una va er nyi sha u hiden a bem man mzougho?
17 Mkaanem ma i kaa ér, “Aôndo Una hoghom cii ken hanma or cii” la, ka mkaanem ma hemban doon cii ma ma pase er uma una va lu ken hemen, shighe u anyom dubu aa bee la yô. Inja i mkaanem man ér nyi? Hide hen ase sha shighe u Adam man Ifa ve lu ken sule u Eden, ve lu vough a mshi shio la. Shighe la ve lu ken tsombor u Yehova u u lu ken bem man ken mzough la. Hen shighe la, Yehova, Tor u Hemban sha Won Cii la lu hemen akaa a a gbe a sha won cii la, ka mbatyomov mba shaav man uumace cii je la. Yange ve lamen a na jighilii, shi ve civir un, nahan un kpa a ver ve doo doo. Yehova yange “hoghom cii ken hanma or cii.”
18 Nahan kpa, shighe u Satan mee uumace, ve hendan a hemen u Yehova la, ikyar i ve ya vea na la vihi. Kpa hii ken inyom i 1914 la je, Tartor u Mesiya ngu eren tom kpoghuloo sha u hiden a bem man mzough ne her. (Ef. 1:9, 10) Sha shighe u Hemen u Anyom Dubu la, a gema nengen a akaa a doon tsung, a nyian i lu a gba “nengen a mi ga” la. Kwagh u una dondo yô, “ka mkur,” inja na yô, ka mkur u Hemen u Anyom Dubu je la. Maa nyi ia ere? Shin er i we Yesu “tahav mbu Sha man mbu sha won cii” sha ikyev nahan kpa, una ngohol Yehova hemen ga. Nahan una hide a iyol na ijime, una “gema tartor Una na Aôndo Ter.” Una er tom a tahav man ian na i civirigh la “sha ci u iengem i Aôndo.”—Mat. 28:18; Fil. 2:9-11.
19, 20. (a) Mba vea lu sha ikyev i Tartor u Aôndo la cii vea tese ér, ve lumun hemen u Yehova shin ve venda u nena? (b) Ka akaa a doon tsung a nyi a lu keghen se?
19 Zum la, mba vea lu uma shin tar sha ikyev i Tartor la cii vea hingir vough. Vea dondo ikyav i Yesu i hiden a iyol ijime la, nahan vea lumun hemen u Yehova a mkighir shio. Aluer ve tile sha mimi shighe u anyom dubu aa bee ve a mase karen ve la yô, a tese ér ve lumun hemen u Yehova. (Mpa. 20:7-10) Shighe u a kar ior la una been yô, a tim mbahembanato cii, a̱ lu mbatyomov shin uumace kpaa. Mtim ve ne una lu mtim u tsôron. Nenge er a saan se iyol hen shighe la sha won yô! Tsombor u Yehova u sha man u shin tar cii ua wuese un. Nahan Yehova una “hoghom cii ken hanma or cii.”—Ôr Pasalmi 99:1-3.
20 Akaa a doon tsung a Tartor u Aôndo u sôôn van a mi la aa mgbegha u u̱ veren ishima shi nôngon wer u er ishima i Aôndo kpa? U fatyô u palegh akaa a gbilinigh a shin tar u Satan, a ior ve nengen ér aa na ve mkpeyol la, sha er aa dan u u̱ eren ishima i Yehova ga kpa? U seer kangen ishima wer u sue hemen u Yehova kpa? Aeren a ou a tese ér ka kwagh u a sar ú u eren gbem sha won je la. Nahan u lu ken bem man mkpeyol ken atô u anyom dubu la tseegh ga, kpa u lu ken bem man mkpeyol gbem sha won!
[Mbampin Mba Ngeren u Henen]
[Ufoto mba sha peeji 11 la]
Yesu una kuren tom Tor u i ne un la yô, una hide a iyol na ijime, una gema Tartor la una na Ter na
