¡Ni kaj akgtum mil kata naʼanan takaksni!
¡Ni kaj akgtum mil kata naʼanan takaksni!
«Wa Dios nti nalikgantaxtuy xlipaks nkatuwaj.» (1 COR. 15:28)
¿LA XKGALHTINANTI?
¿La nalimakgkatsiya akxni nakgantaxtu tuku lichuwinan Biblia?
Miqueas 4:4
Isaías 11:6-9
1. ¿Tuku lu tlan namakglhtinankgo «lhuwa ntachixkuwitat»?
¿KAJ kalakpuwanti la xkamakgtayalh akgtum mil kata chatum mapakgsina tiku lu tliwakga, tlawa tuku xaʼakgstitum chu xalakgalhamana? Wa uma tuku namakglhtinankgo tiku tapakgsikgo «lhuwa ntachixkuwitat» akxni nalakgtaxtukgo «ntlanka tapatin» nema nalimasputukan uma nixatlan kakilhtamaku (Apoc. 7:9, 14).
2. ¿Tuku lanit uma akgchaxan mil kata nema mapakgsinankgonit latamanin?
2 Akgchaxan mil kata nema mapakgsinankgonit latamanin, kaj tapatin chu talipuwan ananit. Makgasa, Biblia lichuwinalh: «Chixku kaʼakgchipanit latamanin xlakata natlawani tuku nitlan» (Ecl. 8:9). Chu wa tuku akxilhaw la uku: guerras, taʼakglhuwit chu talakgaputsit xlakata ni anan tumin, tajatat, masputumaka tuku anan kkatiyatni chu xlakata talakgpalima kakilhtamaku. Lhuwa mapakgsinanin wankgo pi komo ni nalakgpaliyaw kintalakapastaknikan lu nitlan tuku nakitaxtu.
3. ¿Tuku nakgantaxtu akxni natawila Tamapakgsin xaʼAkgtum Mil Kata?
3 Akxni namapakgsinan Jesucristo chu 144,000, xTamapakgsin Dios tsinu tsinu nalakkaxtlawa tuku patikgonit latamanin chu xchikkan kKatiyatni. Akxni natawila Tamapakgsin xaʼAkgtum Mil Kata nakgantaxtu uma tuku wanit Jehová: «¡Kaʼakxilhtit!, naktlawa xasasti akgapun chu xasasti katiyatni; chu tuku titaxtunita nialh katitalakapastakli, na nialh katitawilalh kkinakujkan» (Is. 65:17). ¿Tuku lu tlan nala ama kilhtamaku? Maski nila naʼakxilhaw, tuku Biblia lichuwinan kinkamakgtayayan naʼakxilhaw tuku «ni tasiyuj» (2 Cor. 4:18).
«NATLAWAKGO CHIKI, CHU [...] NACHANKGO UVAS»
4. ¿Tuku limaklakaskinkgo latamanin la uku?
4 Putum kgalhiputunaw akgtum chiki niku kifamiliajkan tlan natawilakgo. Pero kkakilhtamaku lhuwa tiku ni kgalhikgo chiki. Klaklanka kachikinin lu tsamakan, chu lhuwa lamakgolh niku ni anan tumin chu lu nitlan la wilakgolh. Lhuwa latamanin lakpuwankgo pi nakgalhikgo akgtum chiki kaj tamanaxnat.
5, 6. 1) ¿La nakgantaxtu tuku wan Isaías 65:21 chu Miqueas 4:4? 2) ¿Tuku kilitlawatkan xlakata naʼakxilhaw la nakgantaxtu tuku Jehová wanit pi natlawa?
5 Akxni namapakgsinan Cristo putum tlan nakgalhikgo xchikkan, xlakata Isaías wa: «Natlawakgo chiki chu anta natawilakgo; chu nachankgo uvas chu nawakgo xtawakat» (Is. 65:21). Xlikana wilakgolh tiku kgalhikgoya xchikkan chu wilakgolh tiku asta kgalhikgo akgtum lanka chiki. Pero pekuankgo xlakata namakgatsankgakgo akxni ni nakgalhikgo tumin o chatum kgalhana natanu o lu nitlan tuku nakaʼakgspula. Pero kxTamapakgsin Dios nialh naʼanan uma talakgaputsit xlakata palakachuwina Miqueas tsokgli: «Chatunu chatunu natawila xtampin xakiwi xʼuvas chu xtampin xhiguera, chu ni katianalh tiku nakamakgapekuan» (Miq. 4:4).
6 ¿La kinkamakgtayayan uma lu tlan takgalhkgalhin? Xlikana, kimputumkan maklakaskinaw akgtum chiki. Pero ni talakaskin lhuwa naskujaw xlakata nakgalhiyaw chiki nema lakgatiyaw, xlakata max lhuwa tumin nasakuayaw chu alistalh nialh la naxokgoyaw, ¿ni tlakg tlakg xwa pi nakanajlayaw tuku Jehová malaknu? Jesús lichuwinalh xlakata la xlama: «Wa wekgni, kgalhikgoy xchikkan, chu wa laktsu [tsiktsi], na kgalhikgo y xmasakgakan; wampi wa Xkam nchixku, ni kgalhiy xla ntani naʼakxtikatnan» (Luc. 9:58). Jesús xkatsini chu tlan xtlawalh akgtum chiki o tlan xtitamawalh tlakg xatlan chiki. ¿Tuku xlakata nichuna tlawalh? Xlakata ni xlakaskin pi wi tuku xtlawalh pi nialh xlakaskinka xʼakxilhli xTamapakgsin Dios. Chuna la Jesús, ¿tlan natawila kilakgastapukan, ni namastayaw talakaskin pi lu lhuwa tuku nakgalhiputunaw natlawa nakgalhiyaw lhuwa taʼakglhuwit? (Mat. 6:33, 34.)
«LOBO CHU BORREGO AKXTUM NALATAMAKGO»
7. ¿Tuku lakkaxwililh Jehová xlakata la xtalalinkgolh latamanin chu animales?
7 Akxni Jehová tlawalh Katiyatni, xʼawatiya tlawalh latamanin chu wa tuku tlakg xatlan tlawalh. ¿Tuku xlakaskin pi xtlawakgolh? Jehová wa akxni wanilh xapuxku xKgawasa, xaPuxku Skujni: «Katlawaw chixku kintachunakan, chuna la tasiyayaw, chu xla kakamapakgsilh skiti xalak kpupunu chu animal nema kgoskgo kʼakgapun chu animal xalak chiki chu putum katiyatni chu putum animal nema tatsuwi kxʼakgspun katiyatni» (Gén. 1:26). Xlikana, Dios lakkaxwililh pi Adán, Eva chu putum latamanin kakamapakgsikgolh animales.
8. ¿La likatsikgo animales?
8 ¿Xlikana latamanin tlan kamapakgsikgo putum animales chu tlan nakatalalinkgo? Lhuwa latamanin tlan talalinkgo chichi, mitsi, o mistun, o atanu animales. ¿Pero tuku tlan nawanaw xlakata laklipekua lapanit? Uma tuku lichuwinanka: «Científicos tiku putsananikgo animales chu akxtum katalatamakgo, akxilhkgonit pi animales na makgkatsikgo». Putum akxilhnitaw la animales pekuankgo o sitsikgo akxni wi tuku nitlan katlawaniputunkan, pero ¿tlan limasiyakgo pi wi tuku makgkatsikgo? Amakgtum uma tuku wankan: «Akxni uma animales kgalhikgo kskgata limasiyakgo uma lu tlan tayat, pi lu tlan paxkinankgo».
9. ¿Tuku natalakgpali xlakata animales?
9 Tlan nakanajlayaw pi chuna la wan Biblia, latamanin tlan akxtum nakatalatamakgo animales (kalikgalhtawakga Isaías 11:6-9 chu 65:25). ¿Tuku xlakata? Kalakapastakwi tuku Jehová wanilh Noé chu xfamilia akxni taxtukgolh kʼarca: «Nakapekuanikgoyan chu lu nakamakgapekuanatit putum tuku staknan kkatiyatni». Uma tapekua kamakgtaya animales xlakata nitu nakatlawanikan (Gén. 9:2, 3). Jehová tlan natlawa pi nialh napekuankgo o nialh lhuwa napekuankgo animales xlakata nakgantaxtu tuku pulana xlakapastaknit natlawa (Os. 2:18). ¡Lu nalipaxuwakgo tiku nalatamakgo kKatiyatni!
«NAXAKANIKGO DIOS XLAKGPIXTAJATKAN»
10. ¿Tuku xlakata tasayaw?
10 Akxni akxilhli «putum tuku tatlawa xtampin chichini xlakata nakaʼakgchipakan amakgapitsin», Salomón wa: «¡Kaʼakxilhti!, xlakgpixtajatkan tiku xkatlawanikan tuku nitlan, pero ni xwi tiku xkamakgtaya» (Ecl. 4:1). La uku, chuna lamaw o asta tlakg nitlan tuku lama. Putum akinin minit kilhtamaku tasanitaw. Xlikana min kilhtamaku litasayaw xlakata paxuwayaw, pero makglhuwa tasayaw xlakata patinamaw.
11. ¿Tuku lichuwinan Biblia nema tlawa pi wi tuku namakgkatsiya?
11 Kalilakapastakwi tuku lichuwinan Biblia niku akxilhaw tuku xmakgkatsikgo latamanin. Akgtum liʼakxilhtit, «Abrahán tanulh chu tsukulh lakgtasa Sara» akxni Sara nilh xkgalhi 127 kata (Gén. 23:1, 2). Akxni Noemí kawanilh chatiy xnapuwitin tiku xnikgonita xchixkukan pi xtaspitkgolh kxchikkan, «xlakan tsukukgolh tasakgo» (Rut 1:9, 14). Akxni mapakgsinan Ezequías tatatlalh chu xkatsi pi xʼama niy, tlawanilh oración Dios chu «lhuwa tsukulh tasa» wa xlakata Jehová lakgalhamalh (2 Rey. 20:1-5). ¿Chu la namakgkatsiyaw akxni lakapastakaw tuku makgkatsilh Pedro akxni wa pi ni xlakgapasa Jesús chu kgaxmatli la tasalh puyu, alistalh «chalipuwana titsukulh tasay»? (Mat. 26:75.)
12. ¿La nakamakgtaya xTamapakgsin Dios latamanin?
12 Putum lipatinanaw, max tuku lu tuwa o ni, chu maklakaskinaw wi tiku tlan nakinkamamakgkatsiniyan. Chu wa uma tuku namasta Tamapakgsin xaʼAkgtum Mil Kata tiku tapakgsinikgo, xlakata Biblia wan pi «na paks naxakanikgo Dios xlakgpixtajatkan; na nialh katiʼanalh linin; chu na nialh katiʼanalh ntalipuwan, ni mpala wa ntatasa, chu na ni mpala wa ntakatsanajwat» (Apoc. 21:4). Lu tlan xlakata katsiyaw pi nialh nalakgaputsayaw, niti natasa chu niti wi tuku nakatsani. Dios na wanit pi namasputu tuku lu nitlan, tlakg xalanka kintalamakgasitsinkan: linin. ¿La natlawa?
«XLIPAKS NTI AKNUKGOY [O KAʼAKGTAPUKANIT], [...] NATAKXTUPALAKGOY»
13. ¿Tuku nitlan kinkatlawaniman linin lata lakgalhinalh Adán asta la uku?
13 Akxni lakgalhinalh Adán asta la uku, latamanin nimakgolh xlakata talakgalhin chu niti lakgtaxtunit, uma liminit lhuwa tatasa chu tlawa pi lu nitlan nalimakgkatsikan (Rom. 5:12, 14). Tlan nawanaw pi xlakata «[...]pekuanikgoy linin» lhuwa millón latamanin «[...]lamakgo la xtachin» (Heb. 2:15, Hua Xasasti Talaccaxlan, 1999).
14. ¿Tuku nala akxni linin “namasputukan”?
14 Biblia kinkawaniyan pi «xlikgatsputni, talatlawana nawan, wa linin wa ntu nalaktlaway» (1 Cor. 15:26). Uma pulaktiy tiku nalitamakgtayakgo. Pulana «lhuwa amakgapitsin chixkuwin» tiku la uku lamakgolh tlan natanukgo kxasasti kakilhtamaku chu nikxni nanikgo. Nachuna lhuwa millón tiku nikgonitta tlan nalakastakwankgo. ¿Lakpuwana la xlilhuwa napaxuwakgo «lhuwa amakgapitsin chixkuwin» akxni nalakastakwanankgo tiku kapaxkikgo? Xlakata nakatsiyaw, kalikgalhtawakgaw tuku lichuwinan Biblia xlakata tiku kamalakastakwanika (kalikgalhtawakga Marcos 5:38-42 chu Lucas 7:11-17).
15. ¿La namakgkatsiya akxni nalakastakwanankgo tiku kapaxkiya?
15 Kalakapastakwi uma tachuwin xla textos nema lichuwinaw “lhpipakg lilakawankgolh” chu «na xmaxkikgoy nkakni Dios». Komo xtitawilaw uma xalipaxuw kilhtamaku, max na lu xtilipaxuwaw. Xlikana, akxni naʼakxilhaw pi lakastakwanankgonit tiku kapaxkiyaw lu nalipaxuwayaw. Jesús wa: «Namin nkilhtamaku akxni xlipaks nti aknukgoy, [...] natakxtupalakgoy» (Juan 5:28, 29). Xlakata talakastakwanat wa tuku «ni tasiyuj» la uku, uma tuku natatlawa putum kilhtamaku nalakapastakaw.
«LAKIMPI MAN WA DIOS NTI NALIKGANTAXTUY XLIPAKS NKATUWAJ»
16. 1) ¿Tuku xlakata xatapaxuwan nalichuwinanaw tuku «ni tasiyuj»? 2) ¿La kamatliwakglhli Pablo kstalaninanin Cristo xalak Corinto?
16 Tiku ni namakgxtakgkgo Jehová kʼuma xakatuwa kilhtamaku, namakglhtinankgo lhuwa tasikulunalin alistalh. Maski la uku nina akxilhaw umakgolh lanka tasikulunalin, tlan nalilakapastakaw chu uma nakinkamakgtayayan naʼakxilhaw tuku tlakg xlakaskinka chu ni namastayaw talakaskin pi tuku xalak kakilhtamaku natlawa namakgxtakgaw xatlan tiji (Luc. 21:34; 1 Tim. 6:17-19). Lu xatapaxuwan kalichuwinaw kintakgalhkgalhinkan akxni nakgalhtawakgayaw chu nakakninaniyaw Jehová kfamilia, akxni nakatachuwinanaw kinatalankan chu akxni kamakgalhtawakgayaw amakgapitsin o akxni lichuwinanaw Dios. Chuna uma takgalhkgalhin tliwakga natawila kkintalakapastaknikan chu kkinakujkan. Chuna apóstol Pablo kamatliwakglhli kstalaninanin Cristo akxni kamalakapastakalh la xʼama wan akxni ksputli xʼAkgtum Mil Kata xTamapakgsin Cristo. Kalilakapastakti tuku xwamputun akxni tsokgli 1 Corintios 15:24, 25, 28 (kalikgalhtawakga).
17, 18. 1) ¿Tuku xlakata wanaw pi «Dios nti nalikgantaxtuy xlipaks nkatuwa» akxni lakatsukukgolh latamanin? 2) ¿Tuku natlawa Jesús xlakata tlan natalalimparakgo Dios putum tuku tlawanit?
17 Pablo lichuwinalh uma tuku awatiya xʼama la akxni wa pi «lakimpi man wa Dios nti nalikgantaxtuy xlipaks nkatuwaj». ¿Tuku wamputun uma tachuwin? Akxni Adán chu Eva nina xlakgalhinankgo, xfamilia Dios xlitaxtukgo chu tlan xlatalalinkgo. Jehová, tiku Lakgchan Namapakgsinan xliputum kakilhtamaku xkamapakgsi putum tuku xtlawanit, ángeles chu latamanin. Tlan xkakninanikgo chu xtachuwinankgo, chu Jehová xkasikulunatlawa. Xlikana, «Dios nti nalikgantaxtuy xlipaks nkatuwaj».
18 Pero akxni latamanin tlawakgolh tuku Satanás kawanilh chu nialh tapakgsiniputunkgolh Dios, nialh la talalinkgolh. Pero xTamapakgsin Cristo wi tuku tsukulh tlawa kkata 1914 xlakata amakgtum tlan xtalalinkgolh Dios (Efes. 1:9, 10). Akxni natawila xTamapakgsin Cristo xaʼAkgtum Mil Kata, nakgantaxtu tuku «ni tasiyuj». Alistalh namin «lisputni», uma wamputun akxni nasputa xTamapakgsin Cristo xaʼAkgtum Milh Kata. ¿Tuku nala alistalh? Maski Jesús maxkikanit «xlipaks limapakgsin, [...] nkakgapun, chu nkatiyatna» xla ni makglhtiputun Jehová tuku lakgchan xlakata ni tiyaputun tuku ni xla. Wata nataktuju chu «namakamastay nCristo ntapakgsin kxmakan Dios», nalimaklakaskin xlimapakgsin chu tuku lakgayawakanit xlakata «nalitamaxkiy nkakni Dios xaTlat» (Mat. 28:18; Filip. 2:9-11).
19, 20. 1) ¿La nalimasiyakgo putum tiku tapakgsinikgo Tamapakgsin pi kgalhakgaxmatkgo lanka mapakgsina Jehová? 2) ¿Tuku lanka tasikulunalin nakgalhiyaw?
19 Ama kilhtamaku, tiku nalatamakgo unu kkatiyatni nema tapakgsinikgo Tamapakgsin nialh nakgalhikgo talakgalhin. Nalikatsikgo la Jesús chu xatapaxuwan natapakgsinikgo Jehová. Xlakata nalimasiyakgo pi tapakgsiniputunkgo, talakaskin natayanikgo tuku xaʼawatiya nakaliʼakxilhkan (Apoc. 20:7-10). Xaʼawatiya, putum tiku ni kgalhakgaxmatnankgo, latamanin chu ángeles xliputum kilhtamaku nakamasputukan. ¡Lu lipaxuw nawan! Putum xfamilia Dios xatapaxuwan namalanki Jehová, «tiku nalikgantaxtuy xlipaks nkatuwa» (kalikgalhtawakga Salmo 99:1-3).
20 ¿La namakgtayayan xlakata likgalhtawakgaw lu xatlan tuku natlawa Tamapakgsin nema atsinu tsankga nakgantaxtu? ¿Nalimaklakaskina militliwakga xlakata natlawaya xtalakaskin Dios? ¿Ni namastaya talakaskin namatlawiyan Satanás tuku nitlan chu ni nalakgatiya tuku malaknu? ¿Liwana nalakapastaka natatayaya Jehová pi wa lakgchan namapakgsinan? Komo chuna, kalimasiya pi putum kilhtamaku tlawaputuna xtalakaskin Dios. Chuna nakgalhiya lanka talakgalhaman pi ni kaj akgtum mil kata nakgalhiya takaksni chu lhuwa tuku tlan.
[Takgalhskinin]
[Dibujos xla página 11]
Akxni namakgantaxti tuku xlitlawat mapakgsina Jesús, xatapaxuwan namaxkipara Tamapakgsin xTlat
