1. Wanem ol gutpela samting tru bai painim “bikpela lain manmeri”?

 TINGIM: Sapos king bilong wanpela strongpela gavman i gat pasin helpim na i save mekim pasin i fea, orait insait long 1,000 yia em inap helpim tru ol manmeri. Gutpela samting olsem bai painim “bikpela lain manmeri.” Em dispela lain bai abrusim bagarap long taim bilong “traipela hevi tru.” Dispela “traipela hevi tru” bai pinisim olgeta pasin nogut bilong nau.—Rev. 7:9, 14.

2. Wanem ol samting i bin painim ol man insait long 6,000 yia i go pinis?

² Insait long 6,000 yia i go pinis, ol man i bin traim long bosim ol yet. Dispela i mekim na ol man i karim planti pen na hevi. Bipo yet, Baibel i tok: “Sampela bikman i wok long daunim ol arapela manmeri na mekim nogut long ol.” (Sav. 8:9) Wanem ol samting i wok long kamap long nau? I gat planti pait na pasin bilong bikhet long gavman. I gat ol hevi olsem stap rabis, ol sik, pasin bilong bagarapim graun, weda i senis, na sampela arapela hevi. Ol bikman bilong gavman i tok lukaut olsem bikpela hevi tru bai kamap sapos yumi no kamapim sampela bikpela senis na lusim pasin bilong bagarapim graun.

3. Wanem samting bai kamap long Wan Tausen Yia Bilong Krais i Stap King?

³ Aninit long wok bos bilong King Mesaia, Jisas Krais, na 144,000 wanwok bilong em, Kingdom Bilong God bai tekewe ol pen na hevi i bin painim ol manmeri na stretim bek ol samting bilong dispela graun i bagarap. Long Wan Tausen Yia Bilong Krais i Stap King, dispela tok promis bilong God Jehova bai kamap tru: “Mi wokim nupela skai na nupela graun. Na ol man bai i no inap tingim moa ol samting i bin kamap bipo.”  (Ais. 65:17) Wanem ol gutpela samting bai kamap bihain? Ol tok profet bilong Baibel inap helpim yumi long kliagut long ol dispela samting we inap long nau “yumi no inap lukim long ai.”—2 Kor. 4:18.

4. Long nau planti manmeri i save sindaun long wanem ol hap?

⁴ Olgeta man i laik kisim haus bilong ol yet, olsem ples we ol i ken i stap gut wantaim famili bilong ol. Tasol long nau, i hatwok long painim haus. Planti manmeri i pas pas insait long ol bikpela siti. Ating ol i stap long ol setelmen o ol olpela bilding i doti. Laik bilong ol long kisim haus bilong ol yet em samting i no inap kamap tru.

5, 6. (a) Olsem wanem tok bilong Aisaia 65:21 na Maika 4:4 bai kamap tru? (b) Yumi ken mekim wanem long kisim dispela blesing?

⁵ Taim Kingdom i bosim dispela graun, olgeta man bai i gat haus bilong ol yet. Aisaia i tok profet olsem: “Ol manmeri bilong mi bai i wokim ol haus na stap long ol. Na bai ol i planim ol gaden wain na wokim wain na dring.” (Ais. 65:21) Tasol ol bai i no kisim haus tasol, nogat. Long nau, sampela i gat haus bilong ol yet, na sampela i gat ol traipela haus. Tasol ol i wari olsem mani bilong ol bai sot na ol i mas lusim dispela haus. O ol i pret olsem ol stilman o ol raskol bai brukim haus bilong ol. Taim Kingdom i bosim graun, ol man bai i no tingting planti long ol dispela samting. Profet Maika i tok: “Olgeta man wan wan bai i sindaun gut klostu long gaden wain na diwai fik bilong ol, na i no gat wanpela man bai i mekim ol i pret.”—Mai. 4:4.

⁶ Yumi mas mekim wanem sapos yumi laik stap aninit long wok bos bilong Kingdom? Tru, yumi olgeta i mas i gat hap bilong i stap long en. Tasol yumi no ken traim long kisim stail haus long nau na kisim bikpela dinau bilong mekim olsem. Bai yumi bihainim savetingting sapos wokabaut bilong yumi i kamapim ples klia yumi tingim tok promis bilong Jehova. Jisas i tok long em yet olsem: “Ol foks i gat hul long graun na ol pisin i gat hap bilong slip, tasol Pikinini bilong man i no gat ples bilong slip.” (Luk 9:58) Jisas inap wokim o baim wanpela haus i nambawan tru. Bilong wanem em i no mekim olsem? Jisas i no laik mekim ol samting we em bai pasim em long painim Kingdom pastaim. Olsem wanem? Yumi ken bihainim pasin bilong em na no ken larim ol samting bilong skin i kamap olsem nambawan bikpela samting long laip bilong yumi na kirapim yumi long tingting planti?—Mat. 6:33, 34.

7. Jehova i tok olsem wanem long ol man na ol animal?

⁷ Ol manmeri em laspela samting Jehova i wokim long dispela graun. Em i tokim Saveman i Bosim Wok, Jisas, long as na em i wokim ol, em i tok: “Nau yumi wokim ol manmeri bai ol i kamap olsem yumi yet. Bai yumi putim ol i stap bos bilong ol pis na ol pisin na bilong olgeta kain animal na bilong olgeta samting bilong graun.” (Stt. 1:26) God i tokim Adam na Iv long lukautim na bosim ol animal. Na olgeta man i kamap bihain bai i gat dispela namba long bosim ol animal.

8. Ol animal i save bihainim wanem kain pasin long nau?

⁸ Yu ting ol man inap stap bos bilong olgeta animal na stap wanbel wantaim ol? Planti manmeri i save laikim tumas dok o pusi bilong ol. Tasol olsem wanem long ol wel animal? Yumi save olsem ol animal i save pret o belhat taim samting i laik nogutim ol. Tasol ol saientis husat i bin stap long bus na skelim ol wel animal i painimaut  olsem ol wel animal inap kamapim olsem ol i amamas, o ol i sori, o ol i laikim na tingim narapela. Ol saientis i tok taim ol animal i lukautim pikinini bilong ol, ol i kamapim pasin sori tru long ol.

9. Olsem wanem ol animal bai i stap narapela kain long bihain?

⁹ Yumi no ken kirap nogut long tok bilong Baibel olsem ol man na animal bai i stap gut wantaim. (Ritim Aisaia 11:6-9; 65:25.) Bilong wanem yumi no kirap nogut long dispela? Tingim tok Jehova i mekim long Noa na famili bilong en taim ol i lusim sip bihain long Bikpela Tait, em i tok: “Olgeta animal bilong graun na ol pisin na ol pis, bai ol i pret long yupela.” Long nau, bilong lukautim ol yet, planti animal i save ranawe taim ol i lukim ol man. (Stt. 9:2, 3) Tasol Jehova inap daunim dispela pret, na ol man na ol animal bai stap gut wantaim olsem Jehova i bin tok long en long bipo. (Hos. 2:18) Olgeta manmeri i stap long graun bai amamas long dispela taim!

10. Wanem samting i mekim na ol manmeri i save krai?

¹⁰ Solomon i lukim olsem planti pasin nogut i kamap long graun, na planti manmeri i no gat man bilong helpim ol. Olsem na em i bel hevi na tok: “Ol man nogut i save daunim planti manmeri, na ol dispela manmeri i krai nogut tru. Tasol i no gat man bilong helpim ol.” (Sav. 4:1) Long nau wankain samting i kamap na i nogut moa. Ating yumi olgeta i bin krai long sampela samting. Sampela taim yumi krai bikos yumi amamas. Tasol planti taim yumi krai, long wanem, yumi bel hevi tru.

11. Yu pilim tru wanem stori bilong Baibel?

¹¹ Tingim planti stori long Baibel we ol manmeri i bin krai. Taim Sara i gat 127 krismas na dai i painim em, “Abraham i sori tru na i krai long em.” (Stt. 23:1, 2) Taim Naomi i tok gutbai long 2-pela tambu meri, “tupela i krai nogut tru,” na bihain “tupela i krai gen.” (Rut 1:9, 14) Taim King Hesekia i sik nogut tru na i luk olsem em bai dai, em i beten long God na “em i krai moa yet.” Jehova i lukim em i krai na Em i oraitim sik bilong em. (2 Kin. 20:1-5) Yumi olgeta i pilim tru samting i bin kamap taim aposel Pita i tok em i no save long Jisas. Taim Pita i harim kakaruk i krai, em “i go ausait na krai nogut tru.”—Mat. 26:75.

12. Olsem wanem Taim Bilong Wan Tausen Yia Bilong Krais i Stap King inap helpim ol man?

¹² Planti samting i mekim ol man i bel hevi, olsem na ol i mas i gat helpim na man bilong mekim gut bel bilong ol. Long Taim Bilong Wan Tausen Yia Bilong Krais i Stap King, God bai “mekim drai aiwara i stap long ai bilong ol, na bai i no gat dai moa, na ol bai i no bel hevi na krai moa, na ol bai i no inap pilim pen gen.” (Rev. 21:4) Em gutpela samting tru long tingim olsem bihain bai i no gat pen na hevi. Gutpela samting moa em God i promis long pinisim dai. Dispela bai kamap olsem wanem?

13. Kirap long taim Adam i mekim sin na i kam inap long nau, dai i mekim wanem long ol man?

¹³ Kirap long taim Adam i mekim sin na i kam inap long nau, dai i stap olsem king i bosim ol man. Dai em wanpela birua em ol man i no inap sakim. Ol sinman i no inap abrusim dai, na dai i bin kamapim bikpela bel sori na pen. (Rom 5:12, 14) Planti milion manmeri i pret long ol bai dai, olsem na “ol i stap kalabus long laip olgeta bilong ol.”—Hib. 2:15.

14. Wanem samting bai kamap taim i no gat dai moa?

¹⁴ Baibel i stori long taim we ‘dai bai pinis  olgeta.’ (1 Kor. 15:26) Dispela promis bai helpim 2-pela lain. “Bikpela lain manmeri” bilong Jehova husat i stap laip nau, ol inap abrusim bagarap na go insait long nupela taim. Ol i gat rot long stap laip oltaim. Na tu, rot i op long planti bilion manmeri i ken kirap bek. Tingim bikpela amamas ol manmeri bilong “bikpela lain” bai pilim taim ol i bungim ol manmeri i kirap bek. Sapos yumi ritim gut ol stori bilong Baibel long ol man i bin kirap bek, bai yumi kliagut long ol manmeri bai pilim olsem wanem long taim bilong kirap bek long nupela taim.—Ritim Mak 5:38-42; Luk 7:11-17.

15. Bai yu pilim olsem wanem sapos yu lukim wanpela em yu laikim tumas i kirap bek na kisim laip?

¹⁵ Tingim dispela tok olsem ‘ol i amamas nogut tru’ na “ol i stat long givim glori long God.” Sapos yu bin stap taim ol dispela manmeri i bin kirap bek, ating bai yu mekim wankain samting. Bai yumi amamas tru long lukim lain yumi laikim ol tumas, i kirap bek na kisim laip. Em bai gutpela tru! Jisas i tok: “Taim i laik kamap na olgeta man i stap long matmat ol bai harim nek bilong Pikinini na kam ausait.” (Jon 5:28, 29) Yumi no bin lukim kain samting olsem i kamap, tasol taim yumi lukim dispela samting we inap long nau yumi “no inap lukim long ai,” em bai nambawan tru.

16. (a) Bilong wanem yumi mas amamas long stori long ol blesing em yumi no kisim yet? (b) Pol i tok wanem bilong strongim ol Kristen long Korin?

¹⁶ Gutpela samting bai painim ol manmeri husat i stap gut long Jehova long dispela taim nogut! Maski yumi no kisim yet ol dispela blesing, yumi mas tingting long ol dispela samting. Dispela bai helpim yumi long tingim gut ol nambawan bikpela samting. Long dispela rot bai yumi mekim yet ol wok bilong Jehova na bai yumi no larim ol samting bilong  dispela graun i pulim tingting bilong yumi. (Luk 21:34; 1 Tim. 6:17-19) Long taim bilong famili lotu, na taim yumi toktok wantaim ol brata na sista, na taim yumi toktok wantaim ol Baibel sumatin na ol man i gat laik long harim tok, yumi mas amamas tru long stori long ol samting yumi bilip na wetim i kamap bihain. Long dispela rot, hop bilong yumi bai stap strong. Aposel Pol i bin mekim olsem bilong strongim ol wanbilip Kristen. Tok bilong em i helpim ol long tingim ol samting bai kamap long pinis bilong Wan Tausen Yia Bilong Krais i Stap King. Tingim mining bilong tok bilong Pol long 1 Korin 15:24, 25, 28.—Ritim.

17, 18. (a) Long gaden Iden, olsem wanem Jehova i bin “stap het bilong olgeta samting”? (b) Jisas bai mekim wanem bilong kamapim gen bel isi na pasin wanbel?

¹⁷ Baibel i stori long i stap bilong ol man long pinis bilong 1,000 yia taim em i tok, ‘God bai stap het bilong olgeta samting.’ Wanem mining bilong dispela tok? Tingim taim Adam na Iv i bin stap long gaden Iden na ol i insait long gutpela famili bilong Jehova. Jehova, King Bilong Heven na Graun, i bin bosim olgeta lain em bin wokim, maski ol i stap long heven o long graun. Ol inap toktok wantaim Jehova, lotuim em, na em inap blesim ol. Em i “stap het bilong olgeta samting.”

¹⁸ Dispela pasin wanbel i bagarap taim Satan i kirapim ol man long bikhet long Jehova. Tasol kirap long 1914, Kingdom i bin mekim ol samting bilong kamapim gen dispela bel isi na pasin wanbel. (Efe. 1:9, 10) Long taim bilong Wan Tausen Yia, ol gutpela samting em yumi “no inap lukim long ai,” long wanem, ol i no kamap yet, ol bai kamap tru. Bihain, “pinis i kamap,” em pinis bilong Wan Tausen Yia Bilong Krais i Stap King. Wanem samting bai kamap long dispela taim? Jisas i holim “namba long bosim olgeta samting” long heven na long graun, tasol em i no laik holim wankain namba olsem bilong Jehova. Jisas i mekim pasin daun na “putim kingdom long han bilong God na Papa bilong em.” Jisas bai yusim namba bilong en long mekim ol samting i “givim glori long God Papa.”—Mat. 28:18; Fili. 2:9-11.

19, 20. (a) Olsem wanem ol man i stap aninit long wok bos bilong Kingdom inap kamapim olsem ol i sapotim wok bos bilong Jehova? (b) Wanem ol gutpela samting bai painim yumi long bihain?

¹⁹ Long dispela taim, olgeta husat i stap aninit long wok bos bilong Kingdom bai stap gutpela olgeta. Ol bai bihainim pasin bilong Jisas. Ol bai amamas long stap aninit long Jehova, long wanem, ol i gat pasin daun. Sapos ol i kamapim klia olsem ol i laik bai Jehova i stap bos bilong ol, orait ol bai winim laspela traim. (Rev. 20:7-10) Bihain long dispela, ol bikhet lain, maski em ol ensel o ol man, ol bai kisim bagarap na pinis olgeta. Dispela em taim bilong amamas tru! Olgeta lain insait long famili bilong Jehova long heven na long graun bai litimapim nem bilong em. Na Jehova bai i “stap het bilong olgeta samting.”—Ritim Song 99:1-3.

²⁰ Olsem wanem? Ol gutpela samting klostu nau Kingdom bai kamapim bai kirapim yu long givim tingting olgeta na strong olgeta long mekim laik bilong Jehova? Yu inap sakim tingting olsem ol samting bilong dispela graun bilong Satan inap givim amamas na gutpela sindaun long yu? Bai yu strongim disisen bilong yu long sapotim wok bos bilong Jehova? Gutpela sapos pasin bilong yu i kamapim klia olsem yu gat laik long sapotim wok bos bilong Jehova inap oltaim oltaim. Long dispela rot yu bai stap gut na stap bel isi inap long 1,000 yia na i go inap oltaim oltaim!