Mtende kwa Vyaka Cikwi, Ndiposo Kwamuyirayira
Mtende kwa Vyaka Cikwi, Ndiposo Kwamuyirayira
“Mwakuti Ciuta waŵe vinthu vyose kwa waliyose.”—1 KOR. 15:28.
KASI MUNGALONGOSORA?
Kasi para malemba agha ghazakafiskika, muzamujipulika wuli?
1. Kasi “mzinda ukuru” ukulindilira vinthu wuli vyakukondweska?
KASI mungaghanaghanira unandi wa vinthu viwemi ivyo boma liwemi kweniso lankhongono, ilo lili na fumu yirunji kweniso yalusungu, lingacitira ŵanthu ŵake mu vyaka cikwi? Vinthu viwemi ivi ndivyo ukulindilira “mzinda ukuru” wambura mapendeko, uwo uzamupona “suzgo yikuru” iyo yizamumazga mgonezi uheni uwu.—Uvu. 7:9, 14.
2. Kasi ŵanthu ŵakumana na vinthu wuli mu vyaka 6,000 ivyo vyajumpha?
2 Mu vyaka 6,000 vya mdauko wa ŵanthu, nkharo ya ŵanthu ya ukajilange na kukhumba kujiwusa ŵekha yiza na vyakuŵinya ndiposo masuzgo ghanandi. Baibolo likayowoyerathu kuti: “Munthu yumoza wakuwusa pacanya pa munyake” na kumupweteka. (Muph. 8:9) Kasi ni vinthu wuli ivyo tikuwona mazuŵa ghano? Padera pa nkhondo na vivulupi ivyo ŵanthu awo ŵakukhumba kusintha ndyali ŵakucita, paliso masuzgo ghanyake ghazanimuwone, nga mbukavu, matenda, kunangika kwa cilengiwa, kusintha kwa nyengo, na vinyake vinandi. Ŵalara ŵa boma ŵacenjezga kuti usange ŵanthu ŵakuleka yayi kunanga cilengiwa, pa caru pacitikenge vinthu vyakofya.
3. Kasi ni vinthu wuli ivyo Muwuso wa Vyaka Cikwi uzamufiska?
3 Ufumu wa Ciuta wakuwusika na Mesiya Themba, uyo ni Yesu Khristu, na ŵa 144,000, uzamunozga vinthu vyose vyakunangika pa umoyo wa ŵanthu na pa cikaya cawo, ico ncharu capasi. Muwuso wa Vyaka Cikwi uzamufiska layizgo lakukondweska comene la Yehova Ciuta lakuti: “Nkhulenga mtambo uphya na caru ciphya; vya kale ntha vikumbukikenge panji kunjiraso mu mtima.” (Yes. 65:17) Kasi ni vinthu wuli vyakukondweska ivyo tikulindilira, nangauli pa nyengo yasono tindaviwone? Na wovwiri wa Mazgu ghaucimi gha Ciuta, tiyeni tiwone vinthu vyakukondweska ivyo vicali vindawoneke.—2 Kor. 4:18.
‘ŴAZAMUZENGA NYUMBA NA KUPANDA MPHESKA’
4. Kasi ŵanthu ŵanandi ŵakukhala mu nyumba za mtundu wuli mazuŵa ghano?
4 Ni njani uyo wangaleka kukondwa usange wangaŵa na nyumba yake na yake, malo agho iyo na mbumba yake ŵangaŵa ŵakuvikilirika? Kweni mu caru mazuŵa ghano kuzenga nyumba ziwemi ni suzgo likuru comene. Ŵanthu ŵakukhala mwakufyenyana mu misumba. Ŵanandi ŵakukhala mu tunyumba tucokotucoko mu makomboni na mu misumba yambura kupwelelereka. Vyakuti zuŵa linyake ŵangazakaŵa na nyumba yawo yiwemi ni maloto waka kwa iwo.
5, 6. (a) Kasi lemba la Yesaya 65:21 na la Mika 4:4 ghazamufiskika wuli? (b) Kasi tingacita wuli kuti tizakapokere vitumbiko ivi?
5 Para Ufumu wa Ciuta wazakamba kuwusa caru capasi, khumbo la munthu waliyose lakuti waŵe na nyumba lizamufiskika, cifukwa Yesaya wakacima kuti: “Ŵanthu ŵane tiŵazenge nyumba na kukhalamo; tiŵapande mpheska na kurya vipasi.” (Yes. 65:21) Ndipouli paliso vinthu vinyake ivyo ŵakulindilira padera pa kuŵa na nyumba zawo. Nakuti pa nyengo yasono ŵanji ŵakukhala mu nyumba zawo, ŵanji ŵali na vinyumba vikuruvikuru. Kweni nyengo zose ŵakufipa mtima kuti ŵangataya nyumba zawo usange ndalama zingasuzga, usange ŵankhungu ŵangaswa, panji usange cinyake ciheni cingacitika. Ndimo vizamuŵira yayi mu Ufumu wa Ciuta. Nchimi Mika yikalemba kuti: “Tiwakhale munthu yose musi mwa mpheska yake na musi mwa mkuyu wake, kulije yumoza wakuŵawofya.”—Mika 4:4.
6 Pakuti tili na cilindizga ciwemi ici mu maghanoghano ghithu, kasi tikwenera kucita vici? Mbunenesko kuti tose pano tikukhumba kuŵa na nyumba ziwemi. Ndipouli, m’malo mwa kuŵika mtima pa umo tingasangira nyumba ya ku mtima kwithu pa nyengo yasono, panji nanga nkhunjira mu ngongoli kuti tizenge nyumba, kasi cingaŵa camahara yayi kuti tiŵike dankha mtima withu pa layizgo la Yehova? Kumbukani ivyo Yesu wakayowoya vya iyomwene: “Ŵakambwe ŵali na micembo ndipo viyuni vya mu dera vili na vivwimbo, kweni Mwana wa munthu walije malo ghakugonekapo mutu wake.” (Luka 9:58) Yesu wakhumbenge mphanyi wakazenga panji kusanga nyumba yiwemi comene kuluska yiliyose iyo yikaŵako. Cifukwa wuli wakacita nthena yayi? Yesu wakakhumbanga kugega cilicose ico cikatenge cimutimbanizgenge, panji kumujandizga kuŵika Ufumu pakwamba. Tiyeni timuyezge ndipo tiŵe na jiso lakulata pa cimoza, ilo likuleka kulaŵiska pa vyakujandizga vyakuthupi na vyenjezgo.—Mat. 6:33, 34.
‘MPHUMPHI NA KANAMBERERE VIZAMURYA PAMOZA’
7. Kasi pakwamba Yehova wakalangura kuti ŵanthu ŵakhalenge wuli na vinyama?
7 Pakulenga vinthu, Yehova wakamalira kulenga ŵanthu, ndipo ŵanthu ndiwo mbapadera comene pa milimo yake yose ya pa caru capasi. Yehova wakayowoya khumbo lake kwa Fundi wake, uyo ni Mwana wake wakwamba wakati: “Tilenge munthu mu cikozgo cithu, kwakulingana na nkharo yithu; waŵe na mazaza pa somba za mu nyanja, na pa viyuni vya mu dera, na pa vyakuŵeta, na pa caru cose, na pa vyakukhwaŵa vyose ivyo vikukhwaŵa pa caru.” (Gen. 1:26) Ntheura, Adamu na Eva, ndipo pamanyuma ŵanthu wose, ŵakalangulika kuti ŵaŵe na mazaza pa vinyama vyose.
8. Kasi vinyama vili na mikhaliro wuli mazuŵa ghano?
8 Kasi nchamacitiko nadi kuti vinyama vyose vijilambikenge ku ŵanthu na kuŵa nawo pa mtende? Ŵanthu ŵanandi ŵakutemwa viŵeto vyawo, nga ni ncheŵe na ŵacona, ndipo navyo vikuŵatemwa. Kweni wuli pakuyowoya za vinyama vya mu thondo? Lipoti linyake likuti: “Ŵasayansi awo ŵakukhala na vinyama na kuvisanda ŵali kusanga kuti vinyama vyose vikughanaghana.” Mbunenesko kuti tikuwona kuti vinyama vikucita wofi panji kukalipa para taviyamba, kweni kasi navyo vingaŵa na lusungu? Lipoti lenelili likulutilira kuti: “Pakulera ŵana ŵawo ndipo vinyama vikulongolera kuti vili na lusungu kweniso citemwa.”
9. Pakuyowoya za vinyama, kasi tikulindilira kuti pazamuŵa kusintha wuli?
9 Ntheura tikwenera kuzizwa yayi para tikuŵazga mu Baibolo kuti pakati pa ŵanthu na vinyama pazamuŵa mtende. (Ŵazgani Yesaya 11:6-9; 65:25.) Cifukwa wuli tikwenera kuzizwa yayi? Kumbukani kuti apo Nowa na mbumba yake ŵakafumanga mu cingalaŵa pamanyuma pa Ciwowota, Yehova wakaŵaphalira kuti: “Kuwopeka kwinu na cofyo cinu tiviŵenge pa vinyama vyose vya caru.” Ciuta wakayowoya fundo iyi mwakuti vinyama vijivikilirenge. (Gen. 9:2, 3) Yehova wangawuskapo cofya panji wofi uwu, kuti languro lake lapakwamba lifiskike. (Hos. 2:18) Iyi yizamuŵa nyengo yakukondweska comene ku ŵanthu wose awo ŵazamupona na kukhala pa caru capasi.
“WAZAMUFYURA SOZI LILILOSE”
10. Cifukwa wuli masozi ngakuzara pakati pa ŵanthu?
10 Apo Solomoni wakawona “visuzgo vyose ivyo vikucitika panopasi,” wakadandawura, wakati: “Wonani, masozi gha awo mbakusuzgika, kweni ŵakaŵavye wakusanguluska!” (Muph. 4:1) Lero napo vinthu vili nga umo vikaŵira pa nyengo iyi panji kujumpha apa. Ni njani wa ise uyo ciwiro wandathiskepo masozi? Mbunenesko kuti nyengo zinyake ghangaŵa masozi gha cimwemwe. Kweni kanandi masozi nchilongolero cakuti mtima wasuzgika.
11. Kasi ni nkhani wuli za mu Baibolo izo zikumukhwaskani comene mu mtima winu?
11 Kumbukani vinthu vinandi vyakucitiska citima ivyo tikuŵazga mu Baibolo. Apo Sara wakafwira, “Abrahamu wakiza kwiza kamulilira Sara na kumutengelera.” Sara wakaŵa na vyaka 127 apo wakafwiranga. (Gen. 23:1, 2) Apo Naomi wakalayirananga na ŵakamwana ŵake ŵaŵiri awo ŵakaŵa vyokoro, “iwo ŵakatengera na kulira masozi,” kufuma apo, “ŵakakwezga mazgu ghawo na kuliraso.” (Ruth 1:9, 14) Apo Themba Hezekiya likalwara nthenda ya kufwa nayo, likalomba kwa Ciuta ndipo ‘likalira na kulira kukuru,’ ndipo vikulongora kuti ivi vikamukhwaska Yehova. (2 Mathe. 20:1-5) Kweniso, ni njani uyo wangaleka kukhwaskika na nkhani iyo yikulongosora umo mpositole Petrosi wakakanira Yesu? Wakati wapulika tambala wakulira, Petrosi “wakaluta kuwaro na kulira comene.”—Mat. 26:75.
12. Kasi Ufumu uzamuwombora wuli ŵanthu?
12 Cifukwa ca vinthu viheni ivyo vikuticitikira, kwali ni vicoko kwali ni vikuru, tose tikukhumbikwira cipembuzgo na kuwombokwa. Ivi ndivyo Muwuso wa Vyaka Cikwi uzamucitira ŵanthu ŵake: “[Ciuta] wazamufyura sozi lililose ku maso ghawo, ndipo nyifwa yizamuŵakoso cara, nesi kutengera panji kutampha nesi vyakuŵinya vizamuŵakoso cara.” (Uvu. 21:4) Wonani kukondweska kwa layizgo la Ciuta. Kutengera panji kutampha nesi vyakuŵinya vizamuŵakoso cara. Kweniso Ciuta wakulayizga kuti wazamumarana na mulwani mukuru wa ŵanthu uyo ni nyifwa. Kasi ici cizamucitika wuli?
‘WOSE AWO ŴALI MU MALARO GHA CIKUMBUSKO ŴAZAMUFUMIRA KUWARO’
13. Kasi nyifwa yakhwaska wuli ŵanthu kwambira apo Adamu wakanangira?
13 Kwambira apo Adamu wakanangira, nyifwa yawusa nga ni themba pa ŵanthu. Waŵa mulwani wambura kuthereskeka, wakuti munthu wakwananga wangamugwentha yayi. Mulwani uyu wakupangiska kuti ŵanthu ŵaŵe na citima cikuru. (Rom. 5:12, 14) Nakuti cifukwa ca “kopa nyifwa,” ŵanthu mamiliyoni ghanandi ‘ŵakulambikika ku wuzga umoyo wawo wose.’—Heb. 2:15.
14. Kasi ni vinthu wuli ivyo vizamucitika para nyifwa yathereskeka?
14 Baibolo likuyowoya vya nyengo iyo “pakuŵa mulwani waumaliro, nyifwa yizamumalizgika.” (1 Kor. 15:26) Para nyifwa yamara, magulu ghaŵiri gha ŵanthu ghazamusanga candulo. Ŵa “mzinda ukuru” awo pasono mbamoyo, ŵazamupona na kunjira mu caru ciphya cakulayizgika na kuŵa ŵamoyo kwamuyirayira. Ŵanthu mabiliyoni ghanandi awo ŵali kufwa, ŵazamuwuskika. Ghanaghanirani cimwemwe ico cizamuŵapo para ŵanthu awo ŵazamunjira ŵamoyo ŵakuzakapokelera ŵanthu awo ŵazamuwuskika ku ŵakufwa. Para tikuwona mwakupwelelera nkhani za mu Baibolo zakukhwaskana na ŵanthu ŵanyake awo ŵakawuskika, tingaŵa na cithuzithuzi ca ivyo vizamucitika.—Ŵazgani Mariko 5:38-42; Luka 7:11-17.
15. Kasi mungajipulika wuli usange mungawona kuti wakutemweka winu wawuskika?
15 Ghanaghaniranipo pa mazgu ghakuti “penepapo ŵakakondwa comene pakuzura na cimwemwe” na ghakuti “ŵakamba kupeleka ucindami kwa Ciuta.” Usange muŵengepo pa nyengo iyi, panji namwe mphanyi mukajipulika nga umo ŵanthu aŵa ŵakajipulikira. Nadi, para tazakawona ŵabali ŵithu awo ŵazamuwuskika, tizamuŵa na cimwemwe ca zanimuwone. Yesu wakati: “Ora likwiza mu leneilo wose awo ŵali mu malaro gha cikumbusko ŵazamupulika lizgu lake na kufumira kuwaro.” (Yoh. 5:28, 29) Palije yumoza wa ise uyo wali kuwonapo kuti munthu wawuskika; ciwuka cizamuŵa cimoza mwa vinthu vyakukondweska comene “vyambura kuwoneka.”
CIUTA WAZAMUŴA “VINTHU VYOSE KWA WALIYOSE”
16. (a) Cifukwa wuli tikwenera kuyowoya mwakuthukutera za vitumbiko ivyo vicali vindawoneke? (b) Kasi Paulosi wakayowoya vici kuti waciske Ŵakhristu ŵa ku Korinte?
16 Enya, ŵanthu wose awo ŵalutilirenge kugomezgeka kwa Yehova mu nyengo zinonono izi ŵazamusanga vinthu viwemi. Nangauli tindaviwone vitumbiko ivi, kweni usange tikuvikumbuka mu maghanoghano ghithu, vingatovwira kuti tiŵike mtima pa vinthu vyakuzirwa nadi na kugega kupuluskika na vinthu vyakukopa vya nyengo yicoko vya mu mgonezi uwu. (Luka 21:34; 1 Tim. 6:17-19) Pa nyengo ya sambiro la mbumba panji yakusopera ya mbumba, para tikudumbiskana na Ŵakhristu ŵanyithu, panji awo tikusambira nawo Baibolo, tiyeni tiyowoye mwakuthukutera vya cigomezgo na cilindizga cithu. Ici citovwirenge kuti tikumbukenge vinthu ivi mu maghanoghano na mu mitima yithu. Ndimo mpositole Paulosi wakacitira pakuciska Ŵakhristu ŵanyake. Tingayowoya kuti wakaŵatolera kufupi na umaliro wa Muwuso wa Vyaka Cikwi. Ghanaghanirani kuzirwa kwa mazgu gha Paulosi agho ghali pa 1 Ŵakorinte 15:24, 25, 28.—Ŵazgani.
17, 18. (a) Kasi pakwamba Yehova wakaŵa wuli “vinthu vyose kwa waliyose”? (b) Kasi Yesu wazamucita vici kuti wawezgerepo umoza?
17 Pamanyuma pa vyaka cikwi, umoyo uzamuŵa wakukondweska comene kuluska umo tingalongosolera. Fundo yikuru njakuti: ‘Ciuta wazamuŵa vinthu vyose kwa waliyose.’ Kasi mazgu agha ghakung’anamuraci? Ghanaghanirani ivyo vikacitikanga kale mu munda wa Edeni apo Adamu na Eva ŵakaŵa kuti ŵandanange. Pa nyengo iyi, iwo ŵakaŵa mu mbumba yamtende ndiposo yakukolerana ya Yehova. Yehova, Fumu ya Cilengiwa Cose, wakawusanga yekha mwakudunjika vilengiwa vyake vyose, ŵangelo na ŵanthu wuwo. Iwo ŵakayowoyeskananga nayo, kumusopa, ndipo wakaŵatumbikanga. Wakaŵa “vinthu vyose kwa waliyose.”
18 Kukolerana uku kukatimbanizgika apo ŵanthu ŵakagalukira muwuso wa Yehova mwakukhuŵilizgika na Satana. Ndipouli, kwambira waka mu 1914, Ufumu wa Mesiya ukucita vinthu kuti uwezgerepo umoza uwu. (Efe. 1:9, 10) Mu Muwuso wa Vyaka Cikwi, vinthu vyakukondweska ivyo pa nyengo yasono tindaviwone, vizamucitika. Cakulondezgapo, “umaliro,” kung’anamura umaliro wa Vyaka Cikwi wa Khristu. Kasi nchivici ico cizamucitika pa nyengo iyi? Nangauli wali kupika “mazaza ghose . . . kucanya na caru capasi,” Yesu walije mtima wakuti wapoke malo gha Yehova. Mwakujiyuyura iyo “wazamupeleka ufumu kwa Ciuta wake na Ŵawiske.” Kweniso Yesu wazamugwiliskira nchito udindo na mazaza ghake “kuti Ciuta . . . wapike ucindami.”—Mat. 28:18; Fil. 2:9-11.
19, 20. (a) Kasi ŵanthu wose awo ŵazamuwusika na Ufumu ŵazamulongora wuli usange ŵakuzomera muwuso wa Yehova panji yayi? (b) Nchilindizga wuli cakukondweska ico tili naco?
19 Pa nyengo iyi, ŵanthu awo ŵazamuwusika na Ufumu uwu pa caru capasi ŵazamuŵa kuti ŵazgoka ŵarunji. Ŵazamuyezga Yesu ndipo mwakujiyuyura ŵazamulumba muwuso wa Yehova. Ŵazamulongora kuti ŵali na khumbo ili para ŵazakatonda ciyezgo caumaliro. (Uvu. 20:7-10) Para ivi vyajumphapo, ŵakugaluka wose, kwali mbanthu kwali mbangelo, ŵazamufumiskikapo kwamuyirayira. Iyi yizamuŵa nyengo yakukondweska comene. Mbumba yose ya Yehova yizamumulumba, ndipo iyo wazamuŵa “vinthu vyose kwa waliyose.”—Ŵazgani Salmo 99:1-3.
20 Kasi vinthu vyanadi ivi vyakukhwaskana na Ufumu uwo wizenge sonosono apa vimuciskaninge kuti muŵikenge mtima pa kucita khumbo la Ciuta? Kasi mugegenge kupuluskika na cigomezgo cautesi kweniso usambazi wa kanyengo kacoko uwo caru ca Satana cikupeleka? Kasi mukhozgenge khumbo linu la kukhozgera na kudemelera ku muwuso wa Yehova? Mphanyi vyakucita vinu vyalongora kuti mukukhumba kucita ivyo tayowoya apa kwamuyirayira. Usange mucitenge nthena, mbwenu muzamusangwa na mtende na kusakata kwa vyaka cikwi, ndiposo kwamuyirayira.
[Mafumbo]
[Cithuzithuzi pa peji 8]
[Cithuzithuzi pa peji 11]
[Cithuzithuzi pa peji 11]
[Cithuzithuzi pa peji 11]
Para Yesu wamalizga mulimo wake pakuŵa Themba, mwakujiyuyura wazamuwezgera Ufumu kwa Awiske
