Mulalo Une Wa Ḓo Vha Hone Lwa Miṅwaha Ya Tshigidi—na Nga Hu sa Fheli!
“Uri Mudzimu a vhe ene tshoṱhe kha vhoṱhe.”—1 VHA-KOR. 15:28.
1. Ndi tshifhio tshiitea tshi nyanyulaho tsho lavhelelwaho nga vha “gogo ḽihulu”?
EDZANI u humbula nga ha zwithu zwavhuḓi zwine zwa nga vha hone nga fhasi ha muvhuso wa miṅwaha ya tshigidi wa muvhusi a re na khaṱulokwayo na ane a pfela vhuṱungu vhalanda vhawe! Zwiitea zwi nyanyulaho zwo lavhelelwa nga vha “gogo ḽihulu” ḽi sa koni u vhalwa—ḽa vhane vha ḓo ponyoka “maṱunguni mahulu,” ane a ḓo fhelisa tshoṱhe vhuvhi hoṱhe ha ano maitele mavhi a zwithu.—Ndzumb. 7:9, 14.
2. Kha miṅwaha ya 6 000 ya ḓivhazwakale yoṱhe, vhathu vho tshenzhela mini?
2 Kha miṅwaha ya 6 000 ya ḓivhazwakale ya vhathu, u vha na tseḓa na u ḓivhusa zwo ḓisela vhathu vhoṱhe vhuṱungu na tshengelo. Bivhili ndi kale yo amba uri: “Misi muthu a tshi vhusa muthu muṅwe [u] a mu tshinya.” (Muh. 8:9) Hu khou itea mini musalauno? Nga nnḓa ha u vhona dzinndwa na migwalabo, hu na vhathu vhanzhi vhane vha khou sika nga nḓala, malwadze, u tshinywa ha mupo, u shanduka ha mutsho, na zwiṅwe-vho. Vhashumeli vha muvhuso vho sevha uri arali ra sa shandula maitele ashu, hu ḓo vha na mvelelo mmbi.
3. Vhuvhusi ha Miṅwaha ya Tshigidi vhu ḓo ḓadzisa fulufhedziso ḽifhio?
3 Nga fhasi ha vhuvhusi ha Khosi ya Vhumessia Yesu Kristo na vhane a ḓo vhusa navho vha 144 000, Muvhuso wa Mudzimu u ḓo fhelisa nga zwiṱuku nga zwiṱuku zwithu zwoṱhe zwine zwa pfisa vhathu vhuṱungu na zwine zwa tshinya haya havho fhano kha Ḽifhasi. Vhuvhusi ha Miṅwaha ya Tshigidi vhu ḓo ḓadzisa fulufhedziso ḽa Yehova ḽi takadzaho mbilu ḽiṋe ḽa ri: “Ni ḓivhe uri ndi ḓo sika ḽiṱaḓulu ḽiswa na ḽifhasi ḽiswa; ḽa kale a ḽi tsha ḓo ḓihwa, na mbiluni ya muthu a ḽi tsha ḓo vha hone.” (Yes. 65:17) Ndi zwifhio zwiitea zwavhuḓi zwi sa vhonwiho zwe ra zwi lindela? Ipfi ḽa Mudzimu ḽa vhuporofita ḽi ri ṋea luvhonela lwa zwithu zwi mangadzaho zwi sa “vhonwiho” zwe ra zwi lavhelela.—2 Vha-Kor. 4:18.
‘VHA ḒO FHAṰA DZINNḒU VHA SIMA MIṰOKOLA’
4. Ndi vhuleme vhufhio ha dzinnḓu vhune vhathu vha sedzana naho ṋamusi?
4 Ndi nnyi a sa ṱoḓi u vha na nnḓu yawe, fhethu hune a nga dzula hone na muṱa wawe a ḓipfa o tsireledzea? Naho zwo ralo, shangoni ḽoṱhe hu na ṱhahelelo ya fhethu ho teaho ha u dzula. Vhathu vha dzula dziḓoroboni dzo tsitsikanaho vhukuma. Vhathu vhanzhi vha dzula mikhukhuni kana kha zwifhaṱo zwa kale zwi re na tshika. Vha vhona u nga u vha na nnḓu i re yavho ndi muloro une wa sa ḓo vuwa wo ḓadzea.
5, 6. (a) Yesaya 65:21 na Mixa 4:4 dzi ḓo ḓadzea hani? (b) Ri nga wana hani yeneyo phaṱhutshedzo?
5 Nga fhasi ha Muvhuso wa Mudzimu, lutamo lwa vhathu lwa u vha na nnḓu dzavho lu ḓo ḓadzea, ngauri Yesaya o porofita a ri: “Vha ḓo fhaṱa dzinnḓu vha dzula khadzo’; vha ḓo sima miṱokola vha ḽa mitshelo yayo.” (Yes. 65:21) Naho zwo ralo, u vha na dzinnḓu a si tshone tshilavhelelwa tshavho fhedzi. Zwi re zwone ndi uri vhaṅwe vha na dzinnḓu ṋamusi, nahone vhaṅwe vha dzula kha nnḓu khulwane vhukuma. Naho zwo ralo, vha a vhilaela uri vha nga xelelwa nga nnḓu nga nṱhani ha vhuimo vhu si havhuḓi ha zwa masheleni, kana uri vha nga dzhenelwa nga mavemu. Muvhusoni wa Mudzimu hu nga si vhe na zwithu zwo raloho! Muporofita Mixa o ṅwala uri: “Vhoṱhe vha ḓo dzula murunzini wa miṱokola yavho, na murunzini wa mihuyu yavho, hu si vhe na a vha shushedzaho.”—Mixa 4:4.
6 Samusi ri tshi khou humbula nga ha fulufhedziso ḽeneḽo, ri fanela u ita mini? Ndi ngoho uri roṱhe ri ṱoḓa fhethu ha u dzula ho teaho. Naho zwo ralo, nṱhani ha u lwela u wana nnḓu ya mavhai-vhai ine ra tama u vha nayo zwino—khamusi ra ita na u ḓidzhenisa zwikolodoni u itela u i wana—zwi ḓo vha vhuṱali u livhisa ṱhogomelo kha zwe Yehova a ri fulufhedzisa zwone. Humbulani zwe Yesu a zwi amba nga ha ene muṋe musi a tshi ri: “Phunguhwe dzi na milindi, na zwiṋoni zwa ṱaḓulu zwi na zwiṱaha; Murwa-muthu ene ha na huné a siamedza ṱhóho.” (Luka 9:58) Yesu o vha e na vhukoni na maanḓa a u fhaṱa kana u renga nnḓu ya khwine-khwine u fhira dzoṱhe dzine muthu a nga vha nadzo. Ndi ngani a songo zwi ita? Zwi tou vha khagala uri Yesu o vha a tshi ṱoḓa u iledza zwithithisi zwoṱhe kana zwithu zwine zwa nga mu vhofha uri a si kone u ita uri Muvhuso u ḓe u thoma vhutshiloni hawe. Naa ri nga edzisa tsumbo yawe, nahone ra vha na iṱo ḽo tshaho—ḽi songo vhofhwaho nga dzimbilaelo na nga u funesa zwithu zwi vhonalaho?—Mat. 6:33, 34.
“PHELE NA NGWANA ZWI ḒO FULA FHETHU HUTHIHI”
7. Ndi vhufhio vhushaka he Yehova a ita uri vhu vhe hone vhukati ha vhathu na zwipuka mathomoni a tsiko yawe?
7 Musi Yehova a tshi sika zwithu zwoṱhe zwi re kha ḽifhasi, muthu ndi tshivhumbiwa tsha u fhedza tshe a tshi sika. Yehova o vhudza Muḓinḓa wawe Muhulwane, Murwa wawe wa tanzhe nga ha ndivho yawe yo livhaho musi a tshi ri: “Kha ri ite vhathu, tshifanyiso tshashu, vhane vha nga riṋe, vhane vha vhusa dzikhovhe dza lwanzhe na zwiṋoni zwa ṱaḓulu na mutshatshame woṱhe wa zwi tshatshamaho kha shango.” (Gen. 1:26) Nga zwenezwo, Adamu na Eva u katela na vhathu vhoṱhe vho vha vho fanela u vhusa zwipuka zwoṱhe.
8. Zwiṅwe zwipuka zwi kona u sumbedza pfaneleo ifhio?
8 Naa zwi a konadzea uri vhathu vha vhuse zwipuka zwoṱhe na uri vha vhe na mulalo nazwo? Vhathu vhanzhi vha funa zwifuwo zwavho, zwi ngaho dzimmbwa, na zwimange. Naho zwo ralo, hu pfi mini nga zwipuka zwa ḓaka? Muṅwe muvhigo wo ri: “Vhorasaintsi vho fhedzaho tshifhinga tshilapfu na zwipuka zwa ḓaka vha tshi guda nga hazwo vho wana uri zwiṅwe zwi na maḓipfele.” Ri a zwi ḓivha uri zwipuka zwi a tshuwa kana zwa vha na vhuhali musi zwi tshi vhona u nga zwi khomboni, fhedzi naa zwi a kona u sumbedza maḓipfele a lufuno? Muvhigo wonoyo wo bvela phanḓa u tshi ri: “Nḓila ine zwiṅwe zwipuka zwa alusa ngayo vhana vhazwo i dzumbulula pfaneleo ya u kona u sumbedza lufuno ine zwa vha nayo.”
9. Malugana na zwipuka, ndi tshanduko dzifhio dzine ra nga dzi lavhelela?
9 Nga zwenezwo, a zwo ngo fanela uri mangadza musi ri tshi vhala Bivhilini uri hu ḓo vha na mulalo vhukati ha vhathu na zwipuka. (Vhalani Yesaya 11:6-9; 65:25.) Ndi ngani? Humbulani uri nga murahu ha Maḓi Mahulu musi Noaxe na muṱa wawe vha tshi bva gungwani, Yehova o vha vhudza uri: “Ni ḓo ofhiwa na shavhiwa nga zwi tshilaho zwoṱhe, na nga zwiṋoni zwoṱhe, na nga zwikhokhonono zwoṱhe zwa shango.” Zwenezwo zwo vha zwo itelwa uri zwipuka zwi kone u ḓitsireledza. (Gen. 9:2, 3) Naa Yehova a nga fhelisa nyofho dzenedzo, u itela uri zwipuka zwi dovhe zwi vhe na vhushaka na vhathu u fana na nga nḓila ye a vha o zwi dzudzanya ngayo u bva mathomoni? (Hos. 2:18) Vhathu vhane vha ḓo tshila kha ḽifhasi vho lavhelela tshenetsho tshifhinga tshavhuḓi vhukuma.
“U ḒO FHULUṰA MAṰODZI OṰHE”
10. Ndi ngani nga zwiṅwe zwifhinga vhathu vha tshi tsengisa miṱodzi?
10 Musi Salomo a tshi vhona “maṱhupho a re hone fhano ḓasi ha ḓuvha,” o lila nga nṱhani ha u “vhona maṱodzi a vhaṱhuphei vha si na mufhumudzi.” (Muh. 4:1) Musalauno zwithu zwo vhifha vhukuma u fhira tshifhingani tshenetshiḽa. A hu na muthu a sa athu vhuya a tsengisa miṱodzi. Ndi ngoho uri nga zwiṅwe zwifhinga i tsenga nga nṱhani ha dakalo. Naho zwo ralo, vhathu vhanzhi vha tsengisa miṱodzi nga nṱhani ha u pfa mbilu dzi tshi vhavha.
11. Ndi afhio mafhungo a re Bivhilini ane a kwama mbilu yaṋu?
11 Humbulani nga ha zwiitea zwi kwamaho mbilu zwine ra vhala nga hazwo Bivhilini. Sara o fa e na miṅwaha ya 127, nahone “Abrahamu a mu ṱungufhalela a mu lilela.” (Gen. 23:1, 2) Musi Naomi a tshi onesa vhomazwale wawe vha dzitshilikadzi, vho “lila lwa vhuṱungu” nahone vha ṱavha mukosi “vha dovha vha lila lwa vhuṱungu.” (Ruthe 1:9, 14) Musi Khosi Hiskia a tshi khou lwala lwa u fa, o rabela Mudzimu a “lila zwihulu,” nahone zwi tou vha khagala uri zwenezwo zwo kwama Yehova. (2 Dzikh. 20:1-5) Nahone roṱhe ri a kwamiwa mbilu nga mafhungo a musi muapostola Petro a tshi landula Yesu. Musi a tshi pfa khuhu i tshi lila, Petro o “bvela nnḓa a lila lwa u tou ṱungufhadza.”—Mat. 26:75.
12. Muvhuso wa Mudzimu u ḓo ḓisela hani vhathu mbofholowo ya vhukuma?
12 Nga nṱhani ha uri ri sedzana na zwiitea zwihulwane na zwiṱuku zwi si zwavhuḓi, ri a ṱoḓa u fhumudzwa na u vhofhololwa. Ndi zwine Muvhuso wa Miṅwaha ya Tshigidi wa ḓo zwi itela vhalanda vhawo: “[Mudzimu] u ḓo fhuluṱa maṱodzi oṱhe maṱoni avho, lufu a lu tsha ḓo vha hone, na vhuṱungu na zwililo na tshengelo a zwi tsha ḓo vha hone.” (Ndzumb. 21:4) Fulufhedziso ḽa Mudzimu ḽa uri vhuṱungu na zwililo na tshengelo a zwi tsha ḓo vha hone ndi ḽavhuḓi vhukuma, nahone ḽi katela na u fheliswa ha lufu—swina ḽihulwane ḽa vhathu. Zwi ḓo ḓadzea hani zwenezwo?
‘VHOṰHE VHA RE ZWALONI VHA ḒO PFA IPFI ḼAWE, VHA BVELELA’
13. Lufu lwo tambudza hani vhathu u bva tshee Adamu a ita tshivhi?
13 U bva tshee Adamu a ita tshivhi, lufu lu vhusa vhathu vhoṱhe. Ndi swina ḽihulwane ḽa vhathu vhoṱhe vha re na tshivhi, nahone ḽi vha pfisa vhuṱungu vhuhulu. (Vha-Roma 5:12, 14) Zwi re zwone ndi uri nga nṱhani ha u “ofha lufu” vhathu vhanzhi ndi “phuli dzo vhofhiwaho” vhutshiloni havho hoṱhe.—Vha-Heb. 2:15.
14. Hu ḓo itea mini musi hu tshi fheliswa lufu?
14 Bivhili i amba uri “swiná, ḽiné a ḓo fhedzisa ngaḽo’ u ḽi kunda, ndi lufu.” (1 Vha-Kor. 15:26) Hu na zwigwada zwivhili zwine zwa ḓo vhuyelwa nga zwenezwo. Vha “gogo ḽihulu” vhane vha khou tshila zwino, vha ḓo dzhena shangoni ḽiswa vho lavhelela u tshila nga hu sa fheli. Ngeno vhathu vha dzimilioni vho faho vha tshi ḓo vuswa. Naa no no vhuya na humbula nga ha dakalo ḽine ḽa ḓo vha hone musi vha gogo ḽihulu vha tshi ṱanganedza vhathu vho vuswaho? U ṱolisisa nga vhuronwane maṅwe mafhungo a re Bivhilini a vhathu vhe vha vuswa vhafuni zwi ḓo ri thusa u pfesesa nḓila ine zwa ḓo vha ngayo.—Vhalani Marko 5:38-42; Luka 7:11-17.
15. Ni ḓo aravha hani musi ni tshi vhona muthu ane na mu funa o vuswaho vhafuni?
15 Humbulani nga ha mibulo ine ya ri, vho “farwa nga ganuko fulu” nahone “vha renda Mudzimu.” Arali no vha ni hone musi zwenezwo zwi tshi itea, khamusi no vha ni tshi ḓo ḓipfa nga nḓila i fanaho. Vhukuma, u vhona vhathu vhane ra vha funa vho vuswaho vhafuni zwi ḓo ita uri ri takale vhukuma. Yesu o ri: ‘Hu ḓa tshikhathi, tshiné vhoṱhe vha re zwaloni vha ḓo pfa ipfi ḽawe ngatsho’, vha bvelela.’ (Yoh. 5:28, 29) A huna na na muthihi kha riṋe we a vhuya a zwi vhona zwi tshi itea; nga zwenezwo u vuswa vhafuni hu ḓo vha tshiṅwe tsha zwiitea zwihulwane vhukuma kha “zwithu zwi sa vhonwiho” zwe ra zwi lavhelela.
MUDZIMU U ḒO VHA “ENE TSHOṰHE KHA VHOṰHE”
16. (a) Ndi ngani ri tshi fanela u amba nga mafulufulu nga ha phaṱhutshedzo dzi sa vhonwiho dze ra dzi lavhelela? (b) Paulo o ri mini musi a tshi ṱuṱuwedza Vhakriste vha ngei Korinta?
16 Vhukuma, vhathu vhane vha dzula vha tshi fulufhedzea kha Yehova kha ano maḓuvha a lemelaho vho lindelwa nga vhumatshelo havhuḓisa. Naho phaṱhutshedzo khulwane ri sa athu dzi vhona, u dzula ri tshi humbula nga hadzo zwi ḓo ri thusa u livhisa ṱhogomelo kha zwi re zwa ndeme vhukuma na u iledza u thithiswa nga zwithu zwi kungaho zwa ḽino shango. (Luka 21:34; 1 Tim. 6:17-19) Nga tshifhinga tsha vhurabeli hashu ha muṱa, musi ri tshi haseledza na vhaṅwe vhatendi, na musi ri tshi vha na nyambedzano na vhagudiswa vhashu vha Bivhili na vha re na dzangalelo, kha ri ambe nga mafulufulu nga ha fulufhelo ḽashu ḽavhuḓi vhukuma na zwe ra zwi lavhelela. Zwenezwi zwi ḓo ri thusa uri fulufhelo ḽashu ḽi dzule ḽi ḽa vhukuma mihumbuloni na mbiluni dzashu. Yeneyi ndi nḓila ye muapostola Paulo a ṱuṱuwedza ngayo Vhakriste ngae. Maipfi awe o vha thusa uri vha humbule nga ha zwine zwa ḓo itea tshifhingani tsha Vhuvhusi ha Kristo ha Miṅwaha ya Tshigidi. Humbulani nga ho dzikaho nga ha zwine maipfi a Paulo a amba zwone. Eneo maipfi a kha 1 Vha-Korinta 15:24, 25, 28.—Vhalani.
17, 18. (a) Mathomoni a ḓivhazwakale ya vhathu, Yehova o vha e “ene tshoṱhe kha vhoṱhe” nga nḓila dzifhio? (b) Yesu u ḓo ita mini u itela u vusulusa vhuthihi?
17 A hu na nḓila ya u ṱalutshedza khwine nḓila ine vhutshilo ha ḓo vha ngayo musi hu tshi ḓadzea maipfi ane a ri “uri Mudzimu a vhe ene tshoṱhe kha vhoṱhe.” A amba mini eneo maipfi? Humbulani nga ha tshifhinga tsha musi vhe ngei Edeni, musi Adamu na Eva vha tshi kha ḓi vha vho fhelela sa tshipiḓa tsha muṱa wa Yehova wa fhethu hoṱhe u re na vhuthihi na mulalo. Yehova Muvhusahoṱhe o vha a tshi vhusa nga ho livhaho tsiko yawe yoṱhe ine ya katela vharuṅwa na vhathu. Vho vha vha tshi kona u ambedzana nae nga ho livhaho, u mu gwadamela na u fhaṱutshedzwa ngae. O vha e “ene tshoṱhe kha vhoṱhe.”
Musi Yesu o no fhedza mushumo wawe sa Khosi, u ḓo kumedza Muvhuso kha Khotsi awe nga u ḓiṱukufhadza
18 Honovho vhushaka havhuḓi ho tshinyala musi vhathu vha tshi ṱuṱuwedzwa nga Sathane nahone vha shandukela vhuvhusahoṱhe ha Yehova. Naho zwo ralo, u thoma nga 1914, Khosi ya Vhumessia i khou dzhia vhukando nga zwiṱuku nga zwiṱuku u itela u vhuyedzedza mulalo na vhuthihi. (Vha-Ef. 1:9, 10) Tshifhingani tsha Vhuvhusi ha Miṅwaha ya Tshigidi, hu ḓo ḓadzea mafulufhedziso avhuḓi vhukuma a zwithu “zwi sa vhonwiho” zwe ra zwi lavhelela. Musi o no ḓadzea, hu ḓo ḓa “vhufhelo,” vhune ha vha u khunyelela ha Vhuvhusi ha Kristo ha Miṅwaha ya Tshigidi. Hu ḓo itea mini nga murahu? Naho Yesu o ṋewa “maanḓa oṱhe ngei ṱaḓulu na fhano fhasi,” ha na vhuhovheleli. Ha ṱoḓi u dzhia vhuimo ha Yehova. U a ḓiṱukufhadza nahone u ḓo “kumedza vhuhosi Mudzimu a ré Khotsi.” U ḓo shumisa vhuimo hawe ho khetheaho na maanḓa u itela “u renda Mudzimu.”—Mat. 28:18; Vha-Fil. 2:9-11.
19, 20. (a) Vhoṱhe vhalanda vha Muvhuso wa Mudzimu vha sumbedza hani uri vha tikedza vhuvhusahoṱhe ha Yehova? (b) Ndi mafulufhedziso afhio avhuḓi vhukuma e ra a lindela?
19 Nga tshenetsho tshifhinga, vhalanda vha Muvhuso wa Mudzimu vha ḓo vha vho no fhelela. Vha ḓo ḓiṱukufhadza vha edzisa tsumbo ya Yesu, vha dovha vha dzhiela nṱha vhuvhusahoṱhe ha Yehova nga u ḓifunela. Vha ḓo bvelela musi vha tshi lingwa lwa u fhedza arali vha sumbedza uri vha ṱoḓa Yehova a tshi vha muvhusi wavho. (Ndzumb. 20:7-10) Nga murahu, mashandukwa oṱhe—a vhathu na a zwivhumbiwa zwa muya—a ḓo fheliswa tshoṱhe. Tshi ḓo vha tshifhinga tshi takadzaho lungafhani! Muṱa wa Yehova wa fhethu hoṱhe u ḓo vha wo takala u tshi mu renda, nahone ene u ḓo vha “ene tshoṱhe kha vhoṱhe.”—Vhalani Psalme ya 99:1-3.
20 Naa phaṱhutshedzo dza Muvhuso wa Mudzimu dze ra dzi lavhelela dzi ḓo ri ṱuṱuwedza u bvela phanḓa ri tshi ita nga hune zwa konadzea ngaho u ita zwine Mudzimu a zwi funa? Naa ni nga ita vhungoho ha uri a ni fhurwi nga mafulufhedziso a shango ḽa Sathane a mazwifhi ane a nga ita uri ni litshe u shumela Yehova? Naa ni ḓo ḓiimisela tshoṱhe u tikedza vhuvhusahoṱhe ha Yehova? Ungari zwine na zwi ita zwi nga sumbedza uri ni tama u tikedza vhuvhusahoṱhe ha Yehova nga hu sa fheli. Nga zwenezwo, ni ḓo vha na ndugelo ya u ḓiphina nga mulalo une wa ḓo vha hone lwa miṅwaha ya tshigidi—na nga hu sa fheli!
