1. Lapeny ango ma jo mogo ma lugen gipenye kwede?

 LAMEGO mo ma lagen ma okanyo pekki pi mwaki mapol openyo ki mwolo ni, “Tika abineno agikki ma peya ato?” Jo mogo ma dong gutiyo pi Jehovah pi kare malac gipenye kekengi ki lapeny acel-li. Watye ka kuro adada nino ma Lubanga biweko jami ducu doko nyen, kun kwanyo pekki ma watye ka denone i kare-ni. (Yabo 21:5) Kadi bed watye ki tyen lok muromo me bedo ki niye ni agikki me lobo pa Catan-ni dong tye cok, ento diyo cwiny me kuro nino meno twero bedo tek.

2. Lapeny ango madok i kom diyo cwiny ma wabinenogi?

² Baibul waco ni omyero wadi cwinywa. Wabinongo jami ma Lubanga ociko pigi, calo lutic pa Lubanga ma gukwo con, ka watye ki niye matek dok wadiyo cwinywa me kuro karene me cobo jami ma en ocikogi-ni. (Kwan Jo Ibru 6:11, 12.) Jehovah kikome bene obedo ka diyo cwinye. En onongo twero giko tim maraco i kare mo keken, ento tye ka kuro kare ma oporre. (Rom. 9:20-24) Pingo Jehovah diyo cwinye? Yecu obedo lanen maber i diyo cwiny nining? Adwogi maber ango ma wabinongo ka wadiyo cwinywa? Lagam me lapeny magi twero konyowa dongo kit me diyo cwiny kacel ki bedo ki niye matek, kadi bed nen ki botwa ni Jehovah tye ka galle.

3, 4. (a) Pingo Jehovah onyuto diyo cwiny i cobo yubbe pi lobo? (b) Jehovah otimo ngo pi jemo ma otimme i Eden?

³ Jehovah tye ki tyen lok matir me diyo cwinye. Tye gire ni en loyo polo ki lobo; ento jemo ma otimme i Eden okelo lapeny ma pire tek i kom twero me loc pa Jehovah. Jehovah tye ka diyo cwinye, kun  ngeyo ni bitere kare me gamo lapeny man maber. En tye ka diyo cwinye pi ber bedowa pien en tye ki ngec matut i kom tic, tim kacel ki tam pa ngat acel acel ma tye i polo ki lobo.​—Ibru 4:13.

⁴ Onongo obedo yub pa Jehovah ni likwayo pa Adam ki Kawa gunya gupong lobo. I kare ma Catan obwolo Kawa omiyo gin ki Adam pe gubedo luwiny, Lubanga pe ojalo yubbe-ni woko. Kome pe omyel, pe omoko tamme ngwec ngwec, nyo okeco, kun ilo cinge woko i kom dano. Ma ka meno, en oyenyo yo me cobo yub ma en onongo tye kwede pi dano kacel ki lobo. (Ic. 55:11) Pi cobo yubbe kacel ki nyuto ber pa twero me locce, Jehovah ojukke kene kun diyo cwinye, okuro pi mwaki alip mapol pi yubbe mogo me cobbe i yo maber.

5. Diyo cwiny pa Jehovah kelo mot ango?

⁵ Tyen lok mukene ma omiyo Jehovah tye ka diyo cwinye mot aye ni dano mapol omyero gunong kwo ma pe tum. I kare-ni, en tye ka yubbe me laro “lwak dano mapol ata.” (Yabo 7:9, 14; 14:6) Jehovah konyo dano kun tiyo ki tic me tito kwena, lwongogi me pwonyo lok i kom Ker-re kacel ki cikke me kit matir. Kwena me Ker-ri obedo kwena me yomcwiny bot dano, obedo “kwena maber.” (Mat. 24:14) Ngat acel acel ma Jehovah lwongo bino bote doko but kacokke me lurem me ada ma gimaro jami ma tye kakare ma gitye i wi lobo-ni lung. (Jon 6:44-47) Lubangawa me amara konyo kodi jo ma kit meno me nongo cwakke. En bene obedo ka yero ki i kin dano jo ma gibiloc i gamentene me polo. I nge nongo kabedogi i polo, jo ma lugen man bikonyo dano ma luwiny me bedo ki kwo ma roc pe iye kacel ki kwo ma pe tum. Dong nen ka maleng ni, kadi bed ni Jehovah tye ka diyo cwinye, en tye ka tic me cobo cikkene pi ber bedowa.

6. (a) I yo ango ma Jehovah odiyo kwede cwinye i kare pa Nua? (b) Jehovah tye ka diyo cwinye nining i kare-ni?

⁶ Jehovah diyo cwinye kadi bed kiyenyo kolo i kome. Me lapore, tam kong gin ma en oyero me timone i kom lutim maraco ma peya Pii Aluka obino. Lobo onongo opong ki tim me tarwang ki me gero, ci ‘ocwero cwiny’ Jehovah matek pi kit ma kwo pa dano onongo oballe kwede. (Acak. 6:2-8) En pe ye ni jami ma kit meno omedde naka, pi meno, en okelo pii aluka i kom dano ma pe luwiny. Kadi bed “Lubanga odiyo cwinye i komgi i kare pa Nua,” Jehovah obedo ka yubo yub me laro Nua ki luode. (1 Pet. 3:20) Jehovah oniango Nua ki tam ma en omoko ci omiyo bote tic me yubo yeya i kare ma opore. (Acak. 6:14-22) Medo i kom meno, Nua obedo “latit lok me kit ma atir,” otito bot jiranine gin ma onongo cok timme i anyim. (2 Pet. 2:5) Yecu owacci karewa-ni rom ki kare pa Nua. Jehovah dong omoko awene ma ebikelo kwede agikki me kit me kwo me kare-ni. Pe tye dano mo ma ngeyo “nino ki cawa” ma agikki man bibino iye. (Mat. 24:36) I kare-ni, watye ki tic ma Lubanga omiyowa me ciko dano ki waco botgi kit ma gitwero larre kwede.

7. Jehovah mono tye ka galle i cobo cikkene? Titti.

⁷ Tye ni, diyo cwiny pa Jehovah-ni pe tere ni en tye ka kuro ni kare okati. Pe kumeno, omyero pe water ni diyo cwinye-ni nyuto ni tamme nyo mitine nok iye! Ki lok ada, pe yot me terone kit meno ka wawoto ki ti kun wadeno can i kit me kwo marac me kare man. Cwinywa oromo tur nyo tamo ni Lubanga tye ka galle ki cobo cikkene. (Ibru 10:36) Wi  pe owil ni en tye ki tyen lok maber me diyo cwinye dok ni en tye ka tic ki kare ma tye-ni pi ber bedo pa luticce ma lugen. (2 Pet. 2:3; 3:9) Nen kong bene kit ma Yecu odiyo kwede cwinye.

8. Yecu onyuto diyo cwiny nining?

⁸ Yecu tye ka tiyo miti pa Lubanga dok otimo man dong pi mwaki alip ki alip. I kare ma Catan ojemo, Jehovah omoko tamme me cwalo Wode acel keken ma en ocweyo en kikome me bino i lobo macalo Meciya. Tam kong kit ma man onongo bigudo kwede Yecu​—ma odiyo cwinye kun kuro mot pi mwaki alip ki alip nio ka karene oromo. (Kwan Jo Galatia 4:4.) En pe obedo mot i kurone pi mwaki mapol ca; ma ka meno, en olungo wiye i timo tic ma Wonne omiye. I kare ma en obino i lobo, en ongeyo ni omyero eto to ma Catan aye okelo kit ma kitito pire con. (Acak. 3:15; Mat. 16:21) En omine i timo miti pa Lubanga kadi bed man okelo deno can ki arem malit. Gennene-ni obedo genne ma lamal loyo ducu. En pe oketo tamme i kome kene nyo i kom rwomme, dok wan watwero nongo adwogi maber ki i kom genne meno.​—Ibru 5:8, 9.

9, 10. (a) Ngo ma Yecu obedo ka timone kun diyo cwinye i kuro nino ma Jehovah oketo? (b) Wan omyero wanen nino ma Jehovah oketo-ni nining?

⁹ I nge cerre, kimiyo twero ducu ma i polo ki i lobo bot Yecu. (Mat. 28:18) En tye ka tic ki twero meno me cobo yub pa Jehovah ma lubbe ki kare ma Lubanga oketo. Yecu okuro mot i tung cing lacuc pa Lubanga nio wa i mwaka 1914 wek kiket lukworre macalo kom laten tyene. (Jab. 110:1, 2; Ibru 10:12, 13) En cokcok-ki bigiko kit me kwo me kare pa Catan-ni woko. Ento i kare-ni, Yecu tye ka tic ki dano kun terogi i “pii me kwo.”​—Yabo 7:17.

¹⁰ In tika itero lanen pa Yecu-ni calo yo ma omyero inen kwede kare ma Jehovah oketo? Yecu onongo tye ma otere me timo gin mo keken ma Wonne mito ni etim, medo i kom meno, en onongo tye atera me kuro kare ma Lubanga oketo. Ka watye ka kuro agikki me kit me kwo me kare pa Catan-ni, wan ducu omyero wadi cwinywa, ma pe wanguko timo gin mo ma nongo Lubanga peya owaco nyo ilo cingwa pien cwinywa nongo otur. Ngo ma watwero timone me dongo kodi kit me diyo cwiny ma kit meno?

11. (a) Kubbe ango ma tye i kin niye ki diyo cwiny? (b) Pingo watye ki tyen lok muromo me bedo ki niye matek?

¹¹ Ma peya Yecu obino i lobo, lunebi ki lutic ma lugen mukene gunyuto lanen maber i kit ma kadi wa dano ma tye ki roc twero diyo cwinye i kanyo pekki. Kubbe onongo tye i kin niyegi ki diyo cwinygi. (Kwan Yakobo 5:10, 11.) Ka onongo pe giye i gin ma Jehovah owaco botgi​—dok gipe ki niye​—onongo mono kono gudiyo cwinygi mot i cobbe pa cikkene? Kare ki kare, gurwatte ki jami ma kelo lworo nyo atematema me niyegi, kun gibedo ma cwinygi tek ni Lubanga motmot bitimo jami ma en ociko pire. (Ibru 11:13, 35-40) Wan watye ki tyen lok mapol kato megi me bedo ki niye matek, pien Yecu dong tye ka tic macalo “ngat ma cobo niyewa kakare.” (Ibru 12:2) En ocobo lok ma lunebi oloko con kun nyuto yub pa Lubanga i yo ma miyowa tyen lok muromo me bedo ki niye.

12. Ngo ma waromo timone me dongo niyewa?

 ¹² Yo maber ango ma watwero kwanyone me jingo niyewa, ki dong me diyo cwinywa? Pire tek ni omyero waket cik pa Lubanga i tic. Me laporre, tam kong tyen lok ma itye kwede me keto pi Ker-ri bedo mukwongo i kwoni. Tika itwero keto tek me keto cik ma nonge i Matayo 6:33 i tic? Iromo timo meno ka itero cawa malac i tic me tito kwena nyo loko kit me kwoni. Pe icaa kit ma Jehovah dong ogoyo laane i kom yelleni nio wa tin. Oromo bedo ni En okonyi me kwano Baibul ki latin kwan manyen nyo okonyi me nongo ‘kuc pa Lubanga ma gwoko tamwa.’ (Kwan Jo Pilipi 4:7.) Ibimedo pwocci pi diyo cwinyi ka i keto tammi i adwogi maber ma in kikomi inongo ki i lubo cik pa Jehovah.​—Jab. 34:8.

13. Wan watwero poro gin ma timme i dongo niye kacel ki diyo cwiny nining?

¹³ Dongo niye rom ki gin ma timme i tic me puru poto, pito kodi, ka dong kayone. Kare ducu ma lapur moni okayo kac mabup, cwinye doko tek me pito kodi i poto kot manyen. Ngene kene ni en myero odi cwinye mot i kuro kare me kac ento meno pe gengo en ki pito kodi, nyo bene medo puru potone ki dong pito kodi makato ma okato angec. En bedo ki gen ni ebikayo kac. I yo acel-lu, genwa i kom Jehovah medde, ka wamedde ki pwonyo cik pa Jehovah, lubone, ka dong kayo adwogi maber ki iye. Niyewa bene dongo, dok doko yot botwa me kuro mot ma wangeyo ni bibino.​—Kwan Yakobo 5:7, 8.

14, 15. Omyero wabedu ki neno ango i kom can ma dano deno?

¹⁴ Yo mukene me dongo kit me diyo cwiny obedo ngiyo kit ma wan waneno kwede lobo kacel ki kit ma wan watye kwede. Temme me neno jami kit ma  Jehovah neno kwede. Me laporre, tam i kom kit ma en neno kwede deno can pa dano. Wacon En cwinye cwer ka dano deno can; ento pe cwer cwiny nurre mukato kare, ma pe dong twero timo gin mo maber. En ocwalo Wode acel keken ma en ocweyo en kikome “pi turo tic pa Catan” ki dong kwanyo jami maraco ma Catan okelo i kom dano. (1 Jon 3:8) Ki lok ada, deno can tye pi tutuno, ento Lubanga bikwanyone matwal. I yo acel-lu, ma ka bedo ka paro pi jami maraco ma tye ka timme i lobo pa Catan-ni nyo awene ma bigik iye, omyero waket niye i kom jami ma pe ginen ento girii matwal. Jehovah oketo kare dong tye ma tim maraco bigik iye, dok en bigikone i karene kikome​—Ic. 46:13; Nek. 1:9.

¹⁵ I kare man me agikki ma kwo tek tutwal-li, waromo rwatte ki jami ma temo niyewa. Ma ka bedo ki akemo ka warwatte ki tim me gero nyo ka danowa me amara tye ka deno can, omyero wacung matek kun wageno Jehovah. Wan luroc, pi man pe yot me timo meno. Wi opo i kom gin ma Yecu otimo ma kicoyo i Matayo 26:39.​—Kwan.

16. Omyero pe wabed ka timo ngo i kare manok ma odong-ngi?

¹⁶ Gin ma balo diyo cwinywa obedo cwiny ni kong abed akur anen. Man tyen lokke ngo? Tye ni, ngat mo ma genne nok ni agikki dong tye cok romo cako goyo pulan mukene, ki tam ni ginne gwok nyo pe oromo timme kit ma Jehovah owaco kwede. Nyo ni, en romo tam ni, ‘abikuro aneno ka Jehovah cobo gin ma en loko ada.’ En oromo temme me nongo yweka i lobo man, yenyo lonyo macalo gin gwokkene ma ka keto pi Ker-ri bedo mukwongo nyo keto genne i kom kwan i rwom mamalo pi nongo kwo mayot i kare-ni. Ento ki lok ada, eno-ni mono nongo pe nyuto niye manok? Po ni Paulo ocuko cwinywa me poro jo ma lugen ma Jehovah ocikke botgi “pi niyegi, ki pi diyo cwinygi.” (Ibru 6:12) Jehovah pe biye ni lobo-ni omedde ki bedo marac ma kato kare ma en oketo ma lubbe ki mitine. (Ibru 2:3) Pi tutuno i kare-ni, omyero wati tic pa Jehovah ki cwinywa ducu. Pi meno, omyero wabed ma wangwa twolo kun watiyo tic me tito kwena ki mit kom, ma man kelo yengo ma laporre pe i kare-ni.​—Luka 21:36.

17, 18. (a) Kare ango ma watye kwede ma lubbe ki diyo cwiny? (b) Mot ango ma wanongo ka wadiyo cwinywa i kare-ni?

¹⁷ Kadi bed watiyo pi Lubanga pi dwe manok nyo pi mwaki pyera mapol, wamito ni wati pire pi naka. Diyo cwiny konyowa me kanyo peko wang ma wanongo larre, kadi bed kare odong ma rom mene pi agikki pa lobo man. Jehovah dong tye ka miniwa kare me nyuto genwa i tam ma en omoko ki ka twere, me dyere me deno can pi nyinge. (1 Pet. 4:13, 14) Lubanga bene tye ka miyo botwa pwonye ma twero konyowa me bedo ki diyo cwiny ma mitte pi nongo larre.​—1 Pet. 5:10.

¹⁸ Kimiyo twero ducu bot Yecu me loyo polo ki lobo, dong pe tye gin mo ma twero kwanyo in ki i cinge nikwanyo in kikomi. (Jon 10:28, 29) Pe omyero wabed ki lworo pi anyim nyo kadi to. Jo ma gibidiyo cwinygi nio wa i agikki gibilarre. Dong omyero pe wawek jo me lobo obitwa, omi wajuk jenge i kom Jehovah. Ma ka meno, omyero wamok tamwa me dongo i niye ki me tic ki kare ma Lubanga pud tye ka diyo cwinye-ni i yo maber.​—Mat. 24:13; kwan 2 Petero 3:17, 18.