Jehová Diosata ukat Jesusat paciencianïñ yateqasiñäni

“Tatitun paciencianïtapajja, qhespiyäwitakïtapa yatipjjam.” (2 PED. 3:15, MT.)

QHANAÑCHTʼASMATI

¿Kunjamanakatsa Jehová Diosajj paciencianïtap uñachtʼayawayi?

¿Kunatsa Jesusajj walja tiempo paciencianïñapäna?

¿Diosat paciencianïñ yateqasiñatakejj kun lurañasasa?

1. ¿Jehová Diosar taqe chuyma yupaychirinakat kunsa waljanejj jisktʼasipjje?

 JEHOVÁ DIOSAR taqe chuyma walja maranak serviri ukat jan waltʼäwinakan aguantawayiri mä kullakajj akham sänwa: “¿Akapachan tukuyap uñjañatakejj jakaskäti?” sasa. Jehová Diosaru walja maranaka taqe chuyma yupaychiri jilat kullakanakatjja, waljaniw ukham jisktʼasipjjaraki. Ukham jisktʼasiñajj walikïskiwa, kunattejja Jehová Diosajj ‘taqe kun machaqat lurkani’ ukanaksa ukat kuna jan walinakantï uñjasktan ukanak chhaqtayañapsa taqeniw uñjañ muntanjja (Apo. 21:5). Taqe kunatï pasaski ukanakajja, Supayan apnaqat aka ñanqha pachan tukusiñapajj sinti jakʼankatapwa uñachtʼayistu, ukampis uka urun puriniñapkam pacienciampi suytʼañajj chʼamakiwa.

2. ¿Kuna jisktʼanakarus aka yatichäwin qhanañchasiskani?

² Paciencianïñasawa sasaw Bibliajj qhanañchi. Jiwasatï Jehová Diosar taqe chuyma confiyañäni ukat pacienciampi suytʼañäni ukhajja, kunjamtï nayra yupaychirinakapajj Diosan arunakap phoqhasir uñjapkäna ukhamwa uñjarakiñäni (Hebreos 6:11, 12 liytʼasiñapawa). Jehová Diosan pacienciapat amuytʼañäni. Jupajja, aka ñanqha pachjja walja maranak nayraw tukjaspäna, ukampis urup puriniñapwa suyaski (Rom. 9:20-24). ¿Kunatsa Diosajj paciencianïpacha? ¿Kunjamsa Jesusajj Jehová Diosjam paciencianïtap uñachtʼayäna, ukat ukham paciencianïñajj kunjamsa yanaptʼistani? Diosan urupajj sintis qheptʼankaspa ukham amuyañäni ukhajja, uka jisktʼanakan qhanañchäwinakap yatjjatañaw Jehová Diosar jukʼampi confiyañataki ukat pacienciampi suytʼañatak yanaptʼistani.

¿KUNATSA JEHOVÁ DIOSAJJ PACIENCIANI?

3, 4. 1) ¿Kunatsa Jehová Diosajj paciencianïtap uñachtʼayäna? 2) Adanampi Evampi juchachasipkäna uka qhepatjja, ¿kunsa Jehová Diosajj luräna?

³ Jehová Diosajj taqe kunjjar Munañanïkchisa, paciencianïñatakejj  razonanakaniwa. Kunapachatï Adanampi Evampi juchachasipkäna ukhajja, wali wakiskir jisktʼanakaw uñstawayi, ukat uka jisktʼanakan qhanañchäwipajj alajjpachankirinakatakisa aka oraqenkirinakatakis wali wakiskiriwa. Uka jisktʼanakar sum qhanañchañatakejj tiempo wakisitap Jehová Diosajj sum yatïna, ukatwa wali pacienciampi suytʼäna. Alajjpachankirinakas ukat jaqenakas kunjam chuymanïpjjesa ukat kunanaksa lurapjje uk sum yati, cheqas kunanakatï jiwasatakejj askïspa ukwa luraski (Heb. 4:13).

⁴ Adanampin Evampin wawanakapajj aka Oraqe phoqhantapjjaspa ukwa Jehová Diosajj munäna. Kunapachatï Supayajj Evar pantjasiyäna ukat Adanas Diosar jan istʼkäna uka qhepatjja, Diosajj janiw amtap apanukkänti ni jaqenakarus jaytanukkänti. Jan ukasti, kuntï jaqenakatakisa ukat aka Oraqetakisa qalltan amtkäna ukanak phoqhañatakejj kunsa lurani ukwa amtawayäna (Isa. 55:11). Amtap phoqhañataki ukat taqe kunjjaru Munañanïtapa uñachtʼayañatakejja, Jehová Diosajj wali paciencianïtapwa uñachtʼayawayi, yamas yaqhep amtanakap phoqhasiñapatakejj waranq waranqa maranakaw wali pacienciampi suytʼawayi, ukhamat askirjam phoqhasiñapataki.

5. ¿Jehová Diosan pacienciampi suytʼatapat kuna bendicionanakas utji?

⁵ Maysa toqetjja, walja jaqenakan wiñay jakañ jikjjatapjjañapatakiw Jehová Diosajj pacienciampi suytʼaskaraki. Cheqas jichhürunakanwa “walja jaqenakar” qhespiyañatakejj kunatï wakiski uk luraski (Apo. 7:9, 14; 14:6). Yatiyañatak khitkistu uka toqew Jehová Diosajj Reinopata ukat kamachinakapat yateqapjjañapataki jaqenakar jawstʼaski. Diosan Reinopat suma yatiyäwinakajj jaqenakatakejj wali suma yatiyäwipuniwa (Mat. 24:14). Khitinakatï Jehová Diosan jawstʼäwipar iyaw sapki ukanakajja, oraqpachan Diosan cheqa yatichäwinakap munasipki ukanak taypinkapjjarakiwa (Juan 6:44-47). Jehová Diosaw jaqenakarojj Jupampi sum apasipjjañapatakejj yanaptʼaski. Ukat khitinakas alajjpachat apnaqanipjjani uk Juparakiw jaqenak taypit ajlliwayi. Alajjpachankjjapjjani ukhajja, jupanakaw Diosar istʼir jaqenakarojj jan juchanïpjjañapataki ukat wiñay jakañ jikjjatapjjañapatak yanaptʼapjjani. Ukhamasti, Jehová Diosajj pacienciampi suytʼkipanjja, kunatï amtap phoqhañatakejj wakiski ukanak luraski. Ukanakajj jiwasan askisatakiwa.

6. 1) Noé chachan urunakapanjja, ¿kunjamsa Jehová Diosajj paciencianïtap uñachtʼayäna? 2) ¿Kunjamsa Jehová Diosajj paciencianïtap jichhürunakan uñachtʼayaski?

⁶ Jaqenakajj sinti jan walinaksa Jehová Dios nayraqatan lurapkchejja, Jupajj paciencianïskakiwa. Ukaw Uma Juicio janïr purinkipanjja uñjasiwayi. Uka tiemponjja, aka Oraqejj nuwasiñanakampi wachoq qʼañu luräwinakampi phoqhantatänwa, ukat jaqenakan ukham jan phenqʼani jan walinak lurapjjatapatjja, Jehová Diosajj “walirak chuymapjja usuyasïna” (Gén. 6:2-8). Jupajj janiw uka jan walinak ukhamak uñchʼukkaspänti, ukatwa jan wali jaqenakarojj Uma Juiciompi tukjañ amtäna. Ukampis pacienciampi suyaskipanjja, Noé chacharu ukat familiapampir qhespiyañatakiw wakichaskäna (1 Ped. 3:20). Ukat tiempoparuw Jehová Diosajj kuntï lurañ amtkäna uk Noé chacharojj yatiyäna ukat arka lurañapatakis säna (Gén. 6:14-22). Ukhamarusa, Noé chachajj “cheqa arunak parl[irïnwa]” jupaw jaqe masiparojj Diosan juiciopat yatiyäna (2 Ped. 2:5). Jesusajj aka urunakat parlkasinjja, Noé chachan urunakapjamäniwa sasaw säna. Kunapachas aka jan wali pachajj tukjatäni uk Jehová Diosajj amtawayjjewa, “ukampis kuna horasäkanitejj jan ukajj kuna urükanitejj” ukjja janiw khiti jaqes yatkiti (Mat. 24:36). Jichhürunakanjja, Jehová Diosajj amtanakapata ukat kunjamsa jaqenakajj qhespiyasipjjaspa uk yatiyañasatakiw khitistu.

7. ¿Amtap phoqhañatakejj Jehová Diosajj sintipunit qheptʼaski? Uk qhanañchtʼam.

⁷ ¿Jehová Diosajj paciencianïtapatti tiempo ukhamak pasayaskpacha? Janiwa. Paciencianïtapatjja, janis yäqasirïkaspa ukham janiw  amuyañasäkiti. Ukampis chuymankipstjjtan jan ukajj akapachan tʼaqhesktan ukhajja, ukham amuyañajj chʼamakïspawa. Inas chʼam thayjtayasna jan ukajj amtanakap phoqhañatakejj Diosajj sintis qheptʼkaspa ukham amuyjjsna (Heb. 10:36). Jehová Diosajj pacienciampi suytʼañatakejj razonanakaniwa ukat amtap phoqhañataki uru puriniñapkam suytʼkasajja, taqe chuyma yupaychirinakaparuw yanaptʼaski, uk janipun armañäniti (2 Ped. 2:3; 3:9). Kunjamsa Jesusajj Awkipjam paciencianïtap uñachtʼayäna uk jichhajj yatjjatarakiñäni.

JESUSATWA PACIENCIANÏÑ YATEQASSNA

8. ¿Kunjamanakan jikjjatasisas Jesusajj paciencianïtap uñachtʼayäna?

⁸ Jesusajj millón millón maranakaw Diosan munañap taqe chuyma phoqhaski. Kunapachatï Supayajj Dios contra saytʼaskäna ukhajja, Jehová Diosaw sapa Yoqapan aka Oraqer Mesiasjam jutañap amtäna. Jesusatakejj Diosan uka amtap phoqhañajj kunjamänsa uk amuytʼañäni. Jupajj waranq waranqa maranakaw aka Oraqer jutañatakejj suyäna (Gálatas 4:4 liytʼasiñapawa). Ukampis janiw ukhamak suykäni, jan ukasti kuna lurañanaktï Awkipajj churkäna ukanakwa phoqhaskäna. Ukat aka Oraqer jutkäna ukhajja, Supayamp jiwayat uñjasiñapsa sum yatisïna, kunjamtï profecian siskäna ukhama (Gén. 3:15; Mat. 16:21). Jesusajj walsa tʼaqheskchïnjja, wali pacienciampiw Diosan munañapjja phoqhawayäna, ukhamatwa Diosar taqe chuyma servitap uñachtʼayäna. Janiw jupa pachpatak llakiskänti ukat Diosan Yoqapäkchisa altʼat chuymampiw tʼaqhesiwayäna. Ukasti jiwasatakejj yateqaskayapuniwa (Heb. 5:8, 9).

9, 10. 1) ¿Jehová Diosajj amtkäna uka uru puriniñapkam suykasajj kunsa Jesusajj luraskäna? 2) ¿Kunsa Jesusat yateqassna?

⁹ Jaktjjasajja, Jesusajj munañanïñwa alajjpachansa akapachansa katoqäna (Mat. 28:18). Uka munañapjja Jehová Diosan amtap phoqhañatakiw apnaqe, kunjamtï Diosajj amtkäna uka tiempor phoqhañataki. Jesusajja, wali pacienciampiw Awkipan kupïjjaparu qontʼasiñ 1914 marakam suyawayi, ukhaw taqjjatañapatak ‘taqe uñisirinakapajj kayupar uchatäpjjäna’ (Sal. 110:1, 2; Heb. 10:12, 13). Jupajj niyaw Supayan aka ñanqha pachaparojj tukjani. Ukäñkamasti, pacienciampiw jaqenakar uñjaski ukat “jakkir uma[ru]” irparaki (Apo. 7:17).

¹⁰ ¿Kunjamsa Diosar pacienciampi suytʼañ Jesusat yateqassna? Jesusajj taqe chuymaw kuntï Awkipajj maykäna uk phoqhañ munäna, ukampis Diosan amtaparjam tiempoparu phoqhasiñapwa pacienciampi suytʼäna. Supayan apnaqat aka ñanqha pachan tukjatäñap suykasajja, taqeniw paciencianïñasa, janipuniw Jehová Diosan amtapat nayrstʼañasäkiti ni aynachtʼatäktan ukhas jaytañasäkiti. Ukhamasti, ¿kunsa paciencianïñatakejj lurañasa?

¿KUNJAMSA JEHOVÁ DIOSAT PACIENCIANÏÑ YATEQASSNA?

11. 1) ¿Kunatsa confiyansampi pacienciampejj mayakïkaspas ukhamajja? 2) ¿Kunatsa Diosarojj jukʼampi confiyañasa?

¹¹ ¿Jaqenakajj juchararäkasinsa jan qarjtas pacienciampi suytʼapjjaspati? Jïsa, Jesusajj janïr aka Oraqer jutkäna ukhajja, walja profetanaka ukat Diosaru taqe chuyma yupaychirinakas ukwa uñachtʼayapjjäna. Confiyansapasa ukat pacienciapas mayakïkaspas ukhamänwa (Santiago 5:10, 11 liytʼasiñapawa). Jupanakatï Jehová Diosar jan confiyapkaspänjja, janiw Jupan arunakap phoqhasiñapjja pacienciampi suyapkaspänti. Awisajj jan walinakansa uñjasipkchïnjja, Jehová Diosajj arunakap kunjamats phoqhapuniniwa sasaw confiyapjjäna (Heb. 11:13, 35-40). Jiwasajja, nayra tiempot sipansa Diosar confiyañatakejj jukʼampi razonanakanïtanwa, kunattejj Jesusaw “iyawsañasjja phoqhachani” (Heb. 12:2). Jupaw profecianak phoqhasasa ukat Diosan amtanakap yatiyasasa, Jehová Diosaru taqe chuyma confiyañatak yanaptʼawayistu.

12. ¿Jehová Diosar taqe chuyma confiyañatakejj kunsa lurañasa?

 ¹² ¿Jehová Diosar taqe chuyma confiyañatakisa ukat paciencianïñatakis kunsa lurañasa? Jehová Diosan ewjjtʼanakapar istʼañaw wali wakiskirejja. Reinop nayraqat thaqhañajj kunatsa wali wakiskirejja uk amuytʼañäni. ¿Mateo 6:33 qellqatan siski uk sum phoqhañatak chʼamachassnati? Uk phoqhañatakejj inas jukʼampi yatiyañasa jan ukajj jakäwis mayjtʼayañajj wakischispa. Kunjamsa Jehová Diosajj chʼamachasitasat bendicistu uk janipun armañäniti. Inas mayniru Bibliat yatichañatak yanaptʼchistu jan ukajj “samarañapa” churchistu, “ukasti taqe kuntejj jaqejj amuytʼkaspas ukat jukʼamp jachʼawa” (Filipenses 4:7 liytʼasiñapawa). Jehová Diosan ewjjanakaparjam sarnaqasajj kuna askinaksa jikjjatawaytan ukanak amtapuniñäni ukhajja, Jehová Diosan pacienciap wali askirjamaw uñjañäni (Sal. 34:8).

13. Kunjamsa Jehová Diosar confiysna ukat jukʼamp paciencianïsna uk mä uñachtʼäwimp qhanañchtʼam.

¹³ Diosar jukʼamp confiyañajja, kunjamtï mä yapuchirejj satantki, yapup sum uñjki ukat cosechsa apthapiraki ukhamawa. Yapuchirejj walja cosecha apthapki ukhajja, jukʼamp confiyansampiw jutïr maran yapuchañatak amti. Cheqas cosecha apthapiñkamajj pacienciampiw suyañapa, ukampis satantaskakiniwa, janiw chʼam laqʼjtayaskaniti. Ukat jutïr maran inas jukʼamp oraqenakar satantchini, kunattejj achoqarakiniwa sasaw confiyi. Niya ukhamarakiw Jehová Diosan ewjjanakapampejj pasi. Sapa kuti yatichäwinakap yateqktan, ukarjam sarnaqktan, ukat askinak jikjjatktan ukhajja, Diosarojj jukʼampiw confiytanjja. Ukat kuna bendicionanaktï Jupajj churkistani uk jukʼamp pacienciampiw suyaraktanjja (Santiago 5:7, 8 liytʼasiñapawa). *

14, 15. ¿Jaqen tʼaqhesiñanakap kunjamsa uñjañasa?

 ¹⁴ Akapacharusa ukat kunjamantï jaqejj jikjjataski ukarus kunjamtï Jehová Diosajj uñjki ukham uñjañaw paciencianïñatak yanaptʼistani. Amuytʼañäni: Jehová Diosajj walja maranakas jaqen tʼaqhesitap uñjawaykchejja ukat ukanaka uñjasajj walsa chuym ustʼayaskchejja, janiw llakimpi apayasisajj kunatï askïki uka lurañ jaytkänti. Jan ukasti, munat sapa Yoqaparuw “Supayan luratanakap tʼunjiri” khithani, ukhamata taqe kunatï jaqenakar tʼaqhesiyki ukanak chhaqtayañapataki (1 Juan 3:8). Jehová Diosajj niyaw taqe tʼaqhesiñanakjja wiñayatak chhaqtayani. Ukhamasti, Supayan apnaqat akapachan jan walinak utjatapata llakisiñat sipansa jan ukajj jankʼak chhaqtjjañap munañat sipansa, kunatï jan uñjaski ukat wiñayatakïkani ukanakaruw taqe chuyma confiyañasa. Kunürus aka ñanqha pachar tukjani uk Jehová Diosajj amtawayjjewa, ukat tiempoparurakiw phoqhani (Isa. 46:13; Nah. 1:9).

¹⁵ Aka qhepa urunakanjja, inas iyawsäwisajj sinti yantʼat uñjaschini. Ukat jan waltʼäwinak utjatapat tʼaqhesiñäni jan ukajj munat familiaranakasar tʼaqhesir uñjañäni ukhajja, jan colerasiñäniti. Inas juchararätas laykojj ukajj chʼamächini, ukampisa Jehová Diosar taqe chuyma confiyañatak chʼamachasiñäni. Ukat Mateo 26:39 qellqatarjamajj kuntï Jesusajj lurkäna uk amtapuniñäni (liytʼasiñapawa).

16. ¿Akapachan tukusiñap suykasajj kunsa jan lurañasäki?

¹⁶ Jiwasatï Jehová Dios Awkisjam paciencianïñ munstanjja, janipuniw Arupat pächasiñasäkiti. ¿Ukajj kamsañsa muni? Maynejj tukuya urunakan sinti jakʼankatapat pächaski ukhajja, inas yaqhanak lurañ amtchispa, Jehová Diosajj inas arunakap jan phoqkchiniti sasa. Inas ukham amuyasajj akapachan wali aytatäñatak chʼamachaschispa ukat Diosan Reinop nayraqat thaqhañat sipansa inas qollqe thaqhañar uchaschispa, jan ukajj inas suma trabajo jikjjatañatakejj jachʼa yateqañ utanakar sarchispa. Ukham amtki ukajj Diosar jan confiyatapwa uñachtʼayi. Khitinakatï “iyawsäw toqe, jan qarjasisa” sarnaqasin Jehová Diosan bendicionap katoqawayapki ukanakat yateqasipjjam sasaw Pablojj ewjjtʼawayistu (Heb. 6:12). Jehová Diosajj akapachar tukjañ amtawayjjewa, ukat tiempoparuw ukajj phoqhasini (Hab. 2:3). Uka uru puriniñapkamasti, Jehová Diosarojj janiw pata chuymaki yupaychañasäkiti. Jan ukasti, Diosan suma yatiyäwinakap taqe chuymaw jankʼak yatiyañasa, ukat uk lurasaw jichhürunakansa kusisita jikjjatasiñäni (Luc. 21:36).

¿PACIENCIAMP SUYTʼATASAT KUNA BENDICIONANAKSA KATOQAÑÄNI?

17, 18. 1) Jehová Diosajj pacienciampi suytʼkipanjja, ¿kunsa jiwasajj uñachtʼaysna? 2) Jichhürunakan paciencianïtasatjja, ¿kuna bendicionanaksa katoqañäni?

¹⁷ Walja maranak nayrasa jan ukajj jichhakis Jehová Diosar uñtʼaskstanjja, taqe chuymaw wiñayatak serviñ muntanjja. Paciecianïñaw qhespiyäwi jikjjatañkam suytʼañatak yanaptʼistani, qhawqha tiempoy faltaskchi ukhakama. Jichhürunakanjja, Jehová Diosajj kuntï amtki ukar taqe chuyma confiyatas uñachtʼayañasatakiw tiempo churaskistu, ukat wakischini ukhajj sutip arjjatañ laykojj tʼaqhesiñsa janiw ajjsarktanti (1 Ped. 4:13, 14). Ukat qhespiyasiñatak wakiski uka paciencianïñasatakiw wakichaskistu (1 Ped. 5:10).

¹⁸ Jesusajj alajjpachansa, akapachansa munañanïñwa katoqawayi, ukhamasti janiw khitis jupat jitheqtaykistaspati, jan ukasti jiwasakiw jitheqtjjsna (Juan 10:28, 29). Jiwañarusa ukat jutïr urunakarus janiw ajjsarañasäkiti. Khitinakatï tukuykama pacienciampi aguantapkani ukanakakiw qhespiyatäpjjani. Ukhamasti janipuni aka pachampejj engañayasiñäniti ni Jehová Diosar confiyatassa apaqayasiñäniti. Jehová Diosajj pacienciampi suytʼkipanjja, Jupar jukʼampi confiyañatakiw chʼamachasiñasa ukat tiempsa janiw ina chʼusar aptʼañasäkiti (Mat. 24:13; 2 Pedro 3:17, 18 liytʼasiñapawa).

[Qhanañchäwi]

[Jiskt’anaka]

[21 janan fotonakapa]

Paciencianïñajja Diosan Reinop nayraqat uchañataki ukat walja bendicionanak katoqañatakiw yanaptʼistani