Maan e tra e awlɛn kɛ Zoova nin Zezi be sa

“An nian e Min’n i anwlɛn b’ɔ trɛ amun wun’n, amun ti nyanlɛ ti-ɔ.”​—2 PIƐ. 3:15.

?AMÚN TƐ́ SU SƐ?

?Wafa sɛ yɛ Zoova kleli kɛ ɔ trɛ i awlɛn ɔn?

?Ngue ti yɛ ɔ nin i fatali kɛ Zezi trɛ i awlɛn cɛ kpa ɔ?

?Ngue yɛ e kwla yo naan y’a sɔnnzɔn Zoova i awlɛn tralɛ’n niɔn?

1. ?Kosan benin yɛ Ɲanmiɛn i sufuɛ kpa wie’m be fa usa be wun ɔn?

 ANIAAN bla kun m’ɔ su Zoova kpa’n yɛ ɔ trɛli i awlɛn sa kekleekle kpanngban nun afuɛ ko ju wie’n, ɔ usali kɛ: “?Naan kɛ mɛn nga i awieliɛ’n jú’n nn min ɲin te o su?” Aniaan wie mɔ be boli Zoova i sulɛ bo w’a cɛ kpa’n be usa kosan kunngba sɔ’n wie. E ɲin o blɛ mɔ Ɲanmiɛn wá yó like’n kwlaa uflɛ’n m’ɔ́ yí sa kwlaa nga be o e su andɛ yɛ’n, i sin kpa. (Ngl. 21:5) Kannzɛ e wun ninnge nga be kle kɛ Satan i mɛn’n i nunnunlɛ cɛn’n nunman mmua kun’n, sanngɛ ɔ kwla yo kekle man e kɛ e tra e awlɛn e minndɛ cɛn sɔ’n.

2. ?Awlɛn tralɛ i su kosan benin mun yɛ é wá tɛ́ be su ɔ?

² Biblu’n kle kɛ ɔ fata kɛ e tra e awlɛn. Kɛ laa Ɲanmiɛn i sufuɛ kpa’m be sa’n, sɛ e lafi Ɲanmiɛn su kpa naan e tra e awlɛn e minndɛ blɛ nga i waan ɔ́ yó ninnge wie mun’n, é ɲán ninnge sɔ mun sakpa. (An kanngan Ebre Mun 6:11, 12 nun.) Zoova bɔbɔ’n ɔ trɛ i awlɛn. Sɛ ɔ ti kɛ i waan ɔ́ núnnún klunwi yolɛ’n i osu’n nn ɔ nunnunnin i. Sanngɛ ɔ su minndɛ blɛ nga mɔ i sɔ yolɛ’n nin i fata’n. (Rɔm. 9:20-24) ?Ngue ti yɛ ɔ minndɛ lele sɔ ɔ? ?Wafa sɛ yɛ Zezi niɛnnin i Si i awlɛn tralɛ’n su mɔ i sɔ yolɛ’n nun’n ɔ kle e ajalɛ kpa ɔ? ?Ngue ti yɛ ɔ ti kpa man e kɛ e tra e awlɛn kɛ Ɲanmiɛn sa ɔ? Kosan sɔ’m be su tɛlɛ’m be kwla uka e naan kannzɛ ɔ yo e kɛ Zoova cuɛncuɛn i ja ase’n, y’a suan awlɛn tralɛ’n naan kusu e Ɲanmiɛn sulafilɛ’n w’a taka kpa.

?NGUE TI YƐ ZOOVA TE MINNDƐ Ɔ?

3, 4. (a) ?Ngue ti yɛ Zoova w’a minndɛ lele sɔ ɔ? (b) ?Kɛ be yoli ɲin kekle Edɛni fie’n nun lɔ’n, ngue yɛ Zoova yoli ɔ?

³ Zoova si like nga ti yɛ ɔ te minndɛ’n. I yo, ɔ ti su kɛ i yɛ ɔ ti like kwlaa be ti’n niɔn, yɛ ɔ ti i sɔfuɛ blɛ kwlaa nun. Sanngɛ ɲin kekle nga be yoli i Edɛni fie’n nun lɔ’n ti’n, ndɛ wie mɔ be ti cinnjin man ɲanmiɛn su lɔfuɛ mun nin asiɛ’n  sufuɛ mun’n, ɔ fata kɛ be nun kpɛ. Zoova si kɛ ndɛ sɔ’m be nun kpɛlɛ kpa sa’n ɔ́ fá blɛ. I ti yɛ w’a minndɛ lele sɔ ɔ. Kɛ m’ɔ si akunndan nga be kwlaa nga be o ɲanmiɛn su lɔ’n nin asiɛ’n su wa’n be bu’n, ɔ nin be aeliɛ’n be kpa’n ti’n, e si kɛ ninnge nga ɔ su yo be’n be ti e kpa yolɛ liɛ.​—Ebr. 4:13.

⁴ Zoova klun sa’n yɛle kɛ Adam nin Ɛvu be wu ba naan be mma’m be yi asiɛ’n. Kɛ Satan lakali Ɛvu mɔ i sin Adam yoli ɲin kekle Ɲanmiɛn su’n, Ɲanmiɛn w’a seman kɛ ɔ yoman like ng’ɔ sunnzunnin’n kun. I wun w’a usumɛn i annzɛ w’a tɔman su sa w’a faman ajalɛ, annzɛ kusu w’a yiman klɔ sran’m be ase. Like ng’ɔ yoli’n yɛle kɛ ɔ kunndɛli wafa nga ɔ ko yo naan like ng’ɔ sunnzunnin i klɔ sran nin asiɛ’n be lika’n w’a kpɛn su’n. (Eza. 55:11) Kɛ ɔ ko yo naan Zoova i klun sa’n w’a kpɛn su naan w’a kle kɛ i yɛ ɔ le atin sie nglo nin asiɛ’n, ɔ trɛli i awlɛn kpa. Wie liɛ bɔbɔ’n, ɔ minndɛli afuɛ akpi kpanngban naan like nga i waan ɔ́ yó’n, w’a yo i bue wie mun kɛ ɔ nin i fata’n sa.

5. ?Ngue ti yɛ kɛ Zoova minndɛ’n ɔ ti kpa man e ɔ?

⁵ Like kun ekun nga ti yɛ Zoova w’a minndɛ lele sɔ’n, yɛle kɛ ɔ klo kɛ sran kpanngban kpa be ɲan anannganman nguan. Kɛ é sé yɛ’n, ɔ su siesie ninnge mun naan “sran kpanngban kpa” mun be fite nun. (Ngl. 7:9, 14; 14:6) Jasin fɛ’n i bolɛ’n yɛ Zoova fa yiayia sran mun naan be suɛn i Sielɛ’n i su like naan be si i mmla mɔ be ti sɛsɛ mun ɔn. Ndɛ kpafuɛ nga be kwla kan kle sran mun’n yɛle Ɲanmiɛn Sielɛ’n i su ndɛ’n. I kpa bɔbɔ’n, ɔ ti “jasin fɛ.” (Mat. 24:14) Sran kwlaa nga Zoova yiɛ i’n, ɔ kaci i anuannzɛ m’ɔ o asiɛ’n wunmuan’n su’n mɔ i nunfuɛ’m be ti i janvuɛ’n, yɛ be klo like ng’ɔ ti kpa’n i yolɛ’n i nunfuɛ. (Zan 6:44-47) E Ɲanmiɛn m’ɔ klo e’n, ɔ ukɛ i sɔfuɛ mun naan be yo like nga i klun jɔ su’n. Asa ekun’n, ɔ su kpa klɔ sran’m be nun wie mun naan be yo i awa m’ɔ o ɲanmiɛn su lɔ’n i nunfuɛ. Ɲanmiɛn su lɔ’n, bé úka asiɛ’n su wafuɛ nga be ti aɲinyiɛfuɛ’n naan fɔ ng’ɔ o be nun’n ɔ wie, naan be ɲan anannganman nguan. Nanwlɛ kannzɛ Zoova su minndɛ’n, sanngɛ ɔ di junman naan i klun sa’n kpɛn su. E bɔbɔ e kpa yolɛ ti yɛ ɔ yo i kwlaa sɔ’n niɔn.

6. (a) ?Nowe blɛ su’n, wafa sɛ yɛ Zoova trɛli i awlɛn ɔn? (b) ?Wafa sɛ yɛ Zoova trɛ i awlɛn e blɛ liɛ nga su ɔ?

⁶ Kannzɛ be fɔkɔ Zoova i awlɛn’n, sanngɛ ɔ trɛ i awlɛn. E wun i sɔ liɛ’n wafa ng’ɔ nin klunwifuɛ mun trannin ka naan nzue dan’n w’a tɔ’n i nun. Nzaje sa nin sa sukusuku yolɛ’n yɛ ɔ truli asiɛ’n su ɔ. Sa tɛ mɔ be yoli i sa trilili’n, ɔ yoli Zoova “i ya dan.” (Bob. 6:2-8) Sanngɛ w’a kplinman su kɛ sran’m be yo sa tɛtɛ’n sa cɔcɔcɔ. I ti’n ɔ seli kɛ ɔ́ wá yó naan nzue dan kun tɔ naan ɔ nunnun klɔ sran nga be ɲin yimɛn i’n. Kɛ ɔ́ mínndɛ naan blɛ sɔ’n ju’n, ɔ yoli like nga ɔ ko yo naan Nowe nin i awlobofuɛ’m b’a fite nun’n. (1 Piɛ. 3:20) Zoova kannin nzue dan’n i tɔlɛ’n ndɛ kleli Nowe blɛ ng’ɔ nin i fata’n su, yɛ ɔ seli i kɛ ɔ bobo mmeli kun. (Bob. 6:14-22) Asa kusu’n, Zoova seli Nowe kɛ ɔ bo sa nga ɔ́ wá jú’n i su kle i wiengu mun. Biblu’n waan Nowe ‘boli sa nga be yo-ɔ ɔ ti su’n i ndolo.’ (2 Piɛ. 2:5) Zezi seli kɛ e blɛ liɛ’n ɔ nin Nowe i blɛ liɛ’n be ti kun. Zoova w’a sie cɛn kun m’ɔ́ fá núnnún mɛn tɛ nga ɔ. “Cɛn sɔ’n nin i dɔ’n, sran fi si-mɛn i.” (Mat. 24:36) Ɲanmiɛn mannin e junman andɛ kɛ e kan e kle sran mun, naan e kle be like ng’ɔ fata kɛ be yo naan b’a fite nun’n.

7. ?Zoova cuɛncuɛn i ja ase kasiɛ ng’ɔ boli be’n be nuan yialɛ’n nun? Amun yiyi nun.

⁷ Nanwlɛ, kɛ Zoova trɛ i awlɛn minndɛ’n, i sɔ’n kleman kɛ ɔ o lɛ sa ngbɛn naan ɔ diman junman. Kusu nán maan e bu i le kɛ Zoova i awlɛn m’ɔ tra’n ti’n e ndɛ lomɛn i! Sanngɛ kɛ é yó kpɛnngbɛn é kɔ́’n annzɛ kɛ afɛ’n tín e su mɛn tɛ nga nun’n, kɛ ɔ yo naan i sɔ akunndan w’a baman e klun’n, ɔ kwla yo kekle. E sa sin kwla bubu e, annzɛ ɔ kwla yo e kɛ Ɲanmiɛn cuɛncuɛn i ja ase naan w’a yia kasiɛ ng’ɔ boli be’n be nuan sa. (Ebr. 10:36) Nán maan e wla fi su kɛ ɔ le like ti mɔ w’a minndɛ lele’n, naan kusu kɛ ɔ́ mínndɛ sɔ’n, ɔ yo ninnge uflɛ wie  mun ekun fa yo i sufuɛ kpa’m be ye. (2 Piɛ. 2:3; 3:9) Siɛn’n, maan e nian wafa nga Zezi niɛnnin i Si i awlɛn tralɛ’n su’n.

?WAFA SƐ YƐ ZEZI KLELI E AJALƐ KPA AWLƐN TRALƐ’N NUN ƆN?

8. ?Sa benin nun yɛ Zezi trɛli i awlɛn ɔn?

⁸ Kɛ é sé yɛ’n Zezi yo Ɲanmiɛn i klun sa’n, yɛ ɔ sɔ i sɔ yolɛ nán andɛ sa ɔ. Kɛ Satan yoli ɲin kekle Zoova su’n, Zoova fali ajalɛ naan i Wa kunngba cɛ’n ɔ bla asiɛ’n su wa naan ɔ wa yo Mɛsi’n. Maan e bu Zezi i awlɛn m’ɔ trali’n i sin kan e nian. Ɔ minndɛli lele afuɛ akpiakpi naan blɛ sɔ’n w’a ju. (An kanngan Galasifuɛ Mun 4:4 nun.) Kusu nán kɛ Zezi minndɛli sa ngbɛn ɔn. Blɛ sɔ nun’n, ɔ dili junman nga i Si fa mɛnnin i’n. Kɛ ɔ bali asiɛ’n su wa’n, ɔ sili kɛ Satan wá yó maan bé kún i kɛ nga Ɲanmiɛn Ndɛ’n fa kannin’n sa. (Bob. 3:15; Mat. 16:21) Kannzɛ ɔ si kɛ ɔ́ wá wú ɲrɛnnɛn wie’n, sanngɛ ɔ trɛli i awlɛn yoli Ɲanmiɛn klun sa’n. I sɔ liɛ’n nun’n, Zezi i ajalɛ ng’ɔ kleli’n, ɔ lemɛn i wunsu. W’a bumɛn i bɔbɔ i wun akunndan yɛ w’a fɛmɛn i ɲin w’a siemɛn i ɲrun m’ɔ le i’n su. Ɔ maan ɔ fata kɛ e niɛn i ajalɛ’n su.​—Ebr. 5:8, 9.

9, 10. (a) ?Kɛ Zezi mínndɛ kɛ blɛ nga Ɲanmiɛn sieli’n ju’n, ngue yɛ ɔ yo? (b) ?Wafa sɛ yɛ e kwla nian Zezi i ajalɛ’n su ɔ?

⁹ Kɛ Ɲanmiɛn cɛnnin Zezi’n, ɔ mɛnnin i atin kɛ ɔ sie ɲanmiɛn su lɔ nin asiɛ’n su ninnge’n kwlaa. (Mat. 28:18) Ɔ fɛ i sɔ kwlalɛ’n yo Zoova i klun sa’n. Ɔ nian blɛ nga Zoova sieli’n su yɛ ɔ yo i sɔ liɛ’n niɔn. Zezi trɛli i awlɛn minndɛli Ɲanmiɛn i sa fama su lele afuɛ nga be flɛ i 1914 nun naan Ɲanmiɛn yi i kpɔfuɛ’m be ase i bo naan ɔ fa be yo i ja siesiewlɛ. (Jue. 110:1, 2; Ebr. 10:12, 13) Ɔ ka kaan sa’n ɔ́ wá núnnún Satan i mɛn’n. Ka naan i sɔ blɛ liɛ’n w’a ju’n, Zezi uka sran mun blɛblɛblɛ naan Ɲanmiɛn i klun jɔ be wun yɛ ɔ fa be kɔ “nzue ti mun bɔ be man nguan’n be nuan.”​—Ngl. 7:17.

¹⁰ ?Amun wun wafa nga amun kwla nian Zezi i ajalɛ’n su’n? Ɔ si kɛ Zoova w’a kle blɛ kun m’ɔ́ fá núnnún Satan i mɛn’n niɔn. Zezi i wun blibli i kɛ ɔ́ yó like kwlaa nga i Si se i kɛ ɔ yo’n. Sanngɛ ɔ minndɛ kɛ blɛ nga Ɲanmiɛn sieli’n ju ka. Kɛ é mínndɛ kɛ be nunnun Satan i mɛn’n, ɔ fata kɛ e kwlaa’n e tra e awlɛn. Nán maan e kpli sanngɛ e minndɛ Ɲanmiɛn. Asa kusu’n, nán maan e sa sin m’ɔ bubu e ti’n e yaci Ɲanmiɛn sulɛ. ?Ngue yɛ é yó naan y’a kwla tra e awlɛn sɔ ɔ?

?WAFA SƐ YƐ N KWLA TRA MIN AWLƐN KƐ ƝANMIƐN SA Ɔ?

11. (a) ?Wafa sɛ yɛ awlɛn tralɛ’n nin Ɲanmiɛn sulafilɛ’n be kɔ likawlɛ ɔ? (b) ?Ngue yɛ e le i mɔ e kwla jran su e lafi Ɲanmiɛn su ɔ?

¹¹ Ka naan Zezi w’a ba asiɛ’n su wa’n, Ɲanmiɛn nuan ijɔfuɛ mun nin Ɲanmiɛn i sufuɛ nanwlɛfuɛ uflɛ wie mun be kleli kɛ klɔ sran mɔ fɔ o be nun’n be kwla tra be awlɛn be minndɛ. Be Ɲanmiɛn sulafilɛ’n ɔ nin be awlɛn tralɛ’n be ɔli likawlɛ. (An kanngan Zak 5:10, 11 nun.) Sɛ ɔ ti kɛ b’a lafiman Zoova su’n, annzɛ b’a faman be wla b’a guɛmɛn i kasiɛ ng’ɔ boli be’n be su’n, nn b’a kwlá minndɛman kasiɛ sɔ’m be su kpɛnlɛ’n. Kɛ mɔ be lafili su kɛ sɛ i blɛ’n ju’n Ɲanmiɛn yía nda ng’ɔ tali be’n be nuan ti’n, be kleli be ɲrɛnnɛn dan. (Ebr. 11:13, 35-40) E le like kpa kun ekun mɔ e kwla jran su naan y’a lafi Ɲanmiɛn su kpa ɔ. Yɛle kɛ siɛn’n Zezi o lɛ yɛ “i yɛ maan é láfi [Nyanmiɛn] su lele gúɛ i ti nin i bo-ɔ.” (Ebr. 12:2) Ɔ yiali Ɲanmiɛn nuan ijɔfuɛ’m be ndɛ nga be kannin be’n be nuan, yɛ wafa nga ɔ yiyili ninnge nga Ɲanmiɛn waan ɔ́ yó be’n be nun’n maan e Ɲanmiɛn sulafilɛ’n kwla yo dan.

12. ?Ngue yɛ e kwla yo naan e Ɲanmiɛn sulafilɛ’n i bo w’a wla ase kpa ɔ?

¹² ?Ngue yɛ e kwla yo naan e Ɲanmiɛn sulafilɛ’n i bo w’a wla ase kpa naan y’a kwla tra e awlɛn ɔn? Like cinnjin kpa kun mɔ e kwla yo’n yɛle afɔtuɛ nga Ɲanmiɛn man e’n be su falɛ. Maan e bu like nga ti yɛ ɔ fata kɛ e fa Ɲanmiɛn Sielɛ’n e sie i like kwlaa ɲrun’n i akunndan e  nian. ?Kɛ e niɛn i sa’n e kwla mian e ɲin kpa ekun naan y’a fa afɔtuɛ ng’ɔ o Matie 6:33 nun’n su kpa? Ɔ kwla yo jasin fɛ’n i bolɛ dɔ’n yɛ ɔ ti mɔ e uka su ɔ, annzɛ ninnge wie mɔ e yo be laa’n yɛ ɔ ti mɔ e yaci be yolɛ ɔ. Nán maan e ɲin kpa su kɛ, kɛ mɔ e mian e ɲin e fa Zoova i afɔtuɛ’m be su’n ti’n w’a yra e su lele w’a fa ju andɛ. Atrɛkpa’n, ɔ yoli maan e ɲannin sran kun mɔ e su kle i Biblu’n nun like ɔ, annzɛ ɔ yoli ‘maan e wun jɔ e fɔuun.’ (An kanngan Filipfuɛ Mun 4:7 nun.) Sɛ e fa e ɲin sie i suyralɛ sɔ’m be su’n é wún i kɛ sɛ e tra e awlɛn ɔn, ɔ ti like kpa.​—Jue. 34:9.

13. ?Wafa nga e Ɲanmiɛn sulafilɛ’n kwla yo naan y’a tra e awlɛn’n, like benin yɛ e kwla fa sunnzun i ɔ?

¹³ Wafa nga Ɲanmiɛn sulafilɛ’n kwla yo naan y’a tra e awlɛn’n, sunnzun ase nga kwla uka e naan y’a wun i wlɛ kpa. Yɛle kɛ fie difuɛ’n ɔ ta like, ɔ niɛn i lika yɛ ɔ ti i su mma’n. Blɛ kwlaa nga i ninnge’m be yo kpa’n, ɔ ɲan fanngan ta like uflɛ ekun. Wie liɛ bɔbɔ’n ɔ di fie uflɛ ekun. Kannzɛ ɔ si kɛ ɔ́ mínndɛ lele naan w’a ti like ng’ɔ tali’n i su mma’n, sanngɛ ɔ ta like sɔ’n. Ɔ lafi su kpa kɛ ɔ́ tí like sɔ’n i su mma. I kunngba’n, kɛ e suan Zoova i afɔtuɛ’m be su like’n, mɔ e fa be su’n mɔ i bo’n gua kpa man e’n, e lafi i su kpa ekun tra laa’n. Kpɛkun ɔ yo pɔpɔ man e kɛ e tra e awlɛn e minndɛ ninnge kpakpa nga e si kɛ bé wá bá’n.​—An kanngan Zak 5:7, 8 nun.

14, 15. ?Wafa sɛ yɛ ɔ fata kɛ e bu ɲrɛnnɛn nga be tɔ klɔ sran’m be su mun ɔn?

¹⁴ Like kun ekun m’ɔ kwla uka e naan y’a tra e awlɛn’n yɛle mɛn nga e o nun yɛ’n, ɔ nin e bɔbɔ e tranlɛ mɔ e fa tran’n i akunndan bulɛ. Maan e bu ninnge mun kɛ Zoova fa bu be’n sa. E kwla bu wafa nga ɔ bu klɔ sran’m be fɛlɛ mɔ be fɛ’n i akunndan. Kɛ ɔ fɛ i laa lele’n, kɛ ɔ wun afɛ ng’ɔ o sran’m be su’n, ɔ yo i ya. Sanngɛ w’a mɛnmɛn i sɔ liɛ’n i atin kɛ ɔ tɛnndɛn i ɲrun naan w’a yoman like ng’ɔ ti kpa’n. Ɔ sunmɛnnin i Wa kunngba cɛ’n naan ɔ wa bu “sa nga mmusu’m be si Satan yo’n i nuan nnya” naan  ɔ yi ɲrɛnnɛn kwlaa nga Satan fa yili klɔ sran’m be su’n. (1 Zan 3:8) Ɔ ka kaan sa’n Ɲanmiɛn wá yí ɲrɛnnɛn ng’ɔ o e su’n be kwlaa. Sran’m be su wunman ɲrɛnnɛn kun le. Ɔ maan e kloman kɛ é mán klunwi yolɛ ng’ɔ o mɛn nga nun’n i atin naan ɔ yo maan e Ɲanmiɛn sulafilɛ’n kan ase. E kloman kɛ é kplí kɛ blɛ nga Zoova wá núnnún mɛn nga’n ɔ ju ndɛndɛ. Maan e lafi kasiɛ nga Zoova boli be’n be su. Zoova w’a sie blɛ trele nga ɔ́ núnnún mɛn tɛ nga’n, yɛ blɛ sɔ’n i su sɛsɛsɛ yɛ ɔ́ yó i sɔ liɛ’n niɔn.​—Eza. 46:13; Naɔ. 1:9.

¹⁵ Mɛn ng’ɔ su kɔ i bue nuan mɔ lika’n w’a yo kekle yɛ’n nun’n, sa kekleekle wie mɔ bé sá e Ɲanmiɛn sulafilɛ’n nían’n be kwla tɔ e su. Nzaje sa annzɛ sa uflɛ wie’m be ti’n, e bɔbɔ annzɛ e awlɛn su sran’m be kwla wun ɲrɛnnɛn. Ɔ fataman kɛ i sɔ liɛ’n ti e fa ya, sanngɛ maan e fua kpa kɛ é fá e wla kwlaa é gúa Zoova su. Kɛ mɔ fɔ’n o e nun’n ti’n, i sɔ yolɛ’n su yoman pɔpɔ. Sanngɛ maan like nga Zezi yoli mɔ be klɛli i Matie 26:39 nun’n kpɛn e klun.​—An kanngan nun.

16. ?Kɛ é mínndɛ kɛ mɛn’n i awieliɛ’n ju’n, ngue yɛ ɔ fataman kɛ e yo ɔ?

¹⁶ Sran nga ɔ bumɛn i kpa kɛ mɛn nga i awieliɛ’n w’a mantan koko’n, ɔ kwla fa ajalɛ tɛ. Ɔ kwla bu i kɛ ɔ fata kɛ ɔ yo ninnge wie mun naan nja, sɛ kasiɛ nga Zoova boli be’n b’a kpɛnman su’n w’a fa be w’a yo i wun sa ye. Ɔ kwla se i wun kɛ: ‘M’an m minndɛ n nian sɛ sakpa naan Zoova yo kasiɛ ng’ɔ boli be’n be nuan su sa o.’ Akunndan tɛ bulɛ sɔ’n kwla yo maan sran sɔ’n i awlɛn tralɛ yo kekle. I agualiɛ su’n, ɔ kwla kunndɛ kɛ ɔ́ yó sran dan mɛn nga nun annzɛ kusu ɔ kwla fɛ i wla gua sika su, kpɛkun ɔ faman Ɲanmiɛn Sielɛ’n siemɛn i like kwlaa ɲrun kun. Annzɛ mɛn nga nun pɔɔ nun tranlɛ’n ti’n, ɔ kwla fɛ i wla gua suklu dan dilɛ’n su. ?Sanngɛ sran ng’ɔ yo sɔ’n, nn ɔ nunman lɛ yimɛn i nglo kɛ ɔ lafiman Ɲanmiɛn su? “Be nga be lafi Nyanmiɛn su’n, bɔ be tra be anwlɛn” mɔ i ti’n be ɲannin ninnge nga Zoova tali nda kɛ ɔ́ fá mán be’n, Pɔlu wlali e fanngan kɛ e nian be liɛ’n su. Maan i sɔ’n tran e klun. (Ebr. 6:12) Zoova w’a dun mmua w’a kle blɛ ng’ɔ́ núnnún mɛn tɛ nga’n, yɛ blɛ sɔ’n su sɛnmɛn i wun. (Aba. 2:3) Ka naan blɛ sɔ’n w’a ju’n, ɔ fataman kɛ e fa Zoova i sulɛ’n e tratra e sa bɛ nun. Sanngɛ maan e wla kpɛn su titi kɛ e o mɛn’n i bue nuan, yɛ maan e mian e ɲin e di jasin fɛ’n bolɛ junman m’ɔ man aklunjuɛ dan’n. Kɛ é sé yɛ bɔbɔ’n e kwla di junman sɔ’n i su aklunjuɛ m’ɔ leman wunsu’n.​—Lik 21:36.

?KƐ E TRA E AWLƐN’N YE BENIN YƐ E ƝƐN I Ɔ?

17, 18. (a) ?Kɛ é trá e awlɛn é mínndɛ’n, ngue yolɛ wun atin yɛ e le i ɔ? (b) ?Sɛ e tra e awlɛn’n, suyralɛ benin yɛ é ɲɛ́n i ɔ?

¹⁷ Sɛ blɛ li yɛ y’a bo Ɲanmiɛn i sulɛ bo o, annzɛ kusu e sɔli i sɔ yolɛ w’a di afuɛ kaka kpa o, e kunndɛ kɛ é yó i sɔ anannganman. Kannzɛ blɛ ng’ɔ te ka naan b’a nunnun mɛn nga’n ɔ te sɔn annzɛ w’a sɔnman’n, e awlɛn tralɛ’n yo naan y’a jran kekle lele naan blɛ sɔ’n w’a ju. Dɔ nga su’n, Zoova man e blɛ naan e kle kɛ e lafi ajalɛ ng’ɔ fa be’n be su kpa, naan ɲrɛnnɛn blɛ’n nun bɔbɔ’n e su kpɔcimɛn i le. (1 Piɛ. 4:13, 14) Asa ekun’n, Ɲanmiɛn su kle e like ng’ɔ kwla uka e naan y’a tra e awlɛn y’a minndɛ mɛn nga i awieliɛ’n naan y’a ɲan e ti.​—1 Piɛ. 5:10.

¹⁸ Zezi le atin sie ɲanmiɛn su lɔ nin asiɛ’n su ninnge’n kwlaa. Sɛ e nin Ɲanmiɛn e nanti klanman titi’n, like fi sa su kwlá yoman naan w’a sasaman e. (Zan 10:28, 29) Maan ɔ yo e ɲrun lɔ sa mun o annzɛ wie’n bɔbɔ o, nán maan be wun srɛ kun e. Be nga be tra be awlɛn lele mɛn nga i awieliɛ’n bé fíte nun. I sɔ’n ti’n, ɔ fata kɛ e nian e wun naan akunndan nga mɛn’n nunfuɛ’m be bu’n, w’a saman e naan w’a yoman naan y’a yaci Zoova i sulafilɛ. Blɛ mɔ Ɲanmiɛn te trɛ i awlɛn’n, maan e fua kɛ é yó naan e Ɲanmiɛn sulafilɛ’n i bo’n wla ase kpa, yɛ maan e fua kɛ é fá e blɛ’n é yó ninnge mun ngwlɛlɛ su.​—Mat. 24:13; an kanngan 2 Piɛr 3:17, 18 nun.

[Kosan mun]

[Foto mun, bue 21]

Amun awlɛn tralɛ’n ɔ́ úka amun naan amun a fa Ɲanmiɛn Sielɛ’n b’a sie i like kwlaa ɲrun naan amun a ɲan suyralɛ!