Longfala Tingting Blong God Mo Jisas i Tijim Yumi

“Masta blong yumi i gat longfala tingting blong wet long yufala. Mo yufala i mas luk fasin ya blong hem olsem janis blong yufala blong God i sevem yufala.”​—2 PITA 3:15.

?BAMBAE YU YU ANSA OLSEM WANEM?

?Jehova i soemaot olsem wanem se hem i gat longfala tingting?

?From wanem Jisas i mas gat longfala tingting blong longtaem?

?Yumi mas mekem wanem blong gat longfala tingting olsem Jehova?

1. ?Wanem kwestin we sam man blong Jehova oli askem?

WAN sista we i mekem wok blong Jehova longtaem finis, mo we i stanap strong long plante trabol, i askem se: “?Bambae mi mi laef yet taem en i kam?” Plante Kristin we oli mekem wok blong Jehova blong plante yia finis, oli askem kwestin ya. Yumi wantem tumas blong luk dei ya we Jehova bambae i mekem olgeta samting oli kam niuwan bakegen, mo i finisim ol trabol we yumi stap kasem tede. (Rev. 21:5) Yumi save se en blong rabis wol blong Setan bambae i kamtru i no longtaem. Be samtaem yumi faenem i had blong wet long dei ya, wetem longfala tingting.

2. ?Wanem ol kwestin we bambae yumi tokbaot?

² Baebol i soemaot se yumi mas gat longfala tingting. Olsem ol man blong God bifo, bambae yumi kasem ol samting we God i promes blong givim sipos yumi gat strong bilif mo yumi wet wetem longfala tingting. (Ridim Hibrus 6:11, 12.) Longtaem finis i kam, Jehova i gat longfala tingting. Hem i save finisim ol rabis fasin enitaem, be hem i wet long stret taem blong hem. (Rom 9:20-24) ?From wanem hem gat longfala tingting olsem? ?Jisas i folem fasin blong Papa blong hem olsem wanem? ?Mo fasin blong hem i tijim wanem long yumi? ?From wanem yumi mas gat longfala tingting? Ansa blong ol kwestin ya bambae i givhan long yumi blong gat strong bilif mo longfala tingting, nating se i luk olsem we Jehova i tektaem tumas blong mekem samting.

?FROM WANEM JEHOVA I GAT LONGFALA TINGTING?

3, 4. (1) ?From wanem Jehova i soemaot longfala tingting? (2) ?Taem Adam mo Iv tufala i no obei, Jehova i mekem wanem?

³ Jehova nomo i gat paoa long heven mo wol, mo hem i no nid blong wet blong finisim ol trabol. Be hem i gat gud risen blong soemaot longfala tingting. Taem Adam mo Iv tufala i no obei long Jehova, i gat sam impoten  kwestin i kamaot we ansa blong olgeta, bambae i givhan long olgeta long heven mo wol. Jehova i save se taem i mas pas blong hem i ansa long ol kwestin ya. Hem i save gud yumi mo i save gud olgeta long heven. Taswe hem i mekem samting blong givhan long yumi.—Hib. 4:13.

⁴ Jehova i wantem se wol ya i fulap wetem ol pikinini blong Adam mo Iv. Taem Setan i trikim Iv mo biaen Adam i no obei, God i no wari. Hem i no mekem samting we i no tingting gud fastaem mo hem i no lego ol man. Be hem i tingbaot rod we bambae hem i yusum blong mekem stamba tingting blong hem i kamtru. (Aes. 55:11) Jehova i bos long tingting blong hem mo hem i gat longfala tingting. From samting ya, hem i save mekem stamba tingting blong hem i kamtru, mo hem i save pruvum se rul blong hem i beswan. Mo hem i wet plante taosen yia blong mekem sam haf blong stamba tingting blong hem i kamtru.

5. ?Longfala tingting blong Jehova i mekem se wanem blesing i save kamaot?

⁵ Wan narafala risen from wanem Jehova i stap wet yet, hemia se hem i wantem we olgeta man oli kasem laef we i no save finis. Tede Jehova i stap mekem sam samting blong sevem “bigfala hip blong ol man.” (Rev. 7:9, 14; 14:6) Jehova i yusum wok blong prij blong pulum ol man, blong oli save Kingdom blong hem mo ol rul blong hem we oli stret. Ol tok blong Kingdom ya i wan “gud nius” blong ol man. !Yes, hem i nius we i beswan! (Mat. 24:14) Ol man we Jehova i pulum olgeta, oli joen long bigfala kampani blong ol tru fren we oli laekem samting we i stret. (Jon 6:44-47) God i wantem givhan long ol man ya blong oli mekem samting we hem i glad long hem. Mo tu, hem i stap jusum sam man blong oli joen long Kingdom blong hem long heven. Taem olgeta ya oli go long heven, bambae oli givhan long ol man we oli obei long God, blong oli kam stret gud olgeta, mo blong oli kasem laef we i no save finis. Taswe taem Jehova i stap wet, hem i wok blong mekem stamba tingting blong hem i kamtru. Olgeta samting ya oli blong mekem i gud long yumi.

6. (1) ?Long taem blong Noa, Jehova i soemaot longfala tingting olsem wanem? (2) ?Tede Jehova i soemaot longfala tingting olsem wanem?

⁶ Jehova i gat longfala tingting nating se ol man oli mekem rabis samting blong daonem nem blong hem. Yu traem tingbaot samting we hem i mekem from ol rabis fasin we i kam plante long taem blong Noa. Jehova i “harem nogud tumas” from we wol i fulap long ol rabis fasin blong man wetem woman, mo raf fasin. Mo ol man oli wantem nomo blong mekem samting we i nogud. (Jen. 6:2-8) Be Jehova i no save letem rabis fasin i stap blong olwe. Taswe hem i plan blong mekem Bigfala Wota i ron, blong spolem ol rabis man we oli no obei long hem. Taem Jehova i stap wet, hem i mekem rod blong sevem Noa mo famle blong hem. (1 Pita 3:20) Long stret taem blong hem, hem i talem long Noa se bambae hem i mekem Bigfala Wota i ron, mo i talem long hem blong i wokem wan bigfala sip. (Jen. 6:14-22) Mo Jehova i talem long Noa blong i givim woning long ol man. Baebol i talem se Noa i “wan prija we i stap talemaot stret fasin.” (2 Pita 2:5) Jisas i talem se taem blong yumi i olsem taem blong Noa. Jehova i mekem plan finis blong spolem rabis wol ya, be i no gat man i save stret ‘dei mo taem’ blong samting ya. (Mat. 24:36) Tede, God i wantem se yumi givim woning long ol man, blong oli save samting we oli mas mekem blong oli sef.

7. ?Jehova i tektaem tumas blong mekem ol promes blong hem oli kamtru? Yu eksplenem.

⁷ Tru ya, longfala tingting blong Jehova i no min se hem i wet nomo se taem i pas. !Mo yumi no mas ting se hem i no tingbaot yumi, mo hem i no kea long yumi! Be i isi nomo blong tingting olsem taem yumi stap kam olfala mo yumi harem nogud long rabis wol ya. Maet tingting blong yumi i foldaon mo yumi harem se God i tektaem tumas blong mekem  ol promes blong hem oli kamtru. (Hib. 10:36) Yumi no mas fogetem se i gat sam risen we i mekem se Jehova i stap wet longtaem. Mo hem i yusum taem ya blong mekem sam samting we i givhan long ol man blong hem. (2 Pita 2:3; 3:9) Naoia bambae yumi luk olsem wanem Jisas i folem fasin blong Papa blong hem blong gat longfala tingting.

JISAS I GAT LONGFALA TINGTING

8. ?Wetaem Jisas i soemaot se hem i gat longfala tingting?

⁸ Jisas i glad blong mekem wok blong God blong plante taosen yia. Taem Setan i agensem Jehova, Jehova i plan blong sanem pikinini blong hem i kam long wol olsem Mesaea. Yu traem tingbaot longfala tingting we Jisas i gat blong wet plante taosen yia, blong taem ya i kamtru. (Ridim Galesia 4:4.) Be Jisas i no stap sidaon nating nomo mo i stap wet. Hem i bisi blong mekem ol wok we Papa blong hem i givim long hem. Mo taem hem i stap long wol, hem i save se Setan bambae i kilim hem i ded, olsem ol profet tok oli talem. (Jen. 3:15; Mat. 16:21) Bifo we hem i ded, hem i harem nogud bigwan long bodi blong hem. Be hem i gat longfala tingting from we hem i save se hemia samting we God i wantem. Hem i no tingbaot hem wan nomo. Hem i gat tingting daon mo hem i rere blong harem nogud, nating se hem i pikinini blong God. Yumi mas folem eksampol blong hem.—Hib. 5:8, 9.

9, 10. (1) ?Jisas i mekem wanem taem hem i stap wet long stret taem we Jehova i jusum? (2) ?Yumi save folem fasin blong Jisas olsem wanem?

⁹ Afta we Jisas i laef bakegen, hem i kasem paoa antap long olgeta samting long heven mo wol. (Mat. 28:18) Oltaem hem i yusum paoa blong hem blong mekem stamba tingting blong Jehova i kamtru. Mo hem i mekem samting long stret taem we Jehova i jusum. Jisas i gat longfala tingting, i wet long raet saed blong Jehova kasem 1914, taem Jehova i mekem ol enemi blong hem oli kam aninit long paoa blong hem. (Sam 110:1, 2; Hib. 10:12, 13) I no longtaem, bambae hem i spolem wol blong Setan. Taem hem i stap wet, hem i givhan long ol man blong oli mekem samting we Jehova i save glad long olgeta. Mo hem i lidim olgeta i go long “springwota ya we i save givim laef.”—Rev. 7:17.

¹⁰ ?Yu yu luk olsem wanem yu save folem fasin blong Jisas? Jisas i save se Jehova i jusum wan stret taem blong mekem ol samting. Hem i wantem tumas blong mekem ol samting we Jehova i askem hem blong mekem. Be hem i glad blong wet long stret taem we Jehova i jusum. Taem yumi stap wet long en blong rabis wol ya, yumi mas gat longfala tingting. Yumi mas wet long Jehova blong i mekem ol samting mo yumi no mas lego hem taem yumi harem nogud. ?Yumi mas mekem wanem blong yumi save gat longfala tingting?

?MI MI MAS MEKEM WANEM BLONG GAT LONGFALA TINGTING?

11. (1) ?From wanem man we i bilif i save gat longfala tingting? (2) ?From wanem yumi save gat strong bilif?

¹¹ Bifo we Jisas i kam long wol, ol profet mo ol narafala man blong Jehova oli soemaot se ol sinman oli save gat longfala tingting. Bilif blong olgeta i mekem se oli gat longfala tingting. (Ridim Jemes 5:10, 11.) Sipos oli no bilif long ol promes blong Jehova, bambae oli no save wet blong ol promes ya oli kamtru. Be from we oli bilif, plante taem oli stanap strong long ol bigbigfala trabol. (Hib. 11:13, 35-40) Tede, yumi save gat strong bilif from we Jisas i “stamba blong bilif blong yumi.” (Hib. 12:2) Hem i mekem plante profet tok oli kamtru, mo hem i givhan long yumi blong kasem save long stamba tingting blong God.

12. ?Yumi save mekem wanem blong bilif blong yumi i strong?

¹² ?Yumi save mekem wanem blong bilif blong yumi i strong, nao yumi gat longfala tingting? Wan impoten samting blong mekem, hemia blong yumi folem ol tok blong  God. Yu traem tingbaot. ?From wanem yu mas putum Kingdom long fasples long laef blong yu? ?Yu yu save traehad moa blong folem ol tok blong Matiu 6:33? Maet yu save spenem moa taem long wok blong prij, mo yu mekem laef blong yu i no fasfas. Jehova i blesem yu finis from ol traehad we yu mekem blong obei long hem. Maet hem i givhan long yu blong gat wan Baebol stadi, no i givhan long yu blong kasem “pis we hem i givim, we i bigwan moa, i bitim save blong yumi.” (Ridim Filipae 4:7.) Taem yu putum tingting blong yu i stap long ol blesing olsem, bambae yu luksave se i gud blong gat longfala tingting.—Sam 34:8.

13. Yu talem wan pijatok we i soemaot se bilif i save mekem yumi gat longfala tingting.

¹³ Bilif i save mekem yumi gat longfala tingting. Hemia i sem mak long fasin blong wokem garen. Man we i wokem garen i brebrekem graon, i planem kakae, mo i pikimap taem i rere. Evri taem we garen blong hem i karem gudfala kakae, tingting blong hem i kam strong moa blong planem kakae. Maet nekis taem, hem i wokem sam narafala garen bakegen. Hem i planem kakae nating we hem i save se hem i mas wet longtaem lelebet blong oli rere. Hem i save se hem i no planem blong nating. Long sem fasin, taem yumi save ol tok blong Jehova mo yumi folem olgeta, yumi save kasem gudfala frut. Samting ya bambae i mekem se yumi trastem Jehova moa. Mo bilif blong yumi bambae i kam strong. Ale, i isi blong yumi wet long ol blesing we bambae oli kam.—Ridim Jemes 5:7, 8.

14, 15. ?Yumi mas gat wanem tingting long ol trabol we i mekem man i harem nogud?

¹⁴ I gat wan narafala samting we i givhan long yumi blong gat longfala tingting. Yumi mas gat sem tingting olsem Jehova long saed blong wol ya, mo ol samting we i stap hapen long yumi. Yu traem tingbaot se Jehova i harem olsem wanem taem i luk ol man oli harem nogud. Longtaem finis Jehova i  luk samting ya mo hem i harem nogud from. Be hemia i no blokem hem blong mekem samting we i gud. Hem i sanem Pikinini blong hem blong i “brekemdaon ol wok we Setan i mekem” mo blong finisim olgeta trabol we Setan i mekem long ol man. (1 Jon 3:8) Tru ya, ol samting we oli mekem yumi harem nogud oli blong smoltaem nomo, be God bambae i tekemaot olgeta blong olwe. Taswe yumi no wantem letem rabis fasin blong wol ya, i mekem bilif blong yumi i slak. Yumi no wantem hareap long Jehova se wetaem bambae hem i mekem ol samting ya oli kamtru. I gud yumi bilif long ol promes blong hem. Hem i plan finis blong finisim ol rabis fasin, mo bambae hem i mekem ol samting ya long stret taem we hem i jusum.—Aes. 46:13; Neham 1:9.

¹⁵ Long ol las dei ya we laef i strong tumas, bambae yumi kasem sam trabol we oli save traem bilif blong yumi. Maet yumi kasem trabol from raf fasin mo sam narafala samting bakegen. Yumi no mas kros, be yumi mas trastem Jehova fulwan. I no isi blong mekem olsem from we yumi sinman. Be yumi mas tingbaot samting we Jisas i mekem, we Matiu 26:39 i tokbaot.—Ridim.

16. ?Taem yumi stap wet blong en i kam, yumi no mas mekem wanem?

¹⁶ Man we i ting se en i longwe yet, i save gat rong tingting. Hem i save ting se hem i mas mekem prapa plan blong hem from we, maet promes blong Jehova i no kamtru. Maet hem i stap tingting se: ‘Bambae mi wet mo mi luk sipos Jehova i mekem samting we hem i promes blong mekem.’ Rong tingting ya i save mekem se man ya i no moa gat longfala tingting. Ale maet hem i traehad blong kasem haenem long wol ya, i trastem mane, mo hem i no moa putum Kingdom long fasples long laef blong hem. Maet hem i go long yunivesiti from we hem i wantem gat wan gudfala wok. Man olsem i soemaot se hem i no gat bilif. Aposol Pol i talem se yumi mas folem fasin blong olgeta we oli “bilif strong, mo we tingting blong olgeta i longfala.” Fasin blong olgeta ya i mekem se oli kasem blesing we Jehova i promes blong givim long olgeta. (Hib. 6:12) Jehova i plan finis blong spolem rabis wol ya, mo bambae hem i no let blong mekem olsem. (Hab. 2:3) Gogo kasem taem ya, yumi no mas les blong mekem prij. Yumi mas tingbaot se yumi stap long ol las dei, taswe yumi mas traehad long wok ya. Wok ya i save givim bigfala glad long yumi.—Luk 21:36.

?MAN WE I GAT LONGFALA TINGTING I KASEM WANEM BLESING?

17, 18. (1) ?Jehova i givim wanem janis long yumi taem yumi stap wet blong en i kam? (2) ?Sipos yumi gat longfala tingting, bambae yumi kasem wanem blesing?

¹⁷ Nomata se yumi mekem wok blong Jehova blong sam manis no blong plante yia finis, be yumi wantem gohed olsem blong olwe. Longfala tingting i givhan long yumi blong stanap strong kasem en blong rabis wol ya, nating se yumi mas wet longtaem. Jehova i givim janis long yumi blong pruvum se yumi trastem ol plan blong hem fulwan, mo se bambae yumi holemstrong long hem nating se yumi kasem trabol. (1 Pita 4:13, 14) God i trenem yumi tu blong stanap strong wetem longfala tingting gogo kasem en, nao bambae hem i sevem yumi.—1 Pita 5:10.

¹⁸ Jisas i gat paoa long olgeta samting long heven mo wol. I no gat wan samting i save blokem hem blong lukaot gud long yumi, sipos yumi holemstrong long Jehova. (Jon 10:28, 29) Yumi no mas fraet long ded mo long ol samting we bambae oli hapen. Olgeta we oli stanap strong kasem en bambae oli sef. Taswe yumi no mas letem fasin blong wol ya i spolem tingting blong yumi, nao yumi no moa trastem Jehova. Naoia we Jehova i gat longfala tingting, yumi mas traehad blong mekem bilif blong yumi i strong, mo yumi yusum gud taem blong yumi.—Mat. 24:13; ridim 2 Pita 3:17, 18.

[Kwestin]

[Tok blong pija long pej 21]

!Longfala tingting i givhan long yumi blong putum Kingdom fastaem mo kasem blesing!