Káé Seni Án Jiowa Me Jesus Mosonottam

“Oupwe ekieki usun ei, pwe ren mosonotamen ach Samol oua küna manau.”​—2 PET. 3:15.

IFA USUN KOPWE PÉLÚWENI?

Ifa usun Jiowa a pwáraatá pwe a mosonottam?

Met popun a lamot ngeni Jesus an epwe mosonottam lón langattam fansoun?

Ifa usun sipwe áppirú án Kot mosonottam?

1. Met ekkóch Chón Kraist mi tuppwél ra eáni kapas eis?

 EMÉN fin Kraist a tuppwél le akkangang ngeni Jiowa langattam fansoun me likiitú fán sókkópaten weires, a eáni ei kapas eis: “Upwe kúna sópwólóón ei ótót me mwen ai upwe máló?” Ekkóch pwiich kewe mi angang ngeni Jiowa ren fite fite ier ra fen pwal eáni ena kapas eis. Sia áneánei ewe rán Kot epwe asefésefáli mettóch meinisin me amóeló ach kewe osukosuk. (Pwär. 21:5) Inaamwo ika mi wor chómmóng popun sia lúkú pwe sópwólóón án Satan ei ótót a fókkun arapoto, nge epwe tongeni weires ach sipwe mosonottam le witiwiti ena rán.

2. Ikkefa ekkewe kapas eis sipwe pélúweni usun ewe napanap mosonottam?

² Ewe Paipel a pwáraatá pwe mi lamot sipwe mosonottam. Usun chék néún Kot kewe aramas lóóm, sipwe angei minne Kot a fen pwon ika a wor ach lúkú mi péchékkúl me sia witiwit fán mosonottam ngeni an we fansoun epwe apwénúetá an kana pwon. (Álleani Ipru 6:11, 12.) Jiowa pwisin a mosonottam. A tongeni amóeló minne mi ngaw ineet chék a mochen, iwe nge a wikkitiwiti ewe fansoun mi fich. (Rom 9:20-24) Met popun a fókkun mosonottam? Ifa usun Jesus a fen áppirú án Seman we mosonottam me isetiw eú leenien áppirú fán itach? Met popun a múrinné ach sipwe káé le pwáraatá mosonottam usun chék Jiowa? Ikaamwo me rech, usun itá Jiowa a kon mmang le mwékút, nge pélúwen ekkena kapas eis repwe álisikich le eáni lúkú mi péchékkúl me mosonottam.

PWATA JIOWA A PWÁRAATÁ MOSONOTTAM?

3, 4. (a) Met popun Jiowa a pwáraatá mosonottam? (b) Lupwen Atam me Efa ra álleasolap, met Jiowa a féri?

³ Pokiten Jiowa, i ewe Sou Nemenemen Unuselapen Láng me Fénúfan, iwe, ese pwal lamot an epwe witiwiti  och fansoun pwe epwe amóeló meinisin osukosuk. Nge Jiowa a pwáraatá mosonottam ren eú popun mi múrinné. Pokiten ewe féfférún ú ngeni lón Eten, a piitá ekkóch kapas eis mi kkúú meinisin mi nónnóm lón láng me fénúfan me a lamot epwe leteló pélúwer. Jiowa a mosonottam pún a silei pwe mi lamot fansoun pwe epwe wesewesen ffatoló pélúwen ekkena kapas eis. Pokiten Jiowa a silefichi féfférún me ekiekin meinisin chókkewe mi nónnóm láng me fénúfan, iwe a ffat pwe minne a kan féfféri a fókkun échitikich.—Ipr. 4:13.

⁴ Jiowa a tipeni pwe fénúfan epwe uroló ren mwirimwirin Atam me Efa. Lupwen Satan a otupu Efa, me mwirin Atam a álleasolap, Kot ese mwittir apwúngaló an epwe chék likitaló aramas me péútaaló minne a fen tipeni seni lóóm. Nge a fen akkóta och kókkót pwe epwe chúen apwénúetá minne a fen tipeni fán iten aramas me ei fénúfan. (Ais. 55:11) Ren an epwe pwénútá minne a tipeni me leteló an pwúúng le nemenem, Jiowa a pwáraatá mosonottam me nemenifichi an féffér. A mwo nge witiwit ren fite ngeréú ier pwe epwe apwénúetá ekkóch kinikinin minne a fen tipeni seni lóóm lón eú napanap mi múrinné seni meinisin.

5. Án Jiowa mosonottam a atufichikich le kúna menni feiéch?

⁵ Pwal eú popun Jiowa a mosonottam le witiwit, pwe epwe chómmóng aramas repwe kúna ewe manaw esemuch. Pwal mwo iei, Jiowa a féfféri minne a lamot pwe epwe amanawa ewe “mwich mi fokun chocho.” (Pwär. 7:9, 14; 14:6) Ren ach angangen afalafal, Jiowa a ekketiwa aramas le káé usun an we Mwú me an kewe allúk mi pwúng. Pwóróusen ewe Mwú, ina “ewe Pworausen Manau” fán iten aramas. A ffat pwe ina ewe kapas mi fókkun allim! (Mat. 24:14) Iteiten emén me emén Jiowa a etiwa, a chóni ewe mwichen pwipwi mi enlet wóón unusen fénúfan mi tongei minne mi pwúng. (Joh. 6:44-47) Ach Kot mi tong a féfféri ekkeei mettóch pwe epwe álisi aramas ar repwe angei an we chen. A pwal filatá ekkóch aramas pwe repwe chóni an we mwú lón láng. Lupwen ra nónnóm lón láng, repwe álisi ekkewe aramas mi álleasochis wóón fénúfan ar repwe unuséchúló me kúna manaw esemuch. Ina popun, ikaamwo Jiowa a wikkitiwit fán mosonottam, nge a fen akkangang ngeni pwénúetáán an kewe pwon fán iten feiéchúch.

6. (a) Ifa usun Jiowa a pwáraatá mosonottam lón fansoun Noa we? (b) Ifa usun Jiowa a pwáraatá mosonottam lón ach ei fansoun?

⁶ Jiowa a mosonottam inaamwo ika aramas ra féri mettóch mi fókkun ámeteki letipan. Áwewe chék, nengeni ifa usun Jiowa a ataweei féfféringaw mwen ewe Noter. Pokiten aramas ra aúraló fénúfan ren féfférún sikepwach, akkachofesá me ra chék mochen féfféri minne mi ngaw, iwe, ‘letipen [Jiowa] a pwal fokun weires.’ (Ken. 6:2-8) A ffat pwe esap mut ngeni féfféringaw an epwe fis tori feilfeiló. Iwe, a apwúngaló an epwe aworato ewe Noter pwe epwe nieló ekkewe mi álleasolap. Atun Jiowa a wikkitiwit, a féri minne a lamot pwe Noa me an we famili repwe kúna manaw. (1 Pet. 3:20) Lón ewe fansoun mi fich, Jiowa a ereni Noa usun ewe Noter me áiti ngeni ifa usun epwe féri ewe waimw. (Ken. 6:14-22) Jiowa a pwal mochen Noa epwe éúréúra aramas usun ewe kata epwele toriir. Ewe Paipel a erá pwe Noa i “chon afalafala usun pwüng.” (2 Pet. 2:5) Jesus a erá pwe ach ei fansoun a pwal usun fansoun Noa we. Jiowa a fen apwúngaló ineet epwe ataieló ei ótót mi ngaw, nge esor emén a “silei ewe rän are ewe kulok” epwe fis lón. (Mat. 24:36) Lón ei fansoun, Kot a fen ewisa ngenikich ei angangen éúréúra aramas me afalafaler ifa usun repwe kúna manaw.

7. Itá Jiowa a mmang le apwénúetá an kewe pwon? Áweweei.

⁷ A ffat pwe án Jiowa witiwit fán mosonottam ese wewe ngeni pwe a chék mut ngeni lulóón fansoun. Sisap fókkun ekieki pwe ese  tongekich are áfánnikich! Nge ren enletin, a mmen weires ach sipwe chechchemeni ena lupwen sia chinnapeló are meefi riáfféú lón ei ótót mi ngaw. Neman sipwe lichippúngúló me meefi pwe a kon mmang án Jiowa apwénúetá an kewe pwon. (Ipr. 10:36) Nge sipwe chechchemeni pwe mei wor popun Jiowa a pwáraatá mosonottam me a alamota ena fansoun pwe epwe efeiéchú néún kewe aramas mi tuppwél. (2 Pet. 2:3; 3:9) Sipwe nengeni ifa usun Jesus a áppirú mosonottamen Seman we.

IFA USUN JESUS A ISETIW EÚ LEENIEN ÁPPIRÚ REN AN MOSONOTTAM?

8. Menni fansoun Jesus a pwáraatá mosonottam?

⁸ Ren fansoun langattam Jesus a féfféri letipen Kot me ina eú minen apwapwa ngeni. Lupwen Satan a ú ngeni Jiowa, iwe, a filatá néún we áláemén an epwe feitiw fénúfan me wiliti ewe Messaia. Ekieki mosonottamen Jesus atun a wikkitiwiti ena fansoun ren fite ngeréú ier. (Álleani Kalatia 4:4.) Lón ena fansoun, ese chék witiwit, nge a pwal akkangang me féri ekkewe angang Seman we a ewisa ngeni. Iwe, lupwen a feitiw fénúfan, a silei pwe epwe máló lepéún Satan, usun met a fen oesini. (Ken. 3:15; Mat. 16:21) A mosonottam le likiitú fán watteen riáfféú pokiten a silei pwe ina letipen Kot an epwe máló lón ena napanap. Jesus ese ekieki pwisin i, me inaamwo ika i Néún Kot nge a tipetekison me tipemecheres le nóm fán riáfféú. An tuppwél ngeni Kot, ina eú leenien áppirú mi fókkun múrinné ngenikich.​—Ipr. 5:8, 9.

9, 10. (a) Met Jesus a fen féfféri atun a witiwiti ewe fansoun Jiowa epwe apwénúetá minne a tipeni? (b) Ifa usun sipwe áppirú Jesus?

⁹ Mwirin án Jesus manawsefál, a angei ewe nemenem wóón láng me fénúfan. (Mat. 28:18) Fansoun meinisin a áeá an we nemenem le apwénúetá letipen Jiowa lón ewe fansoun mi fich me ren Jiowa. Ina minne, Jesus a mosonottam le witiwit lepeliefichin Kot tori 1914, lupwen Kot a anómu fán nemenien Jesus chón oputan kewe. (Kölf. 110:1, 2; Ipr. 10:12, 13) Ekiseló chék, Jesus epwe ataieló án Satan ei ótót. Nge atun Jesus a chúen witiwit, a álisi aramas ar repwe angei án Kot chen me emmweniir ngeni “ekewe puächen kolukun manau.”​—Pwär. 7:17.

¹⁰ En mi kúna ifa usun kopwe áppirú Jesus? Pwúngún pwe Jesus a mwasangasangeiti an epwe féri minne Jiowa a apasa, nge a tipemecheres le witiwiti ewe fansoun Jiowa a fen filatá an epwe apwénúetá minne a tipeni. Atun sia witiwiti talóón án Satan ei ótót mi ngaw, mi lamot meinisin kich sipwe mosonottam. Sipwe witiwiti Kot me sisap fangetá lupwen sia lichippúng. Met sia tongeni féri pwe sipwe eáni ena sókkun mosonottam?

IFA USUN UPWE MOSONOTTAM USUN KOT?

11. (a)  Ifa usun mosonottam a riri ngeni lúkú? (b) Met popun sia tongeni eáni ewe sókkun lúkú mi péchékkúl?

¹¹ Mwen án Jesus feitiw fénúfan, ekkewe soufós me néún Kot kewe pwal ekkóch chón angang mi tuppwél, ra pwáraatá ren féfférúr pwe pwal mwo nge aramas rese unuséch ra tongeni likiitú fán mosonottam. Ar mosonottam a riri ngeni ar lúkú. (Álleani James 5:10, 11.) Ika ese wor ar lúkú, are rese wesewesen lúkú minne Jiowa a pwon ngeniir, iwe resap tongeni mosonottam le witiwit fán iten pwénúetáán án Kot kewe pwon. Nge fán chómmóng ra likiitú fán watteen weires are sóssót mi eniwokkus pokiten ra lúkú pwe Kot epwe apwénúetá minne a fen pwonei. (Ipr. 11:13, 35-40) Ewe Paipel a pwáraatá pwe a wor watteen popun epwe péchékkúl ach lúkú lón ei fansoun, pún Jesus, i ewe “chon Aunusochulo” ach lúkúlúk. (Ipr. 12:2, TF) A apwénúetá chómmóng oesini me álisikich le weweéchúti minne Kot a fen tipeni seni lepoputáán.

12. Met sia tongeni féri pwe epwe péchékkúleló ach lúkú?

¹² Met sipwe tongeni féri pwe sipwe apéchékkúla  ach lúkú, iwe mwirilóón epwe lapóló ach mosonottam? A lamot sipwe álleasochisi án Kot kewe emmwen. Áwewe chék, ekieki ewe popun a lamot kopwe akkomwa ewe Mwú lón manawom. Ka tongeni alapaaló óm achocho le apwénúetáéchú ewe fén lón Mateus 6:33? Eli ka tongeni alapaaló óm fansoun le afalafal ngeni aramas are féri och siwil pwe kopwe ámecheresaaló nónnómun manawom. Kosap ménúki pwe pwal mwo iei, Jiowa a fen efeiéchú óm achocho. Eli a fen álisuk óm kopwe néúni emén mineféén chón káé are a fen ngonuk an we “kinamwe mi tekia seni ach tongeni weweiti.” (Álleani Filipi 4:7.) Atun ka ekkekieki ekkeei feiéch, kopwe mirititi lamoten óm kopwe mosonottam.​—Kölf. 34:8.

13. Áweweei ifa usun ach lúkú a tongeni alapaaló ach mosonottam.

¹³ Ei kapas áwewe epwe tongeni álisikich le weweiti ifa usun ach lúkú a tongeni álisikich le alapaaló ach mosonottam. Emén chón atake a fótuki an we atake, túmúnú mámmáárin, mwirin a kini uwaan. Iteitan a kini chómmóng ua lón ewe fansoun rás, iwe a fókkun lúkúlúkú lamoten an epwe fótukisefáli ekkewe pwikil. Eli mwirin, epwe pwal achómmóngaaló ekkewe pwikil epwe fótukatiw. I a fótuki ekkena pwikil inaamwo ika a silei pwe mi lamot an epwe mosonottam le witiwit ngeni ewe fansoun rás. A lúkúlúk pwe epwe kini uwaan. Pwal ina chék usun, lupwen sia káé án Jiowa kewe kapasen emmwen, mwirin apwénúetá, mwirin a uwaéch, iwe ach lúkúlúk wóón Jiowa epwe péchékkúleló. Iwe mwirin, a mecheresiló ach sipwe mosonottam me witiwiti ekkewe feiéch epwe torikich.​—Álleani James 5:7, 8.

14, 15. Ifa ewe ekiek sipwe eáni usun án aramas riáfféú?

¹⁴ Sia pwal tongeni alapaaló ach mosonottam ren ach eáni án Jiowa ekiek usun ei fénúfan me pwisin nonnomuch. Áwewe chék, ekieki meefien Jiowa usun riáfféún aramas. Ren fansoun langattam, a kúkkúna aramas ra  riáfféú, me a metek letipan. Nge ese mut ngeni ena metek epwe aúkatiw an féri minne mi múrinné. A tiinaato néún we pwe epwe, “atala än Tefil angang,” me áwesaaló meinisin ekkewe riáfféú Satan a efisatá. (1 Joh. 3:8) A ffat pwe ekiseló chék Jiowa epwe unusen amóeló meinisin riáfféú. Ina popun, sisap mut ngeni féfféringawen ei fénúfan an epwe apwangapwangaaló ach lúkú. Sipwe chék mosonottam le wikkitiwiti Jiowa. Sipwe lúkúlúk wóón án Kot kewe pwon pún a fen apwúngaló tichikin ewe fansoun epwe áwesaaló féfféringaw, me epwe féri ena lón ewe fansoun mi fich.​—Ais. 46:13; Nah. 1:9.

¹⁵ Lón ekkeei ránin lesópwólóón mi weires, eli epwe chómmóng riáfféú mi sótuni ach lúkú sipwe likiitú fán. Kich are attongach kewe eli sia kúna riáfféú ren féfférún akkachofesá me metakkan. Nge mi lamot sipwe ti senikich song me apposa letipach le unusen lúkúlúk wóón Jiowa. Kich sise unuséch, ina popun ese mecheres ach sipwe féri ena. Nge sipwe chechchemeni met Jesus a féri mi mak lón Mateus 26:39.​—Álleani.

16. Atun sia witiwiti warotoon ewe sópwólóón, met mi lamot sipwe túmúnú ach sisap féri?

¹⁶ Emén mi tipemwaramwar ngeni arapotoon ewe sópwólóón, a tongeni poputá le eáni ekiek mwáál. A tongeni ekieki pwe a lamot epwe féri pwal och kókkót lón manawan ika pwe án Jiowa kewe pwon esap pwénútá. Are, eli epwe ekieki, ‘Upwe witiwit me ppii ika Jiowa epwe apwénúetá minne a pwonei.’ Ei ekiek mi mwáál epwe tongeni áweiresi án emén epwe mosonottam. Eli epwe sótun kútta pwisin itetekian lón ei fénúfan are eáni núkúnúk wóón moni me kaúló le akakkomwa án Kot we Mwú lón manawan. Are eli epwe filatá le fiti sukul tekia pwe epwe anúkúnúkéchúeló manawan. Nge ena esin ekiek a wesewesen pwáraatá nafangawen lúkú. Chechchemeni pwe Paulus a erenikich ach sipwe áppirú “chokewe mi angei mine Kot a eäni pwon ren ar lükü me mosonotam.” (Ipr. 6:12) Jiowa a fen apwúngaló pwe ei ótót mi ngaw epwe kataló, me esap tongeni mmang. (Ap. 2:3) Nge iei mwo, sipwe túmúnú ach sisap akúkkúnatiw ach angang ngeni Jiowa. Nge, mi lamot sipwe fen chechchemeni pwe sia nónnóm lón ekkewe ránin le sópwólóón me sipwe aunusaaló ach fiti ei angangen afalafal, ewe angang mi atoto chengel wachemwuk pwal mwo nge iei.​—Luk. 21:36.

MET FEIÉCHÚN MOSONOTTAM?

17, 18. (a) Atun sia witiwit fán mosonottam met a suuk ngenikich? (b) Ikkefa ekkewe feiéch sipwe angei ika sia mosonottam?

¹⁷ Sia mochen angang ngeni Kot tori feilfeiló chék, inaamwo ika sia akkangang ngeni i ren fite maram are ren fite fite ier. Ewe napanap mosonottam epwe álisikich le likiitú tori sópwólóón ei ótót, ese lifilifil ifa úkúkún ttamen ach sipwe witiwit. Iei Jiowa a suuk ngenikich ach sipwe ánnetatá pwe sia unusen lúkúlúk wóón minne a fen apwúngaló, me ach sipwe tuppwél ngeni pwal mwo nge fán riáfféú. (1 Pet. 4:13, 14) Kot a pwal ákkáitikich pwe sipwe tongeni likiitú fán mosonottam tori sópwólóón me kúna manaw.​—1 Pet. 5:10.

¹⁸ A nóm ren Jesus meinisin nemenemen láng me fénúfan, me esor emén a tongeni eppeti an epwe tumunuk ika ka amwéchú óm tuppwél. (Joh. 10:28, 29) Ese wor popun ach sipwe niwokkusiti minne epwe fis lón mwachkkan are pwal mwo nge máló. Chókkewe mi likiitú fán mosonottam tori ewe sópwólóón repwe kúna manaw. Ina popun, sisap fókkun mut ngeni ekiekin ei fénúfan an epwe etipetipakich ach sisap chúen lúkúlúk wóón Jiowa. Nge lón ei atun Kot mi chúen pwáraatá an mosonottam, sipwe tipeppós le apéchékkúla ach lúkú me áeáéchú ach fansoun.​—Mat. 24:13; álleani 2 Petrus 3:17, 18.

[Sasing lon pekin taropwe 21]

Mosonottam epwe álisuk le akkomwa án Kot we Mwú me kúna feiéch!