Imit pasyans Zeova ek Zezi

“Konsider pasyans nou Senyer konman en mwayen pour sov nou.”​—2 PYER 3:15.

KI OU POU REPONN?

Ki mannyer Zeova in montre ki i pasyan?

Akoz Zezi in bezwen demontre pasyans pandan en bon pe letan?

Ki bann pa nou kapab pran pour imit pasyans Bondye?

1. Ki kestyon serten serviter fidel i demande?

E N SER ki’n fidel dan servis Zeova pour plizyer dizenn lannen malgre bokou leprev, i demann sa kestyon: “Eski mon pou mor avan ki lafen i arive?” I annan bokou serviter Zeova ki demann sa menm kestyon. Nou enpasyan pour vwar sa zour kot Bondye pou refer tou keksoz nef e rezourd tou problenm ki nou pe fer fas avek. (Rev. 21:5) Menm si nou annan tou rezon pour krwar ki lafen sistenm Satan i pros, i kapab difisil pour demontre pasyans antretan ki nou pe esper sa zour arive.

2. Ki kestyon nou pou reponn konsernan pasyans?

² Toudmenm, Labib i montre ki nou bezwen annan pasyans. Parey bann serviter Bondye avan nou, nou pou ganny sa ki Bondye in promet si nou annan en lafwa for e esper avek pasyans sa letan kot i pou akonplir son promes. (Lir Ebre 6:11, 12.) Zeova li menm i demontre pasyans. I ti kapab met en lafen avek mesanste nenport ki ler, me i pe esper sa moman apropriye. (Rom. 9:20-24) Akoz i sitan pasyante? Ki mannyer Zezi in imit pasyans son Papa e kit en legzanp pour nou? Ki byenfe nou pou gannyen si nou devlop menm pasyans ki Zeova? Larepons sa bann kestyon i kapab ed nou devlop pasyans ek en lafwa for, menm si pour nou i paret ki Zeova pe tarde.

AKOZ ZEOVA I DEMONTRE PASYANS?

3, 4. (a) Akoz Zeova in demontre pasyans? (b) Ler Adan ek Ev ti dezobeir, ki Zeova ti fer?

³ Zeova i annan bon rezon pour demontre pasyans. I vre ki i’n toultan annan kontrol total lo liniver antye me kantmenm sa, sa rebelyon dan zarden Edenn ti soulev bann kestyon enportan. Zeova in demontre  pasyans akoz i konnen ki i ti pou pran letan pour reponn sa bann kestyon dan en fason parfe. Lefet ki i konn tre byen sa ki imen ek lanz i fer e panse, i pe sertennman azir dan sa fason ki nou pou pli byen benefisye.​—Ebr. 4:13.

⁴ I ti lavolonte Zeova ki bann desandans Adan ek Ev i ranpli later. Ler Satan ti tant Ev e apre Adan ti dezobeir, sa pa ti fer Bondye rezet son plan. I pa ti panik, taye pour fer bann desizyon vitman vitman oubyen reazir an gran e abandonn fanmir imen. O kontrer, i ti rod en fason pour akonplir son plan konsernan bann imen ek later. (Iza. 55:11) Pour akonplir son plan e zistifye son souvrennte, Zeova in demontre bokou kontrol lo son lekor ek pasyans. I’n menm esper plizyer milye lannen pour ki serten laspe son plan i ganny akonplir dan sa pli bon fason.

5. Lefet ki Zeova i demontre pasyans ki byenfe sa i anmennen?

⁵ En lot rezon ki’n fer Zeova demontre pasyans, se pour ki plis dimoun i kapab ganny lavi eternel. La konmela i pe fer tou sa ki neseser pour sov lavi “en gran lafoul.” (Rev. 7:9, 14; 14:6) Atraver sa travay predikasyon, Zeova pe envit tou dimoun pour aprann konsernan son Rwayonm ek son bann standar drwat. Sa mesaz Rwayonm i en ‘bon nouvel’ pour limanite. Anfet, i sa meyer nouvel ki zot kapab tande. (Mat. 24:14) Sak dimoun ki Zeova i atir ver li, i form parti son kongregasyon dan lemonn antye kot i annan bann vre zanmi ki kontan sa ki byen. (Zan 6:44-47) Nou Bondye ranpli avek lanmour i ed sa bann dimoun pour ganny son laprouvasyon e se parmi zot ki i’n swazir bann ki pou dirize dan son gouvernman dan lesyel. Ler zot pou dan lesyel, zot pou ed bann imen obeisan vin parfe e ganny lavi eternel. Alor, menm si pour lemoman Zeova pe demontre pasyans, i touzour pe travay pour akonplir son plan pour byennet nou tou.

6. (a) Ki mannyer Zeova ti demontre pasyans dan letan Noe? (b) Ki mannyer Zeova pe demontre pasyans dan nou letan?

⁶ Zeova i demontre pasyans malgre dimoun i fer en kantite move keksoz ki fer li ankoler. Nou kapab vwar son pasyans par lafason ki i ti azir anver mesanste avan Deliz. Dan sa letan, later ti ranpli avek limoralite seksyel ek vyolans. Letan Zeova ti vwar sa bann keksoz mal, sa ti fer “son leker fer mal.” (Zen. 6:2-8) I pa ti pou toler sa sityasyon pour touzour, alor i ti deside anmenn en Deliz lo bann move dimoun. Pandan ki Zeova ti pe “esper avek pasyans,” i ti fer bann preparasyon pour sov Noe ek son fanmir. (1 Pyer 3:20) Dan son letan apropriye, i ti enform Noe konsernan son desizyon e demann li pour konstri en lars. (Zen. 6:14-22) An plis ki sa, Noe ti “en predikater lazistis,” i ti averti son bann vwazen konsernan sa destriksyon ki ti pe vini. (2 Pyer 2:5) Zezi ti dir ki nou letan i parey dan letan Noe. Zeova in deside kan ki i pou detrir sa move lemonn. Personn pa konn “sa zour e sa ler” ki sa pou arive. (Mat. 24:36) Me antretan Bondye in donn nou en travay pour averti bann dimoun e dir zot ki mannyer zot kapab ganny sove.

7. Eski Zeova pe tarde pour akonplir son bann promes? Eksplike.

⁷ I evidan ki ler Zeova i demontre pasyans, sa pa vedir ki i pe zis esper letan pase. Nou pa devret zanmen krwar ki i pa pe pran ka oubyen pa enterese avek nou. I vre ki i difisil pour mazin koumsa kan nou vwar nou pe vyeyi oubyen soufer dan sa move lemonn. Nou kapab dekouraze oubyen santi ki Bondye pe tarde pour akonplir son promes.  (Ebr. 10:36) Me, pa zanmen oubliye ki Bondye i annan bann bon rezon pour demontre pasyans e i pe servi sa letan pour byennet son bann serviter fidel. (2 Pyer 2:3; 3:9) Annou vwar ki mannyer Zezi ti imit pasyans Bondye.

KI BON LEGZANP ZEZI IN KITE LO PASYANS?

8. Dan ki sityasyon Zezi ti demontre pasyans?

⁸ Zezi i kontan pour fer lavolonte Bondye e i’n fer sa depi plizyer milener. Ler Satan ti rebele, Zeova ti deside fer son sel Garson vin lo later konman Mesi. Zis mazinen ki kantite pasyan Zezi ti’n bezwen pasyan pandan ki i ti esper pour plizyer milye lannen ziska ki sa zour i arive. (Lir Galat 4:4.) I pa ti asize nanryen fer, o kontrer i ti okipe avek travay ki son Papa ti’n donn li pour fer. Ler i ti vin lo later i ti konnen ki Satan ti pou touy li parey i ti’n ganny profetize. (Zen. 3:15; Mat. 16:21) Avek pasyans, i ti pare pour fer lavolonte Bondye menm si i ti pou soufer en kantite. I ti demontre sa pli gran fidelite. I pa ti mazin zis li menm ek son pozisyon konman Garson Bondye e sa i en bon legzanp pour nou.​—Ebr. 5:8, 9.

9, 10. (a) Ki Zezi in fer antretan ki i ti pe esper Zeova pran aksyon? (b) Ki mannyer nou kapab imit legzanp Zezi?

⁹ Apre son rezireksyon, Zezi ti ganny tou pouvwar dan lesyel e lo later. (Mat. 28:18) Zezi ti servi sa pouvwar ki i ti’n gannyen pour akonplir plan Zeova e i ti fer sa dan letan ki Zeova ti’n fikse. Zezi ti esper avek pasyans lo kote drwat Bondye ziska 1914 kan son bann lennmi ti vin en marspye pour son lipye. (Ps. 110:1, 2; Ebr. 10:12, 13) Tre byento i pou detrir sistenm Satan. Antretan, Zezi pe pran letan pour ed bann dimoun e gid zot ver “delo ki donn lavi.”​—Rev. 7:17.

¹⁰ Eski ou’n vwar ki mannyer nou kapab imit legzanp Zezi? I kler ki Zezi ti pare pour fer nenport keksoz ki son Papa ti demann li pour fer. I ti pare pour espere ziska sa letan ki Bondye ti’n fikse pour li azir. Anmezir ki nou esper lafen sa sistenm arive, nou tou nou bezwen imit pasyans Bondye e pa zanmen taye pour fer keksoz san son gidans oubyen abandonnen akoz dekourazman. Ki nou kapab fer pour devlop pasyans parey Bondye?

KI MANNYER MON KAPAB PASYANTE PAREY BONDYE?

11. (a) Dan ki fason lafwa ek pasyans i mars ansanm? (b) Akoz nou annan bon rezon pour annan en lafwa solid?

¹¹ Avan ki Zezi ti vin lo later, bann profet ek lezot serviter fidel ti kit en bon legzanp lo ki mannyer bann imen enparfe i kapab andir leprev avek pasyans. Zot lafwa ek pasyans ti mars ansanm. (Lir Zak 5:10, 11.) Si zot pa ti vreman krwar sa ki Zeova ti’n dir zot oubyen ti napa lafwa, eski zot ti pou esper avek pasyans lakonplisman son bann promes? Souvandfwa zot ti rankontre bann defi ki ti teste zot lafwa, me zot ti annan konfyans ki Zeova ti pou finalman akonplir son promes. (Ebr. 11:13, 35-40) Nou nou annan plis rezon ankor pour annan en lafwa solid akoz aprezan Zezi i sa enn ki “anmenn [nou lafwa] ziska perfeksyon.” (Ebr. 12:2) I akonplir bann profesi e revel plan Bondye dan en fason ki donn nou bann bon rezon pour annan lafwa.

12. Ki nou kapab fer pour ranforsi nou lafwa?

¹² Ki bann pa pratik nou kapab pran pour ranforsi nou lafwa pour ki nou devlop plis pasyans? I vreman enportan ki nou aplik konsey Bondye. Par egzanp, reflesir lo bann bon rezon ki ou annan pour met Rwayonm Bondye premye dan  ou lavi. Eski ou kapab fer plis zefor pour aplik sa konsey ki dan Matye 6:33? Sa i kapab enplik pas plis letan dan predikasyon oubyen fer bann sanzman pour senplifye ou lavi. Pa oubliye konman Zeova in beni ou bann zefor. Petet i’n ed ou ganny en lot letid Labib oubyen annan “lape Bondye ki depas tou konpreansyon imen.” (Lir Filipyen 4:7.) Si ou kontinyen konsantre lo bann byenfe ki ou’n gannyen par swiv bann lenstriksyon Zeova, ou pou realize ki i byen pour ou annan pasyans.​—Ps. 34:8.

13. Donn en legzanp pour montre ki mannyer lafwa i kapab fer nou annan plis pasyans?

¹³ Nou kapab servi en legzanp pour ed nou konpran ki mannyer lafwa i kapab fer nou devlop plis pasyans. En fermye i senm lagrenn, pran swen avek son plant epi i rekolte. Sak fwa ki sa fermye i ganny en bon rekolt, i annan plis konfyans ler i senm lagrenn sa lot sezon. I vre ki i pou bezwen esper avek pasyans sa letan kot i pou rekolte, me sa pa pou anpes li plant son lagrenn, petet i pou menm senm plis lagrenn ankor ki dernyen fwa. I annan konfyans ki i pou rekolte sa ki i’n senmen. Pareyman, ler nou aprann bann lansennyman ki Zeova i donnen, aplik zot e rekolte son bann byenfe, nou konfyans dan Zeova i ogmante. Nou lafwa osi i vin pli for e i vin pli fasil pour esper bann benediksyon ki nou konnen pou vini.​—Lir Zak 5:7, 8.

14, 15. Ki pwennvi nou devret annan konsernan soufrans?

¹⁴ En lot keksoz ki kapab ed nou devlop pasyans se ler nou reflesir lo pwennvi ki nou devret annan lo sa lemonn ek nou prop sityasyon. Esey vwar keksoz parey Zeova i vwar. Par egzanp, esey mazinen ki mannyer i santi ler i vwar imen pe soufer. I fer en kantite letan ki i vwar imen soufer e sa i fer li osi  soufer. Me menm si i sagrinen, sa pa’n anpes li fer sa ki byen. I’n anvoy son sel Garson “pour detri bann travay dyab” e repar tou domaz ki Satan in anmennen lo imen. (1 Zan 3:8) An realite, soufrans i tanporer, me solisyon ki Bondye pou anmennen i pour touzour. Pareyman, olye les mesanste dan sa lemonn afekte nou tro bokou oubyen fer nou perdi pasyans konmsi lafen pe tarde arive, annou met lafwa dan bann keksoz ki nou pa vwar ki pou dir pour touzour. Zeova pa pou permet ki mesanste i depas sa limit ki i’n fikse e i pou azir zis aler.​—Iza. 46:13; Nao. 1:9.

¹⁵ Dan sa bann dernyen zour difisil ki nou pe viv ladan, i tre probab ki nou pou fer fas avek bann difikilte ki pou teste nou lafwa. Olye reazir avek lakoler si nou vin viktim vyolans oubyen ler en dimoun ki nou kontan i soufer, nou devret pare pour met tou nou konfyans dan Zeova. Nou enparfe, alor i pa fasil pour fer sa. Me mazin sa ki Zezi ti fer anmezir ki nou lir Matye 26:39.​—Lir.

16. Ki nou bezwen evite fer pandan sa letan ki reste?

¹⁶ En keksoz ki kapab anpes en dimoun devlop pasyans parey Bondye se ler i annan dout. Akoz nou dir sa? Be, lefet ki i pa krwar ki lafen i pros i kapab konmans fer son prop debrouy zis an ka dapre li plan Zeova pa marse. Andotmo, i kapab mazinen: ‘Mon pou espere e vwar si Zeova i vreman fer sa ki i’n dir.’ Apre sa, i kapab esey vin en dimoun enportan dan sa lemonn oubyen rode ki mannyer i kapab ganny plis larzan olye met Rwayonm Bondye premye dan son lavi. I kapab osi deside pour fer letid avanse e viv en lavi pli konfortab la konmela. Me, eski pa sa ti pou montre ki i napa lafwa? Pa oubliye ki Pol ti ankouraz nou pour imit bann serviter fidel ki ti resevwar promes Zeova “par lafwa ek pasyans.” (Ebr. 6:12) Zeova pa pou permet ki sa move lemonn i egziste pli lontan ki fodre dapre son plan. (Aba. 2:3) Antretan, nou devret evite fer zis en ptigin dan son servis. O kontrer nou bezwen reste eveye par pres sa bon nouvel avek devouman e sa pou donn nou bokou satisfaksyon konmela menm.​—Lik 21:36.

KI BYENFE PASYANS BONDYE I ANMENNEN?

17, 18. (a) Ki loportinite nou annan anmezir ki nou pe esper avek pasyans lafen sa move lemonn? (b) Ki byenfe nou pou gannyen lefet ki nou pe demontre pasyans?

¹⁷ Ki swa nou pe servi Bondye depi detrwa mwan ouswa depi plizyer dizenn lannen, nou bi se pour servi li pour touzour. Pasyans pou ed nou andire ziska lafen sa move lemonn menm si nou pa konnen konbyen letan i reste ankor. Zeova pe aprezan donn nou loportinite pour prouve ki nou annan konfyans total dan son bann desizyon e si i neseser nou devret pare pour soufer pour son non. (1 Pyer 4:13, 14) Bondye pe osi donn nou en formasyon ki kapab ed nou pour andire avek pasyans ziska lafen pour nou ganny sove.​—1 Pyer 5:10.

¹⁸ Zezi in ganny tou pouvwar dan lesyel e lo later e napa nanryen ki kapab anpes li protez ou, eksepte ou menm. (Zan 10:28, 29) Nou pa bezwen per lavenir, ni menm lanmor. Sa bann ki esper avek pasyans lafen sa move lemonn pou ganny sove. Alor nou bezwen fer sir ki nou pa les sa lemonn anbet nou e fer nou aret depan lo Zeova. O kontrer annou determinen pour ranforsi nou lafwa e servi byen sa letan kot Bondye pe demontre pasyans.​—Mat. 24:13; lir 2 Pyer 3:17, 18.

[Kestyon]

[Portre lo paz 21]

Pasyans Bondye pou ed ou met lentere Rwayonm premye e ganny bokou byenfe!