1. Ano ang ginahunahuna sang pila ka matutom?

ANG isa ka sister nga nakalampuwas sa madamo nga kabudlayan sa sulod sang mga dekada mapainubuson nga namangkot, “Maabtan ko pa ayhan ang katapusan antes ako mapatay?” Ang pila nga madugay na nga nagaalagad kay Jehova nagahunahuna man sini. Ginapaabot naton ang adlaw nga bag-uhon sang Dios ang tanan nga butang, kag dulaon ang aton mga problema. (Bug. 21:5) Bisan pa may madamo kita nga rason sa pagpati nga malapit na gid ang katapusan sang sistema ni Satanas, mabudlay maghulat sing mapailubon sa sina nga adlaw.

2. Ano nga mga pamangkot parte sa diosnon nga pagpailob ang aton binagbinagon?

² Apang, ginapakita sang Biblia nga dapat kita magpailob. Pareho sang mga alagad sang Dios sang una, matigayon naton ang ginsaad sang Dios kon may mabakod kita nga pagtuo kag maghulat sing mapailubon sa tion nga tumanon niya ang iya mga saad. (Basaha ang Hebreo 6:11, 12.) Si Jehova mismo mapailubon. Puede niya tapuson ang kalautan sa bisan ano nga oras, pero nagahulat sia sing eksakto nga tion. (Roma 9:20-24) Ngaa mapailubon gid si Jehova? Paano si Jesus nangin halimbawa sang diosnon nga pagpailob? Ano ang mga benepisyo kon palambuon naton ang diosnon nga pagpailob? Ang mga sabat sa sini nga mga pamangkot makapabakod sang aton pagpailob kag pagtuo, bisan pa para sa aton daw kadugay kay Jehova.

3, 4. (a) Ngaa mapailubon si Jehova sa pagtuman sang iya katuyuan sa duta? (b) Ano ang reaksion ni Jehova sa pagrebelde sa Eden?

³ May maayo nga rason si Jehova sa pagpailob. Matuod, may bug-os sia nga awtoridad sa uniberso sa tanan nga tion; pero bangod sa pagrebelde sa Eden, nag-utwas ang mga isyu nga kinahanglan husayon para sa kaayuhan  sang tanan. Mapailubon si Jehova kay nahibaluan niya nga kinahanglan ang tion para masabat sing bug-os ini nga mga isyu. Nahibaluan gid niya ang ginahimo kag ginahunahuna sang mga indibiduwal sa langit kag sa duta, gani nagapanghikot sia para sa aton kaayuhan.—Heb. 4:13.

⁴ Katuyuan ni Jehova nga pun-on ang duta sang mga kaliwat nanday Adan kag Eva. Sang nasulay ni Satanas si Eva, kag naglapas si Adan, wala ginbag-o sang Dios ang iya katuyuan. Wala sia nagpadasudaso sa pagdesisyon, ukon ginpabay-an ang mga tawo. Sa baylo, naghimo sia sing paagi para matuman ang iya katuyuan sa katawhan kag sa Duta. (Isa. 55:11) Para matuman ang iya katuyuan kag mabindikar ang iya pagkasoberano, nagpakita si Jehova sing pagpugong sa kaugalingon kag pagpailob, amo nga naghulat sia sing linibo ka tuig para matuman ang pila ka bahin sang iya katuyuan sa pinakamaayo nga paagi.

5. Ano nga pagpakamaayo ang matigayon naton sa pagpailob ni Jehova?

⁵ May isa pa ka rason kon ngaa naghulat sing mapailubon si Jehova—gusto niya nga madamo pa ang makatigayon sing kabuhi nga walay katapusan. Subong, nagahimo sia sing mga tikang para maluwas ang “dakung kadam-an.” (Bug. 7:9, 14; 14:6) Ginalab-ot ni Jehova ang mga tawo paagi sa aton pagbantala, nga nagaagda sa ila nga magtuon parte sa iya Ginharian kag sa iya matarong nga mga talaksan. Ang mensahe sang Ginharian amo ang pinakamaayo nga balita para sa katawhan—huo, amo ini ang “maayong balita.” (Mat. 24:14) Ang tagsa ka indibiduwal nga ginabuyok ni Jehova nangin bahin sang bug-os kalibutan nga kongregasyon sang mga mag-abyan nga nagahigugma sang matarong. (Juan 6:44-47) Ginabuligan sang aton mahigugmaon nga Dios ina nga mga tawo nga matigayon ang iya kahamuot. Nagapili man sia sing pila ka tawo nga mangin miembro sang iya panguluhan sa langit. Kon ara na sila sa langit, buligan nila ang matinumanon nga mga tawo nga matigayon ang kahimpitan kag kabuhi nga walay katapusan. Gani bisan pa nagahulat sing mapailubon si Jehova, nagapanghikot sia para matuman ang iya mga saad—sa aton kaayuhan.

6. (a) Sa ano nga paagi nagpailob si Jehova sang adlaw ni Noe? (b) Paano nagpailob si Jehova sa aton tion?

⁶ Mapailubon si Jehova bisan pa ginapaakig sia. Makita naton ini sa iya pag-atubang sa kalautan antes sang Anaw. Sadto nga tion, lapnag ang imoralidad kag kasingki sa duta, kag ‘nagpasakit sa tagiposoon’ ni Jehova ang nagalala nga kahimtangan sang tawo. (Gen. 6:2-8) Indi sia magpasugot nga magapadayon ini nga kahimtangan, gani nagdesisyon sia nga laglagon ang di-matinumanon nga katawhan paagi sa anaw. Samtang “mapailubon nga naghulat ang Dios sadtong mga adlaw ni Noe,” naghimo sia sing paagi para maluwas si Noe kag ang iya pamilya. (1 Ped. 3:20) Sa nagakaigo nga tion, ginpahibalo ni Jehova si Noe sang iya desisyon kag ginsugo nga magtukod sing arka. (Gen. 6:14-22) Luwas sini, si Noe nangin “manugbantala sang pagkamatarong,” nga nagasugid sa mga tawo sang nagahilapit nga kalaglagan. (2 Ped. 2:5) Suno kay Jesus, ang aton panahon pareho sang mga adlaw ni Noe. Nakadesisyon na si Jehova kon san-o niya tapuson ining malaut nga sistema. Pero wala sing tawo nga nakahibalo sang “adlaw kag oras” kon san-o ina mahanabo. (Mat. 24:36) Sini nga tion, ginhatag sang Dios sa aton ang hilikuton sa pagpaandam sa mga tawo kag pagsugid kon paano sila maluwas.

7. Mahinay bala si Jehova sa pagtuman sa iya mga saad? Ipaathag.

⁷ Gani, ang pagpailob ni Jehova wala nagapahangop nga nagapaligad lang sia sing tion. Indi kita dapat maghunahuna nga ang iya pagpailob nagapakita nga wala sia sing labot ukon wala nagasapak! Pero mahimo amo sini ang aton mapamensar samtang nagatigulang kita kag nagaantos sa sining malaut  nga sistema. Mahimo kita malugaw-an ukon magbatyag nga mahinay magtuman ang Dios sang iya mga saad. (Heb. 10:36) Indi pagkalimti nga may maayo sia nga mga rason sa pagpailob kag ginagamit niya ang nabilin nga tion para sa kaayuhan sang iya matutom nga mga alagad. (2 Ped. 2:3; 3:9) Binagbinaga man kon paano si Jesus nagpakita sing diosnon nga pagpailob.

8. Sa ano nga mga kahimtangan nagpakita si Jesus sing pagpailob?

⁸ Ginahimo ni Jesus ang kabubut-on sang Dios, kag linibo na ka tuig nga nalipay sia sa paghimo sini. Sang nagrebelde si Satanas, nagdesisyon si Jehova nga ipadala sa duta ang iya bugtong nga Anak subong Mesias. Hunahunaa kon ano ang ginbatyag ni Jesus. Mapailubon sia nga naghulat sing linibo ka tuig tubtob mag-abot ina nga tion. (Basaha ang Galacia 4:4.) Wala lang sia naghulat, kundi nangin masako sia sa hilikuton nga ginhatag sang iya Amay. Sang nagkari sia sa duta, nahibaluan niya nga mapatay sia sa kamot ni Satanas, subong sang gintagna. (Gen. 3:15; Mat. 16:21) Mapailubon sia nga nagpasakop sa kabubut-on sang Dios bisan pa mag-antos sia sing grabe nga kasakit. Pinasahi gid ang iya katutom! Wala sia nagkonsentrar sa iya kaugalingon kag sa iya posisyon, kag dapat naton sia ilugon.—Heb. 5:8, 9.

9, 10. (a) Ano ang ginahimo ni Jesus samtang mapailubon nga nagahulat kay Jehova? (b) Paano naton dapat tamdon ang tion nga ginpahamtang ni Jehova?

⁹ Sa tapos mabanhaw si Jesus, nakabaton sia sing awtoridad sa langit kag sa duta. (Mat. 28:18) Ginagamit niya ini nga awtoridad sa pagtuman sang katuyuan ni Jehova nahisuno sa tion nga ginpahamtang sang Dios. Mapailubon nga naghulat si Jesus sa tuo sang Dios tubtob ang iya mga kaaway mabutang nga palatungan sang iya mga tiil sang 1914. (Sal. 110:1, 2; Heb. 10:12, 13) Sa indi madugay, tapuson niya ang sistema ni Satanas. Sa karon, mapailubon nga nagapanghikot si Jesus upod sa mga tawo kag nagatuytoy sa ila sa “tubig sang kabuhi.”—Bug. 7:17.

¹⁰ Nakita mo bala sa halimbawa ni Jesus kon paano naton dapat tamdon ang tion nga ginpahamtang ni Jehova? Pat-od nga luyag gid himuon ni Jesus ang tanan nga ginapangabay sang iya Amay; pero handa sia maghulat sa tion nga ginpahamtang sang Dios. Samtang ginahulat naton ang kalaglagan sang malauton nga sistema ni Satanas, kinahanglan naton tanan ang diosnon nga pagpailob, nga wala nagauna sa Dios ukon nagapangampo bangod naluyahan kita sing buot. Ano ang aton himuon para matigayon ining diosnon nga pagpailob?

11. (a) Ano ang kaangtanan sang pagtuo kag pagpailob? (b) Ngaa may rason gid kita nga magpakita sing mabakod nga pagtuo?

¹¹ Antes si Jesus nagkari sa duta, ang mga manalagna kag ang iban nga matutom nga mga alagad nagpakita sing halimbawa kon paano makabatas sing mapailubon ang indi himpit nga mga tawo. Ang ila pagpailob naangot sa ila pagtuo. (Basaha ang Santiago 5:10, 11.) Kon wala sila sing pagtuo sa ginsiling ni Jehova, makahulat ayhan sila sing mapailubon sa katumanan sang iya mga saad? Masami sila nakaeksperiensia sing makahaladlok ukon mabudlay nga mga pagtilaw sa ila pagtuo, nga nagasalig nga tumanon sang Dios ang iya ginpromisa. (Heb. 11:13, 35-40) May rason pa gid kita nga magpakita sing mabakod nga pagtuo, kay sa karon si Jesus amo ang “Manughimpit sang aton pagtuo.” (Heb. 12:2) Gintuman niya ang tagna kag ginpahayag ang mga katuyuan sang Dios para mapabakod ang aton pagtuo.

12. Ano ang aton himuon para magbakod ang aton pagtuo?

¹² Ano ang aton himuon para magbakod ang aton pagtuo kag mangin mapailubon? Ang sekreto amo ang pag-aplikar sa laygay  sang Dios. Halimbawa, binagbinaga ang mga rason kon ngaa dapat mo unahon ang Ginharian. Madugangan mo bala ang imo panikasog sa pag-aplikar sa laygay sang Mateo 6:33? Ginapahangop sini nga mahimo mo dugangan ang imo tion sa ministeryo ukon bag-uhon ang pila ka bahin sang imo pagkabuhi. Apresyaha kon paano ginpakamaayo ni Jehova ang imo mga panikasog. Mahimo buligan ka niya nga makadumala sing bag-o nga pagtuon sa Biblia ukon makatigayon sing “paghidait sang Dios nga nagalabaw sa tanan nga panghunahuna.” (Basaha ang Filipos 4:7.) Samtang ginadumdom mo ang mga pagpakamaayo nga imo nabaton sa pagsunod sa mga instruksion ni Jehova, mas marealisar mo nga dapat ka magpailob.—Sal. 34:8.

13. Paano naton iilustrar ang pagpabakod sang aton pagtuo kag pagpailob?

¹³ Mapaanggid ini sa literal nga pagtanom, pagsagod, kag pag-ani. Kon madamo sing maani ang mangunguma, mas may kompiansa sia nga magtanom liwat. Siempre, kinahanglan niya hulaton sing mapailubon ang tig-alani, pero wala ini nagapugong sa iya sa pagtanom. Mahimo pa gani niya palaparon ang iya talamnan. Nagasalig sia nga may anihon sia. Sing kaanggid, kon ginatun-an naton ang mga laygay ni Jehova, ginasunod ini, kag nagabaton sang mga pagpakamaayo, nagabakod ang aton pagsalig sa iya. Nagabakod man ang aton pagtuo, kag mas mahapos para sa aton nga hulaton ang iya pat-od nga mga pagpakamaayo.—Basaha ang Santiago 5:7, 8.

14, 15. Ano dapat ang aton pagtamod sa pag-antos sang tawo?

¹⁴ Ang isa pa ka paagi agod mapalambo ang pagpailob amo ang pagbinagbinag kon paano naton dapat tamdon ang kalibutan kag ang aton kahimtangan. Tilawi nga ilugon ang pagtamod ni Jehova. Halimbawa, hunahunaa kon paano niya ginatamod ang pag-antos sang tawo. Madugay na sia nga nasakitan sa pag-antos sang katawhan; pero  wala ini nagpugong sa iya sa paghimo sing maayo. Ginpadala niya ang iya bugtong nga Anak sa “paglaglag sa mga binuhatan sang Yawa” kag sa pagpasag-uli sa mga tawo gikan sa tanan nga halit nga gintuga ni Satanas sa ila. (1 Juan 3:8) Ang pag-antos temporaryo lamang, pero ang solusyon sang Dios permanente. Sing kaanggid, indi kita dapat maluyahan bangod sa malaut nga paggahom ni Satanas ukon madulaan sing pagpailob kon san-o ini tapuson. Sa baylo, dapat kita magtuo sa mga butang nga indi pa makita nga magapabilin sing dayon. May ginpat-od nga tion si Jehova kon san-o tapuson ang kalautan, kag magahulag sia suno sa tion.—Isa. 46:13; Nah. 1:9.

¹⁵ Sa katapusan nga mga adlaw sining sistema sang mga butang, mahimo kita makaeksperiensia sing grabe nga mga pagtilaw sa aton pagtuo. Sa baylo nga maakig kon mangin biktima kita sang kasingki ukon kon mag-antos ang aton mga hinigugma, dapat kita magsalig sing bug-os kay Jehova. Bangod sa aton di-kahimpitan, indi ini mahapos. Pero dumduma ang ginhimo ni Jesus nga narekord sa Mateo 26:39.—Basaha.

16. Ano ang dapat naton likawan sa sining nabilin nga tion?

¹⁶ Mahimo man maupangan ang aton pagpakita sing diosnon nga pagpailob kon maghulat lang kita nga wala nagapanghikot. Ano ang buot silingon sini? Ang isa ka tawo nga wala nagasalig nga malapit na ang katapusan mahimo maghunahuna sing lain nga plano, engkaso nga ang mga saad ni Jehova indi mag-abot suno sa iya ginaekspektar. Buot silingon, mahimo sia maghunahuna, ‘Tan-awon ko abi kon tumanon gid man ni Jehova ang iya ginsiling.’ Dayon, mahimo sia magtinguha sing kabantugan sa sini nga kalibutan, maghandum sing materyal imbes nga unahon ang Ginharian sang Dios, ukon magsalig sa mas mataas nga edukasyon para mangin masulhay ang iya kabuhi subong. Indi bala nga pamatuod ini sang kakulang sang pagtuo? Dumduma nga ginpalig-on kita ni Pablo nga mangin manug-ilog sa mga matutom nga nakabaton sing mga saad halin kay Jehova “paagi sa pagtuo kag pagpailob.” (Heb. 6:12) Indi pagtugutan ni Jehova nga magdugay pa ining malaut nga sistema kon tion na nga laglagon niya ini. (Hab. 2:3) Sa karon, dapat naton likawan ang pakulahaw nga pag-alagad kay Jehova. Dapat kita magpabilin nga alisto kag mapisan sa pagbantala, nga amo ang ginahalinan sang indi matupungan nga kalipay bisan sa karon.—Luc. 21:36.

17, 18. (a) Ano ang aton kahigayunan kon nagapailob kita? (b) Ano nga mga pagpakamaayo ang aton matigayon kon nagapailob kita karon?

¹⁷ Binulan man ukon dinekada na kita nga nagaalagad sa Dios, luyag naton sia alagaron sing walay katapusan. Ang pagpailob nagabulig sa aton nga magbatas tubtob matigayon ang kaluwasan, bisan pila man ang tion nga nabilin sa sining sistema. Ginahatagan kita karon ni Jehova sing kahigayunan nga mapamatud-an ang aton bug-os nga pagsalig sa iya mga desisyon, kag kon kinahanglanon, handa kita mag-antos sing kalautan para sa iya ngalan. (1 Ped. 4:13, 14) Ginahanas man kita sang Dios agod mapalambo ang pagpailob nga kinahanglan para sa kaluwasan.—1 Ped. 5:10.

¹⁸ May bug-os nga awtoridad si Jesus sa langit kag sa duta, kag wala sing isa nga makaagaw sa imo gikan sa iya pangamlig—luwas kon magpalayo ka sa iya. (Juan 10:28, 29) Indi kita dapat mahadlok sa palaabuton ukon sa kamatayon. Ang mga mapailubon nga nagabatas tubtob sa katapusan maluwas. Gani dapat naton pat-uron nga indi kita masulay sang kalibutan kag mag-untat sa pagsalig kay Jehova. Sa baylo, mangin determinado kita nga pabakuron ang aton pagtuo kag gamiton sing maalamon ang tion nga nagapailob ang Dios.—Mat. 24:13; basaha ang 2 Pedro 3:17, 18.