Wĩrute Kuumana na Ũkirĩrĩria wa Jehova na Jesu

“Tuai atĩ ũrĩa Mwathani witũ atũire akiragĩrĩria, nĩguo ũtũmaga mũhonokio.”—2 PET. 3:15.

ŨNGĨCOKIA ATĨA?

Jehova onanĩtie atĩa atĩ nĩ mũkirĩrĩria?

Jesu aabataraga gũkirĩrĩria ihinda iraya nĩkĩ?

Nĩ makinya marĩkũ tũngĩoya nĩguo twĩkĩre hinya ũkirĩrĩria witũ?

1. Nĩ ũndũ ũrĩkũ andũ amwe arĩa makoretwo marĩ ehokeku meyũragia?

 MWARĨ wa Ithe witũ ũmwe mwĩhokeku wakirĩrĩirie moritũ maingĩ ihinda rĩa mĩaka mĩrongo ĩigana ũna oririe ũũ enyihĩtie, “Hihi nĩ ngona mũthia itakuĩte?” Andũ amwe arĩa matungatĩire Jehova ihinda iraya nĩ meyũragia ũndũ ũcio. Nĩ twĩriragĩria mũno mũthenya ũrĩa Ngai akerũhia maũndũ mothe, eherie mathĩna marĩa mothe tũrĩ namo rĩu. (Kũg. 21:5) O na gũtuĩka tũrĩ na itũmi njiganu cia gwĩtĩkia atĩ mũthia wa mũtabarĩre ũyũ wa Shaitani nĩ ũkuhĩrĩirie mũno-rĩ, ti ũndũ mũhũthũ gweterera mũthenya ũcio tũkirĩrĩirie.

2. Nĩ ciũria irĩkũ tũkwarĩrĩria ciĩgiĩ ũkirĩrĩria ta wa Ngai?

² O na kũrĩ ũguo, Bibilia yonanagia atĩ no mũhaka tũkirĩrĩrie. O ta ndungata cia Ngai cia hau kabere, nĩ tũkaamũkĩra kĩrĩa Ngai eranĩire tũngĩtũũria wĩtĩkio mũrũmu na tweterere ihinda rĩake rĩa kũhingia ciĩranĩro icio tũkirĩrĩirie. (Thoma Ahibirania 6:11, 12.) Jehova we mwene akoretwo arĩ mũkirĩrĩria. Nĩ aangĩaninire waganu ihinda rĩrĩa rĩhĩtũku, no etagĩrĩra hĩndĩ ĩrĩa yagĩrĩire ĩkinye. (Rom. 9:20-24) Akiragĩrĩria ũguo wothe nĩkĩ? Jesu akoretwo arĩ kĩonereria kĩa ũkirĩrĩria ta wa Ngai atĩa? Nĩ irathimo irĩkũ tũngĩgĩa nacio tũngĩkũria ũkirĩrĩria ta wa Ngai? Macokio ma ciũria icio no matũteithie gũkũria ũkirĩrĩria na wĩtĩkio mũrũmu, o na tũngĩona ta Jehova aracererũo.

JEHOVA AKIRAGĨRĨRIA NĨKĨ?

3, 4. (a) Jehova akoretwo akĩonania ũkirĩrĩria harĩ kũhingia muoroto wake wĩgiĩ thĩ nĩkĩ? (b) Jehova eekire atĩa rĩrĩa kwagĩire ũremi Edeni?

³ Jehova arĩ na gĩtũmi kĩega gĩa kuonania ũkirĩrĩria. Nĩ ma nĩ akoretwo na ũhoti wa gwathana kũndũ guothe;  ĩndĩ, ũremi ũrĩa wa Edeni nĩ woimĩririe ciũria cia bata igũrũ na thĩ. Jehova akoretwo arĩ mũkirĩrĩria, akĩmenyaga atĩ gũcokia ciũria icio na njĩra nginyanĩru nĩ gũkuoya ihinda. Nĩ ũndũ wa gũkorũo ena ũmenyo wĩgiĩ ciĩko na mĩerekera ya o kĩũmbe kĩrĩ igũrũ kana gũkũ thĩ, hatarĩ nganja maũndũ marĩa ekaga nĩ ma gũtwendera wega.—Ahib. 4:13.

⁴ Warĩ muoroto wa Jehova atĩ njiarũa cia Adamu na Hawa ciyũrie thĩ. Rĩrĩa Shaitani aahenereirie Hawa nake Adamu agĩcoka akĩhia, Ngai ndaateanĩirie muoroto wake. Ndaamakire, akĩhĩkĩka gũtua itua, kana akĩrakara, agĩtiganĩria famĩlĩ ya andũ. Ithenya rĩa ũguo, aathondekire njĩra ya kũhingia muoroto wake harĩ andũ na Thĩ. (Isa. 55:11) Nĩguo ahingie muoroto wake na atĩithie ũnene wake, Jehova nĩ akoretwo akĩĩgirĩrĩria mũno na agakirĩrĩria, o na ageterera mĩaka ngiri nyingĩ nĩguo maũndũ mamwe makoniĩ muoroto wake mahinge na njĩra njega biũ.

5. Ũkirĩrĩria wa Jehova ũtũhotithagia kũgĩa na irathimo irĩkũ?

⁵ Ũndũ ũngĩ ũtũmĩte Jehova eterere akirĩrĩirie, nĩ getha andũ angĩ aingĩ makona muoyo wa tene na tene. Ihinda-inĩ rĩrĩ, araharĩrĩria ũrĩa akahonokia “kĩrĩndĩ kĩingĩ.” (Kũg. 7:9, 14; 14:6) Jehova etaga andũ merute ũhoro wĩgiĩ Ũthamaki wake na ithimi ciake cia ũthingu, kũgerera wĩra witũ wa kũhunjia. Ndũmĩrĩri ya Ũthamaki nĩyo ũhoro ũrĩa mwega makĩria andũ mangĩheo—nĩ ma, nĩ ‘ũhoro mwega.’ (Mat. 24:14) Mũndũ wothe Jehova agucagĩrĩria aingĩraga thĩinĩ wa kĩũngano gĩa thĩ yothe kĩa arata a ma arĩa mendete maũndũ marĩa mega. (Joh. 6:44-47) Ngai witũ mwendani nĩ ateithagia andũ ta acio metĩkĩrĩke harĩ we. Ningĩ nĩ akoretwo agĩthuura andũ arĩa magaathana thĩinĩ wa thirikari yake ya igũrũ. Marĩkia kũheo wathani igũrũ, andũ acio me kĩyo nĩ magaateithia andũ arĩa athĩki gũtuĩka akinyanĩru na kũgĩa na muoyo ũtagaathira. Ma nĩ atĩ, o na hĩndĩ ĩno etereire akirĩrĩirie, Jehova akoretwo akĩbanga ũrĩa akaahingia ciĩranĩro ciake—nĩguo tũgunĩke.

6. (a) Jehova onanirie ũkirĩrĩria na njĩra ĩrĩkũ matukũ-inĩ ma Nuhu? (b) Jehova onanagia ũkirĩrĩria atĩa mahinda-inĩ maitũ?

⁶ Jehova nĩ akiragĩrĩria o na ekwo maũndũ moru mũno, o ta ũrĩa tuonaga eekire andũ aganu arĩa marĩ kuo mbere ya Kĩguũ. Hĩndĩ ĩyo thĩ yaiyũrĩte waganu na ũhinya, nake Jehova ‘akĩigua ũũru ngoro’ nĩ gũkorũo mĩtugo ya andũ nĩ yathũkĩte mũno. (Kĩam. 6:2-8) Ndangĩakirĩrĩirie ũndũ ũcio tene na tene, nĩ ũndũ ũcio agĩtua atĩ nĩ ekũrehe kĩguũ nĩguo aniine arĩa aganu. Hĩndĩ ĩrĩa ‘Ngai eetereire akirĩrĩirie matukũ-inĩ ma Nuhu,’ Jehova nĩ aahaarĩrĩirie mĩbango ya kũhonokia Nuhu na famĩlĩ yake. (1 Pet. 3:20) Ihinda rĩrĩa rĩagĩrĩire rĩakinya, Jehova nĩ aamenyithirie Nuhu itua rĩake na akĩmwĩra ake thabina. (Kĩam. 6:14-22) Hamwe na ũguo, Nuhu aarĩ “mũhunjia wa ũhoro wa ũthingu,” akamenyithagia andũ arĩa angĩ ũhoro wa mũthiro ũrĩa warorete gũka. (2 Pet. 2:5) Jesu oigire atĩ ihinda ritũ rĩhaana o ta matukũ ma Nuhu. Jehova nĩ atuĩte rĩrĩa akaniina mũtabarĩre ũyũ mũũru. Gũtirĩ mũndũ ũĩ ‘mũthenya kana ihinda’ rĩrĩa ũndũ ũcio ũgekĩka. (Mat. 24:36) Ihinda-inĩ rĩrĩ, Ngai nĩ atũheete wĩra wa kũhe andũ mũkaana na kũmeera ũrĩa mangĩka nĩguo makaahonoka.

7. Hihi Jehova nĩ arĩ kahora harĩ kũhingia ciĩranĩro ciake? Taarĩria.

⁷ Ma nĩ atĩ, gũkirĩrĩria kwa Jehova ti kuuga atĩ arekaga ihinda rĩhĩtũke tu. Aca, tũtiagĩrĩirũo o na rĩ kuona gũkirĩrĩria gwake taarĩ kwaga gũkorũo akĩrũmbũiya maũndũ! O na kũrĩ ũguo-rĩ, ti ũndũ mũhũthũ kũririkana ũndũ ũcio o ũrĩa tũrakũra kana rĩrĩa twanyamarĩka mũtabarĩre-inĩ ũyũ mũũru. Twahota gũkua ngoro kana tuone ta Ngai arĩ  kahora harĩ kũhingia ciĩranĩro ciake. (Ahib. 10:36) Ndũkanariganĩrũo atĩ arĩ na itũmi njega cia gũkirĩrĩria na atĩ etĩkĩrĩtie ihinda rĩrĩ nĩguo ndungata ciake ĩrĩa njĩhokeku igunĩke. (2 Pet. 2:3; 3:9) Ningĩ ta wĩcirie ũrĩa Jesu onanirie ũkirĩrĩria ta wa Ngai.

JESU AIGĨTE ATĨA KĨONERERIA KĨEGA KĨA ŨKIRĨRĨRIA?

8. Jesu onanirie ũkirĩrĩria arĩ rungu rwa maũndũ marĩkũ?

⁸ Jesu nĩ areka wendi wa Ngai na akoretwo agĩĩka ũguo mĩaka ngiri itangĩmenyeka. Rĩrĩa Shaitani aakararirie, Jehova nĩ aatuire atĩ Mũriũ wake wa mũmwe nĩ agoka thĩ arĩ Mesia. Ta wĩcirie ũrĩa Jesu aabataraga gwĩka—gweterera akirĩrĩirie mĩaka ngiri nyingĩ nginya ihinda rĩu rĩkinye. (Thoma Agalatia 4:4.) Hĩndĩ ĩyo yothe to ihinda eeroragĩra rĩkĩhĩtũka; ithenya rĩa ũguo, Jesu aarĩ wĩra-inĩ ũrĩa Ithe aamũheete. Macũngĩrĩro-inĩ rĩrĩa okire gũkũ thĩ, nĩ aamenyaga atĩ no mũhaka oragithio nĩ Shaitani, o ta ũrĩa kwarathĩtwo. (Kĩam. 3:15; Mat. 16:21) Nĩ aathĩkĩire wendi wa Ngai akirĩrĩirie, o na gũtuĩka gwĩka ũguo kwarĩ na ruo rũnene. Akĩonania wĩhokeku mũnene mũno. Ndeeciragia o ũhoro wake na gaturwa gake, na kĩonereria kĩu no gĩtũteithie.—Ahib. 5:8, 9.

9, 10. (a) Jesu akoretwo agĩka atĩa o agĩetagĩrĩra Jehova oye ikinya akirĩrĩirie? (b) Twagĩrĩirũo kuona atĩa mũbango wa Jehova wa mahinda?

⁹ Thutha wa kũriũkio, Jesu nĩ aaheirũo wathani wothe igũrũ na gũkũ thĩ. (Mat. 28:18) Ahũthagĩra wathani ũcio kũhingia muoroto wa Jehova kũringana na ihinda rĩrĩa Ngai abangĩte. Jesu eetereire akirĩrĩirie arĩ guoko-inĩ kwa ũrĩo kwa Ngai nginya 1914 nĩguo thũ ciake ciigwo rungu rwa makinya make. (Thab. 110:1, 2; Ahib. 10:12, 13) Ica ikuhĩ nĩ ekuoya ikinya rĩa kũniina mũtabarĩre ũyũ wa Shaitani. Ihinda-inĩ rĩrĩ, Jesu ararutithania wĩra na andũ akirĩrĩirie na akamatongoria “ithima-inĩ cia maĩ ma muoyo.”—Kũg. 7:17.

¹⁰ Hihi nĩ weruta kuumana na kĩonereria kĩa Jesu ũrĩa wagĩrĩirũo kuona mũbango wa Jehova wa mahinda? Hatirĩ nganja Jesu aarĩ na wendi wa gwĩka o ũrĩa wothe Ithe angĩamwĩrire eke; o na kũrĩ ũguo, nĩ eehaarĩirie gweterera ihinda rĩrĩa Ngai aigĩte. O tũgĩetagĩrĩra mũthia wa mũtabarĩre ũyũ mũũru wa Shaitani, ithuothe nĩ tũrabatara ũkirĩrĩria ta wa Ngai, tũgĩetagĩrĩra Ngai na tũtekũnoga rĩrĩa twakua ngoro. Tũngĩĩka atĩa nĩguo tũkũrie ũkirĩrĩria ta ũcio wa Ngai?

INGĨKŨRIA ŨKIRĨRĨRIA TA WA NGAI ATĨA?

11. (a) Hakoragwo na ũkuruhanu ũrĩkũ gatagatĩ ka wĩtĩkio na ũkirĩrĩria? (b) Nĩkĩ twĩna itũmi njega cia gũkorũo na wĩtĩkio mũrũmu?

¹¹ Jesu atanoka gũkũ thĩ, anabii na andũ angĩ ehokeku nĩ maigĩte kĩonereria kĩega kĩa ũrĩa o na andũ matarĩ akinyanĩru mangĩkirĩrĩria. Wĩtĩkio wao nĩ wakuruhanĩte ĩmwe kwa ĩmwe na ũkirĩrĩria wao. (Thoma Jakubu 5:10, 11.) Korũo matietĩkĩtie biũ ũrĩa Jehova aamerĩte-rĩ, ningĩ korũo matiarĩ na wĩtĩkio—hihi nĩ mangĩetereire makirĩrĩirie kũhinga gwa ciĩranĩro ciake? Nĩ kaingĩ macemanagia na magerio manene ma wĩtĩkio, mehokete biũ atĩ mũthia-inĩ Ngai nĩ aangĩekire ũrĩa eeranĩire. (Ahib. 11:13, 35-40) Ithuĩ twĩna itũmi nyingĩ makĩria cia gũkorũo na wĩtĩkio mũrũmu, amu Jesu rĩu nĩ ‘Mũhingia wa wĩtĩkio ũrĩa twĩtĩkĩtie.’ (Ahib. 12:2) Aahingirie morathi na akĩguũria mĩoroto ya Ngai na njĩra ĩtũheaga itũmi njega cia gũtũma tũgĩe na wĩtĩkio.

12. Nĩ atĩa tũngĩĩka nĩguo twĩkĩre wĩtĩkio witũ hinya?

¹² Nĩ makinya marĩkũ tũngĩoya gwĩkĩra wĩtĩkio witũ hinya, nĩguo tuongerere ũkirĩrĩria? Ũndũ ũmwe wa bata nĩ kũrũmĩrĩra ũtaaro wa Ngai. Kwa ngerekano, wĩcũranie  kĩrĩa gĩtũmaga ũige Ũthamaki mbere ũtũũro-inĩ waku. Hihi no wĩrutanĩrie makĩria kũhũthĩra ũtaaro ũrĩa ũrĩ thĩinĩ wa Mathayo 6:33? No ũbatare kũhũthĩra ihinda rĩinga-ingĩ ũtungata-inĩ kana kũgarũrĩra maũndũ mamwe ma mũtũũrĩre waku. Ndũkanage kuona ũrĩa Jehova arathimĩte kĩyo gĩaku gũkinyĩria rĩu. No akorũo hihi nĩ agũteithĩtie kwambĩrĩria kwĩruta na mũndũ Bibilia kana agagũteithia kũgĩa na “thayũ wa Ngai, ũrĩa ũtangĩmenyeka ũrĩa ũtariĩ.” (Thoma Afilipi 4:7.) Kwoguo o ũrĩa ũrerekeria meciria maku harĩ irathimo iria wamũkĩrĩte nĩ ũndũ wa kũrũmĩrĩra ũtongoria wa Jehova, nĩ ũrĩonaga bata wa gũkirĩrĩria makĩria.—Thab. 34:8.

13. Tũngĩheana ngerekano ĩrĩkũ ya ũrĩa tũngĩĩkĩra hinya wĩtĩkio na ũkirĩrĩria witũ?

¹³ Ũndũ ũcio ũhanaine na mũtaratara ta ũrĩa wa ndũire wa kũhanda, kũrĩmĩra na kũgetha. Hĩndĩ ciothe mũrĩmi angĩgĩa na magetha maingĩ, nĩ agĩaga na ũũmĩrĩru makĩria wa kũhanda mbeũ kĩmera kĩrĩa gĩkũrũmĩrĩra. Nĩ ma, no mũhaka eterere hĩndĩ ya magetha akirĩrĩirie, no ũndũ ũcio ndũngĩgiria ahande mbeũ, o na kana hihi ahande mũgũnda mũnena-nene gũkĩra kĩmera kĩu kĩngĩ. Akoragwo na wĩtĩkio atĩ nĩ akaagetha. No taguo, o ũrĩa tũreruta ũtaaro wa Jehova kaingĩ, tũkaũrũmĩrĩra, na tũkona ũguni waguo, nĩ tũmwĩhokaga makĩria. Wĩtĩkio witũ o naguo nĩ wongererekaga, na ũgakorũo ũrĩ ũndũ mũhũthũ gweterera irathimo iria tũĩ nĩ igooka.—Thoma Jakubu 5:7, 8.

14, 15. Twagĩrĩirũo gũkorũo na mawoni marĩkũ kwerekera mĩnyamaro ya andũ?

¹⁴ Njĩra ĩngĩ ya gũkũria ũkirĩrĩria nĩ gũthuthuria mawoni marĩa twagĩrĩirũo gũkorũo namo kwerekera thĩ na maũndũ maitũ. Geria kuona maũndũ ta ũrĩa Jehova amonaga. Kwa ngerekano, ta wĩcirie ũrĩa onaga mĩnyamaro ya andũ. Kwa ihinda iraya  nĩ akoretwo agĩtuurũo nĩ kuona andũ makĩnyamarĩka; ĩndĩ, ndarĩ atoorio nĩ kĩeha, akaremwo nĩ gwĩka wega. Aatũmire Mũriũ wake wa mũmwe ‘nĩ getha atharũrie wĩra wa Mũcukani’ na aniine maũndũ mothe marĩa moru Shaitani areheire andũ. (1 Joh. 3:8) Ma nĩ atĩ, mĩnyamaro ĩgũkorũo ĩrĩ ya kahinda, no ũteithio wa Ngai nĩ wa gũtũũra. O ũndũ ũmwe na ũguo, handũ ha gwĩtĩkĩra tũtoorio nĩ waganu rungu rwa wathani mũũru wa Shaitani kana gũthethũkĩra rĩrĩa ũgathira-rĩ, rekei tũige wĩtĩkio witũ harĩ maũndũ marĩa matonekaga marĩa megũtũũra tene na tene. Jehova nĩ atuĩte rĩrĩa akaniina waganu, na ageeka ũguo hĩndĩ ĩrĩa yagĩrĩire.—Isa. 46:13; Nah. 1:9.

¹⁵ Matukũ-inĩ maya maritũ ma kũrigĩrĩria ma mũtabarĩre ũyũ, wĩtĩkio witũ wahota gũcemania na magerio ma mwanya. No handũ ha kũrakara rĩrĩa twahutio nĩ wĩki-naĩ kana rĩrĩa endwa aitũ manyamarĩka, tũbatiĩ gũtua itua rĩa kwĩhoka Jehova biũ. Tũtirĩ akinyanĩru, kwoguo ti ũndũ mũhũthũ gwĩka ũguo. O na kũrĩ ũguo, ririkana ũrĩa Jesu eekire ta ũrĩa tũthomaga thĩinĩ wa Mathayo 26:39.—Thoma.

16. Tũrabatara gwĩthema gwĩka atĩa ihinda-inĩ rĩrĩa rĩtigarĩte?

¹⁶ Ũndũ ũmwe ũngĩgiria tũkorũo na ũkirĩrĩria ta wa Ngai nĩ mwerekera wa kuuga ngweterera nyone. Ũguo nĩ kuuga atĩa? Mũndũ ũtetĩkĩtie biũ atĩ mũthia ũrĩ hakuhĩ ahota kwambĩrĩria mĩbango ĩngĩ, kũngĩtuĩka atĩ maũndũ matigũthiĩ ta ũria Jehova oigĩte. Na njĩra ĩngĩ, ahota kwĩĩra atĩrĩ, ‘Ngweterera nyone kana Jehova kũna nĩ ekũhingia ciugo ciake.’ Mũndũ ũcio no agerie kwĩgĩĩra na igweta thĩinĩ wa thĩ ĩno, gũcaria ũgitĩri wa kĩĩmbeca handũ ha kũiga Ũthamaki wa Ngai mbere, kana kũiga mwĩhoko harĩ gĩthomo kĩa igũrũ nĩguo agĩe na mũtũũrĩre mwega rĩu. No kũna, githĩ ũndũ ũcio ndũronania kwaga wĩtĩkio? Ririkana atĩ Paulo aatwĩkĩrire ngoro twĩgerekanagie na andũ ehokeku arĩa maahingĩirio ciĩranĩro nĩ Jehova “nĩ ũndũ wa ũrĩa metĩkĩtie na magakirĩrĩria.” (Ahib. 6:12) Jehova ndegwĩtĩkĩria mũtabarĩre ũyũ mũũru ũthiĩ na mbere ihinda iraya makĩria ma ũrĩa kwagĩrĩire kũringana na muoroto wake. (Hab. 2:3) Ihinda-inĩ rĩrĩ, no mũhaka twĩtheme gũtungatĩra Jehova o no getha twĩrute ho. Ithenya rĩa ũguo, tũrabatara gũikara twĩiguĩte na kũhunjia ũhoro ũyũ mwega tũrĩ na kĩyo, ũndũ ũrĩa ũtũmaga tũiganĩre na njĩra nene o na rĩu.—Luk. 21:36.

GŨKIRĨRĨRIA KŨREHAGA IRATHIMO IRĨKŨ?

17, 18. (a) Ihinda rĩrĩ twĩna mweke ũrĩkũ ũhoro-inĩ wĩgiĩ ũkirĩrĩria? (b) Tũkaagĩa na irathimo irĩkũ nĩ ũndũ wa kuonania ũkirĩrĩria?

¹⁷ O na kana tũtungatĩire Ngai mĩeri o mĩnini kana mĩaka mĩrongo, tũngĩenda kũmũtungatĩra tene na tene. Ũkirĩrĩria nĩ ũtũteithagia kũũmĩrĩria nginya tũkaahonokio, o na ihinda rĩrĩa rĩtigarĩte rĩa mũtabarĩre ũyũ rĩngĩkorũo rĩigana atĩa. Ihinda-inĩ rĩrĩ Jehova aratũhe mweke wa kuonania atĩ nĩ twĩhokete matua make biũ, na atĩ kũngĩbatarania, nĩ twĩtĩkĩrĩte kũnyamario nĩ ũndũ wa rĩĩtwa rĩake. (1 Pet. 4:13, 14) Ningĩ Ngai nĩ aratũhe ũũgĩ ũrĩa ũngĩtũteithia gũkũria ũkirĩrĩria ũrĩa tũrabatara nĩguo tũkaahonoka.—1 Pet. 5:10.

¹⁸ Jesu nĩ aheetwo wathani wothe igũrũ na thĩ, na gũtirĩ kĩndũ kĩngĩhota gũkũruta guoko-inĩ gwake—o tiga wĩrutire. (Joh. 10:28, 29) Hatirĩ bata wa gwĩtigĩra ihinda rĩrĩa rĩũkĩte o na kana gĩkuũ. Arĩa megũkirĩrĩria nginya mũthia nĩ makahonoka. Kwoguo no mũhaka tũtigĩrĩre atĩ tũtiretĩkĩria thĩ ĩno ĩtũheenererie ĩtũme tũtige kwĩhoka Jehova. Ithenya rĩa ũguo, no mũhaka twĩhotore kuongerera wĩtĩkio na kũhũthĩra wega kahinda gaka Ngai aronania ũkirĩrĩria.—Mat. 24:13; thoma 2 Petero 3:17, 18.

[Ciũria cia wĩruti]

[Mbica karatathi ka 21]

Ũkirĩrĩria ta wa Ngai nĩ ũgũgũteithia gũthingata maũndũ ma Ũthamaki na kũgĩa na irathimo nyingĩ!