MUNAZINYETUKADI ogu ga karera Jehova nomvhura dononzi noulimburukwi nokulididimikira maudigu kwa lipura asi: “Ngani mona uhura komeho ni fe ndi?” Vamwe ava va karera Jehova nomvhura dononzi nawo kwa lipura epuro lyangoso. Ose kuna kundindira nononkondo apa Karunga nga ka ninka nayinye yi kare yoyipe, nokukagusa po maudigu getu. (Ehor. 21:5) Nampili ngomu twa diva asi uzuni waSatana ntaantani u ka hage po, kuvhura yi kare udigu kundindira nelididimikiro ezuva olyo.

2. Mapuro musinke gokuhamena elididimikiro natu ka zogera?

² Bibeli kulikida asi twa hepa kulididimikira. Ngwendi vakareli vaKarunga vanare, nose ngatu ka gwana eyi ga tumbwidira Karunga nsene tu kara nepuro lyokupama nokundindira nelididimikiro siruwo esi nga ka sikisa mo matumbwidiro ogo. (Resa Vahebeli 6:11, 12.) Jehova mwene kwa lididimikira. Ngano nare ga hagekesa po uzuni ou, nye age kuna kundindira siruwo souhunga. (Rom. 9:20-24) Morwasinke Jehova a likidire elididimikiro? Ngapi Jesus ga tulisa po sihonena sosiwa selididimikiro? Mauwa musinke ngatu gwanena mo nsene tu tunga po elididimikiro? Malimbururo komapuro ogo kuvhura ga tu vatere tu tunge po elididimikiro nepuro lyokupama, nampili yi moneke kwetu ngwendi Jehova kuna kugusa siruwo sosire mokurugana ko yuma.

3, 4. (a) Morwasinke Jehova ga likidira elididimikiro mokusikisa mo sitambo sendi kevhu? (b) Yisinke ga rugene Jehova apa Adamu naEva va dilire kulimburukwa?

³ Kwato gumwe ogu ga kara nononkondo dokupitakana Jehova, ntani kapi ga hepa kundindira mokukahagekesa po maudigu nagenye. Nye Jehova ga kara nokonda  zongwa zokulikida elididimikiro. Morwa urwanesi womoEdeni, mapuro gamwe gomulyo ga hepere kugalimburura yipo navenye vemeguru nava vepevhu va gwanene mo uwa. Jehova ga lididimikira morwa ga yi divire asi pwa hepa siruwo sosire mokulimburura nawa mapuro ogo. Mokumona asi ga diva nawa yirugana nomagazaro gankenye ogu a kare asi gemeguru ndi gepevhu, yosili age kuna kurugana yoyiwa po kwetu.—Heb. 4:13.

⁴ Sitambo saJehova kwa kere asi ruvharo rwaAdamu naEva ru zwide evhu. Apa Satana ga zedere Eva makura Adamu a dire kulimburukwa, Karunga kapi ga hagekesere po sitambo sendi. Ntani age kapi ga piyaganene a dire kuvhura kutura po matokoro ndi a liguse ko kovantu. Nye, age kwa tulisire po mawapaiko yipo a sikise mo sitambo sendi kovantu nekevhu. (Jes. 55:11) Mokusikisa mo sitambo sendi nokuhungameka upangeli wendi, Jehova kwa likidire elipangero nelididimikiro pokundindira nomvhura mayovi yipo a sikise mo maruha gamwe gositambo sendi monkedi zokuwapera.

5. Konda musinke zongwa eyi Jehova ana kundindilira nelididimikiro?

⁵ Konda zimwe zeyi Jehova ana kundindilira nelididimikiro kuna kara asi yipo vantu wovanzi ngava ka gwane mwenyo gwanarunye. Dogoro ngesi, age kuna kurugana eyi ya hepa po yipo “emukurumbunga” ngali ka paruke. (Ehor. 7:9, 14; 14:6) Kupitira mezuvhiso lyetu, Jehova kuna kuzigida vantu va lironge kuhamena Uhompa wendi nonompango dendi douhunga. Mbudi zoUhompa kuna kara ‘mbudi zongwa’ po kovantu. (Mat. 24:14) Nkenye muntu ogu a koko Jehova kuyakara ruha rombunga zendi mouzuni mudima zovakaume wousili ava va hara youhunga. (Joh. 6:44-47) Karunga gwetu geharo kuvatera vantu vangoso yipo va mu hafese. Age hena ga horowora vantu vamwe yipo va ka hamene mepangero lyendi lyemeguru. Apa ngava ka kara meguru, awo ngava ka vatera vantu wovalimburukwi pevhu va ka sikilire mo nokukagwana mwenyo gwanarunye. Nampili ngomu ana kundindira nelididimikiro, Jehova kuna kutwikira kurugana a ka sikise mo matumbwidiro gendi yipo tu ka gwanene mo uwa.

6. (a) Ngapi Jehova ga likidire elididimikiro momazuva gaNowa? (b) Ngapi Jehova ana kulikida elididimikiro momazuva getu?

⁶ Jehova kulididimikira nampili vantu va rugane yininke yoyidona yokumuswaukisa. Pasihonena, gazadara ko eyi ga rugene apa uzuni wa donapere komeho zoRuhanzo. Jehova kwa ‘liverere’ morwa udona nonyanya kwa vhukire napenye ano vantu ngava gazara yoyidona yelike. (Gen. 6:2-8) Nampili ngoso, age kapi ga pulisilire udona u twikire ngorooro, yipo ga tokwere kureta ruhanzo ru ya zonagure po vantu wokudira kulimburukwa. Ngomu ga “ndindilire” Karunga, age kwa rugene eyi ya hepere po yipo a parure Nowa nepata lyendi. (1 Pet. 3:20) Posiruwo souhunga, Jehova kwa tanterere Nowa kuhamena ruhanzo nokumupangera a tunge emuwato. (Gen. 6:14-22) Ntani hena Jehova kwa tanterere Nowa “ogu nga udisa uhungami” a rondore vantu kuhamena ezonauko eli lya kere pepi. (2 Pet. 2:5) Jesus kwa tente asi mazuva getu kwa lifana nomazuva gaNowa. Jehova nare ga tokora siruwo esi nga ya zonagura po uzuni ou, nye kwato muntu ga diva “ezuva nosiruwo” apa ngayi sika mo oyo. (Mar. 13:32) Mosiruwo esi, ose kwa tu pa sirugana sokurondora vantu nokuvatantera omu nava vhura kuyaparuka.

7. Jehova kuna kugusa siruwo sosire mokusikisa mo matumbwidiro gendi ndi? Faturura.

⁷ Yosili, elididimikiro lyaJehova kapi lina kutanta asi age kuna kundindira tupu siruwo si pite. Twa ha gazara asi Jehova kapi ana kumona eyi yina kuhoroka ndi kwato sinka. Ngomu tuna kukurupa nomu tuna kuhepa mouzuni ou ureru kugazara monkedi zangoso. Kuvhura yi tu dompese mutjima  ndi tu lizuvhe asi Karunga kuna kugusa siruwo sosire sokusikisa mo matumbwidiro gendi. (Heb. 10:36) Twa ha divara asi age ga kara nonokonda donongwa dokulididimikira nokuruganesa siruwo esi yipo vakareli vendi wovalimburukwi va gwanene mo uwa. (2 Pet. 2:3; 3:9) Ngesi tatu ka zogera omu Jesus ga honenene elididimikiro lyoGuhwe.

8. Momaukaro musinke ga likidire Jesus elididimikiro?

⁸ Jesus kwa rugana mpango zaKarunga noruhafo nomvhura mayovi. Apa Satana ga rwanesere, Jehova kwa tokwere kutuma Munwendi a wize pevhu nokuyakara Mesiyasa. Gazara elididimikiro eli ga likidire Jesus nomvhura mayovi ngomu ga ndindilire si sike mo siruwo sokuwiza pevhu. (Resa Vagarata 4:4.) Age kapi tupu ga ndindilire siruwo oso ga hana kurugana ko yuma, nye age kwa rugene unene mosirugana esi ga mu pere Guhwe. Apa ga wizire pevhu, ga yi divire asi Satana yige nga retesa po nomfa dendi ngomu va yi pumba. (Gen. 3:15; Mat. 16:21) Age kwa lididimikire kukora kokunene morwa ga yi divire asi azo mpango zaKarunga asi a fe monkedi zangoso. Jesus kapi tupu ga ligazarere pwamwene. Nampili ngomu ga kere MunwaKarunga, age kwa linunupikire nokutulisa po sihonena sosiwa sokulimburukwa Karunga, ano twa hepa kumuhonena.—Heb. 5:8, 9.

9, 10. (a) Yisinke eyi ga rugene Jesus ngomu ga ndindilire Jehova a rugane ko yuma? (b) Ngapi omu natu temwinina sihonena saJesus?

⁹ Konyima zevhumbuko lyendi, Jesus kwa mu pere nonkondo demeguru nedi depevhu. (Mat. 28:18) Age nga ruganesa nonkondo odo mokusikisa mo sitambo saJehova kuliza nosiruwo esi ga horowora Karunga. Jesus kwa ndindilire nelididimikiro korulyo rwaKarunga dogoro mo-1914 apa ga tulire nonkore dendi konhi zonompadi dendi. (Epis. 110:1, 2; Heb. 10:12, 13) Ntaantani tupu a ka zonagure po uzuni waSatana. Ngomu ana kundindira, age kuna kuvatera vantu yipo ava tambure Karunga nokuvatwara ‘komema gomwenyo.’—Ehor. 7:17.

¹⁰ Ono dimburura mosihonena saJesus monkedi omu no tara siruwo esi ga horowora Jehova ndi? Jesus kapi tupu ga here kurugana eyi ga mu pulire Guhwe a rugane, nye hena kwa ndindira siruwo esi ga horowora Karunga. Ngomu tuna kundindira uhura wouzuni waSatana, natuvenye twa hepa kulikida elididimikiro mokundindira mwaKarunga nokutwikira ngorooro nampili tu dompe mutjima. Yisinke natu rugana yipo tu tunge po elididimikiro lyangoso?

11. (a) Ngapi elididimikiro lya likwatakanene nepuro? (b) Morwasinke tuna karere nokonda zongwa zokukara nepuro lyokupama?

¹¹ Komeho zokuwiza Jesus pevhu, vaporofete novakareli vamwe wovalimburukwi kwa yi likidire moyihonena yawo asi nampili vantu wokudira kusikilira mo kuvhura kulididimikira. Elididimikiro lyawo kwa likwatakanene nepuro lyawo. (Resa Jakopo 5:10, 11.) Ngano kapi va kere nepuro ndi va huguvare momatumbwindiro aga ga va tumbwidilire Jehova, awo ngano kapi va ndindilire nelididimikiro esikiliromo lyomatumbwidiro gendi. Nye, awo kwa lididimikilire momaudigu nomomaukaro gokutjilisa morwa va kere nepuro asi Karunga nga sikisa mo matumbwidiro gendi. (Heb. 11:13, 35-40) Ose twa kara nokonda zeyi natu karera nepuro lyokupama morwa Jesus kuna kara sihonena setu. Jesus kwa sikisire mo mauporofete gomanzi nokutuvatera tu kwate nawa egano sitambo saKarunga.

12. Yisinke twa hepa kurugana tu nkondopeke epuro lyetu?

¹² Nontambo musinke twa hepa kugusa  yipo tu nkondopeke epuro lyetu nokutunga po elididimikiro? Zokuhova kuna kara mokukwama mavyukiso gaKarunga. Pasihonena, gazadara kweyi wa hepera kutura muhowo Uhompa meparu lyoge. Kuvhura o liture mo unene mokulimburukwa mpango zomwaMateusa 6:33 ndi? Nampo kuvhura o rugane unene mosirugana sokuzuvhisa ndi o rerupike eparu lyoge. Jehova ga tungika nare elituromo lyoge lyokulimburukwa mavyukiso gendi. Nampo ga ku pa murongwa goBibeli gomupe ndi ga ku vatera o kare ‘nombili zaKarunga, ezi za pitakana unene nondunge nadinye.’ (Resa Vafilipi 4:7.) Ngomu ono kudemenena komatungiko ogo, ove ngo yi dimburura asi ya wapa mokukara nelididimikiro.—Epis. 34:8.

13. Sifanekeso musinke asi likida omu epuro nali vhura kutuvatera tu tunge po elididimikiro?

¹³ Sifanekeso esi kuvhura si tu vatere tu kwate egano omu epuro lyetu nali tu ninkisa tu likide elididimikiro. Munandima kupurura nokukuna nokuzangura. Nsene munandima a kara nomuzangu gomuwa, age kukara nehuguvaro lyokukuna nombuto hena. Age kuvhura a kune nombuto dononzi, morwa ga yi huguvara asi nga zangura hena. Mokulifana, ngomu tuna kulironga mapukururo gaJehova nokugakwama nokugwanena mo mauwa, ehuguvaro lyetu mwaJehova kukura. Nsene epuro lyetu li kura, ngayi tu rerupira tu ndindire matungiko aga gana kuwiza.—Resa Jakopo 5:7, 8.

14, 15. Ngapi omu atu gazara kuhamena ruhepo rovantu?

¹⁴ Nkedi zimwe omu natu tunga po elididimikiro kuna kara pokugazadara ko omu atu tara uzuni nomaukaro getu. Hetekera ko kutara yininke ngwendi moomu a yi tara Jehova. Pasihonena, gazadara ko omu a lizuvhu Jehova kuhamena ruhepo rovantu. Kutundilira kwanare, Jehova kwa mona ruhepo rovantu ano eyi kumukoresa, nye kapi a pulisire kukora oko ku mu  hagekese kurugana yoyiwa. Age kwa tuma Munwendi a ya “haraganese po yirugana yoMuzonaguli” nokuyagusa po ruhepo narunye oru ga retera Satana vantu. (1 Joh. 3:8) Yosili, Karunga ntaantani a ka guse po ruhepo narunye nanarunye. Yipo nye, kapisi tu pulisire udona ou una kara mouzuni u sesupike epuro lyetu ndi tu dire kukara nelididimikiro kuhamena uhura, nye ngano tu ture epuro moyininke eyi ayi dili kumoneka eyi ngayi dira kukahaga po. Jehova ga tokora nare siruwo esi nga hagekesa po udona, ntani nga yi rugana posiruwo souhunga.—Jes. 46:13; Nah. 1:9.

¹⁵ Pomazuva aga gopouhura goudigu, nampo twa lididimikira maukaro gomadigu unene aga ga heteka epuro lyetu. Nose novahali vetu nampo kuna kuhepa morwa nyanya ndi nokonda dimwe, nye twa hepa kutokomena kuhuguvara nawa-nawa mwaJehova. Ayo kapisi ureru kuyirugana oyo morwa kapi twa sikilira mo. Nye, tu diworokeni eyi ga rugene Jesus, ngomu va yi tjanga mwaMateusa 26:39.—Resa.

16. Ngomu tuna kundindira uhura, yisinke twa hepa kunyokera po?

¹⁶ Muntu ogu a kara nomasinganyeko kuhamena uhura kuvhura kutameka kukara nomutaro gwepuko. Age kuvhura a gazare asi ga hepa kurugana ko yuma morwa matumbwidiro gaJehova kapi gana kusika mo. Age kuvhura a gazare asi: ‘Tani ndindire ni tare nsene Jehova sili nga sikisa mo matumbwidiro gendi.’ Magazaro ogo gepuko kuvhura kuninkisa muntu a dire kulididimikira. Ngoyitundwamo, age kuvhura a hetekere ko kuyakara muntu gokufumana mouzuni ou ndi a tameke kuhuguvara moyimaliwa nokuhageka kutura muhowo Uhompa waKarunga ndi a tokore kuza kelirongo lyokuzeruka yipo a ya paruke nawa. Yosili, muntu gwangoso kulikida asi epuro lyendi kuna kuzegeza. Diworoka asi Paurusa kwa tu korangeda tu honene valimburukwi ava ga tumbwidilire Jehova kupitira ‘mepuro nomoudidimiki wawo.’ (Heb. 6:12) Jehova ga tokora nare kuzonagura po uzuni ou woudona, ano yiyo tupu kuhoroka nogu si ogu na yi rangesa. (Hab. 2:3) Mosiruwo esi ngesi, twa hepa kunyokera po nkareso zokuligusa-gusa mo mokukarera Jehova. Nye, twa hepa kuvangarara nokurugana unene mosirugana sokuzuvhisa mbudi zongwa, morwa sirugana esi ngasi tu retera ruhafo rorunene.—Ruk. 21:36.

17, 18. (a) Mpito musinke tuna kara nazo ngomu tuna kundindira nelididimikiro? (b) Mauwa musinke ngatu ka gwana nsene tu lididimikira?

¹⁷ Yi kare asi ose kwa karera Karunga makwedi gongandi ndi nomvhura dononzi, ose tuna hara kumukarera narunye. Elididimikiro ngali tu vatera tu twikire ngorooro dogoro ngatu ka gwane ezoworo, yi kare asi siruwo sokuhura kupi twa ndindira. Jehova ngesi kuna kutupa mpito zokulikida asi ose twa huguvara nawa-nawa momatokoro gendi ntani asi ngatu kara noulimburukwi kwendi nampili tu ligwanekere nomaudigu. (1 Pet. 4:13, 14) Karunga kuna kutupa hena edeuro eli ngali tu vatera tu lididimikire dogoro kouhura yipo tu ka paruke.—1 Pet. 5:10.

¹⁸ Jesus kwa mu pa nonkondo nadinye demeguru nedi depevhu, ano kwato ogu a vhuru kukugagunyuna mo mokuwoko kwendi nsene o kara noulimburukwi. (Joh. 10:28, 29) Kapisi hepero kutjira meho ndi nomfa. Ava ava lididimikire dogoro kouhura, yiwo ngava yoworoka. Twa ha pulisira magazaro gouzuni ga pukise magazaro getu nokutuninkisa tu dire kuhuguvara mwaJehova. Nye twa hepa kudemenena mokunkondopeka epuro lyetu nokuruganesa siruwo setu monaruwa.—Mat. 24:13; resa 2 Peturusa 3:17, 18.