Mu Likanyise Pilu-telele ya Jehova ni Jesu

“Mu talime pilu-telele ya Mulenaa luna kuli ki puluso.”—2 PIT. 3:15.

MU KONA KU ALABA CWAÑI?

Jehova u bonisize cwañi kuli u na ni pilu-telele?

Ki kabakalañi Jesu ha naa tokwa ku ba ni pilu-telele ka nako ye telele?

Lu kona ku ezañi kuli lu likanyise pilu-telele ya Mulimu?

1. Batu ba ba sepahala ba buzangañi?

KAIZELI ya sebelelize Jehova ka busepahali ka nako ya telele ili ya tiyezi miinelo ye miñata ye taata naa buzize kuli, “Kana ni ka bona mafelelezo a lifasi ni si ka shwa kale?” Batu ba bañwi ba ba sebelelize Jehova ka nako ye telele ba buzanga puzo ya swana. Lu nyolelwa nako yeo Mulimu u ka eza lika kaufela ku ba ze nca ni ku felisa butata bo bu shutana-shutana bo lu kopana ni bona kacenu. (Sin. 21:5) Nihaike kuli lu na ni mabaka a mañata a ku lumela kuli mafelelezo a muinelo wa Satani a fakaufi hahulu, ku kona ku ba taata ku libelela lizazi leo ka pilu-telele.

2. Ki lipuzo mañi ka za pilu-telele ze lu ka alaba?

² Bibele i bonisa kuli lu swanela ku ba ni pilu-telele. Ka ku swana ni batanga ba Mulimu ba kwamulaho, lu ka amuhela za lu sepisize Mulimu haiba lu ba ni tumelo ye tiile ni ku libelela ka pilu-telele nako ya ka taleleza lisepiso zeo. (Mu bale Maheberu 6:11, 12.) Jehova yena ka sibili u bonisize pilu-telele. Mulimu naa kona ku felisa bumaswe ka nako ifi kamba ifi, kono u libelela nako ye swanela. (Maro. 9:20-24) Ki kabakalañi ha bonisa pilu-telele ye tuna cwalo? Jesu u likanyisize cwañi pilu-telele ya Ndatahe mi u lu tomezi cwañi mutala? Ki kabakalañi ha ku li ko ku nde ku likanyisa mutala wa Jehova wa ku bonisa pilu-telele? Likalabo za lipuzo zeo za kona ku lu tusa ku ba ni pilu-telele ni tumelo ye tiile niha ku ka bonahala kuli Jehova wa liyeha hahulu ku nga muhato.

KI KABAKALAÑI JEHOVA HA BONISA PILU-TELELE?

3, 4. (a) Ki kabakalañi Jehova ha bonisize pilu-telele? (b) Jehova naa ezizeñi muta Adama ni Eva ne ba si ka mu utwa?

³ Ha ku na ya na ni maata a matuna mwa pupo kaufela a fita a Jehova, mi Jehova wa kona ku felisa butata kaufela ka nako ifi kamba ifi. Kono Jehova u bonisanga  pilu-telele ka mabaka a mande. Bakeñisa bukwenuheli bo ne bu bile teñi mwa Edeni, lipuzo ze ñwi za butokwa ne li tokwa ku alabiwa kuli libupiwa za kwa lihalimu ni za fa lifasi li tusiwe. Jehova u bile ni pilu-telele kakuli naa ziba kuli ku ka nga nako kuli lipuzo zeo li alabiwe hande. Bakeñisa kuli wa ziba hande likezo ni minahano ya libupiwa za kwa lihalimu ni za fa lifasi, Jehova u eza lika ka nzila ye lu tusa.—Maheb. 4:13.

⁴ Mulelo wa Jehova ne li wa kuli bana ba Adama ni Eva ba tale mwa lifasi. Satani ha naa pumile Eva, ni Adama ha naa si ka utwa Mulimu, Mulimu naa si ka bilaela, naa nahanile mwa ku ezeza lika, mi naa si ka yubeka batu. Kono naa ketile nzila ya naa ka taleleza ka yona mulelo wa hae ka za batu ni lifasi. (Isa. 55:11) Bakeñisa kuli Jehova u bonisize hahulu buiswalo ni pilu-telele, wa kona ku taleleza mulelo wa hae ni ku bonisa kuli puso ya hae ki ye nde kwa batu kaufela. Mane Jehova u libelezi ka lilimo ze ñata ilikuli a taleleze likalulo ze ñwi za mulelo wa hae ka nzila ye nde.

5. Pilu-telele ya Jehova i fumanisa mbuyoti mañi?

⁵ Libaka le liñwi Jehova ha libelezi ka nako ye telele ki la kuli batu ba bañata ba fumane bupilo bo bu sa feli. Ka nako ya cwale Mulimu u eza ze tokwahala kuli a puluse “buñata bo butuna bwa batu.” (Sin. 7:9, 14; 14:6) Ka ku lu fa musebezi wa ku kutaza, Jehova u mema batu kuli ba itute ka za Mubuso wa hae ni milao ya hae ye lukile. Lushango lwa Mubuso ki “taba ye nde” kwa batu. Mane ki taba ye nde ka ku fitisisa! (Mat. 24:14) Mañi ni mañi ya memiwa ki Jehova u ba kalulo ya kopano ya mwa lifasi kaufela mo ku na ni balikani ba niti ba ba lata ze lukile. (Joa. 6:44-47) Mulimu wa luna ya lilato u eza lika kaufela kuli a tuse batu kuli ba lumelelwe ki yena. Hape u sweli ku keta batu ba ba ka ba mwa Mubuso wa kwa lihalimu. Batu bao ha ba ka ba mwa lihalimu, ba ka tusa batu ba ba ipeya ku utwa fa lifasi kuli ba petahale ni kuli ba fumane bupilo bo bu sa feli. Nihaike kuli Jehova wa libelela, u zwezipili ku sebeza kuli a taleleze lisepiso za hae. Mi za eza kaufela za lu tusa.

6. (a) Jehova naa bonisize cwañi pilu-telele mwa linako za Nuwe? (b) Jehova u bonisa cwañi pilu-telele mwa miteñi ya luna?

⁶ Jehova u na ni pilu-telele nihaike kuli batu ba bañwi ba eza lika ze maswe za ku mu nyefula. Ka mutala mu nahane katulo ya naa ezize ka za bumaswe bo ne bu li teñi pili Muunda u si ka taha kale. “Pilu ya hae [Jehova] ya swaba” bakeñisa kuli batu ne ba tupwikezi mwa buhule ni mifilifili mi ne ba bata ku eza feela lika ze maswe. (Gen. 6:2-8) Jehova naa si ke a tuhelela bumaswe bo ku zwelepili ku ya ku ile. Kamukwaocwalo a tahisa Muunda ilikuli a sinye batu ba ba sa ipeyi ku utwa. Pili a si ka tahisa kale Muunda, naa ezize ze ne tokwahala kuli Nuwe ni lubasi lwa hae ba piliswe. (1 Pit. 3:20) Ka nako ye swanela, Jehova naa bulelezi Nuwe kuli naa ka tahisa Muunda mi a mu laela kuli a yahe aleka. (Gen. 6:14-22) Jehova hape naa bata kuli Nuwe a lemuse ba bañwi ka za sinyeho ye ne tuha i taha. Bibele i bulela kuli Nuwe naa li “mukutazi wa ku luka.” (2 Pit. 2:5) Jesu naa bulezi kuli nako ye lu pila ku yona i swana ni nako ya naa pila ku yona Nuwe. Jehova u tomile kale nako ya ka sinya lifasi le li maswe le, kono ha ku na mutu ya ziba “lizazi ni nako” fo i ka tela sinyeho yeo. (Mat. 24:36) Kacenu, Mulimu u lu file musebezi wa ku lemusa batu ni ku ba tusa ku ziba mo ba kona ku pulusezwa.

7. Kana Jehova u nga nako ye telele kuli a taleleze lisepiso za hae? Mu taluse.

⁷ Kaniti pilu-telele ya Jehova ha i talusi kuli u bata feela kuli ku fite nako. Mi ni kamuta ha lu swaneli ku nahana kuli Mulimu ha lu tokomeli kamba kuli ha na taba ni luna! Kono ku kona ku ba bunolo hahulu ku nahana cwalo ha lu nze lu supala ni ku kopana ni manyando a mwa lifasi le. Lu kana lwa zwafa kamba ku ikutwa kuli Mulimu u nga nako ye telele inze a sa talelezi  lisepiso za hae. (Maheb. 10:36) Lu zwelepili ku hupula kuli Mulimu u na ni mabaka a mande a boniseza pilu-telele ni kuli u itusisa nako ye siyezi ka nzila ye tusa batanga ba hae ba ba sepahala. (2 Pit. 2:3; 3:9) Ha lu nyakisiseñi mo Jesu naa likanyiselize pilu-telele ya Ndatahe.

JESU U TOMILE CWAÑI MUTALA O MUNDE WA KU BONISA PILU-TELELE?

8. Ki mwa miinelo mañi mo Jesu naa bonisize pilu-telele?

⁸ Jesu u sweli ku eza tato ya Mulimu mi u zwezipili ku eza cwalo ka lilimo ze ñata. Satani ha naa ipanguzi, Jehova naa atuzi kuli Mwanaa hae naa ka taha fa lifasi ni ku to ba Mesia. Mu nahane feela pilu-telele ya naa bonisize Jesu ha naa nze a libelela ka lilimo ze ñata-ñata kuli a tahe fa lifasi. (Mu bale Magalata 4:4.) Ka nako yeo, Jesu naa si ka ina feela ku si na za naa eza. Naa patehile ku eza musebezi wa naa mu file Ndatahe. Mi ha na tile fa lifasi, Jesu naa ziba kuli Satani ki yena ya naa ka tahisa lifu la hae sina mo ne ku polofitezwi. (Gen. 3:15; Mat. 16:21) Ka pilu-telele, Jesu naa utwisizwe butuku bo butuna bakeñisa kuli naa ziba kuli ne li tato ya Mulimu kuli a shwe ka nzila yeo. Jesu naa sa nahanangi feela za hae. Naa ikokobeza mi na itatela ku nyanda nihaike kuli naa li Mwanaa Mulimu. Jesu naa tomile mutala o munde hahulu wa ku sepahala ku Mulimu mi lu swanela ku mu likanyisa.—Maheb. 5:8, 9.

9, 10. (a) Jesu u zwezipili ku ezañi ha nze a libelela kuli Jehova a nge muhato? (b) Lu kona ku likanyisa cwañi mutala wa Jesu?

⁹ Jesu ha sa zusizwe kwa bafu, naa filwe maata kwa lihalimu ni fa lifasi. (Mat. 28:18) Jesu u zwezipili ku itusisa maata ao kuli a taleleze mulelo wa Jehova mi u zwezipili ku eza lika ka nako ya ketile Mulimu. Jesu naa libelezi ka pilu-telele ku la bulyo la Mulimu ku fitela ka silimo sa 1914, ili nako yeo Mulimu naa file Jesu maata fahalimu a lila za hae. (Samu 110:1, 2; Maheb. 10:12, 13) Hona cwale-cwale fa, Jesu u ka sinya lifasi la Satani. A si ka eza kale cwalo, Jesu ka pilu-telele u tusa bata ku lumelelwa ki Mulimu mi u ba libisa kwa “maweluwelu a mezi a bupilo.”—Sin. 7:17.

¹⁰ Kana mwa bona mo mu kona ku likanyiseza Jesu? Jesu naa ziba kuli Jehova naa tomile nako ya naa ka nga muhato. Ki niti kuli Jesu naa tabela ku eza za naa bata Ndatahe kuli a eze. Kono naa tabela ku libelela nako yeo Mulimu naa ka mu taluseza za ku eza. Ha lu nze lu libelela mafelelezo a lifasi le li maswe la Satani, kaufela luna lu tokwa ku ba ni pilu-telele. Lu swanela ku libelela kuli Mulimu a lu etelele ni ku lu tusa kuli lu si ke lwa zwafa. Lu kona ku ezañi kuli lu be ni pilu-telele ye cwalo?

NI KONA KU LIKANYISA CWAÑI PILU-TELELE YA MULIMU?

11. (a) Pilu-telele i swalisana cwañi ni tumelo? (b) Ki kabakalañi ha lu na ni mabaka a mande e lu swanela ku bela ni tumelo ye tiile?

¹¹ Pili Jesu a si ka taha kale fa lifasi, bapolofita ni batanga ba bañwi ba sepahala ne ba bonisize ka mupilelo wa bona kuli nihaiba batu ba ba si ka petahala ba kona ku ba ni pilu-telele. Kwandaa ku bonisa pilu-telele, Bakreste hape ne ba naa ni tumelo. (Mu bale Jakobo 5:10, 11.) Kambe kuli ne ba si na tumelo, kamba kambe ne ba sa lumeli luli za naa ba sepisize Jehova, ne ba si ke ba bonisa pilu-telele ili ku libelela kuli lisepiso za Mulimu li ka talelezwa. Kono hañata ne ba tiyelanga miinelo ye taata hahulu ni ye sabisa kakuli ne ba ni tumelo ya kuli Mulimu naa ka eza za naa sepisize. (Maheb. 11:13, 35-40) Bibele i bonisa kuli mane lu na ni mabaka a mañata e lu swanela ku bela ni tumelo ye tiile kacenu. Jesu u fetuhile “Mupetahalisi wa tumelo ya luna.” (Maheb. 12:2) Naa talelelize bupolofita bo buñata mi u lu tusize ku utwisisa hande milelo ya Mulimu.

12. Lu kona ku ezañi kuli lu tiise tumelo ya luna?

¹² Lu kona ku ezañi kuli lu tiise tumelo  ya luna ni ku ba ni pilu-telele hahulu? Nto ye ñwi ya butokwa ye kona ku lu tusa ki ku latelela litaelo za Mulimu. Ka mutala, mu nyakisise libaka ha mu swanela ku beya za Mubuso mwa sibaka sa pili. Kana mwa kona ku lika mo mu konela kuli mu latelele taelo ye kwa liñolo la Mateu 6:33? Mwendi mwa kona ku sebezanga nako ye ñata mwa bukombwa kamba ku nolofaza mupilelo wa mina. Jehova u fuyauzi kale buikatazo bwa mina bwa ku mamela litaelo za hae. Mwendi Jehova u mi tusize kuli mu fumane tuto ya Bibele ye nca kamba ku mi tusa ku amuhela “kozo ya Mulimu ye fita kutwisiso kaufela.” (Mu bale Mafilipi 4:7.) Ha mu nze mu isa hahulu pilu kwa limbuyoti zeo, mu ka lemuha kuli ki nto ye nde ku ba ni pilu-telele.—Samu 34:8.

13. Ki mutala ufi o lu bonisa mo tumelo ya luna i kona ku lu tuseza ku ba ni pilu-telele?

¹³ Mutala o latelela wa kona ku lu tusa ku utwisisa mo tumelo ya luna i kona ku lu tuseza ku ba ni pilu-telele. Mulimi wa calanga, ku tahulela, ni ku kutula. Nako kaufela mulimi ha banga ni kutulo ye nde, u banga ni buikolwiso bwa ku cala hape. Mane nako ye tatama wa kona ku cala lipeu mwa masimu a mañata. Mulimi u calanga peu ni ha ziba kuli u ka tokwa ku libelela fo i ka fitela nako ya kutulo. U banga ni sepo ya kuli u ka kutula. Ka nzila ye swana, ha lu ituta litaelo za Jehova, ku li latelela, ni ku fumana ze nde mwateñi, sepo ni tumelo ya luna ku Jehova li ka hula. Ku eza cwalo ku ka tahisa kuli lu kone ku ba ni pilu-telele ni ku libelela limbuyoti ze lu ziba kuli li ka taha.—Mu bale Jakobo 5:7, 8.

14, 15. Lu swanela ku nga cwañi manyando e ba kopana ni ona batu?

¹⁴ Nto ye ñwi ye kona ku lu tusa kuli lu be ni pilu-telele ki ku nga lifasi ni muinelo wa luna mwa li ngela Jehova. Ka mutala, mu nahane mwa ikutwela Jehova ka za manyando e ba kopana ni ona batu. Ka nako ye telele Jehova u boni batu inze ba nyanda mi nto yeo ya mu utwisa butuku. Kono ha si ka tuhelela butuku bwa utwa  kuli bu mu palelwise ku eza ze nde. Naa lumile Mwanaa hae “kuli a sinye misebezi ya Diabulosi” ni ku felisa butata kaufela bo Satani a tahiselize batu. (1 Joa. 3:8) Niti kikuli hona cwale-cwale fa, Mulimu u ka felisa manyando kaufela ku ya ku ile. Kamukwaocwalo, ha lu bati ku tuhelela bumaswe bwa mwa lifasi le kuli bu fokolise tumelo ya luna. Ha lu lati ku nahana kuli Jehova wa liyeha ku nga muhato. Haike lu be ni tumelo mwa lisepiso za Mulimu. Jehova u tomile nako luli fa ka feliseza bumaswe, mi luli u ka nga muhato ka nako yeo.—Isa. 46:13; Nah. 1:9.

¹⁵ Mwa linako za maungulelo ili ze taata ze, mwendi lu ka tokwa ku tiyela miinelo ye miñwi ye taata ye ka lika tumelo ya luna. Luna kamba balatiwa ba luna lwa kona ku nyanda bakeñisa mifilifili kamba lika ze ñwi. Mwa sibaka sa ku filikana, lu tokwa ku sepa Jehova ka ku tala. Ha lu si ka petahala ili nto ye tahisa kuli ku be taata ku eza cwalo. Kono mu hupule za naa ezize Jesu ze lu bala kwa liñolo la Mateu 26:39.—Mu bale.

16. Lu swanela ku ezañi ha lu nze lu libelela mafelelezo a lifasi le?

¹⁶ Mutu wa kona ku ba ni mubonelo o si ka luka haiba a kakanya kuli mafelelezo a lifasi le a fakaufi. Mutu yo u kona ku nahana kuli a eze lika li sili mwa bupilo ka ku nahana kuli mwendi lisepiso za Jehova ha li na ku talelezwa. Wa kona ku nahana kuli, ‘Ni ka libelela ni bone haiba Jehova u ka taleleza za sepisize.’ Mubonelo o si ka luka wo, u kona ku biseza taata mutu ya cwalo kuli a be ni pilu-telele. Bakeñisa ku eza cwalo, mutu yo a kana a bata ku ba ni libubo mwa lifasi le kamba ku nga kuli masheleñi a kona ku mu sileleza ni ku tuhela ku beya za Mubuso wa Mulimu mwa sibaka sa pili. Kamba u kona ku ikatulela ku ya kwa Yunivesiti ka mulelo wa kuli a pile bupilo bo bunde mwa lifasi le. Kono mutu ya eza cwalo u ka bonisa kuli ha na tumelo. Mu hupule kuli Paulusi naa lu bulelezi kuli lu swanela ku likanyisa batu be ne ba naa ni “tumelo ni pilu-telele” ili be ne ba amuhezi limbuyoti za naa ba sepisize Jehova bakeñisa tulemeno twa bona. (Maheb. 6:12) Jehova u tomile kale nako ya ka sinya lifasi le li maswe le, mi ha na ku liyeha. (Hab. 2:3) Pili nako yeo i si ka fita kale, lu swanela ku eza ze ñata ha lu nze lu sebeleza Jehova. Lu swanela ku hupula kuli lu pila mwa mazazi a maungulelo ni ku eza mo lu konela kaufela mwa musebezi wa ku kutaza. Musebezi wa ku kutaza wa kona ku lu fa tabo nihaiba mwa nako ya cwale.—Luka 21:36.

KI LIMBUYOTI MAÑI ZE TISWA KI KU BA NI PILU-TELELE?

17, 18. (a) Lu na ni kolo mañi ha lu nze lu libelela ka pilu-telele? (b) Lu ka amuhela limbuyoti mañi haiba lu bonisa pilu-telele?

¹⁷ Ku si na taba kuli lu sebelelize Jehova ka likweli li sikai kamba ka lilimo ze ñata, lu bata ku mu sebeleza ku ya ku ile. Ku ba ni pilu-telele ku ka lu tusa ku itiisa ku isa kwa mafelelezo ku si na taba kuli lu ka libelela ka nako ye kuma kai. Jehova cwale u lu fa kolo ya kuli lu bonise kuli lu sepile likatulo za hae ka ku tala ni kuli lu ka zwelapili ku sepahala ku yena ni ha lu kopana ni manyando. (1 Pit. 4:13, 14) Mulimu hape wa lu luta ili ku lu tusa kuli lu kone ku itiisa ka pilu-telele ku isa kwa mafelelezo ni kuli lu to punyuha.—1 Pit. 5:10.

¹⁸ Jesu u na ni maata mwa lihalimu ni fa lifasi, mi ha ku na nto ye kona ku mu palelwisa ku mi sileleza haiba mu zwelapili ku sepahala. (Joa. 10:28, 29) Ha lu swaneli ku saba ze ka ezahala kwapili kamba mane ku saba lifu. Ba ba ka itiisa ka pilu-telele ku isa kwa mafelelezo ba ka piliswa. Lu swanela ku bona teñi kuli ha lu tuheleli mubonelo wa lifasi ku kukueza mo lu nahanela ni ku lu tuhelisa ku sepa Jehova. Bakeñisa kuli Mulimu wa bonisa pilu-telele, lu swanela ku ikatulela ku tiisa tumelo ya luna ni ku itusisa nako ya luna ka butali.—Mat. 24:13; mu bale 2 Pitrosi 3:17, 18.

[Lipuzo za Tuto]

[Maswaniso a fa likepe 21]

Pilu-telele i ka mi tusa ku beya za Mubuso wa Mulimu mwa sibaka sa pili ni ku fumana limbuyoti!