Puonjri Bedo gi Horuok Kaka Mar Jehova Gi Yesu

“Parieuru kaka Ruodhwa hore mos, komiyou thuolo mondo uyud warruok.”​—2 PET. 3:​15, The Bible in Luo, 1976.

INYALO DWOKO NADE?

Jehova osenyiso nade ni en gi kido mar horuok?

Ang’o momiyo nochuno ni Yesu obed gi horuok kuom kinde malach?

Ang’o mwanyalo timo mondo wanyag kido mar horuok?

1. Jomoko mosetiyo ne Jehova kuom higini mang’eny jobedoga gi penjo mane?

NYAMINWA moro mosebedo katiyo ne Jehova kuom higini mogwaro kendo osenano e bwo tembe mathoth nopenjo niya, “Be giko nobi kapok atho?” Jomamoko bende mosetiyo ne Jehova kuom higini mang’eny bende osepenjore kamano. Wagombo neno kindego ma Nyasaye biro loko gik moko obed manyien, kogolonwa chandruoge ma wayudo sani. (Fwe. 21:5) Kata obedo ni wan gadier chuth ni piny ma Satan oteloeni chiegni rumo, nyalo bedo matek horuok mondo warit wane odiechieng’no kachopo.

2. Wabiro dwoko penjo mage e wi wach horuok?

² Kata kamano, Muma nyiso ni nyaka wabed gi kido mar horuok. Mana kaka jotich Nyasaye machon, wabiro yudo gigo ma ne Nyasaye osingo mana ka wan-gi yie motegno kendo wabedo gi horuok ka watimo kinda nyaka kindeno chopi. (Som Jo Hibrania 6:​11, 12.) Jehova wuon osebedo ka hore mos. Dikoro osetieko piny marachni, kata kamano pod orito timo mano e kinde mowinjore. (Rumi 9:​20-​24) Ang’o momiyo osebedo kohore kamano? Yesu osebedo nade gi horuok kaka mar Wuon mare, to ere kaka wanyalo luwo ranyisi mare? Gin gweth mage ma wayudo ka wanyago kido mar horuok kaka mar Nyasaye? Dwoko mag penjogi nyalo konyowa nyago kido mar horuok koda yie motegno, kata kapo ni seche moko wanyalo paro ni Jehova deko.

ANG’O MOMIYO JEHOVA OSEBEDO KA HORE?

3, 4. (a) Ang’o momiyo Jehova osenyiso horuok mondo ochop dwache ne piny? (b) Kane Adam gi Hawa oketho chik, Jehova ne otimo ang’o?

³ Nitie gimomiyo Jehova osebedo ka hore. En adier ni onge ng’ato ang’ata ma nigi teko e wi polo gi piny maloyo Jehova; to nikech ng’anyo ma ne otimore e puodho  mar Eden, pod nitie penjo moko madongo mapod ne onego odwoki mondo okony chuech modak e polo koda e pinyka. Jehova osebedo ka hore nikech ong’eyo ni ne dhi kawo kinde, mondo dwoko mag penjogo oyudre e yo makare chuth. To bende bedo ni ong’eyo e yo maber chuth timbe koda paro mag chuech duto manie polo gi piny, en adier ni gik motimo gin gik mabiro konyowa mana wan wawegi.​—Hib. 4:​13.

⁴ Dwaro mar Jehova ne en ni nyithind Adam gi Hawa opong’ piny. Kane Satan owuondo Hawa kae to Adam bende oketho chik Nyasaye, Nyasaye ok nojwang’o dwaro mare mokwongo. Nyasaye ok nobwok, ok nochako ng’ado paro korikni, kata timo piyopiyo mondo ojwang’ oganda dhano. Kar mano, gi kanyono, nochano yo machielo mar chopo dwaro mare ma noyudo oseketo ne dhano koda ne piny. (Isa. 55:11) To nikech Jehova osenyiso horuok maduong’ ahinya, onyalo chopo dwarone kendo nyiso ni loch mare e loch maberie moloyo duto. Oseyie rito kata kuom higini gana mang’eny mondo otim moko kuom gigo makonyo e chopo dwache e yo maber moloyo.

5. Horuok mar Jehova miyo wayudo gweth mage?

⁵ Gimachielo momiyo Jehova osebedo ka hore mos en ni mondo ji mang’eny obi oyud ngima mochwere. Gie sani, otimo chenro mondo ores “oganda mang’ongo.” (Fwe. 7:​9, 14; 14:6) Jehova chopo ne ji kokalo kuom tij lendo, kogwelogi mondo gibi gipuonjre e wi Pinyruodhe kendo ng’eyo chikene makare. Wach Pinyruoth, e “wach maber” chuth ma dhano nyalo winjo. (Math. 24:14) Ng’ato ka ng’ato ma Jehova ywayo ire, bedo jakanyo maloso kanyakla mar osiepe madier mohero luwo timbe makare. (Joh. 6:​44-​47) Nyasachwa ma jahera konyo joma kamago mondo obed osiepene. Bende osebedo koyiero dhano moko mondo obed jokanyo mag sirkal manie polo. Ka gin e polo, gibiro konyo dhano ma nodag e piny kaluwo chike Nyasaye, mondo gibed joma kare chuth kendo giyud ngima mochwere. Omiyo, nenore maler ni kata obedo ni Jehova osebedo ka hore, osebedo kotiyo mondo ochop singo mage. To magi duto otimo mondo bang’e wayud ber.

6. (a) Ere kaka Jehova nonyiso horuok e kinde Noa? (b) Ere kaka Jehova nyiso horuok e kindewagi?

⁶ Jehova pod hore mos kata obedo ni ji timo gik maricho machwanye ahinya, mana kaka ne otimo kane Ataro podi. Piny ne opong’ gi timbe anjawo kod gero, mi “chuny Jehova ne lit” nikech gik maricho ma ne dhano timo. (Chak. 6:​2-8) En adier ni ne ok odhi weyo mondo gik marichogo odhi nyime nyakachieng’, omiyo noramo ni nyaka okel Ataro ne dhano mochayo chik. “Ka Nyasaye ne pod ohore orito e ndalo mag Nowa,” notimo chenro mondo ores Noa gi joode. (1 Pet. 3:​20) E kinde mowinjore, Jehova nonyiso Noa gik mochano timo kendo nomiye migawo mar gero yie. (Chak. 6:​14-​22) E wi mano, “Nowa, jayal wach makare,” ne nyiso joma ne odak e kindego kuom kethruok ma ne Jehova chano kelo. (2 Pet. 2:5) Yesu nowacho ni kindewagi ne dhi chalo gi kinde Noa. Jehova oseketo kinde mobiro kethoe piny marachni. Onge dhano moro amora mong’eyo “chieng’no gi sano” ma giko nobie. (Math. 24:36) Gie sani wan gi tich ma Nyasaye osemiyowa mar miyo ji siem kendo nyisogi kaka ginyalo yudo warruok e kinde mabiro.

7. Be en adier ni Jehova deko kapok ochopo singone? Ler ane.

⁷ Horuok ma Jehova nyiso ok en ni koro obet korito mana mondo kinde okal. Kendo ok onego wapar ni ok ong’eyo chal mar ngimawa kata ni ok odewwa! Kata kamano, adiera en ni ok yot bedo gi paro machalo kamano kinde duto, to ahinya wuon sama wamedo bedo moti, kata wakalo e chandruoge moko e piny mopong’ gi richoni.  Chunywa nyalo nyosore kata wanyalo paro ni Nyasaye deko kapok ochopo singo mage. (Hib. 10:36) Wiyi kik wil ni nitie gimomiyo pod ohore kendo ni otiyo gi thuoloni e yo mabiro kelo ber ne jotichne duto. (2 Pet. 2:3; 3:9) Koro wane ane kaka Yesu bende nonyiso kido mar horuok.

YESU OSEKETO RANYISI MANE MABER MAR HORUOK?

8. Yesu nonyiso horuok e bwo chal mage?

⁸ Yesu timo dwaro mar Nyasaye kendo osebedo kotimo kamano kuom higini gana modhuro. Kane Satan ong’anyo, Jehova nong’ado ni Wuode ma miderma ne dhi biro e piny kaka Mesia. Par ane horuok ma Yesu nonyiso kane pod orito kuom higini alufe mondo kindego ochopi. (Som Jo Galatia 4:4.) E kindego, Yesu ne ok obet abeta ka onge gima otimo; kar mano, ne odich gi tije ma Wuon mare ne omiye. Gikone kane obiro e piny, nong’eyo ni nyaka to ne otho e lwet Satan, mana kaka nosekor. (Chak. 3:​15; Math. 16:21) Ne ohore sama otimo dwaro mar Nyasaye, kata obedo ni mano nokelone lit mang’eny e ringre. Ne omakore gi Nyasaye e okang’ mamalo chuth. Ne obolore kendo ne oikore kalo e chandruok kata obedo ni ne en Wuod Nyasaye. Wan bende onego waluw ranyisi ma ne oketono.​—Hib. 5:​8, 9.

9, 10. (a) Yesu osebedo ka timo ang’o korito Jehova mondo okaw okang’ mowinjore? (b) Ere kaka wanyalo nyiso ni wan gi chuny kaka ma ne Yesu nigo?

⁹ Bang’ chierne, ne omi Yesu teko e polo koda e piny. (Math. 28:18) Otiyo gi tekono e chopo dwaro mar Jehova kaluwore gi chenro ma Nyasaye oseketo. Yesu nobet e bad Nyasaye korachwich kohore mos nyaka nochopo higa mar 1914 kane oket wasike obed raten tiende. (Zab. 110:​1, 2; Hib. 10:​12, 13) Ochiegni kawo okang’ mar tieko piny ma Satan oteloeni. Sama pod orito, gie kindeni Yesu konyo ji mondo obed gi winjruok maber gi Nyasaye kendo tayogi e “pi ngima.”​—Fwe. 7:​17.

¹⁰ Kaluwore gi chuny ma Yesu ne nigo, be ineno kaka onego ine horuok mar Jehova? Onge kiawa ni Yesu ne oikore timo gimoro amora ma Wuon mare ne dwaro ni otim, to kata kamano, ne pod oikore mar rito Nyasaye ema mondo okaw okang’. Kapod warito giko mar piny ma Satan chikoni, waduto dwarore wabed gi horuok kaka mar Nyasaye, kik warikni timo gik ma Nyasaye pok ochiko kata weyo tiyone nikech chunywa onyosore. Ang’o mwanyalo timo mondo wabed gi kido mar horuok machalo kamano?

ERE KAKA ANYALO NYAGO KIDO MAR HORUOK?

11. (a) Yie otudore gi kido mar horuok e yo mane? (b) Gin gik mage mamiyo wabedo gi yie motegno?

¹¹ Kane pok Yesu obiro e piny, jonabi kod jotich Nyasaye moko ma nochung’ motegno noketo ranyisi kuom kaka dhano morem nyalo nano kanyiso horuok. Ne nitie tudruok achiel kachiel e kind yie kod horuok ma ne ginyiso, tiende ni kinda ma ne gitimo ka gihore. (Som Jakobo 5:​10, 11.) Ka dine bed ni gionge yie e wi gik ma Jehova nosingonegi, be dine girito ka gihore mos ka gitimo kinda mondo gine kaka Jehova chopo gik ma nosingo? Kinde ka kinde ne ginano gi kinda e bwo tembe mager, nikech ne gin gi yie ni kata tek kata yot, Nyasaye ne dhi chopo gigo ma nosesingo. (Hib. 11:13, 35-​40) Wan onego wabed gi yie motegno moloyo nikech sani wan gi Yesu ma en “jachop mar yiewa.” (Hib. 12:2) Ne ochopo weche ma nokor kendo nokonyowa ng’eyo e yo maber moloyo dwaro mag Nyasaye.

12. Ang’o ma wanyalo timo mondo wanyag kido mar horuok?

¹² Ang’o ma wanyalo timo mondo wamed tego yie marwa, mondo okonywa bedo  joma hore? Gimaduong’ chuth en luwo puonj ma Nyasaye miyowa. Kuom ranyisi, par ane gimomiyo onego iket Pinyruoth obed mokwongo e ngimani. Be inyalo medo kinda mari e tiyo gi puonj manie Mathayo 6:​33? Mano nyalo dwarore ni iti gi kinde momedore e tij lendo kata itim lokruok moko e chal mar ngimani mapile. Wiyi kik wil gi kaka Jehova osegwedho kinda mitimo e luwo puonj mochiwo. Nyalo bedo ni osekonyi ma ipuonjo ng’ato Muma kata okonyi mondo iyud “kuwe mar Nyasaye, modhierore ng’eyo.” (Som Jo Filipi 4:7.) Sama imedo paro kaka iseyudo kony kuom luwo puonj mag Jehova, ibiro neno kaka en gima ber nyago kido mar horuok.​—Zab. 34:8.

13. En ranyisi mane manyalo konyowa ng’eyo kaka wanyalo nyago yie kod horuok?

¹³ Ranyisi mar japur nyalo konyowa ng’eyo kaka yie marwa nyalo miyo wamed bedo joma hore. Japur chwoyo kodhi, odoyo kae to bang’e okeyo. Kinde duto ka japur okeyo maber, mano jiwe mondo ochuo kodhi kendo e higa maluwo. Onyalo kata medo chwoyo kodhi mang’eny kinde mabiro. Ochwoyo kodhi kata bed ni ong’eyo ni nyaka ohore mos nyaka chieng’ keyo chopi. En gi geno ni obiro keyo. Kamano bende sama wapuonjore chike Jehova ma waluwogi, kendo neno nyak maber mabetie, genowa koda yie ma wan-go kuom Jehova dongo. Kendo mano bedo tich mayot rito gweth ma wang’eyo ni biro.​—Som Jakobo 5:​7, 8.

14, 15. Onego wane nade chandruok ma dhano yudo?

¹⁴ Yo machielo mar nyago kido mar horuok en paro matut kaka onego wane piny ma wadakieni koda chal marwa. Tem neno gik moko kaka Jehova nenogi. Kuom ranyisi, par ane kaka Jehova winjo e chunye sama oneno dhano ka chandore. Kuom higini mang’eny, Jehova osebedo kaneno  kaka dhano chandore kendo mano osekelone lit mang’eny e chunye. Kata kamano pok oweyo mano mondo omone timo gik mabeyo. Ne ooro Wuode ma miderma “mondo oketh tich Satan” kendo ogol chandruoge duto ma Satan osekelo ne dhano. (1 Joh. 3:8) Adiera en ni Nyasaye chiegni tieko chandruoge duto nyakachieng’. Omiyo kik wawe gik maricho matimore e piny mondo onyos yiewa. Wadwaro bedo joma hore ka warito chieng’ ma Jehova biro kawoe okang’. Weuru wabed gi yie kuom singo mag Nyasaye. Jehova owuon oseng’ado kinde sie ma obiro tiekoe gik maricho, kendo ok obi deko e timo kamano.​—Isa. 46:13; Nah. 1:9.

¹⁵ E ndalogi mag giko ma ngima tekie, wanyalo romo gi chandruoge ma temo yiewa e yo makende. Kar bedo gi ich wang’ mokalo tong’ kapo ni otimnwa marach, kata ka ng’ama wahero yudo chandruok moro, dwarore wang’ad e chunywa mar geno kuom Jehova chuth. Wan joma orem, omiyo ok yot timo mano. Kata kamano ber paro gima Yesu notimo, mana kaka ondiki e Mathayo 26:39.​—Som.

16 Kapod warito mondo giko obi, gin gik mage maok owinjore watim?

¹⁶ Ng’at ma keto kiawa kabe giko mar pinyni chiegni, nyalo chako bedo gi paro marach. Onyalo chako paro ni dwarore obed gi chenro mamoko ma kapo ni Jehova ok ochopo singo mage, to oneno kaka dotim. Onyalo chako paro niya, ‘Abiro rito mondo ane ane kabe adier Jehova biro timo kaka nosingo.’ Onyalo chako dwaro bedo gi huma e pinyni, komanyo kaka obiro konyore mondo odag e ngima mayom kar keto Pinyruoth obed motelo. Kata onyalo ng’ado mar dhi e yunivasiti koparo ni sombeno biro konye mondo oyud ngima maber moloyo. Kata kamano, donge mago nyalo nyiso maler ni waonge gi yie? Par ni Paulo nojiwowa mondo wabed jogo maluwo ranyisi mar jotich Nyasaye ma noyudo gweth mag Jehova “kuom yie gi timo kinda” ka gi hore. (Hib. 6:​12) Jehova ok bi yie mondo piny marachni omed dhi nyime betie ka sa mar kethe ochopo kaluwore gi dwache. (Hab. 2:3) Kapod warito kindeno, nyaka wane ni ok wati ne Jehova gi chuny mandhem ndhem. Kar mano, onego wasik ka wang’eyo ni wadak e kinde mag giko, kendo watim duto mwanyalo e tij lando wach maber, ma e tich kende manyalo kelonwa mor e kindewagi.​—Luka 21:36.

BEDO GI HORUOK KELO GWETH MAGE?

17, 18. (a) Gin thuolo mage ma wan-go sama pod wahore ka warito giko mar pinyni? (b) Gin gweth mage mwabiro yudo ka wahore mos gie sani?

¹⁷ Kata bed ni wasetiyo ne Nyasaye kuom dweche matin kata kuom higini mang’eny, gima duong’ en ni wadwaro tiyone nyakachieng’. Horuok konyowa mondo wasik ka wanano mondo wayud warruok, kata bed ni giko mar pinyni chiegni kata bor maromo nade. Jehova sani miyowa thuolo mar nyiso kabe wabiro luwo paro mong’adonwa kendo ni wabiro makore kode kata bed ni wakalo e chandruok nikech nyinge. (1 Pet. 4:​13, 14) Nyasaye bende miyowa tiegruok manyalo konyowa mondo wanyis horuok ka wanano nyaka chieng’ wayud warruok.​—1 Pet. 5:​10.

¹⁸ Yesu nigi teko duto e polo koda e piny kendo onge ng’ama nyalo goloi kuome mak mana kiyiero iwuon mar timo kamano. (Joh. 10:28, 29) Onge tiende bedo gi luoro e wi gik mabiro timore ndalo mabiro, kata luoro tho. Jogo duto matimo kinda nyaka giko ema nokwo. Omiyo onego watem ahinya kik wawe pinyni owuondwa ma wawe keto genowa kuom Jehova. Kar mano onego wang’ad mar dhi nyime tego yiewa kendo tiyo gi kinde mapod odong’gi e yo maber.​—Math. 24:13; som 2 Petro 3:​17, 18.

[Penjo mag Puonjruok]

[Piche e ite mar 21]

Kido mar horuok biro konyi mondo iket pachi e timo dwaro mag Pinyruoth kendo yudo gweth!