Jehova Leh Isua Dawhtheihna Aṭangin Inzir Rawh
Jehova Leh Isua Dawhtheihna Aṭangin Inzir Rawh
“Kan Lalpa dawhtheihzia chu chhandamnaah ruat rawh u.”—2 PET. 3:15.
ENGTIN NGE KAN CHHAN ANG?
Engtin nge Jehova chuan a dawhtheihzia a lantîr?
Engvângin nge Isua chuan hun rei tak chhûng dawhtheihna a lantîr a ngaih?
Engtin nge Pathian dawhtheihna chu kan entawn theih ang?
1. Mi rinawm ṭhenkhat chuan eng nge an ngaihtuah?
KUM rei tak chhûng rinawm taka rawngbâwl a, harsatna tam tak lo pal tlang tawh unaunu pakhat chuan, “Ka thih hma hian tâwpna ka hmu hman ang em aw?” tiin inngaitlâwm takin a ngaihtuah a. Hun rei tak chhûng Jehova rawng lo bâwl tawh ṭhenkhat pawhin chutiang bawk chuan an ngaihtuah ve a ni. Tûna kan hmachhawn buainate Pathianin a tihbova, thil engkim a siam thar hun tûr chu kan nghâkhlel hle a ni. (Thup. 21:5) Setana khawvêl tâwp hun a hnai hle tawh tih rin nachhan tûr tam tak nei mah ila, dawhthei taka chu mi nî nghah chu a harsa hle thei a ni.
2. Pathian dawhtheihna ang neih chungchângah eng zawhnate nge kan ngaihtuah ang?
2 Mahse, Bible chuan dawhtheihna kan lantîr tûr a ni tih a sawi a. Pathian chhiahhlawh rinawm hmasate angin, rinna chak tak kan neih a, Pathian thutiamte thlen famkim hun tûr dawhthei taka kan nghah chuan chûng thutiamte chu kan dawng ang. (Hebrai 6:11, 12 chhiar rawh.) Jehova ngei pawh a dawhthei hle a. Suahsualnate hi engtik hunah pawh titâwp thei reng ni mahse, a hun dik tak chu a nghâk a ni. (Rom 9:20-24) Engvângin nge a dawhtheih êm êm? Engtin nge Isua chu Pathian dawhtheihna ang lantîrna kawngah entawn tûr ṭha tak a nih? Pathian dawhtheihna ang kan neih chuan eng hlâwknate nge kan dawn ang? Hêng zawhnate chhânna hian Jehova chu muang anga kan ngaih hun pawha dawhtheihna leh rinna chak tak nei tûrin min ṭanpui ang.
ENGVANGIN NGE JEHOVA’N DAWHTHEIHNA A LANTIR?
3, 4. (a) Engvângin nge Jehova chuan lei atâna a thiltum hlen chhuah nân dawhtheihna a lantîr? (b) Engtin nge Jehova chuan Eden huana helna chu a chhân lêt?
3 Jehova chuan dawhtheihna lantîr chhan ṭha tak a nei a ni. Ani chu englai pawha lei leh vâna thuneihna sâng ber neitu ni mah se, Eden huana helna chuan lei leh vâna zawhna pawimawh tak a tichhuak a. Chûng zawhnate sawisêlbova chhâng thei tûr chuan hun a ngai dâwn tih a hriat avângin Jehova chu a dawhthei a. Lei leh vâna mite thiltih leh rilru put hmang zawng zawng a hriat chian êm avângin, a thiltih rêng rêng chu kan tâna ṭha ber tûr hlîr a ni.—Heb. 4:13.
4 Adama leh Evi thlahte’n leilung an luah khah chu Jehova thiltum a ni a. Setana’n Evi leh a hnua Adama thuâwih lo tûra a thlêm tlûk khân Pathian chuan a thiltum chu a bânsan chuang lo. Ani chu a chiai lo va, hmanhmawh taka thutlûkna siamin emaw, a lutuka thil tiin emaw mihringte chungah a beidawnna a lantîr mai lo. Chutih a hnêkin, mihringte leh he Leilung tâna a thiltum hlen chhuah dân kawng a ruahman zâwk a ni. (Is. 55:11) Jehova chuan a thiltum tihhlawhtlin nân leh a lal chungnunna thiam chantîr nân insûm theihna leh dawhtheihna nasa tak a lantîr a. A thiltum ṭhenkhatte chu a ṭha thei ang bera hlen chhuah a nih theih nân kum sâng tam tak chhûng a nghâk hial a ni.
5. Jehova dawhtheihna chuan eng malsâwmna nge a awmtîr?
5 Jehova’n dawhthei taka a nghah chhan dang leh chu mi tam lehzualin chatuan nunna an hmuh theih nân a ni a. Tûnah hian, “mipui tam tak” chhandam an nih theih dân tûr ruahmanna a siam mêk a ni. (Thup. 7:9, 14; 14:6) Jehova chuan kan thu hrilh rawngbâwlna hmangin mite chu a Ram leh a tehna felte chungchâng zir tûrin a sâwm a. Lalram thuchah chu mihringte tâna chanchin awm thei azawnga “chanchin ṭha” ber a ni tak meuh a ni. (Mt. 24:14) Jehova’n a lama a hîp apiangte chu thil dik ngainatu ṭhian dik takte awmna, khawvêl pum huap kohhran zînga mi an lo ni a. (Joh. 6:44-47) Hmangaihna ngah tak kan Pathian chuan chûng mite chu a pawm hlawh ni tûrin a ṭanpui a ni. Ani chuan mihringte zîng aṭangin a vân lam sawrkâra mi ni tûrte pawh a thlang bawk a. Chûng mi rinawmte chuan an vân lam dinhmun an chelh hun chuan thuawi mihringte chu nun ṭha famkim leh chatuan daih nei tûrin an ṭanpui ang. Jehova chuan dawhthei taka a nghah lai pawh hian a thiltumte tithleng famkim tûrin hna a thawk reng a, chûng zawng zawng chu kan tâna ṭha tûr vek a ni tih a chiang hle a ni.
6. (a) Eng kawngin nge Jehova chuan Nova hun lai khân dawhtheihna a lantîr? (b) Engtin nge Jehova chuan kan hun laiah dawhtheihna a lantîr?
6 Jehova chu mite thiltih avângin thinur êm êm mah se a dawhthei hle a, chu chu Tuilêt hmaa mi suaksualte a dâwr dân aṭang khân kan hmu thei a ni. Chutih lai chuan leilung hi nungchang bawlhhlawhna leh tharum thawhnain a khat a, mihringte dinhmun chhe zêl chu Jehova’n “rilru nat nân” a hman phah a ni. (Gen. 6:2-8) Chu dinhmun chu dawh kumkhua a tum loh avângin, thuawih lo mihringte chungah tui a lêttîr ta a. “Nova dam laia . . . Pathian dawhtheihnain a nghah lai khân,” Jehova chuan Nova leh a chhûngte chhandamna tûrin ruahmanna a siam a ni. (1 Pet. 3:20) A hun takah, Jehova chuan Nova hnênah a thutlûkna siam chu a hriattîr a, lawng tuk tûrin a ti a ni. (Gen. 6:14-22) Chu bâkah, Nova chu “felna thu hriltu” a ni bawk a, a ṭhenawmte hnênah chhiatna lo thleng tûr chungchâng chu a puang chhuak a ni. (2 Pet. 2:5) Isua chuan kan hun lai hi Nova hun lai ang bawk a ni tih a sawi a. Jehova chuan he khawvêl suaksual tâwp hun tûr chu a rêl fel tawh a. A lo thlen “nî leh a hun” tûr erawh chu mihring tumahin an hre lo. (Mt. 24:36) Tûnah hian, mite hnêna vaukhânna pe tûr leh chhandam an nih theih dân hrilh tûra Pathian pêk hna chu kan nei a ni.
7. Jehova chu a thutiamte hlen chhuah kawngah a muangchâng em? Hrilhfiah rawh.
7 Jehova dawhtheihna tih awmzia chu hun kal liam tûra nghah mai mai hi a ni lo tih a chiang hle. A dawhtheihna hi min ngaihsak lohna emaw, min ngaihthahna emaw angah kan ngai ngai tûr a ni lo! Mahse, he khawvêl suaksual taka kan lo tar emaw, hrehawm kan tawrh emaw hian chutianga ngaih chu thil awl tak a ni a. Kan lunghnual emaw, Pathian chu a thutiamte hlen chhuah kawngah a muangchâng hle emaw niin kan ngai mai thei a ni. (Heb. 10:36) Pathian chuan dawhtheihna chhan ṭha tak a nei tih leh chu a dawhtheih hun chhûng chu a chhiahhlawh rinawmte hlâwkpui nân a hmang tih theihnghilh ngai suh ang che. (2 Pet. 2:3; 3:9) Tin, Isua’n Pathian dawhtheihna ang a lantîr dân pawh ngaihtuah bawk ang che.
ENGTIN NGE ISUA’N DAWHTHEIHNA KAWNGA ENTAWN TUR ṬHA A SIAM?
8. Eng dinhmun hnuaiahte nge Isua’n dawhtheihna a lantîr?
8 Isua chuan Pathian duhzâwng a ti a, kum sâng tam tak chhûng phûr takin a lo ti tawh a ni. Setana a hel khân, Jehova chuan a Fapa mal neih chhun chu Messia anga leia rawn tirh a titlu a. Isua tân chu mi awmzia chu han ngaihtuah teh—ani chuan chu hun a lo thlen nân kum sâng têl dawhthei taka a ngah a ngai a ni. (Galatia 4:4, 5 chhiar rawh.) Chu mi hun chhûng zawng chuan engmah ti lovin a nghâk ringawt lo va, a Pa hna pêk thawkin a buai hle zâwk a ni. A tâwpa leia a rawn kal chuan, hrilh lâwk a nih angin Setana kutah a thi dâwn tih a hria a. (Gen. 3:15; Mt. 16:21) Chu chuan hrehawm tawhna nasa tak thlen dâwn mah se, Pathian duhzâwng tihnaah dawhthei takin a intulût a. Rinawmna sâng ber a lantîr a ni. Ani chuan amah leh a nihna ringawt a ngaihtuah lo va, chu chu keinin kan lo hlâwkpui a ni.—Heb. 5:8, 9.
9, 10. (a) Isua chuan Jehova hma lâk hun tûr dawhthei taka a nghah laiin eng nge a tih? (b) Engtin nge Jehova hun ruat chu kan thlîr ang?
9 A thawhleh hnuah, Isua chuan lei leh vâna thuneihna a dawng a. (Mt. 28:18) Chu thuneihna chu Jehova hun ruat ang thlapin a thiltumte hlen chhuah nân a hmang a ni. Isua chuan a hmêlmate a kephah nghahchhana siam an nih hun tûr chu kum 1914 thlengin Pathian ding lamah dawhthei takin a nghâk a. (Sâm 110:1, 2; Heb. 10:12, 13) Nakin lawkah Setana khawvêl titâwp tûrin hma a rawn la dâwn a ni. Chu mi hma chuan, mite chu dawhthei taka thawhpuiin, ‘nunna tuikhurah’ a hruai a ni.—Thup. 7:17.
10 Isua entawn tûr siam aṭangin Jehova hun ruat kan thlîr dân tûr i hmu thiam em? Isua chuan a Pain ti tûra a duh apiang tih chu châk hle mah se, Pathian hun tiam nghah chu a inhuam tho a ni. Setana khawvêl suaksual tâwpna kan nghah mêk lai hian Pathian dawhtheihna ang kan neih ṭheuh a ngai a, Pathian kaihhruaina kan nghah zêl leh lunghnualna avânga kan tlâwm mai loh a ngai bawk. Chutianga Pathian dawhtheihna ang nei tûrin eng nge kan tih ang?
ENGTIN NGE PATHIAN DAWHTHEIHNA ANG KAN NEIH THEIH ANG?
11. (a) Eng kawngin nge rinna leh dawhtheihna chu a inzawm? (b) Engvângin nge rinna chak tak neih chhan tûr ṭha kan neih?
11 Isua leia a rawn kal hma khân, zâwlneite leh Pathian chhiahhlawh rinawm dangte chuan mihring ṭha famkim lote pawhin dawhthei taka an tawrh theih dân chungchângah entawn tûr an siam a. An rinna leh dawhtheihna neih chuan inzawmna a nei a ni. (Jakoba 5:10, 11 chhiar rawh.) Jehova’n an hnêna a hrilhte chu âwih tak tak lo ta se chuan—rinna nei lo se chuan—a thutiamte thlen famkimna chu dawhthei takin an nghâk ang em? Mahse, anni chuan Pathianin a thutiam angin thil a ti ngei ang tih ring tlatin, an rinna fiahna hlauhawm leh khirh tak takte chu an hmachhawn fo a ni. (Heb. 11:13, 35-40) Tûnah chuan, Isua chu ‘kan rinna tifamkimtu’ a nih tawh avângin, rinna nghet tak neih chhan tûr kan nei ṭha lehzual tawh a ni. (Heb. 12:2) Ani chuan hrilh lâwknate a tifamkim a, rinna neih chhan tûr ṭha tak min pe thei zâwngin Pathian thiltumte chu a hai lang a ni.
12. Kan rinna tihngheh nân eng nge kan tih theih?
12 Kan rinna tichak a, dawhtheihna nei lehzual tûrin eng hma lâkna ṭangkai tak nge kan neih theih? Thil pawimawh ber chu Pathian kaihhruaina zui hi a ni. Entîr nân, i nuna Lalram i dah hmasak ber chhante ngaihtuah ang che. Matthaia 6:33-a fuihna thute nunpui tûrin ṭan i la lehzual thei ang em? Chutianga ti tûr chuan rawngbâwlnaa hun tam zâwk hman emaw, i nun dân phung ṭhenkhat siamrem emaw a ngai mai thei a. Tûn thlenga i thawhrimna Jehova’n mal a sâwm dân pawh hmuh hmaih ngai suh ang che. Jehova chuan Bible zirpui thar nei tûr emaw, “Pathian thlamuanna, rilru rêng rênga hriat sên loh” dawng tûr emawin a ṭanpui che pawh a ni thei. (Philippi 4:7 chhiar rawh.) Chutianga Jehova kaihhruaina i zui aṭanga hlâwkna i hmuhte i chhût chuan, dawhtheihna chu i ngaihlu lehzual ang.—Sâm 34:8.
13. Rinna leh dawhtheihna neih chhoh dân kawng chu eng nên nge kan tehkhin theih?
13 Hei hi lo neituin thlai chi a theh a, a enkawl chho va, a rah a seng ṭhîn nên a inang a. Lo neitu chuan a rah a seng ṭhat apiangin, a kum leha thlai chi theh pawh a inringtâwk sawt ṭhîn. A rah seng hun tûr chu dawhthei taka a nghah ngai mahse, chi a theh loh phah chuang lo va; a rah a seng leh dâwn tih a rin tlat avângin, a hma aiin a theh tam zâwk hial pawh a ni thei a ni. Chutiang bawkin, Jehova fuihnate kan zir a, kan zawm a, a hlâwkna kan têl hian Jehova kan rinna a lo pung a. Chutianga kan rinna lo pun chuan malsâwmna lo thleng ngei tûr tih kan hriatte nghah chu a awlsam sawt ṭhîn a ni.—Jakoba 5:7, 8 chhiar rawh.
14, 15. Mihringte hrehawm tawrh chungchângah eng thlîr dân nge kan neih ngai?
14 Dawhtheihna neih theih dân kawng dang leh chu khawvêl leh mi mal dinhmun kan thlîr dân ngaihtuah hi a ni. Thil awmdân chu Jehova thlîr dân zâwnga thlîr tum rawh. Entîr nân, Jehova’n mihringte hrehawm tawrhna a thlîr dân chungchâng hi ngaihtuah teh. Ani chu kum rei tak chhûng mihringte hrehawm tawrhna avânga rilru na takin a awm tawh a; mahse, thil ṭha ti thei lo khawpa lungngaiin a awm lo. “Diabola hnathawhte a tihboral theih nân” leh Setana’n mihringte chunga chhiatna a thlen zawng zawngte a siamṭhat leh theih nân a fapa neih chhun a rawn tîr zâwk a ni. (1 Johana 3:8) Dik takin, hrehawm tawrhna chu hun engemaw chhûng chauh a ni a, chu mi tihreh nâna Pathian ruahmanna erawh chuan chatuan a daih ang. Chutiang bawkin, tûna Setana awpna suaksual tak avânga kun reng emaw, chu mi tâwpna hun nghâkhlel taka awm ai chuan chatuan daih tûr thil la hmuh theih lohte chungah chuan rinna i nghat zâwk ang u. Jehova chuan suahsualna tihbo nân hun ruat a nei a, a hun takah chuan a che mai dâwn a ni.—Is. 46:13; Nahum. 1:9.
15 He ni hnuhnûng hun khirh takte chhûng hian kan rinna fiahtu thil harsa takte kan tawng mai thei a. Tharum thawhna kan tuar emaw, kan hmangaihte’n hrehawm an tuar emaw a nih pawhin thinrim mai lo va Jehova chunga rinna nghah pumhlûm tlat kan tum zâwk a ngai a ni. Ṭha famkim lo kan nih avângin chutiang tih chu a awl lo ngei mai. Mahse, Matthaia 26:39-a chhinchhiah Isua thusawi hi hre chhuak leh ang che. —Chhiar rawh.
16. Tâwpna lo thlen hun kan nghah chhûng hian eng thil nge kan pumpelh ang?
16 Pathian dawhtheihna ang kan lantîrna dâl theitu thil pakhat chu a hun lo thleng phawt se tih rilru put hmang neih hi a ni. Chu chu eng nge a awmzia? Tâwpna a hnai tawh tih rinhlelhna neitu chuan Jehova thusawi anga thil a rawn thlen loh hlauh tâkah tiin ruahmanna engemaw a siam mai thei a ni. Kawng danga sawi chuan, ‘Jehova hian a thutiam a hlen tak tak leh tak tak loh kan en ang chu’ tiin a ngaihtuah thei a. He khawvêla hmingthan emaw, Pathian Ram dah hmasak aia sum leh pai lama ngelngheh zâwk emaw, a nih loh leh tûna nun nuam tak neih theih nâna zirna sâng neih pawh a tum mai thei a ni. Mahse, a nihna takah chuan chûngte chu rinna tlâkchhamzia târ lanna a ni zâwk a ni lo maw? Paula chuan “rinna leh nghah peihna,” a nih loh leh dawhtheihna avânga Jehova thutiamte dawngtu mi rinawmte entawn tûrin min fuih tih hre reng ang che. (Heb. 6:12) Jehova chuan he khawvêl suaksual tak hi ṭul a tih chin aia chhetêa rei a awm pawh a phal dâwn lo a ni. (Hab. 2:3) Chu mi hun kan nghah chhûng chuan, a hming chauhva Jehova rawngbâwltu kan ni tûr a ni lo. Chutih ahnêkin, kan harhvân leh tûn hun pawha lungawina tehkhin rual loh min petu chanchin ṭha hrilhnaa taima taka kan inhman a ṭûl a ni.—Lk. 21:36.
DAWHTHEIHNA CHUAN ENG MALSAWMNA NGE A THLEN?
17, 18. (a) Tûnah hian dawhtheihna chungchângah eng târ lanna hun remchâng nge kan neih? (b) Tûna dawhtheihna kan lantîr avâng hian eng malsâwmnate nge kan dawn ang?
17 Thla engemaw zât chauh Pathian rawng la bâwl emaw, kum tam tak bâwl tawh emaw pawh ni ila, kumkhuaa a rawngbâwl chu kan duh a ni. Eng anga rei pawh nghah la ngai mah se, dawhtheihna chuan chhandamna kan neih thlenga chhel tûrin min ṭanpui thei a ni. Tûnah hian Jehova chuan a thutlûkna siama rinna lantîr a, a ṭûl a nih chuan a hming avânga hrehawm tawrh pawh kan inhuamzia târ lan theihna hun remchâng min pe a. (1 Pet. 4:13, 14) Chhandamna neih theih nâna thil mamawh dawhtheihna nei tûra min ṭanpui thei zirtîrna pawh min pe bawk a ni.—1 Pet. 5:10.
18 Isua chuan lei leh vâna thuneihna zawng zawng a chang a, rinawm taka i awm phawt chuan engmahin a vênhimna ata a la sawn thei lo che a ni. (Joh. 10:28, 29) Chuvângin, thihna hial pawh tiamin, hma lama hun engmah i hlauh a ngai lo. A tâwp thlenga rinawm apiang chu chhandamin an awm ang. Chuvângin, he khawvêl buma awm a, Jehova rinna bânsan chu kan duh tûr a ni lo. Chutih ahnêkin, rinnaa ṭhan chhoh zêl a, Pathian dawhtheihna hun hman ṭangkai chu kan tum tlat zâwk tûr a ni.—Mt. 24:13; 2 Petera 3:17, 18 chhiar rawh. (w12-E 09/15)
[Zirlai Atâna Zawhnate]
[Phêk 21-naa milem]
Pathian dawhtheihna ang neihna chuan Lalram hmakhua ngaihtuah a, a hlâwkna têl tûrin a ṭanpui ang che!
